TƆM ÑƲƲ ŊGƲ ÐƖKPƐLƖKƖƔ YƆ 23
“Ña-hɩɖɛ yɔɔ ɛñalɩ”
“[Yehowa], ña-hɩɖɛ wɛ tam.”—KEƔA 134:13.
HENDU 10 Ɩɖɛyɩ Yehowa, ɖɛ-Ɛsɔ!
LƖMAƔZA SƆSƆNA *
1-2. Tɔm ndʋ cɛyɩ Yehowa Aseɣɖe Tɩnaa ɛsɩndaa siŋŋ?
TƆM kɩcɛyɩtʋ natʋyʋ tukuuni-ɖʋ sɔnɔ; ndʋ lɛ Ɛsɔ kewiyitu kɩkɩlɩtʋ tɔɔʋ nɛ ɛ-hɩɖɛ yɔɔ lʋbʋ. Ða Yehowa Aseɣɖe Tɩnaa lɛ, ɖɩsɔɔlɩ labʋ kɛdaɣ tɔm kɩcɛyɩtʋ ndʋ tɩ-yɔɔ. Ɛlɛ, ɛzɩ nɔɔ kʋɖʋmaɣ nakɛyɛ fɛyɩ Ɛsɔ kewiyitu kɩkɩlɩtʋ tɔɔʋ nɛ ɛ-hɩɖɛ yɔɔ ñalʋʋ pɛ-hɛkʋ taa yaa we? Aayɩ nɔɔ kʋɖʋmaɣ nakɛyɛ wɛɛ.
2 Ða-tɩŋa payɩ ɖɩkpɛlɩkaa nɛ ɖɩtɩlɩ se pɩwɛɛ se pañalɩ Ɛsɔ hɩɖɛ yɔɔ. Ðɩkpɛlɩkaa ɖɔɖɔ se pɩpɔzʋʋ se ɖɩwɩlɩ se Yehowa kewiyitu tɔɔʋ kpaɖɩnɩ ɖeu. Ye mbʋ, tɔm ndʋ tɩ-naalɛ tɩ-tɔm cɛyaa.
3. Tɔm ndʋ hɩɖɛ Yehowa tukuuna?
3 Toovenim taa lɛ, hɩɖɛ Yehowa tukuuni ɖɛ-Ɛsɔ yɔɔ tɔm tɩŋa payɩ, pɩkpɛndɩnɩ ɛzɩma ɛtɔkɩ kewiyitu yɔ. Ye mbʋ, ye ɖɩyɔɔdaa se Yehowa hɩɖɛ yɔɔ ñalʋʋ kɛnɩ mbʋ pɩ-tɔm kɩlɩ cɛyʋʋ yɔ, pɩwɩlɩɣ se ɖɩwɛɛ nɛ ɖɩyɔɔdʋʋ ɖɔɖɔ se pɩwɛɛ se pawɩlɩ se Yehowa kewiyitu tɔɔʋ kpaɖɩnɩ ɖeu. Yehowa hɩɖɛ labɩ nɔɔ kʋɖʋmaɣ nɛ ɛzɩma ɛtɔkɩ Kewiyitu kɩkɩlɩtʋ yɔ.—Kalɩ aɖakaɣ “ Tɔm kɩcɛyɩtʋ natʋyʋ hɔɔlɩŋ ndɩ ndɩ.”
4. (a) Suwe Keɣa 134:13 yɔɔdʋʋ Ɛsɔ hɩɖɛ yɔɔ? (b) Nɛ tɔm pɔzʋʋ mbʋ yɔɔ ɖɩkaɣ cosuu tɔm ñʋʋ kʋnɛ kɩ-taa?
4 Hɩɖɛ Yehowa wɛ ŋgee. (Kalɩ Keɣa 134:13.) Ɛbɛ yɔɔ Ɛsɔ hɩɖɛ tɔm cɛyɩ siŋŋ mbʋ? Ɛzɩma pacalɩ yɔɔdʋʋ cɛtɩm tɔm ɖɩ-yɔɔ? Ɛzɩma Ɛsɔ ñalɩɣ ɖɩ-yɔɔ? Nɛ ɛzɩma ɖɩpɩzɩɣ ɖɩsɩnɩ-ɩ nɛ ɛlʋ ɛ-hɩɖɛ yɔɔ? Iyele nɛ ɖicosi tɔm pɔzʋʋ mbʋ pɩ-yɔɔ.
ƐZƖMA HƖÐƐ TƆM CƐYAA YƆ
5. Suwe nabɛyɛ pɩzɩɣ nɛ pɔpɔzɩ, alɩwaatʋ ndʋ panɩɣ se pɩwɛɛ se pañalɩ Ɛsɔ hɩɖɛ yɔɔ yɔ?
5 “Ña-hɩɖɛ yɔɔ ɛñalɩ.” (Mat. 6:9) Yesu yɔɔdaa se mbʋ pɩ-tɔm kɩlɩ cɛyʋʋ nɛ pɩwɛɛ se ɖɩpɔzɩ-pʋ ɖa-adɩma taa yɔ pɩ-taa nabʋyʋ lɛ se Ɛsɔ hɩɖɛ yɔɔ ɛñalɩ. Ɛlɛ, Yesu tɔm ndʋ tɩ-tɔbʋʋ lɛ suwe? Ye pɔtɔm se pañalɩ nabʋyʋ yɔɔ yɔ, pʋ-tɔbʋʋ lɛ se pala nɛ pɩwɛɛ kele kele yaa cɩɖɩ cɩɖɩ. Ɛlɛ, nabɛyɛ pɩzɩɣ nɛ pɔpɔzɩ se ‘Yehowa hɩɖɛ tɩtɛ wɛʋ kele kele yaa cɩɖɩ cɩɖɩ yaa we?’ Pɩsa nɛ ɖicosi tɔm ndʋ tɩ-yɔɔ lɛ, pɩwɛɛ se ɖɩmaɣzɩ mbʋ payɩ pitukuuni hɩɖɛ yɔ pɩ-yɔɔ.
6. Ɛbɛ yeki nɛ hɩɖɛ naɖɩyɛ wɛɛ ñɩm?
6 Hɩɖɛ ɛɛsɩɣnɩ masɩ nzɩ pamaɣnɩ-ɖɩ takayaɣ yɔɔ yaa ɛzɩma payaɣ-ɖɩ yɔ. Yʋsɩ ndʋ Bibl yɔɔdʋʋ yɔ: “Hɩɖɛ sɛʋ camɩyɛ kɩlɩ ñɩm sakɩyɛ.” (Adu. 22:1; Ekl. 7:1) Ɛbɛ yɔɔ hɩɖɛ tɔm cɛyɩ mbʋ? Mbʋ pʋyɔɔ yɔ, pitukuuni mbʋ nɔɔyʋ kɛnaa yɔ, ndʋ lalaa maɣzɩɣ weyi payaɣ-ɩ hɩɖɛ nɖɩ yɔ ɛ-yɔɔ yɔ. Ye mbʋ, pɩtɩkɛ ɛzɩma pamaɣ hɩɖɛ naɖɩyɛ takayaɣ yɔɔ yaa ɛzɩma payaɣ-ɖɩ yɔ pɩ-tɔm kɩlɩnɩ cɛyʋʋ; ɛlɛ mbʋ pɩ-tɔm kɩlɩ cɛyʋʋ yɔ, mbʋ lɛ lɩmaɣza wena ɛyaa lalaa wɛɣnɩ alɩwaatʋ ndʋ panaɣ hɩɖɛ nɖɩ yaa panɩɣ-ɖɩ yɔ.
7. Ɛzɩma ɛyaa kaakʋyɩ Ɛsɔ hɩɖɛ yɔɔ?
7 Alɩwaatʋ ndʋ ɛyaa yɔɔdʋʋ cɛtɩm tɔm Yehowa yɔɔ yɔ, pɛwɛɛ nɛ pañakɩ pana se peyele nɛ ɛyaa maɣzɩ tɔm kɩdɛkɛdɩtʋ ɛ-yɔɔ. Alɩwaatʋ ndʋ ɛyaa nɩɣ tɔm kɩdɛkɛdɩtʋ ndʋ lɛ, piyeki nɛ pakʋʋ Ɛsɔ tɔm yaa pɔyɔɔdʋʋ cɛtɩm tɔm ɛ-hɩɖɛ yɔɔ. Edɛɛnɩ kaɖaɣ taa nɔɔyʋ calɩ yɔɔdʋʋ tɔm kɩdɛkɛdɩtʋ Ɛsɔ yɔɔ, nɛ ɛñaɣ pana se eyele nɛ ɛyaa maɣzɩ tɔm kɩdɛkɛdɩtʋ Ɛsɔ yɔɔ. Mbʋ pɩɩlaba yɔ, ɛbɛ pɩkpɛlɩkɩɣ-ɖʋ ? Yele nɛ ɖɩyɔɔdɩ pɩ-tɔm.
ƐZƖMA PACALƖ YƆƆDƲƲ CƐTƖM TƆM ƐSƆ HƖÐƐ YƆƆ?
8. (a) Tɔm ndʋ Aɖam nɛ Ɛva paasɩma? (b) Nɛ tɔm lɛɛtʋ ndʋ ɖɩpɩzɩɣ nɛ ɖɩpɔzɩ?
8 Aɖam nɛ Ɛva paasɩma se Ɛsɔ hɩɖɛ lɛ Yehowa, nɛ paasɩm ɖɔɖɔ tɔm kɩcɛyɩtʋ sakɩyɛ ɛ-yɔɔ. Kɩɖaŋ nɩɩyɩ yɔ. Paasɩma se ɛnʋ lɛ pa-Lɩzɩyʋ, ɛha-wɛ wezuu, lone kɩbanɖɛ nɖɩ ɖɩ-taa pacaɣ wezuu yɔ nɛ ɛha Aɖam halʋ weyi ɛtalɩ pilim yɔ, nɛ ɛha Ɛva abalʋ weyi ɛtalɩ pilim yɔ. (Kiɖe 1:26-28; 2:18) Ɛlɛ, ɛzɩ powobi pɩ-yɔɔ nɛ pamaɣzɩɣ mbʋ payɩ Yehowa labɩ-wɛ yɔ pɩ-yɔɔ? Ɛzɩ powobi pɩ-yɔɔ nɛ pɛcɛyɩsɩɣ sɔɔlɩm nɛ ɛsɩmɩyɛ nɖɩ pɛwɛnɩ Yehowa yɔɔ yɔ? Ðihiɣ tɔm ndʋ tɩ-yɔɔ cosuu kpayɩ kpayɩ alɩwaatʋ ndʋ Ɛsɔ koyindu takɩ-wɛ yɔ.
9. (a) Ɛzɩ Kiɖe Tɛɛ Tɔm 2:16, 17 nɛ 3:1-5 yɔɔdʋʋ yɔ, tɔm ndʋ Yehowa kaaheyi kajalaɣ hɔʋ? (b) Nɛ ɛzɩma Sataŋ huuzi toovenim tɔm yɔɔ?
9 Kalɩ Kiɖe Tɛɛ Tɔm 2:16, 17 nɛ 3:1-5. Sataŋ tɩŋnɩ ɖʋm yɔɔ nɛ ɛpɔzɩ Ɛva tɔm tʋnɛ: “Ɛsɔ tɔm se: ‘Ɩtaatɔɔ kajaɣ taa tɩŋ kpeekpe pee yaa?’” Sataŋ tɔm pɔzʋʋ mbʋ, pɩ-taa nɛ cɛtɩm tɔm; piyeba nɛ Ɛva paɣzɩ wɛnʋʋ lɩmaɣza kɩdɛkɛda Ɛsɔ yɔɔ. Toovenim taa lɛ, Ɛsɔ yɔɔdaa se papɩzɩɣ nɛ pɔtɔɔ tɩŋ kpeekpe pee, ɛlɛ kʋɖʋmʋʋ ɖeke pee ɛtɔm se pataatɔɔ. Aɖam nɛ Ɛva papɩzaɣ se pɔtɔɔ tɩŋ ndɩ ndɩ sakɩyɛ pee. (Kiɖe 2:9) Toovenim taa lɛ, Yehowa kɛ kʋjɔʋ laɖʋ. Ɛlɛ, Ɛsɔ kaaheyi Aɖam nɛ Ɛva se tɩʋ kʋɖʋmʋʋ nakʋyʋ wɛɛ, nɛ pɛfɛyɩnɩ waɖɛ se pɔtɔɔ ki-pee. Ye mbʋ, tɔm ndʋ Sataŋ pɔzaa yɔ, tihuuzi toovenim tɔm yɔɔ. Sataŋ tɔm pɔzʋʋ yeba nɛ pamaɣzɩ se Ɛsɔ tɩkɛ kʋjɔʋ laɖʋ. Pɩtɩla Ɛva pɔzɩ ɛ-tɩ se: ‘Ɛzɩ kɩbam nabʋyʋ wɛɛ nɛ Ɛsɔ tɩsɔɔlɩ se mɛwɛɛnɩ-pʋ?’
10. (a) Ɛzɩma Sataŋ yɔɔdɩ cɛtɩm tɔm kaɣlaa Ɛsɔ hɩɖɛ yɔɔ? (b) Nɛ ɛbɛ lɩ pɩ-taa?
10 Alɩwaatʋ ndʋ Sataŋ kaapɔzɩ tɔm ndʋ yɔ, Ɛva kaawɛnɩ ñamtʋ Yehowa yɔɔ mbʋ. Ɛsɔ kaaɖʋ paɣtʋ ndʋ kpayɩ yɔ, ndʋ Ɛva heyi Sataŋ. Ɛva sɔzaa se halɩ pɩtɩmʋna se potukuni tɩʋ ŋgʋ. Ɛsɩma se Ɛsɔ paɣ-wɛ se ye patɩña paɣtʋ ndʋ yɔ, pɩkaɣ kɔnʋʋ sɩm. Ɛlɛ Sataŋ cosi se: “Pɩlɩ! Ɩɩkaɣ sɩbʋ!” (Kiɖe 3:2-4) Sataŋ tɔm ndʋ tɩɩwɩlɩɣ yem se Yehowa cɛtaa. Lɛɛlɛɛyɔ lɛ, ɛwɛɛ nɛ ɛyɔɔdʋʋ cɛtɩm tɔm Ɛsɔ hɩɖɛ yɔɔ nɛ eheyiɣ Ɛva se Yehowa kɛ cɛtɩyʋ. Pɩtɩŋnɩ pʋyɔɔ lɛ, Sataŋ pɩsɩ Eleeu yaa kɔlɔmɔtʋ tʋ. Sataŋ peɣzi Ɛva siŋŋ; nɛ ɛlɛ tisi ɛ-tɔm yɔɔ. (1 Tim. 2:14) Ɛva ta-ɩ liu nɛ pɩkɩlɩ Yehowa. Piyeba nɛ Ɛva kpaɣ lɩmaɣzɩyɛ kɩdɛkɛdɩyɛ kɛlɛʋ yem. Ɛlɩzaa se ɛɛñaŋ Yehowa nɛ ɛpaɣzɩ tɔɔʋ tɩʋ piye nɖɩ Yehowa kaaɖʋ-ɩ paɣtʋ se ɛtaatɔɔ yɔ. Pʋwayɩ lɛ, ɛha tɩʋ piye nɖɩ ɖɔɖɔ Aɖam.—Kiɖe 3:6.
11. Ɛbɛ Aɖam nɛ Ɛva papɩzaɣ se pala?
11 Maɣzɩ pazɩ nɛ ŋna tɔm ndʋ Ɛva pɩzaɣ se eheyi Sataŋ yɔ. Maɣzɩ se eheyi-i tɔm ɛzɩ tʋnɛ yɔ: “Maasɩŋ weyi ŋkɛnaa yɔ, ɛlɛ mansɩm man-Caa Yehowa nɛ mɔnsɔɔlɩ-ɩ nɛ mantaɣ-ɩ liu. Mbʋ payɩ ma nɛ Aɖam ɖɩwɛna yɔ, ɛnʋ hanɩ-ɖʋ. Waɖɛ nɖɩ ŋwɛna se ŋyɔɔdɩ tɔm kɩdɛkɛdɩtʋ natʋyʋ ɛ-yɔɔ? Ðɛɛ mɔ-yɔɔ!” Pɩtʋʋ fɛyɩ se ye Yehowa pɛlɛ kʋsɔɔlʋ ɛnʋ ɛɛyɔɔdɩ siɣsiɣ tɔm tʋnɛ yɔ, Yehowa taa kaalabɩ leleŋ siŋŋ se ɛnɩɩ-tʋ! (Adu. 27:11) Ɛlɛ, Ɛva taawɛɛnɩ sɔɔlɩm mbʋ pɩwɛ siɣsiɣ yɔ Yehowa yɔɔ; Aɖam ɖɔɖɔ taawɛɛnɩ sɔɔlɩm mbʋ. Pataawɛɛnɩ sɔɔlɩm mbʋ pa-Caa yɔɔ, mbʋ yebina nɛ patɩpɩzɩ nɛ palʋ se nɔɔyʋ ɛtaayɔɔdɩ cɛtɩm tɔm ɛ-hɩɖɛ yɔɔ.
12. (a) Ɛzɩma Sataŋ yeba nɛ abʋta ñɔ Ɛva maɣzɩm taa? (b) Nɛ ɛbɛ Aɖam nɛ Ɛva patɩla?
12 Ɛzɩ ɖɩnaʋ yɔ, Sataŋ ñɩnaɣ se ɛwɛɛkɩ Yehowa hɩɖɛ lɛ, ɛñaɣ pana se eyele nɛ Ɛva pɩtɩ nɛ ɛmaɣzɩ se Yehowa tɩkɛ Caja kɩbanʋ. Aɖam nɛ Ɛva patɩlʋ Yehowa hɩɖɛ yɔɔ se Sataŋ ɛtaayɔɔdɩ cɛtɩm tɔm ɖɩ-yɔɔ. Piyeba nɛ pɩwɛɛ-wɛ kɛlɛʋ se pewelisini Sataŋ nɛ pakʋyɩ pa-Caa yɔɔ. Lɛɣtʋ ndʋ Sataŋ lakɩnɩ tʋmɩyɛ sɔnɔ ɖɔɖɔ. Ɛkaɖɩɣnɩ Yehowa hɩɖɛ pɩtɩŋnɩ ɛzɩma ɛyɔɔdʋʋ cɛtɩm tɔm ɖɩ-yɔɔ yɔ pɩ-yɔɔ. Ɛyaa mba petisiɣ Sataŋ cɛtɩm tɔm yɔɔ yɔ, pɩwɛ kɛlɛʋ se pekizi Yehowa kewiyitu tɔɔʋ.
YEHOWA ÑALƖƔ Ɛ-HƖÐƐ YƆƆ
13. Ɛzɩma Ezekɩyɛɛlɩ 36:23 ñɩkɩɣ niye Bibl tɔm ñʋʋ yɔɔ?
13 Ɛzɩ Yehowa tisiɣ se pɔyɔɔdɩ cɛtɩm tɔm ndʋ ɛ-yɔɔ nɛ ɛɛlakɩ nabʋyʋ se ɛlʋ ɛ-tɩ yɔɔ? Aayɩ! Bibl kpeekpe yɔɔdʋʋ mbʋ Yehowa laba se ɛwɩlɩ se tɔm kɩdɛkɛdɩtʋ ndʋ paayɔɔdɩ ɛ-yɔɔ Edɛɛnɩ kaɖaɣ taa yɔ, tɩtɩkɛ toovenim yɔ pɩ-tɔm. (Kiɖe 3:15) Pʋyɔɔ lɛ, ɖɩpɩzɩɣ nɛ ɖikpeɣli Bibl taa tɔm ɛzʋnɔ: Yehowa tɩŋɩɣnɩ Kewiyaɣ ŋga ɛ-Pɩyalʋ ɖiyiɣ yɔ kɔ-yɔɔ se ɛñalɩ ɛ-hɩɖɛ yɔɔ nɛ eyele nɛ siɣsiɣ wɛtʋ nɛ laŋhɛzɩyɛ ɖaɣnɩ wɛʋ tɛtʋ yɔɔ. Tɔm ndʋ tɩsɩɣnɩ-ɖʋ se ɖɩtɩlɩ ɛzɩma Yehowa lakɩ se ɛñalɩ ɛ-hɩɖɛ yɔɔ yɔ, tɩwɛ Bibl taa.—Kalɩ Ezekɩyɛɛlɩ 36:23.
14. Pakʋyɩ Yehowa yɔɔ Edɛɛnɩ kaɖaɣ taa lɛ, ɛzɩma ɛlaba se ɛñalɩ ɛ-hɩɖɛ yɔɔ?
14 Sataŋ labɩ mbʋ payɩ ɛpɩzɩɣ yɔ se ɛsɩnzɩ Yehowa nɛ ɛtaatɛzɩ mbʋ ɛɖʋwa se ɛlakɩ yɔ. Ɛlɛ Sataŋ tɩpɩzɩ kaaʋ. Bibl wɩlɩɣ-ɖʋ mbʋ Yehowa kaalaba yɔ, nɛ kɩwɩlɩɣ-ɖʋ se toovenim taa lɛ Yehowa kɛnɩ Caja sɔɔlɩm tʋ nɛ Ðiyiyu weyi ɛkpaɖaa yɔ. Toovenim taa lɛ, Sataŋ kʋyɩ Ɛsɔ yɔɔ nɛ mba payɩ patɩŋ ɛ-wayɩ yɔ, peyeba nɛ pɩha Yehowa laŋwɛɛkɩyɛ sɔsɔɖɛ. (Keɣa 77:40) Paa mbʋ yɔ, ɛcɔnɩ tɔm ndʋ ti-ɖeɖe nɛ lɔŋsɩnɖɛ, suuɖu nɛ siɣsiɣ wɛtʋ. Ɛtɩŋnɩ ɖɔɖɔ nʋmɔŋ sakɩyɛ yɔɔ nɛ ɛwɩlɩ e-ɖoŋ sɔsɔŋ. Mbʋ pɩ-tɔm kɩlɩ cɛyʋʋ yɔ, mbʋ lɛ se ɛwɩlɩɣ sɔɔlɩm, mbʋ payɩ ɛlakɩ yɔ pɩ-taa. (1 Yoh. 4:8) Yehowa tiyele tʋmɩyɛ labʋ kpa se ɛñalɩ ɛ-hɩɖɛ yɔɔ.
Sataŋ kaaheyi Ɛva cɛtɩm tɔm Yehowa yɔɔ, nɛ pɩnzɩ mɩnɩŋ sakɩyɛ pʋwayɩ, Eleeu wobi pɩ-yɔɔ nɛ ɛyɔɔdʋʋ cɛtɩm tɔm Ɛsɔ yɔɔ (Cɔnɩ tayʋʋ 9-10, 15) *
15. (a) Ɛzɩma Sataŋ yɔɔdʋʋ cɛtɩm tɔm Ɛsɔ hɩɖɛ yɔɔ sɔnɔ? (b) Nɛ ɛbɛ lɩɣ pɩ-taa?
15 Sɔnɔ ɖɔɖɔ, Sataŋ wɛɛ nɛ ewoki pɩ-yɔɔ nɛ ɛyɔɔdʋʋ cɛtɩm tɔm Ɛsɔ hɩɖɛ yɔɔ. Ɛñakɩ pana se eyele nɛ ɛyaa pɩtɩ nɛ pamaɣzɩ se Ɛsɔ fɛyɩ ɖoŋ, ɛfɛyɩ siɣsiɣ, ɛtɩkɛ lɔŋsɩnɖʋ nɛ ɛtɩkɛ sɔɔlɩm tʋ. Kɩɖaʋ nakʋyʋ yɔ: Sataŋ ñakɩ pana se eyele nɛ ɛyaa tisi se Yehowa tɩkɛ Lɩzɩyʋ. Nɛ ye ɛyaa itisiɣ se Ɛsɔ wɛɛ yɔ, Sataŋ ñakɩ pana se pamaɣzɩ se Ɛsɔ tɔm wɛ kaɖɛ nɛ ɛfɛyɩ siɣsiɣ, nɛ ɛ-paɣtʋ ɖɔɖɔ wɛ kaɖɛ nɛ tɩfɛyɩ siɣsiɣ. Halɩ ɛwɩlɩɣ ɛyaa se Yehowa kɛ Ɛsɔ weyi ɛwɛ kañatʋ yɔ nɛ ɛɖʋʋ ɛyaa miŋ sɔsɔŋ taa. Alɩwaatʋ ndʋ petisiɣ cɛtɩm tɔm ndʋ tɩ-yɔɔ lɛ, pɩwɛɣ-wɛ kɛlɛʋ se pekizi Yehowa kewiyitu tɔɔʋ. Sataŋ kaɣ wobu pɩ-yɔɔ nɛ ɛyɔɔdʋʋ cɛtɩm tɔm Yehowa yɔɔ, nɛ ɛwɛɣ pana ñaɣʋ yɔɔ mbʋ se eyele nɛ ŋha Yehowa siɣye pɩkɔɔ pɩsɩɩnɩ alɩwaatʋ ndʋ Yehowa ɖɩzɩɣ-ɩ cɩɖɩ cɩɖɩ yɔ. Ŋkaɣ pɩzʋʋ nɛ ŋkaɖɩnɩ Sataŋ?
WAÐƐ NÐƖ ŊWƐNƖ TƆM KƖCƐYƖTƲ NDƲ TƖ-TAA YƆ
16. Ɛbɛ Aɖam nɛ Ɛva patɩla nɛ ñapɩzɩɣ nɛ ŋla?
16 Yehowa haɣ waɖɛ ɛyaa mantɩtalɩ pilimwaa se paɖʋ nesi nɛ ɛ-hɩɖɛ yɔɔ ñalɩ. Ye mbʋ, ŋpɩzɩɣ nɛ ŋla mbʋ Aɖam nɛ Ɛva patɩla yɔ. Paa ɖɩwɛ ɛjaɖɛ nɖɩ ɖɩ-taa ɛyaa sakɩyɛ yɔɔdʋʋ cɛtɩm tɔm Yehowa hɩɖɛ yɔɔ nɛ patʋʋ-ɖɩ yɔ, ŋwɛnɩ waɖɛ se ŋlʋ nɛ ŋheyi-wɛ toovenim se Yehowa kɛ kiɖeɖeu, ɛwɛ siɣsiɣ, ɛwɛ ɖeu nɛ ɛkɛ sɔɔlɩm tʋ. (Iza. 29:23) Ŋpɩzɩɣ nɛ ŋwɩlɩ se ŋsɔɔlaa se eɖiyi-ŋ. Ŋpɩzɩɣ ŋsɩnɩ ɛyaa nɛ panɩɩ pɩ-taa se Yehowa ɖeke tɔkɩnɩ kewiyitu ndʋ tɩwɛ siɣsiɣ siŋŋ yɔ, nɛ tɩkaɣ kɔnʋʋ wondu kɩlɩzɩtʋ kpeekpe laŋhɛzɩyɛ nɛ taa leleŋ.—Keɣa 36:9, 37; 145:5, 6, 10.
17. Ɛzɩma Yesu yeba nɛ patɩlɩ ɛ-Caa hɩɖɛ?
17 Alɩwaatʋ ndʋ ɖɩlʋkɩ Yehowa hɩɖɛ yɔɔ yɔ, pɩwɩlɩɣ se ɖɩmaɣzɩɣnɩ Yesu Krɩstʋ kɩɖaʋ. (Yoh. 17:26) Pɩtasɩna se Yesu labɩnɩ ɛ-Caa hɩɖɛ tʋmɩyɛ se ɛyaa ɩtɩlɩ-ɖɩ lɛ, ɛwɩlɩ-wɛ ɖɔɖɔ ɛyʋ weyi keekee Yehowa kɛnaa yɔ. Kɩɖaʋ nakʋyʋ yɔ: Ɛkaɖɩnɩ Farɩsɩ ñɩma mba peyekaɣ se ɛyaa ɩmaɣzɩ se Yehowa wɛ kañatʋ, ɛ-paɣtʋ wɛ kaɖɛ, eposini ɛyaa nɛ ɛɛnaɣ pa-pʋtɔdɩyɛ yɔ. Yesu sɩnɩ ɛyaa nɛ patɩlɩ se ɛ-Caa nɩɣ ɛyaa tɔm taa, ɛwɛ suuɖu, ɛkɛ sɔɔlɩm tʋ nɛ ekpeɣu. Ɛsɩnɩ ɛyaa ɖɔɖɔ se patɩlɩ Yehowa pɩtɩŋnɩ ɛzɩma ɛmaɣzɩnɩ ɛ-Caa wɛtʋ ɖeyi ɖeyi e-wezuu caɣʋ kɩyakɩŋ kpeekpe taa yɔ pɩ-yɔɔ.—Yoh. 14:9.
18. Ɛzɩma ɖɩpɩzɩɣ nɛ ɖɩkaɖɩnɩ pɔbɔtʋ nɛ cɛtɩm tɔm ndʋ pɔyɔɔdʋʋ Yehowa yɔɔ yɔ?
18 Ɛzɩ Yesu yɔ, ɖɩpɩzɩɣ nɛ ɖiheyi ɛyaa ndʋ ɖɩsɩm Yehowa yɔɔ yɔ, nɛ ɖɩwɩlɩ-wɛ se ɛkɛ Ɛsɔ sɔɔlɩm tʋ nɛ ɛlakɩ camɩyɛ lakasɩ. Ye ɖɩlakɩ mbʋ yɔ, ɖɩkaɖɩɣnɩ pɔbɔtʋ nɛ cɛtɩm tɔm ndʋ pɔyɔɔdʋʋ Yehowa yɔɔ yɔ. Ðɩpɩzɩɣ nɛ ɖɩñalɩ Yehowa hɩɖɛ yɔɔ ye ɖɩsɩɣnɩ ɛyaa se patɩlɩ se hɩɖɛ nɖɩ ɖɩwɛ kele kele yɔ. Pɩtasɩ lɛ, pɩwɛɛ se ɖɩñaɣ pana nɛ ɖɩmaɣzɩnɩ Yehowa. Ðɩpɩzɩɣ nɛ ɖɩla mbʋ, paa ɖɩtɩtalɩ pilim yɔ. (Efɛz. 5:1, 2) Alɩwaatʋ ndʋ ɖɔ-yɔɔdaɣ nɛ ɖa-lakasɩ wɩlɩɣ ɛyaa ɛyʋ weyi keekee Yehowa kɛnaa yɔ, pɩwɩlɩɣ se ɖɩɖʋʋ nesi se ɛ-hɩɖɛ yɔɔ ɛñalɩ. Ðɩlʋkɩ hɩɖɛ nɖɩ ɖɩ-yɔɔ ye ɖɩsɩɣnɩ ɛyaa se patɩlɩ toovenim Ɛsɔ yɔɔ yɔ. Ðɩwɩlɩɣ ɖɔɖɔ se ɛyaa mantɩtalɩ pilimwaa pɩzɩɣ nɛ pɔɖɔkɩ pe-siɣsiɣ wɛtʋ Ɛsɔ ɛsɩndaa.—Yɔɔb 27:5.
Ðɩsɔɔlaa se ɖɩsɩnɩ ɖe-Bibl kpɛlɩkɩyaa nɛ patɩlɩ se Yehowa lakɩ camɩyɛ lakasɩ nɛ ɛkɛ sɔɔlɩm tʋ (Cɔnɩ tayʋʋ 18-19) *
19. Ɛzɩma Izaayii 63:7 sɩɣnɩ-ɖʋ se ɖɩtɩlɩ mbʋ pɩwɛɛ se pɩkɛ ɖa-kaɖʋwa sɔsɔɔ ɖɔ-tɔm wɩlʋʋ taa yɔ?
19 Nabʋyʋ ɖɔɖɔ wɛɛ se ɖɩpɩzɩɣ ɖɩla nɛ Yehowa hɩɖɛ yɔɔ ñalɩ. Alɩwaatʋ ndʋ ɖɩwɩlɩɣ ɛyaa Bibl taa toovenim tɔm yɔ, ɖoŋ ɖoŋ lɛ, ɖɩñɩkɩɣ niye Ɛsɔ kewiyitu kɩkɩlɩtʋ tɔɔʋ yɔɔ, se Yehowa wɛnɩ waɖɛ se eɖiyi kedeŋa kpeekpe, nɛ pɩkɛ mbʋ toovenim. Ɛlɛ, paa pɩcɛyaa se ɖɩwɩlɩ ɛyaa Ɛsɔ paɣtʋ yɔ, ɖa-kaɖʋwa sɔsɔɔ lɛ se ɖɩsɩnɩ-wɛ nɛ pɔsɔɔlɩ ɖa-Caa Yehowa nɛ pɛwɛɛ siɣsiɣ ɛ-ɛsɩndaa. Pɩwɛɛ se ɖɩñɩɣ niye Yehowa wɛtʋ kɩbandʋ yɔɔ, ɖɩñɩɣ niye ɖɔɖɔ ɛyʋ weyi ɖeyi ɖeyi hɩɖɛ Yehowa sɩŋnaa yɔ pɩ-yɔɔ. (Kalɩ Izaayii 63:7.) Ye ɖɩwɩlɩɣ ɛyaa tɔm mbʋ yɔ, ɖɩkaɣ-wɛ sɩnʋʋ nɛ pɔsɔɔlɩ Yehowa nɛ pañamɩ-ɩ mbʋ pʋyɔɔ yɔ pɔsɔɔlaa se pɛwɛɛ siɣsiɣ ɛ-ɛsɩndaa.
20. Ɛbɛ tɔm ɖɩkaɣ yɔɔdʋʋ tɔm ñʋʋ ŋgʋ kɩkɔŋ yɔ kɩ-taa?
20 Ye mbʋ, ɛzɩma ɖa-taa pɩzɩɣ nɛ pɩtɛ se ɖa-lakasɩ nɛ ɛzɩma ɖɩwɩlɩɣ tɔm yɔ, pɩsɩɣnɩ ɛyaa se pɛwɛɛnɩ lɩmaɣza kɩbana Yehowa hɩɖɛ yɔɔ nɛ pɔñɔtɩnɩ-ɩ? Tɔm ñʋʋ ŋgʋ kɩkɔŋ yɔ, kɩkaɣ cosuu tɔm ndʋ tɩ-yɔɔ?
HENDU 2 Ña-hɩɖɛ lɛ Yehowa
^ tay. 5 Tɔm kɩcɛyɩtʋ ndʋ tukuuni ɛyaa nɛ tiyiyaa pa-tɩŋa? Ɛbɛ yɔɔ tɩ-tɔm cɛyɩ siŋŋ, nɛ ɛzɩma tɩyɛ titukuuni-ɖʋ? Tɔm pɔzʋʋ pʋnɛ pɩ-yɔɔ cosuu kaɣ-ɖʋ sɩnʋʋ se ɖɩcɛyɩsɩ ɖa nɛ Yehowa ɖa-taabalɩyɛ.
^ tay. 61 KƖLƐMƖŊ YƆƆ TƆM: Eleeu yɔɔdɩ cɛtɩm tɔm Ɛsɔ yɔɔ, eheyi Ɛva se Ɛsɔ kɛ cɛtɩyʋ. Pɩnzɩ mɩnɩŋ sakɩyɛ pʋwayɩ, Sataŋ wobi pɩ-yɔɔ nɛ eseɣtiɣ cɛtɩm lɩmaɣza. A-taa naayɛ lɛ wɩlɩtʋ ndʋ tɩtɔŋ se Ɛsɔ wɛ kañatʋ nɛ ndʋ tɩtɔŋ se pɩtɩkɛ Ɛsɔ lɩzɩnɩ ɛyaa yɔ.
^ tay. 63 KƖLƐMƖŊ YƆƆ TƆM: Koobu abalɩñɩnʋ nɔɔyʋ wɛɛ nɛ ɛñɩkɩɣ niye Ɛsɔ wɛtʋ kɩbandʋ yɔɔ alɩwaatʋ ndʋ ɛwɛɛ nɛ ɛkpɛlɩkɩɣnɩ nɔɔyʋ Bibl yɔ.
