1-2. Kala wena Yehowa sɛyaa siɣsiɣ tɩnaa pɩzɩɣ nɛ pakatɩ?

 ÐƖPƖZƖƔ nɛ ɖɩkatɩ kaɖɛ wɛtʋ natʋyʋ nɛ tɩlɛɣzɩ ɖe-wezuu caɣʋ tuda. Kɩɖaŋ nɩɩyɩ yɔ: Payaɣ koobu abalɩñɩnʋ nɔɔyʋ se Luis. a Ðɔkɔtɔnaa maɣzɩ-ɩ nɛ pana se ɛwɛnɩ kansɛɛrɩ kʋdɔŋ sɔsɔʋ nakʋyʋ. Ðɔkɔtɔ heyi-i se pɩkazɩ-ɩ fenasɩ pazɩ yem se ɛcaɣ wezuu. Monika nɛ ɛ-walʋ palakaɣ fezuu taa tʋma sakɩyɛ. Ɛlɛ kɩyakʋ nakʋyʋ lɛ, Monika nɩɩ se ɛ-walʋ lakaɣ kɩwɛɛkɩm mɛsaɣ tɛɛ pɩnzɩ sakɩyɛ; ɛ-walʋ ɛnʋ ɛɛkɛ ɛzʋtʋyʋ. Koobu halɩñɩnʋ Olivia kɛ ɛɖanɛ. Pɩɩkɔm nɛ pɩpɔzɩ se eyele ɛ-ɖɩɣa nɛ ese nɛ ɛɖɛɛ mbʋ pʋyɔɔ yɔ tɛʋ sɔsɔʋ ŋgʋ kɩnɩɣnɩ helim yɔ, kiɖiɣni kɔm. Tɛʋ sɔsɔʋ ŋgʋ kɩ-wayɩ, ɛpɩsɩ ɛ-tɛ lɛ, ɛna se kɩyɔkɩ ɛ-ɖɩɣa. Alɩwaatʋ pazɩ taa, koobiya mba, pe-wezuu caɣʋ lɛɣzɩ tuda yem. Wiɖiyi ŋtɛm katʋʋ kaɖɛ wɛtʋ natʋyʋ mbʋ nɛ tɩlɛɣzɩ ñe-wezuu caɣʋ tuda yem?

² Paa ɖɩkɛ Yehowa sɛyaa siɣsiɣ tɩnaa yɔ, ɖɩkatɩɣ kala nɛ ɖɩtɔlʋʋ kʋdɔmɩŋ, ɛzɩ ɛyaa lalaa ɖɔɖɔ yɔ. Pɩtasɩ lɛ, mba papaɖɩɣ Ɛsɔ samaɣ yɔ, papɩzɩɣ nɛ pakaɖɩnɩ-ɖʋ yaa panazɩ-ɖʋ. Paa Yehowa ɛɛɖɩkɩ kala ana nʋmɔʋ se ataatalɩ-ɖʋ yɔ, ɛlabɩ-ɖʋ tamaɣ se ɛsɩɣnɩ-ɖʋ. (Iza. 41:10) Yehowa kaɣ-ɖʋ sɩnʋʋ se ɖitaalesi ɖa-taa leleŋ, ɛkaɣ-ɖʋ sɩnʋʋ nɛ ɖɩkpaɣ lɩmaɣza kɩbana nɛ ɖɩɖɔkɩ ɖe-siɣsiɣ wɛtʋ paa ɖɩkatɩɣ kala sɔsɔna yɔ. Tɔm ñʋʋ kʋnɛ kɩ-taa, ɖɩkaɣ naʋ nʋmɔŋ 4 weyi ɩ-yɔɔ Yehowa tɩŋɩɣna nɛ ɛsɩɣnɩ-ɖʋ kaɖɛ alɩwaatʋ taa yɔ. Ðɩkaɣ naʋ ɖɔɖɔ mbʋ pɩpɔzʋʋ se ɖɩla nɛ sɩnʋʋ mbʋ pɩwazɩ-ɖʋ yɔ.

 YEHOWA KAƔ ÐAŊƲƲ ÑƆ-YƆƆ

3. Alɩwaatʋ ndʋ ɖɩkatɩɣ kaɖɛ wɛtʋ natʋyʋ yɔ, ɛbɛ pɩpɩzɩɣ nɛ pɩwɛɛ-ɖʋ kaɖɛ se ɖɩla?

³ Kaɖɛ. Alɩwaatʋ ndʋ ɖɩkatɩɣ kaɖɛ wɛtʋ natʋyʋ yɔ, pɩpɩzɩɣ nɛ pɩwɛɛ-ɖʋ kaɖɛ se ɖɩkpaɣ lɩmaɣza. Ɛbɛ yɔɔ? Mbʋ pʋyɔɔ yɔ pɩtɩla ɖɩnɩɣ siziŋ siŋŋ ɖa-laŋɩyɛ taa. Pɩtɩla ɖɔɖɔ yɔ, nɩɣzɛ su ɖa-maɣzɩm taa. Pɩpɩzɩɣ nɛ pɩlabɩ-ɖʋ ɛzɩ ɖɩwɛɛ nɛ ɖiyotuu hulumiye sɔsɔɖɛ naɖɩyɛ taa nɛ ɖɩɩsɩŋ se ɖɩkpaɣnɩ le yɔ. Na ɛzɩma pɩɩlabɩ koobiya halɩñɩma 2 mba ɖɩɩyɔɔdɩ pɔ-tɔm nɛ pɩɖɛɛ se paawɛ kaɖɛ taa yɔ. Olivia yɔɔdaa se: «Tɛʋ sɔsɔʋ ŋgʋ, kɩwɛɛkɩ man-ɖɩɣa mbʋ lɛ, pisidi ma-ñʋʋ taa nɛ nɩɣzɛ kaakɩlɩ-m kpem.» Monika maɣzɩ mbʋ ɛ-walʋ labɩ-ɩ yɔ pɩ-yɔɔ lɛ, ɛyɔɔdɩ se: «Piitibi-m yɔɔɔ tibu mbʋ yɔ, pɩfɛyɩ yɔɔdʋʋ. Pɩɩlabɩ-m ɛzɩ pɔsɔbɩ-m sɩɣa yɔ. Pɩɩwɛ-m kaɖɛ se mantasɩ pɩzʋʋ nɛ mala evemiye taa tʋma wena mantɩɩlakɩ yɔ. Mbʋ pɩɩtalɩ-m yɔ, mantaamaɣzɩ kpa se pɩkaɣ-m talʋʋ wiɖiyi.» Yehowa labɩ tamaɣ se ɛsɩɣnɩ-ɖʋ alɩwaatʋ ndʋ nɩɣzɛ kɩlɩɣ-ɖʋ yɔ. Ɛzɩma ɛsɩɣnɩ-ɖʋ?

4. Ɛzɩ Filiipi mba 4:​6, 7 yɔɔdʋʋ yɔ, tamaɣ ŋga Yehowa labɩ-ɖʋ?

⁴ Ɛzɩma Yehowa sɩɣnɩ-ɖʋ? Ɛlabɩ tamaɣ se ɛhaɣ-ɖʋ mbʋ Bibl yaɣ se «Ɛsɔ tɛ laŋhɛzɩyɛ» yɔ. (Kalɩ Filiipi mba 4:​6, 7.) Laŋhɛzɩyɛ nɖɩ, nɖɩ lɛ ɖiɣɖiɣ wɛtʋ ndʋ ɛyʋ hikiɣ ɛ-maɣzɩm taa nɛ ɛ-laŋɩyɛ taa yɔ, nɛ tɩlɩɣnɩ taabalɩyɛ kɩbanɖɛ nɖɩ ɖɩwɛɣ ɛ nɛ Yehowa pɛ-hɛkʋ taa yɔ ɖɩ-cɔlɔ. Laŋhɛzɩyɛ nɖɩ, «ɖɩcɛzɩ tɔm taa nɩʋ lɛɣtʋ tɩŋa.» Ðɩwɛ ɖeu kpem nɛ pɩcɛzɩ mbʋ pɩ-yɔɔ ɖɩpɩzɩɣ nɛ ɖɩmaɣzɩ yɔ. Wiɖiyi ŋtɛm tɩmnʋʋ Yehowa siŋŋ nɛ pʋwayɩ lɛ, pɩɖɩɣzɩ-ŋ se ña-laŋɩyɛ hɛwa? «Ɛsɔ tɛ laŋhɛzɩyɛ» yebina nɛ pɩlabɩ-ŋ mbʋ.

5. Ɛzɩma tɩyɛ Ɛsɔ tɛ laŋhɛzɩyɛ ɖaŋɩɣ ɖa-maɣzɩm nɛ ɖa-laŋa yɔɔ?

⁵ Filiipi mba 4:7 yɔɔdaa ɖɔɖɔ se Ɛsɔ tɛ laŋhɛzɩyɛ nɖɩ, ɖɩkaɣ ‘ɖaŋʋʋ’ yaa ɖɩkaɣ kandɩyʋʋ «mɩ-laŋa yɔɔ nɛ mɩ-maɣzɩm yɔɔ.» Kiɖe tɛɛ tɔm piye nɖɩ pɛɖɛzaa se «ɖaŋʋʋ» yɔ, palakaɣnɩ-ɖɩ tʋmɩyɛ sɔɔjatʋ tʋmɩyɛ taa nɛ ɖɩwɩlɩɣ sɔɔjanaa mba paɖaŋaɣ tɛtʋ yɔɔ se koyindinaa itaayooni-tʋ yɔ. Ɛyaa mba pɛwɛ tɛtʋ ndʋ sɔɔjanaa ɖaŋaɣ tɩ-yɔɔ yɔ tɩ-taa yɔ, pahɩnaɣ nɛ poɖou yem fɛɛɛ, mbʋ pʋyɔɔ yɔ panawa se sɔɔjanaa kandɩyaɣ pɔ-yɔɔ. Mbʋ ɖɔɖɔ alɩwaatʋ ndʋ Ɛsɔ tɛ laŋhɛzɩyɛ ɖaŋɩɣ ɖa-laŋa nɛ ɖa-maɣzɩm yɔɔ yɔ, ɖa-laŋa hɛɣ niɣ niɣ mbʋ pʋyɔɔ yɔ ɖɩnawa se ɖɩwɛ pɛɛyɛ taa. (Keɣ. 4:8) Ɛzɩ Hana yɔ, paa ɖɛ-wɛtʋ ɛtɩlɛɣzɩ kpaagbaa yɔ, ɖɩpɩzɩɣ nɛ ɖihiɣ laŋhɛzɩyɛ. (1 Sam. 1:​16-18) Nɛ alɩwaatʋ ndʋ ɖa-laŋɩyɛ hɛɣ yɔ, ɖoŋ ɖoŋ lɛ pɩwɛ-ɖʋ kɛlɛʋ se ɖɩmaɣzɩ camɩyɛ nɛ ɖɩkpaɣ lɩmaɣza kɩbana.

6. Ɛbɛ ɖɩpɩzɩɣ ɖɩla nɛ ɖihiɣ Ɛsɔ tɛ laŋhɛzɩyɛ? (Cɔnɩ ɖɔɖɔ kɩlɛmʋʋ.)

⁶ Mbʋ pɩpɔzʋʋ se ɖɩla yɔ. Alɩwaatʋ ndʋ ŋwɛɣ nɩɣzɛ taa yɔ, pɔzɩ Yehowa se ɛsɩnɩ-ŋ. Ɛzɩma  tɩyɛ? Tɩmnɩ Yehowa nɛ pɩkɔɔ pɩsɩɩnɩ alɩwaatʋ ndʋ ŋhiɣ Ɛsɔ tɛ laŋhɛzɩyɛ yɔ. (Luka 11:9; 1 Tes. 5:17) Luis, weyi ɖɩyɔɔdɩ ɛ-tɔm nɛ pɩɖɛɛ yɔ, ɛyɔɔdɩ mbʋ pɩsɩnɩ ɛ nɛ ɛ-halʋ Ana nɛ papɩzɩ pɔɖɔkɩ pa-tɩ alɩwaatʋ ndʋ panɩwa se pɩkazɩ fenasɩ pazɩ ɛkaɣ sɩbʋ yɔ pɩ-tɔm. Ɛyɔɔdaa se: «Wɛtʋ ɛzɩ tʋnɛ yɔ tɩ-taa, pɩwɛ kaɖɛ kpem se ɛyʋ ɛkpaɣ lɩmaɣza wena atukuuni kɔyɛ labʋ nɛ tɔm lɛɛtʋ yɔ. Ɛlɛ adɩma sɩnɩ-ɖʋ nɛ ɖihiɣ laŋhɛzɩyɛ kaɖɛ alɩwaatʋ sɔsɔtʋ ndʋ tɩ-taa.» Luis nɛ ɛ-halʋ pɔyɔɔdaa se patɩmaɣ siŋŋ kaahɛzaɣ nɛ pɔpɔzʋʋ Yehowa se ɛha-wɛ maɣzɩm taa laŋhɛzɩyɛ, laŋɩyɛ nɖɩ ɖɩhɛ niɣ niɣ yɔ nɛ lɔŋsɩnɖɛ nɛ papɩzɩ pakpaɣ lɩmaɣza kɩbana. Nɛ pana ɛzɩma Yehowa sɩnɩ-wɛ yɔ. Ye ŋwɛɛ nɛ ŋkatɩɣ kala sɔsɔna yɔ, wɛɛ adɩma yɔɔ; nɛ ŋkaɣ hiɣu Yehowa tɛ laŋhɛzɩyɛ nɛ ɖɩkandɩyɩ ña-laŋɩyɛ nɛ ña-maɣzɩm yɔɔ.—Roma 12:12.

YEHOWA KAƔ YEBU NƐ ŊKA CAMƖYƐ

7. Alɩwaatʋ ndʋ ɖɩkatɩɣ kaɖɛ wɛtʋ natʋyʋ yɔ, ɛzɩma pɩpɩzɩɣ nɛ pɩlabɩ-ɖʋ?

⁷ Kaɖɛ. Alɩwaatʋ ndʋ ɖɩkatɩɣ kaɖɛ wɛtʋ natʋyʋ yɔ, ɛzɩma pɩlakɩ-ɖʋ yɔ, pɩpɩzɩɣ nɛ pɩwɛɛ ndɩ nɛ ɛzɩma pɩtɩɩlakɩ-ɖʋ yɔ; nɛ ɖa-lɩmaɣza nɛ ɖa-lakasɩ pɩzɩɣ ɖɔɖɔ nɛ pɩwɛɛ ndɩ nɛ ɛzɩma pɩtɩɩwɛɣ yɔ. Ɛzɩ helim sɔsɔm nabʋyʋ cɔzʋʋ mɛlɛ teŋgu yɔɔ nɛ piwokini-kʋ hɔɔlɩŋ tɩŋa taa yɔ, mbʋ ɖɔɖɔ ɖa-lɩmaɣza pɩzɩɣ nɛ alɛɣzɩɣ yem yem. Ana weyi ɛ-tɔm ɖɩyɔɔdaa nɛ pɩɖɛɛ yɔ, ɛyɔɔdaa se alɩwaatʋ ndʋ ɛ-walʋ Luis sɩba yɔ, lɩmaɣza ndɩ ndɩ kɔm ɛ-ñʋʋ taa. Ɛyɔɔdaa se: «Alɩwaatʋ ndʋ maawɛ laŋwɛɛkɩyɛ sɔsɔyɛ taa yɔ, mɔn-tɔm paɣzɩ-m labʋ pʋtɔdɩyɛ. Man-taa wɩɣaɣ ɖɔɖɔ se ɛɖɛwa nɛ eyebi-m.» Pɩtasɩ lɛ, pɩlakaɣ Ana ɛzɩ ɛwɛ e-ɖeke yɔ nɛ pɩcɛyaɣ-ɩ siŋŋ se lɛɛlɛɛyɔ lɛ, ɛnʋ pɩwɛɛ se ɛkpaɣ lɩmaɣza hɔɔlɩŋ weyi ɩ-taa Luis kpakaɣ lɩmaɣza camɩyɛ yɔ. Nabʋyʋ taa, pɩlakaɣ-ɩ ɛzɩ ɛwɛ helim sɔsɔm nabʋyʋ taa teŋgu yɔɔ yɔ. Ɛzɩma tɩyɛ Yehowa sɩɣnɩ-ɖʋ alɩwaatʋ ndʋ lɩmaɣza ana apaɣzɩɣ kɔm ɖa-ñʋʋ taa yɔ?

8. Ɛzɩ pɔyɔɔdʋʋ Izaayii 33:6 taa yɔ, Yehowa labɩ-ɖʋ tamaɣ se ɛlakɩ-ɖʋ we?

⁸ Ɛzɩma Yehowa sɩɣnɩ-ɖʋ? Yehowa labɩ-ɖʋ tamaɣ se ɛkaɣ yebu nɛ ɖɩka camɩyɛ. (Kalɩ Izaayii 33:6.) Alɩwaatʋ ndʋ helim sɔsɔm nabʋyʋ makɩ teŋgu yɔɔ yɔ, pɩpɩzɩɣ nɛ pɩpaɣzɩ cɔzʋʋ mɛlɛ hɔɔlɩŋ tɩŋa taa. Pɩsa nɛ mɛlɛnaa lʋbɩnɩ kaɖɛ nɖɩ lɛ, paɖʋʋ wondu natʋyʋ mɛlɛnaa sakɩyɛ hɔɔlɩŋ ɛnɩ ɩ-naalɛ ɩ-yɔɔ lɩm tɛɛ se pɩsɩnɩ-wɛ nɛ paka camɩyɛ. Wondu ndʋ tɩsɩɣnɩ mɛlɛ se pɩtaakɩlɩ-kʋ cɔzʋʋ; pɩkandɩyɩɣ mba pɛwɛ mɛlɛ taa yɔ pɔ-yɔɔ nɛ piyeki nɛ pɔɖɔ nʋmɔʋ camɩyɛ. Ɛlɛ pʋcɔ nɛ wondu ndʋ tɩla tʋmɩyɛ camɩyɛ lɛ, pɩwɛɛ se mɛlɛ ɛwɛɛ nɛ kɩɖɔŋ. Mbʋ ɖɔɖɔ, pʋcɔ nɛ Yehowa yele nɛ ɖɩka camɩyɛ lɛ, pɩwɛɛ se ɖiwolo pɩ-yɔɔ nɛ ɖɩsɛɣ-ɩ siɣsiɣ paa ɖɩkatɩɣ kala yɔ.

9. Ɛzɩma ɖɔ-tɔm ñɩnʋʋ wondu pɩzɩɣ nɛ tɩsɩnɩ-ɖʋ nɛ ɖɩɖɔkɩ ɖa-maɣzɩm kaɖɛ alɩwaatʋ taa? (Cɔnɩ ɖɔɖɔ kɩlɛmʋʋ.)

 ⁹ Mbʋ pɩpɔzʋʋ se ɖɩla yɔ. Ye ŋwɛɛ nɛ ŋkatɩɣ wɛtʋ natʋyʋ nɛ lɩmaɣza kɩlɩ-ŋ yɔ, la mbʋ ŋpɩzɩɣ yɔ nɛ ŋtɩmɩɣ, ŋwoki kediɣzisi nɛ ŋsusuu tɔm. Pɩkɛ toovenim se ŋŋpɩzɩɣ nɛ ŋla nɛ pɩtalɩ ɛzɩ ŋtɩɩlakʋʋ ɖooo lɛ yɔ, paa mbʋ yɔ tɔzɩ se Yehowa nɩɣ ñɔ-tɔm taa. (Kpaɣ-tʋ nɛ ŋmaɣzɩnɩ Luka 21:​1-4.) Pɩtasɩ lɛ, ñɩnɩ alɩwaatʋ nɛ ŋkpɛlɩkɩɣ ña-tɩ yɔɔ nɛ ŋmaɣzɩɣ tɔm ndʋ ŋkpɛlɩkɩɣ yɔ tɩ-yɔɔ. Ɛbɛ yɔɔ? Mbʋ pʋyɔɔ yɔ Yehowa tɩŋɩɣnɩ ɛ-ɛgbɛyɛ yɔɔ nɛ ɛhaɣ-ɖʋ fezuu taa tɔɔnaɣ kɩbaŋa se pɩsɩnɩ-ɖʋ nɛ ɖɩɖɔkɩ ɖa-maɣzɩm kaɖɛ alɩwaatʋ taa. Pɩsa nɛ ŋna mbʋ pɩpɩzɩɣ pɩsɩnɩ-ŋ yɔ lɛ, ŋpɩzɩɣ nɛ ŋlabɩnɩ tʋmɩyɛ tɔm ñɩnʋʋ wondu, ɛzɩ JW Library^®, Index des publications des Témoins de Jéhovah nɛ Guide de recherche pour les Témoins de Jéhovah mbʋ yɔ. Monika weyi ɛ-tɔm ɖɩyɔɔdaa nɛ pɩɖɛɛ yɔ ɛyɔɔdaa se alɩwaatʋ ndʋ lɩmaɣza wena ayeki nɛ ɛnɩɣ siziŋ yɔ apaɣzɩɣ kɔm ɛ-ñʋʋ taa yɔ, ɛlakɩnɩ tʋmɩyɛ tɔm ñɩnʋʋ wondu ndʋ se ɛna lɔŋ tasʋʋ mbʋ pɩpɩzɩɣ nɛ pɩsɩnɩ-ɩ yɔ. Nabʋyʋ taa, ɛñɩnaɣ tɔm piye «pana.» Nabʋyʋ taa ɖɔɖɔ lɛ, ɛñɩnaɣ tɔm pee «wayɩ lɩʋ» yaa «siɣsiɣ wɛtʋ.» Pʋwayɩ lɛ, ɛkalaɣ tɔm ndʋ tɩ-yɔɔ ɛlɩɣ yɔ pɩkɔɔ nɛ pɩsɩɩnɩ alɩwaatʋ ndʋ ɛ-laŋɩyɛ hɛɣ yɔ. Ɛyɔɔdaa se: «Alɩwaatʋ ndʋ manpaɣzɩɣ tɔm ñɩnʋʋ yɔ mɛwɛɣ nɩɣzɛ taa, ɛlɛ mɛwɛɣ nɛ mankalɩɣ tɔm ndʋ tɩ-yɔɔ malɩwa yɔ lɛ, pɩlakɩ-m ɛzɩ Yehowa kpiikini-m yɔ. Mɔnkɔm nɛ menɖiɣzina se Yehowa nɩɣaɣ lɩmaɣza ndɩ ndɩ wena maawɛna yɔ a-tɩŋa a-taa nɛ ɛsɩɣaɣnɩ-m.» Yehowa pɩzɩɣ ɛsɩnɩ ña ɖɔɖɔ nɛ ŋɖɔkɩ ña-maɣzɩm pɩkɔɔ nɛ pɩsɩɩnɩ alɩwaatʋ ndʋ ña-laŋɩyɛ hɛɣ yɔ.—Keɣ. 119:​143, 144.

YEHOWA KAƔ-Ŋ SƖNƲƲ

10. Alɩwaatʋ ndʋ ɖɩkatɩɣ kaɖɛ wɛtʋ natʋyʋ yɔ, ɛzɩma pɩpɩzɩɣ nɛ pɩlabɩ-ɖʋ?

¹⁰ Kaɖɛ. Ye ɖɩkatɩ kaɖɛ wɛtʋ natʋyʋ yɔ, pɩpɩzɩɣ nɛ pɩcamɩ-ɖʋ tomnaɣ taa nɛ maɣzɩm taa avema naayɛ. Pɩpɩzɩɣ nɛ pɩlabɩ-ɖʋ ɛzɩ hola aleɣya laɖʋ weyi etiiseɣ lɛɛ lɛɛ, ɛlɛ lɛɛlɛɛyɔ lɛ ɛɖɔŋ taɖɩyɛ yɔ. Tʋma wena ɖɩtɩɩlakɩ kɛlɛʋ yɔ a-labʋ pɩzɩɣ nɛ pɩlabɩ-ɖʋ kaɖɛ, yaa tʋma wena ɖɩtɩɩlakɩnɩ taa leleŋ yɔ lɛɛlɛɛyɔ lɛ, pɩɩtasɩɣ-ɖʋ seɣtuu se ɖɩlabɩ-yɛ. Ɛzɩ Eliya yɔ, pɩpɩzɩɣ nɛ pɩlabɩ-ɖʋ kaɖɛ se ɖɩkʋyɩ ɖa-ñalʋʋ yɔɔ. Pɩwɛ ɛzɩ ɖɩwɛɛ hɩnʋʋ yɔɔ yɔ. (1 Awi. 19:​5-7) Ɛbɛ Yehowa labɩ tamaɣ se ɛlakɩ-ɖʋ alɩwaatʋ ndʋ ɖɩtɩtasɩ wɛnʋʋ ɖoŋ yɔ?

11. Nʋmɔʋ lɛɛkʋ ŋgʋ yɔɔ Yehowa tɩŋɩɣna nɛ ɛsɩɣnɩ-ɖʋ? (Keɣa 94:18)

¹¹ Ɛzɩma Yehowa sɩɣnɩ-ɖʋ? Yehowa labɩ-ɖʋ tamaɣ se ɛkaɣ-ɖʋ sɩnʋʋ. (Kalɩ Keɣa 94:18.)  Pɩpɔzʋʋ se pasɩnɩ hola aleɣya laɖʋ weyi pɩkʋ-ɩ yɔ nɛ ɛpɩzɩ ɛɖɔ, mbʋ ɖɔɖɔ pɩpɔzʋʋ se pasɩnɩ-ɖʋ nɛ ɖiwolo pɩ-yɔɔ nɛ ɖɩlakɩ Yehowa tʋma. Yehowa labɩ-ɖʋ tamaɣ se ɛkaɣ-ɖʋ sɩnʋʋ kaɖɛ alɩwaatʋ ndʋ tɩ-taa. Ɛyɔɔdaa se: «Ma, ñɛ-Ɛsɔ Yehowa, mɔnɖɔkʋʋ ña-nɩwaŋ nesi, meheyiɣni-ŋ se: “Sɔɔndʋ ɛtaakpa-ŋ. Mankaɣ-ŋ sɩnʋʋ.”» (Iza. 41:13) Wiyaʋ Daviid kaananɩ ɛ-ɛsa ɛzɩma Yehowa sɩnɩ-ɩ yɔ. Alɩwaatʋ ndʋ ɛkataɣ kala nɛ alɩwaatʋ ndʋ e-koyindinaa kaɖaɣnɩ-ɩ ɖɔɖɔ yɔ, eheyi Yehowa se: «Ñe-nesi kɩbanzɩ ɖɔkʋʋ-m.» (Keɣ. 18:35) Ɛlɛ ɛzɩma tɩyɛ Yehowa sɩɣnɩ-ɖʋ?

12. Mba yɔɔ Yehowa pɩzɩɣ nɛ ɛtɩŋna nɛ ɛsɩnɩ-ɖʋ alɩwaatʋ ndʋ pitiki-ɖʋ yɔɔɔ yɔ?

¹² Pɩsa nɛ Yehowa sɩnɩ-ɖʋ lɛ, ɖoŋ ɖoŋ lɛ ɛyaa lalaa yɔɔ ɛtɩŋɩɣna. Alɩwaatʋ ndʋ piitibi Daviid yɔɔɔ yɔ, ɛ-taabalʋ Yonataanɩ woba nɛ ɛna-ɩ nɛ ɛkpazɩ-ɩ ɖoŋ. (1 Sam. 23:​16, 17) Mbʋ ɖɔɖɔ Yehowa kaatɩŋnɩ Eliizee yɔɔ nɛ ɛsɩnɩ Eliya. (1 Awi. 19:​16, 21; 2 Awi. 2:2) Sɔnɔ, Yehowa pɩzɩɣ nɛ ɛtɩŋnɩ ɖɔ-hɔʋ taa mba, ɖa-taabalaa yaa ɛgbɛyɛ taa ɛzʋtʋyaa yɔɔ nɛ ɛsɩnɩ-ɖʋ. Paa mbʋ yɔ, alɩwaatʋ ndʋ ɖɩwɛɣ laŋwɛɛkɩyɛ taa yɔ, pɩpɩzɩɣ nɛ pɩlabɩ-ɖʋ ɛzɩ pɩwɛɛ se ɖiposi ɖa-tɩ nɛ ɛyaa lalaa yɔ. Pɩlakɩ-ɖʋ ɛzɩ ye ɖɩwɛ ɖe-ɖeke yɔ, pɩkɩlɩ ɖeu. Ye pɩtalɩ-ɖʋ mbʋ yɔ, pɩtɩkɛ kɩwɛɛkɩm. Ɛlɛ ɛbɛ ɖɩpɩzɩɣ ɖɩla nɛ Yehowa sɩnɩ-ɖʋ?

13. Ɛbɛ pɩwɛɛ se ɖɩla nɛ Yehowa sɩnɩ-ɖʋ? (Cɔnɩ ɖɔɖɔ kɩlɛmʋʋ.)

¹³ Mbʋ pɩpɔzʋʋ se ɖɩla yɔ. Ñaɣ pana kpem nɛ ŋtaaposi ña-tɩ nɛ ɛyaa lalaa. Ye ɖiposuu ɖa-tɩ nɛ ɛyaa lalaa yɔ, pɩpɩzɩɣ piyele nɛ ɖɩpaɣzɩ maɣzʋʋ ɖe-ɖeke ɖɔ-yɔɔ nɛ kala wena ɖɩkatɩɣ yɔ a-yɔɔ. Pɩpɩzɩɣ nɛ pɩwɛɛnɩ ɖoŋ lɩmaɣza wena ɖɩkpakɩɣ yɔ a-yɔɔ. (Adu. 18:1) Pɩkɛ toovenim se nabʋyʋ taa, ɖa-tɩŋa payɩ pɩpɩzɩɣ nɛ pɩpɔzɩ se ɖɩwɛɛ ɖe-ɖeke, kɔzɩ kɔzɩ alɩwaatʋ ndʋ ɖɩkatɩɣ kaɖɛ wɛtʋ natʋyʋ yɔ. Paa mbʋ yɔ, ye ɖiposuu ɖa-tɩ nɛ ɛyaa lalaa alɩwaatʋ sakɩyɛ yɔ, pɩpɩzɩɣ nɛ pɩla se ɖɩwɛɛ nɛ ɖikiziɣ nʋmɔʋ ŋgʋ kɩ-yɔɔ Yehowa tɩŋɩɣna se ɛsɩnɩ-ɖʋ yɔ. Pʋyɔɔ lɛ, paa pɩwɛ kaɖɛ ɛzɩma yɔ, tisi nɛ ñɔ-hɔʋ taa mba, ña-taabalaa nɛ ɛgbɛyɛ taa ɛzʋtʋyaa sɩnɩ-ŋ alɩwaatʋ ndʋ ŋkatɩɣ kaɖɛ naɖɩyɛ yɔ. Kpaɣ-wɛ se pɔ-yɔɔ Yehowa wɛɛ nɛ ɛtɩŋɩɣna se ɛsɩnɩ-ŋ.—Adu. 17:17; Iza. 32:​1, 2.

YEHOWA KAƔ HƐZƲƲ ÑA-LAŊƖYƐ

14. Wɛtʋ ndʋ ɖɩpɩzɩɣ ɖɩkatɩ nɛ tɩkpaɣ-ɖʋ sɔɔndʋ?

¹⁴ Kaɖɛ. Ðɩpɩzɩɣ ɖɩkatɩ wɛtʋ natʋyʋ nɛ sɔɔndʋ kpaɣ-ɖʋ. Bibl taa, Yehowa sɛyaa siɣsiɣ tɩnaa nabɛyɛ yɔɔdɩ ɛzɩma po-koyindinaa yaa kala lɛɛna kaayeba nɛ pɛwɛɛ laŋwɛɛkɩyɛ taa nɛ sɔɔndʋ kpaɣ-wɛ yɔ. (Keɣ. 18:4; 55:​1, 5) Ða ɖɔɖɔ, papɩzɩɣ nɛ pakaɖɩnɩ-ɖʋ sukuli taa,  tʋmɩyɛ taa nɛ ɖɔ-hɔʋ taa; yaa komina pɩzɩɣ nɛ kɩkaɖɩnɩ-ɖʋ. Halɩ kʋdɔŋ nakʋyʋ pɩzɩɣ nɛ kɩkpa-ɖʋ nɛ sɔɔndʋ kpaɣ-ɖʋ se pɩtaakɛdɩ nɛ ɖɩsɩ. Ye ɖɩkatɩɣ wɛtʋ natʋyʋ mbʋ yɔ, pɩpɩzɩɣ nɛ pɩlabɩ-ɖʋ ɛzɩ ɖɩfɛyɩnɩ ɖoŋ nɩɩyɩ ɛzɩ pɩlakʋʋ pɩɣa cikpelaɣ nakɛyɛ yɔ. Ɛzɩma tɩyɛ Yehowa sɩɣnɩ-ɖʋ wɛtʋ ndʋ tɩ-taa?

15. Laŋɩyɛ hɛzʋʋ tɔm ndʋ Keɣa 94:19 heyiɣ-ɖʋ?

¹⁵ Ɛzɩma Yehowa sɩɣnɩ-ɖʋ? Yehowa hɛzɩɣ ɖa-laŋɩyɛ nɛ eyeki nɛ ɖɔ-yɔɔ hɛɣ. (Kalɩ Keɣa 94:19.) Pʋtɔma, keɣa kanɛ keyeki se ɖɩmaɣzɩ halɩbɩɣa cikpelaɣ nakɛyɛ yɔɔ. Sɔɔndʋ kpaɣ-kɛ se koɖoo, mbʋ pʋyɔɔ yɔ tɛʋ sɔsɔʋ nakʋyʋ ɖiɣni nɩʋ nɛ helim ñɛwɛɛ nɛ pɩmakɩ ɖɔɖɔ. Ðɩpɩzɩɣ nɛ ɖɩmaɣzɩ nɛ ɖɩna ɛzɩma ka-caa kɔŋ nɛ ɛkpaɣ-kɛ ɛ-nɔkɔyʋʋ taa pɩkɔɔ nɛ pɩsɩɩnɩ alɩwaatʋ ndʋ koɖowa yɔ. Paa tɛʋ ŋgʋ kiɖiɣni nɩʋ mbʋ yɔ, ɛzɩma ka-caa kpaɣ-kɛ ɛ-nɔkɔyʋʋ taa yɔ, pɩhɛzɩ ka-laŋɩyɛ. Alɩwaatʋ ndʋ ɖɩkatɩɣ wɛtʋ natʋyʋ nɛ tɩkpaɣ-ɖʋ sɔɔndʋ yɔ, pɩpɩzɩɣ nɛ pɩpɔzɩ ɖɔɖɔ se ɖa-Caa weyi ɛwɛ ɛsɔdaa yɔ ɛkpaɣ-ɖʋ ɛ-nɔkɔyʋʋ taa nɛ pɩkɔɔ pɩsɩɩnɩ alɩwaatʋ ndʋ ɖɔ-sɔɔndʋ hɛwa yɔ. Ɛzɩma Yehowa pɩzɩɣ nɛ ɛhɛzɩ ɖa-laŋɩyɛ?

16. Ɛbɛ ɖɩpɩzɩɣ ɖɩla nɛ Yehowa hɛzɩ ɖa-laŋɩyɛ? (Cɔnɩ ɖɔɖɔ kɩlɛmʋʋ.)

¹⁶ Mbʋ pɩpɔzʋʋ se ɖɩla yɔ. Kpakɩɣ alɩwaatʋ ɖoŋ ɖoŋ nɛ ŋtɩmɩɣnɩ Yehowa nɛ ŋkalɩɣ ɛ-Tɔm. (Keɣ. 77:​1, 12-14) Ðɩnɛ ɛlɛ, alɩwaatʋ ndʋ ŋwɛɣ laŋwɛɛkɩyɛ taa yɔ, ŋkaɣ pɩsɩnʋʋ Yehowa yɔɔ kpaagbaa nɛ ŋpɔzɩ-ɩ se ɛsɩnɩ-ŋ. Heyi-i mbʋ pɩkpaɣ-ŋ sɔɔndʋ nɛ mbʋ pɩhaɣ-ŋ nɩɣzɛ yɔ. Yele nɛ ɛtɩŋnɩ Masɩ yɔɔ nɛ ɛyɔɔdɩnɩ-ŋ nɛ ɛhɛzɩ ña-laŋɩyɛ. (Keɣ. 119:28) Pʋtɔma, ŋkaɣ naʋ se Bibl taa hɔɔlɩŋ nɩɩyɩ pɩzɩɣ nɛ ɩhɛzɩ ña-laŋɩyɛ alɩwaatʋ ndʋ sɔɔndʋ kpaɣ-ŋ yɔ. Pɩtɩla, tɔm ndʋ tɩwɛ Yɔɔb, Keɣsi nɛ Aduwa takayɩsɩ taa, pɩkpɛndɩnɩ tɔm ndʋ Yesu yɔɔdɩ Maatiyee ñʋʋ 6 taa yɔ, tɩpɩzɩɣ nɛ tɩhɛzɩ ña-laŋɩyɛ. Ye ŋtɩmɩɣnɩ Yehowa nɛ ŋkalɩɣ ɛ-Tɔm yɔ, ŋkaɣ naʋ ɛzɩma ɛhɛzɩɣ ña-laŋɩyɛ yɔ.

17. Tɔm ndʋ ɖa-taa pɩzɩɣ nɛ pɩtɛmna?

¹⁷ Ða-taa pɩzɩɣ nɛ pɩtɛ se alɩwaatʋ ndʋ ɖɩkatɩɣ kala ɖe-wezuu caɣʋ taa yɔ, Yehowa wɛɣ ɖɔ-cɔlɔ se ɛsɩnɩ-ɖʋ. Ðɩɩkaɣ wɛʋ ɖe-ɖeke. (Keɣ. 23:4; 94:14) Yehowa labɩ tamaɣ se ɛkaɣ ɖɔ-yɔɔ ɖaŋʋʋ, ɛkaɣ labʋ nɛ ɖɩka camɩyɛ, ɛkaɣ-ɖʋ sɩnʋʋ nɛ ɛkaɣ ɖa-laŋɩyɛ hɛzʋʋ. Pɔyɔɔdɩ Yehowa tɔm Izaayii 26:3 taa se: «Ŋkaɣ kandɩyʋʋ mba pamalɩɣnɩ-ŋ nɛ pɛtɛŋ pa-taa yɔ pɔ-yɔɔ; ŋkaɣ-wɛ haʋ laŋhɛzɩyɛ nɖɩ ɖɩwɛɣ tam yɔ, mbʋ pʋyɔɔ yɔ ña pataɣ liu.» Pʋyɔɔ lɛ, taa Yehowa liu nɛ ŋyele nɛ nʋmɔŋ weyi ɩ-yɔɔ ɛtɩŋɩɣna se ɛsɩnɩ-ŋ yɔ ɩwazɩ-ŋ. Ye ŋlakɩ mbʋ yɔ, ŋkaɣ ɖaɣnʋʋ kpaʋ ɖoŋ, halɩ pɩkpɛndɩnɩ kaɖɛ alɩwaatʋ taa.