1. Ɛbɛ yɔɔ Yehowa kpaɣ ɛ-tɩ nɛ ɛmaɣzɩnɩ ɖoyo?

“ƐZƖ halʋ pɩzɩɣ ɛsɔɔ e-lotu taa pɩɣa yɔɔ?” Nayʋ Izaayii alɩwaatʋ taa, tɔm ndʋ Yehowa kaapɔzaa. Ɛsɔ heyi ɛ-samaɣ se: “Nɛ paa ɛsɔwa yɔ, ma yɔ, maakaɣ ñɔ-yɔɔ sɔʋ.” (Iza. 49:15.) Ɛɛkpakɩɣ ɛ-tɩ ɖoŋ ɖoŋ nɛ ɛmaɣzɩɣnɩ ɖoyo. Ɛlɛ, mbʋ ɛlabɩ alɩwaatʋ ndʋ tɩ-taa. Yehowa kpaɣ lɩmaɣza wena ɛwɛnɩ ɛ-sɛyaa yɔɔ yɔ nɛ ɛmaɣzɩnɩ sɔɔlɩm sɔsɔm mbʋ ɖoyo wɛɣnɩ ɛ-pɩɣa yɔɔ yɔ, mbʋ pʋyɔɔ yɔ ɛsɔɔlaa se ɛ-sɛyaa ɩtɩlɩ se ɛsɔɔlɩ-wɛ siŋŋ. Pɩlakɩ ɖoonaa sakɩyɛ ɛzɩ pɩlakʋʋ koobu halɩñɩnʋ nɔɔyʋ yɔ. Payaɣ-ɩ se Jasmin nɛ ɛyɔɔdaa se: “Alɩwaatʋ ndʋ ɖoyo haɣ ɛ-pɩɣa hɩɖɛ se kamʋzɩ yɔ, taabalɩyɛ kɩbanɖɛ naɖɩyɛ wɛɣ pɛ-hɛkʋ taa siŋŋ, nɛ taabalɩyɛ nɖɩ ɖɩwɛɣ pe-wezuu caɣʋ kpeekpe.”

2. Alɩwaatʋ ndʋ Yehowa pɩɣa nakɛyɛ posuuni-i yɔ, ɛzɩma pɩlakɩ-ɩ?

² Alɩwaatʋ ndʋ Yehowa sɛyʋ nɔɔyʋ yeki tɔm susuu nɛ kediɣzisi wobu yɔ, Yehowa naɣ. Ye mbʋ, pɩcɛyɩɣ-ɩ siŋŋ se ɛ-sɛyaa sakɩyɛ pɩsɩɣ tɔm susuu yebiyaa * paa pɩnaɣ ŋga.

3. Ɛbɛ Yehowa sɔɔlaa?

³ Ðo-koobiya mba papɩsɩ tɔm susuu yebiyaa yɔ, pa-taa sakɩyɛ pɩsɩɣ nɛ pɔkɔŋ ɛgbɛyɛ taa, nɛ ɖa-taa wɛɣ leleŋ alɩwaatʋ ndʋ palakɩ mbʋ yɔ! Yehowa sɔɔlaa se papɩsɩ pɔkɔɔ, nɛ mbʋ ɖɩsɔɔlaa ɖɔɖɔ. (1 Pɩy. 2:25) Ɛzɩma ɖɩpɩzɩɣ ɖɩsɩnɩ-wɛ nɛ papɩsɩ pɔkɔɔ? Pʋcɔ nɛ ɖicosi tɔm ndʋ tɩ-yɔɔ lɛ, pɩwɛɣ ɖeu se ɖɩtɩlɩ mbʋ pʋyɔɔ nabɛyɛ yeki kediɣzisi wobu nɛ tɔm susuu yɔ.

4. Ɛzɩma tomnaɣ yɔɔ tʋmɩyɛ pɩzɩɣ nɛ ɖɩwɛɛnɩ ɖoŋ nabɛyɛ yɔɔ?

⁴ Nabɛyɛ yeki nɛ pa-tʋmɩyɛ pɩsɩɣ mbʋ pɩ-tɔm kɩlɩ cɛyʋʋ pe-wezuu caɣʋ taa yɔ. Payaɣ koobu abalɩñɩnʋ nɔɔyʋ se Hung, * nɛ ɛwɛ Aazii ɛjaɖɛ taa. Ɛyɔɔdaa se: “Mankpakaɣ alɩwaatʋ sakɩyɛ nɛ ɖoŋ sakɩyɛ nɛ malakɩnɩ tʋmɩyɛ. Maalabɩ kɩmɛlɛndʋ. Mamaɣzaɣ se ye mɛwɛnɩ liidiye sakɩyɛ yɔ, pɩsɩɣnɩ-m nɛ manpɩzɩ mɛnsɛɛ Yehowa camɩyɛ. Pʋyɔɔ lɛ, mankpakaɣ alɩwaatʋ sakɩyɛ nɛ malakɩnɩ tʋmɩyɛ. Piyeba nɛ manpaɣzɩ fɛʋ kediɣzisi nɛ pɩkɩlɩɣ, pɩkɔɔ pɩsɩɩnɩ alɩwaatʋ ndʋ meyebi-sɩ wobu yɔ. Sataŋ lakɩnɩ tʋmɩyɛ ɛjaɖɛ se ɛkɛzɩ ɛyaa lɩmaɣza se pɩsa nɛ pazɩ pazɩ lɛ, peyele Ɛsɔ sɛʋ.”

5. Ðoŋ weyi kala ndɩ ndɩ wena koobu halɩñɩnʋ nɔɔyʋ kataa yɔ awɛnɩ ɛ-yɔɔ?

⁵ Koobiya nabɛyɛ katɩɣ kala sakɩyɛ, nɛ kala ana ayeki nɛ pitiki-wɛ yɔɔɔ. Anne wɛ Grandɩ Bretaañɩ nɛ ɛwɛnɩ piya kagbanzɩ. Anne yɔɔdaa se: “Malʋlɩ man-pɩɣa lɛɛka lɛ, kɛwɛnɩ kʋdɔmɩŋ sɔsɔŋ sakɩyɛ. Alɩwaatʋ natʋyʋ wayɩ lɛ, palɩzɩ mɛn-pɛlɛ lɛlʋ ɛgbɛyɛ taa, nɛ fɩtɩyɩm taa kʋdɔŋ nakʋyʋ kpa man-pɩyalʋ lɛlʋ. Piitibi-m yɔɔɔ kpem nɛ meyele kediɣzisi wobu nɛ tɔm susuu. Pazɩ pazɩ lɛ, mɔnkɔɔ nɛ mɛhɛɛ fezuu taa.” Ðɩnɩɣ Anne nɛ ɛ-hɔʋ nɛ ɛyaa lalaa mba pakatɩɣ kala ana a-ɖɔndɩ yɔ pe-siziŋ siŋŋ!

6. Ye nɔɔyʋ ɛtɩɖɔ lɔŋ tasʋʋ mbʋ pɩwɛ Koloosi mba 3:13 taa yɔ ɩ-yɔɔ yɔ, ɛzɩma pɩpɩzɩɣ piyele nɛ eposini Yehowa samaɣ?

⁶ Kalɩ Koloosi mba 3:13. Ɛgbɛyɛ taa koobiya nabɛyɛ lakasɩ nasɩyɩ yeki nɛ Yehowa sɛyaa nabɛyɛ mʋʋ pana. Apostoloo Pɔɔlɩ ɖiɣzinaa se nabʋyʋ taa, ɖɩpɩzɩɣ nɛ ɖɩwɛɛnɩ toovenim se ‘ɖa-taa ɛwɛɛnɩ’ koobu nɔɔyʋ. Halɩ pɩtɩla papɩzɩɣ nɛ palabɩ-ɖʋ mulum lakasɩ nasɩyɩ. Ye ɖɩtɩtɩlɩ labʋ yɔ, ɖɩpɩzɩɣ nɛ ɖɩmʋ pana. Pana pɩzɩɣ ayele nɛ pazɩ pazɩ lɛ, nɔɔyʋ posini Yehowa samaɣ. Iyele nɛ ɖɩna mbʋ pɩtalɩ koobu abalɩñɩnʋ nɔɔyʋ yɔ. Payaɣ-ɩ se Pablo nɛ ɛwɛ Amerika Hadɛ kiŋ ɛjaɖɛ naɖɩyɛ taa. Pakʋ ɛ-tɔm ɖulum se ɛlabɩ mbʋ pɩfɛyɩ ɖeu yɔ; nɛ piyeba nɛ elesi ɛgbɛyɛ taa waɖɛ naɖɩyɛ. Ɛzɩma ɛlaba? Pablo yɔɔdaa se: “Mamʋ pana, nɛ pazɩ pazɩ lɛ, monposini ɛgbɛyɛ.”

7. Ye nɔɔyʋ ɛhʋyɛ ɛkʋʋ ɛ-tɔm yɔ, ɖoŋ weyi pɩpɩzɩɣ nɛ pɩwɛɛnɩ ɛ-yɔɔ?

⁷ Ye nɔɔyʋ ɛɛlabɩ kɩdɛkɛdɩm sɔsɔm nabʋyʋ nɛ pɩɖɛɛ yɔ, ɛ-ɛhʋyɛ pɩzɩɣ nɛ ɖɩkʋ ɛ-tɔm alɩwaatʋ sakɩyɛ. Pɩpɩzɩɣ nɛ pɩlakɩ-ɩ ɛzɩ Ɛsɔ ɛɛpɩzɩɣ nɛ ɛtasɩ-ɩ sɔɔlʋʋ yɔ. Halɩ paa eekpiɖi ɛ-kɩwɛɛkɩm yɔɔ, nɛ pana ɛ-pʋtɔdɩyɛ yɔ, pɩpɩzɩɣ nɛ pɩlakɩ-ɩ ɛzɩ ɛtɩtasɩ mʋnʋʋ se ɛkɛ Ɛsɔ samaɣ taa tʋ yɔ. Mbʋ ɖeyi ɖeyi pɩɩlabɩ koobu abalɩñɩnʋ nɔɔyʋ; payaɣ-ɩ se Francisco. Ɛyɔɔdaa se: “Paahɔm ma-nɩŋgbaŋʋʋ mbʋ pʋyɔɔ yɔ, mancaɣ kʋzʋʋ kɩdɛkɛdʋʋ wezuu. Paa kiɖe tɛɛ maawobi pɩ-yɔɔ nɛ mowoki kediɣzisi yɔ, pɩkɔm nɛ pitibi-m yɔɔɔ nɛ pɩlakaɣ-m ɛzɩ mantɩmʋna se mɛwɛɛ Yehowa samaɣ taa yɔ. Mɛ-ɛhʋyɛ kʋwaɣ mɔn-tɔm, nɛ man-taa kaatɛma se Yehowa tikpeɣ-m. Alɩwaatʋ wɛɛ nɛ tɩɖɛɣ lɛ, meyele tɔm susuu nɛ kediɣzisi wobu.” Koobiya mba pakatɩɣ kala wena a-tɔm ɖɩyɔɔdaa nɛ pɩɖɛɛ yɔ a-ɖɔndɩ yɔ, lɩmaɣza wena ŋwɛnɩ pɔ-yɔɔ? Ŋnɩɣ pe-siziŋ na? Kɔzɩ kɔzɩ lɛ, lɩmaɣza wena Yehowa wɛnɩ pɔ-yɔɔ?

8. Ɛzɩ Yehowa sɔʋ mba paasɛ-ɩ nɛ pɩɖɛɛ yɔ pɔ-yɔɔ? Lɩzɩ pɩ-taa.

⁸ Yehowa ɛɛsɔʋ ɛyaa mba paasɛ-ɩ nɛ pɩɖɛɛ ɛlɛ pɔkɔɔ poposini ɛ-samaɣ alɩwaatʋ natʋyʋ yɔ pɔ-yɔɔ. Nɛ ɛɛsɔʋ ɖɔɖɔ tʋmɩyɛ nɖɩ paalabɩ ɛ-sɛtʋ taa yɔ ɖɩ-yɔɔ.  (Ebr. 6:10) Nayʋ Izaayii yɔɔdɩ kɩɖaʋ kɩbaŋʋ nakʋyʋ tɔm se ɛwɩlɩnɩ ɛzɩma Yehowa cɔŋnɩ ɛ-samaɣ yɔɔ yɔ. Ɛmawa se: “Ɛzɩ ninɖiɣyu calʋʋ e-wondu yɔ, ekpeɣliɣ heɣsi ɛ-nɔkɔyʋʋ taa nɛ ɛkpakɩɣ-sɩ nɛ ɛnʋkɩ.” (Iza. 40:11) Alɩwaatʋ ndʋ heu nɔɔyʋ posuuni ewiɖe yɔ, ɛzɩma pɩlakɩ Ninɖiɣyu Sɔsɔ Yehowa? Yesu wɩlɩ ɛzɩma pɩlakɩ Yehowa yɔ alɩwaatʋ ndʋ ɛpɔzɩ tɔm tʋnɛ ɛ-tɔmkpɛlɩkɩyaa yɔ. Ɛpɔzɩ-wɛ se: “Suwe ɩmaɣzɩɣ? Ye ɛyʋ nɔɔyʋ ɛwɛnɩ heŋ 100 nɛ ɩ-taa kʋɖʋm le, ɛɛkaɣ yebu heŋ 99 pʋŋ taa nɛ ewolo ɛñɩnɩ kʋɖʋm weyi eleba yɔ? Nɛ ye ɛna-ɩ yɔ, meheyiɣ-mɩ toovenim taa se, ɛ-taa lakɩ-ɩ nɛ leleŋ nɛ pɩkɩlɩ heŋ 99 weyi itile yɔ.”—Mat. 18:12, 13.

9. Wɛtʋ ndʋ ninɖiɣyaa kɩbama wɛɣnɩ pe-heŋ yɔɔ? (Cɔnɩ takayaɣ huyuu yɔɔ kɩlɛmʋʋ.)

⁹ Ɛbɛ yɔɔ ɖɩpɩzɩɣ nɛ ɖɩkpaɣ Yehowa nɛ ɖɩmaɣzɩnɩ ninɖiɣyu? Mbʋ pʋyɔɔ yɔ, ninɖiɣyu kɩbanʋ maɣzɩɣ e-heŋ yɔɔ siŋŋ. Kɩɖaʋ nakʋyʋ yɔ, Daviid kaalʋbɩnɩ tɔɔyʋʋ nɛ toye yaa kpemtɔɔyaɣ se ɛkandɩyɩ e-ewiɖe yɔɔ. (1 Sam. 17:34, 35) Halɩ ye heu kʋɖʋm eleba yɔ, pɩtʋʋ fɛyɩ se ninɖiɣyu kɩbanʋ naɣ. (Yoh. 10:3, 14) Ninɖiɣyu ɛnʋ, ɛkaɣ yebu e-heŋ 99 kalakʋ ŋgʋ kɩ-taa nabʋyʋ ɛɛlakɩ-ɩ yɔ, yaa ɛkaɣ pɔzʋʋ ɛ-taabalaa ninɖiɣyaa lalaa se pɔcɔnɩ ɩ-yɔɔ nɛ ewolo ɛñɩnɩ weyi eleba yɔ. Yesu labɩnɩ tʋmɩyɛ kɩɖaʋ ŋgʋ se ɛwɩlɩ-ɖʋ toovenim tɔm kɩcɛyɩtʋ tʋnɛ: “Man-Caa weyi ɛwɛ ɛsɔdaa yɔ ɛtɩsɔɔlɩ se piya cikpesi sɩnɛ yɔ, sɩ-taa paa kʋɖʋmaɣ maɣmaɣ ele.”—Mat. 18:14.

10. Ɛzɩ Ezekɩyɛɛlɩ 34:11-16 yɔɔdʋʋ yɔ, ɛbɛ Yehowa yɔɔdaa se ɛlakɩ e-heŋ weyi ileba yɔ?

¹⁰ Yehowa sɔɔlɩ ɖa-taa paa anɩ, pɩkpɛndɩnɩ “piya cikpesi” nzɩ siposini e-ewiɖe yɔ. Ɛsɔ tɩŋnɩ nayʋ Ezekɩyɛɛlɩ yɔɔ nɛ ɛla tamaɣ se ɛkaɣ ñɩnʋ e-heŋ weyi ileba yɔ, nɛ ɛsɩnɩ-ɩ nɛ ɩɖaɣnɩ kpaʋ ɖoŋ fezuu taa. Nɛ ɛyɔɔdɩ nɩŋgbanzɩ nzɩ ɖeyi ɖeyi ɛkaɣ kpɛzʋʋ se eholi-i yɔ sɩ-tɔm. Nɛ nɩŋgbanzɩ nzɩ, sɩwɛ ɖeyi ɖeyi ɛzɩ nzɩ Izrayɛɛlɩ ninɖiɣyu kpɛzaɣ alɩwaatʋ ndʋ e-heu nɔɔyʋ leki yɔ. (Kalɩ  Ezekɩyɛɛlɩ 34:11-16.) Kajalaɣ lɛ, ninɖiɣyu ñɩnaɣ e-heu nɛ pɩpɩzaɣ se pɩpɔzɩ-ɩ alɩwaatʋ nɛ pana ñaɣʋ siŋŋ. Pʋwayɩ lɛ, alɩwaatʋ ndʋ ninɖiɣyu naɣ e-heu kilebu yɔ, ɛpɩsaɣnɩ-ɩ ewiɖe cɔlɔ. Pɩtasɩ lɛ, ye pɩkʋ heu yaa ñɔɔsɩ ɛwɩɣ-ɩ yɔ, ninɖiɣyu sɩɣaɣnɩ-ɩ nɛ sɔɔlɩm, ɛhɔkʋʋ e-heŋ, ɛcɔŋnɩ i-ɖeɖe nɛ ɛhaɣ heu ɛnʋ tɔɔnaɣ. Ɛzʋtʋyaa ɖiyiɣni “Ɛsɔ ewiɖe,” nɛ pɩcɛyaa se pɛkpɛzɩ nɩŋgbanzɩ kʋɖʋmsɩ nzɩ, nɛ pasɩnɩ mba payɩ poposini ɛgbɛyɛ yɔ. (1 Pɩy. 5:2, 3) Ɛzʋtʋyaa ñɩnɩɣ-wɛ, pasɩɣnɩ-wɛ se papɩsɩ ɛgbɛyɛ taa, nɛ pawɩlɩɣ-wɛ se pɔsɔɔlɩ-wɛ alɩwaatʋ ndʋ pasɩɣnɩ-wɛ se papɩsɩ Yehowa taabalaa yɔ. *

11. Tɔm ndʋ taa ninɖiɣyu kɩbanʋ nɩɣ?

¹¹ Ninɖiɣyu kɩbanʋ nɩɣ pɩ-taa se heŋ pɩzɩɣ nɛ ile. Nɛ ye heu nɔɔyʋ eposini ewiɖe yɔ, ninɖiɣyu ɛɛlakɩ-ɩ kañatʋ. Iyele nɛ ɖɩna kɩɖaʋ ŋgʋ Ɛsɔ hawa alɩwaatʋ ndʋ ɛsɩɣaɣnɩ ɛ-sɛyaa nabɛyɛ yɔ. Ɛyaa mba, paaposini Yehowa alɩwaatʋ natʋyʋ.

12. Wɛtʋ ndʋ Yehowa wɩlɩ Yoonaa?

¹² Nayʋ Yoonaa taaña Yehowa nɛ eekizaa se eewoki Niniivi. Paa mbʋ yɔ, Yehowa taalɔ Yoonaa lɛɛ lɛɛ. Ɛzɩ ninɖiɣyu kɩbanʋ yɔ, Yehowa kaaholi-i nɛ ɛsɩnɩ-ɩ nɛ ɛɖaɣnɩ hiɣu ɖoŋ weyi pɩpɔzaɣ-ɩ se ɛlabɩnɩ ɛ-tʋmɩyɛ yɔ. (Yon. 2:7; 3:1, 2) Pʋwayɩ, Ɛsɔ labɩnɩ tʋmɩyɛ pɔbɔʋ tɩʋ se ɛsɩnɩ Yoonaa nɛ ɛtɩlɩ ɛzɩma paa ɛyʋ weyi lɛ, e-wezuu mʋ ñɩm yɔ. (Yon. 4:10, 11) Lɔŋ weyi pɩkpɛlɩkɩɣ-ɖʋ? Pɩtɩpɔzɩ se ɛzʋtʋyaa ɩlɔ mba pɛhɛ fezuu taa yɔ lɛɛ lɛɛ. Ɛlɛ ɛzʋtʋyaa ñakɩ pana se patɩlɩ mbʋ piyeba nɛ heu nɔɔyʋ posini ewiɖe yɔ. Nɛ alɩwaatʋ ndʋ heu ɛnʋ ɛpɩsɩɣ Yehowa cɔlɔ yɔ, ɛzʋtʋyaa woki pɩ-yɔɔ nɛ pawɩlɩɣ-ɩ se pɔsɔɔlɩ-ɩ nɛ pamaɣzɩɣ ɛ-yɔɔ.

13. Ɛbɛ ɖɩpɩzɩɣ nɛ ɖɩkpɛlɩkɩ ɛzɩma Yehowa laba pɩlɩɩnɩ tɔm ndʋ Keɣa 72 maɖʋ yɔɔdaa yɔ tɩ-yɔɔ?

¹³ Alɩwaatʋ ndʋ Keɣa 72 maɖʋ yʋsaa se pɩwɛ ɛzɩ pɩwɛɛ nɛ piɖeɣni ɛyaa kɩdɛkɛdaa yɔ, piitibi-i yɔɔɔ. Ɛpɔzaɣ ɛ-tɩ se ɛzɩ  Ɛsɔ sɔɔlɩm labʋ wɛnɩ wazaɣ nakɛyɛ. (Keɣa 72:12, 13, 16) Ɛzɩma Yehowa laba? Ɛtɩkʋ abalʋ ɛnʋ ɛ-tɔm. Ɛlɛ Ɛsɔ yeba nɛ pama tɔm ndʋ ɛyɔɔdaa yɔ Bibl taa. Alɩwaatʋ wɛɛ nɛ tɩɖɛɣ lɛ, Keɣa maɖʋ kɔma nɛ ɛnɩɩ pɩ-taa se nabʋyʋ fɛyɩ ɖeu ɛyʋ wezuu caɣʋ taa nɛ pɩtalɩ taabalɩyɛ nɖɩ ɖɩwɛɣ ɛ nɛ Yehowa pɛ-hɛkʋ taa yɔ. (Keɣa 72:23, 24, 26, 28) Lɔŋ weyi pɩkpɛlɩkɩɣ-ɖʋ? Pɩtɩpɔzɩ se ɛzʋtʋyaa ɩhʋʋnɩ tɔm mba papaɣzɩɣ pɩtʋʋ se ɛzɩ Yehowa sɛtʋ wɛnɩ wazaɣ yɔ lɛɛ lɛɛ. Mbʋ ɛzɩ ɛzʋtʋyaa ɩɩkʋ pɔ-tɔm lɛ, pɩwɛɛ se pañaɣ pana nɛ patɩlɩ mbʋ pʋyɔɔ pɔyɔɔdʋʋ tɔm natʋyʋ yaa palakɩ lakasɩ nasɩyɩ yɔ. Pi-ɖeke pɩpɩzɩɣna nɛ pɩsɩnɩ ɛzʋtʋyaa nɛ patɩlɩ mbʋ ɖeyi ɖeyi pɩwɛɛ se pala nɛ pakpazɩ mba poposini ɛgbɛyɛ yɔ ɖoŋ fezuu taa yɔ.

14. (a) Ɛbɛ yɔɔ pɩɩpɔzɩ Eliya sɩnʋʋ? (b) Nɛ ɛzɩma Yehowa sɩnɩ-ɩ?

¹⁴ Nayʋ Eliya kaasewa se Abiɖe Yezaabɛɛlɩ ɛtaalabɩ-ɩ kɩdɛkɛdɩm. (1 Aw. 19:1-3) Ɛmaɣzaɣ se nɔɔyʋ tɩtasɩ kɛʋ Yehowa nayʋ nɛ pɩtasɩnɩ-ɩ, nɛ pɩlakaɣ-ɩ ɛzɩ tʋmɩyɛ nɖɩ ɛlakaɣ yɔ ɖɩfɛyɩ wazaɣ yɔ. Piitibi Eliya yɔɔɔ kpem nɛ ɛɛsɔɔlaa se ɛsɩ. (1 Aw. 19:4, 10) Yehowa tɩkʋ Eliya tɔm, ɛlɛ eyeba nɛ ɛ-taa tɛ se ɛfɛyɩ e-ɖeke, ɛpɩzɩɣ nɛ ɛtaa liu Ɛsɔ ɖoŋ, nɛ tʋma sakɩyɛ wɛɛ se ɛtasɩɣ labʋ. Yehowa welisini Eliya camɩyɛ nɛ ɛɖʋ-ɩ tʋma kɩfana. (1 Aw. 19:11-16, 18) Lɔŋ weyi pɩkpɛlɩkɩɣ-ɖʋ? Pɩwɛɛ se ɖa-taa paa anɩ, kɔzɩ kɔzɩ ɛzʋtʋyaa ɩla camɩyɛ lakasɩ Yehowa heŋ. Paa nɔɔyʋ ɛmʋ pana, yaa pɩlakɩ-ɩ ɛzɩ ɛtɩmʋna se Yehowa  ɛna ɛ-pʋtɔdɩyɛ yɔ, ɛzʋtʋyaa kaɣ-ɩ welisinuu alɩwaatʋ ndʋ eeheyiɣ-wɛ ɛ-taa tɔm yɔ. Pʋwayɩ lɛ, ɛzʋtʋyaa kaɣ ñaɣʋ pana se pasɩnɩ heu kilebu ɛnʋ nɛ ɛna se ɛmʋ ñɩm Yehowa ɛsɩndaa.

15. Ɛzɩ Yohanɛɛsɩ 6:39 yɔɔdʋʋ yɔ, lɩmaɣza wena Yesu kaawɛnɩ ɛ-Caa heŋ yɔɔ?

¹⁵ Lɩmaɣza wena Yehowa sɔɔlaa se ɖɩwɛɛnɩ e-heŋ weyi ileba yɔ ɩ-yɔɔ? Yesu kɩɖaʋ pɩzɩɣ nɛ kɩkpɛlɩkɩ-ɖʋ lɔŋ. Yesu kaanawa se Yehowa heŋ tɩŋa mʋ ñɩm Yehowa ɛsɩndaa, pʋyɔɔ lɛ, ɛlabɩ mbʋ payɩ ɛpɩzɩɣ yɔ se ɛsɩnɩ “Izrayɛɛlɩ ɖɩɣa taa heŋ kilebiŋ” nɛ ɩpɩsɩ Yehowa cɔlɔ. (Mat. 15:24; Luka 19:9, 10) Ɛzɩ ninɖiɣyu kɩbanʋ yɔ, Yesu labɩ mbʋ payɩ ɛpɩzɩɣ yɔ se pɩsa nɛ etaalesi Yehowa heu nɔɔyʋ.—Kalɩ Yohanɛɛsɩ 6:39.

16-17. Lɩmaɣza wena pɩwɛɛ se ɛzʋtʋyaa ɩwɛɛnɩ mba peleba yɔ pa-sɩnʋʋ yɔɔ? (Kalɩ aɖakaɣ “ Ɛzɩma pɩpɩzɩɣ nɛ pɩla heu kilebu nɔɔyʋ yɔ.”)

¹⁶ Apostoloo Pɔɔlɩ kaaseɣti Efɛɛzɩ ɛgbɛyɛ taa ɛzʋtʋyaa se pamaɣzɩnɩ Yesu kɩɖaʋ. Ɛyɔɔdaa se: “Ɩsɩnɩ ajamaa, nɛ pɩwɛɛ se ɩtɔzʋʋ Kɩbaɣlʋ Yesu tɔm yɔɔ, alɩwaatʋ ndʋ ɛ-maɣmaɣ ɛyɔɔdaa se: ‘Taa leleŋ wɛ haʋ taa nɛ pɩkɩlɩ mʋʋ taa’ yɔ.” (Tʋma 20:17, 35) Mayaɣ ŋga, kawɩlɩɣ se ɛzʋtʋyaa wɛnɩ tʋmɩyɛ kɩcɛyɩyɛ naɖɩyɛ; nɖɩ lɛ se pɔcɔnɩ Yehowa samaɣ yɔɔ. Payaɣ ɛgbɛyɛ taa ɛzʋtʋyʋ nɔɔyʋ se Salvador nɛ ɛwɛ Ɛsɩpaañɩ ɛjaɖɛ taa. Ɛyɔɔdaa se: “Alɩwaatʋ ndʋ mamaɣzɩɣ ɛzɩma Yehowa cɔŋnɩ e-heŋ weyi ileba yɔ ɩ-yɔɔ siŋŋ yɔ pɩ-yɔɔ lɛ, piseɣtiɣ-m se mala mbʋ payɩ manpɩzɩɣ yɔ nɛ mansɩnɩ heŋ ɛnɩ. Mɛnkɛ fezuu taa ninɖiɣyu nɛ pʋyɔɔ lɛ, man-taa tɛma se Yehowa sɔɔlaa se mɔncɔnɩ heŋ ɛnɩ ɩ-yɔɔ.”

¹⁷ Ɛyaa mba payɩ pɔ-tɔm ɖɩyɔɔdɩ tɔm ñʋʋ kʋnɛ kɩ-taa se paaposini Yehowa yɔ, pasɩnɩ-wɛ nɛ papɩsɩ Yehowa cɔlɔ. Sɔnɔ, ɛyaa sakɩyɛ mba paaposini Yehowa yɔ, pɔsɔɔlaa se pala mbʋ ɖɔɖɔ. Tɔm ñʋʋ ŋgʋ kɩkɔŋ yɔ, kɩkaɣ yɔɔdʋʋ mbʋ ɖeyi ɖeyi ɖɩpɩzɩɣ ɖɩla nɛ ɖɩsɩnɩ-wɛ nɛ papɩsɩ Yehowa cɔlɔ yɔ pɩ-tɔm nɛ pɩkpaɖɩ.