1. Ɛbɛ Yehowa labɩ ɖa-taa paa anɩ?

YEHOWA hɔmnɩ ɖa-taa paa anɩ nɛ ewoni ɛ-cɔlɔ. (Yoh. 6:44) Maɣzɩ pɩ-yɔɔ nɛ ŋna. Yehowa tazɩ ɛyaa miiliyaarɩwaa sakɩyɛ mba pɛwɛ tɛtʋ yɔɔ yɔ pa-taa camɩyɛ lɛ, ɛna se nabʋyʋ wɛ ña-taa nɛ pɩmʋ ñɩm. Ɛnawa se ŋwɛnɩ laŋɩyɛ kɩbanɖɛ nɛ ŋkaɣ-ɩ sɔɔlʋʋ. (3 Aw. 28:9) Yehowa sɩmɩ-ŋ, ɛnɩɣ ñɔ-tɔm taa nɛ ɛsɔɔlɩ-ŋ. Pɩhɛzɩɣ ɖa-laŋɩyɛ siŋŋ!

2. Ɛzɩma Yesu sɩnɩ-ɖʋ se ɖɩtɩlɩ se Yehowa maɣzɩɣ ɖa-taa paa weyi lɛ ɛ-yɔɔ siŋŋ?

² Yehowa maɣzɩɣ ñɔ-yɔɔ siŋŋ nɛ ɛmaɣzɩɣ ɖɔɖɔ ño-koobiya Krɩstʋ ñɩma kpeekpe yɔɔ. Pɩsa nɛ ɖɩnɩɩ pɩ-taa lɛ, Yesu kpaɣ Yehowa nɛ ɛmaɣzɩnɩ ninɖiɣyu. Ye heŋ 100 taa lɛ 1 eleba yɔ, ɛbɛ ninɖiɣyu kaɣ labʋ? Ɛkaɣ “yebu heŋ 99 pʋŋ taa nɛ ewolo ɛñɩnɩ kʋɖʋm weyi eleba yɔ.” Alɩwaatʋ ndʋ ninɖiɣyu naɣ heu ɛnʋ yɔ, ɛ-taa ɛɛwɩɣnɩ-ɩ se pʋyɔɔ eleba. Ɛ-taa kaɣ labʋ leleŋ. Pɩkpɛlɩkɩɣ-ɖʋ suwe? Paa heu weyi lɛ ɛmʋ ñɩm Yehowa ɛsɩndaa. Yesu yɔɔdaa se: “Man-Caa weyi ɛwɛ ɛsɔdaa yɔ ɛtɩsɔɔlɩ se piya cikpesi sɩnɛ yɔ, sɩ-taa paa kʋɖʋmaɣ maɣmaɣ ele.”—Mat. 18:12-14.

3. Ɛbɛ tɔm ɖɩkaɣ yɔɔdʋʋ tɔm ñʋʋ kʋnɛ kɩ-taa?

³ Pɩtʋʋ fɛyɩ se ɖɩtɩsɔɔlɩ kpa se ɖɩla nɛ pitii ɖo-koobu nɔɔyʋ yɔɔɔ. Ɛzɩma ɖɩpɩzɩɣ ɖɩla nɛ ɖitaayele nɛ pituuli lalaa? Nɛ ye nɔɔyʋ ɛɖʋ-ɖʋ ɖɩwɩzɩyɛ yɔ, ɛbɛ ɖɩpɩzɩɣ nɛ ɖɩla ? Ðɩkaɣ cosuu tɔm pɔzʋʋ mbʋ pɩ-yɔɔ tɔm ñʋʋ kʋnɛ kɩ-taa. Ɛlɛ kajalaɣ lɛ, iyele nɛ ɖɩkpɛlɩkɩ mba paya-wɛ Maatiyee ñʋʋ 18 taa se “piya cikpesi sɩnɛ” yɔ pɔ-yɔɔ tɔm nɛ pɩkɩlɩ.

4. Mba payaɣ se “piya cikpesi sɩnɛ”?

⁴ Yesu tɔmkpɛlɩkɩyaa payaɣ se “piya cikpesi sɩnɛ,” paa pɩnzɩ nzɩ pɛwɛna yɔ. Paa pɩnzɩ ɛzɩma patɩɩwɛna yɔ, pɛwɛ “ɛzɩ piya cikpesi yɔ” mbʋ pʋyɔɔ yɔ pɔsɔɔlaa se Yesu ɛwɩlɩ-wɛ tɔm. (Mat. 18:3) Paa palɩnɩ lona ndɩ ndɩ taa nɛ sɔnzɩ ndɩ ndɩ taa nɛ pɛwɛɛnɩ wɛtʋ ndɩ ndɩ yɔ, pa-tɩŋa pɛwɛnɩ tisuu Krɩstʋ yɔɔ. Nɛ Krɩstʋ sɔɔlɩ-wɛ siŋŋ.—Mat. 18:6; Yoh. 1:12.

5. Ɛzɩma pɩlakɩ Yehowa alɩwaatʋ ndʋ nɔɔyʋ lakɩ nɛ pituuli ɛ-samaɣ taa nɔɔyʋ yaa pɩɖʋ-ɩ ɖɩwɩzɩyɛ yɔ?

⁵ Mba payaɣ-wɛ se “piya cikpesi sɩnɛ” yɔ, pa-tɩŋa pamʋ ñɩm Yehowa ɛsɩndaa. Pɩsa nɛ ɖɩna lɩmaɣza wena ɛwɛnɩ pɔ-yɔɔ yɔ lɛ, iyele nɛ ɖɩna lɩmaɣza wena ɖɩwɛnɩ piya yɔɔ yɔ. Piya mʋ ñɩm ɖɛ-ɛsɩndaa. Ðɩsɔɔlaa se ɖɩkandɩyɩ sɩ-yɔɔ mbʋ pʋyɔɔ yɔ sɩfɛyɩnɩ ɖoŋ, sɩfɛyɩnɩ wezuu caɣʋ taa lɛɣtʋ nɛ sɩfɛyɩnɩ lɔŋsɩnɖɛ ɛzɩ ɛyaa sɔsaa yɔ. Alɩwaatʋ ndʋ ɛyʋ nɔɔyʋ ɖʋʋ lɛlʋ ɖɩwɩzɩyɛ yɔ pɩcɛyɩɣ-ɖʋ, ɛlɛ alɩwaatʋ ndʋ paɖʋʋ pɩɣa nakɛyɛ ɖɩwɩzɩyɛ yɔ, pɩcɛyɩɣ-ɖʋ nɛ pɩkɩlɩ. Mbʋ ɖɔɖɔ Yehowa sɔɔlaa se ɛkandɩyɩ ɖɔ-yɔɔ. Pɩcɛyɩɣ-ɩ yaa halɩ pɩwɩzɩɣ-ɩ alɩwaatʋ ndʋ ɛnaɣ se nɔɔyʋ laba nɛ pituuli ɛ-samaɣ taa nɔɔyʋ yaa pɩɖʋ-ɩ ɖɩwɩzɩyɛ yɔ!—Iza. 63:9; Mark. 9:42.

6. Ɛzɩ 1 Kɔrɛntɩ mba 1:26-29 yɔɔdʋʋ yɔ, lɩmaɣza wena ɛjaɖɛ yɔɔ mba wɛnɩ Yesu tɔmkpɛlɩkɩyaa yɔɔ?

⁶ Hɔɔlʋʋ lɛɛkʋ ŋgʋ taa ɖɔɖɔ Yesu tɔmkpɛlɩkɩyaa wɛ ɛzɩ “piya cikpesi” yɔ? Toovenim taa lɛ, mba ɛjaɖɛ kpakɩɣ se pɔ-tɔm cɛyaa? Ñɩm tɩnaa, mba pa-hɩla sɛwa yɔ nɛ ɖoŋ tɩnaa. Ɛlɛ ɖoŋ ɖoŋ lɛ, Yesu tɔmkpɛlɩkɩyaa tɩkɛ ñɩm tɩnaa, pa-hɩla tɩsɛɛ nɛ patɩkɛ ɖoŋ tɩnaa. Pʋyɔɔ ɛjaɖɛ yɔɔ ɛyaa maɣzɩɣ se pɔ-tɔm tɩcɛyɩ nɛ pɛwɛ ɛzɩ “piya cikpesi” nzɩ sɩtɩlɩɩ pʋyʋ yɔ. (Kalɩ 1 Kɔrɛntɩ mba 1:26-29.) Ɛlɛ pɩtɩkɛ lɩmaɣza ana Yehowa wɛnɩ pɔ-yɔɔ.

7. Lɩmaɣza wena Yehowa sɔɔlaa se ɖɩwɛɛnɩ ɖo-koobiya yɔɔ?

⁷ Yehowa sɔɔlɩ ɛ-sɛyaa tɩŋa, paa papaɣzʋʋ-ɩ sɛʋ yɔ pileɖaa yaa pitileɖi yɔ. Ðo-koobiya kpeekpe mʋ ñɩm Yehowa ɛsɩndaa, pʋyɔɔ lɛ pɩwɛɛ se pamʋ ñɩm ɖɛ-ɛsɩndaa ɖɔɖɔ. Ðɩñɩnɩɣ se ɖɩsɔɔlɩ “ɛjaɖɛ kpeekpe yɔɔ koobiya,” pɩtɩkɛ pa-taa nabɛyɛ ɖeke. (1 Pɩy. 2:17) Pɩwɛɛ se ɖɩsɔɔlɩ faaa se ɖɩla mbʋ payɩ ɖɩpɩzɩɣ yɔ nɛ ɖɩkandɩyɩ pɔ-yɔɔ, nɛ ɖɩmaɣzɩ pɔ-yɔɔ. Ye ɖɩnawa se ɖɩlabɩ nabʋyʋ nɛ pɩcɛyɩ nɔɔyʋ yaa ɖɩyʋsɩnɩ nɔɔyʋ yɔ, pɩtɩmʋna se ɖɩla ɛzɩ nabʋyʋ tɩla yɔ nɛ ɖɩmaɣzɩ se pɩwɛɛ se ɛkpaɣ nɛ ekpeɣ-ɖʋ nɛ ɛsɔɔ pɩ-yɔɔ. Ɛbɛ pɩzɩɣ piyele nɛ nabɛyɛ taa wɩɩ? Pɩtɩla lone nɖɩ ɖɩ-taa koobiya nabɛyɛ caɣaa nɛ papaɣlɩ yɔ pʋyɔɔ lɛ, pɩlakɩ-wɛ ɛzɩ lalaa kɩlɩ-wɛ yɔ. Lalaa wɛʋ toovenim taa yɔ pitileɖita, nɛ patɩkpɛlɩkɩtɩ ɛzɩma pekpeɣ ɛyaa lalaa alɩwaatʋ ndʋ paba yʋsʋʋnɩ-wɛ yɔ. Paa pɩtɩɩkɛ suwe yɔ, pɩwɛɛ se ɖɩla ɖo-ɖoŋ ɖeɖe nɛ laŋhɛzɩyɛ ɖaɣnɩ wɛʋ ɖɛ-hɛkʋ taa. Pɩtasɩ lɛ, ɛyʋ weyi koobiya lalaa lakasɩ ɖʋʋ-ɩ ɖɩwɩzɩyɛ ɖoŋ ɖoŋ yɔ, pɩwɛɛ se ɛtɩlɩ se pɩkɛ wɛtʋ ndʋ tɩfɛyɩ ɖeu yɔ nɛ pɩmʋnaa se ɛñaɣ pana nɛ ɛlɛɣzɩ. Ye ɛlabɩ mbʋ yɔ, ehikiɣ taa leleŋ nɛ piyeki nɛ taabalɩyɛ kɩbanɖɛ wɛɛ ɛ nɛ e-koobiya pɛ-hɛkʋ taa.

8. Lɩmaɣza wena Yesu alɩwaatʋ taa ɛyaa kaawɛna nɛ awɛɛnɩ ɖoŋ ɛ-tɔmkpɛlɩkɩyaa yɔɔ?

⁸ Ɛbɛ yɔɔ Yesu yɔɔdɩ “piya cikpesi sɩnɛ” sɩ-tɔm? Ɛ-tɔmkpɛlɩkɩyaa kaapɔzɩ-ɩ se: “Toovenim taa lɛ, akɛ sɔsɔ ɛsɔdaa Kewiyaɣ taa?” (Mat. 18:1) Yuuda ñɩma sakɩyɛ kaasɔɔlaa se ɛyaa lalaa ɩmaɣzɩ se pɔ-tɔm cɛyaa. Takayɩsɩ mayʋ nɔɔyʋ yɔɔdaa se: “Mbʋ pɩ-tɔm kaakɩlɩ cɛyʋʋ ɛyaa wezuu caɣʋ taa yɔ, mbʋ lɛ se lalaa ɩha-wɛ ñamtʋ nɛ pa-hɩla sɛɛ.”

9. Ɛbɛ pɩɩwɛɛ se Yesu tɔmkpɛlɩkɩyaa ɩla?

 ⁹ Yesu kaanawa se Yuuda ñɩma sakɩyɛ ñɩnaɣ se pɔ-tɔm ɛcɛyɩ nɛ pɩkɩlɩ lalaa, nɛ pɩɩwɛɛ se ɛ-tɔmkpɛlɩkɩyaa ɩñaɣ pana nɛ pɛlɛɣzɩ pa-lɩmaɣza ana. Eheyi-wɛ se: “Weyi ɛkɛ sɔsɔ mɩ-hɛkʋ taa yɔ, ɛpɩsɩ cikpelu, nɛ weyi ɛɖɛɣ nɔɔ yɔ, ɛpɩsɩ lɩmɖʋyʋ.” (Luka 22:26) Ðɩkpakɩɣ ɖa-tɩ ɛzɩ “cikpelu” yɔ alɩwaatʋ ndʋ ‘ɖɩkpakɩɣ lalaa se pakɩlɩ-ɖʋ’ yɔ. (Fil. 2:3) Ðɩñakɩ pana se ɖɩwɛɛnɩ wɛtʋ ndʋ nɛ pɩkɩlɩ lɛ, piyeki nɛ ɖɩɩkɩlɩɣ labʋ nɛ pituuluu lalaa.

10. Pɔɔlɩ lɔŋ tasʋʋ mbʋ pɩwɛɛ se ɖɩlabɩnɩ tʋmɩyɛ?

¹⁰ Paa ɖo-koobu weyi lɛ ɛkɩlɩ-ɖʋ hɔɔlʋʋ nakʋyʋ taa. Ye ɖɩkaŋ ɖa-lɩmaɣza pɛ-wɛtʋ kɩbandʋ yɔɔ yɔ, pɩwɛɣ-ɖʋ kɛlɛʋ se ɖɩnɩɩ pɩ-taa mbʋ. Pɩwɛɛ se ɖɩlabɩnɩ tʋmɩyɛ lɔŋ weyi apostoloo Pɔɔlɩ tasɩ Kɔrɛntɩ mba yɔ; ɛyɔɔdaa se: “Ayeki se ŋwɛɛ ndɩ nɛ ɛyʋ lɛlʋ? Toovenim taa lɛ, ɛbɛ ŋwɛna nɛ patɩha-ŋ pʋ kɩhaʋ? Ye paha-ŋ pʋ kɩhaʋ toovenim taa yɔ, ɛbɛ yɔɔ ŋkʋndʋʋ ɛzɩ patɩha-ŋ pʋ kɩhaʋ yɔ?” (1 Kɔr. 4:7) Pʋyɔɔ lɛ, pɩtɩpɔzɩ kpa se ɖɩsɔɔlɩ se ɖɩhɔ lalaa lɩmaɣza nɛ ɖɩkɔnɩ ɖa-maɣmaɣ ɖɔ-yɔɔ yaa ɖɩmaɣzɩ se ɖɩkɩlɩ lalaa. Kɩɖaŋ nɩɩyɩ yɔ: Koobiya abalɩñɩma mba pɔyɔɔdʋʋ samaɣ taa tɔm camɩyɛ kpem yɔ, yaa koobiya halɩñɩma mba pɩwɛ-wɛ kɛlɛʋ se papaɣzɩ kpɛlɩkɩnʋʋ ɛyaa sakɩyɛ Bibl yɔ, pɩwɛɛ se paa ɛzɩmtaa lɛ, mbʋ papɩzɩɣ labʋ yɔ pɛcɛlɩ pɩ-samtʋ Yehowa.

11. Ɛbɛ ɖɩkpɛlɩkɩɣ wiyaʋ nɔɔyʋ nɛ e-yom kɩɖaʋ ŋgʋ Yesu hawa yɔ kɩ-taa?

¹¹ Yesu paɣ ɛ-wayɩ tɩŋɩyaa se pataala nɛ pituuli lalaa nɛ pɩtɛ lɛ, ɛha wiyaʋ nɔɔyʋ nɛ e-yom pa-kɩɖaʋ. Wiyaʋ kpeɣ yom kɩmɩyɛ sɔsɔɖɛ nɖɩ ɛtaapɩzɩɣ kpa se ɛhɛyɩ yɔ. Pʋwayɩ lɛ, yom kʋɖʋm ɛnʋ ekizi se eekpeɣu yom lɛlʋ kɩmɩyɛ cikpeɖe. Pɩtɛmnaa se wiyaʋ ɖɩɣ yom kɩdɛkɛdʋ ɛnʋ salaka. Suwe pɩkpɛlɩkɩɣ-ɖʋ? Yesu yɔɔdaa se: “Mbʋ ɖɔɖɔ man-Caa weyi ɛwɛ ɛsɔdaa yɔ, ɛkaɣ-mɩ labʋ ye mɩ-taa paa weyi eekpeɣu e-koobu nɛ ɛ-laŋɩyɛ pilim kɔyɔ.”—Mat. 18:21-35.

12. Ye ɖikizaa se ɖiikpeɣu nɔɔyʋ yɔ, ɛzɩma pɩcɛyɩɣ lalaa?

¹² Yom ɛnʋ ɛ-lakasɩ tɩcɛyɩ yom lɛlʋ ɖeke ɛlɛ sɩcɛyɩ lalaa ɖɔɖɔ. Kajalaɣ lɛ, ɛtɩla ɛ-taabalʋ camɩyɛ lakasɩ nɛ ɛtɩna ɛ-pʋtɔdɩyɛ nɛ “ɛɖʋ-ɩ salaka se ɛwɛɛ peeɖe nɛ pɩkɔɔ pɩsɩɩnɩ alɩwaatʋ ndʋ ɛhɛyɩ ɛ-kɩmɩyɛ yɔ.” Nabʋlɛ lɛ, ɛ-lakasɩ cɛyɩ yomaa lalaa mba pana mbʋ pɩlaba yɔ. Alɩwaatʋ ndʋ “ɛ-taabalaa yomaa lalaa na mbʋ pɩlaba yɔ lɛ, pɩwɩzɩ-wɛ siŋŋ.” Mbʋ ɖɔɖɔ ɖa-lakasɩ wɛɣnɩ ɖoŋ ɛyaa lalaa yɔɔ. Ye nɔɔyʋ ɛlabɩ-ɖʋ mbʋ pɩfɛyɩ ɖeu yɔ nɛ ɖikizi se ɖiikpeɣ-i, ɛbɛ pɩzɩɣ nɛ pɩla? Kajalaɣ lɛ, ɖa-lakasɩ cɛyɩɣ-ɩ mbʋ pʋyɔɔ yɔ ɖikizaa se ɖiikpeɣ-i nɛ pɩtɩla ɖa-paa fɛyɩnɩ-ɩ nɛ ɖɩɩwɩlɩɣ-ɩ sɔɔlɩm. Nabʋlɛ lɛ, pɩcɛyɩɣ ɛgbɛyɛ taa ñɩma lalaa alɩwaatʋ ndʋ panaɣ se laŋhɛzɩyɛ fɛyɩ ɖa nɛ ɛyʋ ɛnʋ ɖɛ-hɛkʋ taa yɔ.

13. Mbʋ pɩtalɩ nʋmɔʋ lɩzɩyʋ nɔɔyʋ yɔ, ɛbɛ pɩkpɛlɩkɩ-ŋ?

¹³ Alɩwaatʋ ndʋ ɖikpeɣu ɖo-koobiya yɔ, pɩwazɩɣ ɖa-maɣmaɣ nɛ lalaa. Payaɣ nʋmɔʋ lɩzɩyʋ nɔɔyʋ se Crystal (ɖɩlɛɣzɩ ɛ-hɩɖɛ.) Wɛtʋ ndʋ tɩɩtalɩ-ɩ. Ɛgbɛyɛ taa koobu halɩñɩnʋ nɔɔyʋ kaaɖʋ-ɩ ɖɩwɩzɩyɛ. Crystal yɔɔdaa se: “Kañatʋ tɔm ndʋ ɛyɔɔdʋʋ yɔ, nabʋyʋ taa tɩsɔkɩ-m ɛzɩ sɩɣa yɔ. Halɩ mantaasɔɔlɩ se ma nɛ ɩ ɖɩlɩɩ tɔm susuu. Maapaɣzɩ lesuu man-taa leleŋ nɛ kpekpeka ŋga maawɛnɩ tɔm susuu taa yɔ.” Crystal maɣzaɣ se ɛnʋ wɛnɩ toovenim se pɩwɩzɩ-ɩ. Ɛlɛ ɛtɩcaɣnɩ koobu ɛnʋ yaa ɛtɩka ɛ-lɩmaɣza ɛ-maɣmaɣ ɛ-yɔɔ yaa ɛzɩma pɩlakɩ-ɩ yɔ pɩ-yɔɔ. Ɛbɛ yɔɔ? Mbʋ pʋyɔɔ yɔ eluzi ɛ-tɩ nɛ ɛɖɔ Bibl lɔŋ tasʋʋ mbʋ pɩwɛ tɔm ñʋʋ “Pardonnez de tout votre cœur” ŋgʋ kɩwɛ 15 octobre 1999 tɛ Feŋuu Tilimiye (Fransɩɩ) taa yɔ pɩ-yɔɔ. Ekpeɣ e-koobu. Crystal yɔɔdaa se: “Lɛɛlɛɛyɔ manɩ  pɩ-taa se ɖa-tɩŋa ɖɩwɛɛ nɛ ɖɩñakɩ pana se ɖɩlɛɣzɩ ɖɛ-wɛtʋ, nɛ Yehowa ɖaŋ kpam se ekpeɣ-ɖʋ paa kɩyakʋ ŋgʋ. Mehiɣ laŋɩyɛ hɛzʋʋ siŋŋ. Nɛ manɖaɣnɩ wɛʋ taa leleŋ taa.”

14. (a) Ɛzɩ Maatiyee 18:21, 22 yɔɔdʋʋ yɔ, pɩtɩla pɩɩlabɩ apostoloo Pɩyɛɛrɩ kaɖɛ se ɛla we? (b) Nɛ suwe ŋkpɛlɩkɩɣ tɔm ndʋ Yesu cosi-i yɔ tɩ-taa?

¹⁴ Ðɩnawa se pɩpɔzʋʋ se ɖikpeɣ; nɛ mbʋ wɛnɩ ɖeu. Ɛlɛ, pɩpɩzɩɣ nɛ pɩwɛɛ-ɖʋ kaɖɛ se ɖɩla mbʋ. Pɩtɩla pɩɩlabɩ apostoloo Pɩyɛɛrɩ mbʋ alɩwaatʋ natʋyʋ. (Kalɩ Maatiyee 18:21, 22.) Ɛbɛ pɩzɩɣ nɛ pɩsɩnɩ-ɖʋ? Kajalaɣ lɛ, maɣzɩ tam ɛzɩma Yehowa kpeɣ-ŋ yɔ pɩ-yɔɔ. (Mat. 18:32, 33) Ðɩtɩmʋna se ɛkpaɣ nɛ ekpeɣ-ɖʋ, ɛlɛ ekpeɣ-ɖʋ faaa. (Keɣa 102:8-10) Alɩwaatʋ kʋɖʋmtʋ ndʋ tɩ-taa lɛ, “pɩkɛnɩ-ɖʋ ɖɔɖɔ kɩjɛyʋʋ se ɖɩsɔɔlɩ ɖama.” Ye mbʋ, kpaɣʋ nɛ kpeɣu tɩkɛ mbʋ ɖɩpɩzɩɣ nɛ ɖɩlɩzɩ se ɖɩlakɩ yaa ɖɩɩlakɩ yɔ. Pɩkɛnɩ-ɖʋ kɩjɛyʋʋ se ɖikpeɣ ɖo-koobiya. (1 Yoh. 4:11) Nabʋlɛ lɛ, maɣzɩ mbʋ pɩlakɩ alɩwaatʋ ndʋ ŋkpeɣu yɔ pɩ-yɔɔ. Ðɩpɩzɩɣ nɛ ɖɩsɩnɩ weyi ɛlabɩ-ɖʋ mbʋ pɩfɛyɩ ɖeu yɔ, ɖiyele nɛ nɔɔ kʋɖʋmaɣ wɛɛ ɛgbɛyɛ taa, ɖɩkandɩyɩ ɖa nɛ Yehowa ɖa-taabalɩyɛ yɔɔ, nɛ ɖihiɣ laŋɩyɛ hɛzʋʋ. (2 Kɔr. 2:7; Kol. 3:14) Kɛdɛzaɣ lɛ, tɩmɩ weyi ɛpɔzʋʋ-ŋ se ŋkpeɣ-i yɔ ɛ-yɔɔ. Taayele nɛ Sataŋ wɛɛkɩ laŋhɛzɩyɛ nɖɩ ɖɩwɛ ña nɛ koobiya mɩ-hɛkʋ taa yɔ. (Efɛz. 4:26, 27) Ye ɖɩtɩsɔɔlɩ se ɖɩtɔlɩ Sataŋ kpaca taa yɔ, pɩpɔzʋʋ se Yehowa ɛsɩnɩ-ɖʋ.

15. Ɛzɩ Koloosi mba 3:13 yɔɔdʋʋ yɔ, ye koobu nɔɔyʋ ɛlabɩ nabʋyʋ nɛ pɩwɩzɩ-ŋ yɔ, ɛbɛ pɩwɛɛ se ŋla?

¹⁵ Ye koobu nɔɔyʋ ɛlabɩ nabʋyʋ nɛ pɩwɩzɩ-ŋ siŋŋ yɔ, ɛbɛ pɩwɛɛ se ŋla? La mbʋ payɩ ŋpɩzɩɣ yɔ nɛ laŋhɛzɩyɛ wɛɛ mɩ-hɛkʋ taa. Heyi Yehowa ɛzɩma pɩlakɩ-ŋ yɔ. Pɔzɩ Yehowa se ɛsɩnɩ weyi ɛyʋsɩnɩ-ŋ yɔ, nɛ ɛsɩnɩ-ŋ nɛ ŋna wɛtʋ kɩbandʋ ndʋ ɛyʋ ɛnʋ ɛwɛna yɔ; wɛtʋ ndʋ ɛsɔɔlɩ ɛyʋ ɛnʋ ɛ-cɔlɔ yɔ. (Luka 6:28) Ye ŋŋpɩzɩɣ se ŋsɔɔ mbʋ ño-koobu labɩ-ŋ yɔ pɩ-yɔɔ yɔ, maɣzɩ nɛ ŋna nʋmɔʋ kɩbaŋʋ ŋgʋ  kɩ-yɔɔ ŋpɩzɩɣ ŋtɩŋna nɛ ŋyɔɔdɩnɩ-ɩ yɔ. Paa ɛzɩmtaa lɛ, pɩwɛɣ ɖeu se ŋmaɣzɩ se koobu ɛnʋ ɛtɩɖʋ ɛ-taa faɖaɖa nɛ ɛɖʋ-ŋ ɖɩwɩzɩyɛ. (Mat. 5:23, 24; 1 Kɔr. 13:7) Ŋŋyɔɔdʋʋnɩ-ɩ lɛ, ɖʋ ña-taa se ɛɛwɛnɩ lɩmaɣza kɩbana. Ye ɛtɩsɔɔlɩ se ɩla laŋhɛzɩyɛ yɔ, ɛbɛ pɩwɛɛ se ŋla? Wolo pɩ-yɔɔ nɛ ‘ɛ-tɔm ɛtaanɩ-ŋ.’ Taayele wɩlʋʋ suuɖu ño-koobu. (Kalɩ Koloosi mba 3:13.) Kɔzɩ kɔzɩ lɛ, taacaɣnɩ-ɩ mbʋ pʋyɔɔ yɔ, pɩpɩzɩɣ nɛ pɩwɛɛkɩ ña nɛ Yehowa mɩ-taabalɩyɛ. Taayele kpa nɛ nabʋyʋ tuuli-ŋ. Ye ŋlakɩ mbʋ yɔ, ŋwɩlɩɣ se ŋsɔɔlɩ Yehowa nɛ pɩkɩlɩ pɩtɩŋa.—Keɣa 118:165.

16. Sʋʋtʋ ndʋ ɖa-tɩŋa payɩ ɖɩwɛna?

¹⁶ Ðɩwɛnɩ ɛsɩmɩyɛ se ɖa nɛ ɖo-koobiya ɖɩpɩzɩɣ nɛ ɖɩsɛɛ Yehowa ɛzɩ “ewiɖe kʋɖʋmɖɩyɛ” nɖɩ “ninɖiɣyu kʋɖʋm” ɖiyiɣ yɔ! (Yoh. 10:16) Pɔñɔɔzɩ pa-tɩ se pala Yehowa sɔɔlɩm takayaɣ hɔɔlʋʋ 165 yɔɔdʋʋ se: “Nɔɔ kʋɖʋmaɣ ŋga . . . kɛwɛɛ nɛ kawazɩɣ ña ɖɔɖɔ. Ye mbʋ, pɩkɛnɩ-ŋ sʋʋtʋ se ŋɖʋ nesi nɛ pɛcɛyɩsɩ nɔɔ kʋɖʋmaɣ ŋga.” Pʋyɔɔ lɛ, pɩwɛɛ se “ɖɩñakɩ pana se ɖɩwɛɛnɩ Yehowa lɩmaɣza ɖo-koobiya yɔɔ.” Yehowa ɛsɩndaa lɛ, ɖa-tɩŋa payɩ ɖɩkɛ ɛyaa cikpema mba pamʋ ñɩm yɔ. Lɩmaɣza ana ɖɔɖɔ ŋwɛnɩ ño-koobiya yɔɔ? Mbʋ payɩ ŋlakɩ se ŋsɩnɩ-wɛ nɛ ŋwɩlɩɣ se ŋmaɣzɩɣ pɔ-yɔɔ yɔ, Yehowa naɣ nɛ pɩmʋ ñɩm ɛ-ɛsɩndaa.—Mat. 10:42.

17. Ɛbɛ ɖɩtɛm ɖa-taa se ɖɩlakɩ?

¹⁷ Ðɩsɔɔlɩ ɖo-koobiya Krɩstʋ ñɩma. Pʋyɔɔ lɛ, ɖɩtɛm ɖa-taa se “ɖɩɩsɩɣ pɩyɛ nɖɩ ɖituuluu yɔ yaa mbʋ pɩpadɩɣ ɛyʋ yɔ koobu nɔɔyʋ ɛsɩndaa.” (Roma 14:13) Ðɩkpakɩɣ ɖo-koobiya se pakɩlɩ-ɖʋ, nɛ ɖɩsɔɔlaa se ɖikpeɣ-wɛ nɛ ɖa-laŋɩyɛ pilim. Pɩtɩpɔzɩ se ɖiyele nɛ mbʋ lalaa lakɩ yɔ, pituuli-ɖʋ. Ɛlɛ, ɖɩtɛ ɖa-taa se ɖiwoki pɩ-yɔɔ nɛ “ɖɩñɩnɩ mbʋ pɩkɔŋnɩ laŋhɛzɩyɛ nɛ mbʋ pɩsɩɣnɩ-ɖʋ se ɖɩkpazɩ ɖama ɖoŋ yɔ.”—Roma 14:19.