Palʋlɩ-m Etaazuunii tɛtʋ ndʋ payaɣ se Saint Paul Minnesota yɔ tɩ-taa pɩnaɣ 1954 taa. Ma-lʋlɩyaa taakɛ ñɩm tɩnaa nɛ pataakɛ ɖɔɖɔ kʋñɔndɩnaa, nɛ ɖɩɩkɛ Katooliki mba. Ðɩɩkpɛndɩ piya kagbanzɩ, nɛ ma lɛ naalɛ ñɩŋga. Maakɛ pɩɣa lɛ, mowokaɣ Katooliki sukuli; nɛ maakɛ abalɩbɩɣa ŋga kasɩɣaɣnɩ fada cooci sɔnzɩ taa yɔ. Ɛlɛ, mantaatɩlɩ tɔm sakɩyɛ Bibl yɔɔ. Paa maawɛnɩ tisuu se Ɛsɔ nɔɔyʋ wɛɛ nɛ ɛnʋ lɩzɩnɩ pɩtɩŋa payɩ yɔ, mantaawɛɛnɩ tisuu se Katooliki cooci pɩzɩɣ kɩsɩnɩ-m nɛ mɛnsɛɛ-ɩ.

Maawɛɛ nɛ malakɩ paɣtʋ kpɛlɩkʋʋ sukuli, nɛ kajalaɣ pɩnaɣ taa lɛ, Yehowa Aseɣɖe Tɩnaa kɔɔ man-ɖɩɣa. Mɛ-ɛsɩyɛ kaasɛnɩ wondu cɔtʋʋ, nɛ abalʋ weyi ɛ nɛ ɛ-halʋ paakɔma yɔ, petisini taa leleŋ se papɩsɩɣ nɛ pɔkɔɔ pʋwayɩ. Papɩsaa lɛ mɔnpɔzɩ-wɛ tɔm naalɛ: “Ɛbɛ yɔɔ piɖeɣni ɛyaa kɩdɛkɛdaa nɛ pɩkpaɖɩɣ ɛyaa kɩbama? Ɛzɩma ɛyaa pɩzɩɣ nɛ pehiɣ taa leleŋ siŋŋ?” Mentisi nɛ paha-m La vérité qui conduit à la vie éternelle takayaɣ nɛ Les Saintes Écritures. Traduction du monde nouveau, kɩ-tɔlɩm kaawɛ ɛzɩ hatʋ lɩm yɔ nɛ kɩñɩlɩsaɣ. Mentisi ɖɔɖɔ se pɛkpɛlɩkɩnɩ-m Bibl. Piikuli mɛ-ɛsa siŋŋ. Man-taa  kaawɛ leleŋ siŋŋ se mantɩlɩ se Ɛsɔ Kewiyaɣ kɛnɩ komina ŋgʋ kɩkaɣ ɖiyuu tɛtʋ yɔ. Manpɩzaɣ se mana se ɛyaa kewiyitu tɔɔʋ yeba nɛ ɛjaɖɛ wɛɛkɩ siŋŋ, nɛ tiyeba ɖɔɖɔ nɛ kʋñɔŋ, mulum nɛ kañatʋ suni ɛjaɖɛ.

Maha man-tɩ Yehowa pɩnaɣ 1982 ɖɩbazɩyɛ, nɛ pamɩyɩsɩ-m lɩm pʋwayɩ pɩnaɣ ŋga ka-taa “La vérité du Royaume” kigbeɣluu sɔsɔʋ ŋgʋ paalabɩ kuduyuu sɔsɔʋ nakʋyʋ taa Saint Paul tɛtʋ taa yɔ. Kpɩtaʋ ŋgʋ kɩtɩŋ pʋwayɩ yɔ, mala santaɖaʋ nakʋyʋ kuduyuu sɔsɔʋ ŋgʋ kɩ-taa se pɩsa nɛ mamʋ takayaɣ ŋga kawɩlɩɣ se mɛnkɛ lɔyaa yɔ. Octobre fenaɣ ɖɩbazɩyɛ taa lɛ, manɩɩ se mehiɣ santaɖaʋ ŋgʋ, pʋ-tɔbʋʋ se lɛɛlɛɛyɔ manpɩzɩɣ nɛ mala tʋmɩyɛ ɛzɩ lɔyaa yɔ.

Maakatɩ Mike Richardson weyi ɛɛkɛ Brooklyn tɛ Betɛɛlɩ tʋmlaɖʋ yɔ “La vérité du Royaume” kigbeɣluu sɔsɔʋ ŋgʋ kɩ-taa, nɛ ɛlɛ lɩzɩ-m pɩ-taa se patʋlɩ Betɛɛlɩ tʋmɩyɛ nɖɩ ɖɩcɔŋnɩ paɣtʋ tɔm yɔɔ yɔ ɖa-tʋmɩyɛ ɖɩlaɖɛ sɔsɔɖɛ taa. Peeɖe mɔntɔzɩ Etiyoopii eliŋgiye tɔm ndʋ pama Tʋma Labʋ 8:36 taa yɔ tɩ-yɔɔ nɛ mɔnpɔzɩ man-tɩ se: ‘Ɛbɛ ɖaŋɩɣ-m se mantaapɔzɩ nɛ paha-m nʋmɔʋ nɛ mala tʋmɩyɛ Betɛɛlɩ tʋmɩyɛ nɖɩ ɖɩcɔŋnɩ paɣtʋ tɔm yɔɔ yɔ ɖɩ-taa?’ Pʋyɔɔ lɛ, mɔnpɔzɩ se paha-m waɖɛ nɛ mala tʋmɩyɛ Betɛɛlɩ.

Ma-lʋlɩyaa taa taawɛɛ leleŋ se manpɩsɩ Yehowa Aseɣɖe Tʋ. Man-caa pɔzɩ-m se ɛzɩ Betɛɛlɩ tʋmɩyɛ kaɣ yebu nɛ mehiɣ wazaɣ nakɛyɛ lɔyaa tʋmɩyɛ nɖɩ manɖʋwa se malakɩ yɔ ɖɩ-taa? Malɩzɩ-ɩ pɩ-taa se sɔɔlɩm faaa tʋmɩyɛ mankaɣ labʋ. Nɛ meheyi-i se pakaɣ-m haʋ liidiye pazɩ paa fenaɣ ŋga ɛzɩ Betɛɛlɩ tʋmlaɖaa lalaa yɔ.

Ɛzɩma maatɛm tisuu se malakɩ tʋmɩyɛ tɔm ɖɩhʋyɛ naɖɩyɛ taa yɔ pʋyɔɔ lɛ, mantaapɩzɩɣ se mowolo Betɛɛlɩ kpaagbaa. Pɩnaɣ 1984 taa manpaɣzɩ Betɛɛlɩ tʋmɩyɛ Brooklyn, Niyuu Yɔrɩkɩ. Paaheyi-m se mala tʋmɩyɛ Betɛɛlɩ tʋmɩyɛ nɖɩ ɖɩcɔŋnɩ paɣtʋ tɔm yɔɔ yɔ ɖɩ-taa. Ɛzɩma malabɩ tʋmɩyɛ tɔm ɖɩhʋyɛ taa yɔ, pɩsɩnɩ-m se mɔñɔɔzɩ man-tɩ nɛ manɖaŋ mbʋ pɩɩwɛnɩ ɛsɩndaa yɔ.

Paayabɩ Stanley aleɣya ɖɩlaɖɛ nɖɩ ɖɩwɛ New Jersey yɔ novembre 1983 taa. Koobiya pɔzɩ se paha-wɛ nʋmɔʋ nɛ pɔñɔɔzɩ laatriki nimasɩ nɛ lɩm tiyoowaa mba paawɛ kuduyuu ŋgʋ kɩ-taa yɔ. Koobiya katɩ peeɖe tɛtʋ taa sɔsaa lɛ, palɩzɩ-wɛ pɩ-taa se mba ñɩnɩɣ se peyele nɛ Stanley aleɣya ɖɩlaɖɛ pɩsɩ kuduyuu ŋgʋ kɩ-taa Yehowa Aseɣɖe Tɩnaa lakɩ kigbeɣliŋ yɔ. Pɩɩkɔnɩ tɔm. Paɣtʋ ndʋ Jersey City ɖʋwa pɩlɩɩnɩ ɛzɩma papɩzɩɣ nɛ palabɩnɩ kuduyuŋ ɛnɩ tʋmɩyɛ yɔ, tɩyɔɔdʋʋ se pɩtɩpɔzɩ se Ɛsɔ sɛtʋ kuduyuŋ ɩñɔtɩnɩ  ɛyaa ɖɩsɩ. Stanley aleɣya ɖɩlaɖɛ kaawɛ tadɩyɛ tɛtʋ taa, nɛ pʋyɔɔ lɛ tɛtʋ taa sɔsaa kizi se paahaɣ koobiya waɖɛ. Nɛ koobiya pɔzɩ se patasɩ tɔm ndʋ ti-ɖeɖe cɔnʋʋ, ɛlɛ pekizi.

Maawɛ man-kajalaɣ kpɩtaʋ taa Betɛɛlɩ lɛ, ɛgbɛyɛ kpaɣ tɔm ndʋ nɛ ɖiwoni tɔm ɖɩhʋyɛ. Ɛzɩma malabɩ tʋmɩyɛ pɩnzɩ naalɛ Saint Paul, Minnesota tɔm ɖɩhʋyɛ pitileɖita yɔ pʋyɔɔ lɛ, pɩɩmalɩnɩ-m nɛ tɔm ɛzɩ tʋnɛ yɔ. Lɔyaawaa mba paawɛ ɖɔ-hɔɔlʋʋ yɔɔ yɔ, pa-taa nɔɔyʋ yɔɔdaa se ɛyaa kpeɣlaɣ Stanley aleɣya ɖɩlaɖɛ taa nɛ pɔcɔŋnɩ videowaa nɛ pewelisiɣni hendu teyaa. Ye mbʋ, ɛbɛ yɔɔ pɩkɛɣnɩ paɣtʋ yɔɔ maʋ se nabɛyɛ ikpeɣli peeɖe nɛ pala pɛ-Ɛsɔ sɛtʋ? Tɔm ɖɩhʋyɛ kɔ tɔm ñʋʋ se Jersey City tɩña waɖɛ nɖɩ ɖɩwɛna se ɖɩla ɖɛ-Ɛsɔ sɛtʋ faaa yɔ. Tɔm ɖɩhʋyɛ ɖʋ tɛtʋ ñʋndɩnaa paɣtʋ se paha-ɖʋ wala wena ɖɩpɔzaa yɔ, nɛ manpaɣzɩ naʋ ɛzɩma Yehowa kaawɛɛ nɛ ɛwazɩɣ ɛ-ɛgbɛyɛ tʋmɩyɛ nɖɩ ɖɩcɔŋnɩ paɣtʋ tɔm yɔɔ yɔ se pɩsa nɛ ɛ-tʋmɩyɛ ɖɛɛnɩ ɛsɩndaa yɔ. Man-taa kaawɛ leleŋ siŋŋ se manɖʋ nesi nɛ pɔcɔnɩ tɔm ndʋ ti-ɖeɖe.

Koobiya paɣzɩ Stanley kuduyuu ñɔɔzʋʋ, nɛ Jersey City Kigbeɣluu Kpaaŋ taa pɛcɛlɩ Gileyaadɩ sukulibiya nzɩ sɩlabɩ ɖaŋ 79 ñɩŋgʋ yɔ takayɩsɩ 8 septembre 1985 wiye, pɩ-tɔbʋʋ se papaɣzɩ kuduyuu ŋgʋ ñɔɔzʋʋ pɩnaɣ tɩtɛ nɛ pʋcɔ. Man-taa kaawɛ leleŋ siŋŋ se manɖʋ nesi Yehowa tʋmɩyɛ nɖɩ. Piyeba nɛ mehiɣ taa leleŋ nɛ pɩkpaɖɩ tʋmɩyɛ nɖɩ malaba pʋcɔ nɛ mɔnkɔɔ Betɛɛlɩ alɩwaatʋ ndʋ maakɛ lɔyaa yɔ. Mantaatɩlɩ se Yehowa ɖʋwa se ɛhaɣ-m wala sakɩyɛ nɛ ɛsɩndaa.

Pɩnzɩ 1980 waa taa, ɖoŋ ɖoŋ lɛ, fɛɖaa nɛ ɖɔkɔtɔnaa taañaŋ lɩmaɣza wena Aseɣɖe Tʋ nɔɔyʋ, weyi ɛtɩkɛ pɩɣa yɔ ɛkpakaɣ se paalakɩ-ɩ kɔyɛ lɛ pataaɖʋ-ɩ calɩm yɔ. Tɔm hʋyaa maɣzaɣ ɖoŋ ɖoŋ se kɔzɩ kɔzɩ lɛ, halaa hɔsɩ tɩnaa fɛyɩnɩ waɖɛ se pekizi se pataaɖʋ-wɛ calɩm. Tɔm hʋyaa yɔɔdaa se ye patɩɖʋ ɖoyo calɩm yɔ, ɛpɩzɩɣ ɛsɩ nɛ eyele ɛ-pɩɣa.

29 décembre 1988 wiye koobu halɩñɩnʋ Denise Nicoleau lʋlɩ ɛ-pɩyalʋ nɛ pɩtɛ lɛ, calɩm kpemni-i siŋŋ. Ɛzɩma pɩɩwɛ ɛzɩ e-wezuu wɛ kaɖɛ taa yɔ pʋyɔɔ lɛ, ɖɔkɔtɔ ñɩnaɣ se etisi nɛ paɖʋ-ɩ calɩm. Ɛlɛ, koobu Nicoleau kizi. Tɛʋ fem tanaŋ tɛɛ lɛ, ɖɔkɔtɔnaa pɔzɩ tɔm hʋyʋ nɔɔyʋ se ɛha-wɛ waɖɛ nɛ paɖʋ koobu ɛnʋ calɩm. Tɔm hʋyʋ ɛnʋ ɛtɩha koobu Nicoleau yaa ɛ-walʋ waɖɛ naɖɩyɛ se pɔyɔɔdɩ pa-lɩmaɣza nɛ halɩ etiheyi-wɛ se ɛha ɖɔkɔtɔnaa waɖɛ se paɖʋ-ɩ calɩm.

Kemeɣa 30 décembre wiye lɛ, ɖɔkɔtɔnaa ɖʋ koobu Nicoleau calɩm paa ɛ-walʋ nɛ hɔʋ taa ñɩma lalaa mba paawɛ ɛ-cɔlɔ yɔ pekizaa yɔ. Ðanaɣ ŋga, pakpa hɔʋ taa ñɩma sakɩyɛ nɛ ɛzʋtʋyaa nabɛyɛ mbʋ pʋyɔɔ yɔ, pakʋ pɔ-tɔm se paasɩŋ kaɖʋ ŋgʋ kɩ-yɔɔ paahɩzɩ koobu  Nicoleau yɔ kɩ-cɔlɔ nɛ paɖaŋɩɣ se pataaɖʋ ɛlɛ calɩm. Tɛʋ fema lɛ, posusi Niyuu Yɔrɩkɩ tɛtʋ nɛ tɛtʋ ndʋ tɩcɔ-tʋ nɛ tɩta yɔ pɛ-tɛ tɔm susuu takayɩsɩ, teeleewaa nɛ raadiyoowaa yɔɔ se mbʋ pakpa koobiya mba.

Hodo wiye tanaŋ tɛɛ lɛ, mɔyɔɔdɩnɩ tɔm hʋyʋ nɔɔyʋ, payaɣ-ɩ se Milton Mollen nɛ ɛlakaɣ tʋmɩyɛ tɔm ɖɩhʋyɛ sɔsɔɖɛ naɖɩyɛ taa. Meheyi-i mbʋ pɩlaba yɔ, nɛ meheyi-i kpayɩ se tɔm hʋyʋ lɛlʋ ha waɖɛ se paɖʋ nɔɔyʋ calɩm nɛ etiheyi ɛlɛ nɛ pʋcɔ. Tɔm hʋyʋ Mollen heyi-m se mowolo ɖanaɣ ŋga ɛ-tʋmɩyɛ taa nɛ ɖɩyɔɔdɩ tɔm ndʋ nɛ ɖɩna paɣtʋ ndʋ pɩwɛɛ se palabɩnɩ tʋmɩyɛ hɔɔlʋʋ ŋgʋ kɩ-taa yɔ. Ma-ñʋʋdʋ Philip Brumley sɩ-m nɛ ɖiwolo tɔm hʋyʋ Mollen tʋmɩyɛ taa ɖanaɣ ŋga. Tɔm hʋyʋ ɛnʋ, ɛɛya ɖɔɖɔ ɖɔkɔtɔ tɛ lɔyaa se ɛkɔɔ ɖɔ-cɔlɔ. Ðɔ-tɔm yɔɔdʋʋ kaasa miŋ. Pɩtalɩ ɖoli lɛ, koobu Brumley la yʋsaɣ nakɛyɛ ɛ-takayaɣ taa nɛ eheyi-m se: “Taakɩlɩ holuu.” Pɩɩkɛ lɔŋ tasʋʋ kɩbam mbʋ pʋyɔɔ yɔ, pɩɩwɩzɩ-m nɛ mɛwɛɛ mañakɩ pana se mawɩlɩ se tɔm ndʋ ɖɔkɔtɔ tɛ lɔyaa wɛɛ nɛ ɛyɔɔdʋʋ yɔ tɩtɩtʋʋzɩ.

Ñɩɣyʋʋ kʋɖʋmʋʋ wayɩ lɛ, tɔm hʋyʋ Mollen yɔɔdɩ se tɛʋ feŋ tanaŋ tɛɛ lɛ, tɔm ndʋ ɖɩkaɣ paɣzɩnʋʋ. Ðɩlɩɣaɣ tɔm hʋyʋ Mollen tʋmɩyɛ taa lɛ, ɛlɛ yɔɔdɩ se ɖɔkɔtɔ tɛ lɔyaa wɛnɩ “sʋʋtʋ sɔsɔtʋ cee.” Pʋ-tɔbʋʋ se pɩɩkaɣ wɛʋ lɔyaa ɛnʋ kɛlɛʋ se ɛwɩlɩ se ɖɔkɔtɔnaa wɛnɩ toovenim se pañɩɣ koobu Nicoleau yɔɔ se ɛlɛ etisi nɛ paɖʋ-ɩ calɩm. Pɩɩwɛ-m ɛzɩ Yehowa wɛɛ nɛ eheyiɣ-m se pɩtʋʋ fɛyɩ se ɖakaɣnɩ wabʋ yɔ. Pɩɩwɛ ɖeu se ɖɩna ɛzɩma Yehowa wɛɛ nɛ ɛtɩŋɩɣnɩ ɖɔ-yɔɔ se ɛla ɛ-sɔɔlɩm yɔ.

Ðɩlabɩ tʋmɩyɛ ɖoo taa se ɖɩñɩnɩ tɔm ndʋ ɖɩkaɣ yɔɔdʋʋ tɛʋ kifemuu yɔ. Tɔm ɖɩhʋyɛ kaañɔtɩnɩ Brooklyn tɛ Betɛɛlɩ kpam, nɛ pʋyɔɔ lɛ mba palakaɣ tʋmɩyɛ nɖɩ ɖɩcɔŋnɩ paɣtʋ tɔm yɔɔ ɖa-tʋmɩyɛ ɖɩlaɖɛ cikpeɖe taa yɔ, pa-taa sakɩyɛ ɖɔma nɛ powolo peeɖe. Tɔm hʋyaa naanza welisini-ɖʋ nɛ pɩtɛ lɛ, pɔkɔ tɔm ñʋʋ se pɩtaapɔzɩ se paha waɖɛ nɛ paɖʋ calɩm. Tɔm hʋyaa ha koobu Nicoleau toovenim nɛ pɔyɔɔdɩ se pɩkɛnɩ ɛyʋ waɖɛ yɔɔ maʋ se paha nʋmɔʋ nɛ paɖʋ nɔɔyʋ calɩm nɛ patiwelisi se pana ndʋ kʋdɔndʋ maɣzɩɣ yɔ nɛ pʋcɔ.

Pitileɖi lɛ, Niyuu Yɔrɩkɩ tɔm ɖɩhʋyɛ sɔsɔɖɛ yɔɔdɩ se koobu Nicoleau wɛnɩ waɖɛ se pɔcɔnɩ ɛ-kʋdɔŋ ɖeɖe ɛlɛ pataaɖʋ-ɩ calɩm. Lɩmaɣza naanza wena tɔm ɖɩhʋyɛ lona sɔsɔna  kpaɣaa nɛ atukuuni calɩm ɖʋʋ tɔm, nɛ maawɛnɩ waɖɛ se manɖʋ mɔ-nɔɔ tɩ-taa yɔ, a-taa kajalaɣ ñɩnɖɛ lɛ. (Kalɩ aɖakaɣ “ Ðɩwabɩ tɔm ɖɩhʋyɛ lona sɔsɔna ndɩ ndɩ taa.”) Ma nɛ Betɛɛlɩ lɔyaawaa lalaa ɖɩlabɩ tʋmɩyɛ ɖɔɖɔ hɔɔlɩŋ weyi itukuuni piya yɔɔ cɔnʋʋ, nesi cɛbʋ, paɣtʋ ndʋ titukuuni ɛzɩma palabɩnɩ tʋmɩyɛ tɛtʋ nɛ kuduyuŋ yɔ ɩ-taa.

Mancalɩ katʋʋ ma-halʋ Dawn lɛ, e-nesi ɖɔkʋʋ kaacɛba nɛ e-ɖeke ɛɛwɛna nɛ ɛcɔŋnɩ piya naadozo yɔɔ. Ɛñakaɣ pana e-wezuu caɣʋ taa nɛ ɛɛkɛ nʋmɔʋ lɩzɩyʋ ɖɔɖɔ. Ɛɛkatɩ kala e-wezuu caɣʋ taa, ɛlɛ ɛzɩma ɛɛtɛm ɛ-taa se ɛsɛɣ Yehowa yɔ, pɩɩkɛdɩnɩ-m siŋŋ. Pɩnaɣ 1992, ɖiwobi “Porteurs de lumière” kigbeɣluu sɔsɔʋ Niyuu Yɔrɩkɩ tɛtʋ taa lɛ, mɔnpɔzɩ-ɩ se mana se ma nɛ ɩ ɖɩpɩzɩɣ ɖɩtɩlɩ ɖama nɛ pɩkpaɖɩ yaa we. Ðɩɖɔkɩ nesi pɩnaɣ kʋɖʋmaɣ wayɩ. Mehiɣ halʋ weyi ɛsɩɣ Yehowa kajalaɣ lone taa paa ɛzɩmtaa nɛ ɛlakɩ tanaʋ camɩyɛ yɔ, nɛ pɩkɛnɩ kʋjɔʋ ŋgʋ kɩlɩnɩ Yehowa cɔlɔ yɔ. Toovenim taa lɛ, alɩwaatʋ ndʋ payɩ ma nɛ Dawn ɖɩɩwɛ ɖama cɔlɔ yɔ, ɛɛlabɩ-m kɩbandʋ.—Adu. 31:12.

Ðɩɖɔkɩ nesi lɛ, piya kaawɛnɩ pɩnzɩ 11, 13 nɛ 16. Maasɔɔlaa se mɛnkɛ caja kɩbanʋ, pʋyɔɔ lɛ mankalɩ tɔm ndʋ payɩ manpɩzaa nɛ mana ɖɛ-ɛgbɛyɛ takayɩsɩ taa nɛ titukuuni lʋlɩyʋ kɩɖɔkʋ yɔ nɛ malabɩnɩ-tʋ tʋmɩyɛ. Ðɩɩkatɩ kala pɩnzɩ sakɩyɛ, ɛlɛ man-taa labɩ leleŋ se piya kɔma nɛ sitisi se mɛnkɛ taabalʋ weyi sɩpɩzɩɣ nɛ sɩtaa liu yɔ nɛ caja sɔɔlɩm tʋ. Ðɩmʋwaɣ ɖe-piya taabalaa mba pɔkɔŋ ɖa-ɖɩɣa yɔ camɩyɛ, nɛ ɖɩnaɣaɣ se piya kɩbanzɩ kaacɔ-ɖʋ nɛ sɩta lɛ, pɩkɛdaɣnɩ-ɖʋ.

Pɩnaɣ 2013 taa, ma nɛ Dawn ɖɩkʋyaa nɛ ɖiwolo Wisconsin se ɖɩcɔnɩ ɖa-lʋlɩyaa mba pakpadɩyaa yɔ pɔ-yɔɔ. Pɩɩɖɩɣzɩ-m se tʋmɩyɛ nɖɩ malakaɣ Betɛɛlɩ yɔ, ɖɩtaasɩɩ tɩnaɣ. Paaya-m se mowolo pɩ-yɔɔ nɛ manɖʋʋ ɖɛ-ɛgbɛyɛ nesi tɔm hʋʋ ndɩ ndɩ taa.

Septembre 2018 taa, mayʋsaa se nabʋyʋ kaawɛ me-liu tɛɛ nɛ pɩcɛyɩɣ-m. Ðenɖe ɖɩɩwɛ yɔ, peeɖe ɖɔkɔtɔ nɔɔyʋ wili-m lɛ, ɛtɩpɩzɩ nɛ ɛna mbʋ pɩcɛyaɣ-m yɔ. Pʋwayɩ janvier 2019 taa lɛ, ɖɔkɔtɔ lɛlʋ heyi-m se pɩtɩla mɛwɛnɩ kʋdɔŋ nakʋyʋ ŋgʋ kɩtɩtɔyɩ yɔ, nɛ alɩwaatʋ kaaɖɛɣ lɛ kɩkaɣ wɛnʋʋ ɖoŋ siŋŋ mon-tomnaɣ kpeekpe yɔɔ.

Kɩyakɩŋ naadozo wayɩ, maawɛɛ nɛ malakɩ hola aleɣya wena mankɩlɩ sɔɔlʋʋ yɔ lɛ, mɔntɔlɩ nɛ me-nesi kɩbanzɩ ajɔɔ taa pɛlɩ. Malabɩ hola aleɣya ana me-wezuu kpeekpe, nɛ maasɔɔlɩ-yɛ siŋŋ. Ɛlɛ maanawa se pɩkaɣ-m wɛʋ kaɖɛ lɛɛlɛɛyɔ se menciɣdi mo-hola camɩyɛ. Pɩɩɖɩɣzɩ-m se man-kʋdɔŋ kpa ɖoŋ lɛɛ lɛɛ siŋŋ. Kiyeba nɛ yɔɔdaɣ wɛɣ-m kaɖɛ nɛ pɩkɩlɩɣ, pɩwɛɣ-m kaɖɛ se menciɣdi man-tɩ nɛ pɩwɛɣ-m kaɖɛ se meli nabʋyʋ.

Man-taa wɛ leleŋ siŋŋ se lɔyaa tʋmɩyɛ nɖɩ malaba yɔ, ɖɩpɩzaa nɛ ɖɩsɩnɩ Yehowa ɛgbɛyɛ. Nɛ man-taa wɛ leleŋ siŋŋ ɖɔɖɔ se manpɩzaa nɛ mama tɔm sakɩyɛ takayɩsɩ taa nɛ ɖɔkɔtɔnaa, lɔyaawaa nɛ tɔm hʋyaa pakalɩ. Mɔyɔɔdɩ ɖɔɖɔ tɔm sakɩyɛ ɛjaɖɛ kpeekpe yɔɔ, nɛ malʋ waɖɛ nɖɩ Yehowa samaɣ wɛna se kalɩzɩ kɔyɛ labʋ nʋmɔʋ ŋgʋ kɔsɔɔlaa yɔ nɛ pataaɖʋ-kɛ calɩm yɔ ɖɩ-yɔɔ. Manpɩzɩɣ nɛ mɔyɔɔdɩ Luka 17:10 taa tɔm ɛzʋnɔ: ‘Mɛnkɛ yom weyi ɛfɛyɩnɩ wazaɣ yɔ. Malabɩ mbʋ pɩɩwɛɛ se mala yɔ na.’