1-2. Ɛzɩma tɩyɛ papɩzɩɣ nɛ pakpaɣ Krɩstʋ tʋ nɛ pamaɣzɩnɩ ɛsɔdaa kuduyuu sɔsɔʋ? (1 Kɔrɛntɩ mba 15:58)

 PƖNAƔ 1978 taa, pama ɛsɔdaa kuduyuu sɔsɔʋ nakʋyʋ Tokiyo, Japɔŋ ɛjaɖɛ taa. Tɛtʋ ñamsɩɣ peeɖe ɖoŋ ɖoŋ; pʋyɔɔ lɛ, ɛyaa pɔzaɣ pa-tɩ se ɛzɩma kuduyuu ŋgʋ kɩkaɣ pɩzʋʋ nɛ kɩwɛɛ ki-ɖeɖe cɩŋgɩlɩm. Ɛbɛ kɩ-mayaa laba se pɩsa nɛ alɩwaatʋ ndʋ tɛtʋ ñamsɩɣ yɔ kɩtaayɔkɩ? Pama-kʋ nɛ kɩwɛɛ ɖoŋ camɩyɛ nɛ alɩwaatʋ kʋɖʋmtʋ ndʋ tɩ-taa lɛ kɩpɩzɩɣ nɛ kiciɣdi alɩwaatʋ ndʋ tɛtʋ ñamsɩɣ yɔ. Krɩstʋ mba wɛ ɛzɩ kuduyuu ŋgʋ yɔ. Ɛzɩma tɩyɛ?

² Pɩwɛɛ se Krɩstʋ tʋ ɛɖɔkɩ ɛ-tɩ kpam nɛ ɛtɛ ɛwɛɛ yɔɔ yɔɔ, ɛlɛ eekpiliɣni hɔɔlʋʋ nakʋyʋ yɔɔ. Pɩpɔzʋʋ se ɛɖɔkɩ ɛ-tɩ kpam nɛ ɛtɛ ɛ-taa se paa ɛzɩmtaa lɛ, ɛñaŋ Yehowa paɣtʋ nɛ ɛ-paɣtʋ kila. (Kalɩ 1 Kɔrɛntɩ mba 15:58.) ‘Etisiɣ faaa’ nɛ ɛñaŋ nɛ ɛɛñɩnɩɣ kawanaɣ nɛ ɛmaɣnɩ paɣtʋ yɔɔ. Hɔɔlʋʋ lɛɛkʋ taa lɛ, pɩpɔzʋʋ se ɛkɛ ɛyʋ weyi ‘ɛnɩɣ tɔm taa’ yɔ yaa ɛwɛɛ yɔɔ yɔɔ ye pɩpɔzʋʋ yaa pɩcɛyaa se ɛla mbʋ yɔ. (Yak. 3:17) Krɩstʋ tʋ weyi ɛkpɛlɩkɩ ɛzɩma etaakpilini hɔɔlʋʋ nakʋyʋ yɔɔ yɔ, ɛ-tɔm taa ɛɛkɩlɩɣ wɛʋ kaɖɛ nɛ ɛɛkɩlɩɣ wɛʋ yɔɔ yɔɔ ɖɔɖɔ. Tɔm ñʋʋ kʋnɛ kɩ-taa, ɖɩkaɣ naʋ ɛzɩma ɖɩpɩzɩɣ ɖɩla nɛ pɩtaacɛŋɛsɩ-ɖʋ yɔ. Ðɩkaɣ naʋ ɖɔɖɔ nʋmɔŋ 5 weyi ɩ-yɔɔ Sataŋ tɩŋɩɣna se eyele nɛ pɩwɛɛ-ɖʋ kaɖɛ se ɖiwolo pɩ-yɔɔ nɛ ɖɩɖɔkɩ ɖa-tɩ kpam yɔ nɛ ɛzɩma ɖɩpɩzɩɣ nɛ ɖɩlʋbɩnɩ-ɩ yɔ.

3. Tʋma Labʋ 15:28, 29 taa, paɣtʋ ndʋ Paɣtʋ Ðʋyʋ weyi ɛkpaɖaa yɔ ɛɖʋwa?

³ Yehowa kɛnɩ Paɣtʋ Ðʋyʋ weyi ɛkpaɖaa yɔ, nɛ paa ɛzɩmtaa lɛ eyeki se ɛ-samaɣ ɛnɩɩ ɛ-paɣtʋ taa kɛlɛʋ. (Iza. 33:22) Kɩɖaʋ nakʋyʋ yɔ: Kajalaɣ pɩnzɩ mɩnʋʋ taa Nɔɔɖɛyaa ɛgbɛyɛ kaañɩɣ niye hɔɔlɩŋ weyi ɩ-taa pɩpɔzʋʋ se Krɩstʋ mba ɩɖɔkɩ pa-tɩ kpam yɔ ɩ-yɔɔ. Ɛnɩ yɔ: (1) pɩwɛɛ se pekizi sɩnaa latʋ nɛ pɛsɛɛ Yehowa  ɖeke koŋ, (2) pɩwɛɛ se paña paɣtʋ ndʋ Yehowa ɖʋ calɩm yɔɔ yɔ, pɩkɛ pʋyʋ kiɖeɖeu; nɛ (3) pɩwɛɛ se pɔɖɔ Bibl paɣtʋ ndʋ titukuuni wezuu kɩbaŋʋ caɣʋ yɔ tɩ-yɔɔ. (Kalɩ Tʋma Labʋ 15:28, 29.) Sɔnɔ, ɛzɩma Krɩstʋ mba pɩzɩɣ nɛ pɔɖɔkɩ pa-tɩ kpam hɔɔlɩŋ ɛnɩ ɩ-naadozo ɩ-taa?

4. Ɛzɩma ɖɩwɩlɩɣ se Yehowa ɖeke koŋ ɖɩsɛɣ? (Natʋ 4:11)

⁴ Ðikiziɣ sɩnaa latʋ nɛ ɖɩsɛɣ Yehowa ɖeke koŋ. Ɛɛɖʋ Izrayɛɛlɩ mba paɣtʋ se pɛsɛɛ e-ɖeke koŋ. (Wp. 5:6-10) Nɛ alɩwaatʋ ndʋ Eleeu takɩ Yesu yɔ, Yesu yɔɔdɩ kpayɩ kpayɩ se Yehowa ɖeke koŋ pɩpɔzʋʋ se ɖɩsɛɛ. (Mat. 4:8-10) Pʋyɔɔ lɛ, ɖɩɩsɛɣ sɩʋ kpelisi. Pɩtasɩ lɛ, ɖɩɩcɛlɩɣ ɛyaa sɛtʋ, paa patɩɩkɛ Ɛsɔ sɛtʋ agbaa ñʋndɩnaa, politiki agbaa ñʋndɩnaa, yaa hola aleɣya laɖaa nɛ hendu teyaa mba pa-hɩla sɛwa yɔ; nɛ ɖɩɩkpakɩɣ-wɛ ɛzɩ pɛkɛ ɛsɔnaa yɔ. Yehowa hɔɔlʋʋ yɔɔ ɖɩwɛɛ nɛ e-ɖeke koŋ ɖɩsɛɣ mbʋ pʋyɔɔ yɔ ɛnʋ ‘lɩzɩnɩ pɩtɩŋa payɩ.’—Kalɩ Natʋ 4:11.

5. Yehowa paɣtʋ ndʋ tɩtɔŋ se wezuu nɛ calɩm pɛkɛ pʋyʋ kiɖeɖeu yɔ, ɛbɛ yɔɔ ɖɩñɔʋnɩ-tʋ?

⁵ Paɣtʋ ndʋ Yehowa ɖʋwa se wezuu nɛ calɩm pɛkɛ pʋyʋ kiɖeɖeu yɔ, ɖɩñɔʋnɩ-tʋ. Ɛbɛ yɔɔ? Mbʋ pʋyɔɔ yɔ, Yehowa yɔɔdaa se calɩm kɛ wezuu. Wezuu kɛ kʋjɔʋ ŋgʋ kɩlɩnɩ ɛ-cɔlɔ yɔ nɛ kɩmʋ ñɩm. (Lev. 17:14) Alɩwaatʋ ndʋ Yehowa calɩ haʋ ɛyaa waɖɛ se pɔtɔɔ nandʋ yɔ, eheyi-wɛ se pɩtɩpɔzɩ se pɔtɔɔ calɩm. (Kiɖe 9:4) Alɩwaatʋ ndʋ ɛcɛlɩ Moyizi Paɣtʋ Izrayɛɛlɩ mba yɔ, ɛɖaɣnɩ yɔɔdʋʋ paɣtʋ ndʋ tɩ-tɔm. (Lev. 17:10) Nɛ eɖiyi kajalaɣ pɩnzɩ mɩnʋʋ taa Nɔɔɖɛyaa ɛgbɛyɛ nɛ ɖɩɖʋ paɣtʋ se pɩwɛɛ se Krɩstʋ mba tɩŋa «ɩsɔ . . . calɩm.» (Tʋma 15:28, 29) Alɩwaatʋ ndʋ ɖɩkpakɩɣ lɩmaɣza kɔyɛ labʋ nʋmɔʋ taa yɔ, ɖɩñɔʋnɩ paɣtʋ ndʋ kpam. b

6. Ɛbɛ ɖɩñakɩ pana nɛ ɖɩlakɩ se pɩsa nɛ ɖɩcaɣ wezuu nɛ pɩla nɔɔ kʋɖʋmaɣ nɛ wezuu kɩbaŋʋ caɣʋ paɣtʋ ndʋ Yehowa ɖʋwa yɔ?

⁶ Paɣtʋ ndʋ Yehowa ɖʋ wezuu kɩbaŋʋ caɣʋ nʋmɔʋ taa yɔ, ɖɩñɔʋnɩ-tʋ kpam. (Ebr. 13:4) Apostoloo Pɔɔlɩ tasɩɣ-ɖʋ lɔŋ se ‘ɖɩkʋ’ ɖo-tomnaɣ pilinzi, pʋ-tɔbʋʋ lɛ se pɩwɛɛ se ɖɩñaɣ pana siŋŋ nɛ ɖɩlɔ paa kɔɖɛyɩ kɩdɛkɛdʋʋ ŋgʋ. Mbʋ pɩpɩzɩɣ nɛ pituyi-ɖʋ nɛ ɖɩcaɣ kʋzʋʋ kɩdɛkɛdʋʋ wezuu yɔ, ɖɩɩcɔŋnɩ-pʋ yaa ɖɩɩlakɩ-pʋ. (Kol. 3:5; Yɔɔb 31:1) Alɩwaatʋ ndʋ pɩtakɩɣ-ɖʋ se ɖɩla mbʋ pɩfɛyɩ ɖeu yɔ, ɖɩlɔʋ lɩmaɣza yaa ɖikiziɣ lakasɩ nzɩ sɩpɩzɩɣ nɛ sɩcamɩ ɖa nɛ Yehowa ɖa-taabalɩyɛ yɔ.

7. Pɩwɛɛ se ɖɩtɛ ɖa-taa se ɖɩlakɩ we, nɛ ɛbɛ yɔɔ?

⁷ Yehowa sɔɔlaa se ‘ɖɩñamnɩ ɖa-laŋɩyɛ.’ (Roma 6:17) Mbʋ ɛpɔzʋʋ-ɖʋ se ɖɩla yɔ pɩwazɩɣ-ɖʋ paa ɛzɩmtaa, nɛ ɖɩɩpɩzɩɣ nɛ ɖɩlɛɣzɩ ɛ-paɣtʋ. (Iza. 48:17, 18; 1 Kɔr. 6:9, 10) Ðɩñakɩ pana se ɖɔ-tɔm ɛkɛdɩnɩ Yehowa nɛ ɖɩwɩlɩɣ se ɖɩwɛnɩ lɩmaɣza wena keɣa maɖʋ kaawɛna yɔ. Ete hendu se: «Mɛntɛm man-taa se mañaŋ ña-paɣtʋ alɩwaatʋ kpeekpe, piwolo pɩtalɩ tɩnaɣ yɔɔ.» (Keɣ. 119:112) Ɛlɛ, Sataŋ kaɣ ñaɣʋ pana se eyele nɛ pɩwɛɛ-ɖʋ kaɖɛ se ɖɩɖɔkɩ ɖa-tɩ kpam. Nʋmɔŋ weyi ɩ-yɔɔ ɛkaɣ tɩŋnʋʋ se ɛla mbʋ?

8. Ɛzɩma Sataŋ tɩŋɩɣnɩ nazɩm yɔɔ se eyele nɛ ɖɩtaapɩzɩ ɖiwolo pɩ-yɔɔ nɛ ɖɩɖɔkɩ ɖa-tɩ kpam?

⁸ Nazɩm. Eleeu yeki se pawɩlɩ-ɖʋ ñaŋ nɛ pañɩɣ ɖɔ-yɔɔ se pɩsa nɛ ɖɩtaapɩzɩ ɖiwolo pɩ-yɔɔ nɛ ɖɩɖɔkɩ ɖa-tɩ kpam. Ɛñɩnɩɣ se ‘ɛtɔɔ-ɖʋ,’ pʋ-tɔbʋʋ lɛ se ɛwɛɛkɩ ɖa nɛ Yehowa ɖa-taabalɩyɛ. (1 Pɩy. 5:8) Paawɩlɩ ñaŋ kajalaɣ pɩnzɩ mɩnʋʋ taa Krɩstʋ mba, pamabɩ-wɛ nɛ pakʋ pa-taa nabɛyɛ mbʋ pʋyɔɔ yɔ paatɛm pa-taa se powoki pɩ-yɔɔ nɛ pɔɖɔkɩ pa-tɩ kpam. (Tʋma 5:27, 28, 40; 7:54-60) Sɔnɔ, Sataŋ ɖiɣni tɩŋnʋʋ nazɩm  yɔɔ se eyele nɛ ɖɩtaapɩzɩ nɛ ɖɩɖɔkɩ ɖa-tɩ kpam. Ðɩnaɣ wɛtʋ ndʋ kaɣlaa mbʋ pʋyɔɔ yɔ, ɖo-koyindinaa wɛɛ nɛ pawɩlɩɣ ñaŋ ɖo-koobiya Rusii nɛ ajɛɛ lɛɛna taa, nɛ patɩŋɩɣnɩ nʋmɔŋ lɛɛŋ yɔɔ nɛ panazɩɣ ɖo-koobiya.

9. Kɩɖaʋ ŋgʋ wɩlɩɣ se pɩcɛyaa se ɖɩkpa ɖa-tɩ nɛ mɛsaɣ tɛɛ nʋmɔŋ?

⁹ Mɛsaɣ tɛɛ nʋmɔŋ. Pɩtasɩnɩ nazɩm lɛ, Sataŋ tɩŋɩɣnɩ «ajitu lakasɩ» yɔɔ se eyele nɛ pɩwɛɛ-ɖʋ kaɖɛ se ɖɩɖɔkɩ ɖa-tɩ kpam. (Efɛz. 6:11) Iyele nɛ ɖɩna koobu abalɩñɩnʋ nɔɔyʋ kɩɖaʋ, payaɣ-ɩ se Bob. Pɩwɩɣaɣ-ɩ nɛ pasɩ-ɩ ɖɔkɔtɔ tɛ, nɛ pɩɩpɔzaa se palabɩ-ɩ tʋmɩyɛ. Eheyi ɖɔkɔtɔnaa se paa ɛbɛ ɛtɩɩlakɩ yɔ ɛnʋ ɛɛkaɣ tisuu kpa nɛ paɖʋ-ɩ calɩm. Ðɔkɔtɔ weyi ɛkaɣaɣ-ɩ labʋ tʋmɩyɛ yɔ etisaa se ɛnʋ lakɩ ɛzɩ ɛyɔɔdʋʋ yɔ. Ɛlɛ, ɖoo wena aɖɛwa nɛ kife nɛ pala Bob tʋmɩyɛ yɔ a-taa, ɛ-hɔʋ taa mba kpem ɖɩɣa nɛ pɩkazɩ e-ɖeke lɛ, ɖɔkɔtɔ lɛlʋ wolo nɛ ɛna-ɩ. Eheyi Bob se pɩtɩla ɖɔkɔtɔnaa ɩɩkaɣ labɩnʋʋ calɩm tʋmɩyɛ, ɛlɛ pakaɣ-pʋ sɩʋ pɔ-cɔlɔ nɛ ye pɩkɔm nɛ pɩpɔzɩ se palabɩnɩ-pʋ tʋmɩyɛ lɛ paalabɩnɩ-pʋ tʋmɩyɛ. Pɩtɩla ɖɔkɔtɔ ɛnʋ ɛmaɣzaɣ se Bob kaɣ lɛɣzʋʋ ɛ-lɩmaɣza mbʋ pʋyɔɔ yɔ ɛ-hɔʋ taa mba fɛyɩ ɛ-cɔlɔ. Ɛlɛ, Bob wobi pɩ-yɔɔ nɛ ɛɖɔkɩ ɛ-tɩ kpam, nɛ ɛyɔɔdaa se paa ɛbɛ ɛtɩɩlakɩ yɔ, ɛnʋ ɛɛkaɣ tisuu nɛ paɖʋ-ɩ calɩm.

10. Ɛbɛ yɔɔ ɛyaa lɩmaɣza kɛ kpaca? (1 Kɔrɛntɩ mba 3:19, 20)

¹⁰ Ɛyaa lɩmaɣza. Ye ɖɩmaɣzɩɣ ɛzɩ ɛyaa mba pabaa fɛyɩnɩ Yehowa paɣtʋ yɔ pamaɣzʋʋ yɔ, pɩpɩzɩɣ piyele nɛ ɖɩpaɣzɩ nim Yehowa nɛ ɛ-paɣtʋ. (Kalɩ 1 Kɔrɛntɩ mba 3:19, 20.) Ðoŋ ɖoŋ lɛ, «ɛjaɖɛ ɖɩnɛ ɖɩ-lɔŋsɩnɖɛ» yeki nɛ ɛyaa ɩɩñaŋ Ɛsɔ. Pɛɛrɩgam nɛ Tiyaatiiri Krɩstʋ mba nabɛyɛ kaayeba nɛ tɛtʋ ndʋ tɩ-taa ñɩma mba palaɣaɣ sɩnaa nɛ pacakɩ wezuu kɩdɛkɛdʋʋ yɔ pa-lɩmaɣza wɛɛnɩ ɖoŋ pɔ-yɔɔ. Yesu tasɩ agbaa ana a-naalɛ lɔŋ kpayɩ mbʋ pʋyɔɔ yɔ, aha nʋmɔʋ nɛ kʋzʋʋ kɩdɛkɛdʋʋ wezuu caɣʋ wɛɛ a-taa. (Natʋ 2:14, 20) Sɔnɔ, ɛyaa ñɩkɩɣ ɖɔ-yɔɔ se ɖitisi nɛ ɖɩwɛɛnɩ lɩmaɣza kɩdɛkɛda wena ɛyaa lalaa wɛna yɔ. Ðɔ-hɔʋ taa mba nɛ ɖɛ-ɛyɩsɩmaa pɩzɩɣ nɛ pañaɣ pana se peyele nɛ ɖa-taa tɛ se ɖɩkɩlɩɣ ñɔnʋʋ Yehowa paɣtʋ nɛ pɩpɔzʋʋ se ɖɩmaanɩ tɩ-yɔɔ. Kɩɖaʋ nakʋyʋ yɔ: Papɩzɩɣ nɛ pɔyɔɔdɩ se pɩtɩcɛyɩ se ɖiwolo pɩ-yɔɔ nɛ ɖɩwɛɛ kele kele, nɛ wezuu kɩbaŋʋ caɣʋ paɣtʋ ndʋ tɩwɛ Bibl taa yɔ tɩ-alɩwaatʋ ɖɛwa.

11. Ðɩwɛɣ nɛ ɖɩɖɔkʋʋ ɖa-tɩ kpam lɛ, pɩpɔzʋʋ se ɖɩkpa ɖa-tɩ nɛ ɛbɛ?

¹¹ Nabʋyʋ taa, pɩtɩla ɖɩmaɣzɩɣ se mbʋ Yehowa pɔzʋʋ-ɖʋ se ɖɩla yɔ pɩ-taa tɩtʋ kpayɩ kpayɩ ɛzɩ pɩpɔzʋʋ yɔ. Halɩ pɩpɩzɩɣ nɛ pɩtakɩ-ɖʋ se ‘ɖɩcɛzɩ tɔm ndʋ pamawa yɔ tɩ-yɔɔ.’ (1 Kɔr. 4:6) Mbʋ Yesu alɩwaatʋ taa Ɛsɔ sɛtʋ ñʋndɩnaa laba. Pɔsɔzɩ pa-maɣmaɣ pa-paɣtʋ Moyizi Paɣtʋ yɔɔ, nɛ piiyeba nɛ pɩpɩsɩ ɛyaa sakɩyɛ sʋʋtʋ. (Mat. 23:4) Yehowa tɩŋɩɣnɩ ɛ-Tɔm nɛ ɛ-ɛgbɛyɛ yɔɔ nɛ ɛwɩlɩɣ-ɖʋ mbʋ pɩwɛɛ se ɖɩla yɔ kpayɩ kpayɩ. Ðɩfɛyɩnɩ waɖɛ se ɖɩsɔzɩ nabʋyʋ mbʋ ɛpɔzʋʋ-ɖʋ se ɖɩla yɔ pɩ-yɔɔ. (Adu. 3:5-7) Pʋyɔɔ lɛ, ɖɩɩcɛzɩɣ tɔm ndʋ pama Bibl taa yɔ tɩ-yɔɔ yaa ɖɩɩɖʋʋ ɖo-koobiya paɣtʋ hɔɔlɩŋ weyi ɩ-taa paa weyi ɛwɛnɩ waɖɛ se ɛkpaɣ lɩmaɣza yɔ.

12. Ɛzɩma Sataŋ lakɩnɩ tʋmɩyɛ «pɔbɔtʋ tɔm ndʋ tɩɩwazɩɣ pʋyʋ yɔ»?

¹² Pɔbɔtʋ tɔm. Sataŋ tɩŋɩɣnɩ «pɔbɔtʋ tɔm ndʋ tɩɩwazɩɣ pʋyʋ yɔ» nɛ «ɛjaɖɛ yɔɔ kajalaɣ wondu» yɔɔ se epeɣzi ɛyaa nɛ ɛtayɩ pɛ-hɛkʋ taa. (Kol. 2:8) Kajalaɣ pɩnzɩ mɩnʋʋ taa lɛ, pɔbɔtʋ tɔm nɛ kajalaɣ wondu ndʋ, tɩ-taa natʋyʋ lɛ ɛjaɖɛ yɔɔ lɔŋsɩnɖɛ, Yuuda mba wɩlɩtʋ ndʋ tɩtɩlɩɩnɩ Masɩ taa yɔ, nɛ wɩlɩtʋ ndʋ tɩtɔŋaɣ se pɩwɛɛ se Krɩstʋ mba ɩɖɔ Moyizi Paɣtʋ yɔɔ yɔ. Pɩkɛ pɔbɔtʋ tɔm mbʋ pʋyɔɔ yɔ, piiyeba nɛ ɛyaa lɩmaɣza tɩtasɩ wɛʋ Yehowa yɔɔ; ɛ-cɔlɔ lɔŋsɩnɖɛ siŋŋ lɩɣna. Sɔnɔ, Sataŋ tɩŋɩɣnɩ  tɔm susuu wondu nɛ réseaux sociaux waa yɔɔ se eyele nɛ tɔm kɩkpɛyɩtʋ wɩlɩtʋ nɛ cɛtɩm tɔm ndʋ politiki ñʋndɩnaa yɔɔdʋʋ yɔ, tɩyɛlɩ. COVID-19 kʋdɔŋ alɩwaatʋ taa, ɖɩnɩ cɛtɩm tɔm ndʋ tɩ-taa sakɩyɛ. c Mba pewelisi cɛtɩm tɔm ndʋ yɔ pɩkɔnɩ-wɛ nɩɣzɛ, ɛlɛ Yehowa Aseɣɖe tɩnaa mba pewelisi ɖɛ-ɛgbɛyɛ lɔŋ tasʋʋ yɔ pɛfɛ nɩɣzɛ ana.—Mat. 24:45.

13. Ɛbɛ yɔɔ pɩpɔzʋʋ se ɖɩkpa ɖa-tɩ nɛ mbʋ pɩkɛzɩɣ ɛyʋ lɩmaɣza yɔ?

¹³ Mbʋ pɩkɛzɩɣ ɛyʋ lɩmaɣza yɔ. Pɩtɩpɔzɩ se ɖɩsɔɔ «mbʋ pɩ-tɔm kɩlɩ cɛyʋʋ yɔ» pɩ-yɔɔ. (Filp. 1:9, 10) Mbʋ pɩkɛzɩɣ ɛyʋ lɩmaɣza yɔ pɩpɩzɩɣ nɛ pɩkpaɣ-ɖʋ alɩwaatʋ sakɩyɛ nɛ piyele nɛ ɖɩɩkaŋ ɖa-lɩmaɣza mbʋ pɩwɛ wazaɣ nɛ pɩkɩlɩ yɔ pɩ-yɔɔ. Ye ɖɩha nʋmɔʋ nɛ mbʋ ɖɩlakɩ ɖoŋ ɖoŋ yɔ, ɛzɩ tɔkɩyɛ, ñɔtʋ, helim mʋʋ nɛ tomnaɣ yɔɔ tʋmɩyɛ mbʋ yɔ tɔm kɩlɩ cɛyʋʋ ɖe-wezuu caɣʋ taa yɔ, pɩpɩzɩɣ nɛ pɩpɩsɩ mbʋ pɩkɛzɩɣ ɖa-lɩmaɣza yɔ. (Luka 21:34, 35) Pɩtasɩ lɛ, paa evemiye nɖɩ ɖɩnɩɣ tɔm kususutu ndʋ titukuuni ɛzɩma ɛyaa kaɖɩɣnɩ komina yɔ nɛ politiki nɔɔhɔnɖɛ tɔm. Pɩwɛɛ se ɖɩkpa ɖa-tɩ nɛ tɔm ndʋ tɩtaakɛzɩ ɖa-lɩmaɣza. Pɩtɩkɛ mbʋ yɔ, ɖɩpɩzɩɣ nɛ ɖɩpaɣzɩ tɩnʋʋ hɔɔlʋʋ nakʋyʋ yɔɔ ɖa-maɣzɩm nɛ ɖa-laŋɩyɛ taa. Sataŋ tɩŋɩɣnɩ nʋmɔŋ weyi ɩ-tɔm ɖɩyɔɔdaa nɛ pɩɖɛɛ yɔ ɩ-tɩŋa ɩ-yɔɔ se ɛcamɩ ɛzɩma ɖɩtɛm ɖa-taa se ɖiwoki pɩ-yɔɔ nɛ ɖɩlakɩ mbʋ pɩtʋʋzaa yɔ. Iyele nɛ ɖɩna ɛzɩma ɖɩpɩzɩɣ nɛ ɖɩkaɖɩnɩ ɛ-pana ñaɣʋ nɛ ɖiwolo pɩ-yɔɔ nɛ ɖɩɖɔkɩ ɖa-tɩ kpam yɔ.

14. Mbʋ pɩpɩzɩɣ pɩsɩnɩ-ɖʋ nɛ ɖiwolo pɩ-yɔɔ nɛ ɖɩwɛɛ Yehowa hɔɔlʋʋ yɔɔ yɔ, pɩ-taa nabʋyʋ lɛ ɛbɛ?

¹⁴ Maɣzɩɣ mbʋ pʋyɔɔ ŋha ña-tɩ Yehowa nɛ pamɩyɩsɩ-ŋ lɩm yɔ pɩ-yɔɔ. Ŋkpɛzɩ nɩŋgbanzɩ nzɩ mbʋ pʋyɔɔ yɔ, ŋsɔɔlaa se ŋwɛɛ Yehowa hɔɔlʋʋ yɔɔ. Ðaɣnɩ maɣzʋʋ mbʋ pɩsɩnɩ-ŋ nɛ ña-taa tɛ se ŋlɩ toovenim yɔɔ yɔ pɩ-yɔɔ. Ŋkpɛlɩkaa nɛ ŋtɩlɩ Yehowa, ña-Caa weyi ɛwɛ ɛsɔdaa yɔ nɛ ŋpaɣzɩ-ɩ ñam nɛ ŋsɔɔlʋʋ-ɩ. Ŋkɔm nɛ ŋwɛɛnɩ tisuu nɛ piseɣti-ŋ nɛ ŋkpiɖi ña-kɩwɛɛkɩm yɔɔ. Ŋyebi labʋ mbʋ Yehowa paɖɩɣ yɔ nɛ ŋpaɣzɩ labʋ mbʋ pɩkɛdɩɣnɩ-ɩ yɔ. Ŋɖiɣzinaa se Ɛsɔ kpeɣ-ŋ ña-kɩwɛɛkɩm lɛ, pɩhɛzɩ  ña-laŋɩyɛ. (Keɣ. 32:1, 2) Ŋpaɣzɩ wobu Krɩstʋ mba kediɣzisi nɛ ŋheyiɣ ɛyaa lalaa tɔm kɩbandʋ ndʋ ŋkpɛlɩkaa yɔ. Ŋha ña-tɩ nɛ pamɩyɩsɩ-ŋ lɩm nɛ ŋpɩsɩ Krɩstʋ tʋ; nɛ lɛɛlɛɛyɔ ŋwɛɛ nɛ ŋɖɔŋ wezuu nʋmɔʋ taa nɛ ŋtɛm ña-taa se ŋŋyeki kɩ-taa ɖɔm kpa.—Mat. 7:13, 14.

15. Ɛbɛ yɔɔ Ɛsɔtɔm kpɛlɩkʋʋ nɛ tɩ-yɔɔ maɣzʋʋ wɛ wazaɣ?

¹⁵ Kpɛlɩkɩɣ Ɛsɔtɔm nɛ ŋmaɣzɩɣ tɩ-yɔɔ. Ye tɩʋ nakʋyʋ lila ɩkam camɩyɛ yɔ kɩwɛɣ ɖoŋ, mbʋ ɖɔɖɔ ye ɖɩwɛnɩ tisuu sɔsɔm Yehowa yɔɔ yɔ ɖɩpɩzɩɣ ɖiwolo pɩ-yɔɔ nɛ ɖɩɖɔkɩ ɖa-tɩ kpam. Tɩʋ wɛɣ nɛ kɩpaɣlɩɣ lɛ, ki-lila wɛɣ nɛ apaɣlɩɣ nɛ akaŋ camɩyɛ. Ye ɖɩkpɛlɩkɩɣ Ɛsɔtɔm nɛ ɖɩmaɣzɩɣ tɩ-yɔɔ yɔ, ɖe-tisuu cɛyɩsɩɣ nɛ ɖa-taa tɛŋ nɛ pɩkɩlɩ se Ɛsɔ nʋmɔŋ kpaɖɩnɩ ɖeu. (Kol. 2:6, 7) Yehowa ɖʋʋ ɛ-sɛyaa paɣtʋ, ɛtasɩɣ-wɛ lɔŋ nɛ ɛkandɩyɩɣ pɔ-yɔɔ. Kpakɩɣ alɩwaatʋ nɛ ŋmaɣzɩɣ ɛzɩma pɩtɩŋa payɩ mbʋ yɔ pɩɩsɩnɩ ɛ-sɛyaa nɛ pɩɖɛɛ yɔ pɩ-yɔɔ. Kɩɖaʋ nakʋyʋ yɔ: Alɩwaatʋ ndʋ Ezekɩyɛɛlɩ na Ɛsɔ tiyiyu nɔɔyʋ natʋ taa ɛwɛɛ nɛ ɛmaɣzɩɣ templo tete yɔ, ɛkpaɣ alɩwaatʋ nɛ ɛcɔnɩ-ɩ camɩyɛ. Natʋ ndʋ, tɩɩkpazɩ Ezekɩyɛɛlɩ ɖoŋ, nɛ tɩkpɛlɩkɩɣ-ɖʋ lɔŋ kɩbaŋ ɛzɩma ɖɩpɩzɩɣ nɛ ɖɩñɔɔnɩ paɣtʋ ndʋ Yehowa ɖʋ Ɛsɔ sɛtʋ kele kele ñɩndʋ hɔɔlʋʋ taa yɔ pɩ-yɔɔ. d (Ezek. 40:1-4; 43:10-12) Ye ɖɩkpakɩɣ alɩwaatʋ nɛ ɖɩkpɛlɩkɩɣ Ɛsɔtɔm taa tɔm ndʋ tɩwɛ cukaŋ yɔ nɛ ɖɩmaɣzɩɣ tɩ-yɔɔ yɔ, pɩwazɩɣ-ɖʋ ɖɔɖɔ.

16. Bob wɛnɩ laŋɩyɛ nɖɩ ɖɩkam camɩyɛ yɔ lɛ, ɛzɩma pɩkandɩyɩ ɛ-yɔɔ? (Keɣa 112:7)

¹⁶ Ñaɣ pana nɛ ŋwɛɛnɩ laŋɩyɛ nɖɩ ɖɩkam camɩyɛ yɔ. Wiyaʋ Daviid yɔɔdaa se ɛnʋ ɛɛkaɣ yebu Yehowa sɔɔlʋʋ kpa. Ete hendu se: «Ma-laŋɩyɛ kam camɩyɛ, Oo Ɛsɔ.» (Keɣ. 57:7) Ða ɖɔɖɔ ɖɩpɩzɩɣ nɛ ɖɩwɛɛnɩ laŋɩyɛ nɖɩ ɖɩkam camɩyɛ yɔ nɛ ɖɩtaɣ Yehowa liu kiya. (Kalɩ Keɣa 112:7.) Mbʋ kaasɩnɩnɩ Bob weyi ɛ-tɔm ɖɩyɔɔdaa nɛ pɩɖɛɛ yɔ. Ðɔkɔtɔ heyi-i se pakaɣ sɩʋ calɩm pɩ-cɔlɔ nɛ ye pɩkɔm nɛ pɩpɔzɩ se palabɩnɩ-pʋ tʋmɩyɛ lɛ paalabɩna lɛ, ecosi kpaagbaa se ye panawa se pɩpɩzɩɣ nɛ pɩpɔzɩ se paɖʋ ɛnʋ calɩm yɔ, ɖɩnɛ ɛnʋ lɩɣ ɖɔkɔtɔ ŋgʋ kɩ-taa kpaagbaa. Pʋwayɩ Bob yɔɔdaa se: «Mantaapɩtɩɣ mbʋ mankaɣ labʋ yɔ pɩ-yɔɔ kpa, nɛ sɔɔndʋ taakpaɣ-m nɛ mbʋ pɩpɩzɩɣ nɛ pɩtalɩ-m yɔ.»

17. Ɛbɛ ɖɩpɩzɩɣ nɛ ɖɩkpɛlɩkɩ Bob kɩɖaʋ taa? (Cɔnɩ ɖɔɖɔ kɩlɛmʋʋ.)

 ¹⁷ Bob pɩzaa nɛ ɛɖɔkɩ ɛ-tɩ kpam mbʋ pʋyɔɔ yɔ ɛɛtɛm kpaɣʋ lɩmaɣzɩyɛ ɖooo lɔŋ se ɛkaɣ wobu pɩ-yɔɔ nɛ ɛɖɔkɩ ɛ-tɩ kpam pʋcɔ nɛ ewoki ɖɔkɔtɔ tɛ. Kajalaɣ lɛ, ɛɛsɔɔlɩ siŋŋ se eyele nɛ Yehowa taa la leleŋ. Nabʋlɛ lɛ, tɔm ndʋ Bibl nɛ ɖɛ-ɛgbɛyɛ takayɩsɩ yɔɔdʋʋ pɩlɩɩnɩ ɛzɩma wezuu nɛ calɩm pɛkɛ pʋyʋ kiɖeɖeu yɔ pɩ-yɔɔ yɔ, ɛkpaɣ alɩwaatʋ nɛ ɛkpɛlɩkɩ-tʋ camɩyɛ. Nabudozo lɛ, ɛ-taa kaatɛma se ye ɛɖɔm nʋmɔʋ ŋgʋ Yehowa wɩlɩɣ-ɩ yɔ kɩ-taa yɔ, ɛkaɣ hiɣu wazasɩ nzɩ sɩwɛɣ tam yɔ. Paa kala wena ɖɩkatɩɣ yɔ, ɖa ɖɔɖɔ ɖɩpɩzɩɣ nɛ ɖɩwɛɛnɩ laŋɩyɛ nɖɩ ɖɩkam camɩyɛ yɔ.

18. Ɛzɩma tɩyɛ Baaraakɩ kɩɖaʋ wɩlɩɣ-ɖʋ se pɩwɛɛ se ɖɩtaa Yehowa liu? (Cɔnɩ takayaɣ huyuu yɔɔ kɩlɛmʋʋ.)

¹⁸ Taa Yehowa liu. Iyele nɛ ɖɩna ɛzɩma pɩɖɔmnɩ Baaraakɩ camɩyɛ mbʋ pʋyɔɔ yɔ ɛta liu nʋmɔʋ ŋgʋ Yehowa wɩlɩ-ɩ yɔ. Alɩwaatʋ ndʋ tɩ-taa, kpayʋʋ yaa kɩgbɛzɛŋ taawɛɛ Izrayɛɛlɩ ɛjaɖɛ kpeekpe taa, ɛlɛ Yehowa heyi Baaraakɩ se ewolo nɛ eyooni Kanaŋ mba sɔɔjanaa ñʋʋdʋ Sisera nɛ ɛ-sɔɔjanaa; paba kaawɛnɩ you wondu sakɩyɛ. (Tɔh. 5:8) Nayʋ halɩñɩnʋ Debora heyi Baaraakɩ se etii kɛdɛɛŋa taa nɛ ɛkatɩ Sisera nɛ e-you kɛɛkɛɛnaa 900. Baaraakɩ kaanawa se you kɛɛkɛɛnaa seɣ lɛɛ lɛɛ kɛdɛɛŋa taa nɛ pɩɩkaɣ wɛʋ Izrayɛɛlɩ mba kɛlɛʋ se poyooni-wɛ. Paa mbʋ yɔ, etisaa nɛ ɛña. Sɔɔjanaa lɩnɩ Taabɔɔrɩ Pʋʋ yɔɔ nɛ petii lɛ, Yehowa yele nɛ tɛʋ sɔsɔʋ nakʋyʋ nɩɩ. Ahɔya li Sisera you kɛɛkɛɛnaa, nɛ Yehowa yele nɛ Baaraakɩ wa. (Tɔh. 4:1-7, 10, 13-16) Mbʋ ɖɔɖɔ ye ɖɩtaɣ Yehowa liu nɛ ɖɩtaɣ liu ɖɔɖɔ nʋmɔʋ ŋgʋ ɛtɩŋɩɣnɩ ɛ-ɛgbɛyɛ yɔɔ nɛ ɛwɩlɩɣ-ɖʋ yɔ, ɛkaɣ-ɖʋ sɩnʋʋ nɛ ɖɩwa.—Wp. 31:6.

19. Ɛbɛ yɔɔ ŋsɔɔlaa se ŋwoki pɩ-yɔɔ nɛ ŋɖɔkɩ ña-tɩ kpam?

¹⁹ Ɛjaɖɛ ɖɩnɛ ɖɩ-taa, pɩkaɣ pɔzʋʋ se ɖiwolo pɩ-yɔɔ nɛ ɖɩlʋkɩ nɛ pɩsa nɛ ɖɩɖɔkɩ ɖa-tɩ kpam. (1 Tim. 6:11, 12; 2 Pɩy. 3:17) Tɛtɛ nɛ ɖɩtɛ ɖa-taa se ɖɩɩhaɣ nʋmɔʋ nɛ nazɩm, mɛsaɣ tɛɛ nʋmɔŋ, ɛyaa lɩmaɣza, pɔbɔtʋ tɔm nɛ mbʋ pɩkɛzɩɣ ɛyʋ lɩmaɣza yɔ piyele nɛ ɖiyele ɖa-tɩ ɖɔkʋʋ kpam. (Efɛz. 4:14) Ɛlɛ iyele nɛ ɖiwolo pɩ-yɔɔ nɛ ɖɩɖɔkɩ ɖa-tɩ kpam nɛ paa ɛzɩmtaa lɛ, ɖɩsɔɔlʋʋ Yehowa nɛ ɖɩñaŋ ɛ-paɣtʋ. Alɩwaatʋ kʋɖʋmtʋ ndʋ tɩ-taa lɛ, pɩpɔzʋʋ se ɖɩkɛ ɛyaa mba panɩɣ tɔm taa yɔ. Tɔm ñʋʋ ŋgʋ kɩkɔŋ yɔ kɩ-taa, ɖɩkaɣ naʋ ɛzɩma Yehowa nɛ Yesu paha-ɖʋ kɩɖaʋ ŋgʋ kɩtalɩ pilim yɔ hɔɔlʋʋ ŋgʋ kɩ-taa yɔ.