KIÐE tɛɛ kʋnʋŋ taa tɔm piye nɖɩ pɛɖɛzɩ Ɛjaɖɛ kɩfaɖɛ tɔm ɖɛzʋʋ Bibl taa se «kɛɛkɛɛ» yɔ, ɖɩpɩzɩɣ nɛ ɖɩwɩlɩ se pɩɩkɛ kɛɛkɛɛnaa ndɩ ndɩ mba paawɛ alɩwaatʋ ndʋ tɩ-taa yɔ, pa-taa paa ŋgʋ. (Tʋma 8:​28, 29, 38) Ɛlɛ pɩwɛ ɛzɩ kɛɛkɛɛ ŋgʋ kɩ-taa Etiyoopii eliŋgiye kaacaɣaa yɔ, kɩɩpaɣlaa nɛ pɩkɩlɩ kɛɛkɛɛnaa cikpema mba palakaɣnɩ tʋmɩyɛ you taa yaa seya taa yɔ. Iyele nɛ ɖɩna lɩmaɣza wena a-yɔɔ ɖɩyɔɔdʋʋ mbʋ yɔ.

Etiyoopii abalʋ ɛnʋ, ɛɛkɛ kaɖɩka sɔsɔɔ nɛ ɛɛɖɔm nʋmɔʋ ŋgʋ yɔ, kɩɖaɣlaa pɩdɩɩfɛyɩ. Abalʋ ɛnʋ, «ɛɛwɛnɩ ɖoŋ sɔsɔŋ, ɛɖʋwaɣ lɩm Etiyoopii abiɖe Kandaasɩ, nɛ ɛcɔŋnɩ ɛ-ñɩm kpeekpe yɔɔ.» (Tʋma 8:27) Ɛjaɖɛ nɖɩ payaɣ sɔnɔ se Suudan yɔ nɛ sɔnɔ Ejipiti hadɛ kiŋ hɔɔlʋʋ sɔsɔʋ kaakɛ caanaʋ taa Etiyoopii ɛjaɖɛ hɔɔlɩŋ nɩɩyɩ. Pʋtɔma yɔ, pɩtɩkɛ kɛɛkɛɛ kʋɖʋmʋʋ taa abalʋ ɛnʋ ɛɛcaɣaa nɛ ɛɖɔ ɛ-nʋmɔʋ ŋgʋ kɩ-tɩŋa; paa mbʋ yɔ, pɩtʋʋ fɛyɩ se ɛɛkpɛndɩnɩ wondu sakɩyɛ ɛ-nʋmɔʋ kɩɖaɣlʋʋ ŋgʋ kɩ-ɖɔm taa. Kajalaɣ pɩnzɩ mɩnʋʋ taa kɛɛkɛɛnaa mba pa-taa ɛyaa cakaɣ nɛ powoki nʋmɔʋ yɔ, pa-taa nabɛyɛ kaawɛnɩ pɔbɔla 4 nɛ paahuuzi pa-ñʋŋ yɔɔ. Takayaɣ nakɛyɛ yɔɔdɩ Tʋma Labʋ takayaɣ yɔɔ se: «Kɛɛkɛɛnaa mba, pa-taa kaawalaa nɛ papɩzaɣ se paɖʋ wondu sakɩyɛ pa-taa, nʋmɔɖɔnaa cakaɣ pa-taa camɩyɛ nɛ pɩtaakaɣdɩɣ-wɛ, nɛ pɩtɩla pɩsɩɣaɣnɩ ɛyaa se pɔɖɔ nʋmɔʋ kɩɖaɣlʋʋ nɛ pɩkɩlɩ.»

Etiyoopii abalʋ ɛnʋ, ɛɛwɛɛ nɛ ɛkalɩɣ takayaɣ alɩwaatʋ ndʋ Filiipu wobi ɛ-cɔlɔ yɔ. Bibl yɔɔdʋʋ se «Filiipu se nɛ ewolo kɩ-cɔlɔ nɛ ɛnɩɩ [abalʋ ɛnʋ] ɛwɛɛ nɛ ɛkalɩɣ nayʋ Izaayii takayaɣ nɛ nɔɔ kɩkʋyaɣ.» (Tʋma 8:30) Kɛɛkɛɛnaa mba ɛyaa ɖɔŋaɣnɩ nʋmɔʋ yɔ, pataaseɣ. Ɛzɩma kɛɛkɛɛnaa mba pɔɖɔŋaɣ hɛɛɛ yɔ, mbʋ kaahanɩ abalʋ ɛnʋ nʋmɔʋ nɛ ɛkalɩɣ tɔm, nɛ mbʋ kaayebina ɖɔɖɔ nɛ Filiipu pɩzɩ nɛ ese nɛ ehiɣ kɛɛkɛɛ ŋgʋ.

Etiyoopii abalʋ ɛnʋ, «etendi Filiipu se ɛkpa nɛ ɛcaɣ ɛ-cɔlɔ.» (Tʋma 8:31) Kɛɛkɛɛnaa mba palakaɣnɩ tʋmɩyɛ seya taa yɔ, pa-sayaa sɩŋaɣ kɩsɩŋʋʋ. Ɛlɛ kɛɛkɛɛnaa mba ɛyaa ɖɔŋaɣnɩ nʋmɔʋ yɔ pa-taa lɛ, ɖɩjaɣyɛ kaawɛɛ, nɛ pʋyɔɔ Etiyoopii abalʋ ɛnʋ nɛ Filiipu papɩzaa nɛ pacaɣ.

Tɔm ndʋ pama Tʋma Labʋ ñʋʋ 8 taa yɔ nɛ caanaʋ taa tɔm taa tazɩyaa ñɩnaa nɛ pana mbʋ yɔ pʋyɔɔ lɛ, pitileɖi yɔ papaɣzɩ lɩzʋʋ ɖɛ-ɛgbɛyɛ takayɩsɩ taa Etiyoopii abalʋ ɛnʋ kɛɛkɛɛ sɔsɔʋ taa, nɛ pɩtɩkɛ kɛɛkɛɛ cikpeluu ŋgʋ palakɩnɩ tʋmɩyɛ you taa yaa seya taa yɔ kɩ-taa.