Pɔɔlɩ mawa se: “Pɩtɩŋnɩ paɣtʋ yɔɔ lɛ, mansɩbɩ paɣtʋ yɔɔ, se pɩsa nɛ manɖaɣnɩ wɛʋ wezuu Ɛsɔ yɔɔ.”—Gal. 2:19.

Tɔm ndʋ Pɔɔlɩ mawa yɔ, tɩlabɩ nɔɔ kʋɖʋmaɣ nɛ lɩmaɣzɩyɛ sɔsɔyɛ nɖɩ ɛñɩnaɣ se Galaatii agbaa wena awɛ Roma egeetiye taa yɔ atɩlɩ yɔ. Cɛtɩm wɩlɩyaa kaawɛnɩ ɖoŋ Krɩstʋ ñɩma mba paawɛ peeɖe yɔ pa-taa nabɛyɛ yɔɔ. Wɩlɩyaa mba, paawɛɛ nɛ pawɩlɩɣ se pɩsa nɛ nɔɔyʋ hiɣ ñʋʋ yabʋ lɛ, pɩwɛɛ se ɛɖɔ Moyizi Paɣtʋ yɔɔ kɔzɩ kɔzɩ ndʋ tɩtɔŋ se pɩwɛɛ se pɛpɛlɩ ɛyʋ yɔ. Ɛlɛ Pɔɔlɩ kaanawa se Ɛsɔ ɛɛtasɩɣ pɔzʋʋ se pɛpɛlɩ mba pɛwɛnɩ tisuu yɔ. Ɛcɔlɩ ɛyaa lɩmaɣza camɩyɛ siŋŋ nɛ ekizi cɛtɩm wɩlɩtʋ, nɛ ɛkpazɩ ɖoŋ tisuu mbʋ koobiya kaawɛnɩ Yesu Krɩstʋ kɩhɛyʋʋ pʋ-ñʋʋ taa kɩlaʋ yɔɔ yɔ.—Gal. 2:4; 5:2.

Bibl yɔɔdʋʋ kpayɩ se alɩwaatʋ ndʋ ɛyʋ nɔɔyʋ sɩkɩ yɔ, ɛɛtasɩɣ natʋyʋ sɩm, yaa mbʋ payɩ pɩlakɩ ɛ-cɔlɔ yɔ, pɩɩwɛɣnɩ ɖoŋ ɛ-yɔɔ. (Ekl. 9:5) Pɔɔlɩ yɔɔdʋʋ se “mansɩbɩ paɣtʋ yɔɔ” yɔ, ɛcaɣ ɛwɩlɩ se Moyizi paɣtʋ tɩtasɩ wɛnʋʋ ɖoŋ nɩɩyɩ ɛ-yɔɔ. Ɛlɛ Pɔɔlɩ taa kaatɛma se tisuu mbʋ ɛɛwɛnɩ kɩhɛyʋʋ pʋ-ñʋʋ taa kɩlaʋ yɔɔ yɔ pʋyɔɔ lɛ, ‘ɛɖaɣnɩ wɛʋ wezuu Ɛsɔ yɔɔ.’

“Paɣtʋ” yebina nɛ Pɔɔlɩ wɛtʋ lɛɣzɩ mbʋ. Ɛzɩma tɩyɛ? Ɛlɩzɩ pɩ-taa se: “Pɩtɩkɛ paɣtʋ tʋma yɔɔ pɩtɩŋɩɣna nɛ payaa ɛyʋ se siɣsiɣ tʋ, ɛlɛ Yesu Krɩstʋ yɔɔ tisuu ɖeke yɔɔ pɩtɩŋɩɣna.” (Gal. 2:16) Toovenim taa lɛ, Paɣtʋ labɩ nabʋyʋ nɛ pɩ-tɔm cɛyɩ siŋŋ. Pɔɔlɩ lɩzɩ Galaatii mba pɩ-taa se: “Pɔsɔzɩ-tʋ se pɩsa nɛ pawɩlɩ mbʋ paɣtʋ yɔɔ maʋ kɛnaa yɔ, nɛ pɩkɔɔ pɩsɩɩnɩ alɩwaatʋ ndʋ liɖe kɔŋ yɔ, ɛnʋ weyi peheyi-i lidaʋ tɔm yɔ.” (Gal. 3:19) Ɛɛɛ, Paɣtʋ wɩlɩ kpayɩ kpayɩ se ɛyaa mba patɩtalɩ pilim nɛ pɛkɛ kɩwɛɛkɩm laɖaa yɔ, paapɩzɩɣ nɛ pɔɖɔ Paɣtʋ yɔɔ nɛ pɩtalɩ pilim, nɛ pɩpɔzɩ-wɛ kɩlaʋ ŋgʋ kɩtalɩ pilim yɔ. Ye mbʋ, Paɣtʋ sɩnɩ ɛyaa nɛ peɖiɣzina se Yesu kaakɛnɩnɩ “liɖe.” Ye ɛyʋ nɔɔyʋ ɛwɛnɩ tisuu Yesu Krɩstʋ yɔɔ yɔ, Ɛsɔ pɩzɩɣ nɛ ɛyaa-ɩ se siɣsiɣ tʋ. (Gal. 3:24) Paya Pɔɔlɩ se siɣsiɣ tʋ mbʋ pʋyɔɔ yɔ, pɩtɩŋnɩ Paɣtʋ yɔɔ lɛ, ɛkɔm nɛ ɛwɛɛnɩ tisuu Yesu yɔɔ. Pʋyɔɔ lɛ, Pɔɔlɩ “[sɩbɩ] paɣtʋ yɔɔ” nɛ ɛɖaɣnɩ “wɛʋ wezuu Ɛsɔ yɔɔ.” Paɣtʋ tɩtasɩ wɛnʋʋ ɖoŋ ɛ-yɔɔ, ɛlɛ Ɛsɔ wɛnɩnɩ ɖoŋ ɛ-yɔɔ.

Pɔɔlɩ maɣaɣ Roma mba takayaɣ lɛ, ɛyɔɔdɩ lɩmaɣza ana a-ɖɔndɩ tɔm. Ɛyɔɔdaa se: “Mon-koobiya, mɩ ɖɔɖɔ ɩsɩbɩ Paɣtʋ hɔɔlʋʋ taa pɩtɩŋnɩ Krɩstʋ tomnaɣ yɔɔ . . . Poholi-ɖʋ Paɣtʋ tɛɛ, mbʋ pʋyɔɔ yɔ ɖɩsɩbɩ mbʋ pɩɖɩkaɣ-ɖʋ nʋmɔʋ yɔ pɩ-hɔɔlʋʋ taa.” (Roma 7:4, 6) Mayaɣ kanɛ nɛ Galaatii mba 2:19 wɩlɩɣ se pɩtɩkɛ sɩm mbʋ Paɣtʋ yeki nɛ kɩwɛɛkɩm laɖʋ nɔɔyʋ sɩ yɔ, pɩ-tɔm Pɔɔlɩ yɔɔdaɣ. Ɛlɛ ɛɛwɛɛ nɛ ɛyɔɔdʋʋ ɛzɩma piholuu ɛyʋ nɛ ɛwɛɛ ɛ-tɩ yɔɔ yɔ pɩ-tɔm na. Paɣtʋ taatasɩ wɛnʋʋ ɖoŋ nɩɩyɩ ɛ-yɔɔ nɛ ɛyaa lalaa mba pɛwɛ ɛzɩ ɛnʋ yɔ pɔ-yɔɔ. Tisuu mbʋ paawɛnɩ Krɩstʋ kɩhɛyʋʋ pʋ-ñʋʋ taa yɔɔ yɔ, piholi-wɛ nɛ pɛwɛɛ pa-tɩ yɔɔ.