1. Ɛzɩ 3 Yohanɛɛsɩ 3, 4 wɩlʋʋ yɔ, ɛbɛ haɣ-ɖʋ taa leleŋ?

MAƔZƖ nɛ ŋna ɛzɩma apostoloo Yohanɛɛsɩ taa kaalabɩ leleŋ alɩwaatʋ ndʋ ɛnɩwa se ɛyaa mba ɛɛsɩnaa nɛ pɛkpɛlɩkɩ toovenim yɔ, powobi pɩ-yɔɔ nɛ pɔɖɔkʋʋ pe-siɣsiɣ wɛtʋ Yehowa ɛsɩndaa yɔ. Paakatɩ kala sakɩyɛ, nɛ Yohanɛɛsɩ kaawɛɛ nɛ ɛñakɩ pana se ɛkpazɩ Krɩstʋ mba siɣsiɣ ñɩma mba pe-tisuu ɖoŋ. Ɛkpakaɣ-wɛ ɛzɩ pɛkɛ e-piya fezuu taa yɔ. Mbʋ ɖɔɖɔ alɩwaatʋ ndʋ ɖa-maɣmaɣ ɖe-piya yaa ɛyaa mba ɖɩsɩnaa nɛ patɩlɩ toovenim yɔ, pahaɣ pa-tɩ Yehowa nɛ powoki pɩ-yɔɔ nɛ pɛsɛɣ-ɩ yɔ, ɖa-taa lakɩ leleŋ.—Kalɩ 3 Yohanɛɛsɩ 3, 4.

2. Takayɩsɩ nzɩ Yohanɛɛsɩ mawa yɔ, sɩ-kaɖʋwa lɛ ŋga?

² Pɩnaɣ 98 taa, pɩɩwɛ ɛzɩ Yohanɛɛsɩ kaawɛ Efɛɛzɩ tɛtʋ taa yaa tɩ-cɔlɔ yɔ. Pɩtɩla, palɩzɩ-ɩ nɛ salaka taa lɩm hɛkʋ taa tɛtʋ ndʋ payaɣ se Patɩmoosɩ yɔ tɩ-taa nɛ pɩtɛ lɛ, ewobi peeɖe. Alɩwaatʋ ndʋ tɩ-taa Yehowa fezuu kiɖeɖeu seɣti-i nɛ ɛma takayɩsɩ naadozo. Takayɩsɩ nzɩ, sɩ-kaɖʋwa lɛ se siseɣti Krɩstʋ mba siɣsiɣ ñɩma nɛ pataalesi tisuu mbʋ pɛwɛnɩ Yesu yɔɔ yɔ, nɛ powolo pɩ-yɔɔ nɛ pɔɖɔŋ toovenim taa.

3. Tɔm pɔzʋʋ mbʋ yɔɔ ɖɩkaɣ cosuu?

³ Apostoloowaa tɩŋa kaatɛm sɩbʋ, Yohanɛɛsɩ ɖeke pɩɩkazaa; nɛ ɛnɩɣzaɣ ɖoŋ kɩdɛkɛdɩŋ weyi cɛtɩm tɔm wɩlɩyaa kaawɛnɩ agbaa yɔɔ yɔ ɩ-yɔɔ. * (1 Yoh. 2:18, 19, 26) Tisuu yebiyaa mba, pɔyɔɔdaɣ se pasɩm Ɛsɔ, ɛlɛ paataaɖɔŋ Yehowa paɣtʋ yɔɔ. Iyele nɛ ɖɩtazɩ lɔŋ weyi fezuu kiɖeɖeu sɩnɩ Yohanɛɛsɩ nɛ ɛtasɩ yɔ ɩ-taa. Ðɩɩtazɩɣ lɔŋ tasʋʋ mbʋ pɩ-taa lɛ, ɖɩkaɣ cosuu tɔm pɔzʋʋ naadozo yɔɔ: Ye pɔtɔm se ɛyʋ ɛɖɔ toovenim taa yɔ, pʋ-tɔbʋʋ lɛ suwe? Kala wena ɖɩkatɩɣ? Nɛ ɛzɩma ɖɩpɩzɩɣ nɛ ɖɩsɩnɩ ɖama nɛ ɖiwolo pɩ-yɔɔ nɛ ɖɩwɛɛ toovenim taa?

4. Ɛzɩ 1 Yohanɛɛsɩ 2:3-6 nɛ 2 Yohanɛɛsɩ 4, 6 yɔɔdʋʋ yɔ, ɛbɛ pɩcɛyaa se ɖɩla nɛ ɖɩɖɔ toovenim taa?

⁴ Pɩsa nɛ ɖɩɖɔ toovenim taa lɛ, pɩcɛyaa se ɖɩtɩlɩ toovenim tɔm ndʋ tɩwɛ Ɛsɔtɔm taa yɔ. Pɩtasɩ lɛ, pɩwɛɛ se ‘ɖɩɖɔ Yehowa paɣtʋ yɔɔ,’ pʋ-tɔbʋʋ lɛ se ɖɩñam-tʋ. (Kalɩ 1 Yohanɛɛsɩ 2:3-6; 2 Yohanɛɛsɩ 4, 6.) Yehowa ñam hɔɔlʋʋ taa lɛ, Yesu hanɩ kɩɖaʋ ŋgʋ kɩtalɩ pilim yɔ. Ye mbʋ, nʋmɔŋ sɔsɔŋ weyi ɩ-yɔɔ ɖɩpɩzɩɣ ɖɩtɩŋna nɛ ɖɩña Yehowa yɔ, ɩ-taa lɛɛkʋ lɛ se ɖɩñaɣ pana nɛ ɖɩmaɣzɩnɩ Yesu kɩɖaʋ ɖeyi ɖeyi.—Yoh. 8:29; 1 Pɩy. 2:21.

5. Ɛbɛ pɩwɛɛ se ɖa-taa ɛtɛmna?

⁵ Pɩsa nɛ ɖiwolo pɩ-yɔɔ nɛ ɖɩɖɔŋ toovenim taa lɛ, pɩwɛɛ se ɖa-taa ɛtɛ se Yehowa kɛnɩ toovenim tɛ Ɛsɔ, nɛ tɔm ndʋ payɩ eheyiɣ-ɖʋ ɛ-Tɔm taa yɔ, tɩkɛ toovenim. Nɛ pɩwɛɛ ɖɔɖɔ se ɖa-taa ɛtɛ se Yesu kɛnɩ Mesiya weyi ɛ-tɔm paayɔɔdaa yɔ. Sɔnɔ, ɛyaa sakɩyɛ pɩtɩɣ se pata Yesu num nɛ ɛpɩsɩ Ɛsɔ Kewiyaɣ Wiyaʋ. Yohanɛɛsɩ kaapaɣ ɛyaa se “peɣziyaa sakɩyɛ” kaawɛɛ nɛ papɩzɩɣ nɛ pepeɣzi mba pataañɔɔzɩ pa-tɩ se palʋ toovenim tɔm yɔɔ yɔ. Toovenim tɔm ndʋ titukuuni Yehowa nɛ Yesu. (2 Yoh. 7-11) Yohanɛɛsɩ mawa se: “Akɛ cɛtɩyʋ ye pɩtɩkɛ weyi ekiziɣ se Yesu tɩkɛ Krɩstʋ yɔ?” (1 Yoh. 2:22) Nʋmɔʋ ŋgʋ ki-ɖeke kɩ-yɔɔ ɖɩpɩzɩɣ ɖɩtɩŋna nɛ ɖitaayele nɛ pepeɣzi-ɖʋ yɔ, ŋgʋ lɛ se pɩwɛɛ se ɖɩkpɛlɩkɩɣ Ɛsɔtɔm. Pi-ɖeke pɩ-labʋ kaɣnɩ yebu nɛ ɖɩtɩlɩ Yehowa nɛ Yesu. (Yoh. 17:3) Nɛ ɖa-taa kaɣ tɛm se mbʋ pɩ-yɔɔ ɖitisiɣ yɔ, pɩkɛ toovenim.

6. Piya evelisi nzɩ sɩkɛ Krɩstʋ ñɩma yɔ sɩkatɩɣ kala naayɛ. A-taa naɖɩyɛ lɛ nɖɩ?

⁶ Pɩwɛɛ se Krɩstʋ ñɩma tɩŋa ɩkpa pa-tɩ nɛ ɛjaɖɛ yɔɔ lɔŋsɩnɖɛ etaapeɣzi-wɛ. (1 Yoh. 2:26) Kɔzɩ kɔzɩ lɛ, pɩwɛɛ se piya evelisi nzɩ sɩkɛ Krɩstʋ ñɩma yɔ, sɩkpa sɩ-tɩ nɛ kpaca ŋgʋ. Payaɣ koobu halɩñɩnʋ nɔɔyʋ se Alexia, * ɛwɛnɩ pɩnzɩ 25 nɛ ɛwɛ Fransɩ ɛjaɖɛ taa. Ɛyɔɔdaa se: “Alɩwaatʋ ndʋ mowokaɣ sukuli yɔ, mɛnkpɛlɩkɩ évolution wɩlɩtʋ nɛ ɛyaa wɩlɩtʋ lɛɛtʋ; nɛ wɩlɩtʋ ndʋ tiyeba nɛ manpaɣzɩ pɩtʋʋ toovenim yɔɔ. Nabʋyʋ taa wɩlɩtʋ ndʋ tɩkɛdaɣnɩ-m. Ɛlɛ mamaɣzɩ se pɩɩwɛɣ ɖeu se menkizi tɔm ndʋ Bibl wɩlɩɣ yɔ nɛ mentisi tɔm ndʋ payɩ ma-wɩlɩyaa yɔɔdaa yɔ tɩ-yɔɔ.” Alexia kpɛlɩkɩ takayaɣ ŋga payaɣ  se La vie: comment est-elle apparue? Évolution ou création? yɔ. Kpɩtaŋ pazɩ wayɩ lɛ, eyele pɩtʋʋ. Alexia yɔɔdaa se: “Ma-maɣmaɣ mañɩnaa nɛ mana se tɔm ndʋ tɩwɛ Bibl taa yɔ tɩkɛ toovenim. Nɛ menɖiɣzinaa se ye mɔnɖɔŋ kɩ-paɣtʋ yɔɔ yɔ, mehikiɣ taa leleŋ nɛ laŋhɛzɩyɛ.”

7. (a) Pɩwɛɛ se ɖɩkpa ɖa-tɩ nɛ nɔɔyʋ ɛtaañɩɣ ɖɔ-yɔɔ nɛ ɖɩla we? (b)Nɛ ɛbɛ yɔɔ pɩwɛɛ se ɖɩkpa ɖa-tɩ mbʋ?

⁷ Pɩwɛɛ se Krɩstʋ ñɩma tɩŋa, pʋ-tɔbʋʋ se piya evelisi nɛ sɔsaa ɩkpa pa-tɩ nɛ nɔɔyʋ ɛtaañɩɣ pɔ-yɔɔ nɛ pacaɣ pɩ-tɛɛ nɛ pɩ-yɔɔ wezuu. Yohanɛɛsɩ ñɩɣ niye se ɖɩɩpɩzɩɣ nɛ ɖɩɖɔŋ toovenim taa nɛ alɩwaatʋ kʋɖʋmtʋ ndʋ tɩ-taa lɛ, ɖɩcakɩ wezuu kɩdɛkɛdʋʋ. (1 Yoh. 1:6) Ye ɖɩsɔɔlaa se Yehowa taa ɛlabɩnɩ-ɖʋ leleŋ yɔ, pɩcɛyaa se paa ɛzɩmtaa lɛ, ɖɩtɔzɩ se ɛnaɣ mbʋ payɩ ɖɩlakɩ yɔ. Paa ɛyaa ɩɩnaɣ mbʋ ɖɩlakɩ mɛsaɣ tɛɛ yɔ, Yehowa pɩzɩɣ nɛ ɛna mbʋ payɩ ɖɩlakɩ yɔ.—Ebr. 4:13.

8. Ɛbɛ pɩwɛɛ se ɖikizi?

⁸ Pɩwɛɛ se ɖikizi lɩmaɣza wena ɛjaɖɛ wɛnɩ kɩwɛɛkɩm yɔɔ yɔ. Apostoloo Yohanɛɛsɩ mawa se: “Ye ɖɩtɔŋ se: ‘Ðɩfɛyɩnɩ kɩwɛɛkɩm’ yɔ, ɖɩwɛɛ nɛ ɖipeɣziɣ ɖa-tɩ.” (1 Yoh. 1:8) Yohanɛɛsɩ alɩwaatʋ taa, tisuu yebiyaa yɔɔdaɣ se ɛyʋ pɩzɩɣ nɛ ɛna faɖaɖa nɛ ɛla kɩwɛɛkɩm, nɛ taabalɩyɛ wɛɛ ɛ nɛ Ɛsɔ pɛ-hɛkʋ taa mbʋ. Sɔnɔ, mba pɛ-hɛkʋ taa ɖɩwɛɛ yɔ, lɩmaɣza kʋɖʋma ana pɛwɛna. Sakɩyɛ yɔɔdʋʋ se mba tisiɣ Ɛsɔ yɔɔ, ɛlɛ paatisiɣ lɩmaɣza wena Yehowa wɛnɩ kɩwɛɛkɩm yɔɔ yɔ a-yɔɔ, kɔzɩ kɔzɩ alɩwaatʋ ndʋ pitukuuni kʋzʋʋ yɔ. Yehowa yɔɔdʋʋ se kʋzʋʋ lakasɩ nasɩyɩ wɛɛ lɛ, sɩfɛyɩ ɖeu. Ɛlɛ ɛyaa mba paba ñɔyɔɔdʋʋ se ye nɔɔyʋ ɛsɔɔlaa nɛ ɛla kʋzʋʋ lakasɩ nzɩ yɔ, pɩtɩwɛɛkɩ pʋyʋ.

9. Alɩwaatʋ ndʋ piya evelisi ñɔʋnɩ Bibl taa tɔm ndʋ tɩ-yɔɔ sitisiɣ yɔ, ɛzɩma pɩwazɩɣ-sɩ?

⁹ Pɩpɩzɩɣ nɛ pɩwɛɛ kaɖɛ siŋŋ piya evelisi nzɩ sɩkɛ Krɩstʋ mba yɔ se sɩwɛɛnɩ lɩmaɣza  kɩbana kʋzʋʋ yɔɔ, ye mba pa nɛ sɩ pɛwɛ tʋmɩyɛ taa yaa sukuli taa yɔ, paatisiɣ tɔm ndʋ Bibl yɔɔdʋʋ kʋzʋʋ yɔɔ yɔ tɩ-yɔɔ yɔ. Wɛtʋ ndʋ Aleksandar kaakataa. Ɛyɔɔdaa se: “Mon-sukuli taa halɩbiya nasɩyɩ kaañaɣ pana se sɩñɩɣ mɔ-yɔɔ nɛ ma nɛ sɩ ɖɩcaɣ kʋzʋʋ kɩdɛkɛdʋʋ wezuu. Sɩyɔɔdaɣ se ye maaɖanɩɣ halɩbɩɣa nakɛyɛ yɔ, pɩwɩlɩɣ se mansʋʋnɩ mba ma nɛ wɛ ɖɩka kʋzʋʋ piliŋa yɔ.” Wɛtʋ ndʋ tɩpɩzɩɣ nɛ tɩtalɩ-ŋ ɖɔɖɔ. Ɛlɛ ye ŋlabɩ mbʋ ŋnawa se Bibl yɔɔdʋʋ se pɩwɛ ɖeu yɔ, ŋkaɣ hiɣu taa leleŋ, ŋkandɩyɩ ñɔ-tɔnʋʋ taa alaafɩya yɔɔ, ŋfɛɛ laŋwɛɛkɩyɛ nɛ taabalɩyɛ wɛɛ ña nɛ Yehowa mɩ-hɛkʋ taa mbʋ. Nɛ ye ŋñakɩ pana se nɔɔyʋ ɛtaañɩɣ ñɔ-yɔɔ nɛ ŋla mbʋ pɩfɛyɩ ɖeu yɔ, pɩkaɣ-ŋ wɛʋ kɛlɛʋ nɛ pɩkɩlɩ se ŋla mbʋ pɩwɛ ɖeu yɔ. Tɔzɩ ɖɔɖɔ se lɩmaɣza kɩdɛkɛda wena ɛjaɖɛ wɛnɩ kʋzʋʋ yɔɔ yɔ, alɩnɩ Sataŋ cɔlɔ na. Ye mbʋ, alɩwaatʋ ndʋ ŋkiziɣ se ŋŋwɛɣnɩ lɩmaɣza wena ɛyaa wɛnɩ ɛjaɖɛ yɔɔ yɔ, ‘ŋwakɩ kañatʋ tʋ.’—1 Yoh. 2:14.

10. Ɛzɩma 1 Yohanɛɛsɩ 1:9 sɩɣnɩ-ɖʋ se ɖɩsɛɛ Yehowa nɛ ɛhʋyɛ kele kele ñɩnɖɛ?

¹⁰ Ðiɖiɣzinaa se Yehowa pɩmʋnaa se eheyi-ɖʋ mbʋ pɩkɛ kɩwɛɛkɩm yɔ. Nɛ ɖɩñakɩ pana se ɖɩtaala kɩwɛɛkɩm. Ɛlɛ alɩwaatʋ ndʋ ɖɩlakɩ kɩwɛɛkɩm yɔ, ɖɩtɩmɩɣnɩ Yehowa nɛ ɖiheyi-i mbʋ ɖɩlaba nɛ pɩfɛyɩ ɖeu yɔ. (Kalɩ 1 Yohanɛɛsɩ 1:9.) Nɛ ye ɖɩlabɩ kɩwɛɛkɩm sɔsɔm nabʋyʋ yɔ, ɖɩpɔzʋʋ ɛzʋtʋyaa se pasɩnɩ-ɖʋ. Ɛzʋtʋyaa mba Yehowa lɩzaa se pɔcɔnɩ ɖɔ-yɔɔ. (Yak. 5:14-16) Ɛlɛ pɩtɩpɔzɩ se ɖiwolo pɩ-yɔɔ nɛ ɖɩmaɣzɩɣ kɩwɛɛkɩm mbʋ ɖɩlaba nɛ pɩɖɛɛ yɔ pɩ-yɔɔ. Ɛbɛ yɔɔ? Mbʋ pʋyɔɔ yɔ, ɖa-Caa kʋsɔɔlʋ kpaɣ ɛ-Pɩyalʋ nɛ ɛlaa se pɩkɛnɩ kɩhɛyʋʋ pʋ-ñʋʋ taa kɩlaʋ se pɩsa nɛ papɩzɩ nɛ pekpeɣ-ɖʋ ɖa-kɩwɛɛkɩm. Yehowa yɔɔdaa se ɛkaɣ kpeɣu kɩwɛɛkɩm laɖaa mba pekpiɖiɣ yɔ, nɛ ɛcakɩ ɛ-tɔm yɔɔ. Ye mbʋ, nabʋyʋ ɛɛpɩzɩɣ nɛ pɩɖɩɣ-ɖʋ nʋmɔʋ se ɖɩtaasɛɛ Yehowa nɛ ɛhʋyɛ kele kele ñɩnɖɛ.—1 Yoh. 2:1, 2, 12; 3:19, 20.

11. Ɛzɩma ɖɩpɩzɩɣ nɛ ɖɩkandɩyɩ ɖa-maɣzɩm yɔɔ nɛ wɩlɩtʋ ndʋ tɩpɩzɩɣ nɛ tɩcamɩ ɖe-tisuu yɔ tɩtaawɛɛnɩ ɖoŋ pɩ-yɔɔ?

 ¹¹ Pɩwɛɛ se ɖikizi tisuu yebiyaa wɩlɩtʋ. Kpaɣnɩ alɩwaatʋ ndʋ Krɩstʋ ɛgbɛyɛ ñɔwa yɔ, Eleeu wɛɛ nɛ ɛtɩŋɩɣnɩ peɣziyaa sakɩyɛ yɔɔ se eyele nɛ abʋta ñɔ Ɛsɔ sɛyaa siɣsiɣ ñɩma maɣzɩm taa. Mbʋ pɩlɩ pɩ-taa yɔ lɛ se pɩwɛɛ se ɖɩtɩlɩ ɛzɩma ɖɩɖʋ tʋkaɣ toovenim nɛ cɛtɩm pɛ-hɛkʋ taa yɔ. * Ðo-koyindinaa pɩzɩɣ nɛ patɩŋnɩ intɛrnɛɛtɩ yaa réseaux sociaux waa yɔɔ se pañaɣ pana nɛ pacamɩ tisuu mbʋ ɖɩwɛnɩ Yehowa yɔɔ yɔ, nɛ sɔɔlɩm mbʋ ɖɩwɛnɩ ɖo-koobiya yɔɔ yɔ. Taatisi cɛtɩm tɔm ndʋ tɩ-yɔɔ, mbʋ pʋyɔɔ yɔ Sataŋ cɔlɔ tɩlɩɣna!—1 Yoh. 4:1, 6; Natʋ 12:9.

12. Ɛbɛ yɔɔ pɩpɔzʋʋ se ɖɩkpazɩ ɖoŋ tisuu mbʋ ɖɩwɛnɩ toovenim tɔm ndʋ ɖɩkpɛlɩkaa yɔ tɩ-yɔɔ?

¹² Pɩsa nɛ ɖɩkaɖɩnɩ pana wena Sataŋ ñakɩ se ɛcamɩ ɖe-tisuu yɔ lɛ, pɩcɛyaa se ɖɩkpazɩ ɖoŋ tisuu mbʋ ɖɩwɛnɩ Yesu yɔɔ yɔ. Pɩtasɩ lɛ, pɩmʋnaa se ɖɩkpazɩ ɖoŋ tisuu mbʋ ɖɩwɛnɩ lone nɖɩ ɛwɛnɩ Ɛsɔ kaɖʋwa taa yɔ ɖɩ-yɔɔ. Pɩcɛyaa ɖɔɖɔ se ɖɩtaa liu yom siɣsiɣ tʋ nɛ lɔŋsɩnɖʋ se e-ɖeke ɛ-yɔɔ Yehowa wɛɛ ɛtɩŋɩɣna nɛ eɖiyiɣ ɛ-ɛgbɛyɛ. (Mat. 24:45-47) Ye ɖɩkpɛlɩkɩɣ Ɛsɔtɔm ɖoŋ ɖoŋ yɔ, ɖɩkpazɩɣ ɖoŋ tisuu mbʋ ɖɩwɛna yɔ. Pɩkaɣ yebu nɛ ɖe-tisuu wɛɛ ɛzɩ tɩʋ ŋgʋ ki-lila kam tɛtɛɛ camɩyɛ yɔ. Pɔɔlɩ kaayɔɔdɩ tɔm ndʋ tɩ-ɖɔndɩ alɩwaatʋ ndʋ ɛmaɣaɣ Koloosi ɛgbɛyɛ takayaɣ yɔ. Ɛyɔɔdaa se: “Ɛzɩ ɩmʋʋ Kɩbaɣlʋ Krɩstʋ Yesu yɔ, iwolo pɩ-yɔɔ nɛ mɩ nɛ ɩ ɩɖɔ nɔɔ kʋɖʋmaɣ taa, nɛ ɩka lila nɛ ɩkɛ mba pama-wɛ ɛ-yɔɔ yɔ nɛ ɩcɛyɩsɩ tisuu taa.” (Kol. 2:6, 7) Ye ɖɩñakɩ pana se ɖɩkpazɩ ɖoŋ ɖe-tisuu yɔ, Sataŋ yaa mba paɖʋʋ-ɩ nesi yɔ, paakaɣ pɩzʋʋ nɛ paɖɩɣ-ɖʋ nʋmɔʋ se ɖitaawolo pɩ-yɔɔ nɛ ɖɩɖɔŋ toovenim taa.—2 Yoh. 8, 9.

13. Ɛbɛ pɩwɛɛ se ɖɩɖaŋ, nɛ ɛbɛ yɔɔ?

¹³ Pɩwɛɛ se ɖɩɖaŋ se ɛjaɖɛ kaɣ-ɖʋ paɖʋʋ. (1 Yoh. 3:13) Yohanɛɛsɩ tɔzʋʋ-ɖʋ se “ɛjaɖɛ kpeekpe wɛ kañatʋ tʋ ɖoŋ tɛɛ.” (1 Yoh. 5:19) Ɛjaɖɛ ɖɩnɛ ɖɩwɛɣ nɛ ɖɩñɔtʋʋnɩ ɖɩ-ɖɩdɛnɖɛ lɛ, Sataŋ pana wɛɣ nɛ akpaɣ ɖoŋ kpaʋ yɔɔ. (Natʋ 12:12) Pɩtɩkɛ ajitu nʋmɔŋ ɛzɩ wezuu kɩdɛkɛdʋʋ caɣʋ nɛ tisuu yebiyaa cɛtɩm tɔm ɖeke yɔɔ ɛtɩŋɩɣna se ɛkaɖɩnɩ-ɖʋ, ɛlɛ ɛtɩŋɩɣnɩ ɖɔɖɔ nʋmɔŋ weyi ɩnaɣ kaɣlaa ɛzɩ nazɩm yɔɔ mbʋ yɔ nɛ ɛkaɖɩɣnɩ-ɖʋ. Sataŋ nawa se alɩwaatʋ pazɩ yem pɩkazɩ-ɩ se ɛñaɣ pana nɛ ɛsɩnzɩ ɖɔ-tɔm susuu tʋmɩyɛ yaa eyele nɛ ɖɩlɔ tisuu. Pʋyɔɔ lɛ, pɩɩɖɩɣzɩɣ-ɖʋ se pasɩnzɩ ɖa-tʋma naayɛ yaa a-tɩŋa ajɛɛ naayɛ taa. Paa mbʋ yɔ, ɖo-koobiya mba pɛwɛ ajɛɛ ana a-taa yɔ pɛwɛɛ nɛ pɔɖɔkʋʋ pa-tɩ. Pʋyɔɔ lɛ, paa ɛbɛ Sataŋ ɛlakɩ Yehowa samaɣ yɔ, ɖɩpɩzɩɣ ɖiwolo pɩ-yɔɔ nɛ ɖɩɖɔkɩ ɖe-siɣsiɣ wɛtʋ!

14. Nʋmɔŋ weyi ɩ-yɔɔ ɖɩpɩzɩɣ ɖɩtɩŋna nɛ ɖɩsɩnɩ ɖo-koobiya nɛ pɛwɛɛ toovenim taa tam yɔ, ɩ-taa nakʋyʋ lɛ ŋgʋ?

¹⁴ Pɩsa nɛ ɖɩsɩnɩ ɖo-koobiya nɛ pɛwɛɛ toovenim taa tam lɛ, pɩwɛɛ se ɖɩwɩlɩ se ɖɩkɛ pʋtɔdɩyɛ nayaa. (1 Yoh. 3:10, 11, 16-18) Pɩtɩkɛ alɩwaatʋ ndʋ pɩtɩŋa pɩɖɔŋ camɩyɛ yɔ pɩwɛɛ se ɖɩwɩlɩ se ɖɩsɔɔlɩ ɖama, ɛlɛ pɩwɛɛ se ɖɩla mbʋ ɖɔɖɔ alɩwaatʋ ndʋ kala kɔŋ yɔ. Kɩɖaŋ nɩɩyɩ yɔ: Ŋsɩm nɔɔyʋ se elesi ɛ-ɛyʋ kʋsɔɔlʋ nɔɔyʋ nɛ pɩpɔzʋʋ se pɛhɛzɩ ɛ-laŋɩyɛ, yaa pala nabʋyʋ ɖeyi ɖeyi nɛ pasɩnɩ-ɩ? Yaa ŋnɩwa se asɛyʋʋ nakʋyʋ laba nɛ koobiya nabɛyɛ lesi pa-ñɩm nɛ pɩpɔzʋʋ se pasɩnɩ-wɛ nɛ paɖaɣnɩ maʋ pe-Kewiyaɣ Kpaamɩŋ yaa pa-ɖɩsɩ na? Pɩtɩkɛ tɔm ndʋ ɖɩyɔɔdʋʋ yɔ, tɩ-yɔɔ ɖeke ɖɩtɩŋɩɣna nɛ ɖɩwɩlɩɣ se ɖɩsɔɔlɩ ɖo-koobiya nɛ ɖɩnaɣ pa-pʋtɔdɩyɛ siŋŋ, ɛlɛ kɔzɩ kɔzɩ lɛ ɖɩtɩŋɩɣnɩ ɖa-lakasɩ yɔɔ nɛ ɖɩlakɩ mbʋ ɖɔɖɔ.

15. Ɛzɩ 1 Yohanɛɛsɩ 4:7, 8 yɔɔdʋʋ yɔ, ɛbɛ pɩcɛyaa se ɖɩla?

 ¹⁵ Alɩwaatʋ ndʋ ɖɩwɩlɩɣ ɖama sɔɔlɩm yɔ, ɖɩmaɣzɩɣnɩ ɖa-Caa kʋsɔɔlʋ weyi ɛwɛ ɛsɔdaa yɔ. (Kalɩ 1 Yohanɛɛsɩ 4:7, 8.) Nʋmɔʋ sɔsɔʋ ŋgʋ kɩ-yɔɔ ɖɩtɩŋɩɣna nɛ ɖɩwɩlɩɣ se ɖɩwɛnɩ sɔɔlɩm yɔ, ŋgʋ lɛ se ɖikpeɣ ɖama. Kɩɖaʋ nakʋyʋ yɔ: Ye nɔɔyʋ ɛɖʋ-ɖʋ ɖɩwɩzɩyɛ yɔ, pɩwɛɛ se ɖikpeɣ-i nɛ ɖɩsɔɔ mbʋ ɛlabɩ-ɖʋ yɔ pɩ-yɔɔ, mbʋ wɩlɩɣna se ɖɩwɛnɩ sɔɔlɩm. (Kol. 3:13) Payaɣ koobu abalɩñɩnʋ nɔɔyʋ se Aldo. Kɩyakʋ nakʋyʋ koobu weyi ɛñaŋaɣ yɔ, ɛyɔɔdɩ tɔm kɩdɛkɛdɩtʋ ɛyaa mba pa nɛ Aldo paka sɔnzɩ yɔ pɔ-yɔɔ. Peeɖe pɩwɩzɩ Aldo siŋŋ. Aldo yɔɔdaa se: “Mantɩmaɣnɩ Yehowa ɖoŋ ɖoŋ se ɛsɩnɩ-m nɛ mantaawɛɛnɩ lɩmaɣza kɩdɛkɛda koobu ɛnʋ ɛ-yɔɔ.” Ɛlɛ Aldo kaalabɩ nabʋyʋ ɖɔɖɔ. Ɛkpaɣ lɩmaɣzɩyɛ se ɛyaɣ koobu ɛnʋ nɛ ɛ nɛ ɩ palɩɩ nɛ posusi tɔm. Pɛkpɛndaa nɛ posusuu tɔm lɛ, Aldo lɩzɩ koobu ɛnʋ pɩ-taa se tɔm ndʋ ɛyɔɔdaa yɔ, tɩwɩzɩ-ɩ. Aldo yɔɔdaa se: “Koobu ɛnʋ ɛnɩ ɛzɩma tɔm ndʋ ɛyɔɔdaa yɔ tɩlabɩ-m yɔ lɛ, etendi-m. Nɔɔ ŋga ɛyɔɔdɩnɩ-m yɔ, keyeba nɛ mana se ekpiɖi tɔm ndʋ ɛyɔɔdaa yɔ tɩ-yɔɔ siŋŋ. Kpaɣnɩ mbʋ lɛ, ɖɩɖaɣnɩ pɩsʋʋ taabalaa kɩbama.”

16-17. Ɛbɛ pɩwɛɛ se ɖɩtɛ ɖa-taa se ɖɩlakɩ?

¹⁶ Apostoloo Yohanɛɛsɩ kaasɔɔlɩ e-koobiya siŋŋ nɛ ɛɛsɔɔlaa se pɛwɛɛnɩ tisuu sɔsɔm. Lɔŋ weyi ɛtasɩ-wɛ takayɩsɩ naadozo nzɩ ɛmawa yɔ sɩ-taa yɔ, ɩwɩlɩ kpayɩ kpayɩ se ɛsɔɔlɩ-wɛ nɛ ɛmaɣzɩɣ pɔ-yɔɔ. Pɩwɛ ɖeu siŋŋ se ɖɩtɩlɩ se abalaa nɛ halaa mba pa nɛ Yesu pakaɣ tɔɔʋ Kewiyitu ɛsɔdaa yɔ, pɛwɛnɩ sɔɔlɩm nɛ pamaɣzɩɣ ɛyaa yɔɔ ɛzɩ Yohanɛɛsɩ yɔ!—1 Yoh. 2:27.

¹⁷ Tɛtɛ nɛ ɖɩkpaɣ lɔŋ tasʋʋ mbʋ pɩ-taa ɖɩtazaa yɔ nɛ ɖɩlabɩnɩ tʋmɩyɛ. Iyele nɛ ɖɩtɛ ɖa-taa se ɖɩɖɔŋ toovenim taa, pʋ-tɔbʋʋ se ɖiwoki pɩ-yɔɔ nɛ ɖɩñaŋ Yehowa ɖe-wezuu caɣʋ hɔɔlɩŋ kpeekpe taa. Kpɛlɩkɩɣ ɛ-Tɔm nɛ ŋtaɣ-tʋ liu. Wɛɛnɩ tisuu sɔsɔm Yesu yɔɔ. Kizi ɛjaɖɛ yɔɔ lɔŋsɩnɖɛ nɛ tisuu yebiyaa wɩlɩtʋ. Taayele nɛ nɔɔyʋ ñɩɣ ñɔ-yɔɔ nɛ ŋcaɣ pɩ-tɛɛ nɛ pɩ-yɔɔ wezuu, nɛ ŋla kɩdɛkɛdɩm. Ðɔ paɣtʋ ndʋ Yehowa ɖʋ wezuu kɩbaŋʋ caɣʋ nʋmɔʋ taa yɔ tɩ-yɔɔ. Nɛ iyele nɛ ɖikpeɣ mba paɖʋʋ-ɖʋ ɖɩwɩzɩyɛ yɔ, nɛ ɖɩsɩɣnɩ mba pɛwɛ kɩcɛyɩm taa yɔ, pɩsɩɣnɩ ɖo-koobiya nɛ pɛwɛɛ ɖoŋ tam. Piyeki nɛ ɖiwolo pɩ-yɔɔ nɛ ɖɩɖɔŋ toovenim taa, paa ɖɩkatɩɣ kala ndɩ ndɩ yɔ.