Masɩ nzɩ, sɩyɔɔdɩ Krɩstʋ mba wɛtʋ nakʋ tɔm: “Piye nɖɩ fezuu lʋlʋʋ yɔ, nɖɩ yɔ sɔɔlɩm, taa leleŋ, laŋhɛzɩyɛ, suuɖu, camɩyɛ lakasɩ, kɩbandʋ labʋ, tisuu, hɛɛɛ wɛtʋ, tɩ ɖɔkʋʋ.” Ɛlɛ wɛtʋ kɩbandʋ ndʋ Ɛsɔ fezuu pɩzɩɣ kɩsɩnɩ-ɖʋ nɛ ɖɩwɛɛna yɔ, pɩtɩkɛ tɩ-tɩŋa lɛ.

Ɛzɩma ɖɩlaba nɛ ɖɩtɩlɩ? Pʋcɔ nɛ apostoloo Pɔɔlɩ yɔɔdʋʋ wɛtʋ ndɩ ndɩ ndʋ pɛkpɛndaa nɛ payaa se piye nɖɩ fezuu lʋlʋʋ yɔ tɩ-tɔm lɛ, ɛmawa se: “Pɩnaɣ tomnaɣ lakasɩ . . . nɛ nzɩ yɔ kʋzʋʋ kɩdɛkɛdʋʋ, azuluma, lakasɩ nzɩ sɩwɛ fɛyɛ yɔ, sɩɩnaa latʋ, feziŋ kɩdɛkɛdɩŋ yaʋ, koyindiye, you, sʋsɩ, pana kadadayaɣ, paɖɩyɛ, tayʋʋ, kɩjaʋ yɔɔ agbaa ɖʋʋ, ɛsɩsɛmɩyɛ, sʋlʋm kpaŋʋʋ, kazandʋ ndʋ tɩ-taa pɛɖɛlɛsɩɣ niye yɔ, nɛ lakasɩ lɛɛsɩ ɖɔɖɔ mbʋ yɔ.” (Gal. 5:19-21) Pɔɔlɩ tɛzɩnaa se “lakasɩ lɛɛsɩ ɖɔɖɔ mbʋ yɔ,” ye mbʋ, ɛtɩyɔɔdɩ wɛtʋ ndɩ ndɩ ndʋ payaɣ se “tomnaɣ lakasɩ” yɔ tɩ-tɩŋa tɩ-tɔm ɛzɩ ndʋ tɩ-tɔm pɔyɔɔdɩ Koloosi mba 3:5 taa mbʋ yɔ. Ɛyɔɔdɩ wɛtʋ kɩbandʋ nakʋ tɔm nɛ pɩtɛ lɛ, mbʋ ɖɔɖɔ ɛlaba. Kalɩtʋ 23 taa, ɛyɔɔdaa se: ‘Paɣtʋ natʋyʋ ɛɛkaɖɩɣnɩ wɛtʋ ɛzɩ tʋnɛ yɔ.’ Ye mbʋ, Pɔɔlɩ tɩyɔɔdɩ wɛtʋ kɩbandʋ ndʋ fezuu kiɖeɖeu pɩzɩɣ kɩsɩnɩ-ɖʋ nɛ ɖɩwɛɛna yɔ tɩ-tɩŋa tɩ-tɔm.

Alɩwaatʋ ndʋ ɖɩkpakɩɣ piye nɖɩ fezuu lʋlʋʋ yɔ nɛ ɖɩmaɣzɩnɩ tɔm ndʋ Pɔɔlɩ ma Efɛɛzɩ mba ɛgbɛyɛ nɛ tɩyɔɔdʋʋ piye nɖɩ ñalɩmɩyɛ lʋlʋʋ yɔ ɖɩ-tɔm yɔ, ɖɩnɩɣ pɩ-taa. Ɛmawa se: “Piye nɖɩ ñalɩmɩyɛ lʋlʋʋ yɔ, nɖɩ lɛ paa kɩbandʋ labʋ mbʋ nɛ paa siɣsiɣ wɛtʋ ndʋ nɛ paa toovenim mbʋ.” (Efɛz. 5:8, 9) Toovenim taa lɛ, “kɩbandʋ labʋ” nɛ siɣsiɣ wɛtʋ nɛ toovenim pɛkɛ “piye nɖɩ ñalɩmɩyɛ lʋlʋʋ yɔ,” ɖɩ-hɔɔlʋʋ nakʋyʋ, ɛlɛ pɛkɛ ɖɔɖɔ “piye nɖɩ fezuu lʋlʋʋ yɔ” ɖɩ-hɔɔlʋʋ nakʋyʋ.

Ðɩpɩzɩɣ nɛ ɖɩnɩɩ pɩ-taa ɖɔɖɔ alɩwaatʋ ndʋ ɖɩkpakɩɣ piye nɖɩ fezuu lʋlʋʋ yɔ nɛ ɖɩmaɣzɩnɩ wɛtʋ kɩbandʋ loɖo ndʋ Pɔɔlɩ seɣti Timootee se ɛñaɣ pana nɛ ɛwɛɛna yɔ. Wɛtʋ ndʋ yɔ: “Siɣsiɣ wɛtʋ, Ɛsɔ ñɔnʋʋ, tisuu, sɔɔlɩm, laŋɩyɛ ɖɔkʋʋ, nɛ hɛɛɛ wɛtʋ.” (1 Tim. 6:11) Wɛtʋ ndʋ tɩ-taa lɛ, naadozo ɖeke (tisuu, sɔɔlɩm nɛ hɛɛɛ wɛtʋ) tɔm pɔyɔɔdaa se tɩkɛ “piye nɖɩ fezuu lʋlʋʋ yɔ” ɖɩ-hɔɔlɩŋ nɩɩyɩ. Ɛlɛ, pɩtʋʋ fɛyɩ se pɩɩpɔzaa ɖɔɖɔ se Timootee ɛñaɣ pana nɛ ɛwɛɛnɩ siɣsiɣ wɛtʋ, Ɛsɔ ñɔnʋʋ nɛ laŋɩyɛ ɖɔkʋʋ, nɛ ɛɛnawa se pɩpɔzʋʋ se fezuu kiɖeɖeu ɛsɩnɩ-ɩ pʋcɔ nɛ ɛpɩzɩ nɛ ɛwɛɛnɩ wɛtʋ ndʋ.—Kpaɣ-tʋ nɛ ŋmaɣzɩnɩ Koloosi mba 3:12; 2 Pɩyɛɛrɩ 1:5-7.

Ye mbʋ, Galaatii mba 5:22, 23 tɩyɔɔdɩ wɛtʋ ndʋ pɩpɔzʋʋ se Krɩstʋ ñɩma ɩñaɣ pana nɛ pɛwɛɛna yɔ tɩ-tɩŋa tɩ-tɔm. Ɛsɔ fezuu pɩzɩɣ kɩsɩnɩ-ɖʋ nɛ ɖɩwɛɛnɩ wɛtʋ nakʋ ndʋ pɛkpɛndaa nɛ payaa se “piye nɖɩ fezuu lʋlʋʋ yɔ.” Ɛlɛ wɛtʋ lɛɛtʋ sakɩyɛ wɛɛ nɛ pɩpɔzʋʋ se ɖɩñaɣ pana nɛ ɖɩwɛɛnɩ-tʋ nɛ pɩsa nɛ ɖɩpɩsɩ Krɩstʋ ñɩma mba papɩ fezuu taa yɔ, nɛ ‘ɖisuu ɛyʋtʋ kɩfatʋ ndʋ palɩzɩ-tʋ siɣsiɣ wɛtʋ toovenim ñɩndʋ nɛ Ɛsɔ ñɔnʋʋ siŋŋ pa-taa ɛzɩ Ɛsɔ sɔɔlʋʋ yɔ.’—Efɛz. 4:24.