1. Ɛbɛ yɔɔ Yesu sɩm yɔɔ tɔzʋʋ sɔnzɩ wiye kɛnɩ evemiye nɖɩ ɖɩ-tɔm kɩlɩ cɛyʋʋ pɩnaɣ taa yɔ? (Luka 22:​19, 20)

 YEHOWA sɛyaa ɛsɩndaa lɛ, Krɩstʋ sɩm yɔɔ tɔzʋʋ sɔnzɩ kɛ evemiye nɖɩ ɖɩ-tɔm kɩlɩ cɛyʋʋ pɩnaɣ taa yɔ. Sɔnzɩ nzɩ si-ɖeke Yesu ɖʋ ɛ-tɔmkpɛlɩkɩyaa paɣtʋ kpayɩ se palakɩ. (Kalɩ Luka 22:​19, 20.) Lɩmaɣza sakɩyɛ yɔɔ lɛ, ɖɩɖaŋ Yesu sɩm yɔɔ tɔzʋʋ sɔnzɩ kpam. Iyele nɛ ɖɩna lɩmaɣza ana a-taa naayɛ.

2. Lɩmaɣza wena a-yɔɔ ɖɩɖaŋɩɣ Yesu sɩm yɔɔ tɔzʋʋ sɔnzɩ kpam yɔ, a-taa naayɛ lɛ wena?

² Yesu sɩm yɔɔ tɔzʋʋ sɔnzɩ sɩɣnɩ-ɖʋ se ɖɩmaɣzɩ nɛ ɖɩna ɛzɩma kɩhɛyʋʋ pʋ-ñʋʋ taa kɩlaʋ tɔm cɛyɩ siŋŋ nɛ ɛzɩma kɩwazɩɣ-ɖʋ yɔ. Sɩtɔzʋʋ-ɖʋ nʋmɔŋ weyi ɩ-yɔɔ ɖɩpɩzɩɣ nɛ ɖɩtɩŋna nɛ ɖɩlɩzɩ ɖɛ-ɛsɩmɩyɛ nɛ ɖɩwɩlɩ Yesu kɩlaʋ yɔɔ yɔ. (2 Kɔr. 5:​14, 15) Sɩhaɣ-ɖʋ ɖɔɖɔ waɖɛ se ɖa nɛ ɖo-koobiya «ɖɩkpazɩ ɖama ɖoŋ.» (Roma 1:12) Paa pɩnaɣ ŋga, ɖo-koobiya mba pɛhɛ fezuu taa yɔ pa-taa sakɩyɛ woki sɔnzɩ nzɩ sɩ-taa. Halɩ piseɣtiɣ pa-taa nabɛyɛ se papɩsɩ Yehowa cɔlɔ, mbʋ pʋyɔɔ yɔ pamʋ-wɛ nɛ sɔɔlɩm sɔnzɩ nzɩ si-wiye. Nɛ ɛyaa mba toovenim tɔm kɛdɩnɩ-wɛ yɔ, mbʋ panaɣ nɛ tɔm ndʋ panɩɣ puwiye yɔ, piseɣtiɣ-wɛ se papaɣzɩ Bibl kpɛlɩkʋʋ. Pɩtʋʋ fɛyɩ se pɩtɩŋa payɩ mbʋ yɔ, piyeki nɛ Yesu sɩm yɔɔ tɔzʋʋ sɔnzɩ wɛɣ ŋgee siŋŋ ɖɛ-ɛsɩndaa!

3. Ɛzɩma tɩyɛ Yesu sɩm yɔɔ tɔzʋʋ sɔnzɩ yeki se nɔɔ kʋɖʋmaɣ ɛwɛɛ ɖa nɛ ɖo-koobiya ɖɛ-hɛkʋ taa ɛjaɖɛ kpeekpe yɔɔ? (Cɔnɩ ɖɔɖɔ kɩlɛmʋʋ.)

³ Maɣzɩ ɖɔɖɔ nɛ ŋna ɛzɩma Yesu sɩm yɔɔ tɔzʋʋ sɔnzɩ yeki se nɔɔ kʋɖʋmaɣ ɛwɛɛ ɖa nɛ ɖo-koobiya ɖɛ-hɛkʋ taa ɛjaɖɛ kpeekpe yɔɔ yɔ. Ɛjaɖɛ hɔɔlɩŋ kpeekpe taa, wɩsɩ ɖʋʋ nɛ pɩtɛ lɛ, Yehowa Aseɣɖe Tɩnaa kpeɣliɣ se pala sɔnzɩ nzɩ. Ða-tɩŋa payɩ ɖiwelisiɣ samaɣ taa tɔm natʋyʋ, nɛ tɩñɩkɩɣ niye ɛzɩma kɩhɛyʋʋ pʋ-ñʋʋ taa kɩlaʋ tɔm cɛyɩ kpem yɔ pɩ-yɔɔ. Ðiteɣ samtʋ hendu tam  nabʋlɛ, pɔcɔʋnɩ ɖɔɖɔ kpɔnɔ nɛ vɛɛ; pɩtasɩ lɛ palakɩ adɩma 4 nɛ ɖɩlakɩ «amɛn» nɛ ɖa-laŋɩyɛ pilim. Ñɩɣtʋ 24 kaatɛŋ lɛ, ɛjaɖɛ kpeekpe yɔɔ agbaa tɩŋa ɖɔm ɖʋtʋ kʋɖʋmtʋ ndʋ tɩ-yɔɔ. Maɣzɩ nɛ ŋna ɛzɩma Yehowa nɛ Yesu pa-taa lakɩ leleŋ siŋŋ alɩwaatʋ ndʋ panaɣ ɖa-tɩŋa ɖikpeɣlaa nɛ ɖɩɖʋʋ-wɛ hɩɖɛ nɔɔ kʋɖʋmaɣ taa mbʋ yɔ.

4. Ɛbɛ tɔm ɖɩkaɣ yɔɔdʋʋ tɔm ñʋʋ kʋnɛ kɩ-taa?

⁴ Tɔm ñʋʋ kʋnɛ kɩ-taa ɖɩkaɣ cosuu tɔm pɔzʋʋ pʋnɛ pɩ-yɔɔ: Ɛzɩma ɖɩpɩzɩɣ nɛ ɖɩñɔɔzɩ ɖa-laŋa nɛ ɖɩɖaŋ Yesu sɩm yɔɔ tɔzʋʋ sɔnzɩ? Ɛzɩma ɖɩpɩzɩɣ nɛ ɖɩsɩnɩ ɛyaa lalaa nɛ sɔnzɩ nzɩ sɩwazɩ-wɛ? Nɛ ɛzɩma ɖɩpɩzɩɣ nɛ ɖɩsɩnɩ ɖo-koobiya mba pɛhɛ fezuu taa yɔ? Tɔm pɔzʋʋ mbʋ pɩ-yɔɔ cosuu kaɣ-ɖʋ sɩnʋʋ nɛ ɖɩñɔɔzɩ ɖa-tɩ nɛ ɖɩɖaŋ ŋgee sɔnzɩ nzɩ.

ƐZƖMA ÐƖPƖZƖƔ NƐ ÐƖÑƆƆZƖ ÐA-LAŊA NƐ ÐƖÐAŊ YESU SƖM YƆƆ TƆZƲƲ SƆNZƖ?

5. (a) Ɛbɛ yɔɔ pɩpɔzʋʋ se ɖɩmaɣzɩ ɛzɩma kɩhɛyʋʋ pʋ-ñʋʋ taa kɩlaʋ mʋ ñɩm yɔ pɩ-yɔɔ? (Keɣa 49:​7, 8) (b) Ɛbɛ ŋkpɛlɩkɩ Ɛbɛ yɔɔ Yesu sɩba? tɛ video taa?

⁵ Nʋmɔŋ kɩbaŋ weyi ɩ-yɔɔ ɖɩpɩzɩɣ ɖɩtɩŋna nɛ ɖɩñɔɔzɩ ɖa-laŋa nɛ ɖɩɖaŋ Yesu sɩm yɔɔ tɔzʋʋ sɔnzɩ yɔ, ɩ-taa nakʋyʋ lɛ se ɖɩmaɣzɩɣ ɛzɩma Yesu Krɩstʋ kɩhɛyʋʋ pʋ-ñʋʋ taa kɩlaʋ mʋ ñɩm yɔ pɩ-yɔɔ. Ða-mamaɣ ɖɩtaapɩzɩɣ kpa se ɖiholi ɖa-tɩ kɩwɛɛkɩm nɛ sɩm nesi tɛɛ. (Kalɩ Keɣa 49:​7, 8; cɔnɩ ɖɔɖɔ video Ɛbɛ yɔɔ Yesu sɩba?) a Pʋyɔɔ paa pɩtaawɛɛ Yehowa nɛ Yesu kɛlɛʋ yɔ, Yehowa labɩ ɖʋtʋ se ɛ-Pɩyalʋ kʋsɔɔlʋ Yesu ɛlaa e-wezuu ɖɔ-yɔɔ. (Roma 6:23) Ye ɖɩkpakɩɣ alɩwaatʋ nɛ ɖɩmaɣzɩɣ mbʋ Yehowa nɛ Yesu palabɩ-ɖʋ yɔ pɩ-yɔɔ nɛ pɩkɩlɩɣ yɔ, pɩsɩɣnɩ-ɖʋ nɛ ɖɩwɛɛnɩ ɛsɩmɩyɛ kɩhɛyʋʋ pʋ-ñʋʋ taa kɩlaʋ yɔɔ nɛ pɩkɩlɩ. Ðɩkaɣ naʋ mbʋ Yehowa nɛ Yesu petisi faaa se palabɩ-ɖʋ paa pɩtaawɛɛ kɛlɛʋ yɔ pɩ-taa nabʋyʋ. Ɛlɛ kajalaɣ lɛ, ɛbɛ kɩhɛyʋʋ pʋ-ñʋʋ taa kɛnaa?

6. Ɛbɛ kɩhɛyʋʋ pʋ-ñʋʋ taa kɛnaa?

⁶ Kɩhɛyʋʋ pʋ-ñʋʋ taa kɛ mbʋ pɛhɛyɩɣ se paya nabʋyʋ ñʋʋ yɔ. Alɩwaatʋ ndʋ palabɩ kajalaɣ abalʋ Aɖam yɔ, ɛɛtalɩ pilim. Ɛlabɩ kɩwɛɛkɩm lɛ, pɩtɩkɛ e-ɖeke elesini wezuu maatɛŋ lidaʋ ŋgʋ ɛɛwɛna yɔ, ɛlɛ eyeba ɖɔɖɔ nɛ e-piya tɩŋa lesi lidaʋ ŋgʋ. Pɩsa nɛ paya mbʋ Aɖam lesaa yɔ lɛ, Yesu cɛlɩ ɛ-maɣmaɣ e-wezuu ŋgʋ kɩtalɩ pilim yɔ se pɩkɛnɩ kɩlaʋ. Alɩwaatʋ ndʋ Yesu kaacaɣ wezuu tɛtʋ yɔɔ yɔ, «ɛtɩla kɩwɛɛkɩm nabʋyʋ, nɛ patɩna ɖɔɖɔ cɛtɩm tɔm natʋyʋ ɛ-nɔɔ taa.» (1 Pɩy. 2:22) Alɩwaatʋ ndʋ Yesu sɩba yɔ, e-wezuu pilim ñɩŋgʋ kaamʋnɩ wezuu ŋgʋ Aɖam lesaa yɔ ɖeyi ɖeyi.—1 Kɔr. 15:45; 1 Tim. 2:6.

7. Alɩwaatʋ ndʋ Yesu kaawɛ tɛtʋ yɔɔ yɔ, takɩm mbʋ ɛɛkataa?

⁷ Alɩwaatʋ ndʋ Yesu kaawɛ tɛtʋ yɔɔ yɔ, paa ɛɛkatɩ takɩm sakɩyɛ yɔ, ɛñam ɛ-Caa weyi ɛwɛ ɛsɔdaa yɔ pɩtɩŋa pɩ-taa. Palʋlɩ Yesu lɛ, ɛɛkɛ pɩɣa ŋga katalɩ pilim yɔ nɛ ɛ-lʋlɩyaa taatalɩ pilim; paa mbʋ yɔ, eluzi ɛ-tɩ pɛ-tɛɛ. (Luka 2:51) Ɛkɔm nɛ ɛpɩsɩ pɩɣa evelaɣ lɛ, pɩɩwɛɛ se ɛlʋbɩnɩ wɛtʋ ndʋ payɩ tiyekaɣ se ɛtaawɛɛnɩ ñamtʋ yaa ɛtaaɖɔkɩ e-siɣsiɣ wɛtʋ yɔ. Nɛ Yesu kɔm nɛ ɛpɩsɩ ɛyʋ sɔsɔ lɛ, pɩɩwɛɛ se ɛkaɖɩnɩ Eleeu; ɛlɛ kaatakɩ-ɩ se pɩsa nɛ ɛla kɩwɛɛkɩm, halɩ eheyi Yesu kpayɩ se ɛtaaɖɔkɩ e-siɣsiɣ wɛtʋ Ɛsɔ ɛsɩndaa. (Mat. 4:​1-11) Sataŋ kaatɛm ɛ-taa se ɛlakɩ nɛ Yesu la kɩwɛɛkɩm nɛ pɩsa nɛ ɛtaapɩzɩ ɛhɛyɩ kɩhɛyʋʋ pʋ-ñʋʋ taa.

8. Takɩm mbʋ ɖɔɖɔ Yesu tasɩ katʋʋ?

⁸ Alɩwaatʋ ndʋ Yesu lakaɣ ɛ-Ɛsɔ sɛtʋ tʋmɩyɛ tɛtʋ yɔɔ yɔ, ɛɛɖɔkɩ ɛ-laŋɩyɛ takɩm lɛɛbʋ taa. E-koyindinaa kaanazɩ-ɩ nɛ pañɩnaɣ se pakʋ-ɩ. (Luka 4:​28, 29; 13:31) Ɛ-wayɩ tɩŋɩyaa taatalɩ pilim nɛ pʋyɔɔ lɛ, pɩɩwɛɛ se ɛɖɔkɩ ɛ-laŋɩyɛ nɛ ɛlʋbɩnɩ pɛ-ɛjandʋ. (Mark. 9:​33, 34) Alɩwaatʋ ndʋ paakpa-ɩ nɛ pahʋʋnɩ-ɩ tɔm yɔ, paawɩlɩ-ɩ ñaŋ siŋŋ nɛ pohoŋi-i. Pʋwayɩ lɛ, pakʋ-ɩ ɛzɩ kɩwɛɛkɩm laɖʋ sɔsɔ nɔɔyʋ yɔ nɛ  ɛnɩɩ siziŋ siŋŋ. (Ebr. 12:​1-3) E-wezuu caɣʋ kɛdɛzaɣ alɩwaatʋ taa, ɛɛlʋbɩ e-ɖeke mbʋ pʋyɔɔ yɔ Yehowa kaayebi ɛ-yɔɔ kandɩyʋʋ. b—Mat. 27:46.

9. Alɩwaatʋ ndʋ ɖɩmaɣzɩɣ Yesu kɩlaʋ yɔɔ yɔ, ɛzɩma pɩlakɩ-ɖʋ? (1 Pɩyɛɛrɩ 1:8)

⁹ Pɩnaɣ kpayɩ kpayɩ se Yesu labɩ kʋñɔŋ siŋŋ se pɩsa nɛ ɛhɛyɩ kɩhɛyʋʋ pʋ-ñʋʋ taa. Alɩwaatʋ ndʋ ɖɩmaɣzɩɣ kɩlaŋ weyi payɩ Yesu tisi faaa nɛ ɛlaa ɖɔ-yɔɔ yɔ ɩ-yɔɔ yɔ, piseɣtiɣ-ɖʋ se ɖɩsɔɔlɩ-ɩ siŋŋ nɛ pɩkɩlɩ.—Kalɩ 1 Pɩyɛɛrɩ 1:8.

10. Kɩlaŋ weyi Yehowa tisi faaa nɛ ɛlaa se pɩsa nɛ Yesu hɛyɩ kɩhɛyʋʋ pʋ-ñʋʋ taa?

¹⁰ Nɛ Yehowa yɔ? Kɩlaŋ weyi etisi faaa nɛ ɛlaa se pɩsa nɛ Yesu hɛyɩ kɩhɛyʋʋ pʋ-ñʋʋ taa? Taabalɩyɛ kɩbanɖɛ kaawɛ Yehowa nɛ Yesu pɛ-hɛkʋ taa ɛzɩ taabalɩyɛ kɩbanɖɛ wɛʋ caja nɛ ɛ-pɩyalʋ pɛ-hɛkʋ taa yɔ. (Adu. 8:30) Maɣzɩ nɛ ŋna ɛzɩma pɩɩlabɩ Yehowa alɩwaatʋ ndʋ Yesu kaawɛɛ nɛ ɛtɔkɩ kʋñɔmɩŋ sakɩyɛ tɛtʋ yɔɔ yɔ. Pɩtʋʋ fɛyɩ se Yehowa kaanɩ siziŋ siŋŋ alɩwaatʋ ndʋ palabɩ ɛ-Pɩyalʋ kañatʋ, pɔlɔ-ɩ nɛ patakɩ-ɩ yɔ.

11. Tɩŋnɩ kɩɖaʋ nakʋyʋ yɔɔ nɛ ŋwɩlɩ ɛzɩma pɩɩlabɩ Yehowa alɩwaatʋ ndʋ pakʋwaɣ Yesu yɔ.

¹¹ Lʋlɩyaa mba pa-pɩɣa nakɛyɛ tɛm sɩbʋ nɛ pana yɔ, panɩɣ laŋwɛɛkɩyɛ nɖɩ ɖɩ-taa Yehowa kaawɛɛ yɔ ɖɩ-taa camɩyɛ nɛ pɩkɩlɩ. Ðɩwɛnɩ tisuu siŋŋ se pakaɣ fezuu sɩɖaa, paa mbʋ yɔ alɩwaatʋ ndʋ ɖɛ-ɛyʋ kʋsɔɔlʋ nɔɔyʋ sɩkɩ yɔ, ɖɩnɩɣ siziŋ siŋŋ. Kɩɖaʋ kʋnɛ, kɩsɩɣnɩ-ɖʋ se ɖɩna ɛzɩma pɩɩlabɩ Yehowa alɩwaatʋ ndʋ ɛɛwɛɛ nɛ ɛnaɣ ɛ-Pɩyalʋ wɛɛ nɛ ɛtɔkɩ kʋñɔŋ nɛ ɛkɔɔ ɛsɩ pɩnaɣ 33 taa yɔ. c—Mat. 3:17.

12. Kpaɣnɩ lɛɛlɛɛyɔ nɛ pɩtalɩ Yesu sɩm yɔɔ tɔzʋʋ sɔnzɩ wiye lɛ, ɛbɛ ɖɩpɩzɩɣ nɛ ɖɩla?

¹² Kpaɣnɩ lɛɛlɛɛyɔ nɛ pɩtalɩ Yesu sɩm yɔɔ tɔzʋʋ sɔnzɩ wiye lɛ, ɩñaɣ pana nɛ ɩkpɛlɩkɩ kɩhɛyʋʋ pʋ-ñʋʋ taa tɔm mɩ-tɩ yɔɔ kpɛlɩkʋʋ yaa mɩ-hɔʋ taa Ɛsɔ sɛtʋ alɩwaatʋ taa nɛ pɩkɩlɩ. Ɩlabɩnɩ tʋmɩyɛ Guide de recherche pour les Témoins de Jéhovah (ye kɩwɛ mɩ-kʋnʋŋ taa yɔ) yaa Bibl kpɛlɩkʋʋ wondu lɛɛtʋ nɛ ɩtazɩ kɩhɛyʋʋ pʋ-ñʋʋ taa tɔm taa nɛ pɩkɩlɩ. d Pɩtasɩ lɛ, ɩñaɣ pana nɛ ɩtɩŋɩɣ Yesu sɩm yɔɔ tɔzʋʋ sɔnzɩ Bibl kalʋʋ ɖʋtʋ ndʋ paɖʋ Ðe-wezuu caɣʋ nɛ ɖɛ-Ɛsɔ sɛtʋ tʋmɩyɛ—Kpɛlɩkʋʋ takayaɣ taa yɔ. Nɛ Yesu sɩm yɔɔ tɔzʋʋ sɔnzɩ wiye, ɩñaɣ pana ɖɔɖɔ nɛ ɩcɔnɩ ŋgee tanaŋ tɛɛ Ɛsɔ sɛtʋ tɛ video. Ye ɖɩñɔɔzʋʋ ɖa-laŋa se ɖɩɖaŋ Yesu sɩm yɔɔ tɔzʋʋ sɔnzɩ yɔ, ɖɩkaɣ pɩzʋʋ nɛ ɖɩsɩnɩ ɛyaa lalaa se sɔnzɩ nzɩ, sɩwazɩ-wɛ ɖɔɖɔ.—Ɛsd. 7:10.

 SƖNƖ ƐYAA LALAA NƐ SƆNZƖ NZƖ SƖWAZƖ-WƐ

13. Pɩsa nɛ ɖɩsɩnɩ ɛyaa lalaa nɛ Yesu sɩm yɔɔ tɔzʋʋ sɔnzɩ wazɩ-wɛ lɛ, ɛbɛ pɩwɛɛ se ɖɩcalɩ labʋ?

¹³ Ɛzɩma ɖɩpɩzɩɣ nɛ ɖɩsɩnɩ ɛyaa lalaa nɛ Yesu sɩm yɔɔ tɔzʋʋ sɔnzɩ wazɩ-wɛ? Kajalaɣ lɛ, pɩwɛɛ se ɖɩyaa-wɛ nɛ pɔkɔɔ sɔnzɩ nzɩ sɩ-taa. Pɩtasɩnɩ ɛyaa mba ɖɩkatɩɣ ɖɔ-tɔm susuu taa ɖoŋ ɖoŋ yɔ lɛ, ɖɩpɩzɩɣ nɛ ɖɩma ɛyaa mba ɖɩsɩm-wɛ yɔ pa-hɩla nɛ ɖɩyaa-wɛ ɖɔɖɔ se pɔkɔɔ sɔnzɩ nzɩ sɩ-taa. Ɛyaa mba, papɩzɩɣ nɛ pɛkɛ ɖɔ-hɔʋ taa mba, ɖa-tʋmɩyɛ taa taabalaa, ɖo-sukuli taa taabalaa nɛ ɛyaa lalaa mba ɖɩsɩm-wɛ yɔ. Halɩ paa ɖɩfɛyɩnɩ yaʋ takayɩsɩ maɣmaɣ sakɩyɛ yɔ, ɖɩpɩzɩɣ nɛ ɖitiyini-wɛ lien ŋgʋ kiwokini-wɛ elɛkɩtroniiki ñɩŋga yɔɔ yɔ. Halɩ pɩɖɩɣzɩɣ-ɖʋ se ɛyaa sakɩyɛ pɩzɩɣ petisi nɛ pɔkɔɔ.—Ekl. 11:6.

14. Ha kɩɖaʋ ŋgʋ kɩwɩlɩɣ se ye ɖɩya nɔɔyʋ se ɛkɔɔ Yesu sɩm yɔɔ tɔzʋʋ sɔnzɩ taa yɔ, pɩpɩzɩɣ nɛ pɩlʋlɩ pee kɩbana yɔ.

¹⁴ Ye ŋya nɔɔyʋ se ɛkɔɔ Yesu sɩm yɔɔ tɔzʋʋ sɔnzɩ taa yɔ, pɩtɩla ɛkaɣ sɔɔlʋʋ siŋŋ se ɛkɔɔ. Kɩyakʋ nakʋyʋ, pɩɖɩɣzɩ koobu halɩñɩnʋ nɔɔyʋ alɩwaatʋ ndʋ ɛ-walʋ heyi-i nɛ taa leleŋ se ɛwɛɛ nɛ ɛlakɩ ɖʋtʋ se ɛ nɛ ɩ powolo Yesu sɩm yɔɔ tɔzʋʋ sɔnzɩ taa yɔ; ɛ-walʋ ɛnʋ ɛtɩkɛ Yehowa Aseɣɖe Tʋ. Ɛbɛ yɔɔ pɩɩɖɩɣzɩ koobu halɩñɩnʋ ɛnʋ? Mbʋ pʋyɔɔ yɔ, pɩnzɩ nzɩ sɩɖɛwa yɔ, ɛɛya-ɩ tam sakɩyɛ se ɛ nɛ ɩ powolo, ɛlɛ wiɖiyi etiwolo. Lɛɛlɛɛyɔ ɛbɛ lɛɣzaa yɔ? Ɛ-walʋ yɔɔdaa se: «Paha-m yaʋ takayaɣ.» Nɛ ɛlɩzɩ pɩ-taa se e-egeetiye taa ɛzʋtʋyʋ nɔɔyʋ kaahanɩ-ɩ kɛ, ɛɛsɩmɩ-ɩ camɩyɛ. Koobu halɩñɩnʋ ɛnʋ, ɛ-walʋ wobi sɔnzɩ nzɩ sɩ-taa pɩnaɣ ŋga nɛ pɩnzɩ lɛɛsɩ sakɩyɛ nzɩ sɩtɩŋ pʋwayɩ yɔ.

15. Alɩwaatʋ ndʋ ɖɩyaɣ ɛyaa se pɔkɔɔ Yesu sɩm yɔɔ tɔzʋʋ sɔnzɩ taa yɔ, tɔm ndʋ yɔɔ pɩwɛɛ se ɖɩtɔzɩ?

¹⁵ Tɔzɩ se ɛyaa mba ɖɩyaɣ yɔ, papɩzɩɣ nɛ pɔpɔzɩ-ɖʋ tɔm pɩlɩɩnɩ sɔnzɩ nzɩ sɩ-yɔɔ, kɔzɩ kɔzɩ ye wiɖiyi patiwobiti ɖe-kediɣzaɣ nakɛyɛ nɛ pana yɔ. Pɩwɛɣ ɖeu se ɖɩmaɣzɩ tɔm ndʋ papɩzɩɣ nɛ pɔpɔzɩ-ɖʋ yɔ tɩ-yɔɔ nɛ ɖɩñɔɔzɩ ɖa-tɩ nɛ ɖicosi-wɛ. (Kol. 4:6) Nabɛyɛ pɩzɩɣ nɛ pɔpɔzɩ se: «Ɛbɛ pakaɣ labʋ sɔnzɩ nzɩ sɩ-taa?» «Alɩwaatʋ ɛzɩma pɩkaɣ kpaɣʋ?» «Wondu ndʋ pɩpɔzʋʋ se posuu?» «Pɩpɔzʋʋ se mɛhɛyɩ liidiye pʋcɔ nɛ mowolo sɩ-taa?» «Pakaɣ cɔʋ liidiye sɔnzɩ nzɩ sɩ-taa?» Alɩwaatʋ ndʋ ɖɩyaɣ ɛyʋ nɔɔyʋ se ɛkɔɔ Yesu sɩm yɔɔ tɔzʋʋ sɔnzɩ taa yɔ, ɖɩpɩzɩɣ nɛ  ɖɩpɔzɩ-ɩ se: «Ŋwɛnɩ tɔm natʋyʋ se ŋpɔzʋʋ?» nɛ pʋwayɩ lɛ, ɖicosi tɔm ndʋ payɩ ɛpɔzʋʋ yɔ tɩ-yɔɔ. Ðɩpɩzɩɣ ɖɔɖɔ nɛ ɖɩlabɩnɩ tʋmɩyɛ Tɔzɩ Yesu sɩm yɔɔ nɛ Ɛbɛ palakɩ Kewiyaɣ Kpaaŋ taa? tɛ videowaa nɛ ɖɩsɩnɩ ɛyʋ ɛnʋ nɛ ɛna ɛzɩma ɖɩlakɩ ɖe-kediɣzisi yɔ. Nɛ Nɩɩ wezuu leleŋ tam! takayaɣ tɛ tɔm kɩkpɛlɩkɩtʋ 28 yɔɔdʋʋ lɩmaɣza kɩbana sakɩyɛ wena ɖɩpɩzɩɣ nɛ ɖiheyi-i yɔ a-taa naayɛ tɔm.

16. Tɔm lɛɛtʋ ndʋ mba pɔkɔŋ Yesu sɩm yɔɔ tɔzʋʋ sɔnzɩ taa yɔ papɩzɩɣ nɛ pɔpɔzɩ?

¹⁶ Ɛyaa mba Ɛsɔtɔm kɛdɩnɩ-wɛ yɔ, powoki Yesu sɩm yɔɔ tɔzʋʋ sɔnzɩ taa nɛ pɩtɛ lɛ, pɩtɩla pakaɣ pɔzʋʋ tɔm lɛɛtʋ ɖɔɖɔ. Papɩzɩɣ nɛ pɔpɔzɩ se ɛbɛ yɔɔ ɛyaa pazɩ yem tɔɔnɩ kpɔnɔ nɛ pɔñɔɔ vɛɛ, yaa ɛbɛ yɔɔ nɔɔyʋ tɩtɔɔ nɛ ɛñɔɔ? Papɩzɩɣ ɖɔɖɔ nɛ pɔpɔzɩ se tam ɛzɩma ɖɩlakɩ Yesu sɩm yɔɔ tɔzʋʋ sɔnzɩ? Nɛ papɩzɩɣ nɛ pɔpɔzɩ se pana se mbʋ ɖɔɖɔ palakɩ Yehowa Aseɣɖe Tɩnaa kediɣzisi tɩŋa na. Paa patazɩ lɩmaɣza ana a-taa Yesu sɩm yɔɔ tɔzʋʋ sɔnzɩ tɔm yɔɔdʋʋ taa yɔ, pɩtɩla pɩkaɣ pɔzʋʋ se ɖɩsɩnɩ ɛyaa kɩfama mba pɔkɔma yɔ nɛ panɩɩ lɩmaɣza ana a-taa nɛ pɩkɩlɩ. Tɔm ñʋʋ «Pourquoi les Témoins de Jéhovah célèbrent-ils le Repas du Seigneur différemment des autres religions ?» ŋgʋ kɩwɛ jw.org yɔɔ yɔ, kɩpɩzɩɣ nɛ kɩsɩnɩ-ɖʋ nɛ ɖicosi tɔm ndʋ pɔpɔzʋʋ-ɖʋ yɔ tɩ-taa natʋyʋ yɔɔ. Pʋcɔ nɛ pala Yesu sɩm yɔɔ tɔzʋʋ sɔnzɩ, alɩwaatʋ ndʋ palakɩ-sɩ yɔ nɛ palakɩ-sɩ nɛ pɩtɛ lɛ, ɖɩsɔɔlaa se ɖɩla mbʋ payɩ ɖɩpɩzɩɣ yɔ nɛ ɖɩsɩnɩ ‘mba payɩ pɛwɛnɩ laŋa kɩbana’ yɔ nɛ sɔnzɩ nzɩ sɩwazɩ-wɛ.—Tʋma 13:48.

SƖNƖ KOOBIYA MBA PƐHƐ FEZUU TAA YƆ

17. Ɛzɩma ɛgbɛyɛ taa ɛzʋtʋyaa pɩzɩɣ nɛ pasɩnɩ koobiya mba pɛhɛ fezuu taa yɔ? (Ezekɩyɛɛlɩ 34:​12, 16)

¹⁷ Ɛzɩma ɛgbɛyɛ taa ɛzʋtʋyaa pɩzɩɣ nɛ pasɩnɩ koobiya mba pɛhɛ fezuu taa yɔ Yesu sɩm yɔɔ tɔzʋʋ sɔnzɩ alɩwaatʋ taa? Wɩlɩ-wɛ se ŋmaɣzɩɣ pɔ-yɔɔ. (Kalɩ Ezekɩyɛɛlɩ 34:​12, 16.) Pʋcɔ nɛ pala Yesu sɩm yɔɔ tɔzʋʋ sɔnzɩ lɛ, ñaɣ pana nɛ ŋyaa pa-taa sakɩyɛ. Yele nɛ pa-taa tɛ se ŋsɔɔlɩ-wɛ nɛ ñe-liu wɛɛ kpem se ŋla mbʋ payɩ ŋpɩzɩɣ yɔ nɛ ŋsɩnɩ-wɛ. Yaa-wɛ se pɔkɔɔ Yesu sɩm yɔɔ tɔzʋʋ sɔnzɩ taa. Ye pɔkɔma yɔ, mʋ-wɛ nɛ sɔɔlɩm. Nɛ palakɩ Yesu sɩm yɔɔ tɔzʋʋ sɔnzɩ nɛ pɩtɛ lɛ, wolo pɩ-yɔɔ nɛ ŋyaɣ-wɛ yaa ŋkilimiɣ  pɔ-yɔɔ nɛ ŋla mbʋ payɩ ŋpɩzɩɣ yɔ nɛ ŋsɩnɩ-wɛ nɛ papɩsɩ Yehowa cɔlɔ.—1 Pɩy. 2:25.

18. Ɛzɩma ɖa-tɩŋa ɖɩpɩzɩɣ nɛ ɖɩsɩnɩ koobiya mba pɛhɛ fezuu taa yɔ? (Roma mba 12:10)

¹⁸ Ɛgbɛyɛ taa mba tɩŋa pɩzɩɣ nɛ pasɩnɩ koobiya mba pɔkɔŋ Yesu sɩm yɔɔ tɔzʋʋ sɔnzɩ taa nɛ pɛhɛ fezuu taa yɔ. Ɛzɩma tɩyɛ? Pɩwɛɛ se pamʋ-wɛ nɛ sɔɔlɩm, palabɩ-wɛ camɩyɛ lakasɩ nɛ pañam-wɛ. (Kalɩ Roma mba 12:10.) Tɔzɩ se pɩpɩzɩɣ nɛ pɩla koobiya kʋsɔɔlaa mba kaɖɛ se paɖaɣnɩ paɣzʋʋ kediɣzisi wobu. Pɩtɩla, sɔɔndʋ kpaɣ-wɛ nɛ tɔm ndʋ koobiya kaɣ yɔɔdʋʋ yaa ndʋ pakaɣ maɣzʋʋ pɔ-yɔɔ yɔ. e Pʋyɔɔ lɛ, taapɔzʋʋ-wɛ tɔm ndʋ tɩpɩzɩɣ nɛ tɩcɛyɩ-wɛ yɔ yaa taayɔɔdʋʋ tɔm ndʋ tɩpɩzɩɣ nɛ tɩɖʋ-wɛ ɖɩwɩzɩyɛ yɔ. (1 Tes. 5:11) Pɛkɛ ɖo-koobiya. Ða-taa wɛ leleŋ se ɖa nɛ wɛ ɖɩɖaɣnɩ kpɛndʋʋ nɛ ɖɩsɛɣ Ɛsɔ.—Keɣ. 119:176; Tʋma 20:35.

19. Ye ɖɩtɔzʋʋ Yesu sɩm yɔɔ yɔ, wazasɩ nzɩ ɖihikiɣ?

¹⁹ Ða-taa wɛ leleŋ se Yesu heyi-ɖʋ se ɖɩtɔzʋʋ ɛ-sɩm yɔɔ paa pɩnaɣ ŋga, nɛ ɖɩna mbʋ pʋyɔɔ pɩ-tɔm cɛyɩ siŋŋ yɔ. Alɩwaatʋ ndʋ ɖiwoki Yesu sɩm yɔɔ tɔzʋʋ sɔnzɩ taa yɔ, pɩwazɩɣ ɖa-maɣmaɣ nɛ ɛyaa lalaa hɔɔlɩŋ sakɩyɛ taa. (Iza. 48:​17, 18) Pɩsɩɣnɩ-ɖʋ se ɖɩsɔɔlɩ Yehowa nɛ Yesu nɛ pɩkɩlɩ. Ðɩwɩlɩɣ se ɖɩwɛnɩ ɛsɩmɩyɛ mbʋ palabɩ-ɖʋ yɔ pɩ-yɔɔ siŋŋ. Ðɩcɛyɩsɩɣ taabalɩyɛ nɖɩ ɖɩwɛ ɖa nɛ ɖo-koobiya ɖɛ-hɛkʋ taa yɔ. Nɛ ɖɩpɩzɩɣ ɖɩsɩnɩ ɛyaa lalaa nɛ patɩlɩ ɛzɩma mba ɖɔɖɔ papɩzɩɣ nɛ pala nɛ kɩhɛyʋʋ pʋ-ñʋʋ taa kɩlaʋ wazɩ-wɛ yɔ. Ye mbʋ, iyele nɛ ɖɩla mbʋ payɩ ɖɩpɩzɩɣ yɔ nɛ ɖɩñɔɔzɩ ɖa-tɩ nɛ ɖɩɖaŋ sɛmɩyɔɔ evemiye nɖɩ ɖɩ-tɔm kɩlɩ cɛyʋʋ yɔ, pʋ-tɔbʋʋ se Yesu sɩm yɔɔ tɔzʋʋ sɔnzɩ!