Man-caa kaakɛ ɛzʋtʋyʋ cooci ŋgʋ payaɣ se l’Église Unie du Canada yɔ kɩ-taa; pʋyɔɔ lɛ, paa kpɩtaʋ ŋgʋ ewokaɣni ma nɛ me-neu halɩñɩnʋ cooci taa ɖaŋ ŋgʋ kɩ-taa pawɩlɩɣ piya tɔm Kujuka tanaŋ tɛɛ yɔ, nɛ ñɩɣtʋ 11:00 makɩ lɛ ɖiwolo ɛ-cɔlɔ cooci taa. Wɩsɩ wɛlʋʋ lɛ, ɖa nɛ ɖo-ɖoo ɖiwokaɣ Kewiyaɣ kpaaŋ taa. Pɩɩwɛ-ɖʋ kɛlɛʋ se ɖɩna tʋkaɣ ŋga kɛwɛ Ɛsɔ sɛtʋ agbaa ana a-naalɛ a-hɛkʋ taa yɔ.

Mon-ɖoo susi tɔm ndʋ ɛkpɛlɩkaɣ Bibl taa yɔ ɛ-taabalaa kɩbama Bob Hutcheson nɛ ɛ-halʋ Marion nɛ paba ɖɔɖɔ papɩsɩ Yehowa Aseɣɖe tɩnaa. Pɩnaɣ 1958 taa koobu Hutcheson nɛ ɛ-halʋ pakpaɣ ma nɛ pa-pɩyalaa 3 nɛ ɖiwolo ‘Ɛsɔ sɔɔlɩm’ ajɛɛ kigbeɣluu Niyuu Yɔrɩkɩ tɛtʋ taa; kɩyakɩŋ 8 palabɩnɩ-kʋ. Lɛɛlɛɛyɔ, menɖiɣzinaa se pɩtaawɛɛ-wɛ kɛlɛʋ se pɛkpɛndɩnɩ-m; ɛlɛ kigbeɣluu ŋgʋ kɩkɛ kɩbam mbʋ pɩtalɩ-m me-wezuu caɣʋ taa nɛ maasɔʋ pɩ-yɔɔ yɔ pɩ-taa nabʋyʋ.

Maakɛ pɩɣa evelaɣ lɛ, ɖɩɩwɛ kɔfɩ nakʋyʋ taa nɛ ɖɩɖɔʋ kpɩna; nɛ kpɩna yɔɔ cɔnʋʋ haɣaɣ-m taa leleŋ. Maasɔɔlɩ siŋŋ se mala sukuli nɛ manpɩsɩ ɖɔkɔtɔ weyi ɛcɔŋnɩ kpɩna tɛ alaafɩya yɔɔ yɔ. Mon-ɖoo heyi ɛgbɛyɛ taa ɛzʋtʋyʋ nɔɔyʋ man-kaɖʋwa ŋga kɔ-tɔm. Ɛzʋtʋyʋ ɛnʋ ɛtɔzɩ-m nɛ sɔɔlɩm se ɖɩwɛ «kɛdɛzaɣ kɩyakɩŋ taa.» Ɛsɩnɩ-m nɛ mana ɖoŋ weyi pɩnzɩ sakɩyɛ nzɩ mankpakɩɣ se malabɩnɩ sukuli kɩtɛzʋʋ yɔ,  ɛpɩzɩɣ nɛ ɛwɛɛnɩ ma nɛ Yehowa ɖa-taabalɩyɛ yɔɔ yɔ. (2 Tim. 3:1) Mbʋ pɩlɩ pɩ-taa yɔ lɛ se mankpaɣ lɩmaɣzɩyɛ se maalakɩ sukuli kɩtɛzʋʋ.

Paa mbʋ yɔ, maawobi pɩ-yɔɔ nɛ mamaɣzɩɣ mbʋ mankaɣ labʋ alɩwaatʋ ndʋ mɛntɛŋ liisee yɔ pɩ-yɔɔ. Malɩɣaɣ tɔm susuu paa kpɩtaʋ ɖɩdɛnɖɛ nɖɩ, paa mbʋ yɔ mantaahikiɣ taa leleŋ tɔm susuu taa nɛ mantaamaɣzɩ se manpɩzɩɣ nɛ mɛnkɛ nʋmɔʋ lɩzɩyʋ. Alɩwaatʋ ndʋ tɩ-taa lɛ, man-caa nɛ e-neu abalɩñɩnʋ pataakɛ Yehowa Aseɣɖe tɩnaa nɛ peseɣtaɣ-m se mala tʋmɩyɛ alɩwaatʋ tɩŋa assurance ɛgbɛyɛ sɔsɔɖɛ naɖɩyɛ taa Toronto. Man-caa neu ɛnʋ ɛɛwɛnɩ lone sɔsɔɖɛ ɛgbɛyɛ nɖɩ ɖɩ-taa, piyeba nɛ mentisi tʋmɩyɛ nɖɩ.

Mɛwɛ Toronto lɛ, malakaɣ tʋmɩyɛ nɛ pɩcɛzɩɣ alɩwaatʋ yɔɔ ɖoŋ ɖoŋ nɛ manɖʋwaɣ taabalɩyɛ nɛ mba patɩkɛ koobiya yɔ, piyeba nɛ mɛnfɛɣ kediɣzisi nɛ tɔm susuu ɖoŋ ɖoŋ. Kajalaɣ taa lɛ maawɛ mɔn-cɔzɔ cɔlɔ; ɛtaakɛ koobu. Ɛlɛ ɛsɩba lɛ pɩpɔzɩ se mañɩnɩ ɖenɖe mɛwɛɣ yɔ.

Mankpakaɣ Hutcheson nɛ ɛ-halʋ ɛzɩ ma-lʋlɩyaa yɔ; mba kaakpaɣnɩ-m nɛ powoni kigbeɣluu taa pɩnaɣ 1958 taa. Pamʋ-m nɛ mɛwɛɛ pɛ-tɛ nɛ pasɩnɩ-m nɛ mɛnɖɛɛnɩ ɛsɩndaa fezuu taa. Pɩnaɣ 1960 taa, ma nɛ pa-pɩyalʋ John ɖɩha ɖa-tɩ nɛ pamɩyɩsɩ-ɖʋ lɩm. John paɣzɩ nʋmɔʋ lɩzʋʋ tʋmɩyɛ lɛ, piseɣti-m nɛ manpaɣzɩ tɔm susuu nɛ pɩkɩlɩ. Koobiya nawa se mɛwɛɛ nɛ mɛnɖɛɣnɩ ɛsɩndaa fezuu taa lɛ paha-m waɖɛ se mɛnkɛ Ɛsɔ sɛtʋ tɛ teokrasɩ sukuli yɔɔ cɔnɩyʋ. a

Pɩnaɣ 1966 taa, ma nɛ Randi Berge ɖɩɖɔkɩ nesi. Ɛɛkɛ nʋmɔʋ lɩzɩyʋ weyi ɛwɛ kpekpeka yɔ, nɛ ɛɛsɔɔlɩ siŋŋ se ɛla Ɛsɔ sɛtʋ tʋmɩyɛ ɖenɖe pɩpɔzʋʋ tɔm susuyaa nɛ pɩkɩlɩ yɔ. Ðe-egeetiye yɔɔ cɔnɩyʋ maɣzaɣ ɖɔ-yɔɔ siŋŋ. Eeseɣti-ɖʋ se ɖiwolo nɛ ɖɩɖʋ nesi ɛgbɛyɛ nɖɩ ɖɩwɛ Orillia, Ontario yɔ. Pʋyɔɔ lɛ, ɖɩkʋyɩ kpaagbaa nɛ ɖiwolo peeɖe.

Ðɩtɩɩtalɩ Orillia lɛ, ma ɖɔɖɔ manpɩsɩ paa ɖooye nʋmɔʋ lɩzɩyʋ. Randi kaawɛ kpekpeka nɛ piseɣti-m nɛ manpaɣzɩ-ɩ maɣzɩnʋʋ! Manpaɣzɩ ñaɣʋ pana se mɛnkɛ nʋmɔʋ lɩzɩyʋ kɩbanʋ lɛ, manpaɣzɩ Bibl labɩnʋʋ tʋmɩyɛ camɩyɛ nɛ manaɣaɣ ɛyaa nɩɣ toovenim  tɔm taa lɛ pɩhaɣ-m taa leleŋ. Ða-taa labɩ leleŋ se ɖɩsɩnɩ Orillia abalʋ nɔɔyʋ nɛ ɛ-halʋ nɛ pala lɛɣzɩtʋ pe-wezuu caɣʋ taa nɛ papɩsɩ Yehowa sɛyaa.

Alɩwaatʋ natʋyʋ mowobi Toronto lɛ, mankatɩ Arnold MacNamara, ɛɛkɛ koobiya abalɩñɩma mba pɛɖɛɣ nɔɔ Betɛɛlɩ taa yɔ pa-taa kʋɖʋm. Ɛpɔzɩ-m se ɖɩsɔɔlaa se ɖɩla nʋmɔʋ lɩzʋʋ kiya tʋmɩyɛ na. Moncosi-i kpaagbaa se: «Ɛɛɛ! Paa le, ɛlɛ pɩtaakɛ Keebɛɛkɩ!» Kanadaa ñɩma mba pɔyɔɔdʋʋ Aŋglɛɛ yɔ paawɛnɩ lɩmaɣza kɩdɛkɛdaa Keebɛɛkɩ egeetiye taa mba yɔɔ; fransɩɩ pɔyɔɔdaɣ Keebɛɛkɩ. Pa-lɩmaɣza ana aawɛnɩ ɖoŋ kɩdɛkɛdɩŋ mɔ-yɔɔ. Alɩwaatʋ ndʋ tɩ-taa lɛ, Keebɛɛkɩ politiki ɛgbɛyɛ naɖɩyɛ kaɖaɣnɩ komina nɛ ɖɩñakaɣ pana se Keebɛɛkɩ egeetiye ɛwɛɛ ɖɩ-tɩ yɔɔ nɛ ɖɩtaatasɩ kɛʋ Kanadaa hɔɔlʋʋ nakʋyʋ.

Arnold cosi-m se: «Alɩwaatʋ tʋnɛ tɩ-taa lɛ, Keebɛɛkɩ ɖeke ɛgbɛyɛ piliŋa tiyiɣni nʋmɔʋ lɩzɩyaa kiya.» Mentisi kpaagbaa se ɖiwoki. Maatɛm naʋ se Randi kaasɔɔlaa se ɖɩla ɖɛ-Ɛsɔ sɛtʋ tʋmɩyɛ peeɖe. Pʋwayɩ lɛ, menɖiɣzina se lɩmaɣza kɩbana wena ɖɩkpaɣ ɖe-wezuu caɣʋ taa yɔ a-taa kʋɖʋmɖɩyɛ lɛ!

Ðɩkpɛlɩkɩ fransɩɩ kpɩtaŋ 5 nɛ pɩtɛ lɛ, ma nɛ Randi nɛ koobu lɛlʋ nɛ ɛ-halʋ ɖɩɖɔ nʋmɔʋ kilomɛtanaa ɛzɩ 540 mbʋ yɔ nɛ ɖiwolo Rimouski, Mɔɔreyaalɩ hayo kiŋ wɩsɩ ɖɩlɩyɛ taa. Ɛlɛ pɩɩpɔzaa se ɖɩñaɣ pana nɛ ɖɩtɩlɩ fransɩɩ nɛ pɩkɩlɩ. Mankalɩ tɔm kususutu natʋyʋ kediɣzaɣ nakɛyɛ taa nɛ pɩtɛ lɛ menɖiɣzini toovenim tɔm ndʋ kpayɩ kpayɩ. Mɔyɔɔdaa se kigbeɣluu sɔsɔʋ ŋgʋ kɩkɔŋ yɔ kɩ-taa, ɖɩkaɣ mʋʋ «autruches» waa sakɩyɛ (taataanaa sakɩyɛ) ŋgʋ mañɩnaɣ se mɔyɔɔdɩ se ɖɩkaɣ mʋʋ «autrichiens» waa sakɩyɛ (Otirisi mba sakɩyɛ).

Ðɩwɛ Rimouski peeɖe lɛ, koobiya halɩñɩma kpekpeka tɩnaa 4 nɛ Huberdeau nɛ ɛ-halʋ nɛ pɛ-pɛlaa 2 kɔɔ nɛ pɔsɔzɩ ɖɔ-yɔɔ. Huberdeau nɛ ɛ-halʋ paalabɩ haya ɖɩɣa sɔsɔɔ nakɛyɛ nɛ nʋmɔʋ lɩzɩyaa tɩŋa wɛɛ ka-taa; ɖa-tɩŋa ɖɩsɩɣna nɛ ɖɩhɛyɩɣ haya liidiye. Ðɩyaɣaɣ-kɛ se Ðɩɣa kʋhʋlʋmaɣ, mbʋ pʋyɔɔ yɔ pata tɔlɩm kʋhʋlʋmʋm kɛ-ɛsɩndaa hɔɔlʋʋ nɛ ke-tilima. Ðoŋ ɖoŋ lɛ, ɖa mba ɖɩɩwɛ ka-taa yɔ ɖɩkpɛndaɣ ɛyaa 12 yaa 14. Ma nɛ Randi ɖɩɩkɛ nʋmɔʋ lɩzɩyaa kiya; pʋyɔɔ lɛ ɖisusaɣ tɔm tanaŋ tɛɛ, wɩsɩ wɛlʋʋ nɛ ɖanasɩ yɔɔ. Ðɩɩwɛnɩ ɛsɩmɩyɛ siŋŋ se paa ɛzɩmtaa lɛ nɔɔyʋ kaawɛɛ se ɛsɩɩ-ɖʋ tɔm susuu taa, halɩ pɩkpɛndɩnɩ pɩnaɣ alɩwaatʋ ndʋ tɩ-taa niŋkaɣ lakɩ yɔ.

Ða nɛ nʋmɔʋ lɩzɩyaa siɣsiɣ tɩnaa mba ɖɩɩpɩsɩ taabalaa kɩbama nɛ ɖɩɩwɛ ɛzɩ hɔʋ kʋɖʋmʋʋ taa mba yɔ. Nabʋyʋ taa ɖɩɖʋwaɣ miŋ sɔsɔŋ nɩɩyɩ nɛ ɖɩcakɩ ɛ-cɔlɔ yaa nabʋyʋ taa ɖɩkpɛndaɣ nɛ ɖɩlakɩ tɔɔnaɣ. Koobiya abalɩñɩma taa kʋɖʋm kaakɛ minziiki maɖʋ, pʋyɔɔ ɖoŋ ɖoŋ lɛ mazasɩ ɖoo taa ɖiteɣaɣ hendu nɛ ɖɩpaɣ.

Rimouski mba sakɩyɛ kaasɔɔlɩ Bibl kpɛlɩkʋʋ! Ða-taa kaalabɩ leleŋ mbʋ pʋyɔɔ yɔ pɩnzɩ 5 taa, ɖɩna Bibl kpɛlɩkɩyaa sakɩyɛ ɖɛnɩ ɛsɩndaa nɛ pamɩyɩsɩ-wɛ lɩm. Ɛgbɛyɛ taa tɔm susuyaa huwaa nɛ pɩtalɩ 35 mbʋ yɔ.

Alɩwaatʋ ndʋ ɖɩɩwɛ Keebɛɛkɩ yɔ, tɔm susuu yeba nɛ ɖɩpɩsɩ tɔm susuyaa kɩbama siŋŋ. Ðɩna ɛzɩma Yehowa sɩnɩ-ɖʋ tɔm susuu taa nɛ ɛzɩma ɛsɩnɩ-ɖʋ nɛ ɖɩcɔnɩ ɖo-tomnaɣ yɔɔ kɩcɛyɩm ɖeɖe yɔ. Pɩtasɩ lɛ, ɖɩsɔɔlɩ ɛyaa mba pɔyɔɔdʋʋ fransɩɩ yɔ, pa-kʋnʋŋ nɛ pɔ-sɔnzɩ; pɩsɩnɩ-ɖʋ nɛ ɖɩsɔɔlɩ sɔnzɩ lɛɛsɩ ɖɔɖɔ.—2 Kɔr. 6:13.

Alɩwaatʋ ndʋ ɖɩtaaɖʋna yɔ lɛ, ɛgbɛyɛ piliŋa pɔzɩ-ɖʋ se ɖɩkʋyɩ nɛ ɖiwolo Trakaadii tɛtʋ taa; tɩɩwɛ Nouveau-Brunswick egeetiye taa wɩsɩ ɖɩlɩyɛ kidiiliŋ yɔɔ. Pɩɩwɛ-ɖʋ kaɖɛ se ɖitisi nɛ ɖiwolo, mbʋ pʋyɔɔ yɔ ɖɩɩlabɩ hayaa ɖɩɣa nakɛyɛ pitileɖita, nɛ ma nɛ sukuli nakʋyʋ ɖɩɩnɩnɩ ɖama nɛ mawɩlɩɣ tɔm kɩ-taa avema naayɛ. Pɩtasɩ lɛ, ɖe-Bibl kpɛlɩkɩyaa nabɛyɛ  pɩsɩ tɔm susuyaa pitileɖita, nɛ ɖiiɖiɣni Kewiyaɣ kpaaŋ maʋ nɛ alɩwaatʋ ndʋ lɛ ɖɩtayɩ kɩmaŋ.

Ðɩtɩmɩ tɔm ndʋ tɩ-yɔɔ kpɩtaʋ ɖɩdɛnɖɛ tɩŋa, nɛ ɖiwolo nɛ ɖɩna Trakaadii; peeɖe kaawɛ ndɩ kpem nɛ Rimouski. Ɛlɛ ɖɩkpaɣ lɩmaɣzɩyɛ se ɖiwoki, mbʋ pʋyɔɔ yɔ Yehowa sɔɔlaa se ɖiwolo peeɖe. Ðɩtakɩ Yehowa se ɖɩna, nɛ ɛsɩnɩ-ɖʋ nɛ ɖɩwa kala wena payɩ ɖɩkataa yɔ. (Mal. 3:10) Taabalɩyɛ kɩbanɖɛ wɛ Randi nɛ Yehowa pɛ-hɛkʋ taa, ɛwɛnɩ tɩ laʋ lɩmaɣza, nɛ ɛsɔɔlɩ tanaʋ labʋ; pʋyɔɔ lɛ pɩɩwɛ-ɖʋ kɛlɛʋ se ɖɩkʋyɩ nɛ ɖiwolo peeɖe.

Robert Ross ɖeke kaakɛnɩ ɛgbɛyɛ taa ɛzʋtʋyʋ ɖɛ-ɛgbɛyɛ kɩfaɖɛ taa. Ɛ nɛ ɛ-halʋ Linda paakɛ nʋmɔʋ lɩzɩyaa. Nɛ palʋlɩ pa-pɩɣa kajalaɣ ñɩŋga lɛ pakpaɣ lɩmaɣzɩyɛ se pɛwɛɣ peeɖe. Paa paawɛɛ nɛ pɔcɔŋnɩ pa-pɩɣa ɛjam yɔɔ yɔ, pakpazɩ ma nɛ Randi ɖoŋ kpem mbʋ pʋyɔɔ yɔ pɔsɔɔlɩ ɛyaa mʋʋ ɛgɔndʋ nɛ pɛwɛ kpekpeka tɔm susuu taa.

Ðɩlabɩ nʋmɔʋ lɩzʋʋ tʋmɩyɛ Trakaadii pɩnzɩ 2 lɛ, paɖaɣnɩ-ɖʋ ɖʋʋ tʋmɩyɛ lɛɛɖɛ, nɖɩ ɖɩtaaɖʋna yɔ: paha-m waɖɛ se mɛnkɛ egeetiye yɔɔ cɔnɩyʋ. Ðɩlabɩ tʋmɩyɛ nɖɩ Aŋglɛɛ egeetiye taa pɩnzɩ 7; nɛ pʋwayɩ lɛ paɖʋ-ɖʋ tʋmɩyɛ nɖɩ fransɩɩ egeetiye taa Keebɛɛkɩ. Léonce Crépeault kaakɛnɩ ageeta yɔɔ cɔnɩyʋ Keebɛɛkɩ. Mɔyɔɔdʋʋ samaɣ taa tɔm lɛ ɛsaŋɩ-m pɩ-yɔɔ. Ɛlɛ paa ɛzɩmtaa, ɛsaŋɩ-m nɛ pɩtɛ lɛ ɛpɔzʋʋ-m se: «Ɛzɩma ŋpɩzaɣ se ŋla nɛ tɔm yɔɔdʋʋ mbʋ pɩwɛɛ wazaɣ nɛ pɩkɩlɩ?» b Ɛzɩma ɛmaɣzaɣ mɔ-yɔɔ mbʋ yɔ, pɩsɩnɩ-m nɛ manka ma-lɩmaɣza ɛzɩma meyele nɛ mɔn-tɔm wɩlʋʋ wɛɛnɩ kaɖʋwa nakɛyɛ ɖeyi ɖeyi nɛ tɩ-taa nɩʋ wɛɛ kɛlɛʋ nɛ pɩkɩlɩ yɔ pɩ-yɔɔ.

Tʋma wena paɖʋ-m nɛ mɔntɔzʋʋ a-yɔɔ paa ɛzɩmtaa yɔ a-taa naɖɩyɛ lɛ nɖɩ paaɖʋ-m pɩnaɣ 1978 ajɛɛ kigbeɣluu ŋgʋ palabɩ Mɔɔreyaalɩ yɔ kɩ-taa yɔ; kɩ-ñʋʋ yɔ: «La foi victorieuse.» Malabɩ tʋmɩyɛ tɔɔnaɣ ɖɩlaɖɛ. Ðɩɩɖaŋaa se ɛyaa 80000 kɔŋnɩ kigbeɣluu ŋgʋ kɩ-taa; nɛ ɛzɩma pɩɩwɛɛ se ɖɩla tɔɔnasɩ yɔ pɩɩwɛ ndɩ kpem nɛ pɩnzɩ nzɩ sɩɖɛwa yɔ. Pɩtɩŋa pɩɩkɛ pʋyʋ kɩfam kpem: wondu ndʋ tɩ-taa ɖɩlakɩ tɔɔnasɩ nɛ ndʋ tɩ-taa ɖɩɖʋʋ-sɩ yɔ, tɔɔnasɩ nzɩ ɖɩlakɩ yɔ nɛ ɛzɩma ɖɩlakɩ-sɩ yɔ. Ðɩɩwɛnɩ menziiniwaa mba peniɣdiɣ wondu yɔ ɛzɩ 20 mbʋ yɔ, nɛ nabʋyʋ taa pataalakɩ tʋmɩyɛ camɩyɛ. Pʋcɔ nɛ kigbeɣluu kajalaɣ evemiye paɣzɩɣ lɛ, ɖoo tayɩ kɩmaŋ ɛlɛ ɖɩtaapɩzɩta nɛ ɖɩsʋnɩ ɖo-wondu kigbeɣluu ɖɩlaɖɛ, mbʋ pʋyɔɔ yɔ palakaɣ hola aleɣya naayɛ peeɖe. Nɛ pɩwɛɛ se ɖipuzi miŋ nɛ ɖɩla tɔɔnaɣ ŋga palɩzɩɣnɩ sɔntɔ yɔ pʋcɔ nɛ tɛʋ fe! Pɩɩnɩ-ɖʋ, ɛlɛ mɛnkpɛlɩkɩ lɔŋ sakɩyɛ koobiya mba paha pa-tɩ nɛ ma nɛ wɛ ɖɩkpɛndɩ ɖɩla  tʋmɩyɛ yɔ pɔ-cɔlɔ: palabɩ tʋmɩyɛ nɛ kpekpeka, papɩ fezuu taa, nɛ pɔsɔɔlɩ tanaʋ labʋ. Ðɩpɩsɩ taabalaa, nɛ taabalɩyɛ nɖɩ ɖɩwɛ halɩ nɛ sɔnɔ. Man-taa wɛ leleŋ se mowobi kigbeɣluu ŋgʋ Keebɛɛkɩ nɛ maasɔʋ kɩ-yɔɔ kpa. Paanazɩ ɖo-koobiya siŋŋ egeetiye nɖɩ ɖɩ-taa kpaɣnɩ pɩnzɩ 1940 nɛ piwolo 1950 waa taa.

Kigbeɣliŋ sɔsɔŋ weyi ɖɩlabɩ Mɔɔreyaalɩ yɔ ɩ-taa, mɛnkpɛlɩkɩ lɔŋ sakɩyɛ koobiya mba pɔcɔŋnaɣ kigbeɣliŋ ɛnɩ ɩ-yɔɔ yɔ pɔ-cɔlɔ. Pɩnaɣ nakɛyɛ, David Splane, weyi ɛkɛ Nɔɔɖɛyaa ɛgbɛyɛ taa tʋ lɛɛlɛɛyɔ yɔ, ɛɛcɔnɩ kigbeɣluu nakʋyʋ yɔɔ. Pʋwayɩ, kigbeɣluu nakʋyʋ taa lɛ, ma paɖʋ tʋmɩyɛ nɖɩ, nɛ David ɖʋ-m nesi siŋŋ.

Ðɩlabɩ egeetiye yɔɔ cɔnʋʋ tʋmɩyɛ pɩnzɩ 36 lɛ, pɩnaɣ 2011 taa paha-m waɖɛ se mɛnkɛ wɩlɩyʋ Ɛgbɛyɛ taa ɛzʋtʋyaa sukuli taa. Ma nɛ Randi ɖɩhɩnɩ kaɖʋnaa ndɩ ndɩ 75 yɔɔ pɩnzɩ 2 taa. Ɛlɛ pɩɩcɛyaa se ɖɩlaa kɩlaŋ ɛnɩ. Paa kpɩtaʋ ŋgʋ kɩtɛŋ lɛ, ɛgbɛyɛ taa ɛzʋtʋyaa wɛnɩ ɛsɩmɩyɛ mbʋ pʋyɔɔ yɔ panaɣ se Nɔɔɖɛyaa ɛgbɛyɛ maɣzɩɣ pa nɛ Yehowa pa-taabalɩyɛ yɔɔ.

Pʋwayɩ lɛ, mɛnkɛ wɩlɩyʋ Kewiyaɣ tɔm susuyaa sukuli taa. Ðoŋ ɖoŋ lɛ, sukuli ɖʋtʋ yeki nɛ pɩnɩɣ sukulibiya siŋŋ: paa evemiye nɖɩ lɛ palakɩ ñɩɣtʋ 7 sukuli ɖaŋ taa, pakpakɩɣ ñɩɣtʋ 3 paa ɖoo wena nɛ pɔñɔɔzʋʋ sukuli taa tʋma, nɛ paa kpɩtaʋ ŋgʋ lɛ pɛwɛnɩ sukulibiya tʋma 4 yaa 5 se palakɩ. Ma nɛ wɩlɩyʋ lɛlʋ ɖɩlɩzɩ-wɛ pɩ-taa se ye Yehowa ɛtɩsɩnɩ-wɛ yɔ paapɩzɩɣ nɛ pala tʋma ana. Sukulibiya nawa se sɩta liu Yehowa lɛ, sɩpɩzaa nɛ sɩla nɛ pɩcɛzɩ mbʋ sɩmaɣzaɣ se sɩpɩzɩɣ nɛ sɩla yɔ nɛ pɩɖɩɣzɩ-sɩ; maasɔʋ tɔm ndʋ tɩ-yɔɔ kpa.

Mon-ɖoo wɩlaa se ɛmaɣzɩɣ lalaa yɔɔ lɛ, pɩsɩnɩ e-Bibl kpɛlɩkɩyaa nɛ pɛɖɛɛnɩ ɛsɩndaa, nɛ halɩ pɩsɩnɩ man-caa nɛ ɛlɛɣzɩ lɩmaɣza wena ɛɛwɛnɩ toovenim yɔɔ yɔ. Mon-ɖoo sɩba nɛ pɩla kɩyakɩŋ 3 lɛ, man-caa kɔɔ Kewiyaɣ kpaaŋ taa nɛ ewelisi samaɣ taa tɔm yɔɔdʋʋ, nɛ pɩɩɖɩɣzɩ-ɖʋ kpem. Nɛ eewobi pɩ-yɔɔ nɛ ewoki kediɣzisi pɩnzɩ 26 nzɩ sɩtɩŋaa yɔ sɩ-taa. Paa man-caa ɛtɩha ɛ-tɩ kpa nɛ pamɩyɩsɩ-ɩ lɩm yɔ, ɛgbɛyɛ taa ɛzʋtʋyaa heyi-m se paa ɛzɩmtaa lɛ, ɛnʋ lɛyaɣnɩ talʋʋ kediɣzisi taa paa kpɩtaʋ ŋgʋ.

Pɩtasɩ lɛ, mon-ɖoo ha ma nɛ me-newaa kɩɖaʋ kɩbaŋʋ siŋŋ. Me-newaa mba, pɛkpɛndɩ 3; pa nɛ pa-walaa pɛwɛɛ nɛ pɛsɛɣ Yehowa siɣsiɣ. Naalɛ lakɩ tʋmɩyɛ Betɛɛlɩ: kʋɖʋm Pɔrtiigaalɩ Betɛɛlɩ taa nɛ lɛlʋ Hayitii Betɛɛlɩ taa.

Lɛɛlɛɛyɔ lɛ, ma nɛ Randi ɖɩkɛ nʋmɔʋ lɩzɩyaa kiya Hamilton, Ontario. Ðɩlakaɣ egeetiye yɔɔ cɔnʋʋ tʋmɩyɛ lɛ, ɖa-taa kaawɛ leleŋ se ɖɩsɩɩ lalaa nɛ ɖiwolo pɛ-tɛ pɩsɩ ŋna-ɩ waa nɛ Bibl kpɛlɩkɩyaa cɔlɔ. Ɛlɛ lɛɛlɛɛyɔ lɛ, ɖa-maɣmaɣ ɖɩwɛnɩ Bibl kpɛlɩkɩyaa nɛ ɖɩnaɣ ɛzɩma pɛɖɛɣnɩ ɛsɩndaa yɔ lɛ, pɩhaɣ-ɖʋ taa leleŋ. Nɛ ɖa nɛ ɖɛ-ɛgbɛyɛ kɩfaɖɛ taa koobiya ɖɩpɩsɩ taabalaa, nɛ ɖɩnaɣ ɛzɩma Yehowa sɩɣnɩ-wɛ alɩwaatʋ kɩbandʋ taa nɛ alɩwaatʋ kɩdɛkɛdɩtʋ taa yɔ lɛ pɩkpazɩɣ-ɖʋ ɖoŋ.

Ðɩmaɣzɩɣ mbʋ pɩlabɩ ɖe-wezuu caɣʋ taa yɔ pɩ-yɔɔ lɛ, ɖɩwɛnɩ ɛsɩmɩyɛ siŋŋ se ɛyaa sakɩyɛ wɩlaa se pamaɣzɩɣ ɖɔ-yɔɔ. Pʋyɔɔ lɛ, ɖa ɖɔɖɔ ɖɩñakɩ pana se ɖɩwɩlɩ lalaa se ‘ɖɩmaɣzɩɣ pɔ-yɔɔ siŋŋ,’ nɛ ɖiseɣtiɣ-wɛ se pala po-ɖoŋ ɖeɖe Yehowa sɛtʋ taa. (2 Kɔr. 7:6, 7) Kɩɖaʋ nakʋyʋ yɔ. Hɔʋ nakʋyʋ taa, ɖoyo nɛ piya tɩŋa wɛ alɩwaatʋ tɩŋa Ɛsɔ sɛtʋ tʋmɩyɛ taa. Mɔnpɔzɩ hɔʋ ŋgʋ kɩ-ñʋʋdʋ se wiɖiyi ɛtɛm maɣzʋʋ nɛ ɛna se ɛpɩzɩɣ nɛ ɛla nʋmɔʋ lɩzʋʋ tʋmɩyɛ na. Ecosi-m se ɛnʋ ɖʋʋ nesi nʋmɔʋ lɩzɩyaa 3. Peeɖe mɔnpɔzɩ-ɩ se: «Ŋpɩzɩɣ nɛ ŋsɩnɩ-wɛ nɛ pɩkpaɖɩ Yehowa?» Menseɣti-i se ɛñaɣ pana nɛ ehiɣ taa leleŋ weyi pehikiɣ yɔ. Fenasɩ 6 wayɩ lɛ ɛpɩsɩ nʋmɔʋ lɩzɩyʋ.

Ma nɛ Randi ɖɩkaɣ wobu pɩ-yɔɔ nɛ ‘ɖɩkɛdɩɣ kpaɖʋʋ’ ŋgʋ kɩkɔŋ yɔ Yehowa «piti tʋma tɔm,» nɛ ɖɩtaɣ liu se pakaɣ wobu pɩ-yɔɔ nɛ pɛsɛɣ Yehowa nɛ taa leleŋ ɛzɩ ɖa yɔ.—Keɣ. 71:17, 18.