1. Ɛbɛ yɔɔ ɛyaa sakɩyɛ kɩlɩɣ maɣzʋʋ sɔnɔ?

 PƖTƖLA ŋɖiɣzinaa se sɔnɔ, ɛyaa sakɩyɛ maɣzɩɣ pa-tɩ yɔɔ nɛ pɩkɩlɩ ɛzɩma pamaɣzɩɣ lalaa yɔɔ yɔ. Kɩɖaʋ nakʋyʋ yɔ: Nabɛyɛ tɩŋɩɣnɩ réseaux sociaux waa yɔɔ nɛ pawɩlɩɣ pa-tɩ nɛ mbʋ palakɩ yɔ. Ɛlɛ, ɛyaa mba pɛcɛlɩɣ Ɛsɔ Yehowa samtʋ sɔnɔ yɔ patɩɖɔɔ. Tɔm ñʋʋ kʋnɛ kɩ-taa, ɖɩkaɣ cosuu tɔm pɔzʋʋ pʋnɛ pɩ-yɔɔ: Ye pɔtɔm se ɖɩcɛlɩ Yehowa samtʋ yɔ, pʋ-tɔbʋʋ lɛ suwe? Ɛbɛ yɔɔ pɩwɛɛ se ɖɩcɛlɩ-ɩ samtʋ? Ðɩkaɣ naʋ ɖɔɖɔ ɛzɩma ɖɩpɩzɩɣ nɛ ɖɩcɛlɩ Ɛsɔ samtʋ ndʋ tɩmʋnɩ-ɩ yɔ, nɛ ɛzɩma piileɖiɣ lɛ ɛ-maɣmaɣ ɛkaɣ ɛ-hɩɖɛ sam yɔ.

YE PƆTƆM SE ÐƖCƐLƖ YEHOWA SAMTƲ YƆ PƲ-TƆBƲƲ LƐ SUWE?

 2. Ɛzɩma Yehowa lɩzɩ ɛ-samtʋ nɛ ɛwɩlɩ Sinayii Pʋʋ yɔɔ? (Cɔnɩ ɖɔɖɔ kɩlɛmʋʋ.)

² Ɛbɛ payaɣ se samtʋ? Bibl taa lɛ, tɔm piye «samtʋ» pɩzɩɣ nɛ pɩkɛ mbʋ payɩ piyeki se nɔɔyʋ hɩɖɛ ɛsɛɛ yɔ. Yehowa holi Izrayɛɛlɩ mba yomiye taa Ejipiti nɛ pitileɖi lɛ, ɛlɩzɩ ɛ-samtʋ nɛ ɛwɩlɩ-wɛ. Maɣzɩ nɛ ŋna: Izrayɛɛlɩ mba miiliyɔɔwaa kpeɣli Sinayii Pʋʋ liu tɛɛ se pewelisini pɛ-Ɛsɔ. Mɩndʋ yuŋ ñɩndʋ natʋyʋ huuzi pʋʋ yɔɔ. Kpaagbaa mbʋ lɛ, tɛtʋ paɣzɩ ñamsʋʋ ɖoŋ, pʋʋ tɔʋ miŋ, tɛʋ nazɩɣ nɛ kɩñɩlɩsɩɣ nɛ nɔndɔʋ nakʋyʋ wiɣ ɖoŋ. (Ejl. 19:​16-18; 24:17; Keɣ. 68:8) Alɩwaatʋ ndʋ  Yehowa lɩzɩ ɛ-samtʋ sɔsɔtʋ ndʋ nɛ ɛwɩlɩ yɔ, pɩtʋʋ fɛyɩ se pɩɩɖɩɣzɩ Izrayɛɛlɩ mba siŋŋ.

 3. Ye pɔtɔm se ɖɩcɛlɩ Yehowa samtʋ yɔ pʋ-tɔbʋʋ lɛ suwe?

³ Nɛ ɖa ɛyaa yɔ, ɛzɩ ɖɩpɩzɩɣ nɛ ɖɩcɛlɩ Yehowa samtʋ na? Ɛɛɛ, ɖɩpɩzɩɣ. Nʋmɔŋ weyi ɩ-yɔɔ ɖɩpɩzɩɣ ɖɩtɩŋna nɛ ɖɩcɛlɩ Yehowa samtʋ yɔ ɩ-taa nakʋyʋ lɛ se ɖiheyi ɛyaa lalaa e-ɖoŋ sɔsɔŋ nɛ ɛ-wɛtʋ kɩbandʋ yɔɔ tɔm. Ðɩcɛlɩɣ ɖɔɖɔ Yehowa samtʋ alɩwaatʋ ndʋ ɖɩɖʋʋ-ɩ hɩɖɛ mbʋ payɩ ɛsɩɣnɩ-ɖʋ nɛ ɖɩlakɩ yɔ pɩ-yɔɔ yɔ. (Iza. 26:12) Wiyaʋ Daviid cɛlɩ Yehowa samtʋ, nɛ ɛkɛnɩ-ɖʋ kɩɖaʋ kɩbaŋʋ siŋŋ. Ɛɛlabɩ adɩma naayɛ Izrayɛɛlɩ samaɣ kpeekpe ɛsɩndaa nɛ ɛyɔɔdɩ se: «Oo Yehowa, ñatɩnɩ sɔsɔtʋ nɛ ɖoŋ nɛ kajʋka nɛ keɖeɣa nɛ paɣlɩka, mbʋ pʋyɔɔ yɔ ñatɩnɩ mbʋ payɩ pɩwɛ ɛsɔdaa nɛ tataa yɔ.» Daviid tɛm ɛ-adɩma lɛ, «samaɣ taa ɛyaa kpeekpe sa . . . Yehowa.»—1 Kro. 29:​11, 20.

 4. Ɛzɩma Yesu cɛlɩ Yehowa samtʋ?

⁴ Alɩwaatʋ ndʋ Yesu kaawɛ tɛtʋ yɔɔ yɔ, ɛcɛlɩ ɛ-Caa samtʋ. Eheyi ɛyaa se Yehowa hanɩ-ɩ ɖoŋ nɛ ɛlakɩ maamaaci lakasɩ nzɩ ɛlakaɣ yɔ. (Mark. 5:​18-20) Yesu tɩŋnɩ ɖɔɖɔ tɔm ndʋ ɛyɔɔdaɣ yɔ nɛ wɛtʋ ndʋ ɛɛwɛnɩ ɛyaa lalaa yɔɔ yɔ tɩ-yɔɔ nɛ ɛcɛlɩ ɛ-Caa samtʋ. Kɩyakʋ nakʋyʋ Yesu kaawɛɛ nɛ ɛwɩlɩɣ tɔm sinaagɔɔgɩ taa. Halʋ nɔɔyʋ kaawɛ mba pewelisaɣni-i yɔ pɛ-hɛkʋ taa, eleeu nɔɔyʋ kaawɛ halʋ ɛnʋ ɛ-taa pɩlakɩ pɩnzɩ 18. Eleeu ɛnʋ ɛɛpɩsɩ halʋ ɛnʋ kʋdɔndʋ nɛ ɛpa konɖoŋŋ nɛ ɛtaapɩzɩɣ se ɛsɩŋ yiɣ yiɣ. Pɩtʋʋ fɛyɩ se halʋ ɛnʋ ɛnɩɣaɣ siziŋ siŋŋ. Ɛ-tɔm labɩ Yesu pʋtɔdɩyɛ, nɛ Yesu ñɔtɩnɩ-ɩ nɛ eheyi-i nɛ sɔɔlɩm se: «Halʋ ña, poholi-ŋ ña-kʋdɔŋ taa.» Pʋwayɩ lɛ, Yesu tɩnɩ e-nesi ɛ-yɔɔ nɛ kpaagbaa mbʋ lɛ halʋ kʋyɩ nɛ ɛsɩŋ yiɣ yiɣ «nɛ ɛpaɣzɩ Ɛsɔ sam,» mbʋ pʋyɔɔ yɔ ɛ-yɔɔ kaacɛbɩ kiya. (Luka 13:​10-13) Pɩɩmʋnɩ mbʋ se halʋ ɛnʋ ɛcɛlɩ Ɛsɔ samtʋ, nɛ mbʋ pɩwɛɛ se ɖa ɖɔɖɔ ɖɩla.

ƐBƐ YƆƆ ÐƖCƐLƖƔ YEHOWA SAMTƲ?

 5. Lɩmaɣza wena yɔɔ pɩwɛɛ se ɖɩña Yehowa?

⁵ Ðɩcɛlɩɣ Yehowa samtʋ mbʋ pʋyɔɔ yɔ ɖɩñaŋɩ-ɩ siŋŋ. Lɩmaɣza sakɩyɛ yɔɔ pɩwɛɛ se ɖɩña Yehowa. Yehowa kɛ ɖoŋ tɩŋa tʋ; e-ɖoŋ fɛyɩnɩ kamaɣ. (Keɣ. 96:​4-7) Ðɩnaɣ ɛ-lɔŋsɩnɖɛ kpayɩ kpayɩ e-wondu kɩlɩzɩtʋ taa. Ɛnʋ hanɩ-ɖʋ wezuu nɛ mbʋ payɩ pɩpɔzʋʋ-ɖʋ se ɖɩwɛɛ wezuu yɔ. (Natʋ 4:11) Ɛwɛ siɣsiɣ. (Natʋ 15:4) Mbʋ payɩ ɛlakɩ yɔ piɖeɣni-i, nɛ paa ɛzɩmtaa lɛ ɛɖɔŋ ɛ-tamasɩ yɔɔ. (Yoz. 23:14) Pʋyɔɔ nayʋ Yereemii yɔɔdɩ Yehowa yɔɔ se: «Ajɛɛ lɔŋsɩnɖaa kpeekpe hɛkʋ taa nɛ pe-kewiyisi kpeekpe hɛkʋ taa lɛ, nɔɔyʋ fɛyɩ kaaʋ ɛzɩ ña yɔ.» (Yer. 10:​6, 7) Toovenim taa lɛ, lɩmaɣza wena a-yɔɔ pɩwɛɛ se ɖɩña ɖa-Caa weyi ɛwɛ ɛsɔdaa yɔ aɖɔ sakɩyɛ. Ɛlɛ pɩtasɩna se ɖɩñaŋ Yehowa lɛ, ɖɩsɔɔlɩ-ɩ ɖɔɖɔ.

 6. Ɛbɛ yɔɔ ɖɩsɔɔlɩ Yehowa?

⁶ Ðɩcɛlɩɣ Yehowa samtʋ mbʋ pʋyɔɔ yɔ ɖɩsɔɔlɩ-ɩ siŋŋ. Iyele nɛ ɖɩna Yehowa wɛtʋ kɩbandʋ ndʋ tɩ-yɔɔ ɖɩsɔɔlɩ-ɩ yɔ. Ɛkɛ pʋtɔdɩyɛ nayʋ. (Keɣ. 103:13; Iza. 49:15) Ɛnɩɣ ɛyaa siziŋ. (Zak. 2:8) Ɛsɩɣnɩ-ɖʋ se ɖɩtɩlɩ-ɩ nɛ ɖɩɖʋ-ɩ nɛ taabalɩyɛ. (Keɣ. 25:14; Tʋma 17:27) Nɛ ɛwɛnɩ tɩ luzuu; «eluzuu ɛ-tɩ nɛ ɛcɔŋnɩ ɛsɔdaa nɛ tɛtʋ, nɛ ɛkʋsʋʋ ɛjam mʋzʋʋ taa.» (Keɣ. 113:​6, 7) Lɩmaɣza ana a-tɩŋa a-yɔɔ lɛ, ɖɩcɛlɩɣ ɖɛ-Ɛsɔ sɔsɔ samtʋ.—Keɣ. 86:12.

 7. Ŋgee waɖɛ nɖɩ ɖɩwɛna?

⁷ Ðɩcɛlɩɣ Yehowa samtʋ mbʋ pʋyɔɔ yɔ ɖɩsɔɔlaa se ɛyaa lalaa ɩtɩlɩ-ɩ. Ɛyaa sakɩyɛ ɩɩsɩŋ Yehowa yɔɔ toovenim tɔm. Ɛbɛ yɔɔ? Mbʋ pʋyɔɔ yɔ Sataŋ yɛlɩnɩ cɛtɩm tɔm Yehowa yɔɔ  nɛ pɩyʋlʋsɩ pa-maɣzɩm. (2 Kɔr. 4:4) Sataŋ yeba nɛ ɛyaa taa tɛ se Yehowa cakɩnɩ ɛyaa, ɛɛmaɣzɩɣ pɔ-yɔɔ, nɛ ɛ-cɔlɔ kʋñɔmɩŋ weyi ɩwɛ ɛjaɖɛ yɔɔ yɔ ɩlɩnaa. Ɛlɛ ɖa lɛ, ɖɩsɩm Ɛsɔ yɔɔ toovenim tɔm. Ðɩwɛnɩ waɖɛ se ɖiyele nɛ ɛyaa tɩlɩ weyi ɖeyi ɖeyi Ɛsɔ kɛnaa yɔ nɛ paba ɖɔɖɔ pɛcɛlɩ-ɩ samtʋ. (Iza. 43:10) Keɣa 96 yɔɔdʋʋ se pɩcɛyaa se ɖɩcɛlɩ Yehowa samtʋ. Ðɩɩtazɩɣ Keɣa ŋga kɔ-hɔɔlɩŋ nɩɩyɩ taa lɛ, maɣzɩ nɛ ŋna nʋmɔŋ weyi ɩ-yɔɔ ŋpɩzɩɣ nɛ ŋtɩŋna nɛ ŋcɛlɩ Yehowa samtʋ ndʋ ɛmʋnaa se pɛcɛlɩ-ɩ yɔ.

ƐZƖMA ÐƖPƖZƖƔ ÐƖCƐLƖ YEHOWA SAMTƲ NDƲ TƖMƲNƖ-Ɩ YƆ?

 8. Nʋmɔʋ ŋgʋ yɔɔ ɖɩpɩzɩɣ ɖɩtɩŋna nɛ ɖɩcɛlɩ Yehowa samtʋ? (Keɣa 96:​1-3)

⁸ Kalɩ Keɣa 96:​1-3. Ðɩpɩzɩɣ nɛ ɖɩtɩŋnɩ tɔm ndʋ ɖɩyɔɔdʋʋ Yehowa yɔɔ yɔ tɩ-yɔɔ nɛ ɖɩcɛlɩ-ɩ samtʋ. Masɩ nzɩ, siseɣtiɣ Yehowa sɛyaa se ‘petee hendu Yehowa,’ ‘pasa ɛ-hɩɖɛ,’ ‘posusi ɛ-ñʋʋ yabʋ tɔm kɩbandʋ’ nɛ ‘posusi ɛ-samtʋ ajɛɛ taa.’ Ðɩpɩzɩɣ nɛ ɖɩtɩŋnɩ nʋmɔŋ ɛnɩ ɩ-yɔɔ nɛ ɖɩcɛlɩ ɖa-Caa weyi ɛwɛ ɛsɔdaa yɔ samtʋ. Yuuda ñɩma mba paawɛ siɣsiɣ yɔ nɛ kajalaɣ pɩnzɩ mɩnʋʋ taa Krɩstʋ ñɩma kaasɔɔlɩ siŋŋ se peheyi ɛyaa lalaa kɩbandʋ ndʋ payɩ Yehowa labɩ-wɛ yɔ tɩ-tɔm nɛ peyele nɛ ɛ-hɩɖɛ yɔɔ ñalɩ. (Dan. 3:​16-18; Tʋma 4:29) Ɛzɩma ɖa ɖɔɖɔ ɖɩpɩzɩɣ nɛ ɖɩla mbʋ?

9-10. Ɛbɛ Angelena kɩɖaʋ kpɛlɩkɩɣ-ŋ? (Cɔnɩ ɖɔɖɔ kɩlɛmʋʋ.)

⁹ Payaɣ koobu halɩñɩnʋ nɔɔyʋ se Angelena, a ɛwɛ Etaazuunii ɛjaɖɛ taa; iyele nɛ ɖɩna ɛ-kɩɖaʋ. Ɛlʋbɩ Yehowa hɩɖɛ yɔɔ nɛ abalɩtʋ ɛ-tʋmɩyɛ taa. Ɛɛkɛ tʋmlaɖʋ kɩfalʋ tʋmɩyɛ nɖɩ ɖɩ-taa, nɛ paaya-ɩ se ewolo kediɣzaɣ ŋga ka-taa mba pɛkɛ tʋmlaɖaa kɩfama yɔ peheyiɣ pɔ-yɔɔ tɔm tʋmlaɖaa lalaa yɔ. Angelena kaañɔɔzɩ fotonaa nabɛyɛ se ɛwɩlɩɣ-wɛ, nɛ eheyi-wɛ taa leleŋ weyi ehikiɣ mbʋ pʋyɔɔ yɔ ɛkɛ Yehowa Aseɣɖe Tʋ yɔ ɩ-tɔm. Ɛlɛ ɛyʋ weyi ɛyɔɔdaa pʋcɔ nɛ Angelena yɔɔdʋʋ yɔ, ɛyɔɔdaa se Yehowa Aseɣɖe Tɩnaa hɔʋ taa ɛcaɣaa nɛ ɛpaɣlɩ. Nɛ ɛpaɣzɩ yɔɔdʋʋ tɔm kɩdɛkɛdɩtʋ Yehowa Aseɣɖe Tɩnaa nɛ pe-tisuu yɔɔ. Angelena yɔɔdaa se: «Ma-laŋɩyɛ maɣaɣ. Paa mbʋ yɔ mɔnpɔzɩ man-tɩ se: “Meyeki nɛ nɔɔyʋ cɛtɩ tɔm Yehowa yɔɔ? Yaa malʋkɩ ɛ-yɔɔ?”»

¹⁰ Angelena tʋmɩyɛ taa taabalʋ ɛnʋ ɛtɛm  yɔɔdʋʋ lɛ, Angelena la adɩma naayɛ e-liu tɛɛ tobi. Pʋwayɩ lɛ eheyi-i nɛ nɔɔ kɩbaŋa se: «Mɔ-yɔɔ tɔm nɩɣzɩnɩ ña-ñɩndʋ. Ma ɖɔɖɔ Yehowa Aseɣɖe Tɩnaa hɔʋ taa mancaɣaa nɛ manpaɣlɩ, ɛlɛ mɛnkpɛndɩ mɛnkɛ Yehowa Aseɣɖe Tʋ halɩ nɛ sɔnɔ.» Paa sɔɔndʋ ɛkpaɣaɣ Angelena yɔ, ɛpɩzaa nɛ ɛɖɔkɩ ɛ-laŋɩyɛ nɛ ɛwɩlɩ-wɛ fotonaa mba pa-taa ɛ nɛ ɛ-taabalaa pɛwɛɛ nɛ pɛsɛɣ Yehowa nɛ taa leleŋ yɔ. Nɛ eheyi-wɛ ɖɔɖɔ e-tisuu yɔɔ tɔm nɛ ñamtʋ. (1 Pɩy. 3:15) Ɛbɛ lɩ pɩ-taa? Alɩwaatʋ ndʋ Angelena tɛm yɔɔdʋʋ yɔ, ɛ-tʋmɩyɛ taa taabalʋ ɛnʋ ɛlɛɣzɩ ɛ-lɩmaɣza. Halɩ ɛyɔɔdɩ taa leleŋ weyi eehiɣaa alɩwaatʋ ndʋ ɛɛkɛ pɩɣa nɛ ɛ nɛ Yehowa Aseɣɖe Tɩnaa pɛkpɛndɩɣ yɔ ɩ-tɔm. Angelena yɔɔdaa se: «Pɩmʋnaa se malʋ Yehowa yɔɔ. Pɩkɛnɩ-m hɩɖɛ ɖʋʋ se malʋ ɛ-hɩɖɛ yɔɔ.» Ða ɖɔɖɔ pɩkɛnɩ-ɖʋ hɩɖɛ ɖʋʋ se ɖɩsɛɛ Yehowa nɛ ɖɩcɛlɩ-ɩ samtʋ paa ɛyaa lalaa ipisiɣ ɛ-hɩɖɛ yɔ.

11. Kpaɣnɩ ɖooo caanaʋ taa nɛ pɩtalɩnɩ sɔnɔ, ɛzɩma Ɛsɔ sɛyaa toovenim ñɩma ɖɔm paɣtʋ kiɖe nɖɩ ɖɩwɛ Keɣa 96:8 taa yɔ ɖɩ-yɔɔ?

¹¹ Kalɩ Keɣa 96:8. Ðɩpɩzɩɣ ɖɩtɩŋnɩ ɖo-wondu ndʋ tɩmʋ ñɩm yɔ tɩ-yɔɔ nɛ ɖɩcɛlɩ Yehowa samtʋ. Kpaɣnɩ ɖooo caanaʋ taa, nʋmɔʋ ŋgʋ, kɩ-yɔɔ Ɛsɔ sɛyaa toovenim ñɩma tɩŋnaa nɛ paɖʋ Yehowa hɩɖɛ. (Adu. 3:9) Kɩɖaŋ nɩɩyɩ yɔ: Izrayɛɛlɩ mba kaaha liidiye nɛ po-wondu ndʋ tɩmʋ ñɩm yɔ nɛ pamanɩ templo nɛ pɔcɔnɩ kɩ-yɔɔ. (2 Awi. 12:​4, 5; 1 Kro. 29:​3-9) Yesu wayɩ tɩŋɩyaa nabɛyɛ kaaha «mbʋ pɛwɛna yɔ» nɛ paɖʋnɩ lɩm ɛ nɛ ɛ-apostoloowaa. (Luka 8:​1-3) Kajalaɣ pɩnzɩ mɩnʋʋ taa Krɩstʋ ñɩma ɖɔɖɔ kaaha liidiye nɛ pasɩnɩ po-koobiya Krɩstʋ ñɩma lalaa. (Tʋma 11:​27-29) Sɔnɔ, ɖa ɖɔɖɔ ɖɩpɩzɩɣ nɛ ɖɩtɩŋnɩ sɔɔlɩm haɖɛ yɔɔ nɛ ɖɩcɛlɩ Yehowa samtʋ.

12. Ɛzɩma sɔɔlɩm haɖɛ nɖɩ ɖɩlakɩ yɔ ɖɩpɩzɩɣ ɖiyele nɛ pɛcɛlɩ Yehowa samtʋ? (Cɔnɩ ɖɔɖɔ kɩlɛmʋʋ.)

¹² Iyele nɛ ɖɩna kɩɖaʋ ŋgʋ kɩwɩlɩɣ se sɔɔlɩm haɖɛ nɖɩ ɖɩlakɩ yɔ, ɖiyeki se pɛcɛlɩ Yehowa samtʋ yɔ. Pɩnaɣ 2020 taa, wɩlɩŋ nɩɩyɩ kaakpa Zimbaabuwee ɛjaɖɛ taa nɛ pileɖi siŋŋ. Ɛyaa sakɩyɛ weziŋ kaasʋ kaɖɛ taa, mbʋ pʋyɔɔ yɔ pataawɛɛnɩ tɔɔnaɣ, pɩkpɛndɩnɩ ɖo-koobu halɩñɩnʋ nɔɔyʋ; payaɣ-ɩ se Prisca. Paa pɩɩwɛ kaɖɛ siŋŋ yɔ, Prisca wobi pɩ-yɔɔ nɛ esusuu tɔm paa Cɩla ŋgʋ nɛ paa Kemeɣa ŋga, halɩ pɩkpɛndɩnɩ haɖaʋ alɩwaatʋ taa. Ɛ-cɔlɔ mba hoŋaɣ-ɩ mbʋ pʋyɔɔ yɔ mbʋ ɛzɩ ɛɛɖɛ hayɩm lɛ, ɛlɩɣ tɔm susuu. Nɛ pɔyɔɔdaɣ se: «Ŋkaɣ sɩbʋ ñɔɔsɩ.» Prisca taa kaatɛma se  Yehowa kaɣ cɔnʋʋ ɛ-yɔɔ. Pʋyɔɔ ecosaɣ-wɛ paa ɛzɩmtaa se: «Yehowa ɛɛlɔʋ ɛ-sɛyaa kpa.» Pitileɖi lɛ, ɖɛ-ɛgbɛyɛ ha-ɩ wondu natʋyʋ se pɩsɩnɩ-ɩ. Ðɔ-sɔɔlɩm haɖɛ yebina nɛ papɩzɩ nɛ paha Prisca nɛ ɛyaa lalaa sɩnʋʋ wondu ndʋ. Pɩɩɖɩɣzɩ Prisca cɔlɔ mba nɛ peheyi-i se: «Ɛsɔ tɩlɔ-ŋ kpa, nɛ pʋyɔɔ lɛ ɖɩsɔɔlaa se ɖɩkpɛlɩkɩ nɛ ɖɩtɩlɩ-ɩ nɛ pɩkɩlɩ.» Pa-taa ɛyaa 7 paɣzɩ kediɣzisi wobu.

13. Ɛzɩma ɖɩpɩzɩɣ nɛ ɖɩtɩŋnɩ ɖɔ-ɖɔnɛ yɔɔ nɛ ɖɩcɛlɩ Yehowa samtʋ? (Keɣa 96:9)

¹³ Kalɩ Keɣa 96:9. Ðɩpɩzɩɣ nɛ ɖɩtɩŋnɩ ɖɔ-ɖɔnɛ yɔɔ nɛ ɖɩcɛlɩ Yehowa samtʋ. Cɔjɔnaa mba palakaɣ tʋmɩyɛ Yehowa templo taa yɔ, pɩɩpɔzaa se pɛwɛɛ kele kele tomnaɣ yɔɔ. (Ejl. 40:​30-32) Ɛlɛ ɖɔnɛ kɩbanɖɛ tɔm cɛyaa nɛ pɩkɩlɩ tomnaɣ yɔɔ kele kele wɛtʋ. (Keɣ. 24:​3, 4; 1 Pɩy. 1:​15, 16) Pɩwɛɛ se ɖɩñaɣ pana nɛ ɖɩhɔzɩ «ɛyʋtʋ kɩbɩndʋ,» pʋ-tɔbʋʋ se ɖɩlɔ lakasɩ nzɩ sɩtɩtʋʋzɩ yɔ nɛ ɖisuu «ɛyʋtʋ kɩfatʋ,» pʋ-tɔbʋʋ se ɖɩwɛɛnɩ maɣzɩm nɛ lakasɩ nzɩ sɩlabɩ nɔɔ kʋɖʋmaɣ nɛ Yehowa wɛtʋ kɩbandʋ yɔ. (Kol. 3:​9, 10) Yehowa ɖoŋ taa lɛ, halɩ ɛyaa mba pacakɩ wezuu kɩdɛkɛdʋʋ nɛ palakɩ puuyaɣ lakasɩ yɔ, papɩzɩɣ pɛlɛɣzɩ nɛ posuu ɛyʋtʋ kɩfatʋ.

14. Ɛbɛ Jack kɩɖaʋ kpɛlɩkɩɣ-ŋ? (Cɔnɩ ɖɔɖɔ kɩlɛmʋʋ.)

¹⁴ Iyele nɛ ɖɩna Jack kɩɖaʋ. Ɛɛwɛ puuyaɣ kpem nɛ ɛ-tɔm kaawɛ kaɖɛ siŋŋ. Paakʋmɩ-ɩ hɩɖɛ se Eleeu. Kɩdɛkɛdɩm sɔsɔm mbʋ Jack laba yɔ, pʋyɔɔ lɛ pakʋ ɛ-tɔm se ɛmʋnɩ sɩm. Ɛlɛ ɛɛwɛ salaka taa nɛ ɛɖaŋ ɛ-sɩm lɛ, etisi nɛ ɛ nɛ koobu nɔɔyʋ papaɣzɩ Bibl kpɛlɩkʋʋ. Koobu ɛnʋ etiiwoki salaka ŋga ka-taa nɛ ɛnaɣ salaka tɩnaa. Paa Jack kaalabɩ kɩdɛkɛdɩm sakɩyɛ nɛ pɩɖɛɛ yɔ, ɛɛhɔzɩ ɛ-ɛyʋtʋ kɩbɩndʋ nɛ pʋwayɩ ɛha ɛ-tɩ nɛ pamɩyɩsɩ-ɩ lɩm. Jack kaalɛɣzɩ kpem, nɛ halɩ kɩyakʋ ŋgʋ pakʋwaɣ-ɩ yɔ kɩtalaa lɛ, salaka yɔɔ cɔnɩyaa nabɛyɛ tisi ɛsɩtɛɣlɩm alɩwaatʋ ndʋ pɛsɛɣaɣ-ɩ kɛdɛzaɣ ɖeɖe yɔ. Sɔɔja nɔɔyʋ lakaɣ tʋmɩyɛ salaka ŋga ka-taa, ɛyɔɔdaa se: «Ðooo lɛ, Jack kaakɛnɩ ɛyʋ weyi ɛ-tɔm kaakɩlɩ kaɖɛ cɩnɛ yɔ. Lɛɛlɛɛyɔ lɛ, ɛnʋ kpaɖɩnɩ ɖeu.» Jack sɩba nɛ pɩla kpɩtaʋ lɛ, koobiya mba powoba se pɔcɔnɩ kediɣzaɣ yɔɔ salaka taa yɔ, pakatɩ salaka tʋ nɔɔyʋ kediɣzaɣ taa; ɛ-kajalaɣ ɖeɖe lɛ ewobu kediɣzaɣ yɔ. Ɛbɛ seɣti-i nɛ ewolo kediɣzaɣ? Lɛɣzɩtʋ ndʋ Jack laba yɔ tɩɩɖɩɣzɩ-ɩ kpem, nɛ ɛɛsɔɔlaa se ɛtɩlɩ mbʋ pɩwɛɛ se ɛla nɛ ɛsɛɛ Yehowa yɔ. Pɩnaɣ kpayɩ kpayɩ se ɖɩpɩzɩɣ nɛ ɖɩtɩŋnɩ  ɖɔ-ɖɔnɛ yɔɔ nɛ ɖɩcɛlɩ Yehowa samtʋ.—1 Pɩy. 2:12.

PIILEÐIƔ LƐ ƐZƖMA YEHOWA KAƔ Ɛ-HƖÐƐ SAM?

15. Piileɖiɣ lɛ, ɛzɩma Yehowa kaɣ sam ɛ-hɩɖɛ caɣ caɣ? (Keɣa 96:​10-13)

¹⁵ Kalɩ Keɣa 96:​10-13. Keɣa 96 taa masɩ kɛdɛzaɣ ñɩnzɩ sɩnɛ, sɩyɔɔdʋʋ se Yehowa kɛ Tɔm hʋyʋ nɛ Wiyaʋ weyi ɛwɛ siɣsiɣ yɔ. Piileɖiɣ lɛ, ɛzɩma Yehowa kaɣ ɛ-hɩɖɛ sam? Ɛtɩŋɩɣnɩ ɛ-tɔm hʋʋ yɔɔ nɛ ɛla mbʋ. Pɩkazɩ pazɩ, Yehowa kaɣ ɖɩzʋʋ Babilɔɔnɩ Sɔsɔʋ, mbʋ pʋyɔɔ yɔ kipisi ɛ-hɩɖɛ kiɖeɖeye. (Natʋ 17:​5, 16; 19:​1, 2) Alɩwaatʋ ndʋ paɖɩzɩɣ Babilɔɔnɩ Sɔsɔʋ yɔ, pɩtɩla nabɛyɛ kaɣ kpɛndʋʋ ɖɔ-yɔɔ nɛ ɖa nɛ wɛ ɖɩsɛɛ Yehowa. Kɛdɛzaɣ ɖeɖe lɛ, Yehowa kaɣ ɖɩzʋʋ Sataŋ ɛjaɖɛ Armaagedɔɔ you taa. Ɛkaɣ ɖɩzʋʋ mba payɩ pakaɖɩɣnɩ-ɩ nɛ pɔyɔɔdʋʋ tɔm kɩdɛkɛdɩtʋ ɛ-hɩɖɛ yɔɔ yɔ, ɛlɛ ɛkaɣ yabʋ mba payɩ pɔsɔɔlɩ-ɩ nɛ pañaŋɩ-ɩ, nɛ pɔsɔɔlaa se pɛcɛlɩ-ɩ samtʋ yɔ pa-ñʋʋ. (Mark. 8:38; 2 Tes. 1:​6-10) Yehowa kaɣ ñalʋʋ ɛ-hɩɖɛ yɔɔ caɣ caɣ alɩwaatʋ ndʋ Krɩstʋ pɩnzɩ kudoku kewiyitu tɔɔʋ tɛŋ nɛ kɛdɛzaɣ takɩm ɖɔɖɔ tɛ yɔ. (Natʋ 20:​7-10) Alɩwaatʋ ndʋ lɛ, «Yehowa samtʋ tɩlʋʋ kaɣ suu tɛtʋ yɔɔ ɛzɩ lɩm suu teŋgu taa yɔ.»—Hab. 2:14.

16. Ɛbɛ ŋtɛm ña-taa se ŋlakɩ? (Cɔnɩ ɖɔɖɔ kɩlɛmʋʋ.)

¹⁶ Pɩkaɣ wɛʋ ɖeu kpem alɩwaatʋ ndʋ ɛyaa mba payɩ pɛwɛ wezuu yɔ pakaɣ cɛlʋʋ Yehowa samtʋ ndʋ tɩmʋnɩ ɛ-hɩɖɛ yɔ. Ɛlɛ pʋcɔ nɛ alɩwaatʋ ndʋ tɩtalɩ lɛ, ɖɩpɩzɩɣ nɛ ɖɩla mbʋ payɩ ɖɩpɩzɩɣ yɔ nɛ ɖɩtɩŋnɩ wala wena payɩ ɖihikiɣ yɔ a-yɔɔ nɛ ɖɩcɛlɩ Yehowa samtʋ. Pɩsa nɛ ɖɩka ɖa-lɩmaɣza tɔm ndʋ tɩ-yɔɔ lɛ, Nɔɔɖɛyaa ɛgbɛyɛ lɩzɩ Keɣa 96:8 se kɛkɛ pɩnaɣ 2025 mayaɣ. Kɔtɔŋ se: «Ɩcɛlɩ Yehowa samtʋ ndʋ tɩmʋnɩ ɛ-hɩɖɛ yɔ.»