ÐA-TƖŊA ɖitisiɣ se Yehowa wɛɛ nɛ eɖiyiɣ ɛ-samaɣ nɛ ɛcɔŋnɩ kɔ-yɔɔ fezuu taa “kɛdɛzaɣ kɩyakɩŋ” ɩnɛ ɩ-taa. (2 Tim. 3:1) Ɛlɛ, pɩpɔzʋʋ se ɖa-tɩŋa ɖɩña Yehowa. Ðɩpɩzɩɣ nɛ ɖɩkpaɣ wɛtʋ ndʋ tɩ-taa ɖɩwɛɛ yɔ nɛ ɖɩmaɣzɩnɩ wɛtʋ ndʋ tɩ-taa Izrayɛɛlɩ mba kaawɛ kañɩmbusuu taa yɔ. Pɩpɔzaɣ se sɩña alɩwaatʋ ndʋ sɩnɩɣ aganda hʋlʋʋ yɔ.

Yehowa kaayeba nɛ Moyizi lu ñɩɣlɩm ɖɔfɩɩ aganda naalɛ se patɩŋnɩ a-yɔɔ nɛ ‘payaanɩ samaɣ nɛ peheyi-kɛ se kakʋyɩ maalika taa.’ (Kɩg. 10:2) Pɩpɔzaɣ se cɔjɔnaa aganda hʋlʋʋ ɛwɛɛ ndɩ ndɩ nɛ pɩwɩlɩ samaɣ mbʋ pɩpɔzʋʋ se kala yɔ. (Kɩg. 10:3-8) Sɔnɔ, Ɛsɔ tɩŋɩɣnɩ nʋmɔŋ ndɩ ndɩ yɔɔ nɛ ɛwɩlɩɣ ɛ-samaɣ mbʋ pɩwɛɛ se kala yɔ. Iyele nɛ ɖɩtazɩ nʋmɔŋ ɛnɩ ɩ-taa naadozo taa; ɩtɔzʋʋ-ɖʋ caanaʋ taa Izrayɛɛlɩ taa aganda hʋlʋʋ yɔɔ. Nʋmɔŋ ɛnɩ ɩ-naadozo yɔ: Alɩwaatʋ ndʋ payaɣ-ɖʋ se ɖikpeɣli yɔ, alɩwaatʋ ndʋ pafalɩsɩɣ ɛgbɛyɛ taa ɛzʋtʋyaa yɔ, nɛ alɩwaatʋ ndʋ palakɩ lɛɣzɩtʋ ndʋ titukuuni agbaa kpeekpe yɔ.

Alɩwaatʋ ndʋ Yehowa ñɩnaɣ se “samaɣ kpeekpe” ekpeɣli kediɣzaɣ kizinziku nɔnɔɔ ŋga kɛwɛnɩ wɩsɩ ɖɩlɩyɛ taa yɔ kɔ-cɔlɔ yɔ, cɔjɔnaa hʋlaɣ aganda ana a-naalɛ. (Kɩg. 10:3) Cejewe kpeekpe wena aacɔ kediɣzaɣ kizinziku nɛ ata nɛ aawɛ kɩ-hɔɔlɩŋ naanza yɔɔ yɔ, anɩɣaɣ aganda hʋlʋʋ mbʋ kpayɩ kpayɩ. Mba paañɔtɩnɩ kediɣzaɣ kizinziku nɔnɔɔ yɔ, papɩzaɣ se pakpaɣ cɛcɛsɩ pazɩ yem nɛ pɔɖɔ nɛ patalɩ nɔnɔɔ ŋga kɔ-cɔlɔ. Lalaa ñaawɛ poliŋ; pʋyɔɔ lɛ, pʋcɔ nɛ pɔkɔɔ lɛ, pɩtɩla pɩpɔzaɣ-wɛ alɩwaatʋ nɛ pana ñaɣʋ nɛ pɩkpaɖɩ. Paa le Izrayɛɛlɩ piya kaawɛ yɔ, Yehowa ñɩnaɣ se sɩ-tɩŋa sikpeɣli nɛ siwelisi lɔŋ tasʋʋ.

Sɔnɔ, ɖiikpeɣliɣ kediɣzaɣ kizinziku nakʋyʋ cɔlɔ, ɛlɛ payaɣ-ɖʋ se ɖiwolo Yehowa sɛyaa kigbeɣliŋ taa. Pɩpɩzɩɣ nɛ pɩkɛ kigbeɣliŋ sɔsɔŋ, yaa ŋgee kigbeɣliŋ lɛɛŋ weyi ɩ-taa pawɩlɩɣ-ɖʋ tɔm kɩcɛyɩtʋ nɛ peheyiɣ-ɖʋ mbʋ pɩwɛɛ se ɖɩla yɔ. Wɩlɩtʋ kʋɖʋmtʋ Yehowa samaɣ mʋʋ ajɛɛ wena payɩ awɛ tɛtʋ kpeekpe yɔɔ yɔ a-taa. Ye mbʋ, mba payɩ petisiɣ nɛ powoki kigbeɣliŋ ɛnɩ yɔ, pɛwɛ samaɣ sɔsɔɔ ŋga kɛwɛ taa leleŋ taa yɔ ka-taa. Nʋmɔʋ ŋgʋ nabɛyɛ ɖɔŋ yɔ kɩwɛ poliŋ nɛ pɩcɛzɩ lalaa. Ɛlɛ mba payɩ powoki yɔ, petisiɣ se pɩɩcɛyaa se pañaɣ pana.

Ɛzɩ ɖʋtʋ ndʋ tɩwazɩɣ ɖɔɖɔ ɛyaa mba pɛwɛ poliŋ siŋŋ nɛ kigbeɣliŋ sɔsɔŋ lona ana yɔ? Lɛɣtʋ ñɩnʋʋ ɖɛnɩ ɛsɩndaa nɛ pʋyɔɔ lɛ, ɖʋtʋ ndʋ tɩpɩzɩɣ nɛ tɩwazɩ ɛyaa mba pa-taa sakɩyɛ, nɛ halɩ pɩlabɩ-wɛ ɛzɩ pɛwɛ kigbeɣliŋ sɔsɔŋ ɛnɩ ɩ-taa yɔ. Kɩɖaʋ nakʋyʋ yɔ: Nɔɔɖɛyaa Ɛgbɛyɛ tiyiyu nɔɔyʋ kilimi Peenɛɛ Ɛgbɛyɛ piliŋa yɔɔ alɩwaatʋ natʋyʋ lɛ, kaka yele nɛ ɖʋtʋ ndʋ tɩtalɩ mba pɛwɛ Nijɛɛrɩ ɛjaɖɛ taa tɛtʋ cikpetu ndʋ tɩwɛ Sahara kañɩmbusuu taa nɛ payaɣ-tʋ se Arlit yɔ tɩ-taa. Ɛyaa mba paakpeɣlaa yɔ pɛkpɛndɩ 21: Koobiya abalɩñɩma 3, koobiya halɩñɩma 2, nɛ abalaa  8 nɛ halaa 8 mba paya-wɛ yɔ. Paa paawɛ poliŋ lone nɖɩ ɖɩ-taa yɔ, pɩlakaɣ-wɛ ɛzɩ pa nɛ ɛyaa 44131 pɛkpɛndɩna nɛ pekpeɣli yɔ. Koobu abalɩñɩnʋ nɔɔyʋ mawa se: “Ðɩsɛɣ-mɩ nɛ ɖa-laŋɩyɛ siŋŋ ɛzɩma iyeba nɛ ɖʋtʋ tʋnɛ tɩtalɩ-ɖʋ cɩnɛ yɔ pʋyɔɔ. Pɩɖaɣnɩ-ɖʋ wɩlʋʋ se ɩsɔɔlɩ-ɖʋ siŋŋ.”

Alɩwaatʋ ndʋ Izrayɛɛlɩ cɔjɔ nɔɔyʋ hʋlʋʋ ɛgandɩyɛ kʋɖʋmɖɩyɛ yɔ, ‘ñʋndɩnaa nɛ Izrayɛɛlɩ taa sɔsaa’ ɖeke pɩɩwɛɛ se pɔkɔɔ kediɣzaɣ kizinziku cɔlɔ. (Kɩg. 10:4) Peeɖe powokaɣ nɛ Moyizi heyiɣ-wɛ tɔm nɛ ɛfalɩsɩɣ-wɛ. Pɩsɩɣanɩ-wɛ se pala tʋma wena paɖʋ-wɛ pe-cejewe taa yɔ camɩyɛ. Ye ŋŋkɛ sɔsaa mba pa-taa nɔɔyʋ yɔ, pɩtʋʋ fɛyɩ se ŋŋlabɩ mbʋ payɩ ŋpɩzɩɣ yɔ se ŋwolo peeɖe nɛ ŋmʋ falɩsʋʋ mbʋ.

Sɔnɔ, ɛgbɛyɛ taa ɛzʋtʋyaa tɩkɛ sɔsaa, nɛ Ɛsɔ ewiɖe nɖɩ ɖɩ-yɔɔ pɔcɔŋna yɔ paañazɩɣ-ɖɩ. (1 Pɩy. 5:1-3) Ɛlɛ pɩtʋʋ fɛyɩ se palakɩ mbʋ papɩzɩɣ yɔ se pɔcɔnɩ ewiɖe yɔɔ. Pʋyɔɔ lɛ, alɩwaatʋ ndʋ payaɣ-wɛ se pafalɩsɩ-wɛ nɛ pɩkpaɖɩ yɔ, ɛzɩ Kewiyaɣ Ɛsɔ Sɛtʋ Sukuli taa mbʋ yɔ, petisiɣ faaa nɛ powoki. Falɩsʋʋ mbʋ pɩ-taa ɛzʋtʋyaa kpɛlɩkɩɣ ɛzɩma pɔcɔnɩ ɛgbɛyɛ taa tɔm ndɩ ndɩ ɖeɖe camɩyɛ nɛ pɩkpaɖɩ yɔ. Pɩtɩŋnɩ falɩsʋʋ mbʋ pɩ-yɔɔ lɛ, ɛzʋtʋyaa nɛ mba pɔ-yɔɔ pɔcɔŋnɩ ɛgbɛyɛ taa yɔ, papɩzɩɣ nɛ pɔñɔtɩnɩ Yehowa nɛ pɩkpaɖɩ. Paa wiɖiyi ŋtiwolo sukulinaa mba pa-taa nakʋyʋ yɔ, pɩtʋʋ fɛyɩ se ŋwɛɛ nɛ ŋhikiɣ wazasɩ mba powobi-kʋ yɔ pɔ-cɔlɔ.

Nabʋyʋ taa, Izrayɛɛlɩ cɔjɔnaa hʋlaɣ ɛgandɩyɛ nɛ pɩwɛɣ ŋgee. Piyekaɣ nɛ panɩɣ pɩ-taa se Yehowa ñɩnɩɣ se samaɣ kpeekpe ɛlɛɣzɩ lone. (Kɩg. 10:5, 6) Alɩwaatʋ ndʋ samaɣ lɛɣzaɣ lone yɔ, ka-taa ɛyaa lakaɣ mbʋ nɔɔ kʋɖʋmaɣ taa siŋŋ, ɛlɛ pɩpɔzaɣ se paa weyi ɛla tʋmɩyɛ siŋŋ. Nabʋyʋ taa, pɩtɩla Izrayɛɛlɩ piya nasɩyɩ taasɔɔlɩ se sɩkʋyɩ nɛ siwolo lone lɛɛɖɛ taa. Ɛbɛ yɔɔ?

Pɩtɩla, nabɛyɛ maɣzaɣ se pakɩlɩɣ-wɛ pɔzʋʋ ɖoŋ ɖoŋ se pɛlɛɣzɩ lona, nɛ pɩkɩlaɣ-wɛ tuduu ɖɔɖɔ. ‘Nabʋyʋ taa, mɩndʋ cakɩ kpaɣnɩ ɖanaɣ nɛ tɛʋ fe tanaŋ tɛɛ.’ Alɩwaatʋ lɛɛtʋ taa lɛ, tɩcakɩ “kɩyakɩŋ naalɛ yaa fenaɣ, yaa pɩɖɔɔ pɩkɩlɩ mbʋ” pʋcɔ nɛ pɛlɛɣzɩ lone. (Kɩg. 9:21, 22) Ɛlɛ toovenim taa lɛ, tam ɛzɩma samaɣ lɛɣzɩ lone? Kɩgalʋʋ takayaɣ ñʋʋ 33 yɔɔdʋʋ se Izrayɛɛlɩ mba lɛɣzɩ lona ɛzɩ tam 40 mbʋ yɔ.

Nabʋyʋ taa, Izrayɛɛlɩ mba cakaɣ lona wena a-taa wɛ kɩlɛmʋʋ yɔ. Pɩtʋʋ fɛyɩ se lona ana aakɛ lona kɩbana ‘sɔɔndʋ kañɩmbusuu sɔsɔʋ’ ŋgʋ kɩ-taa. (Wp. 1:19) Pʋyɔɔ lɛ, pɩpɩzaɣ se pɩtakɩ-wɛ nɛ pamaɣzɩ se lone nɖɩ ɖɩ-taa pakʋyʋʋ wobu yɔ, ɖɩɩwɛɣ ɖeu nɛ ɖɩtalɩ nɖɩ ɖɩ-taa pɛwɛɛ yɔ.

Alɩwaatʋ ndʋ samaɣ paɣzɩɣ kʋyʋʋ se kɛɖɛɛ yɔ, pɩwɛɛ se cejewe naayɛ ɩɖʋ suuɖu nɛ aɖaŋ se pɩtalɩnɩ-yɛ pʋcɔ nɛ akʋyɩ. Pe-kpeekpe panɩɣnɩ ɛgandɩyɛ hʋlʋʋ mbʋ pɩwɛ ŋgee yɔ, ɛlɛ pɩtɩkɛ pa-tɩŋa papɩzɩɣna se pakʋyɩ alɩwaatʋ kʋɖʋmtʋ yɔɔ. Ŋgee ɛgandɩyɛ hʋlʋʋ mbʋ, pɩwɩlɩɣ se pɩpɔzʋʋ se cejewe wena awɛnɩ wɩsɩ ɖɩlɩyɛ taa kiŋ yɔ aɖɛɛ; cejewe ana lɛ Yuuda, Isakaarɩ nɛ Zebulɔɔnɩ cejewe. (Kɩg. 2:3-7; 10:5, 6) Aɖɛɣ nɛ pɩtɛ lɛ, cɔjɔnaa ɖaɣnɩ hʋlʋʋ ɛgandɩyɛ nabʋlɛ ɖeɖe nɛ pɩwɩlɩ se cejewe naadozo wena awɛnɩ hadɛ kiŋ yɔ, alɛ ɩkʋyɩ. Cɔjɔnaa wokaɣ pɩ-yɔɔ nɛ palakɩ mbʋ pɩkɔɔ pɩsɩɩnɩ alɩwaatʋ ndʋ samaɣ kpeekpe kʋyaa nɛ kɛɖɛɛ yɔ.

Pɩtɩla, ɛgbɛyɛ kaalabɩ lɛɣzɩtʋ ndɩ ndɩ nɛ pɩwɛ-ŋ kaɖɛ se ŋtisi tɩ-yɔɔ. Ɛbɛ yɔɔ? Pɩtɩla, ŋmaɣzaɣ se lɛɣzɩtʋ kaakɩlɩ ɖɔʋ. Yaa pɩtɩla, ŋŋsɔɔlɩ ɛzɩma palakaɣ nabʋyʋ ɖooo lɛ yɔ nɛ pʋyɔɔ lɛ, ŋtaasɔɔlɩ se pala lɛɣzɩtʋ. Paa pɩtɩɩkɛ suwe yɔ, pʋtɔma pɩɩtakɩ suuɖu ŋgʋ ŋŋwɛna yɔ, nɛ pɩkpaɣ alɩwaatʋ pʋcɔ nɛ lɛɣzɩtʋ ndʋ tɩmalɩnɩ-ŋ. Ɛlɛ, ye ɖɩñaɣ pana nɛ ɖɩla lɛɣzɩtʋ mbʋ pʋyɔɔ yɔ ɖɩnawa se pɩpɔzʋʋ se ɖɩla mbʋ yɔ, pɩtʋʋ fɛyɩ se ɖɩkaɣ naʋ se Ɛsɔ wɛɛ nɛ ɛwazɩɣ-ɖʋ.

Moyizi alɩwaatʋ taa, Yehowa kaaɖiyi abalaa, halaa nɛ piya miiliyɔɔwaa sakɩyɛ kañɩmbusuu taa. Ye Yehowa ɛtaacɔnɩ pɔ-yɔɔ nɛ eɖiyi-wɛ yɔ, pataahiɣ ñʋʋ yabʋ. Sɔnɔ, Yehowa wɛɛ nɛ eɖiyiɣ-ɖʋ kɛdɛzaɣ kɩyakɩŋ kɩdɛkɛdɩŋ ɩnɛ ɩ-taa. Ɛsɩɣnɩ-ɖʋ se ɖɩñɔtɩnɩ-ɩ nɛ ɖiyele nɛ ɖe-tisuu wɛɛ ɖoŋ! Pʋyɔɔ lɛ, ɖɩsɔɔlaa se ɖɩla mbʋ payɩ ɖɩpɩzɩɣ yɔ nɛ ɖɩña ɛzɩ Izrayɛɛlɩ mba siɣsiɣ ñɩma mba paañam aganda hʋlʋʋ ndɩ ndɩ yɔ!