1, 2. Ɛzɩma apostoloo Pɔɔlɩ wɩlaa se ɛwɛnɩ ɛsɩmɩyɛ lootiye nɖɩ Ɛsɔ labɩ-ɩ yɔ ɖɩ-yɔɔ?

APOSTOLOO Pɔɔlɩ yɔɔdɩ kpayɩ se: “Ɛsɔ kʋjɔʋ tɩwɛɛ man-taa yem fala.” (Kalɩ 1 Kɔrɛntɩ 15:9, 10.) Pɔɔlɩ kaanawa se ɛtaamʋna se Ɛsɔ ɛna ɛ-pʋtɔdɩyɛ, mbʋ pʋyɔɔ yɔ ɛɛnazɩ Krɩstʋ mba siŋŋ nɛ pɩɖɛɛ.

² Alɩwaatʋ ndʋ ɛ-sɩm ñɔtaa yɔ, ɛma Timootee takayaɣ nɛ eheyi-i se: “Mɛnsɛɣ weyi ɛha-m ɖoŋ yɔ, ɖa-Kɩbaɣlʋ Yesu Krɩstʋ weyi ɛcɔnɩ-m se ɛyʋ nɛ ɛya-m ɛ-tʋmɩyɛ taa yɔ.” (1 Tim. 1:12-14) Tʋmɩyɛ nɖɩ paaɖʋ Pɔɔlɩ? Pɔɔlɩ heyi ɛgbɛyɛ taa ɛzʋtʋyaa mba paawɛ Efɛɛzɩ yɔ tʋmɩyɛ nɖɩ ɖɩ-tɔm nɛ ɛtɔ se: “Mañɩtaa mɛntɛ man-tʋmɩyɛ nɖɩ Kɩbaɣlʋ Yesu ɖʋ-m yɔ yɔ, me-wezuu tɩkɛnɩ-m pʋyʋ. Nɖɩ lɛ se: Monsusi Ɛsɔ lootiye laŋhɛzɩyɛ tɔm.”—Tʋma 20:24, ABT.

3. Tʋmɩyɛ ŋgee ñɩnɖɛ nɖɩ paɖʋ Pɔɔlɩ? (Cɔnɩ kiɖe tɛɛ kɩlɛmʋʋ.)

 ³ Laŋhɛzɩyɛ tɔm ndʋ Pɔɔlɩ susaa, nɛ ɛzɩma tɩwɩlɩɣ se Ɛsɔ labɩ ɛyaa lootiye? Eheyi Efɛɛzɩ koobiya se: “Ɩnɩ lootiye nɖɩ Ɛsɔ labɩ-m nɛ ɛɖʋ-m se mala tʋmɩyɛ mɩ-hɛkʋ taa yɔ ɖɩ-tɔm.” (Efɛz. 3:1, 2, ABT) Paaɖʋ Pɔɔlɩ tʋmɩyɛ se esusi laŋhɛzɩyɛ tɔm mba pataakɛ Yuda ñɩma yɔ nɛ pɩha paba waɖɛ se pɛwɛɛ mba pa nɛ Yesu pakaɣ tɔɔʋ kewiyitu ɛsɔdaa yɔ pa-taa. (Kalɩ Efɛɛzɩ 3:5-8.) Pɔɔlɩ labɩ tʋmɩyɛ nɖɩ nɛ kpekpeka nɛ ɛha Krɩstʋ ñɩma mba pɛwɛ sɔnɔ yɔ kɩɖaʋ kɩbaŋʋ. Ɛwɩlaa se Ɛsɔ tɩlabɩ-ɩ lootiye “yem falaa.”

4, 5. Ɛbɛ yɔɔ ɖɩpɩzɩɣ nɛ ɖɩyɔɔdɩ se Kewiyaɣ laŋhɛzɩyɛ tɔm kɛ ɖɔɖɔ “Ɛsɔ lootiye laŋhɛzɩyɛ tɔm”?

⁴ Kɛdɛzaɣ kɩyakɩŋ ɛnɛ ɩ-taa, paɖʋ Yehowa sɛyaa tʋmɩyɛ se posusi ‘Kewiyaɣ tɔm kɩbandʋ ɛjaɖɛ kpeekpe yɔɔ, se ɛyaa kpeekpe ɩnɩɩ.’ (Mat. 24:14) Tɔm ndʋ ɖisusuu yɔ, tɩkɛ ɖɔɖɔ “Ɛsɔ lootiye laŋhɛzɩyɛ tɔm” mbʋ pʋyɔɔ yɔ Ɛsɔ lootiye yekina se ɖihiɣ wazasɩ nzɩ Ɛsɔ Kewiyaɣ kaɣ kɔnʋʋ yɔ. (Efɛz. 1:3) Ɛzɩ Pɔɔlɩ yɔ, ɖɩwɩlɩɣ Yehowa ɖɛ-ɛsɩmɩyɛ lootiye nɖɩ ɛlabɩ-ɖʋ yɔ ɖɩ-yɔɔ nɛ ɖisusuu tɔm nɛ kpekpeka na?—Kalɩ Roma 1:14-16.

⁵ Ñʋʋ ŋgʋ kɩɖɛwa yɔ kɩ-taa, ɖɩna hɔɔlɩŋ ndɩ ndɩ weyi ɩ-taa Yehowa lootiye wazɩɣ ɖa mba ɖɩkɛ kɩwɛɛkɩm laɖaa yɔ. Pʋyɔɔ lɛ, ɖɩñakɩ pana se ɖɩwɩlɩ ɛyaa ɛzɩma Yehowa sɔɔlɩ-wɛ nɛ mbʋ papɩzɩɣ pala nɛ sɔɔlɩm mbʋ pɩwazɩ-wɛ yɔ. Ɛzɩma ɖɩpɩzɩɣ nɛ ɖɩsɩnɩ ɛyaa nɛ pɛwɛɛnɩ ɛsɩmɩyɛ lootiye nɖɩ Yehowa labɩ-wɛ yɔ ɖɩ-yɔɔ?

6, 7. Alɩwaatʋ ndʋ ɖiheyiɣ ɛyaa kɩhɛyʋʋ pʋ-ñʋʋ taa kɩlaʋ tɔm yɔ, ɛzɩma pɩwɩlɩɣ se ɖɩwɛɛ nɛ ɖisusuu Ɛsɔ lootiye laŋhɛzɩyɛ tɔm?

⁶ Sɔnɔ, alɩwaatʋ ndʋ ɛyaa sakɩyɛ lakɩ kɩwɛɛkɩm yɔ pɩɩcɛyɩɣ-wɛ, nɛ pʋyɔɔ lɛ paanaɣ kɩhɛyʋʋ pʋ-ñʋʋ taa kɩlaʋ wazaɣ. Pɩtasɩ lɛ, ɛyaa ɖiɣzinaa se pe-wezuu caɣʋ ɛɛhaɣ-wɛ koboyaɣ siŋŋ. Paasɩŋ mbʋ kɩwɛɛkɩm kɛnaa yɔ, ɛzɩma pitukuuni-wɛ nɛ mbʋ pɩwɛɛ se pala nɛ palɩɩ kɩwɛɛkɩm yomiye taa yɔ. Ɛlɛ alɩwaatʋ ndʋ pakatɩɣ Yehowa Aseɣɖe Tɩnaa yɔ, pa-lɩmaɣza lɛɣzɩɣ. Ɛyaa mba pɛwɛnɩ laŋa kɩbana yɔ, pa-taa lakɩ leleŋ alɩwaatʋ ndʋ panaɣ se Yehowa tiyi ɛ-Pɩyalʋ ɛgbamɩyɛ tɛtʋ yɔɔ se ɛlaa ɛ-tɩ ɖɔ-yɔɔ nɛ ɛlɩzɩ-ɖʋ kɩwɛɛkɩm nɛ sɩm pe-nesi tɛɛ yɔ. Ye Yehowa ɛlabɩ mbʋ yɔ, pɩwɩlɩɣ se ɛsɔɔlɩ-ɖʋ nɛ ɛlabɩ-ɖʋ lootiye siŋŋ.—1 Yoh. 4:9, 10.

⁷ Pɔɔlɩ yɔɔdɩ Yesu yɔɔ tɔm se: “[Yesu] taa ɖihikiɣ ñʋʋ yabɩtʋ ɛ-calɩm yɔɔ, kɩwɛɛkɩm kpeɣu [Yehowa] kʋjɔʋ ñɩm yɔɔ.” (Efɛz. 1:7) Yesu kɩlaʋ wɩlɩɣ se Yehowa sɔɔlɩ-ɖʋ siŋŋ nɛ pɩwɩlɩɣ ɖɔɖɔ se pɩkɛ ɛ-kʋjɔʋ ñɩm yaa lootiye sɔsɔɖɛ. Pɩkɛnɩ taa leleŋ tɔm se ɖɩtɩlɩ se ye ɖɩwɛnɩ tisuu Yesu kɩlaʋ yɔɔ kɔyɔ, pakaɣ-ɖʋ kpeɣu ɖa-kɩwɛɛkɩm nɛ piyeki se ɖɩwɛɛnɩ ɛhʋyɛ kɩbanɖɛ. (Ebr. 9:14) Pɩkɛnɩ laŋhɛzɩyɛ tɔm ndʋ pɩwɛɛ se ɖiheyi ɛyaa lalaa yɔ.

8. Ɛbɛ yɔɔ pɩwɛɛ se kɩwɛɛkɩm laɖaa nɛ Ɛsɔ peceɣ?

⁸ Pɩwɛɛ se ɖɩsɩnɩ ɛyaa nɛ pana se pa nɛ pa-Lɩzɩyʋ papɩzɩɣ nɛ paɖʋ taabalɩyɛ kɩbanɖɛ. Yehowa ɛzɩdaa lɛ, mba pɛfɛyɩnɩ tisuu Yesu kɩlaʋ yɔɔ yɔ, pɛkɛ e-koyindinaa. Apostoloo Yohanɛɛsɩ mawa se: “Weyi etisiɣ Pɩyalʋ yɔɔ yɔ, ɛwɛnɩ tamtam wezuu, weyi eetisiɣ Pɩyalʋ yɔɔ yɔ, ɛɛkaɣ hiɣu wezuu, Ɛsɔ kɔʋ-ɩ nɛ pana pɩŋŋ.” (Yoh. 3:36) Ɛlɛ pɩkɛnɩ taa leleŋ tɔm se Yesu kɩlaʋ yɔɔ lɛ, ɛyaa nɛ Ɛsɔ papɩzɩɣ nɛ peceɣ. Pɔɔlɩ yɔɔdaa se: “Mba mɩ, ɖooo lɛ, ɩɩkɛ agɔma nɛ koyindinaa, mɩ-maɣzɩm nɛ mɩ-lakasɩ kɩdɛkɛdɩsɩ yɔɔ yɔ, lɛɛlɛɛyɔ eceɣ-mɩ e-tomnaɣ nandʋ taa, eyebi-kɛ nɛ sɩm.”—Kol. 1:21, 22.

9, 10. (a) Tʋmɩyɛ nɖɩ Yesu ɖʋ e-koobiya patam numwaa? (b) Ɛzɩma tɩyɛ “heŋ lɛɛŋ” sɩɣnɩ patam numwaa?

⁹ Krɩstʋ ɖʋ e-koobiya patam numwaa tʋmɩyɛ naɖɩyɛ nɛ Pɔɔlɩ ya-ɖɩ se “ceɣu tʋmɩyɛ.” Eheyi-wɛ se: “Pɩtɩŋa pɩlɩnɩ Ɛsɔ cɔlɔ na, ɛnʋ weyi ɛtɩŋnɩ Krɩstʋ yɔɔ nɛ eceɣ ɖa nɛ ɩ yɔ, nɛ ɛɖʋ-ɖʋ ceɣu tʋmɩyɛ yɔ. Mbʋ yɔ Ɛsɔ maɣmaɣ tɩŋnɩ Krɩstʋ yɔɔ nɛ ɛ nɛ ɛjaɖɛ peceɣ yɔ, eyebi kem ɛyaa kɩwɛɛkɩm cɔlɔ, nɛ ɛɖʋ ɖɔ-nɔɔ taa ceɣu tɔm. Mbʋ lɛ ɖɩkɛ Krɩstʋ tiyiyaa nɛ, Ɛsɔ maɣmaɣ sɛzɩɣ-mɩ nɛ ɖɔ-nɔɔ. Krɩstʋ hɩɖɛ taa lɛ, ɖɩpɔzʋʋ-mɩ se iyele nɛ mɩ nɛ Ɛsɔ iceɣ.”—2 Kɔr. 5:18-20.

¹⁰ Pɩkɛnɩ “heŋ lɛɛŋ” waɖɛ sɔsɔɖɛ se pasɩnɩ patam numwaa tʋmɩyɛ nɖɩ ɖɩ-labʋ. (Yoh. 10:16, ABT) Heŋ lɛɛŋ kɛ Krɩstʋ tiyiyaa yaa ɛ-tʋmlaɖaa nɛ pʋyɔɔ lɛ, pawɩlɩɣ ɛyaa toovenim tɔm Ɛsɔ yɔɔ nɛ pasɩɣnɩ-wɛ se pa nɛ ɩ paɖʋ taabalɩyɛ. Pɩwɩlɩɣ se pɛwɛɛ nɛ posusuu Ɛsɔ lootiye laŋhɛzɩyɛ tɔm.

11, 12. Ɛbɛ yɔɔ ɛyaa taa lakɩ leleŋ alɩwaatʋ ndʋ panaɣ se papɩzɩɣ nɛ patɩmnɩ Yehowa yɔ?

¹¹ Ɛyaa sakɩyɛ tɩmɩɣ, mbʋ pʋyɔɔ yɔ pamaɣzɩɣ se adɩma hɛzɩɣ pa-laŋa. Paa mbʋ yɔ, paatisiɣ se Ɛsɔ nɔɔyʋ wɛɛ nɛ ewelisiɣ pa-adɩma. Ɛlɛ pɩcɛyaa se patɩlɩ se Yehowa kɛnɩ “adɩma Welisiyu.” Keɣa maɖʋ Daviid yɔɔdaa se: “Hayɩ adɩma Welisiyu, paa ɛyʋ weyi lɛ ña ɛkaɣ talʋʋ. Man-kɩdɛkɛdɩm kɩlɩ-m yuŋ, ɛlɛ ŋhuuzuu ɖa-kɩwɛɛkɩm yɔɔ.”—Keɣa 65:2, 3, nwt.

¹² Yesu heyi ɛ-tɔmkpɛlɩkɩyaa se: “Ye ɩpɔzʋʋ pʋyʋ nɔɔyʋ ma-hɩɖɛ taa kɔyɔ, malakɩ-pʋ.” (Yoh. 14:14) Ye pɔtɔm se “pʋyʋ nɔɔyʋ” yɔ, pɩwɩlɩɣ se mbʋ payɩ pɩlabɩ nɔɔ kʋɖʋmaɣ nɛ Yehowa sɔɔlɩm yɔ. Yohanɛɛsɩ yɔɔdaa se: “Ðɩwɛnɩ Ɛsɔ lidaʋ kʋnɛ yɔ se ye ɖɩpɔzʋʋ-ɩ mbʋ pɩkɛdɩnɩ-ɩ kɔyɔ, ewelisiɣni-ɖʋ.” (1 Yoh. 5:14) Pɩkɛnɩ taa leleŋ se ɖɩwɩlɩ ɛyaa se adɩma ɛɛhɛzɩɣ ɖa-laŋa yem na, ɛlɛ asɩɣnɩ-ɖʋ se ɖɩñɔtɩnɩ Yehowa “kʋjɔʋ kpelaɣ.” (Ebr. 4:16) Ye ɖɩwɩlɩɣ-wɛ ɛzɩma pɩwɛɛ se patɩmɩ, weyi pɩwɛɛ se patɩmna, nɛ mbʋ pɩwɛɛ se pɔpɔzɩ pa-adɩma taa kɔyɔ, pɩsɩɣnɩ-wɛ nɛ pɔñɔtɩnɩ Yehowa nɛ pehiɣ laŋɩyɛ hɛzʋʋ kaɖɛ alɩwaatʋ taa.—Keɣsi 4:2; 144:18.

13, 14. (a) Wala sɔsɔna wena patam numwaa kaɣ wɛnʋʋ cee wayɩ? (b) Tʋmɩyɛ kɩbanɖɛ nɖɩ patam numwaa kaɣ labʋ se pɩwazɩ ɛyaa?

¹³ Ɛjaɖɛ kɩfaɖɛ taa, Yehowa kaɣ-ɖʋ labʋ lootiye nɛ pɩkɩlɩ. Alɩwaatʋ ndʋ Pɔɔlɩ yɔɔdaɣ waɖɛ nɖɩ patam numwaa 144000 wɛna se pa nɛ Yesu pɔtɔɔ kewiyitu lɛ, ɛtɔm se: “Ɛsɔ kɛ pʋtɔdɩyɛ nayʋ sɔsɔ; ɛ-sɔɔlɩm mbʋ ɛsɔɔlɩnɩ-ɖʋ yɔ pɩ-yɔɔ, mba ɖa ɖɩɩkɛ sɩɖaa ɖa-kɩwɛɛkɩm yɔɔ yɔ, eyebi-ɖʋ se ɖa nɛ Krɩstʋ ɖɩɖaɣnɩ wɛʋ (kʋjɔʋ payabɩnɩ mɩ-ñʋʋ!) Efezi ɖa nɛ ɩ sɩm yɔɔ nɛ ɛcaɣzɩ-ɖʋ ɛsɔdaa, Krɩstʋ Yesu taa. Ɛsɔɔlaa se ɛwɩlɩ cee wayɩ wɛɛ taa kʋjɔʋ ñɩm mbʋ pɩ-wayɩ fɛyɩ yɔ nɛ ɛ-kɩbandʋ ndʋ ɛlakɩ-ɖʋ Krɩstʋ Yesu taa yɔ.”—Efɛz. 2:4-7.

¹⁴ Pɩwɛ kaɖɛ se ɖɩmaɣzɩ nɛ ɖɩna wazasɩ nzɩ Yehowa ñɔɔzaa nɛ ɛsɩɩ patam numwaa alɩwaatʋ ndʋ pa nɛ Yesu pɔtɔkɩ kewiyitu ɛsɔdaa yɔ. (Luka 22:28-30; Fil. 3:20, 21; 1 Yoh. 3:2) Yehowa kaɣ-wɛ wɩlʋʋ “kʋjɔʋ ñɩm mbʋ pɩ-wayɩ fɛyɩ yɔ.” Pakaɣ kɛʋ “Yerusalɛm kɩfalʋʋ” ŋgʋ kɩsɩŋnɩ Krɩstʋ halʋ yɔ. (Natʋ 3:12; 17:14; 21:2, 9, 10) Pa nɛ Yesu pakaɣ labʋ nɛ ɛyaa mba pañaŋ Yehowa yɔ ‘pɔ-yɔɔ cɛ’ nɛ palɩzɩ-wɛ kɩwɛɛkɩm nɛ sɩm po-yomiye taa nɛ piyele nɛ patalɩ pilim.—Kalɩ Natʋ 22:1, 2, 17.

15, 16. Ɛzɩma tɩyɛ Yehowa kaɣ labʋ “heŋ lɛɛŋ” lootiye ɛjaɖɛ kɩfaɖɛ taa?

¹⁵ Efɛɛzɩ 2:7 tɔŋ se Ɛsɔ kaɣ wɩlʋʋ e-lootiye “cee wayɩ wɛɛ taa” yaa ɛjaɖɛ kɩfaɖɛ taa. Pɩtʋʋ fɛyɩ se alɩwaatʋ ndʋ tɩ-taa, paa weyi ɛkaɣ hiɣu “kʋjɔʋ ñɩm mbʋ pɩ-wayɩ fɛyɩ yɔ.” (Luka 18:29, 30) Lootiye sɔsɔɖɛ nɖɩ Yehowa kaɣ-ɖʋ labʋ yɔ lɛ se ɛkaɣ sɩɖaa fezuu. (Yɔb 14:13-15; Yoh. 5:28, 29) Pakaɣ fezuu ɛyaa siɣsiɣ tɩnaa mba paasɩba pʋcɔ nɛ Yesu laɣ ɛ-tɩ ɛyaa yɔɔ yɔ. Pakaɣ ɖɔɖɔ fezuu ɛyaa kɩbama mba pɛwɛɛ nɛ pasɩkɩ kɛdɛzaɣ alɩwaatʋ tʋnɛ tɩ-taa yɔ se powolo pɩ-yɔɔ nɛ pɛsɛɛ Yehowa.

¹⁶ Pɩtasɩ lɛ, pakaɣ fezuu ɛyaa miiliyɔɔwaa sakɩyɛ mba pataatɩlɩ Yehowa pʋcɔ nɛ pasɩ yɔ. Pakaɣ-wɛ haʋ waɖɛ se poluzi pa-tɩ Yehowa kewiyitu tɛɛ. Yohanɛɛsɩ mawa se: “Mana sɩɖaa, sɔsaa nɛ cikpema, pasɩŋ kewiyaɣ kpelaɣ cɔlɔ; pokuli takayɩsɩ, pʋwayɩ lɛ pokuli lɛɛka, ŋga kɛkɛ wezuu takayaɣ yɔ; ɖɩnɛ ɛlɛ pahʋʋnɩ sɩɖaa tɔm takayɩsɩ nzɩ sɩ-taa, paa weyi lɛ ɛ-lakasɩ yɔɔ. Nɛ lɩm sɔsɔm huu nɛ pɩtɔ sɩɖaa mba paawɛ pɩ-taa yɔ, Sɩm nɛ Hadɛ papɩsɩnɩ sɩɖaa mba paaɖɔkaa yɔ, nɛ pahʋʋnɩ paa weyi lɛ tɔm ɛ-lakasɩ yɔɔ.” (Natʋ 20:12, 13) Pɩkaɣ pɔzʋʋ se ɛyaa mba pefeziɣ yɔ, pɛkpɛlɩkɩ Ɛsɔ paɣtʋ ndʋ tɩwɛ Bibl taa yɔ nɛ pɔɖɔ tɩ-yɔɔ. Pɩtasɩ lɛ, pakaɣ kpɛlɩkʋʋ paɣtʋ ndʋ Yehowa kaɣ ɖʋʋ “takayɩsɩ” kɩfasɩ nasɩyɩ taa nɛ sɩwɩlɩɣ ɛzɩma ɖɩcaɣ wezuu ɛjaɖɛ kɩfaɖɛ taa yɔ. Ɛzɩma Yehowa kaɣ-ɖʋ wɩlʋʋ takayɩsɩ kɩfasɩ nzɩ sɩ-taa tɔm yɔ, pɩkaɣ wɩlʋʋ se ɛlabɩ-ɖʋ lootiye.

17. Alɩwaatʋ ndʋ ɖisusuu tɔm yɔ, tɔm ndʋ yɔɔ pɩwɛɛ se ɖɩtɔzɩ?

¹⁷ Lɛɛlɛɛyɔ kpem pɩwɛɛ se ɖisusi  Kewiyaɣ laŋhɛzɩyɛ tɔm, mbʋ pʋyɔɔ yɔ ɛjaɖɛ tɛm ñɔtɩ kpam. (Mark. 13:10) Toovenim taa lɛ, laŋhɛzɩyɛ tɔm susuu wɩlɩɣ se Yehowa labɩ-ɖʋ lootiye. Pɩwɛɛ se ɖɩtɔzɩ tɔm ndʋ tɩ-yɔɔ alɩwaatʋ ndʋ ɖisusuu tɔm yɔ. Ða-kaɖʋwa lɛ se ɖɩɖʋ Yehowa hɩɖɛ. Ɛzɩma ɖɩpɩzɩɣ nɛ ɖɩtalɩ kaɖʋwa ŋga? Pɩwɛɛ se ɖɩsɩnɩ ɛyaa nɛ pana se wazasɩ nzɩ ɖɩkaɣ hiɣu ɛjaɖɛ kɩfaɖɛ taa yɔ, sɩwɩlɩɣ se lootiye sɔsɔɖɛ kpem Yehowa labɩ-ɖʋ.

18, 19. Ɛzɩma tɩyɛ ɖɩpɩzɩɣ ɖɩsa Yehowa pɩlɩɩnɩ lootiye nɖɩ ɛlabɩ-ɖʋ yɔ ɖɩ-yɔɔ?

¹⁸ Alɩwaatʋ ndʋ ɖisusuu ɛyaa tɔm yɔ, ɖɩpɩzɩɣ ɖɩsɩnɩ-wɛ nɛ pana se Krɩstʋ kewiyitu tɛɛ lɛ, ɛyaa kaɣ hiɣu kɩhɛyʋʋ pʋ-ñʋʋ taa kɩlaʋ wazasɩ tɩŋa, nɛ pazɩ pazɩ lɛ patalɩ pilim. Bibl tɔŋ se: “Wondu kpeekpe kaɣ lɩʋ kɩdɛkɛdɩm yomiye taa nɛ tɩwɛɛ tɩ-tɩ yɔɔ ɛzɩ Ɛsɔ piya yɔ, nɛ tɩ nɛ sɩ pakaa ɖoŋ.” (Roma 8:21) Yehowa lootiye yeke yɔɔ pɩtɩŋɩɣna nɛ pɩla mbʋ.

¹⁹ Ðɩwɛnɩ waɖɛ se ɖiheyi ɛyaa tɔm kɩbandʋ ndʋ tɩwɛ Natʋ 21:4 taa yɔ. Tɩtɔŋ se: “[Ɛsɔ] kaɣ hɩzʋʋ pɛ-ɛzɩdaa ɛzɩtɛɣlɩm kpeekpe, nɛ sɩm ɛɛtasɩɣ wɛʋ; nɛ paatasɩɣ wiu, paatasɩɣ kubusi mabʋ, kʋñɔŋ ɛɛtasɩɣ wɛʋ, mbʋ yɔ ɛjaɖɛ kɩbɩnɖɛ ɖɛwa.” Nɛ Yehowa weyi ɛcaɣ Kewiyaɣ kpelaɣ yɔɔ yɔ, ɛtɔ se: “Na! Malakɩ wondu tɩŋa payɩ nɛ tɩpɩsɩ kɩfatʋ. Ma tɔm ndʋ, mbʋ pʋyɔɔ yɔ, tɩkɛ toovenim, tɩlakɩ mbʋ.” (Natʋ 21:5, ABT) Alɩwaatʋ ndʋ ɖisusuu ɛyaa lalaa laŋhɛzɩyɛ tɔm nɛ kpekpeka yɔ, ɖɩwɩlɩɣ se ɖɩsaŋ Yehowa pɩlɩɩnɩ lootiye nɖɩ ɛlabɩ-ɖʋ yɔ ɖɩ-yɔɔ.