1. Mbʋ pɩkpaɣ ɛyaa sɔɔndʋ yɔ, pɩ-taa nabʋyʋ lɛ ɛbɛ?

 IYELE nɛ ɖɩna wɛtʋ ndɩ ndɩ ndʋ koobiya nabɛyɛ katɩ pe-wezuu caɣʋ taa yɔ. Nestor nɛ ɛ-halʋ María, paasɔɔlaa se powolo nɛ paɖʋ nesi ɖenɖe pɩpɔzʋʋ tɔm susuyaa nɛ pɩkɩlɩ yɔ. * Ɛlɛ pɩsa nɛ pala mbʋ lɛ, pɩkaɣ pɔzʋʋ se pɛlɛɣzɩ ɛzɩma pacakaɣ wezuu yɔ. Ɛlɛ sɔɔndʋ kpaɣaɣ-wɛ se ye palɩzaa se pacakɩ wezuu kɛlɛʋ yɔ, pɩtɩla paakaɣ hiɣu taa leleŋ siŋŋ. Alɩwaatʋ ndʋ Biniam pɩsɩ Yehowa Aseɣɖe Tʋ yɔ, pakaɖaɣnɩ ɖɛ-Ɛsɔ sɛtʋ tʋmɩyɛ ɛjaɖɛ nɖɩ ɖɩ-taa ɛɛwɛɛ yɔ, nɛ eɖiɣzinaa se ɛpɩsʋʋ Aseɣɖe Tʋ yɔ, papɩzɩɣ nɛ panazɩ-ɩ. Piiyeba nɛ sɔɔndʋ kpaɣ-ɩ. Ɛlɛ mbʋ pɩkpaɣaɣ-ɩ sɔɔndʋ nɛ pɩkɩlɩ yɔ, mbʋ yɔ: Ɛzɩma ɛ-hɔʋ taa mba kaɣ labʋ alɩwaatʋ ndʋ patɩlɩɣ Ɛsɔ sɛtʋ ɛgbɛyɛ nɖɩ ɖɩ-taa ɛwɛ lɛɛlɛɛyɔ yɔ. Ðɔkɔtɔnaa wili Valérie lɛ, pana se ɛwɛnɩ kansɛɛrɩ kʋdɔŋ ŋgʋ kɩ-tɔm wɛ kaɖɛ siŋŋ yɔ; nɛ pɩɩwɛ-ɩ kaɖɛ se ehiɣ ɖɔkɔtɔ weyi ɛñaŋ tisuu mbʋ ɛwɛna pɩlɩɩnɩ calɩm yɔɔ yɔ alɩwaatʋ ndʋ ɛlakɩ-ɩ tʋmɩyɛ yɔ. Sɔɔndʋ kpaɣaɣ-ɩ se pɩtɩla ɛsɩkɩ, nɛ pɩmʋnɩ mbʋ se sɔɔndʋ ɛkpa-ɩ.

2. Ɛbɛ yɔɔ pɩpɔzʋʋ se ɖɩñaɣ pana nɛ ɖɩwa ɖɔ-sɔɔndʋ?

² Wiɖiyi sɔɔndʋ tɛmɩ-ŋ kpaʋ ɛzɩ koobiya mba yɔ? Sɔɔndʋ tɛm kpaʋ ɖa-taa sakɩyɛ. Ye ɖɩtɩkpɛlɩkɩ ɛzɩma ɖɩwa ɖɔ-sɔɔndʋ yɔ, pɩtʋʋ fɛyɩ se ɖɩkaɣ kpaɣʋ lɩmaɣza kɩdɛkɛda nɛ apɩzɩɣ nɛ awɛɛnɩ ɖoŋ kɩdɛkɛdɩŋ ɖa nɛ Yehowa ɖa-taabalɩyɛ yɔɔ. Mbʋ Sataŋ sɔɔlaa. Pɩtasɩ lɛ, ɛñakɩ pana se ɛtɩŋnɩ ɖɔ-sɔɔndʋ yɔɔ nɛ eyele nɛ ɖɩmaanɩ Yehowa paɣtʋ yɔɔ; tɩ-taa natʋyʋ lɛ paɣtʋ ndʋ ɛɖʋwa se ɖisusi tɔm kɩbandʋ yɔ. (Natʋ 12:17) Sataŋ kɛ ɛyʋ kɩdɛkɛdʋ, ɛwɛ kañatʋ, nɛ ɛwɛ ɖoŋ ɖɔɖɔ. Ɛlɛ ŋpɩzɩɣ nɛ ŋkandɩyɩ ña-tɩ yɔɔ nɛ ɛtaahiɣ-ŋ. Ɛzɩma tɩyɛ?

3. Ɛbɛ kaɣ-ɖʋ sɩnʋʋ se ɖɩwa ɖɔ-sɔɔndʋ?

³ Ye ɖa-taa ɛtɛma se Yehowa sɔɔlɩ-ɖʋ nɛ ɛkaɣ-ɖʋ sɩnʋʋ paa ɛzɩmtaa yɔ, Sataŋ ɛɛkaɣ pɩzʋʋ eyele nɛ sɔɔndʋ kpa-ɖʋ.  (Keɣa 117:6) Weyi ɛma Keɣa 117 yɔ, ɛɛkatɩ kaɖɛ wɛtʋ ndɩ ndɩ. Ɛɛwɛnɩ koyindinaa sakɩyɛ nɛ pa-taa nabɛyɛ kaawɛ lona sɔsɔna taa (kalɩtʋ 9, 10). Nabʋyʋ taa ɛwɛɛ nɩɣzɛ taa siŋŋ (kalɩtʋ 13). Nɛ Yehowa kaahɔm ɛ-nɩŋgbaaŋ siŋŋ (kalɩtʋ 18). Paa mbʋ yɔ, Keɣa maɖʋ ɛnʋ ete hendu se: “Sɔɔndʋ ɛɛtasɩ-m kpaʋ.” Ɛbɛ kaayeba nɛ ɛmaɣzɩɣ se ɛwɛ lone nɖɩ ɖɩ-taa nabʋyʋ ɛɛlakɩ-ɩ yɔ? Ɛɛnawa se paa Yehowa, ɛ-Caa weyi ɛwɛ ɛsɔdaa yɔ, ɛɛhɔm ɛ-nɩŋgbaaŋ yɔ, ɛsɔɔlɩ-ɩ siŋŋ. Keɣa maɖʋ ɛnʋ, ɛ-taa kaatɛma se paa wɛtʋ ndʋ ɛkataa yɔ, paa ɛzɩmtaa lɛ, ɛ-Ɛsɔ kʋsɔɔlʋ kaɣ sɔɔlʋʋ se ɛsɩnɩ-ɩ.—Keɣa 117:29.

4. Ye ɖa-taa ɛtɛma se Ɛsɔ sɔɔlɩ-ɖʋ yɔ, sɔɔndʋ ndʋ ɖɩpɩzɩɣ nɛ ɖɩwa?

⁴ Pɩwɛɛ se ɖa-taa ɛtɛ se Yehowa sɔɔlɩ ɖa-taa paa anɩ. Ye ɖa-taa ɛtɛma mbʋ yɔ, pɩkaɣ-ɖʋ sɩnʋʋ nɛ ɖɩwa sɔɔndʋ naadozo ndʋ ɖa-taa sakɩyɛ seɣ yɔ. Ndʋ yɔ: (1) sɔɔndʋ ndʋ tɩkpaɣ-ɖʋ se ɖɩɩpɩzɩɣ nɛ ɖɩcɔnɩ ɖɔ-hɔʋ yɔɔ yɔ, (2) ɛyʋ sɔɔndʋ seu, nɛ (3) sɩm sɔɔndʋ. Koobiya mba pɔ-tɔm ɖɩyɔɔdɩ tayʋʋ kajalaɣ ñɩmbʋ taa yɔ, papɩzaa nɛ pawa sɔɔndʋ ndʋ tɩkpaɣ-wɛ yɔ mbʋ pʋyɔɔ yɔ, pa-taa kaatɛma se Ɛsɔ sɔɔlɩ-wɛ.

5. Wɛtʋ ndʋ pɩzɩɣ nɛ tiyele nɛ sɔɔndʋ kpa hɔʋ ñʋʋdʋ nɔɔyʋ siŋŋ? (Cɔnɩ takayaɣ huyuu yɔɔ kɩlɛmʋʋ.)

⁵ Hɔʋ ñʋʋdʋ weyi ɛkɛ Krɩstʋ tʋ yɔ, eeleɣyiɣni tʋmɩyɛ nɖɩ ɛwɛna se ɛcɔnɩ ɛ-hɔʋ tomnaɣ yɔɔ kɩcɛyɩm ɖeɖe yɔ. (1 Tim. 5:8) Ye ŋkɛ hɔʋ ñʋʋdʋ yɔ, kʋdɔŋ kɩɖɛɖɛʋ ŋgʋ kɩlɩwa pitileɖita yɔ kɩ-alɩwaatʋ taa, pɩtɩla sɔɔndʋ kpaɣaɣ-ŋ se ŋkaɣ lesuu ña-tʋmɩyɛ. Pɩtɩla sɔɔndʋ kpaɣaɣ-ŋ se ŋŋkaɣ pɩzʋʋ nɛ ŋya ñɔ-hɔʋ tɔɔnaɣ yaa ŋhɛyɩ kuduyuu yɔɔ. Pɩtasɩ lɛ, pɩtɩla sɔɔndʋ kpaɣaɣ-ŋ se ye ŋlesi ña-tʋmɩyɛ yɔ, ŋŋkaɣ pɩzʋʋ nɛ ŋhiɣ lɛɛɖɛ. Yaa pɩtɩla ɛzɩ Nestor nɛ María, mba pɔ-tɔm ɖɩyɔɔdaa nɛ pɩɖɛɛ yɔ, ŋmaɣzaɣ se ŋŋkaɣ pɩzʋʋ nɛ ŋcaɣ wezuu kɛlɛʋ. Sataŋ pɩzaa nɛ ɛtɩŋnɩ sɔɔndʋ ndʋ tɩ-yɔɔ nɛ ɛɖɩɣ ɛyaa sakɩyɛ nʋmɔʋ nɛ peyele Yehowa sɛʋ.

6. Lɩmaɣza wena Sataŋ ñakɩ pana se eyele nɛ ɖɩwɛɛna?

⁶ Sataŋ ñakɩ pana se eyele nɛ ɖɩmaɣzɩ se Yehowa tɩsɔɔlɩ-ɖʋ nɛ ɛɛkaɣ-ɖʋ sɩnʋʋ se ɖɩcɔnɩ ɖɔ-hɔʋ yɔɔ. Pɩpɩzɩɣ piyele nɛ ɖɩmaɣzɩ se pɩpɔzʋʋ se ɖɩla mbʋ payɩ ɖɩpɩzɩɣ yɔ nɛ ɖitaalesi tʋmɩyɛ nɖɩ ɖɩlakɩ yɔ paa pɩpɔzʋʋ se ɖɩmaɣnɩ Bibl paɣtʋ kila yɔɔ yɔ.

7. Lidaʋ tɔm ndʋ Yesu heyiɣ-ɖʋ?

⁷ Yesu sɩm Caa camɩyɛ nɛ pɩkpaɖɩ paa anɩ; nɛ eheyiɣ-ɖʋ se Ɛsɔ ‘tɩlɩ mbʋ pɩtɛɖɩɣ-ɖʋ yɔ, halɩ pʋcɔ nɛ ɖɩpɔzʋʋ-ɩ.’ (Mat. 6:8) Nɛ Yesu nawa se Yehowa sɔɔlɩ faaa se ɛcɔnɩ ɖa-kɩcɛyɩm ɖeɖe. Ðɩkɛ Krɩstʋ ñɩma nɛ pʋyɔɔ lɛ, ɖɩkɛ Ɛsɔ hɔʋ taa mba. Yehowa kɛnɩ ɖɔ-hɔʋ ñʋʋdʋ nɛ ɖa-taa pɩzɩɣ nɛ pɩtɛ se ɛkaɣ labʋ mbʋ ɖeyi ɖeyi eheyi hɔŋ ñʋndɩnaa tɩŋa 1 Timootee 5:8 taa se pala yɔ.

8. (a) Ɛbɛ kaɣ-ɖʋ sɩnʋʋ nɛ ɖɩwa sɔɔndʋ ndʋ tɩkpaɣ-ɖʋ se ɖɩɩkaɣ pɩzʋʋ nɛ ɖɩcɔnɩ ɖɔ-hɔʋ yɔɔ yɔ? (Maatiyee 6:31-33) (b) Ɛzɩ ɖɩnaʋ kɩlɛmʋʋ yɔɔ yɔ, koobu nɔɔyʋ nɛ ɛ-halʋ peɖiɣni wonuu tɔɔnaɣ se paha koobu halɩñɩnʋ nɔɔyʋ. Ɛzɩma ɖɩpɩzɩɣ nɛ ɖɩmaɣzɩnɩ-wɛ?

⁸ Ye ɖa-taa ɛtɛma se Yehowa sɔɔlɩ-ɖʋ nɛ ɛsɔɔlɩ ɖɔ-hɔʋ ɖɔɖɔ yɔ, ɖa-taa kaɣ tɛm se ɖɩkaɣ wɛnʋʋ mbʋ pɩpɔzʋʋ-ɖʋ yɔ. (Kalɩ Maatiyee 6:31-33.) Yehowa sɔɔlaa se ɛcɔnɩ ɖɔ-yɔɔ, nɛ ɛkɛ ɖɔ-yɔɔ cɔnɩyʋ weyi ɛwɛnɩ sɔɔlɩm yɔ, nɛ ɛkɛ kʋjɔʋ tʋ ɖɔɖɔ! Alɩwaatʋ ndʋ ɛlɩzɩ tɛtʋ yɔ, pɩtasɩnɩ se ɛha-ɖʋ wondu ndʋ pɩpɔzʋʋ-ɖʋ se ɖɩcaɣ wezuu yɔ lɛ, ɛlabɩ nabʋyʋ ɖɔɖɔ. Sɔɔlɩm tuyi-i nɛ ɛlɩzɩ wondu sakɩyɛ tɛtʋ yɔɔ nɛ wondu ndʋ tɩhaɣ-ɖʋ taa leleŋ siŋŋ. (Kiɖe 2:9) Paa nabʋyʋ taa, ɖɩwɛnɩ mbʋ pɩpɔzʋʋ-ɖʋ yɔ pi-ɖeke nɛ ɖɩfɛyɩna nɛ pɩkpaɖɩ mbʋ yɔ, pɩwɛɛ se ɖɩtɔzɩ se ye ɖɩwɛnɩ mbʋ pɩpɔzʋʋ-ɖʋ yɔ, Yehowa hanɩ-ɖʋ pʋ. (Mat. 6:11) Pɩwɛɛ se paa ɛzɩmtaa lɛ, ɖɩtɔzʋʋ  se Yehowa kaɣ-ɖʋ haʋ mbʋ pɩmʋ ñɩm siŋŋ nɛ pɩkpaɖɩ mbʋ ɖɩha-pʋ siɣye lɛɛlɛɛyɔ yɔ, nɛ cee wayɩ lɛ ɛkaɣ-ɖʋ haʋ wezuu maatɛŋ. Mbʋ Nestor nɛ María pɔkɔm nɛ peɖiɣzina.—Iza. 65:21, 22.

9. Ɛbɛ ŋpɩzɩɣ nɛ ŋkpɛlɩkɩ Nestor nɛ María pa-kɩɖaʋ taa?

⁹ Nestor nɛ María paawɛnɩ ɖɩɣa kɩbaŋa nɛ paawɛnɩ ɖɔɖɔ tʋma kɩbana Kolombii ɛjaɖɛ taa. Pɔyɔɔdaa se: “Ðɩmaɣzaɣ se ɖɩcakɩ wezuu kɛlɛʋ nɛ ɖɩwalɩsɩ ɖɛ-Ɛsɔ sɛtʋ tʋmɩyɛ, ɛlɛ sɔɔndʋ kpaɣaɣ-ɖʋ se ye ɖɩpaɣzɩ caɣʋ wezuu kɛlɛʋ yɔ, ɖɩɩkaɣ hiɣu taa leleŋ.” Ɛbɛ sɩnɩ-wɛ nɛ pawa pɔ-sɔɔndʋ? Pakpaɣ alɩwaatʋ nɛ pamaɣzɩ nʋmɔŋ sakɩyɛ weyi ɩ-yɔɔ Yehowa tɩŋnaa nɛ ɛwɩlɩ se ɛsɔɔlɩ-wɛ yɔ ɩ-yɔɔ. Piyeba nɛ pa-taa tɛ se Yehowa kaɣ cɔnʋʋ pɔ-yɔɔ paa ɛzɩmtaa; nɛ peyele labʋ tʋma wena palakaɣ nɛ pɛhɛyɩɣ-wɛ camɩyɛ yɔ. Pɛpɛdɩ pa-ɖɩɣa nɛ pakʋyɩ nɛ powolo ɛjaɖɛ hɔɔlʋʋ ŋgʋ kɩ-taa pɩpɔzaɣ Kewiyaɣ tɔm susuyaa sakɩyɛ nɛ pɩkɩlɩ yɔ. Suwe pamaɣzɩɣ pɩlɩɩnɩ lɩmaɣzɩyɛ nɖɩ pakpaɣaa yɔ ɖɩ-yɔɔ? Nestor yɔɔdaa se: “Ðɩna ɛzɩma tɔm ndʋ tɩwɛ Maatiyee 6:33 taa yɔ tɩkɛ toovenim yɔ. Wiɖiyi nabʋyʋ tɩtɛɖɩ-ɖʋ tomnaɣ yɔɔ. Nɛ lɛɛlɛɛyɔ ɖɩnɩɣ leleŋ ɖe-wezuu caɣʋ taa nɛ pɩkɩlɩɣ.”

10. Ɛbɛ yɔɔ pɩmʋnɩ mbʋ se ɛyaa seɣ ɖama sɔɔndʋ?

¹⁰ Kpaɣnɩ alɩwaatʋ ndʋ Aɖam nɛ Ɛva pakʋyɩ Yehowa yɔɔ yɔ, ɛyaa wɛɛ nɛ palakɩ lakasɩ nzɩ sɩkɔŋnɩ kaɖɛ ɛyaa lalaa yɔ. (Ekl. 8:9) Kɩɖaŋ nɩɩyɩ yɔ: Ɛyaa lakɩnɩ po-ɖoŋ tʋmɩyɛ nɛ palakɩ lalaa mbʋ pɩfɛyɩ ɖeu yɔ, ɛyaa kʋyaa lakɩ puuyaɣ lakasɩ, sukuli piya nzɩ sɩwɛ kañatʋ yɔ, sɩtʋʋ si-sukuli ɖaŋ taa taabalaa nɛ sɩnazɩɣ-wɛ; nɛ halɩ ɛyaa nabɛyɛ lakɩ pɔ-hɔŋ taa mba kañatʋ lakasɩ. Pʋyɔɔ lɛ, pɩɩɖɩɣzɩɣ-ɖʋ se ɛyaa seɣ sɔɔndʋ ɛyaa lalaa! Ɛzɩma Sataŋ ñakɩ pana se ɛtɩŋnɩ ɛyʋ sɔɔndʋ seu mbʋ ɖɩwɛna yɔ pɩ-yɔɔ nɛ ɛwɛɛnɩ ɖoŋ ɖɔ-yɔɔ?

11-12. Ɛzɩma Sataŋ tɩŋɩɣnɩ ɛyʋ sɔɔndʋ seu yɔɔ se ɛwɛɛnɩ ɖoŋ ɖɔ-yɔɔ?

¹¹ Sataŋ ñakɩ pana se eyele nɛ ɖise ɛyaa sɔɔndʋ siŋŋ nɛ ɖiyele tɔm susuu yaa ɖiyele labʋ mbʋ Yehowa heyiɣ-ɖʋ se ɖɩla yɔ. Sataŋ seɣti kominawaa nɛ paɖɩkɩ nʋmɔʋ ɖɛ-Ɛsɔ sɛtʋ tʋmɩyɛ nɛ panazɩɣ-ɖʋ. (Luka 21:12; Natʋ 2:10) Sataŋ ɛjaɖɛ ɖɩnɛ ɖɩ-taa, ɛyaa sakɩyɛ yɛlɩɣnɩ tɔm kɩdɛkɛdɩtʋ nɛ cɛtɩm tɔm Yehowa Aseɣɖe Tɩnaa yɔɔ. Ɛyaa mba petisiɣ cɛtɩm tɔm ndʋ tɩ-yɔɔ yɔ, papɩzɩɣ nɛ pohoŋ-ɖʋ, yaa halɩ panazɩ-ɖʋ tomnaɣ yɔɔ.  (Mat.10:36) Ɛzɩ nʋmɔŋ weyi Sataŋ lakɩnɩ tʋmɩyɛ yɔ ɩɖɩɣzɩɣ-ɖʋ yaa we? Aayɩ. Ɛɛtɛm labɩnʋʋ tʋmɩyɛ nʋmɔŋ ɛnɩ kajalaɣ pɩnzɩ mɩnʋʋ taa.—Tʋma 5:27, 28, 40.

¹² Sɔɔndʋ ndʋ tɩkpaɣ-ɖʋ se kominawaa kaakaɖɩnɩ-ɖʋ yɔ, pɩtɩkɛ ti-ɖeke tɩkɛnɩ you wonuu ŋgʋ Sataŋ lakɩnɩ tʋmɩyɛ yɔ. Nabɛyɛ lɛ, sɔɔndʋ kpaɣ-wɛ nɛ ndʋ pɔ-hɔʋ taa mba kaɣ maɣzʋʋ ye papɩsɩ Yehowa Aseɣɖe Tɩnaa yɔ. Nabʋyʋ taa, sɔɔndʋ kpaɣ-wɛ nɛ ndʋ pɔ-hɔʋ taa mba kaɣ maɣzʋʋ yɔ nɛ pɩkɩlɩ se pamabɩ-wɛ. Pɔsɔɔlɩ pɔ-hɔŋ taa mba siŋŋ nɛ pɔsɔɔlaa se paba ɖɔɖɔ pɛkpɛlɩkɩ nɛ patɩlɩ Yehowa nɛ pɔsɔɔlɩ-ɩ. Alɩwaatʋ ndʋ panɩɣ pɔ-hɔʋ taa mba yɔɔdʋʋ tɔm ndʋ tɩtɩmʋna yɔ Ɛsɔ toovenim tʋ nɛ ɛ-sɛyaa pɔ-yɔɔ yɔ, pɩcɛyɩɣ-wɛ. Ɛlɛ nabʋyʋ taa ɖɔ-hɔʋ taa ñɩma mba pakaɖaɣnɩ-ɖʋ kiɖe tɛɛ yɔ, pʋwayɩ pɔkɔm nɛ pamʋ toovenim. Ɛlɛ ɖɩkpaɣ se tisuu kɩfam mbʋ ɖɩwɛna yɔ pʋyɔɔ lɛ, ɖɔ-hɔʋ taa mba lɔ-ɖʋ. Ɛzɩma ɖɩkaɣ labʋ?

13. Ye ɖa-taa ɛtɛma se Ɛsɔ sɔɔlɩ-ɖʋ yɔ, ɛzɩma pɩpɩzɩɣ pɩsɩnɩ-ɖʋ nɛ ɖɩɖɔkɩ ɖa-laŋa alɩwaatʋ ndʋ ɖɔ-hɔʋ taa mba lɔʋ-ɖʋ yɔ? (Keɣa 26:10)

¹³ Toovenim tɔm kɩbandʋ ndʋ tɩwɛ Keɣa 26:10 taa yɔ, tɩpɩzɩɣ nɛ tɩhɛzɩ ɖa-laŋɩyɛ. (Kalɩ Keɣa 26:10.) Paa ɖɔ-hɔʋ taa mba ɩlɔ-ɖʋ yɔ, alɩwaatʋ ndʋ ɖɩtɔzʋʋ se Yehowa sɔɔlɩ-ɖʋ siŋŋ yɔ, sɔɔndʋ ɛɛkpaɣ-ɖʋ nɛ mbʋ pɩkaɣ labʋ yɔ. Nɛ ɖa-taa tɛma se ɛkaɣ-ɖʋ wazʋʋ ɖa-laŋɩyɛ ɖɔkʋʋ yɔ. Yehowa kaɣ cɔnʋʋ ɖo-tomnaɣ yɔɔ nɛ ɖe-fezuu taa kɩcɛyɩm ɖeɖe, nɛ ɛkaɣ-ɖʋ sɩnʋʋ nɛ ɖa-laŋɩyɛ hɛɛ nɛ ɖihiɣ taa leleŋ. Nɔɔyʋ fɛyɩ se ɛpɩzɩɣ nɛ ɛcɔnɩ ɖa-kɩcɛyɩm ɖeɖe camɩyɛ nɛ pɩtalɩ-ɩ! Mbʋ pɩlabɩ Biniam weyi ɛ-tɔm ɖɩyɔɔdaa nɛ pɩɖɛɛ yɔ ɛ-hɔɔlʋʋ taa.

14. Ɛbɛ ŋpɩzɩɣ nɛ ŋkpɛlɩkɩ Biniam kɩɖaʋ taa?

¹⁴ Biniam pɩsɩ Yehowa Aseɣɖe Tʋ paa ɛɛnawa se pɩpɩzɩɣ piyele nɛ panazɩ-ɩ siŋŋ yɔ. Biniam kaanawa se Yehowa sɔɔlɩ-ɩ. Iyele nɛ ɖɩna ɛzɩma pɩsɩnɩ-ɩ nɛ ɛwa ɛyʋ sɔɔndʋ seu yɔ. Ɛyɔɔdaa se: “Panazɩ-m nɛ pɩcɛzɩ ɛzɩma mamaɣzaɣ yɔ pɩ-yɔɔ. Ɛlɛ, mbʋ pɩkpaɣaɣ-m sɔɔndʋ nɛ pɩkɩlɩ ɛzɩma komina kaɣ-m nazʋʋ yɔ mbʋ lɛ ɛzɩma mɔ-hɔʋ taa mba kaɣ-m kaɖɩnʋʋ yɔ. Sɔɔndʋ kpaɣaɣ-m se lɩmaɣzɩyɛ nɖɩ mankpaɣaa se manpɩsɩɣ Yehowa Aseɣɖe Tʋ yɔ, ɖɩkaɣ yebu nɛ ma-caa weyi ɛtɩkɛ Yehowa Aseɣɖe Tʋ yɔ, ɛ-taa wɩɩ, nɛ ɖɩkaɣ yebu ɖɔɖɔ nɛ mɔ-hɔʋ taa mba ɩɩtasɩ-m ñam paa ññɩɩ.” Paa mbʋ yɔ, Biniam taa kaatɛma se paa ɛzɩmtaa lɛ, Yehowa cɔŋnɩ mba ɛsɔɔlɩ-wɛ yɔ pɔ-yɔɔ. Biniam lɩzɩ pɩ-taa  se: “Mankpaɣ alɩwaatʋ nɛ mamaɣzɩ ɛzɩma Yehowa sɩnɩ ɛyaa lalaa nɛ pɔɖɔkɩ pa-laŋa alɩwaatʋ ndʋ pakatɩ liidiye kʋñɔŋ, alɩwaatʋ ndʋ pɔyɔɔdɩ pɔ-yɔɔ tɔm kɩdɛkɛdɩtʋ, nɛ alɩwaatʋ ndʋ samaɣ labɩ-wɛ puuyaɣ lakasɩ yɔ pɩ-yɔɔ. Maanawa se ye mɔñɔnɩ Yehowa yɔ, ɛkaɣ-m wazʋʋ. Alɩwaatʋ ndʋ pakpa-m tam sakɩyɛ nɛ halɩ panazɩ-m yɔ, ma-maɣmaɣ mananɩ mɛ-ɛsa se ye ɖiwobi pɩ-yɔɔ nɛ ɖɩɖɔkɩ ɖe-siɣsiɣ wɛtʋ yɔ, Yehowa sɩɣnɩ-ɖʋ siŋŋ alɩwaatʋ ndʋ pɩpɔzʋʋ se pasɩnɩ-ɖʋ yɔ.” Yehowa pɩsɩ Biniam Caa toovenim taa, nɛ ɛlɛ samaɣ taa mba wɩlaa se papɩsɩ ɛ-hɔʋ taa mba.

15. Ɛbɛ yɔɔ pɩtɩwɛɛkɩ pʋyʋ se ɖise sɩm sɔɔndʋ?

¹⁵ Bibl yɔɔdʋʋ se sɩm kɛ koyindu nɔɔyʋ. (1 Kɔr. 15:25, 26) Alɩwaatʋ ndʋ ɖɩmaɣzɩɣ sɩm yɔɔ yɔ, sɔɔndʋ pɩzɩɣ nɛ pɩkpa-ɖʋ siŋŋ, kɔzɩ kɔzɩ ye pɩwɩɣ ɖa-maɣmaɣ yaa ɖɛ-ɛyʋ kʋsɔɔlʋ nɔɔyʋ siŋŋ yɔ. Ɛbɛ yɔɔ ɖiseɣ sɩm sɔɔndʋ? Mbʋ pʋyɔɔ yɔ, Yehowa lɩzɩ-ɖʋ lɛ, ʻɛɖʋ tamtam wɛʋ lɩmaɣza ɖa-laŋa taa.ʼ (Ekl. 3:11, nwt) Ye ɖiseɣ sɩm sɔɔndʋ ɛzɩ pɩmʋnaʋ yɔ, pɩpɩzɩɣ nɛ pɩsɩnɩ-ɖʋ nɛ ɖɩkandɩyɩ ɖe-wezuu yɔɔ. Kɩɖaŋ nɩɩyɩ yɔ: Pɩpɩzɩɣ nɛ piseɣti-ɖʋ nɛ ɖɩkpaɣ lɩmaɣza kɩbana pɩlɩɩnɩ tɔɔnasɩ nzɩ ɖɩtɔkɩ nɛ hola aleɣya wena ɖɩlakɩ yɔ a-yɔɔ, ɖɩpɔzɩ ɖɔkɔtɔnaa se pasɩnɩ-ɖʋ yaa ɖɩya kɔ alɩwaatʋ ndʋ pɩpɔzʋʋ yɔ, nɛ pɩpɩzɩɣ pɩsɩnɩ-ɖʋ ɖɔɖɔ nɛ ɖɩtaala mbʋ piyeki se ɖɩɖʋ ɖe-wezuu kaɖɛ taa falaa yɔ.

16. Ɛzɩma tɩyɛ Sataŋ ñakɩ pana se ɛtɩŋnɩ ɛzɩma ɖiseɣ sɩm sɔɔndʋ yɔ pɩ-yɔɔ?

¹⁶ Sataŋ nawa se ɖe-wezuu mʋ ñɩm ɖɛ-ɛsɩndaa nɛ ɛyɔɔdʋʋ se halɩ ɖɩkaɣ kizuu ɖa nɛ Yehowa ɖa-taabalɩyɛ se pɩsa nɛ ɖɩwɛɛ wezuu. (Yɔɔb 2:4, 5) Sataŋ fɛyɩnɩ toovenim! Ɛlɛ Sataŋ ʻwɛnɩ ɖoŋ se ɛkɔnɩ sɩm;ʼ pʋyɔɔ lɛ, ɛtɩŋɩɣnɩ ɛzɩma ɖiseɣ sɩm sɔɔndʋ yɔ pɩ-yɔɔ se ɛla nɛ ɖikizi Yehowa. (Ebr. 2:14, 15) Nabʋyʋ taa, ɛyaa mba Sataŋ ɖiyiɣ yɔ paɖʋʋ-ɖʋ sɔɔndʋ se pakʋʋ-ɖʋ ye ɖititisi nɛ ɖɩlɔ ɖe-tisuu yɔ. Yaa nabʋyʋ taa, Sataŋ pɩzɩɣ nɛ ɛna se ɖɩhɩnɩ kʋdɔŋ siŋŋ nɛ ɛpɩzɩɣ nɛ ɛñaɣ pana se ɛtɩŋnɩ pɩ-yɔɔ nɛ etuzi-ɖʋ nɛ ɖɩla mbʋ pɩtɩmʋna yɔ. Ðɔkɔtɔnaa yaa ɖɔ-hɔʋ taa ñɩma mba patɩkɛ Yehowa sɛyaa yɔ, papɩzɩɣ nɛ pañɩɣ ɖɔ-yɔɔ se ɖitisi nɛ paɖʋ-ɖʋ calɩm; ɛlɛ ye ɖɩlabɩ mbʋ yɔ, ɖɩmaɣnɩ Ɛsɔ paɣtʋ yɔɔ. Yaa ɛyʋ nɔɔyʋ pɩzɩɣ nɛ ɛñaɣ pana se eyele nɛ ɖitisi kʋdɔmɩŋ waʋ nʋmʋʋ ŋgʋ kɩɩlakɩ nɔɔ kʋɖʋmaɣ nɛ Bibl paɣtʋ kila yɔ kɩ-yɔɔ.

17. Ɛzɩ Roma mba 8:37-39 wɩlʋʋ yɔ, ɛbɛ yɔɔ pɩtɩpɔzɩ se ɖise sɩm sɔɔndʋ?

¹⁷ Paa ɖɩtɩsɔɔlɩ se ɖɩsɩ yɔ, ɖɩnawa Yehowa kaɣ wobu pɩ-yɔɔ nɛ ɛsɔɔlʋʋ-ɖʋ paa pɩtalɩ-ɖʋ mbʋ yɔ. (Kalɩ Roma mba 8:37-39.) Alɩwaatʋ ndʋ Yehowa taabalaa sɩkɩ yɔ, ewoki pɩ-yɔɔ nɛ ɛtɔzʋʋ pɔ-yɔɔ, nɛ pɩwɛ ɛzɩ pɛwɛ wezuu yɔ. (Luka 20:37, 38) E-liu wɛɛ se efezi-wɛ nɛ paɖaɣnɩ caɣʋ wezuu. (Yɔɔb 14:15) Yehowa hɛyɩ mbʋ pɩmʋ ñɩm siŋŋ yɔ se pɩsa nɛ ‘ɖihiɣ wezuu maatɛŋ.’ (Yoh. 3:16) Ðɩnawa se Yehowa sɔɔlɩ-ɖʋ siŋŋ nɛ ɛcɔŋnɩ ɖɔ-yɔɔ. Pʋyɔɔ lɛ, alɩwaatʋ ndʋ ɖɩhɩnɩɣ kʋdɔŋ yaa alɩwaatʋ ndʋ paɖʋʋ-ɖʋ sɔɔndʋ se pakʋʋ-ɖʋ yɔ, ɖɩɩhaɣ Yehowa siɣye; ɛlɛ ɖɩtaɣ-ɩ liu se ɛkaɣ hɛzʋʋ ɖa-laŋɩyɛ, ɛha-ɖʋ lɔŋsɩnɖɛ nɛ ɖoŋ. Mbʋ ɖeyi ɖeyi Valérie nɛ ɛ-walʋ palaba.—Keɣa 40:4.

18. Ɛbɛ Valérie kɩɖaʋ pɩzɩɣ nɛ kɩkpɛlɩkɩ-ŋ?

¹⁸ Alɩwaatʋ ndʋ Valérie kaawɛnɩ pɩnzɩ 35 yɔ, ɖɔkɔtɔnaa wili-i nɛ pana se ɛwɛnɩ kansɛɛrɩ kʋdɔŋ ŋgʋ kɩtɩtɔyɩ nɛ kɩ-tɔm wɛ kaɖɛ yɔ. Iyele nɛ ɖɩna ɛzɩma sɔɔlɩm sɩnɩ-ɩ nɛ ɛwa ɛzɩma eseɣaɣ sɩm sɔɔndʋ yɔ. Ɛyɔɔdaa se: “Alɩwaatʋ ndʋ manɩwa se mɛwɛnɩ kansɛɛrɩ kʋdɔŋ yɔ, piitibi ma nɛ ma-walʋ yɔɔɔ kpem. Pɩɩpɔzaa se palabɩ-m tʋmɩyɛ nɛ pɩsa nɛ mɛwɛɛ wezuu. Mɔyɔɔdɩnɩ ɖɔkɔtɔnaa mba palakɩ ɛyaa tʋmɩyɛ yɔ pa-taa sakɩyɛ, ɛlɛ pa-tɩŋa  payɩ pekizaa se paapɩzɩɣ nɛ palabɩ-m tʋmɩyɛ nɛ paaɖʋʋ-m calɩm. Sɔɔndʋ kaakpa-m ɛlɛ paɣtʋ ndʋ Ɛsɔ ɖʋwa yɔ tɩ-yɔɔ lɛ, menkizaa se pataaɖʋ-m calɩm! Me-wezuu caɣʋ taa lɛ, Yehowa wɩlɩ-m se ɛsɔɔlɩ-m siŋŋ. Lɛɛlɛɛyɔ ma ɖɔɖɔ mɛwɛnɩ waɖɛ se mawɩlɩ-ɩ mɔn-sɔɔlɩm. Alɩwaatʋ ndʋ payɩ manɩɣaɣ tɔm kɩdɛkɛdɩtʋ natʋyʋ yɔ, tiyekaɣ nɛ mɛntɛŋ man-taa nɛ pɩkɩlɩɣ se meyeki nɛ Yehowa taa la leleŋ nɛ maayeki nɛ Sataŋ wa. Pɔkɔm nɛ palabɩ-m tʋmɩyɛ nɛ pɩɖɔ camɩyɛ, ɛlɛ patɩɖʋ-m calɩm. Paa man-kʋdɔŋ ɛtɩtɛ yɔ, paa ɛzɩmtaa Yehowa ha-ɖʋ mbʋ pɩpɔzʋʋ-ɖʋ yɔ. Pʋcɔ nɛ ɖɔkɔtɔnaa wili-m nɛ panaɣ kʋdɔŋ mɔ-yɔɔ lɛ, kediɣzaɣ ŋga ɖɩlabɩ kpɩtaʋ ɖɩdɛnɖɛ yɔ ka-taa, ɖɩtazɩ tɔm ñʋʋ kʋnɛ kɩ-taa: ‘Affrontons les difficultés de la vie avec courage.’ * Tɔm ñʋʋ ŋgʋ, kɩɩhɛzɩ ɖa-laŋa siŋŋ. Ðɩkalɩ-kʋ tam sakɩyɛ. Tɔm ñʋŋ ɛzɩ kʋnɛ yɔ, nɛ ɛzɩma ɖiwobi pɩ-yɔɔ nɛ ɖɩɖɔŋ fezuu taa ɖʋtʋ kɩbandʋ ndʋ ɖɩwɛna yɔ tɩ-yɔɔ yɔ, pɩsɩnɩ-ɖʋ nɛ ɖihiɣ laŋhɛzɩyɛ nɛ pɩsɩnɩ-ɖʋ ɖɔɖɔ nɛ ɖa-lɩmaɣza wɛɛ a-ɖeɖe nɛ ɖɩkpaɣ lɩmaɣza kɩbana.

19. Pɩkazɩ pazɩ, ɛbɛ kaɣ labʋ?

¹⁹ Yehowa wɛɛ nɛ ɛsɩɣnɩ Krɩstʋ ñɩma ɛjaɖɛ hɔɔlɩŋ kpeekpe taa nɛ pawakɩ kaɖɛ wɛtʋ ndʋ pakatɩɣ yɔ nɛ papɩzɩɣ pakaɖɩɣnɩ Eleeu. (1 Pɩy. 5:8, 9) Ña ɖɔɖɔ ŋpɩzɩɣ nɛ ŋla mbʋ. Pɩkazɩ pazɩ, Yehowa kaɣ ɖiyuu Yesu nɛ mba ɛ nɛ wɛ pɔtɔkɩ kewiyitu yɔ se ‘pɛwɛɛkɩ Eleeu tʋma.’ (1 Yoh. 3:8) Pʋwayɩ lɛ, Ɛsɔ samaɣ taa ñɩma mba pɛwɛ tɛtʋ yɔɔ cɩnɛ nɛ pɛsɛɣ-ɩ yɔ, paakaɣ “tasʋʋ seluu nɛ seu sɔɔndʋ.” (Iza. 54:14; Mik. 4:4) Ɛlɛ pʋcɔ nɛ pɩtalɩ mbʋ lɛ, pɩcɛyaa se ɖɩñaɣ pana siŋŋ nɛ ɖɩwa ɖɔ-sɔɔndʋ.

20. Ɛbɛ kaɣ-ɖʋ sɩnʋʋ nɛ ɖɩwa ɖɔ-sɔɔndʋ?

²⁰ Pɩpɔzʋʋ se ɖiwolo pɩ-yɔɔ nɛ ɖɩcɛyɩsɩɣ tisuu mbʋ ɖɩwɛna se Yehowa sɔɔlɩ ɛ-sɛyaa nɛ ɛkandɩyɩɣ pɔ-yɔɔ yɔ. Ye ɖɩkpakɩɣ alɩwaatʋ nɛ ɖɩmaɣzɩɣ ɛzɩma Yehowa kandɩyɩ ɛ-sɛyaa yɔɔ nɛ pɩɖɛɛ yɔ pɩ-yɔɔ nɛ ɖiheyiɣ ɛyaa lalaa pɩ-tɔm yɔ, pɩkaɣ-ɖʋ sɩnʋʋ nɛ ɖɩla mbʋ. Ðɩmaɣzɩɣ ɖɔɖɔ ɛzɩma Yehowa sɩnɩ ɖa-maɣmaɣ nɛ ɖɩwa kaɖɛ wɛtʋ natʋyʋ yɔ pɩ-yɔɔ. Yehowa sɩɣnɩ-ɖʋ nɛ ɖɩpɩzɩ ɖɩwa ɖɔ-sɔɔndʋ!—Keɣa 33:5.