TƆM ÑƲƲ ŊGƲ ÐƖKPƐLƖKƖƔ YƆ 3
HENDU 35 “Tɩlɩ mbʋ pɩ-tɔm kɩlɩ cɛyʋʋ yɔ”
Kpaɣ lɩmaɣza wena akɛdɩɣnɩ Yehowa yɔ
«Yehowa sɔɔndʋ seu kɛnɩ lɔŋsɩnɖɛ ɖɩbazɩyɛ, ye ɛyʋ ɛsɩm Kiɖeɖema Taa Kiɖeɖeu yɔ, ɛwɛnɩ tɔm taa nɩʋ lɛɣtʋ.» —ADU. 9:10.
LƖMAƔZƖYƐ SƆSƆÐƐ
Ðɩkaɣ naʋ ɛzɩma ɖɩpɩzɩɣ nɛ ɖɩlabɩnɩ tʋmɩyɛ sɩmtʋ, tɔm taa nɩʋ lɛɣtʋ nɛ lɛɣtʋ nɛ ɖɩkpaɣ lɩmaɣza kɩbana yɔ.
1. Ɛbɛ pɩpɔzʋʋ se ɖa-tɩŋa ɖɩla?
PAA evemiye nɖɩ, pɩpɔzʋʋ se ɖɩkpaɣ lɩmaɣza. Pɩwɛ kɛlɛʋ se ɖɩkpaɣ lɩmaɣza naayɛ, ɛzɩ mbʋ ɖɩkaɣ lɩzɩnʋʋ sɔntɔ yaa ɛzɩmtaa pɩwɛɛ se ɖɩhɩnɩ yɔ. Ɛlɛ lɩmaɣza naayɛ kpaɣʋ ñɛwɛ kaɖɛ nɛ pɩkɩlɩ. Apɩzɩɣ nɛ awɛɛnɩ ɖoŋ ɖɔ-tɔnʋʋ taa alaafɩya yɔɔ, ɖa-taa leleŋ yɔɔ, ɖɛ-ɛyaa kʋsɔɔlaa yɔɔ yaa ɖɛ-Ɛsɔ sɛtʋ yɔɔ. Ðɩsɔɔlaa se lɩmaɣza wena ɖɩkpakɩɣ yɔ, awazɩ ɖa nɛ ɖɔ-hɔʋ taa mba. Kɔzɩ kɔzɩ lɛ, ɖɩsɔɔlaa se lɩmaɣza wena ɖɩkpakɩɣ yɔ akɛdɩnɩ Yehowa.—Roma 12:1, 2.
2. Ɛbɛ pɩzɩɣ pɩsɩnɩ-ŋ nɛ ŋkpaɣ lɩmaɣza kɩbana?
2 Ŋpɩzɩɣ nɛ ŋkpaɣ lɩmaɣza kɩbana (1) ye ŋsɩm tɔm tɩŋa tɔm natʋyʋ yɔɔ yɔ, (2) ye ŋñɩnɩɣ Yehowa lɩmaɣza tɔm ndʋ tɩ-yɔɔ yɔ, nɛ (3) ye ŋmaɣzɩɣ lɩmaɣza ndɩ ndɩ wena ŋpɩzɩɣ nɛ ŋkpaɣ yɔ a-yɔɔ camɩyɛ yɔ. Tɔm ñʋʋ kʋnɛ kɩ-taa, ɖɩkaɣ tazʋʋ lɩmaɣza ana a-naadozo a-taa, nɛ ɖɩkaɣ naʋ ɖɔɖɔ ɛzɩma ɖɩpɩzɩɣ nɛ ɖɩlabɩnɩ tʋmɩyɛ ɖoŋ weyi ɖɩwɛna se ɖɩnɩɩ tɔm taa yɔ.—Adu. 2:11.
TƖLƖ TƆM TƖŊA LƖMAƔZƖYƐ NÐƖ ŊCAƔ KPAƔƲ YƆ ÐƖ-YƆƆ
3. Ha kɩɖaʋ ŋgʋ kɩwɩlɩɣ se pɩcɛyaa se ŋtɩlɩ tɔm tɩŋa pʋcɔ nɛ ŋkpaɣ lɩmaɣzɩyɛ naɖɩyɛ yɔ.
3 Kajalaɣ nɩŋgbaŋaɣ ŋga pɩwɛɛ se ŋkpɛzɩ nɛ pɩsa nɛ ŋkpaɣ lɩmaɣzɩyɛ kɩbanɖɛ yɔ, ŋga lɛ se ŋtɩlɩ tɔm tɩŋa wɛtʋ ndʋ tɩ-taa ŋwɛɛ yɔ tɩ-yɔɔ. Ɛbɛ yɔɔ pɩcɛyaa? Maɣzɩ se pɩwɩɣ nɔɔyʋ siŋŋ nɛ ewolo ɖɔkɔtɔ nɔɔyʋ cɔlɔ. Ye ɖɔkɔtɔ etiwili kʋdɔndʋ ɛnʋ yaa ɛtɩpɔzɩ-ɩ tɔm yɔ, ɛzɩ ɛpɩzɩɣ nɛ ɛma-ɩ kɔyɛ nɖɩ pɩpɔzʋʋ yɔ? Pɩtʋʋ fɛyɩ se aayɩ. Ña ɖɔɖɔ, ye ŋcalɩnɩ ñɩnʋʋ tɔm ndʋ payɩ titukuuni lɩmaɣzɩyɛ nɖɩ ŋcaɣ kpaɣʋ yɔ, pɩsɩɣnɩ-ŋ nɛ ŋkpaɣ lɩmaɣzɩyɛ kɩbanɖɛ. Ɛzɩma ŋpɩzɩɣ nɛ ŋla mbʋ?
4. Ɛzɩ Aduwa 18:13 yɔɔdʋʋ yɔ, ɛbɛ ŋpɩzɩɣ ŋla nɛ ŋtɩlɩ tɔm tɩŋa lɩmaɣzɩyɛ nɖɩ ŋcaɣ kpaɣʋ yɔ ɖɩ-yɔɔ? (Cɔnɩ ɖɔɖɔ kɩlɛmʋʋ.)
4 Pɩsa nɛ ŋtɩlɩ tɔm tɩŋa lɩmaɣzɩyɛ nɖɩ ŋcaɣ kpaɣʋ yɔ ɖɩ-yɔɔ lɛ, ŋpɩzɩɣ nɛ ŋpɔzɩ tɔm. Kpaɣ se nɔɔyʋ ya-ŋ se ŋwolo nɛ ña nɛ ɩ nɛ ɛyaa lalaa ɩkpɛndɩ nɛ ɩmʋ helim. Ɛzɩ pɩwɛɛ se ŋwolo? Ye ŋŋsɩŋ weyi ɛya-ŋ yɔ yaa mbʋ pakaɣ labʋ peeɖe yɔ, pɩkaɣ pɔzʋʋ se ŋpɔzɩ-ɩ tɔm ɛzɩ tʋnɛ yɔ: «Le ɖɩkaɣ katʋʋ nɛ ɛzɩmtaa? Ɛyaa ɛzɩma kaɣ kɔm? Akaɣ cɔnʋʋ mbʋ pakaɣ labʋ peeɖe yɔ pɩ-yɔɔ? Mba ŋyawa? Ɛbɛ mba pɔkɔŋ yɔ pakaɣ labʋ? Sʋlʋm ɖoŋ ñɩmbʋ kaɣ wɛʋ na?» Tɔm pɔzʋʋ mbʋ pɩ-yɔɔ cosuu pɩzɩɣ pɩsɩnɩ-ŋ nɛ ŋkpaɣ lɩmaɣzɩyɛ kɩbanɖɛ.—Kalɩ Aduwa 18:13.
Pɔzɩ tɔm nɛ pɩsɩnɩ-ŋ nɛ ŋtɩlɩ tɔm tɩŋa (Cɔnɩ tayʋʋ 4) a
5. Ŋtɩlɩɣ tɔm tɩŋa nɛ pɩtɛ lɛ, ɛbɛ pɩwɛɛ se ŋla?
5 Ŋtɩlɩɣ tɔm tɩŋa nɛ pɩtɛ lɛ, maɣzɩ wɛtʋ ndʋ tɩ-yɔɔ ŋcaɣ lɩmaɣzɩyɛ kpaɣʋ yɔ tɩ-yɔɔ camɩyɛ. Ðɩpɩsɩ kɩɖaʋ ŋgʋ ɖɩɩkpaɣaa yɔ kɩ-yɔɔ. Ye ŋnɩwa se ɛyaa mba paañaŋ Bibl paɣtʋ kila yɔ paba ɖɔɖɔ pakaɣ wobu ɖenɖe paya-ŋ yɔ yaa ye ŋnɩwa se pakaɣ wonuu sʋlʋm ɖoŋ ñɩmbʋ peeɖe ɛlɛ nɔɔyʋ ɛɛkaɣ pɩ-yɔɔ cɔnʋʋ nɛ paa weyi ɛpɩzɩɣ nɛ ɛñɔɔ ɛzɩ ɛsɔɔlʋʋ yɔ, ɛbɛ ŋkaɣ labʋ? Ŋŋmaɣzɩɣ se helim mʋʋ mbʋ, pɩpɩzɩɣ nɛ pɩpɩsɩ kazandʋ ndʋ tɩ-taa pɛɖɛlɛsɩɣ niye yɔ? (1 Pɩy. 4:3) Yaa ye alɩwaatʋ ndʋ palɩzaa se pamʋʋ helim mbʋ yɔ tiyeki se ŋtaawolo kediɣzaɣ yaa tɔm susuu yɔ, ɛbɛ ŋkaɣ labʋ? Ye ŋmaɣzɩ tɔm ndʋ tɩ-tɩŋa tɩ-yɔɔ yɔ, pɩkaɣ-ŋ sɩnʋʋ nɛ ŋkpaɣ lɩmaɣzɩyɛ kɩbanɖɛ. Ɛlɛ pɩwɛɛ ɖɔɖɔ se ŋkpɛzɩ nɩŋgbaŋaɣ lɛɛka. Ŋsɩm ndʋ ña-maɣmaɣ ŋmaɣzɩɣ tɔm ndʋ tɩ-yɔɔ yɔ; ɛlɛ suwe Yehowa ñamaɣzɩɣ?—Adu. 2:6.
ÑƖNƖ NƐ ŊTƖLƖ YEHOWA LƖMAƔZƖYƐ
6. Ɛzɩ Yakubu 1:5 yɔɔdʋʋ yɔ, ɛbɛ yɔɔ pɩwɛɛ se ɖɩtɩmɩ nɛ ɖɩpɔzɩ Yehowa se ɛsɩnɩ-ɖʋ?
6 Pɔzɩ Yehowa se ɛsɩnɩ-ŋ nɛ ŋtɩlɩ ɛ-lɩmaɣzɩyɛ. Yehowa labɩ-ɖʋ tamaɣ se ɛkaɣ-ɖʋ haʋ lɔŋsɩnɖɛ nɛ ɖɩsɩnɩ-ɖʋ nɛ ɖɩna se lɩmaɣzɩyɛ naɖɩyɛ kɛdɩnɩ-ɩ yaa ɖɩtɩkɛdɩnɩ-ɩ. Ɛhaɣ lɔŋsɩnɖɛ nɖɩ «ɛyaa kpeekpe faaa nɛ ɛɛkalɩɣ.»—Kalɩ Yakubu 1:5.
7. Ɛbɛ ŋpɩzɩɣ ŋla nɛ ŋtɩlɩ Yehowa lɩmaɣzɩyɛ? Ha kɩɖaʋ nakʋyʋ.
7 Ŋtɩmɩɣnɩ Yehowa nɛ ŋpɔzɩ-ɩ se ɛsɩnɩ-ŋ nɛ pɩtɛ lɛ, ñaɣ pana nɛ ŋna ɛzɩma ecosuu-ŋ yɔ. Ðɩkpaɣ kɩɖaʋ kʋnɛ: Ye ŋwɛɛ nɛ ŋɖɔŋ nʋmɔʋ nɛ ŋle yɔ, ŋpɩzɩɣ nɛ ŋpɔzɩ ɛyʋ weyi ɛwɛ lone nɖɩ ɖɩ-taa ŋleba yɔ se ɛsɩnɩ-ŋ. Ɛlɛ ŋpɩzɩɣ ŋwolo ña-nʋmɔʋ ɖɔm yɔɔ ye ɛyʋ ɛnʋ ɛtɩwɩlɩtɩ-ŋ nʋmɔʋ yɔ? Aayɩ. Ŋkaɣ-ɩ welisinuu camɩyɛ alɩwaatʋ ndʋ ɛwɩlɩɣ-ŋ nʋmɔʋ yɔ. Mbʋ ɖɔɖɔ, alɩwaatʋ ndʋ ŋpɔzʋʋ Yehowa se ɛha-ŋ lɔŋsɩnɖɛ yɔ, ñɩnɩ Bibl paɣtʋ nɛ paɣtʋ kila wena atukuuni ñɛ-wɛtʋ yɔ nɛ pɩsɩnɩ-ŋ nɛ ŋna ɛzɩma Yehowa cosuu-ŋ yɔ. Ðɩpɩsɩ kɩɖaʋ ŋgʋ ɖɩɩkpaɣaa nɛ kɩyɔɔdʋʋ helim mʋʋ tɔm yɔ kɩ-yɔɔ. Ŋpɩzɩɣ nɛ ŋñɩnɩ nɛ ŋna tɔm ndʋ Bibl yɔɔdʋʋ kazandʋ ndʋ tɩ-taa pɛɖɛlɛsɩɣ niye yɔ, taabalɩyɛ kɩdɛkɛdɩyɛ ɖʋʋ nɛ mbʋ pʋyɔɔ pɩcɛyaa se ɖɩsɩɩ Kewiyaɣ tʋma kajalaɣ lone taa yɔ pɩ-yɔɔ yɔ. Pɩsɩɣnɩ-ŋ nɛ ŋna se pɩwɛɛ se ŋwolo helim mʋʋ mbʋ pɩ-taa yaa ŋtaawolo.—Mat. 6:33; Roma 13:13; 1 Kɔr. 15:33.
8. Ye pɩpɔzʋʋ se pasɩnɩ-ŋ nɛ ŋna tɔm ndʋ ŋñɩnɩɣ yɔ, ɛbɛ ŋpɩzɩɣ nɛ ŋla? (Cɔnɩ ɖɔɖɔ kɩlɛmʋʋ.)
8 Ɛlɛ pʋtɔma, alɩwaatʋ natʋyʋ pɩkaɣ pɔzʋʋ se ŋpɔzɩ nɛ pasɩnɩ-ŋ nɛ ŋna tɔm ndʋ ŋñɩnɩɣ yɔ. Ŋpɩzɩɣ nɛ ŋpɔzɩ koobu weyi ɛpɩ fezuu taa yɔ se ɛtasɩ-ŋ lɔŋ. Ɛlɛ, ña-maɣmaɣ ŋpɩzɩɣ ɖɔɖɔ nɛ ŋñɩnɩ tɔm nɛ pɩwazɩ-ŋ. Lɔŋ kɩbaŋ sakɩyɛ wɛ Bibl kpɛlɩkʋʋ wondu ɛzɩ Yehowa Aseɣɖe Tɩnaa tɔm ñɩnʋʋ takayaɣ nɛ Masɩ nzɩ siɖiyiɣ Krɩstʋ tʋ yɔ taa mbʋ yɔ. Tɔzɩ se ña-kaɖʋwa lɛ se ŋkpaɣ lɩmaɣzɩyɛ nɖɩ ɖɩkɛdɩɣnɩ Yehowa yɔ.
Ñɩnɩ Yehowa lɩmaɣza (Cɔnɩ tayʋʋ 8) b
9. Ɛbɛ pɩzɩɣ pɩsɩnɩ-ɖʋ nɛ ɖa-taa tɛ se lɩmaɣzɩyɛ nɖɩ ɖɩkpakɩɣ yɔ ɖɩkaɣ kɛdɩnʋʋ Yehowa? (Efɛɛzɩ mba 5:17)
9 Ɛbɛ pɩzɩɣ pɩsɩnɩ-ɖʋ nɛ ɖa-taa tɛ se lɩmaɣzɩyɛ nɖɩ ɖɩkpakɩɣ yɔ ɖɩkaɣ kɛdɩnʋʋ Yehowa? Kajalaɣ lɛ, pɩpɔzʋʋ se ɖɩkpɛlɩkɩ nɛ ɖɩtɩlɩ Yehowa camɩyɛ. Bibl yɔɔdʋʋ se: «Ye ɛyʋ ɛsɩm Kiɖeɖema Taa Kiɖeɖeu yɔ, ɛwɛnɩ tɔm taa nɩʋ lɛɣtʋ.» (Adu. 9:10) Toovenim taa lɛ, ye ɛyʋ ɛsɩm Yehowa wɛtʋ kɩbandʋ, ɛ-kaɖʋsɩ, mbʋ ɛsɔɔlaa yɔ nɛ mbʋ ɛpaɖɩɣ yɔ, ɛwɛɣnɩ tɔm taa nɩʋ lɛɣtʋ siŋŋ. Pɔzɩ ña-tɩ se: «Mansɩm Yehowa sɩm mbʋ yɔ, lɩmaɣzɩyɛ nɖɩ manpɩzɩɣ nɛ mankpaɣ nɛ pɩkɛdɩnɩ-ɩ?»—Kalɩ Efɛɛzɩ mba 5:17.
10. Ɛbɛ yɔɔ Bibl taa paɣtʋ kila tɔm cɛyaa nɛ pɩkɩlɩ ɖɔ-hɔʋ yaa ɖe-egeetiye taa sɔnzɩ?
10 Nabʋyʋ taa, pɩsa nɛ ɖɔ-tɔm kɛdɩnɩ Yehowa lɛ, pɩkaɣ pɔzʋʋ se ɖɩkpaɣ lɩmaɣzɩyɛ nɖɩ ɖɩɩkɛdɩɣnɩ ɖɛ-ɛyaa kʋsɔɔlaa yɔ. Kɩɖaʋ nakʋyʋ yɔ: Lʋlɩyaa nabɛyɛ pɩzɩɣ nɛ peseɣti pɛ-pɛlɛ se ɛwalɩ abalʋ weyi ɛwɛnɩ ñɩm yɔ yaa weyi ɛkaɣ wonuu wondu sakɩyɛ alɩwaatʋ ndʋ ɛpɔzʋʋ ɛ-yɔɔ yɔ, paa abalʋ ɛnʋ ɛtɩpɩɩ fezuu taa yɔ. Pʋtɔma palakɩ mbʋ, mbʋ pʋyɔɔ yɔ pɔsɔɔlɩ pɛ-pɛlɛ nɛ pɔsɔɔlaa se abalʋ ɛnʋ ɛcɔnɩ ɛ-yɔɔ camɩyɛ tomnaɣ yɔɔ. Ɛlɛ akaɣ pɛ-pɛlɛ ɛnʋ sɩnʋʋ nɛ ɛɖɛɛnɩ ɛsɩndaa fezuu taa? Suwe Yehowa maɣzɩɣ tɔm ndʋ tɩ-yɔɔ? Pocosi tɔm ndʋ tɩ-yɔɔ Maatiyee 6:33 taa. Peseɣti Krɩstʋ mba mayaɣ ŋga ka-taa se powolo pɩ-yɔɔ nɛ ‘pacalɩnɩ ñɩnʋʋ Kewiyaɣ.’ Paa ɖɩɖʋʋ ɖa-lʋlɩyaa hɩɖɛ nɛ ɖɩñaŋ ɖe-egeetiye taa mba yɔ, mbʋ pɩ-tɔm kɩlɩ cɛyʋʋ ɖɛ-ɛsɩndaa yɔ lɛ se ɖiyele nɛ Yehowa taa la leleŋ.
MAƔZƖ LƖMAƔZA NDƖ NDƖ WENA ŊPƖZƖƔ NƐ ŊKPAƔ YƆ A-YƆƆ CAMƖYƐ
11. Filiipi mba 1:9, 10 taa wɛtʋ kɩbandʋ ndʋ pɩzɩɣ nɛ tɩsɩnɩ-ŋ nɛ ŋtazɩ lɩmaɣza wena ŋpɩzɩɣ nɛ ŋkpaɣ yɔ a-taa?
11 Ŋñɩnɩɣ nɛ ŋna ndʋ Bibl paɣtʋ kila yɔɔdʋʋ lɩmaɣzɩyɛ nɖɩ ŋcaɣ kpaɣʋ yɔ ɖɩ-yɔɔ nɛ pɩtɛ lɛ, pɩpɔzʋʋ se ŋmaɣzɩ lɩmaɣza ndɩ ndɩ wena ŋpɩzɩɣ nɛ ŋkpaɣ yɔ a-yɔɔ camɩyɛ. (Kalɩ Filiipi mba 1:9, 10.) Lɛɣtʋ siŋŋ kaɣ-ŋ sɩnʋʋ nɛ ŋtazɩ lɩmaɣza ndɩ ndɩ wena ŋpɩzɩɣ nɛ ŋkpaɣ yɔ a-taa nɛ ŋna mbʋ pɩpɩzɩɣ nɛ pɩlɩɩ paa lɩmaɣzɩyɛ nɖɩ lɛ ɖɩ-taa yɔ. Nabʋyʋ taa, pɩpɩzɩɣ nɛ pɩwɛ-ŋ kɛlɛʋ se ŋkpaɣ lɩmaɣzɩyɛ naɖɩyɛ. Ɛlɛ pɩtɩkɛ lɩmaɣza tɩŋa kpaɣʋ wɛnɩ kɛlɛʋ. Lɛɣtʋ kaɣ-ŋ sɩnʋʋ nɛ ŋkpaɣ lɩmaɣza kɩbana, halɩ pɩkpɛndɩnɩ lɩmaɣza wena a-kpaɣʋ wɛ kaɖɛ yɔ.
12-13. Ɛzɩma lɛɣtʋ pɩzɩɣ nɛ tɩsɩnɩ-ŋ nɛ ŋkpaɣ lɩmaɣzɩyɛ kɩbanɖɛ tʋmɩyɛ hɔɔlʋʋ taa?
12 Maɣzɩ wɛtʋ tʋnɛ tɩ-yɔɔ nɛ ŋna. Ŋwɛɛ nɛ ŋñɩnɩɣ tʋmɩyɛ naɖɩyɛ se pɩsa nɛ ŋcɔnɩ ñɔ-hɔʋ yɔɔ. Ŋhiɣ tʋma 2. Ŋmaɣzɩ tɔm ndɩ ndɩ yɔɔ, ɛzɩ tʋmɩyɛ nɖɩ ɖeyi ɖeyi pɩkaɣ pɔzʋʋ se ŋla yɔ, alɩwaatʋ ndʋ tɩ-yɔɔ pɩwɛɛ se ŋlabɩ-ɖɩ yɔ, alɩwaatʋ ndʋ pɩkpakɩɣ-ŋ pʋcɔ nɛ ŋtalɩ tʋmɩyɛ taa yɔ nɛ tɔm lɛɛtʋ yɔɔ mbʋ yɔ. Tʋma ana a-naalɛ aakaɖɩɣnɩ Bibl paɣtʋ kila. Pʋtɔma yɔ, tʋma ana a-naalɛ a-taa lɛ, ŋsɔɔlɩ naɖɩyɛ nɛ pɩkɩlɩ lɛɛɖɛ mbʋ pʋyɔɔ yɔ tʋmɩyɛ nɖɩ palakɩ peeɖe yɔ ɖɩkɛdɩnɩ-ŋ yaa pɛhɛyɩɣ ɖɩ-taa camɩyɛ. Ɛlɛ pɩwɛɛ se ŋmaɣzɩ tɔm lɛɛtʋ yɔɔ pʋcɔ nɛ ŋlɩzɩ tʋmɩyɛ nɖɩ ŋkaɣ labʋ yɔ.
13 Ŋpɩzɩɣ nɛ ŋmaɣzɩ tɔm tʋnɛ tɩ-yɔɔ: Tʋma ana a-taa naɖɩyɛ yeki se ŋtaawolo ɛgbɛyɛ taa kediɣzisi na? A-taa naɖɩyɛ yeki se ŋpasɩ alɩwaatʋ ndʋ ŋkpakɩɣ nɛ ña nɛ ñɔ-hɔʋ ɩcakɩ yaa alɩwaatʋ ndʋ ŋkpakɩɣ nɛ ŋsɩɣnɩ-kʋ fezuu taa yɔ? Ye ŋpɔzɩ ña-tɩ tɔm ndʋ tɩ-ɖɔndɩ yɔ, pɩkaɣ-ŋ sɩnʋʋ nɛ ŋsɩɩ «mbʋ pɩ-tɔm kɩlɩ cɛyʋʋ yɔ» kajalaɣ ɖeɖe, pʋ-tɔbʋʋ se ñɛ-Ɛsɔ sɛtʋ nɛ ñɔ-hɔʋ kɩcɛyɩm. Ðɩnɛ ɛlɛ, ŋkaɣ kpaɣʋ lɩmaɣzɩyɛ kɩbanɖɛ nɛ Yehowa kaɣ ɖɩ-yɔɔ wazʋʋ.
14. Ɛzɩma lɛɣtʋ nɛ sɔɔlɩm mbʋ ɖɩwɛnɩ lalaa yɔɔ yɔ pɩkaɣ-ɖʋ sɩnʋʋ se ɖɩtaala mbʋ pituuluu-wɛ yɔ?
14 Lɛɣtʋ seɣtiɣ-ɖʋ ɖɔɖɔ se ɖɩmaɣzɩ ɖoŋ weyi lɩmaɣzɩyɛ nɖɩ ɖɩkpakɩɣ yɔ ɖɩwɛɣnɩ ɛyaa lalaa yɔɔ yɔ ɩ-yɔɔ; ɖɩnɛ ɛlɛ ɖɩɩlakɩ nabʋyʋ nɛ «pituuli lalaa.» (Filp. 1:10) Pɩcɛyaa kpem se ɖɩla mbʋ alɩwaatʋ ndʋ ɖɩkpakɩɣ lɩmaɣza ɖo-wondu suu nɛ ɖa-tɩ ñɔɔzʋʋ hɔɔlʋʋ taa yɔ. Pʋtɔma yɔ, ɖɩsɔɔlɩ wondu natʋyʋ suu yaa ɖɩsɔɔlɩ tɩ ñɔɔzʋʋ nabʋyʋ. Ɛlɛ ye ɖo-wondu suu nɛ ɖa-tɩ ñɔɔzʋʋ eyeki se pituuli koobiya nɛ ɛyaa mba patɩkɛ koobiya yɔ, ɛbɛ pɩwɛɛ se ɖɩla? Lɛɣtʋ kaɣ-ɖʋ sɩnʋʋ nɛ ɖɩña lalaa lɩmaɣza. Sɔɔlɩm kaɣ-ɖʋ seɣtuu se ɖɩñɩnɩ lalaa ‘kɛzɛsɩ’ nɛ ɖɩwɛɛnɩ tɩ luzuu. (1 Kɔr. 10:23, 24, 32; 1 Tim. 2:9, 10) Ðɩnɛ ɛlɛ, ɖɩkaɣ kpaɣʋ lɩmaɣzɩyɛ nɖɩ ɖɩwɩlɩɣ se ɖɩsɔɔlɩ lalaa nɛ ɖɩñaŋ-wɛ yɔ.
15. Pʋcɔ nɛ ŋkpaɣ lɩmaɣzɩyɛ sɔsɔɖɛ naɖɩyɛ lɛ, ɛbɛ pɩcɛyaa se ŋla?
15 Ye ŋcaɣ lɩmaɣzɩyɛ sɔsɔɖɛ naɖɩyɛ kpaɣʋ yɔ, maɣzɩ mbʋ pɩkaɣ pɔzʋʋ se ŋla nɛ ŋɖɔ ɖɩ-yɔɔ yɔ pɩ-yɔɔ. Yesu wɩlɩ-ɖʋ se pʋcɔ nɛ ɖɩla nabʋyʋ lɛ, pɩwɛɛ se ‘ɖɩtʋʋzɩ liidiye.’ (Luka 14:28) Pʋyɔɔ lɛ, maɣzɩ alɩwaatʋ, ɖoŋ nɛ mbʋ payɩ pɩkaɣ-ŋ pɔzʋʋ pʋcɔ nɛ ŋɖɔ ña-lɩmaɣzɩyɛ nɖɩ ɖɩ-yɔɔ yɔ pɩ-yɔɔ. Nabʋyʋ taa lɛ, pɩpɩzɩɣ nɛ pɩpɔzɩ se ŋyɔɔdɩnɩ ñɔ-hɔʋ taa mba nɛ ŋna mbʋ papɩzɩɣ pala nɛ paɖʋ nesi lɩmaɣzɩyɛ nɖɩ yɔ. Ɛbɛ yɔɔ pɩwɛɣ ɖeu se ŋla mbʋ? Mbʋ pʋyɔɔ yɔ pɩpɩzɩɣ pɩsɩɣnɩ-ŋ nɛ ŋna se pɩcɛyaa se ŋla lɛɣzɩtʋ natʋyʋ lɩmaɣzɩyɛ nɖɩ ŋcaɣ kpaɣʋ yɔ ɖɩ-taa yaa pɩtɩcɛyɩ. Pɩpɩzɩɣ pɩsɩnɩ-ŋ ɖɔɖɔ nɛ ŋɖiɣzina se lɩmaɣzɩyɛ naɖɩyɛ wɛɛ nɛ ɖɩwɛ ɖeu nɛ ɖɩkpaɖɩ nɖɩ ŋcaɣ kpaɣʋ yɔ. Pɩtasɩ lɛ, alɩwaatʋ ndʋ ŋyɔɔdʋʋnɩ ñɔ-hɔʋ taa mba nɛ ŋwelisi ndʋ pamaɣzɩɣ yɔ, pɩwɛɣ-wɛ kɛlɛʋ se paɖʋ nesi lɩmaɣzɩyɛ nɖɩ ŋkpakɩɣ yɔ nɛ pɩɖɔ camɩyɛ.—Adu. 15:22.
KPAƔ LƖMAƔZƖYƐ NÐƖ ŊPƖZƖƔ NƐ ŊÐƆ ÐƖ-YƆƆ YƆ
16. Nɩŋgbanzɩ nzɩ ŋpɩzɩɣ ŋkpɛzɩ nɛ pɩsɩnɩ-ŋ nɛ ŋkpaɣ lɩmaɣzɩyɛ kɩbanɖɛ? (Kalɩ ɖɔɖɔ aɖakaɣ « Mbʋ pɩpɩzɩɣ pɩsɩnɩ-ŋ nɛ ŋkpaɣ lɩmaɣza kɩbana yɔ.»)
16 Ye ŋkpɛzɩ nɩŋgbanzɩ nzɩ ɖɩyɔɔdɩ sɩ-tɔm tɔm ñʋʋ kʋnɛ kɩ-taa yɔ, ɖɩnɛ ɛlɛ pɩwɩlɩɣ se ŋñɔɔzɩ ña-tɩ se pɩsa nɛ ŋkpaɣ lɩmaɣzɩyɛ kɩbanɖɛ. Ŋñɩnɩ tɔm tɩŋa nɛ ŋtazɩ paɣtʋ kila wena apɩzɩɣ nɛ asɩnɩ-ŋ nɛ ŋkpaɣ lɩmaɣzɩyɛ nɖɩ ɖɩkɛdɩɣnɩ Yehowa yɔ. Lɛɛlɛɛyɔ lɛ ŋpɩzɩɣ nɛ ŋpɔzɩ Yehowa se ɛsɩnɩ-ŋ nɛ lɩmaɣzɩyɛ nɖɩ ŋkpakɩɣ yɔ ɖɩɖɔ camɩyɛ.
17. Ɛbɛ sɩɣnɩ-ŋ se ŋkpaɣ lɩmaɣza kɩbana?
17 Paa ŋŋtɛm kpaɣʋ lɩmaɣza kɩbana sakɩyɛ nɛ pɩɖɛɛ yɔ, tɔzɩ se mbʋ pɩsɩɣnɩ-ŋ se ŋkpaɣ lɩmaɣza kɩbana yɔ, mbʋ lɛ se ŋtaa liu lɔŋsɩnɖɛ nɖɩ ɖɩlɩnɩ Yehowa cɔlɔ yɔ, ɛlɛ taataa liu ña-maɣmaɣ ñɔ-lɔŋsɩnɖɛ yaa ñɛ-lɛɣtʋ. Yehowa ɖeke pɩzɩɣna nɛ ɛha-ŋ sɩmtʋ siŋŋ, tɔm taa nɩʋ lɛɣtʋ nɛ lɛɣtʋ, nɛ pɩcɛyaa se ɛyʋ ɛwɛɛnɩ wɛtʋ kɩbandʋ ndʋ tɩ-tɩŋa nɛ pɩsa nɛ ɛwɛɛnɩ lɔŋsɩnɖɛ. (Adu. 2:1-5) Yehowa pɩzɩɣ ɛsɩnɩ-ŋ nɛ ŋkpaɣ lɩmaɣza wena akɛdɩɣnɩ-ɩ yɔ.—Keɣ. 23:2, 3.
HENDU 28 Apɩzɩɣ nɛ ɛkɛ Yehowa taabalʋ?
