Pɩnaɣ kpayɩ kpayɩ se Yesu pɩsɩ Cɔjɔ Sɔsɔ alɩwaatʋ ndʋ pamɩyɩsɩ-ɩ lɩm pɩnaɣ 29 taa yɔ. Ɛzɩma ɖɩlaba nɛ ɖɩtɩlɩ? Alɩwaatʋ ndʋ pamɩyɩsɩ Yesu lɩm yɔ, ɛwɩlaa se ɛsɔɔlɩ faaa se ɛkpaɣ e-wezuu nɛ ɛlaa kɩlaʋ altaaru ŋgʋ kɩsɩŋnɩ mbʋ Ɛsɔ ‘sɔɔlaa’ yɔ kɩ-yɔɔ. (Gal. 1:4; Ebr. 10:5-10) Altaaru ŋgʋ, kɩwɛɛ kpaɣnɩ alɩwaatʋ ndʋ pamɩyɩsɩ Yesu lɩm yɔ. Pʋyɔɔ lɛ, pɩtɩla fezuu taa templo sɔsɔʋ ŋgʋ kɩsɩŋnɩ Ɛsɔ sɛtʋ kele kele ñɩndʋ ɖʋtʋ ndʋ Yehowa laba pɩtɩŋnɩ kɩhɛyʋʋ pʋ-ñʋʋ taa yɔɔ yɔ, tɩpaɣzɩ ɖɔɖɔ alɩwaatʋ ndʋ tɩ-taa na. Altaaru kɛ mbʋ pɩ-tɔm cɛyɩ fezuu taa templo ŋgʋ kɩ-taa yɔ.—Mat. 3:16, 17; Ebr. 5:4-6.

Pɩɩpɔzɩ cɔjɔ sɔsɔ fezuu taa templo sɔsɔʋ taa. Pʋyɔɔ Yehowa lɩzɩ Yesu nɛ ‘ɛtaa-ɩ num fezuu kiɖeɖeu taa nɛ ɛha-ɩ ɖoŋ’ se ɛkɛ cɔjɔ sɔsɔ. (Tʋma 10:37, 38; Mark. 1:9-11) Ɛlɛ, ɛbɛ yɔɔ ɖa-taa pɩzɩɣ nɛ pɩtɛ se palɩzɩ Yesu se ɛkɛ Cɔjɔ Sɔsɔ pʋcɔ ɛsɩkɩ nɛ pefeziɣ-i? Aarɔɔnɩ nɛ cɔjɔnaa sɔsaa mba patɩŋ ɛ-wayɩ yɔ, pa-kɩɖaʋ kaɣ-ɖʋ sɩnʋʋ nɛ ɖicosi tɔm ndʋ tɩ-yɔɔ.

Ɛzɩ Moyizi Paɣtʋ kaapɔzʋʋ yɔ, cɔjɔ sɔsɔ ɖeke pɩzaɣna se ɛsʋʋ Ɛsɔ sɛtʋ kɩɖanɖʋʋ tɛ Kiɖeɖena taa Kiɖeɖee taa, nɛ pʋwayɩ lɛ templo tɛ Kiɖeɖena taa Kiɖeɖee taa. Pɩsaʋ nakʋyʋ tayaɣ Lone Kiɖeɖee nɛ Kiɖeɖena taa Kiɖeɖee pɛ-hɛkʋ taa. Kɩwɛɛkɩm Hɩzʋʋ Kɩyakʋ wiye ɖeke cɔjɔ sɔsɔ tɛzaɣ pɩsaʋ wayɩ. (Ebr. 9:1-3, 6, 7) Paata Aarɔɔnɩ nɛ mba patɩŋ ɛ-wayɩ yɔ num se papɩsɩ cɔjɔnaa sɔsaa pʋcɔ nɛ pɛtɛzɩɣ pɩsaʋ nɛ pasʋʋ Kiɖeɖena taa Kiɖeɖee taa. Yesu ɖɔɖɔ mbʋ, pɩɩwɛɛ se pataa-ɩ num nɛ ɛpɩsɩ Cɔjɔ Sɔsɔ pʋcɔ nɛ ɛsɩ nɛ pʋwayɩ lɛ, “ɛtɩŋnɩ pɩsaʋ wayɩ, pʋ-tɔbʋʋ se e-tomnaɣ” nɛ ɛcaɣ wezuu ɛsɔdaa. (Ebr. 10:20) Pʋyɔɔ apostoloo Pɔɔlɩ yɔɔdaa se Krɩstʋ kɔm ɛzɩ “cɔjɔ sɔsɔ yɔ” nɛ pʋwayɩ ɛtɩŋnɩ “kizinziku ŋgʋ kɩpaɣlaa nɛ pɩkɩlɩ nɛ kɩwɛɛ pilim nɛ pɩkɩlɩ yɔ kɩ-tɛɛ, ŋgʋ patɩlabɩ-kʋ nɛ nesi” yɔ, nɛ “ɛsɔdaa maɣmaɣ.”—Ebr. 9:11, 24.

Tʋkaɣ nakɛyɛ fɛyɩ alɩwaatʋ ndʋ pañɩɣ niye ɛgbɛyɛ kɩfaɖɛ yɔɔ nɛ alɩwaatʋ ndʋ patʋlɩ ɖɩ-nɔɔ yɔ pɛ-hɛkʋ taa. Ɛbɛ yɔɔ? Alɩwaatʋ ndʋ Yesu kpa ɛsɔdaa nɛ ewoni ɖɔ-yɔɔ wezuu ŋgʋ ɛcaɣaa ɛzɩ ɛyʋ weyi ɛtalɩ pilim yɔ kɩ-wazaɣ nɛ ɛwɩlɩ yɔ, ɛkpɛzɩ nɩŋgbanzɩ naadozo nzɩ sɩñɩkɩɣ niye ɛgbɛyɛ kɩfaɖɛ yɔɔ, yaa sɩtʋlʋʋ ɖɩ-nɔɔ yɔ, sɩ-taa kajalaɣ ñɩŋga. Nɩŋgbanzɩ nzɩ, sɩtʋlʋʋ ɖɔɖɔ ɛgbɛyɛ nɔɔ yaa siyeki se ɛgbɛyɛ nɖɩ ɖɩpaɣzɩ tʋmɩyɛ. Ɛbɛ nɩŋgbanzɩ nzɩ sɩɩkɛnaa?

Kajalaɣ lɛ, Yesu wobi Yehowa ɛsɩndaa; pʋwayɩ lɛ, Yesu woni ɛ-kɩlaʋ wazaɣ nɛ ɛwɩlɩ Yehowa; nɛ kɛdɛzaɣ ɖeɖe lɛ, Yehowa tisaa nɛ ɛmʋ calɩm mbʋ Yesu kpɛdaa nɛ pɩmʋ ñɩm yɔ. Pɛkpɛzɩ nɩŋgbanzɩ nzɩ pʋcɔ nɛ ɛgbɛyɛ kɩfaɖɛ paɣzɩɣ tʋmɩyɛ.

Bibl tiheyi-ɖʋ alɩwaatʋ ndʋ ɖeyi ɖeyi Yehowa tisaa nɛ ɛmʋ Yesu kɩlaʋ ŋgʋ kɩmʋ ñɩm yɔ. Ye mbʋ, ɖɩɩpɩzɩɣ nɛ ɖɩyɔɔdɩ alɩwaatʋ ndʋ ɖeyi ɖeyi pañɩɣ niye ɛgbɛyɛ kɩfaɖɛ yɔɔ nɛ alɩwaatʋ ndʋ ɖɩpaɣzɩ tʋmɩyɛ ɖɔɖɔ yɔ. Ɛlɛ, ɖɩnawa se Yesu kpa ɛsɔdaa nɛ pɩla kɩyakɩŋ hiu pʋcɔ nɛ Pantekooti talɩ. (Tʋma 1:3) Alɩwaatʋ ndʋ tɩ-taa ewoni ɛ-kɩlaʋ ŋgʋ kɩmʋ ñɩm yɔ nɛ ɛwɩlɩ Yehowa nɛ ɛlɛ tisi nɛ ɛmʋ-kʋ. (Ebr. 9:12) Mbʋ pɩlabɩ pɩnaɣ 33 tɛ Pantekooti wiye yɔ, mbʋ yebina nɛ ɖɩtɩlɩ tɔm ndʋ. (Tʋma 2:1-4, 32, 33) Pɩnaɣaɣ kpayɩ kpayɩ alɩwaatʋ ndʋ tɩ-taa se paɖʋ ɛgbɛyɛ kɩfaɖɛ nɛ ɖɩpaɣzɩ tʋmɩyɛ.

Tobi lɛ, Yehowa tisaa nɛ ɛmʋ calɩm mbʋ Yesu kpɛdaa nɛ pɩmʋ ñɩm yɔ pʋcɔ nɛ pañɩɣ niye ɛgbɛyɛ kɩfaɖɛ yɔɔ nɛ patʋlɩ ɖɩ-nɔɔ. Alɩwaatʋ ndʋ tɩ-taa ɛgbɛyɛ nɖɩ ɖɩpaɣzɩ tʋmɩyɛ nɛ Yesu pɩsɩ Cɔjɔ Sɔsɔ nɛ Loliyu ɛgbɛyɛ nɖɩ ɖɩ-taa.—Ebr. 7:25; 8:1-3, 6; 9:13-15.