TƆM ÑƲƲ ŊGƲ ÐƖKPƐLƖKƖƔ YƆ 5
HENDU 108 Ɛsɔ sɔɔlɩm
Ɛzɩma Yehowa sɔɔlɩm wazɩɣ-ɖʋ?
«Krɩstʋ Yesu kɔm ɛjaɖɛ yɔɔ se ɛya kɩwɛɛkɩm laɖaa ñʋʋ.»—1 TIM. 1:15.
LƖMAƔZƖYƐ SƆSƆÐƐ
Ðɩkaɣ naʋ ɛzɩma kɩhɛyʋʋ pʋ-ñʋʋ taa kɩlaʋ wazɩɣ-ɖʋ yɔ nɛ ɛzɩma ɖɩpɩzɩɣ nɛ ɖɩwɩlɩ Yehowa ɖɛ-ɛsɩmɩyɛ kɩlaʋ ŋgʋ kɩ-yɔɔ yɔ.
1. Ɛbɛ ɖɩpɩzɩɣ ɖɩla nɛ Yehowa taa la leleŋ?
MAƔZƖ se ŋlabɩ kʋjɔʋ kɩbaŋʋ nakʋyʋ ɛyʋ weyi ŋsɔɔlɩ-ɩ yɔ; kʋjɔʋ ŋgʋ kɩwɛ kajʋka nɛ kɩwɛ wazaɣ. Ye ɛyʋ ɛnʋ ɛkpaɣ kʋjɔʋ ŋgʋ nɛ ɛsɩɩ ɖoŋnɔɔyʋ nɛ ɛsɔɔ kɩ-yɔɔ yɔ, pɩɩkɛdɩɣnɩ-ŋ. Ɛlɛ ye ɛlabɩnɩ kʋjɔʋ ŋgʋ tʋmɩyɛ camɩyɛ nɛ ɛwɩlɩ-ŋ ɖɔɖɔ ɛ-ɛsɩmɩyɛ kɩ-yɔɔ yɔ, pɩtʋʋ fɛyɩ se pɩkɛdɩɣnɩ-ŋ. Suwe ɖɩcaɣ yɔɔdʋʋ? Yehowa cɛlɩ ɛ-Pɩyalʋ ɖɔ-yɔɔ. Ye mbʋ, Yehowa taa kaɣ labʋ leleŋ ye ɖɩwɩlɩɣ-ɩ ɖɛ-ɛsɩmɩyɛ kʋjɔʋ kɩbaŋʋ ŋgʋ kɩ-yɔɔ yɔ. Ɛ-taa lakɩ leleŋ ɖɔɖɔ ye ɖɩwɩlɩɣ-ɩ ɖɛ-ɛsɩmɩyɛ sɔɔlɩm mbʋ pituyi-i nɛ ɛhɛyɩ kɩhɛyʋʋ pʋ-ñʋʋ taa yɔ pɩ-yɔɔ yɔ.—Yoh. 3:16; Roma 5:7, 8.
2. Ɛbɛ ɖɩkaɣ naʋ tɔm ñʋʋ kʋnɛ kɩ-taa?
2 Ɛlɛ alɩwaatʋ wɛɣ nɛ tɩɖɛɣ lɛ, pɩtɩla ɖɩɩtasɩɣ kpaɣʋ kɩhɛyʋʋ pʋ-ñʋʋ taa kɩlaʋ ɛzɩ mbʋ pɩmʋ ñɩm siŋŋ yɔ. Pɩwɛɣ ɛzɩ ɖɩkpaɣ Ɛsɔ kʋjɔʋ nɛ ɖɩsɩɩ ɖoŋnɔɔyʋ nɛ ɖɩsɔɔ kɩ-yɔɔ yɔ. Ða-taa labɩ leleŋ se ɛlabɩ-ɖʋ kʋjɔʋ ŋgʋ, ɛlɛ ɖɩkpaɣ-kʋ nɛ ɖɩsɩɩ ɖenɖe ɖɩɩpɩzɩɣ nɛ ɖɩtasɩ-kʋ naʋ yɔ. Pɩsa nɛ pɩtaatalɩ-ɖʋ mbʋ lɛ, pɩwɛɛ se ɖɩmaɣzɩɣ mbʋ payɩ Ɛsɔ nɛ Krɩstʋ palabɩ-ɖʋ yɔ pɩ-yɔɔ ɖoŋ ɖoŋ. Tɔm ñʋʋ kʋnɛ kɩkaɣ-ɖʋ sɩnʋʋ nɛ ɖɩna ɛzɩma ɖɩpɩzɩɣ nɛ ɖɩla mbʋ yɔ. Ðɩkaɣ naʋ ɛzɩma kɩhɛyʋʋ pʋ-ñʋʋ taa kɩlaʋ wazɩɣ-ɖʋ sɔnɔ sɔnɔ nɛ ɛzɩma kɩpɩzɩɣ nɛ kɩwazɩ-ɖʋ cee wayɩ yɔ. Ðɩkaɣ naʋ ɖɔɖɔ mbʋ ɖɩpɩzɩɣ ɖɩla nɛ ɖɩwɩlɩ Yehowa ɖɛ-ɛsɩmɩyɛ ɛ-sɔɔlɩm yɔɔ, kɔzɩ kɔzɩ Yesu sɩm yɔɔ tɔzʋʋ sɔnzɩ alɩwaatʋ tʋnɛ tɩ-taa yɔ.
ƐZƖMA KƖHƐYƲƲ PƲ-ÑƲƲ TAA KƖLAƲ WAZƖƔ-ÐƲ SƆNƆ SƆNƆ?
3. Ɛzɩma kɩhɛyʋʋ pʋ-ñʋʋ taa kɩlaʋ wazɩɣ-ɖʋ sɔnɔ sɔnɔ?
3 Ðɩtɛm paɣzʋʋ hiɣu Krɩstʋ kɩhɛyʋʋ pʋ-ñʋʋ taa kɩlaʋ wazasɩ. Kɩhɛyʋʋ ŋgʋ kɩ-yɔɔ Yehowa kpeɣu-ɖʋ ɖa-kɩwɛɛkɩm. Pɩtɩkɛnɩ-ɩ kɩjɛyʋʋ se ekpeɣ-ɖʋ ɖa-kɩwɛɛkɩm. Ɛlɛ ɛsɔɔlɩ faaa se ekpeɣ-ɖʋ. Keɣa maɖʋ kaawɩlaa se ɛwɛnɩ ɛsɩmɩyɛ Yehowa kpaɣʋ nɛ kpeɣu yɔɔ; ɛyɔɔdaa se: «Mbʋ pʋyɔɔ yɔ, Oo Yehowa, ŋwɛ ɖeu nɛ ŋsɔɔlɩ kpeɣu.»—Keɣ. 86:5; 103:3, 10-13.
4. Mba yɔɔ Yehowa hɛyɩ kɩhɛyʋʋ pʋ-ñʋʋ taa? (Luka 5:32; 1 Timootee 1:15)
4 Nabɛyɛ pɩzɩɣ nɛ pamaɣzɩ se patɩmʋna se Yehowa ekpeɣ-wɛ pa-kɩwɛɛkɩm. Toovenim taa lɛ ɖa-taa nɔɔyʋ tɩmʋna se pekpeɣ-i ɛ-kɩwɛɛkɩm. Apostoloo Pɔɔlɩ nɩ pɩ-taa se ‘ɛtɩmʋna se payaa-ɩ se apostoloo.’ Paa mbʋ yɔ ɛsɔzaa se: «Pɩtɩŋnɩ Ɛsɔ lootiye yɔɔ lɛ, mɛnkɛ mbʋ mɛnkɛwa yɔ.» (1 Kɔr. 15:9, 10) Alɩwaatʋ ndʋ ɖikpiɖiɣ ɖa-kɩwɛɛkɩm yɔɔ yɔ, Yehowa kpakɩɣ nɛ ekpeɣu-ɖʋ. Ɛbɛ yɔɔ? Pɩtɩkɛ se ɖɩmʋnaa yɔɔ ekpeɣu-ɖʋ, ɛlɛ ekpeɣu-ɖʋ mbʋ pʋyɔɔ yɔ ɛsɔɔlɩ-ɖʋ. Ye ŋwɛ laŋwɛɛkɩyɛ taa mbʋ pʋyɔɔ yɔ ŋmaɣzɩɣ se ŋtɩmʋna se Yehowa ekpeɣ-ŋ yɔ, tɔzɩ se pɩtɩkɛ mba patalɩ pilim yɔ pɔ-yɔɔ ɛhɛyɩ kɩhɛyʋʋ pʋ-ñʋʋ taa, ɛlɛ kɩwɛɛkɩm laɖaa yɔɔ ɛhɛyɩ-kʋ.—Kalɩ Luka 5:32; 1 Timootee 1:15.
5. Ða-taa nɔɔyʋ mʋnaa se Yehowa ɛna ɛ-pʋtɔdɩyɛ na? Lɩzɩ pɩ-taa.
5 Pɩfɛyɩ se ɖa-taa nɔɔyʋ ɛmaɣzɩ se ɛwɛʋ nɛ ɛsɛɣ Yehowa yɔ pɩlakɩ pɩnzɩ sakɩyɛ nɛ pʋyɔɔ lɛ, ɛmʋnaa se Yehowa ekpeɣ-i ɛ-kɩwɛɛkɩm. Toovenim taa lɛ, Yehowa tɔzʋʋ mbʋ payɩ ɖɩlabɩ ɛ-sɛtʋ taa yɔ pɩ-yɔɔ. (Ebr. 6:10) Ɛlɛ, kʋjɔʋ Yehowa labɩ-ɖʋ nɛ ɛha-ɖʋ ɛ-Pɩyalʋ, pɩtɩkɛ mbʋ ɖɩlabɩ ɛ-sɛtʋ taa yɔ pɩ-kɩhɛyʋʋ pɩkɛnaa. Ye ɖɩmaɣzɩɣ se ɖɩmʋnaa se Ɛsɔ ɛna ɖa-pʋtɔdɩyɛ yaa ɖɩmʋnaa se ɛcɔnɩ ɖɔ-yɔɔ camɩyɛ yɔ, ɖɩnɛ ɛlɛ pɩwɛ ɛzɩ ɖɩwɛɛ nɛ ɖɩyɔɔdʋʋ se Krɩstʋ sɩbɩ falaa yɔ.—Kpaɣ-tʋ nɛ ŋmaɣzɩnɩ Galaatii mba 2:21.
6. Ɛbɛ yɔɔ Pɔɔlɩ kaañaɣ pana siŋŋ Yehowa sɛtʋ taa?
6 Pɔɔlɩ kaanawa se ɛtɩmʋna se Ɛsɔ ɛna ɛ-pʋtɔdɩyɛ. Ye mbʋ, ɛbɛ yɔɔ ɛɛñaɣ pana siŋŋ Yehowa sɛtʋ taa? Ɛtaala mbʋ se ɛwɩlɩ se ɛmʋnaa se Ɛsɔ ɛna ɛ-pʋtɔdɩyɛ, ɛlɛ ɛlabɩ mbʋ se ɛwɩlɩ Yehowa ɛ-ɛsɩmɩyɛ e-lootiye yɔɔ. (Efɛz. 3:7) Ɛzɩ Pɔɔlɩ yɔ, ɖɩɩsɛɣ Yehowa nɛ kpekpeka se pɩsa nɛ ɛna ɖa-pʋtɔdɩyɛ, ɛlɛ ɖɩsɛɣ-ɩ mbʋ pʋyɔɔ yɔ ɖɩsɔɔlaa se ɖɩwɩlɩ-ɩ ɖɛ-ɛsɩmɩyɛ.
7. Wazaɣ lɛɛka ŋga kɩhɛyʋʋ pʋ-ñʋʋ taa kɩlaʋ yeki se ɖihiɣ sɔnɔ sɔnɔ? (Roma mba 5:1; Yakubu 2:23)
7 Wazaɣ lɛɛka ŋga kɩhɛyʋʋ pʋ-ñʋʋ taa kɩlaʋ yeki se ɖihiɣ sɔnɔ sɔnɔ yɔ, ŋga lɛ se taabalɩyɛ kɩbanɖɛ pɩzɩɣ nɛ ɖɩwɛɛ ɖa nɛ Yehowa ɖɛ-hɛkʋ taa. a Ɛzɩ ɖɩtɛm yɔɔdʋʋ tɔm ñʋʋ ŋgʋ kɩɖɛwa yɔ kɩ-taa yɔ, alɩwaatʋ ndʋ palʋlɩ-ɖʋ yɔ taabalɩyɛ naɖɩyɛ taawɛɛ ɖa nɛ Yehowa ɖɛ-hɛkʋ taa. Ɛlɛ kɩhɛyʋʋ pʋ-ñʋʋ taa kɩlaʋ yɔɔ lɛ, laŋhɛzɩyɛ pɩzɩɣ nɛ ‘ɖɩwɛɛ ɖa nɛ Ɛsɔ ɖɛ-hɛkʋ taa’ nɛ ɖɩpɩzɩɣ nɛ ɖɩñɔtɩnɩ-ɩ.—Kalɩ Roma mba 5:1; Yakubu 2:23.
8. Ɛbɛ yɔɔ pɩwɛɛ se ɖɩwɛɛnɩ ɛsɩmɩyɛ waɖɛ nɖɩ ɖɩwɛna se ɖɩtɩmnɩ Yehowa yɔ ɖɩ-yɔɔ?
8 Taabalɩyɛ nɖɩ ɖɩwɛɣ ɖa nɛ Yehowa ɖɛ-hɛkʋ taa yɔ, ɖɩhaɣ-ɖʋ waɖɛ se ɖɩtɩmɩɣnɩ-ɩ; nɛ waɖɛ nɖɩ ɖɩwɛ ŋgee kpem. Pɩtasɩna se Yehowa welisiɣ adɩma wena ɛ-samaɣ lakɩ alɩwaatʋ ndʋ kekpeɣliɣ yɔ lɛ, ewelisiɣ ɖɔɖɔ adɩma wena ka-taa paa weyi lakɩ yɔ. Adɩma pɩzɩɣ nɛ ahɛzɩ ɖa-laŋa nɛ ahaɣ-ɖʋ lɩmaɣza taa laŋhɛzɩyɛ, ɛlɛ pɩtɩkɛ adɩma wazaɣ ɖeke lɛ. Adɩma pɩzɩɣ ɖɔɖɔ nɛ acɛyɩsɩ ɖa nɛ Ɛsɔ ɖa-taabalɩyɛ. (Keɣ. 65:2; Yak. 4:8; 1 Yoh. 5:14) Yesu kaawɛ tɛtʋ yɔɔ lɛ, ɛtɩmaɣnɩ Yehowa ɖoŋ ɖoŋ mbʋ pʋyɔɔ yɔ ɛɛnawa se ewelisiɣ ɛ-adɩma, nɛ adɩma yekaɣ ɖɔɖɔ se ɛ nɛ ɛ-Caa pa-taabalɩyɛ ɛcɛyɩsɩ. (Luka 5:16) Ðɩwɛnɩ ɛsɩmɩyɛ siŋŋ se Yesu kɩlaʋ pɩzɩɣ kiyele nɛ taabalɩyɛ kɩbanɖɛ wɛɛ ɖa nɛ Yehowa ɖɛ-hɛkʋ taa, nɛ halɩ kɩpɩzɩɣ kiyele nɛ ɖɩtɩŋnɩ adɩma yɔɔ nɛ ɖɩyɔɔdɩnɩ-ɩ.
ƐZƖMA KƖHƐYƲƲ PƲ-ÑƲƲ TAA KƖLAƲ KAƔ-ÐƲ WAZƲƲ CEE WAYƖ?
9. Ɛzɩma kɩhɛyʋʋ pʋ-ñʋʋ taa kɩlaʋ kaɣ wazʋʋ Yehowa sɛyaa siɣsiɣ tɩnaa cee wayɩ?
9 Ɛzɩma kɩhɛyʋʋ pʋ-ñʋʋ taa kɩlaʋ kaɣ wazʋʋ Yehowa sɛyaa siɣsiɣ tɩnaa cee wayɩ? Pakaɣ hiɣu wezuu maatɛŋ. Ɛyaa sakɩyɛ maɣzɩɣ se ɛyʋ ɛɛpɩzɩɣ nɛ ɛcaɣ wezuu tam, mbʋ pʋyɔɔ yɔ ɛyaa paɣzʋʋ sɩbʋ yɔ pɩlakɩ pɩnzɩ kudokiŋ sakɩyɛ yɔ. Ɛlɛ tamaɣ ŋga Ɛsɔ kaalabɩ kiɖe tɛɛ yɔ, ŋga lɛ se ɛyaa ɩcaɣ wezuu tam. Ye Aɖam ɛtaala kɩwɛɛkɩm yɔ, nɔɔyʋ taamaɣzɩ kpa se ɛyʋ ɛɛpɩzɩɣ nɛ ɛcaɣ wezuu tam, paa weyi ɛɛcaɣ wezuu tam tam. Nɛ paa sɔnɔ sɔnɔ pɩwɛ kaɖɛ se ɖɩmaɣzɩ se ɖɩkaɣ caɣʋ wezuu tam yɔ, ɖɩpɩzɩɣ nɛ ɖitisi tɔm ndʋ tɩ-yɔɔ mbʋ pʋyɔɔ yɔ Yehowa hɛyɩ kɩhɛyʋʋ sɔsɔʋ se pɩsa nɛ ɖɩpɩzɩ ɖɩcaɣ wezuu maatɛŋ. Kɩhɛyʋʋ ŋgʋ lɛ ɛ-maɣmaɣ ɛ-Pɩyalʋ wezuu.—Roma 8:32.
10. Ɛbɛ patam numwaa nɛ heŋ lɛɛŋ taa mba ɖaŋaa?
10 Paa cee wayɩ ɖɩkaɣ caɣʋ wezuu maatɛŋ yɔ, Yehowa sɔɔlaa se ɖɩmaɣzɩ kɩ-yɔɔ sɔnɔ sɔnɔ. Patam numwaa ɖaŋ kpam se pacaɣ wezuu kɩbaŋʋ ɛsɔdaa nɛ pa nɛ Krɩstʋ pɔtɔɔ kewiyitu ɛyaa mba pɛwɛɣ tɛtʋ yɔɔ yɔ pɔ-yɔɔ. (Natʋ 20:6) Heŋ lɛɛŋ taa mba ñaɖaŋ kpam se pacaɣ wezuu paradisuu taa, ɖenɖe wɩzasɩ, kʋñɔmɩŋ yaa laŋwɛɛkɩyɛ ɛɛtasɩɣ wɛʋ yɔ. (Natʋ 21:3, 4) Ŋwɛ heŋ lɛɛŋ taa ñɩma mba pɛwɛnɩ lidaʋ se pacakɩ wezuu tam tɛtʋ yɔɔ yɔ pa-taa? Ɛsɔdaa wezuu caɣʋ tɩkpaɖɩ tɛtʋ yɔɔ wezuu caɣʋ. Ɛsɔ kaalɩzɩ ɛyaa lɛ, tɛtʋ yɔɔ ɛñɩnaɣ se pacaɣ wezuu. Ye mbʋ, wezuu ŋgʋ ɖɩkaɣ caɣʋ tɛtʋ yɔɔ yɔ kɩkaɣ-ɖʋ haʋ koboyaɣ siŋŋ.
11-12. Paradisuu taa wazasɩ nzɩ yɔɔ ɖɩpɩzɩɣ nɛ ɖɩmaɣzɩ? (Cɔnɩ ɖɔɖɔ kɩlɛmɩŋ.)
11 Maɣzɩ nɛ ŋna ɛzɩma wezuu caɣʋ kaɣ wɛʋ Paradisuu taa tɛtʋ yɔɔ yɔ. Ŋŋkaɣ tasʋʋ seu kʋdɔŋ yaa sɩm sɔɔndʋ. (Iza. 25:8; 33:24) Yehowa kaɣ-ŋ haɣzʋʋ mbʋ ñe-liu wɛɛ nɛ pɩmʋnaa yɔ. Ɛbɛ ŋsɔɔlaa se ŋkpɛlɩkɩ? Ŋsɔɔlaa se ŋkpɛlɩkɩ kpɩna yɔɔ tɔm nɛ pɩkɩlɩ? Yaa ŋsɔɔlaa se ŋkpɛlɩkɩ minziiki mabʋ? Yaa ŋsɔɔlaa se ŋkpɛlɩkɩ kɩlɛmɩŋ lɩzʋʋ? Pɩtʋʋ fɛyɩ se paradisuu taa, pɩkaɣ-ɖʋ pɔzʋʋ ɛyaa mba pasɩm kuduyuŋ anjaʋwaa lɩzʋʋ yaa kuduyuŋ maʋ yɔ nɛ haɖaa. Pɩtʋʋ fɛyɩ se pɩkaɣ pɔzʋʋ ɖɔɖɔ ɛyaa se patɩzɩ tɔɔnaɣ, polu wondu nɛ pɔcɔnɩ kaɖasɩ yɔɔ se sɩwɛɛ kajʋka. (Iza. 35:1; 65:21) Ðɩkaɣ caɣʋ wezuu maatɛŋ, pʋyɔɔ lɛ ɖɩwɛɣnɩ alɩwaatʋ se ɖɩkpɛlɩkɩ mbʋ payɩ ɖɩsɔɔlaa yɔ.
12 Pɩkɛɣnɩ taa leleŋ siŋŋ se ɖɩmʋ ɛyaa mba pakaɣ-wɛ fezuu yɔ. (Tʋma 24:15) Maɣzɩ ɖɔɖɔ nɛ ŋna ɛzɩma ña-taa kaɣ labʋ leleŋ alɩwaatʋ ndʋ ŋkpɛlɩkɩɣ Yehowa wondu kɩlɩzɩtʋ ndʋ tɩfɛyɩ kalʋʋ yɔ tɩ-yɔɔ tɔm se ŋtɩlɩ-ɩ nɛ pɩkpaɖɩ yɔ. (Keɣ. 104:24; Iza. 11:9) Kɔzɩ kɔzɩ lɛ, ŋŋkaɣ labʋ kɩwɛɛkɩm nabʋyʋ kaaʋ nɛ pɩpɔzɩ se ŋpɔzɩ Yehowa kpaɣʋ nɛ kpeɣu, nɛ ŋkaɣ pɩzʋʋ nɛ ŋsɛɛ-ɩ camɩyɛ. Ŋkaɣ sɔɔlʋʋ se ŋnɩɩ «kɩwɛɛkɩm leleŋ weyi eeleɖiɣ yɔ» nɛ ŋlesi cee wayɩ wazasɩ nzɩ? (Ebr. 11:25) Pɩtʋʋ fɛyɩ se aayɩ. Wazasɩ nzɩ ɖɩkaɣ hiɣu yɔ, sɩcɛzɩ kɩlaŋ weyi payɩ ɖɩlaɣ lɛɛlɛɛyɔ yɔ. Tɔzɩ se Paradisuu ɛɛkaɣ kɛnʋʋ cee wayɩ lidaʋ mbʋ tam. Wiɖiyi kɩkaɣ kɛnʋʋ lone nɖɩ ɖɩ-taa ɖɩwɛɣ paa evemiye nɖɩ yɔ. Nɛ ɖɩkaɣ hiɣu wazasɩ nzɩ sɩ-tɩŋa payɩ mbʋ pʋyɔɔ yɔ Yehowa sɔɔlɩ-ɖʋ siŋŋ nɛ ɛcɛlɩ ɛ-Pɩyalʋ ɖɔ-yɔɔ.
Wazasɩ nzɩ ŋɖaŋ kpam se ŋhiɣ Paradisuu taa? (Cɔnɩ tayʋʋ 11-12)
WƖLƖ ƐSƖMƖYƐ SƆƆLƖM MBƲ YEHOWA WƖLƖ-Ŋ YƆ PƖ-YƆƆ
13. Ɛzɩma ɖɩpɩzɩɣ nɛ ɖɩwɩlɩ ɖɛ-ɛsɩmɩyɛ sɔɔlɩm mbʋ Yehowa wɩlɩ-ɖʋ yɔ pɩ-yɔɔ?
13 Ɛzɩma ɖɩpɩzɩɣ nɛ ɖɩwɩlɩ ɖɛ-ɛsɩmɩyɛ Yehowa se ɛlabɩ-ɖʋ kɩhɛyʋʋ pʋ-ñʋʋ taa kʋjɔʋ. Ðɩpɩzɩɣ nɛ ɖɩla mbʋ ye ɖɩsɩɣ ɛ-tʋma kajalaɣ ɖeɖe ɖe-wezuu caɣʋ taa yɔ. (Mat. 6:33) Toovenim taa lɛ, Yesu sɩba «se pɩsa nɛ mba pɛwɛ wezuu yɔ, pataatasɩ caɣʋ wezuu pa-tɩ yɔɔ; ɛlɛ pacaɣ-kʋ weyi ɛsɩbɩ pɔ-yɔɔ nɛ pefezi-i yɔ ɛ-yɔɔ.» (2 Kɔr. 5:15) Pɩtʋʋ fɛyɩ se ɖɩsɔɔlaa se ɖɩtalɩ lootiye nɖɩ Yehowa labɩ-ɖʋ yɔ ɖɩ-kaɖʋwa.—Kalɩ 2 Kɔrɛntɩ mba 6:1.
14. Ɛzɩma ɖɩpɩzɩɣ nɛ ɖɩwɩlɩ se ɖɩtaɣ liu Yehowa lɔŋ tasʋʋ?
14 Ðɩpɩzɩɣ ɖɔɖɔ nɛ ɖɩwɩlɩ ɖɛ-ɛsɩmɩyɛ sɔɔlɩm mbʋ Yehowa wɩlɩ-ɖʋ yɔ pɩ-yɔɔ ye ɖɩtaɣ-ɩ liu nɛ ɖɩɖɔŋ ɛ-lɔŋ tasʋʋ yɔɔ yɔ. Ɛzɩma tɩyɛ? Alɩwaatʋ ndʋ ɖɩcaɣ kpaɣʋ lɩmaɣzɩyɛ ɛzɩ sukuli labʋ yaa tʋmɩyɛ labʋ hɔɔlʋʋ taa mbʋ yɔ yɔ, pɩpɔzʋʋ se ɖɩmaɣzɩ mbʋ Yehowa sɔɔlaa se ɖɩla yɔ pɩ-yɔɔ. (1 Kɔr. 10:31; 2 Kɔr. 5:7) Alɩwaatʋ ndʋ ɖɩtaɣ Yehowa liu yɔ, nabʋyʋ lakɩ nɛ pɩwɛ ɖeu kpem, mbʋ lɛ se tisuu mbʋ ɖɩwɛnɩ Yehowa yɔɔ yɔ pɩcɛyɩsɩɣ nɛ taabalɩyɛ nɖɩ ɖɩwɛ ɖa nɛ ɩ ɖɛ-hɛkʋ taa yɔ ɖɩkpaɣ ɖoŋ nɛ pɩkɩlɩɣ. Nɛ ɖe-lidaʋ ɖɔɖɔ kpaɣ ɖoŋ nɛ pɩkɩlɩ.—Roma 5:3-5; Yak. 2:21, 22.
15. Ɛzɩma ɖɩpɩzɩɣ nɛ ɖɩwɩlɩ ɖɛ-ɛsɩmɩyɛ Yesu sɩm yɔɔ tɔzʋʋ sɔnzɩ alɩwaatʋ taa?
15 Ðɩpɩzɩɣ nɛ ɖɩtɩŋnɩ ɖɔɖɔ nʋmɔʋ nakʋyʋ yɔɔ nɛ ɖɩwɩlɩ ɖɛ-ɛsɩmɩyɛ sɔɔlɩm mbʋ Yehowa wɩlɩ-ɖʋ yɔ pɩ-yɔɔ. Ŋgʋ lɛ se ɖɩla mbʋ payɩ ɖɩpɩzɩɣ yɔ Yesu sɩm yɔɔ tɔzʋʋ sɔnzɩ alɩwaatʋ taa nɛ ɖɩwɩlɩ Yehowa se ɖa-taa wɛ leleŋ siŋŋ kɩhɛyʋʋ pʋ-ñʋʋ taa kɩlaʋ yɔɔ. Pɩtasɩna se ɖɩlakɩ ɖʋtʋ se ɖiwolo Yesu sɩm yɔɔ tɔzʋʋ sɔnzɩ taa lɛ, ɖɩyaɣ ɛyaa lalaa ɖɔɖɔ se powolo sɔnzɩ nzɩ sɩ-taa. (1 Tim. 2:4) Ɛyaa mba ŋyaɣ se powolo sɔnzɩ nzɩ sɩ-taa yɔ, heyi-wɛ mbʋ pakaɣ labʋ sɩ-taa yɔ. Pɩtɩla pɩwɛɣ ɖeu se ŋwɩlɩ-wɛ video Ɛbɛ yɔɔ Yesu sɩba? nɛ Tɔzɩ Yesu sɩm yɔɔ; pɛwɛ jw.org yɔɔ. Pɩwɛɛ se ɛgbɛyɛ taa ɛzʋtʋyaa ɩyaa mba pɛhɛ fezuu taa yɔ. Maɣzɩ nɛ ŋna ɛzɩma taa leleŋ wɛɣ ɛsɔdaa nɛ tɛtʋ yɔɔ ye Yehowa heu kilebu nɔɔyʋ ɛpɩsɩ ɛ-kalakʋ taa yɔ. (Luka 15:4-7) Yesu sɩm yɔɔ tɔzʋʋ sɔnzɩ taa, paa ɖɩsɛɣ ɖama yɔ, ɖɩtaasɔɔ se ɖɩsɛɛ kɔzɩ kɔzɩ ɛyaa kɩfama mba pɔkɔŋ yɔ yaa ɛyaa mba peyebi sɔnzɩ nzɩ sɩ-taa kɔm pileɖaa yɔ. Ðɩsɔɔlaa se ɖiyele nɛ pa-taa la leleŋ se pɔkɔm sɔnzɩ nzɩ sɩ-taa.—Roma 12:13.
16. Ɛbɛ yɔɔ pɩwɛɛ se ɖɩwalɩsɩ ɖɛ-Ɛsɔ sɛtʋ tʋmɩyɛ Yesu sɩm yɔɔ tɔzʋʋ sɔnzɩ alɩwaatʋ taa?
16 Yesu sɩm yɔɔ tɔzʋʋ sɔnzɩ alɩwaatʋ taa, ŋpɩzɩɣ nɛ ŋla fezuu taa tʋma nɛ pɩkɩlɩ. Ye ɖɩlabɩ mbʋ yɔ, ɖɩwɩlɩɣ se ɖɩwɛnɩ ɛsɩmɩyɛ mbʋ payɩ Ɛsɔ nɛ Krɩstʋ palabɩ-ɖʋ yɔ pɩ-yɔɔ. Ye ɖɩlakɩ fezuu taa tʋma nɛ pɩkɩlɩɣ yɔ, ɖɩkaɣ naʋ ɛzɩma Yehowa sɩɣnɩ-ɖʋ yɔ nɛ pɩkɩlɩ, nɛ piyeki nɛ ɖɩtaa-ɩ liu nɛ pɩkɩlɩ. (1 Kɔr. 3:9) Pɩtasɩ lɛ, kalɩ Bibl masɩ nzɩ pahawa se pakalɩ Yesu sɩm yɔɔ tɔzʋʋ sɔnzɩ alɩwaatʋ taa yɔ. Masɩ nzɩ sɩ-ɖʋtʋ wɛ Ðɩtazɩ Masɩ taa paa evemiye nɖɩ hatʋ cabɩ takayaɣ taa. Sɩwɛ ɖɔɖɔ anjaʋ ŋgʋ kɩwɛ kpɩtaʋ hɛkʋ taa kediɣzaɣ Kpɛlɩkʋʋ takayaɣ taa yɔ. Halɩ ŋpɩzɩɣ nɛ ŋlɩzɩ se ŋtazɩɣ Bibl masɩ nzɩ sɩ-taa ña-tɩ yɔɔ kpɛlɩkʋʋ alɩwaatʋ taa.
17. Ɛbɛ kɛdɩɣnɩ Yehowa? (Kalɩ ɖɔɖɔ aɖakaɣ « Ɛzɩma ɖɩpɩzɩɣ nɛ ɖɩwɩlɩ Yehowa ɖɛ-ɛsɩmɩyɛ ɛ-sɔɔlɩm yɔɔ?»)
17 Pɩtɩla ñɛ-wɛtʋ ɛɛhaɣ-ŋ nʋmɔʋ se ŋla mbʋ payɩ pɩ-tɔm pɔyɔɔdɩ tɔm ñʋʋ kʋnɛ kɩ-taa yɔ. Paa mbʋ yɔ, tɔzɩ se Yehowa ɛɛkpakɩɣ mbʋ ŋlakɩ yɔ nɛ ɛmaɣzɩɣnɩ mbʋ lalaa lakɩ yɔ, ɛlɛ mbʋ pɩwɛ ña-laŋɩyɛ taa yɔ mbʋ ɛcɔŋna. Alɩwaatʋ ndʋ ɛnaɣ ña-laŋɩyɛ taa ɛsɩmɩyɛ nɖɩ ŋwɛnɩ kɩhɛyʋʋ pʋ-ñʋʋ taa kʋjɔʋ ŋgʋ ɛlabɩ-ɖʋ yɔ kɩ-yɔɔ yɔ, pɩkɛdɩɣnɩ-ɩ siŋŋ.—1 Sam. 16:7; Mark. 12:41-44.
18. Ɛbɛ yɔɔ pɩwɛɛ se ɖɩwɩlɩ ɖɛ-ɛsɩmɩyɛ Ɛsɔ Yehowa nɛ Yesu Krɩstʋ?
18 Kɩhɛyʋʋ pʋ-ñʋʋ taa kɩlaʋ yɔɔ Yehowa kpeɣu-ɖʋ ɖa-kɩwɛɛkɩm nɛ kɩ-yɔɔ ɖɔɖɔ taabalɩyɛ wɛ ɖa nɛ ɩ ɖɛ-hɛkʋ taa. Pɩtasɩ lɛ, kɩhɛyʋʋ ŋgʋ kɩ-yɔɔ ɖɩwɛnɩ lidaʋ se ɖɩkaɣ hiɣu wezuu maatɛŋ. Tɛtɛ nɛ paa ɛzɩmtaa lɛ, ɖɩwɩlɩɣ ɖɛ-ɛsɩmɩyɛ Yehowa ɛ-sɔɔlɩm yɔɔ, mbʋ pʋyɔɔ yɔ sɔɔlɩm mbʋ pituyini-i nɛ eyele se ɖihiɣ wazasɩ nzɩ. (1 Yoh. 4:19) Tɛtɛ nɛ ɖɩwɩlɩ ɖɔɖɔ ɖɛ-ɛsɩmɩyɛ Yesu, mbʋ pʋyɔɔ yɔ ɛsɔɔlɩ-ɖʋ siŋŋ nɛ ɛkpaɣ e-wezuu nɛ ɛlaa ɖɔ-yɔɔ.—Yoh. 15:13.
HENDU 154 Siɣsiɣ sɔɔlɩm
a Yehowa kpakaɣ mba pɛsɛɣaɣ-ɩ yɔ pa-kɩwɛɛkɩm nɛ ekpeɣu-wɛ halɩ pʋcɔ nɛ Yesu kpaɣ e-wezuu nɛ ɛhɛyɩ kɩhɛyʋʋ pʋ-ñʋʋ taa. Yehowa lakaɣ mbʋ, mbʋ pʋyɔɔ yɔ ɛ-taa kaatɛma se ɛ-Pɩyalʋ kaɣ wɛʋ siɣsiɣ nɛ pɩtalɩ sɩm taa. Ye mbʋ, Yehowa ɛsɩndaa lɛ, pɩɩwɛ ɛzɩ pɛtɛm hɛyʋʋ kɩhɛyʋʋ pʋ-ñʋʋ taa pʋcɔ nɛ Yesu sɩkɩ yɔ.—Roma 3:25.
