Pɩtʋʋ fɛyɩ se Yehowa sɔɔlaa se ɛyaa naalɛ mba pɔɖɔkɩ nesi yɔ, pehiɣ taa leleŋ nɛ taabalɩyɛ kɩbanɖɛ wɛɛ pɛ-hɛkʋ taa tam. (Mat. 19:4-6) Ye ŋsɔɔlaa se ŋɖɔkɩ nesi yɔ, ɛzɩma ŋpɩzɩɣ nɛ ŋhiɣ walʋ kɩbanʋ yaa halʋ kɩbanʋ? Yehowa kɛnɩ ɖa-Lɩzɩyʋ, pʋyɔɔ lɛ ɛsɩm mbʋ pɩpɔzʋʋ-ɖʋ se pɩsa nɛ ɖihiɣ taa leleŋ ɖe-nesi ɖɔkʋʋ taa yɔ. Pʋyɔɔ lɛ, ye ŋlakɩnɩ tʋmɩyɛ paɣtʋ kila wena ɛha-ɖʋ yɔ, ŋkaɣ hiɣu taa leleŋ siŋŋ. Yele nɛ ɖɩna paɣtʋ kila ana a-taa naayɛ.

Kajalaɣ lɛ, pɩwɛɛ se ɖɩtɩlɩ ɖa-maɣmaɣ ɖɔ-yɔɔ tɔm tʋnɛ: “Laŋɩyɛ kɛ cɛtɩyʋ nɛ pɩkpaɖɩ pɩ-tɩŋa nɛ ɖɩ-tɔm wɛ kaɖɛ.” (Yer. 17:9; nwt) Alɩwaatʋ ndʋ ɛyaa naalɛ mba pɔsɔɔlaa se pɔɖɔkɩ nesi yɔ pakatɩɣ ɖama nɛ papaɣzɩ ɖama ɖanʋʋ yɔ, papɩzɩɣ nɛ papaɣzɩ ɖama sɔɔlʋʋ siŋŋ lɛɛ lɛɛ. Pɩlakɩ mbʋ lɛ, pɩwɛɣ-wɛ kaɖɛ se pakpaɣ lɩmaɣza kɩbana. Ye sɔɔlɩm mbʋ ɛyaa nabɛyɛ wɛnɩ ɖama yɔɔ yɔ pi-ɖeke piseɣtiɣni-wɛ se pakpaɣ lɩmaɣzɩyɛ se pɔɖɔkʋʋ nesi yɔ, pʋwayɩ pɩpɩzɩɣ nɛ pɩkɔnɩ-wɛ laŋwɛɛkɩyɛ. (Adu. 28:26) Pʋyɔɔ lɛ, pɩɩkɛɣnɩ lɔŋsɩnɖɛ se alɩwaatʋ ndʋ ɛyaa naalɛ paɣzɩɣ ɖanʋʋ ɖama yɔ, papaɣzɩ ɖama sɔɔlʋʋ siŋŋ yaa pala ɖama tamaɣ se pakaɣ ɖɔkʋʋ nesi pʋcɔ nɛ patɩlɩ ɖama camɩyɛ.

Aduwa 22:3 yɔɔdʋʋ se: “Ɛyʋ lɔŋ tʋ naɣ kɩdɛkɛdɩm nɛ ɛmɛlɩɣ, ɛyaa kɛlɛʋ tɩnaa tɛzɩɣ-pʋ nɛ panɩɣ siziŋ.” Ye ɖɩtɩŋɩɣnɩ intɛrnɛɛtɩ yɔɔ se ɖɩñɩnɩ weyi ɖa nɛ ɩ ɖɩkaɣ nesi ɖɔkʋʋ yɔ, kaɖɛ nɖɩ ɖɩpɩzɩɣ nɛ ɖɩkatɩ? Pɩlabɩ pʋtɔdɩyɛ se ɛyaa nabɛyɛ katɩ ɛyaa mba paasɩŋ-wɛ yɔ intɛrnɛɛtɩ yɔɔ, pa nɛ wɛ papaɣzɩ ɖama ɖanʋʋ nɛ pʋwayɩ lɛ peɖiɣzina se ɛyaa mba pepeɣzi-wɛ kipeɣzu. Pɩtasɩ lɛ, ɛyaa mba paayɔɔdʋʋ toovenim yɔ pɛmɛɛsɩɣ ɛyaa mba ɖeyi ɖeyi pɛkɛnaa yɔ nɛ pamɩlɩɣ ɛyaa lalaa liidiye. Nabʋyʋ taa ɛyaa mba, pɔyɔɔdʋʋ se mba kɛ Yehowa Aseɣɖe Tɩnaa.

Iyele nɛ ɖɩna kaɖɛ lɛɛɖɛ. Intɛrnɛɛtɩ lona wena a-yɔɔ ɛyaa tɩŋɩɣna nɛ pañɩnɩɣ walʋ yaa halʋ yɔ, a-taa naayɛ tɩŋɩɣnɩ ordinatɛɛrɩ yɔɔ ɖʋtʋ ndɩ ndɩ yɔɔ se pana se ɛyaa mba pɩzɩɣ nɛ paɖanɩ ɖama. Paa mbʋ yɔ, nabʋyʋ fɛyɩ nɛ pɩwɩlɩɣ kpayɩ kpayɩ se ordinatɛɛrɩ yɔɔ ɖʋtʋ ndʋ tɩsɩɣnɩ ɛyaa toovenim taa. Pɩɩkɛɣnɩ lɔŋsɩnɖɛ se ɛyʋ ɛtaa liu ordinatɛɛrɩ yɔɔ ɖʋtʋ ndʋ ɛyaa laba yɔ tɩ-taa natʋyʋ alɩwaatʋ ndʋ ɛñɩnɩɣ se ɛkpaɣ lɩmaɣzɩyɛ kɩcɛyɩyɛ naɖɩyɛ yɔ. Pɩpɩzɩɣ nɛ pɩkɛ alɩwaatʋ ndʋ ɛñɩnɩɣ se ɛlɩzɩ abalʋ yaa halʋ kɩbanʋ weyi ɛ nɛ ɩ pakaɣ nesi ɖɔkʋʋ yɔ. Ðɩɩpɩzɩɣ nɛ ɖɩtaa liu ordinatɛɛrɩ yɔɔ ɖʋtʋ kpa ɛzɩ Bibl paɣtʋ kila yɔ.—Adu. 1:7; 3:5-7.

Paɣtʋ kiɖe naɖɩyɛ wɛ Aduwa 14:15 taa nɛ  ɖɩtɔŋ se: “Weyi [ɛfɛyɩnɩ lɛɣtʋ] yɔ, etisiɣ tɔm kpeekpe yɔɔ, ɛlɛ ɛyʋ lɔŋ tʋ cɔŋnɩ ɛ-ɖɔnɛ yɔɔ.” Pʋcɔ nɛ ŋtɩlɩ se ɛyʋ nɔɔyʋ kaɣ kɛʋ walʋ yaa halʋ kɩbanʋ yaa ɛɛkɛɣ lɛ, pɩcɛyaa se ŋñaɣ pana nɛ ŋtɩlɩ ɛyʋ ɛnʋ camɩyɛ. Ɛlɛ, ye intɛrnɛɛtɩ yɔɔ ŋkatɩ-ɩ yɔ, pɩwɛɣ-ŋ kaɖɛ se ŋtɩlɩ-ɩ camɩyɛ. Halɩ paa ɩkɛdɩɣ ɖama mɩ-yɔɔ tɔm nɛ ɩkpakɩɣ alɩwaatʋ sakɩyɛ nɛ ɛyɔɔdʋʋnɩ ɖama intɛrnɛɛtɩ yɔɔ yɔ, ɛzɩ toovenim taa lɛ, ŋpɩzɩɣ nɛ ŋyɔɔdɩ se ŋtɩlɩ pʋdʋ camɩyɛ na? Ɛyaa nabɛyɛ maɣzaɣ se pehiɣ ɛyʋ weyi ɛsɔɔlɩ-wɛ siŋŋ yɔ, ɛlɛ pɔkɔm nɛ pakatɩ ɛyʋ ɛnʋ keekee nɛ patɩlɩ ɛ-yɔɔ tɔm lɛ, pɩcɛyɩ-wɛ siŋŋ.

Keɣa maɖʋ nɔɔyʋ yɔɔdaa se: “Ma nɛ cɛtɩm tɩnaa ɖɩɩcakɩ, maawoki tɛɛ nɛ pɩ-yɔɔ tʋ tɛ.” (Keɣa 25:4) Ɛyaa sakɩyɛ maɣzɩɣ se pɩtɩwɛɛkɩ pʋyʋ se peheyi ɛyʋ weyi paɖanɩɣ-ɩ intɛrnɛɛtɩ yɔɔ yɔ, pɔ-yɔɔ tɔm ndʋ tɩtɩkɛ toovenim yɔ nɛ pɩsa nɛ pɔ-tɔm kɛdɩnɩ pʋdʋ nɛ pɩkpaɖɩ. Papɩzɩɣ nɛ pɛmɛɛsɩ pɛ-wɛtʋ kɩdɛkɛdɩtʋ, yaa pɛ-wɛtʋ ndʋ tɩɩnaɣ alɩwaatʋ ndʋ petiyiɣni message waa ɛyaa lalaa intɛrnɛɛtɩ yɔɔ yɔ. Ɛyaa nabɛyɛ pɩzɩɣ nɛ pɔyɔɔdɩ se pɛkɛ Yehowa Aseɣɖe Tɩnaa, ɛlɛ toovenim taa lɛ pɛkɛ Krɩstʋ ñɩma mba pamɩyɩsɩ-wɛ lɩm yɔ? Papɩ fezuu taa? Taabalɩyɛ wɛ panɛ Yehowa pɛ-hɛkʋ taa? Pɛ-ɛgbɛyɛ taa ñɩma wɛnɩ ñamtʋ pɔ-yɔɔ? Yaa pɩtɩla, pɛkɛ kɩɖaŋ kɩdɛkɛdɩŋ, halɩ pɛkɛ taabalaa kɩdɛkɛdaa? (1 Kɔr. 15:33; 2 Tim. 2:20, 21) Masɩ ɛsɩndaa lɛ, pɛwɛnɩ waɖɛ se pɔɖɔkɩ nesi na? Pɩcɛyaa se ŋtɩlɩ tɔm pɔzʋʋ mbʋ pɩ-yɔɔ cosuu, ɛlɛ pɩpɩzɩɣ nɛ pɩlabɩ-ŋ kaɖɛ se ŋtɩlɩ tɩ-yɔɔ cosuu ye ŋtɩpɔzɩ Yehowa Aseɣɖe Tɩnaa lalaa mba pasɩm ɛyʋ ɛnʋ camɩyɛ yɔ. (Adu. 15:22) Nɛ toovenim taa lɛ, Yehowa sɛyʋ siɣsiɣ tʋ nɔɔyʋ ɛɛpɩzɩɣ nɛ etisi se ɛ nɛ ɛyʋ weyi ɛfɛyɩnɩ tisuu yɔ ‘pɛkpɛndɩ.’—2 Kɔr. 6:14; 1 Kɔr. 7:39.

Ye ɖɩtɩŋɩɣnɩ intɛrnɛɛtɩ yɔɔ se ɖɩñɩnɩ walʋ yaa halʋ yɔ, pɩkɔŋnɩ-ɖʋ kaɖɛ. Pʋyɔɔ lɛ, nʋmɔŋ kɩbaŋ nɩɩyɩ wɛɛ nɛ ɖɩpɩzɩɣ nɛ ɖɩtɩŋnɩ ɩ-yɔɔ nɛ ɖɩñɩnɩ weyi ɖa nɛ ɩ ɖɩkaɣ nesi ɖɔkʋʋ yɔ nɛ ɖɩtɩlɩ-ɩ camɩyɛ. Le ŋpɩzɩɣ nɛ ŋkatɩ ɛyʋ weyi ɛpɩzɩɣ nɛ ɛkɛ walʋ kɩbanʋ yaa halʋ kɩbanʋ yɔ? Alɩwaatʋ ndʋ pataaɖɩɣ nʋmɔʋ se ɛyaa ikpeɣliɣ yɔ, Yehowa Aseɣɖe Tɩnaa pɩzaɣ se patɩlɩ koobiya lalaa alɩwaatʋ ndʋ powoki ɛgbɛyɛ taa kediɣzisi, kigbeɣliŋ cikpeŋ, kigbeɣliŋ sɔsɔŋ, nɛ alɩwaatʋ ndʋ pakatɩɣ ɖama lona lɛɛna taa yɔ.

Alɩwaatʋ ndʋ paahaɣ ɛyaa nʋmɔʋ se pekpeɣliɣ ɖama ɛzɩ COVID-19 kʋdɔŋ alɩwaatʋ taa mbʋ yɔ, ɖɩtɩŋɩɣnɩ pɔrtaabɩlɩ, taabɩlɛɛtɩ nɛ ordinatɛɛrɩwaa yɔɔ mbʋ nɛ ɖɩlakɩ kediɣzisi nɛ pɩhaɣ-ɖʋ waɖɛ se ɖɩtɩlɩ Aseɣɖe Tɩnaa lalaa mba patɩɖɔkɩ nesi yɔ. Ŋpɩzɩɣ nɛ ŋna ɛzɩma palakɩ tʋma kediɣzisi taa yɔ, nɛ ɛzɩma pɔ-tɔm cosuu wɩlɩɣ se pɛwɛnɩ tisuu yɔ. (1 Tim. 6:11, 12) Kediɣzaɣ tɛŋ lɛ, papɩzɩɣ nɛ patayɩ-mɩ cabɩ cabɩ nɛ ña wɛ ɩla kɛdaɣ ɖɔɖɔ. Alɩwaatʋ ndʋ ña nɛ Aseɣɖe Tɩnaa lalaa ɩtɩŋɩɣnɩ pɔrtaabɩlɩ, taabɩlɛɛtɩ yaa ordinatɛɛrɩ waa yɔɔ nɛ ɩlakɩ kɛdɛsɩ yɔ, ŋpɩzɩɣ nɛ ŋna wɛtʋ ndʋ ɛyʋ weyi ɛ-tɔm kɛdɩnɩ-ŋ yɔ ɛwɛnɩ ɛyaa lalaa yɔɔ yɔ, nɛ pɩpɩzɩɣ pɩsɩnɩ-ŋ nɛ ŋtɩlɩ ɛyʋ weyi ɖeyi ɖeyi ɛkɛnaa yɔ. (1 Pɩy. 3:4) Alɩwaatʋ wɛɣ nɛ tɩɖɛɣ nɛ ŋtɩlɩ ɛyʋ ɛnʋ camɩyɛ lɛ, ŋpɩzɩɣ nɛ ŋmaɣzɩ nɛ ŋna se ɩwɛnɩ kaɖʋsɩ kʋɖʋmsɩ yaa ɩfɛyɩna, nɛ ɩkaɣ kɛʋ ɖama walʋ kɩbanʋ nɛ halʋ kɩbanʋ na.

Ye aɖamɛɛ ɩlakɩnɩ tʋmɩyɛ Bibl paɣtʋ kila se pɩsɩnɩ-wɛ nɛ palɩzɩ weyi pa nɛ ɩ pakaɣ nesi ɖɔkʋʋ yɔ, pɩtʋʋ fɛyɩ se pɩsɩɣnɩ-wɛ nɛ pɩkɩlɩ se pehiɣ taa leleŋ pe-nesi ɖɔkʋʋ taa ɛzɩ aduwa takayaɣ yɔɔdʋʋ yɔ. Pɔyɔɔdɩ peeɖe se: “Weyi ehiɣ halʋ [yaa walʋ] kɩbanʋ yɔ, ehiɣ ñɩm nɛ kʋjɔʋ [Yehowa] cɔlɔ.”—Adu. 18:22.