1. Ŋpaɣzɩ Bibl kpɛlɩkʋʋ lɛ, toovenim tɔm ndʋ ŋkpɛlɩkaa?

 ŊTƆZƲƲ alɩwaatʋ ndʋ ŋpaɣzɩ Bibl kpɛlɩkʋʋ yɔ tɩ-yɔɔ? Pɩtɩla alɩwaatʋ ndʋ ŋnawa se Ɛsɔ wɛnɩ hɩɖɛ yɔ pɩɖɩɣzɩ-ŋ. Pʋtɔma yɔ, alɩwaatʋ ndʋ ŋɖiɣzinaa se Ɛsɔ ɛɛwɩlɩɣ ɛyaa kʋñɔŋ miŋ maatɛŋ taa yɔ, pɩhɛzɩ ña-laŋɩyɛ. Nɛ alɩwaatʋ ndʋ ŋnawa se lidaʋ wɛɛ se ŋɖaɣnɩɣ naʋ ñɛ-ɛyaa kʋsɔɔlaa mba pasɩba yɔ nɛ ña nɛ wɛ ɩcaɣ wezuu paradisuu taa tɛtʋ yɔɔ yɔ pɩtʋʋ fɛyɩ se ña-taa labɩ leleŋ siŋŋ.

2. Pɩtasɩnɩ Bibl taa toovenim tɔm ndʋ ŋkpɛlɩkaa yɔ lɛ, hɔɔlɩŋ weyi taa ɖɔɖɔ ŋwobini ɛsɩndaa? (Efɛɛzɩ mba 5:1, 2)

² Ŋwɛɛ nɛ ŋkpɛlɩkɩɣ Ɛsɔtɔm nɛ pɩkɩlɩɣ lɛ, sɔɔlɩm mbʋ ŋwɛnɩ Yehowa yɔɔ yɔ pɩwɛɛ paɣlɩɣ nɛ pɩkɩlɩ. Sɔɔlɩm mbʋ, piseɣti-ŋ nɛ ŋɖɔŋ tɔm ndʋ ŋkpɛlɩkaa yɔ tɩ-yɔɔ. Ŋlabɩnɩ tʋmɩyɛ Bibl paɣtʋ kila nɛ ŋkpaɣ lɩmaɣza kɩbana. Ŋñaɣ pana nɛ ŋlɛɣzɩ ñɛ-wɛtʋ nɛ ñe-wezuu nɛ kɩwɛɛ ɖeu nɛ pɩkɩlɩ mbʋ pʋyɔɔ yɔ ŋsɔɔlaa se ñɔ-tɔm ɛkɛdɩnɩ Ɛsɔ. Ɛzɩ pɩɣa maɣzʋʋnʋʋ ka-lʋlɩyʋ kʋsɔɔlʋ yɔ, mbʋ ɖɔɖɔ ŋwɛɛ nɛ ŋmaɣzɩɣnɩ ña-Caa weyi ɛwɛ ɛsɔdaa yɔ.—Kalɩ Efɛɛzɩ mba 5:1, 2.

3. Tɔm ndʋ ɖɩpɩzɩɣ nɛ ɖɩpɔzɩ ɖa-tɩ?

³ Ðɩpɩzɩɣ nɛ ɖɩpɔzɩ ɖa-tɩ se: ‘Sɔɔlɩm mbʋ mɛwɛnɩ Yehowa yɔɔ lɛɛlɛɛyɔ yɔ, pɩpaɣlaa nɛ pɩkɩlɩ mbʋ maawɛnɩ alɩwaatʋ ndʋ mancalɩ pɩsʋʋ Krɩstʋ tʋ yɔ? Kpaɣnɩ alɩwaatʋ ndʋ pamɩyɩsɩ-m lɩm yɔ mɛwɛɛ nɛ mamaɣzɩɣnɩ Yehowa maɣzɩm nɛ ɛ-lakasɩ nɛ pɩkɩlɩɣ, kɔzɩ kɔzɩ sɔɔlɩm wɩlʋʋ mon-koobiya Krɩstʋ mba hɔɔlʋʋ taa?’ Ye ŋɖiɣzinaa se «sɔɔlɩm mbʋ ŋŋwɛnɩ kiɖe tɛɛ yɔ» pɩpasaa yɔ, pitaatibi-m yɔɔɔ. Kajalaɣ pɩnzɩ mɩnʋʋ taa Krɩstʋ mba kaakatɩ wɛtʋ ndʋ tɩ-ɖɔndɩ. Ɛlɛ Yesu tɩlɔ-wɛ, nɛ ɛɛkaɣ-ɖʋ lɔʋ ɖɔɖɔ. (Natʋ 2:4, 7) Ɛnawa se ɖɩpɩzɩɣ nɛ ɖɩñaɣ pana nɛ ɖɩtasɩ wɛnʋʋ sɔɔlɩm mbʋ ɖɩɩwɛna alɩwaatʋ ndʋ ɖɩcalɩ kpɛlɩkʋʋ toovenim yɔ.

4. Ɛbɛ ɖɩkaɣ naʋ tɔm ñʋʋ kʋnɛ kɩ-taa?

 ⁴ Tɔm ñʋʋ kʋnɛ kɩ-taa, ɖɩkaɣ naʋ ɛzɩma ɖɩpɩzɩɣ nɛ ɖiyele nɛ sɔɔlɩm mbʋ ɖɩwɛnɩ Yehowa nɛ ɛyaa lalaa yɔɔ yɔ pɩwɛɛ nɛ pɩpaɣlɩɣ yɔ. Ðɩkaɣ naʋ ɖɔɖɔ wazasɩ nzɩ ɖa nɛ ɛyaa lalaa ɖihikiɣ alɩwaatʋ ndʋ ɖɩcɛyɩsɩɣ sɔɔlɩm mbʋ ɖɩwɛnɩ Yehowa nɛ ɖo-koobiya yɔɔ yɔ sɩ-taa nasɩyɩ.

5-6. (a) Alɩwaatʋ ndʋ Pɔɔlɩ lakaɣ ɛ-Ɛsɔ sɛtʋ tʋmɩyɛ yɔ, kala wena ɛkataa? (b) Ɛlɛ ɛbɛ kaaseɣti-i nɛ ewolo pɩ-yɔɔ nɛ ɛsɛɛ Yehowa?

⁵ Apostoloo Pɔɔlɩ kaahiɣ taa leleŋ Yehowa sɛtʋ taa, ɛlɛ pɩtaawɛɛ-ɩ kɛlɛʋ paa ɛzɩmtaa. Ðoŋ ɖoŋ lɛ, ɛɖɔŋaɣ nʋmɔʋ nɛ ewoki lona wena awɛ poliŋ yɔ a-taa, nɛ alɩwaatʋ ndʋ tɩ-taa lɛ nʋmɔʋ wobu taawɛɛ kɛlɛʋ. Alɩwaatʋ ndʋ Pɔɔlɩ wokaɣ nʋmɔʋ yɔ, nabʋyʋ taa ‘ɛkatɩ kala pɔsɩ taa’ nɛ ‘ɛkatɩ kala mɩlaa sɔsaa nesi tɛɛ’ ɖɔɖɔ. Pɩtasɩ lɛ, alɩwaatʋ natʋyʋ taa lɛ, e-koyindinaa mabɩ-ɩ. (2 Kɔr. 11:23-27) Nɛ pɩtaakɛ paa ɛzɩmtaa e-koobiya Krɩstʋ mba wɩlaa se pɛwɛnɩ ɛsɩmɩyɛ pana wena ɛñakaɣ nɛ ɛ-laŋɩyɛ pilim se ɛsɩnɩ-wɛ yɔ a-yɔɔ.—2 Kɔr. 10:10; Filp. 4:15.

⁶ Ɛbɛ kaasɩnɩ Pɔɔlɩ nɛ ewolo pɩ-yɔɔ nɛ ɛsɛɣ Yehowa? Masɩ nɛ mbʋ pɩtalɩ-ɩ e-wezuu caɣʋ taa yɔ, pɩsɩnɩ-ɩ nɛ ɛkpɛlɩkɩ tɔm sakɩyɛ Yehowa wɛtʋ kɩbandʋ yɔɔ. Pɩsɩnɩ-ɩ nɛ ɛ-taa tɛ se Yehowa sɔɔlɩ-ɩ. (Roma 8:38, 39; Efɛz. 2:4, 5) Piyeba nɛ ɛsɔɔlɩ Yehowa siŋŋ. Pɔɔlɩ ‘kaaɖʋ ɛyaa kiɖeɖema lɩm nɛ eewobi pɩ-yɔɔ nɛ ɛɖʋʋ-wɛ lɩm’ nɛ ɛwɩlɩ se ɛsɔɔlɩ Yehowa.—Ebr. 6:10.

7. Nʋmɔŋ weyi ɩ-yɔɔ ɖɩpɩzɩɣ ɖɩtɩŋna nɛ ɖiyele nɛ sɔɔlɩm mbʋ ɖɩwɛnɩ Yehowa yɔɔ yɔ pɩpaɣlɩ yɔ, ɩ-taa nakʋyʋ lɛ ŋgʋ?

⁷ Ye ɖɩkpɛlɩkɩɣ Ɛsɔtɔm camɩyɛ yɔ, pɩpɩzɩɣ pɩsɩnɩ-ɖʋ nɛ sɔɔlɩm mbʋ ɖɩwɛnɩ Ɛsɔ yɔɔ yɔ pɩpaɣlɩ. Alɩwaatʋ ndʋ ŋkalɩɣ Bibl yɔ, ñaɣ pana nɛ ŋna mbʋ paa hɔɔlʋʋ ŋgʋ lɛ kɩkpɛlɩkɩɣ-ŋ Yehowa yɔɔ yɔ. Pɔzɩ ña-tɩ se: ‘Ɛzɩma kɛdaɣ kanɛ kawɩlɩɣ se Yehowa sɔɔlɩ-m? Kawɩlɩɣ se lɩmaɣza wena yɔɔ pɩwɛɛ se mɔnsɔɔlɩ Yehowa?’

8. Ɛzɩma tɩyɛ adɩma sɩɣnɩ-ɖʋ se sɔɔlɩm mbʋ ɖɩwɛnɩ Ɛsɔ yɔɔ yɔ pɩpaɣlɩ?

⁸ Nʋmɔʋ lɛɛkʋ ŋgʋ kɩ-yɔɔ ɖɩpɩzɩɣ ɖɩtɩŋna nɛ sɔɔlɩm mbʋ ɖɩwɛnɩ Yehowa yɔɔ yɔ pɩwɛɛ nɛ pɩpaɣlɩ yɔ ŋgʋ lɛ se ɖɩtɩmɩɣnɩ-ɩ paa ɖooye nɛ ɖiheyiɣ-i ɛzɩma ɖeyi ɖeyi pɩlakɩ-ɖʋ yɔ. (Keɣ. 25:4, 5) Nɛ Yehowa kaɣ cosuu ɖa-adɩma yɔɔ. (1 Yoh. 3:21, 22) Payaɣ koobu halɩñɩnʋ nɔɔyʋ se Khanh nɛ ɛwɛ Aazii. Ɛyɔɔdaa se: «Kajalaɣ taa lɛ, mbʋ mɛnkpɛlɩkɩ Yehowa yɔɔ yɔ mbʋ yebina nɛ mɔnsɔɔlɩ-ɩ; ɛlɛ mana ɛzɩma ecosi ma-adɩma yɔɔ lɛ, mɔnsɔɔlɩ-ɩ nɛ pɩkɩlɩ. Piseɣti-m nɛ mɔnsɔɔlɩ se mala mbʋ pɩkɛdɩɣnɩ-ɩ yɔ.» b

9. Tɔm ndʋ Pɔɔlɩ yɔɔdaa nɛ tɩwɩlɩɣ se Timootee kaawɛɛ nɛ ɛñakɩ pana se ɛwɩlɩ ɛyaa lalaa se ɛsɔɔlɩ-wɛ siŋŋ?

⁹ Pɔɔlɩ pɩsɩ Krɩstʋ tʋ nɛ pɩla pɩnzɩ nasɩyɩ lɛ ɛkatɩ Timootee. Timootee kaasɔɔlɩ Yehowa, nɛ ɛɛsɔɔlɩ ɖɔɖɔ ɛyaa. Pɔɔlɩ heyi Filiipi mba se: «Mɛnfɛyɩnɩ nɔɔyʋ se ɛwɛnɩ wɛtʋ kɩbandʋ ɛzɩ [Timootee] yɔ, weyi ɛkaɣ cɔnʋʋ mɩ-kɩcɛyɩm ɖeɖe siŋŋ yɔ.» (Filp. 2:20) Pɩtɩkɛ ɛzɩma Timootee kaawɛ niye ɖʋtʋ labʋ taa yaa samaɣ taa tɔm yɔɔdʋʋ taa yɔ pɩ-tɔm Pɔɔlɩ yɔɔdʋʋ cɩnɛ, ɛlɛ ɛzɩma Timootee kaasɔɔlɩ koobiya siŋŋ yɔ pɩ-tɔm ɛyɔɔdʋʋ. Pɩtʋʋ fɛyɩ se agbaa wena a-yɔɔ Timootee kilimaɣ yɔ, a-taa koobiya ɖaŋaɣ-ɩ kpam.—1 Kɔr. 4:17.

10. Ɛzɩma Anna nɛ ɛ-walʋ palɩzɩ sɔɔlɩm nɛ pawɩlɩ po-koobiya Krɩstʋ mba?

¹⁰ Ða ɖɔɖɔ, ɖɩñɩnɩɣ nʋmɔŋ weyi ɩ-yɔɔ pɩwɛɛ se ɖɩtɩŋna nɛ ɖɩsɩnɩ ɖo-koobiya yɔ. (Ebr. 13:16) Iyele nɛ ɖɩna Anna weyi ɛ-tɔm ɖɩyɔɔdɩ tɔm ñʋʋ ŋgʋ kɩɖɛwa yɔ kɩ-taa yɔ ɛ-kɩɖaʋ.  Helim sɔsɔm nabʋyʋ maba nɛ pɩtɛ lɛ, ɛ nɛ ɛ-walʋ powolo nɛ pekilimi hɔʋ nakʋyʋ yɔɔ, kɩ-taa mba kɛ koobiya; nɛ pana se helim wɛɛkɩ pa-ɖɩɣa. Piyeba nɛ po-wondu kususutu tɩŋa piyi. Anna yɔɔdaa se: «Ðɩkpaɣ po-wondu kususutu, ɖɩcɔtɩ-tʋ, ɖɩnaŋ-tʋ, ɖikpiyi-tʋ nɛ ɖɩpɩsɩnɩ-wɛ. Ðɛ-ɛsɩndaa lɛ, mbʋ ɖɩlaba yɔ pɩtaakɛ pʋyʋ sɔsɔm, ɛlɛ piyeba nɛ ɖɩpɩsɩ taabalaa kɩbama pɩkɔɔ nɛ pɩtalɩnɩ sɔnɔ.» Anna nɛ ɛ-walʋ pɔsɔɔlɩ koobiya mba, piseɣti-wɛ nɛ pala nabʋyʋ ɖeyi ɖeyi nɛ pasɩnɩ-wɛ.—1 Yoh. 3:17, 18.

11. (a) Alɩwaatʋ ndʋ ɖɩwɩlɩɣ lalaa sɔɔlɩm yɔ, ɖoŋ ɖoŋ lɛ ɛzɩma pɩlakɩ-wɛ? (b) Ɛzɩ Aduwa 19:17 yɔɔdʋʋ yɔ, alɩwaatʋ ndʋ ɖɩwɩlɩɣ lalaa sɔɔlɩm yɔ suwe Yehowa maɣzɩɣ?

¹¹ Alɩwaatʋ ndʋ ɖɩwɩlɩɣ lalaa sɔɔlɩm nɛ ɖɩlakɩ-wɛ camɩyɛ lakasɩ yɔ, ɖoŋ ɖoŋ lɛ panaɣ pana wena ɖɩwɛɛ nɛ ɖɩñakɩ se ɖɩmaɣzɩnɩ Yehowa maɣzɩm nɛ ɛ-lakasɩ yɔ. Nɛ pɩtɩla yɔ pɛwɛɣnɩ ɛsɩmɩyɛ ɖa-camɩyɛ lakasɩ nzɩ sɩ-yɔɔ nɛ ɖɩɩtɩlɩɣ se pɛwɛnɩ ɛsɩmɩyɛ mbʋ. Khanh weyi ɛ-tɔm ɖɩyɔɔdaa nɛ pɩɖɛɛ yɔ, ɛtɔzʋʋ mba paasɩnɩ-ɩ yɔ pɔ-yɔɔ nɛ taa leleŋ. Ɛyɔɔdaa se: «Koobiya halɩñɩma mba payaɣaɣ-m se ma nɛ wɛ ɖɩlɩɩ tɔm susuu yɔ mɛwɛnɩ ɛsɩmɩyɛ siŋŋ pɔ-yɔɔ. Pɔkɔŋaɣ nɛ pakpakɩɣ-m mɛn-tɛ, payaɣ-m se ma nɛ wɛ ɖɩtɔɔ tɔɔnaɣ, nɛ pakpakɩɣ-m nɛ papɩsɩɣnɩ mɛn-tɛ. Lɛɛlɛɛyɔ lɛ, menɖiɣzinaa se pɩ-labʋ pɔzaɣ-wɛ pana ñaɣʋ siŋŋ. Nɛ palakaɣ mbʋ nɛ sɔɔlɩm.» Toovenim taa lɛ, pɩtɩkɛ ɛyaa tɩŋa kaɣnɩ hiɣu waɖɛ se pɛhɛyɩ-ɖʋ camɩyɛ lakasɩ nzɩ ɖɩlakɩ-wɛ yɔ sɩ-yɔɔ. Khanh yɔɔdɩ mba pasɩnɩ-ɩ yɔ pɔ-tɔm nɛ ɛtɔ se: «Me-liu kaawɛɛ se mɛhɛyɩ-wɛ camɩyɛ lakasɩ sakɩyɛ nzɩ palabɩ-m yɔ sɩ-yɔɔ, ɛlɛ maasɩŋ ɖenɖe pa-tɩŋa pɛwɛ lɛɛlɛɛyɔ yɔ. Paa mbʋ yɔ Yehowa ñasɩma, nɛ mantɩmɩɣ se ɛhɛyɩ-wɛ pi-lone taa.» Khanh wɛnɩ toovenim. Yehowa naɣ camɩyɛ lakasɩ nzɩ payɩ ɖɩlakɩ lalaa yɔ, halɩ paa sɩwɛ ññɩɩ yɔ. Ɛkpakɩɣ camɩyɛ lakasɩ nzɩ se sɩkɛ kɩlaʋ ŋgʋ kɩmʋ ñɩm ɛ-ɛsɩndaa yɔ nɛ  ɛmaɣzɩɣ se nabʋyʋ ɖɩkɩndɩ-ɩ nɛ ɛkaɣ-ɖʋ hɛyʋʋ pɩ-yɔɔ.—Kalɩ Aduwa 19:17.

12. Ɛzɩma koobiya abalɩñɩma pɩzɩɣ nɛ pawɩlɩ se pɔsɔɔlɩ ɛgbɛyɛ? (Cɔnɩ ɖɔɖɔ kɩlɛmɩŋ.)

¹² Ye ŋkɛ koobu abalɩñɩnʋ yɔ, ɛzɩma ŋpɩzɩɣ nɛ ŋwɩlɩ lalaa sɔɔlɩm nɛ ŋla nabʋyʋ nɛ ŋsɩnɩ-wɛ? Payaɣ koobu abalɩñɩnʋ nɔɔyʋ se Jordan; ɛpɔzɩ ɛgbɛyɛ taa ɛzʋtʋyʋ nɔɔyʋ se ɛna mbʋ ɛpɩzɩɣ ɛla nɛ ɛsɩnɩ ɛgbɛyɛ nɛ pɩkɩlɩ yɔ. Ɛzʋtʋyʋ ɛnʋ ɛsamɩ-ɩ hɔɔlɩŋ weyi ɩ-taa ɛtɛm wobinuu ɛsɩndaa yɔ ɩ-yɔɔ; nɛ pʋwayɩ lɛ, ɛtasɩ-ɩ lɔŋ mbʋ ɛpɩzɩɣ nɛ ɛtasɩ labʋ nɛ pɩkɩlɩ yɔ pɩ-yɔɔ. Lɔŋ weyi ɛtasɩ-ɩ yɔ ɩ-taa nɩɩyɩ yɔ: pɩwɛɛ se ɛtalɩɣ Kewiyaɣ kpaaŋ taa lɔŋ nɛ ɛsɛɣ lalaa, ecosuu tɔm kediɣzisi taa, ɛ nɛ ɛ-tɔm susuu ɛgbɛyɛ taa mba pɛkpɛndɩɣ nɛ posusuu tɔm ɖoŋ ɖoŋ, nɛ ɛmaɣzɩ nɛ ɛna mbʋ ɖeyi ɖeyi ɛpɩzɩɣ ɛla nɛ ɛsɩnɩ lalaa yɔ. Jordan ɖɔm lɔŋ tasʋʋ mbʋ pɩ-yɔɔ lɛ, pɩtɩkɛ lɛɣtʋ kɩfatʋ ɖeke ɛkpɛlɩkaa ɛlɛ ɛkpɛlɩkɩ ɖɔɖɔ ɛzɩma ɛsɔɔlɩ e-koobiya nɛ pɩkɩlɩ yɔ. Jordan kpɛlɩkaa se pʋcɔ nɛ koobu abalɩñɩnʋ nɔɔyʋ pɩsɩ ɛgbɛyɛ taa tʋmlaɖʋ lɛ, pɩwɛɛ se ɛpaɣzɩ ɛyaa lalaa sɩnʋʋ, nɛ pahaɣ-ɩ waɖɛ nɖɩ lɛ pɩwɛɛ se ewolo pɩ-yɔɔ nɛ ɛsɩɣnɩ-wɛ.—1 Tim. 3:8-10, 13.

13. Ɛzɩma sɔɔlɩm seɣti Christian nɛ ɛñaɣ pana nɛ ɛmʋna nɛ ɛɖaɣnɩ pɩsʋʋ ɛzʋtʋyʋ?

¹³ Nɛ ye ŋŋkɛ ɛgbɛyɛ taa tʋmlaɖʋ yaa ɛgbɛyɛ taa ɛzʋtʋyʋ nɛ pɩɖɛɛ yɔ, ɛbɛ pɩpɔzʋʋ se ŋla? Yehowa ɛɛsɔʋ tʋmɩyɛ nɖɩ ŋlaba nɛ pɩɖɛɛ nɛ sɔɔlɩm mbʋ piiseɣti-ŋ nɛ ŋlabɩ-ɖɩ yɔ pɩ-yɔɔ. (1 Kɔr. 15:58) Ɛnaɣ ɖɔɖɔ sɔɔlɩm mbʋ ŋɖiɣni lɩzʋʋ nɛ ŋwɩlɩɣ yɔ. Payaɣ koobu abalɩñɩnʋ nɔɔyʋ se Christian; alɩwaatʋ ndʋ pamʋ ɛ-cɔlɔ waɖɛ se ɛtaatasɩ kɛʋ ɛzʋtʋyʋ yɔ, pitibi-i yɔɔɔ. Paa mbʋ yɔ, ɛyɔɔdaa se: «Maakpaɣ lɩmaɣzɩyɛ se malakɩ mbʋ payɩ manpɩzɩɣ yɔ nɛ mɛnsɛɣ Yehowa nɛ sɔɔlɩm paa mɛwɛnɩ wala naayɛ yaa mɛnfɛyɩna yɔ.» Pʋwayɩ lɛ, paha-ɩ waɖɛ nɛ ɛɖaɣnɩ kɛʋ ɛzʋtʋyʋ. Christian yɔɔdaa se: «Sɔɔndʋ  kpaɣaɣ-m pazɩ se manɖaɣnɩ kɛʋ ɛzʋtʋyʋ. Ɛlɛ meheyi man-tɩ se ye Yehowa ɛna man-pʋtɔdɩyɛ nɛ ɛha-m waɖɛ se manɖaɣnɩ labʋ ɛzʋtʋyʋ tʋmɩyɛ yɔ malakɩ-ɖɩ, mbʋ pʋyɔɔ yɔ mɔnsɔɔlɩ-ɩ nɛ mɔnsɔɔlɩ mon-koobiya.»

14. Tɔm ndʋ koobu halɩñɩnʋ Elena yɔɔdaa yɔ ɛbɛ tɩkpɛlɩkɩɣ-ŋ?

¹⁴ Yehowa sɛyaa wɩlɩɣ ɖɔɖɔ sɔɔlɩm pɔ-cɔlɔ ñɩma. (Mat. 22:37-39) Kɩɖaʋ nakʋyʋ yɔ: Payaɣ koobu halɩñɩnʋ nɔɔyʋ se Elena nɛ ɛwɛ Jeyɔɔrjii ɛjaɖɛ taa. Ɛyɔɔdaa se: «Kajalaɣ taa lɛ, sɔɔlɩm mbʋ mɛwɛnɩ Yehowa yɔɔ yɔ pi-ɖeke piseɣtaɣni-m nɛ monsusuu tɔm. Ɛlɛ sɔɔlɩm mbʋ mɛwɛnɩ man-Caa weyi ɛwɛ ɛsɔdaa yɔ ɛ-yɔɔ yɔ pɩwɛɛ nɛ pɩpaɣlɩɣ lɛ, sɔɔlɩm mbʋ mɛwɛnɩ ɛyaa yɔɔ yɔ pɩwɛɛ nɛ pɩpaɣlɩɣ ɖɔɖɔ. Maañaɣ pana se mantɩlɩ kala wena pakatɩɣ yɔ nɛ tɔm ñʋŋ weyi ɩpɩzɩɣ nɛ itukuni pa-laŋa yɔ. Mɛwɛɛ nɛ mamaɣzɩɣ pɔ-yɔɔ mbʋ nɛ pɩkɩlɩɣ lɛ, mɔnsɔɔlɩ se mansɩnɩ-wɛ nɛ pɩkɩlɩ.»—Roma 10:13-15.

15-16. Ɛzɩ ɖɩnaʋ kɩlɛmɩŋ yɔɔ yɔ, alɩwaatʋ ndʋ ɖɩwɩlɩɣ lalaa sɔɔlɩm yɔ, wazasɩ nzɩ pɩkɔŋna?

¹⁵ Alɩwaatʋ ndʋ ɖɩwɩlɩɣ lalaa sɔɔlɩm yɔ, pɩtɩkɛ pe-ɖeke pɩwazɩɣ. COVID-19 kʋdɔŋ paɣzaa lɛ, koobu Paolo nɛ ɛ-halʋ pasɩnɩ koobiya halɩñɩma akpadɩyaa sakɩyɛ nɛ patɩlɩ ɛzɩma palabɩnɩ elɛkɩtroniiki wondu tʋmɩyɛ nɛ posusi tɔm yɔ. Pɩɩwɛ koobu halɩñɩnʋ nɔɔyʋ kaɖɛ kiɖe tɛɛ se ɛlabɩnɩ tʋmɩyɛ ɛ-tɛ elɛkɩtroniiki wonuu, ɛlɛ pʋwayɩ lɛ ɛpɩzaa nɛ ɛlabɩnɩ-kʋ tʋmɩyɛ camɩyɛ. Ɛpɩzaa nɛ ɛlabɩnɩ-kʋ tʋmɩyɛ nɛ  ɛyaa ɛ-hɔʋ taa mba se pɔkɔɔ Yesu sɩm yɔɔ tɔzʋʋ sɔnzɩ taa. Pa-taa 60 tɩŋnɩ vidéoconférence yɔɔ nɛ pɔkɔɔ kediɣzaɣ ŋga ka-taa! Pana wena Paolo nɛ ɛ-halʋ pañaɣaa yɔ awazɩ koobu ɛnʋ nɛ ɛ-hɔʋ taa mba. Pʋwayɩ lɛ, koobu halɩñɩnʋ ɛnʋ ɛma Paolo se: «Ɩlabaɣ lɛ mbʋ pʋyɔɔ yɔ ɩfalɩsɩ ɖa mba ɖɩkɛ akpadɩyaa yɔ. Maakaɣ sɔʋ ɛzɩma Yehowa maɣzɩɣ ɖɔ-yɔɔ nɛ ɛzɩma ɩñaɣ pana siŋŋ nɛ ɩsɩnɩ-ɖʋ yɔ pɩ-yɔɔ kpa.»

¹⁶ Kɩɖaŋ ɛzɩ kʋnɛ yɔ kpɛlɩkɩ Paolo lɔŋ kɩbaŋ nɩɩyɩ. Pɩtɔzɩ-ɩ se sɔɔlɩm tɔm cɛyaa nɛ pɩkɩlɩ sɩmtʋ nɛ hɔɔlɩŋ weyi ɩ-taa ɛyʋ wɛ niye yɔ. Ɛyɔɔdaa se: «Maakɛ egeetiye yɔɔ cɔnɩyʋ. Sɔnɔ, menɖiɣzinaa se paa koobiya ɩsɔ samaɣ taa tɔm ndʋ maayɔɔdaa yɔ tɩ-yɔɔ yɔ, peɖiɣni tɔzʋʋ mbʋ malabɩ ɖeyi ɖeyi nɛ mansɩnɩ-wɛ yɔ pɩ-yɔɔ.»

17. Alɩwaatʋ ndʋ ɖɩwɩlɩɣ lalaa sɔɔlɩm yɔ anɩ ɖɔɖɔ pɩwazɩɣ?

¹⁷ Alɩwaatʋ ndʋ ɖɩwɩlɩɣ lalaa sɔɔlɩm yɔ, ɖa-maɣmaɣ ɖihikiɣ wazasɩ nzɩ ɖɩtaaɖʋna yɔ. Jonathan wɛ Nuvɛɛlɩ Zelandɩ ɛjaɖɛ taa; ɛ-kɩɖaʋ wɩlɩɣ se tɔm ndʋ tɩkɛ toovenim. Mazaɣ nakɛyɛ wɩsɩ taa, ɛna koobu abalɩñɩnʋ nʋmɔʋ lɩzɩyʋ nɔɔyʋ, ɛwɛɛ nɛ esusuu tɔm habɩyɛ nɔɔ, nɛ soŋaɣ kaawɛɛ kpem. Jonathan kpaɣ lɩmaɣzɩyɛ se ɛ nɛ koobu ɛnʋ posusuu tɔm mazasɩ wɩsɩ taa. Alɩwaatʋ ndʋ lɛ, etaaɖiɣzini ɛzɩma ɛ-camɩyɛ lakasɩ nzɩ sɩkaɣaɣ ɛ-maɣmaɣ wazʋʋ siŋŋ yɔ. Jonathan yɔɔdaa se: «Alɩwaatʋ ndʋ tɩ-taa lɛ, tɔm susuu taahaɣ-m taa leleŋ. Ɛlɛ mana ɛzɩma nʋmɔʋ lɩzɩyʋ ɛnʋ ɛwɩlɩɣ tɔm nɛ ɛzɩma ɛ-tɔm susuu lʋlʋʋ pee yɔ lɛ, piseɣti-m nɛ mɔnsɔɔlɩ tɔm susuu siŋŋ. Koobu abalɩñɩnʋ ɛnʋ, ɛpɩsɩ man-taabalʋ kɩbanʋ nɛ ɛsɩnɩ-m nɛ manpɩɩ fezuu taa, mehiɣ taa leleŋ tɔm susuu taa, nɛ mɔñɔtɩnɩ Yehowa nɛ pɩkɩlɩ.»

18. Ɛbɛ Yehowa sɔɔlaa se ɖɩla?

¹⁸ Yehowa sɔɔlaa se ɛsɩnɩ ɖa-tɩŋa nɛ sɔɔlɩm mbʋ ɖɩwɛnɩ ɛ-yɔɔ nɛ ɛyaa lalaa yɔɔ yɔ pɩwɛɛ nɛ pɩpaɣlɩɣ. Ɛzɩ ɖɩkpɛlɩkʋʋ yɔ, ye ɖɩkalɩɣ ɛ-Tɔm nɛ ɖɩmaɣzɩɣ tɩ-yɔɔ nɛ ye ɖɩtɩmɩɣnɩ-ɩ ɖoŋ ɖoŋ yɔ ɖɩpɩzɩɣ nɛ ɖɩcɛyɩsɩ sɔɔlɩm mbʋ ɖɩwɛnɩ ɛ-yɔɔ yɔ. Ye ɖɩtɩŋɩɣnɩ nʋmɔŋ nɩɩyɩ yɔɔ ɖeyi ɖeyi nɛ ɖɩsɩɣnɩ ɖo-koobiya yɔ, pɩpɩzɩɣ piyele nɛ sɔɔlɩm mbʋ ɖɩwɛnɩ pɔ-yɔɔ yɔ pɩpaɣlɩ nɛ pɩkɩlɩ. Ðɔ-sɔɔlɩm wɛɣ nɛ pɩpaɣlɩɣ lɛ, ɖɩkaɣ ñɔtɩnʋʋ Yehowa nɛ ɖo-koobiya Krɩstʋ mba nɛ pɩkɩlɩ. Nɛ taabalɩyɛ kaɣ wɛʋ ɖa nɛ wɛ ɖɛ-hɛkʋ taa tam!