1. Ɛzɩ Eklezɩyasɩtɩ 7:20 wɩlʋʋ yɔ, toovenim tɔm ndʋ Wiyaʋ Salomɔɔ yɔɔdaa?

 WIYAƲ Salomɔɔ mawa se: “Ɛyʋ siɣsiɣ tʋ nɔɔyʋ fɛyɩ tɛtʋ yɔɔ nɛ ɛlakɩ kɩbandʋ yeke nɛ ɛɛlakɩ kɩwɛɛkɩm kaaʋ.” (Ekl. 7:20) Tɔm ndʋ tɩkɛ toovenim! Ða-tɩŋa ɖɩkɛ kɩwɛɛkɩm laɖaa. (1 Yoh. 1:8) Pʋyɔɔ lɛ, pɩpɔzʋʋ se Ɛsɔ ekpeɣ-ɖʋ nɛ pɩpɔzʋʋ ɖɔɖɔ se ɛyaa lalaa ikpeɣ-ɖʋ.

2. Alɩwaatʋ ndʋ ŋɖʋʋ ɖɩwɩzɩyɛ ña-taabalʋ kʋsɔɔlʋ nɔɔyʋ nɛ ɛkpaɣ nɛ ekpeɣ-ŋ yɔ, ɛzɩma pɩlakɩ-ŋ?

² Pɩtʋʋ fɛyɩ se ŋtɔzʋʋ alɩwaatʋ ndʋ ŋlabɩ nabʋyʋ nɛ pɩɖʋ ña-taabalʋ kʋsɔɔlʋ nɔɔyʋ ɖɩwɩzɩyɛ yɔ tɩ-yɔɔ. Ŋŋsɔɔlaa se ŋñɔɔzɩ tɔm ndʋ nɛ taabalɩyɛ ɖaɣnɩ wɛʋ ña nɛ ɩ mɩ-hɛkʋ taa, pʋyɔɔ lɛ ŋtendi-i nɛ ña-laŋɩyɛ pilim se ɛkpaɣ nɛ ekpeɣ-ŋ. Alɩwaatʋ ndʋ ña-taabalʋ tisi faaa nɛ ekpeɣ-ŋ yɔ, ɛzɩma pɩlabɩ-ŋ? Pɩhɛzɩ ña-laŋɩyɛ na? Pɩtʋʋ fɛyɩ se pɩhɛzɩ ña-laŋɩyɛ nɛ ña-taa labɩ leleŋ ɖɔɖɔ.

3. Ɛbɛ taa ɖɩkaɣ tazʋʋ tɔm ñʋʋ kʋnɛ kɩ-taa?

³ Ðɩsɔɔlaa se Yehowa ɛkɛ ɖa-taabalʋ kɩbanʋ weyi ɛ-wayɩ fɛyɩ yɔ; ɛlɛ nabʋyʋ taa, ɖɩpɩzɩɣ nɛ ɖɩyɔɔdɩ natʋyʋ yaa ɖɩla nabʋyʋ nɛ pɩɖʋ-ɩ ɖɩwɩzɩyɛ. Ye mbʋ, ɛbɛ yɔɔ ɖa-taa pɩzɩɣ nɛ pɩtɛ se Yehowa sɔɔlɩ faaa se ekpeɣ-ɖʋ? Tʋkaɣ ŋga wɛ Yehowa kpaɣʋ nɛ kpeɣu nɛ ɛyaa kpaɣʋ nɛ kpeɣu pɛ-hɛkʋ taa? Nɛ kɛdɛzaɣ ɖeɖe lɛ, mba Ɛsɔ kpeɣu?

4. Ɛbɛ yɔɔ ɖa-taa pɩzɩɣ nɛ pɩtɛ se Yehowa sɔɔlɩ faaa se ekpeɣ-ɖʋ?

⁴ Ɛsɔtɔm heyiɣ-ɖʋ se Yehowa sɔɔlɩ faaa se ekpeɣ-ɖʋ. Alɩwaatʋ ndʋ Yehowa lɩzɩ ɛ-tɩ nɛ ɛwɩlɩ Moyizi Sinayii Pʋʋ yɔɔ yɔ, ɛtɩŋnɩ tiyiyu nɔɔyʋ yɔɔ nɛ eheyi-i se: “[Yehowa, Yehowa] Ɛsɔ, pʋtɔdɩyɛ nayʋ nɛ hɛndɩyʋ, suuɖu tʋ nɛ pʋtɔdɩyɛ tʋ nɛ  tʋtʋyɛ tʋ, weyi ɛnaɣ pʋtɔdɩyɛ pɩnzɩ kudoku yɔ, weyi ɛhɩzɩɣ [yaa ekpeɣu] azuluma nɛ kʋzɔɔtʋ nɛ kɩwɛɛkɩm yɔ.” (Ejl. 34:6, 7) Yehowa kɛ Ɛsɔ weyi ɛlakɩ camɩyɛ lakasɩ nɛ weyi ɛnaɣ ɛyaa pʋtɔdɩyɛ yɔ, nɛ paa ɛzɩmtaa lɛ ɛsɔɔlɩ faaa se ekpeɣ kɩwɛɛkɩm laɖaa mba pekpiɖiɣ yɔ.—Neh. 9:17; Keɣa 85:15.

5. Ɛzɩ Keɣa 102:13, 14 yɔɔdʋʋ yɔ, ɛzɩma Yehowa sɩm ɛyaa camɩyɛ yɔ, piseɣtiɣ-i se ɛla we?

⁵ Yehowa kɛnɩ ɖa-Lɩzɩyʋ, pʋyɔɔ lɛ ɛsɩm ɖɔ-yɔɔ tɔm tɩŋa. Maɣzɩ pazɩ nɛ ŋna! Ɛyaa mba pɛwɛ tɛtʋ yɔɔ cɩnɛ yɔ, ɛsɩm pa-taa paa weyi lɛ ɛ-yɔɔ tɔm tete. (Keɣa 138:15-17) Ye mbʋ, ɛpɩzɩɣ nɛ ɛna mantɩtalɩ pilim wɛtʋ ndʋ payɩ ɖa-lʋlɩyaa ɖɛzɩ-ɖʋ yɔ. Halɩ ɛsɩm mbʋ payɩ pɩtalɩ-ɖʋ ɖe-wezuu caɣʋ taa nɛ piyele nɛ ɖɩkɛ ɛyaa mba ɖɩkɛnɩ lɛɛlɛɛyɔ yɔ. Ɛzɩma Yehowa sɩm-ɖʋ camɩyɛ yɔ, piseɣtiɣ-i se ɛla we? Piseɣtiɣ-i se ɛna ɖa-pʋtɔdɩyɛ.—Keɣa 77:39; kalɩ Keɣa 102:13, 14.

6. Ɛzɩma Yehowa wɩlaa se ɛsɔɔlɩ faaa se ekpeɣ-ɖʋ?

⁶ Yehowa wɩlaa se ɛsɔɔlɩ faaa se ekpeɣ-ɖʋ. Ɛnɩɣ pɩ-taa se mbʋ abalʋ kajalaɣ ñɩnʋ Aɖam laba yɔ, piyeba nɛ ɖa-tɩŋa ɖɩpɩsɩ sɩm nɛ kɩwɛɛkɩm po-yomaa. (Roma 5:12) Nʋmɔʋ nakʋyʋ fɛyɩ se ɖɩpɩzɩɣ ɖɩtɩŋnɩ kɩ-yɔɔ nɛ ɖɩlɩzɩ ɖa-maɣmaɣ yaa ɛyʋ lɛlʋ yomiye nɖɩ ɖɩ-taa. (Keɣa 48:8-10) Ɛlɛ ɖɛ-Ɛsɔ kʋsɔɔlʋ na ɖa-pʋtɔdɩyɛ nɛ ɛla nabʋyʋ se pɩsa nɛ ɖɩlɩɩ yomiye nɖɩ ɖɩ-taa. Ɛbɛ ɛlaba? Ɛzɩ Yohanɛɛsɩ 3:16 wɩlʋʋ yɔ, Yehowa tiyi ɛ-Pɩyalʋ ɛgbamɩyɛ se ɛsɩ ɖɔ-yɔɔ. (Mat. 20:28; Roma 5:19) Yesu sɩbɩ ɖo-lone taa se pɩsa nɛ ɛlɩzɩ mba payɩ pɛwɛɣnɩ tisuu ɛ-yɔɔ yɔ yomiye nɖɩ ɖɩ-taa. (Ebr. 2:9) Pɩtʋʋ fɛyɩ se Yehowa nɩ siziŋ kpem alɩwaatʋ ndʋ ɛna ɛ-Pɩyalʋ nɩ siziŋ siŋŋ nɛ ɛsɩ fɛyɛ sɩm yɔ! Pɩtʋʋ fɛyɩ se ye Yehowa ɛtaasɔɔlɩ se ekpeɣ-ɖʋ yɔ, ɛtaaha nʋmɔʋ se ɛ-Pɩyalʋ ɛsɩ.

7. Bibl taa ɛyaa mba Yehowa kpeɣ faaa yɔ, pa-taa nabɛyɛ lɛ mba?

⁷ Ðɩnaɣ ɛyaa sakɩyɛ mba Yehowa kpeɣ faaa yɔ pa-kɩɖaŋ Bibl taa. (Efɛz. 4:32) A-yɔɔ ŋmaɣzɩɣ? Pɩtɩla ŋmaɣzɩɣ Wiyaʋ Manaasee yɔɔ. Abalʋ kɩdɛkɛdʋ ɛnʋ ɛlabɩ kɩwɛɛkɩm sɔsɔm siŋŋ Yehowa ɛsɩndaa hɔɔlɩŋ ndɩ ndɩ taa. Ɛɛɖɛ nɔɔ cɛtɩm Ɛsɔ sɛtʋ taa. Ɛkʋ ɛ-maɣmaɣ e-piya nɛ ɛlaanɩ kɩlaŋ cɛtɩm ɛsɔnaa. Halɩ elubi sɩʋ kpelaɣ nakɛyɛ cɛtɩm ɛsɔ nɔɔyʋ nɛ ɛsɩɩ-kɛ Yehowa tɛ templo kiɖeɖeu taa. Bibl yɔɔdɩ ɛ-yɔɔ se: ‘Ɛlabɩ kɩdɛkɛdɩm Yehowa ɛsɩndaa pɩdɩɩfɛyɩ nɛ pɩwɩzɩ-ɩ.’  (4 Aw. 33:2-7; 2 Aw. 21:6) Paa mbʋ yɔ, alɩwaatʋ ndʋ Manaasee kpiɖi siŋŋ yɔ, Yehowa kpeɣ-i faaa. Halɩ Ɛsɔ ɖaɣnɩ-ɩ haʋ waɖɛ nɛ ɛpɩsɩ wiyaʋ. (4 Aw. 33:12, 13) Pɩtɩla ŋmaɣzɩɣ ɖɔɖɔ Wiyaʋ Daviid yɔɔ; ɛɛlabɩ ɖɔɖɔ kɩwɛɛkɩm sɔsɔm Yehowa ɛsɩndaa. Pɩ-taa nabʋyʋ lɛ se ɛlabɩ acɛyɛ nɛ ɛkʋ ɛyʋ. Paa mbʋ yɔ, alɩwaatʋ ndʋ Daviid tisaa se ɛlabɩ kɩwɛɛkɩm nɛ ekpiɖi siŋŋ yɔ, Yehowa kpeɣ-i ɖɔɖɔ. (2 Sam. 12:9, 10, 13, 14) Ɛɛɛ, ɖa-taa pɩzɩɣ nɛ pɩtɛ se Yehowa sɔɔlɩ faaa se ekpeɣ-ɖʋ. Nɛ ɛzɩ ɖɩkɔŋʋʋ naʋ yɔ, ye pakpaɣ Yehowa kpaɣʋ nɛ kpeɣu nɛ pamaɣzɩnɩ ɛzɩma ɛyaa kpeɣu ɖama yɔ, Yehowa kpaɣʋ nɛ kpeɣu wɛ ŋgee.

8. Yehowa kɛnɩ Tɔm Hʋyʋ weyi ɛ-wayɩ fɛyɩ yɔ. Ðoŋ weyi pɩwɛnɩ ɛ-tɛ kpaɣʋ nɛ kpeɣu yɔɔ?

⁸ Yehowa kɛnɩ “tɛtʋ kpeekpe Tɔm Hʋyʋ.” (Kiɖe 18:25) Pɩpɔzʋʋ se tɔm hʋyʋ kɩbanʋ ɛtɩlɩ paɣtʋ camɩyɛ. Pɩtʋʋ fɛyɩ se tɔm ndʋ tɩkɛ toovenim Yehowa hɔɔlʋʋ taa mbʋ pʋyɔɔ yɔ, pɩtasɩna se ɛkɛ ɖɔ-Tɔm Hʋyʋ lɛ, ɛkɛ ɖɔɖɔ ɖa-Paɣtʋ Ðʋyʋ. (Iza. 33:22) Nɔɔyʋ fɛyɩ se ɛsɩm mbʋ pɩkɛ kɩbam nɛ mbʋ pɩkɛ kɩdɛkɛdɩm yɔ camɩyɛ ɛzɩ Yehowa yɔ. Ɛbɛ ɖɔɖɔ pɩpɔzʋʋ se tɔm hʋyʋ kɩbanʋ ɛtɩlɩ? Pɩpɔzʋʋ se ɛtɩlɩ mbʋ pɩlaba yɔ pɩ-yɔɔ toovenim tɔm tɩŋa pʋcɔ nɛ ɛkpaɣ lɩmaɣzɩyɛ alɩwaatʋ ndʋ ɛhʋʋ tɔm yɔ. Ye mbʋ, Yehowa kɛnɩ tɔm hʋyʋ weyi ɛkpaɖaa yɔ mbʋ pʋyɔɔ yɔ, paa ɛzɩmtaa lɛ ɛtɩlɩɣ mbʋ pɩlaba yɔ pɩ-yɔɔ toovenim tɔm tɩŋa.

9. Tɔm ndʋ Yehowa sɩma alɩwaatʋ ndʋ ɛkpakɩɣ lɩmaɣzɩyɛ se ekpeɣu nɔɔyʋ yaa eekpeɣ-i yɔ?

⁹ Yehowa wɛ ndɩ nɛ ɛyaa mba pɛkɛ tɔm hʋyaa yɔ mbʋ pʋyɔɔ yɔ, paa ɛzɩmtaa lɛ ɛsɩm paa tɔm ndʋ lɛ tɩ-yɔɔ toovenim tɔm tɩŋa. (Kiɖe 18:20, 21; Keɣa 89:8) Pɩtɩkɛ mbʋ ɛyaa naɣ yaa tɔm ndʋ panɩɣ yɔ ɛcɔŋna nɛ ɛhʋʋ tɔm. Ɛsɩm wɛtʋ nɛ lakasɩ nzɩ ɛyʋ nɔɔyʋ lʋlɩyaa ɖɛzɩ-ɩ yɔ, falɩsʋʋ mbʋ ɛmʋwa yɔ, ɖenɖe ɛcaɣaa nɛ ɛpaɣlɩ yɔ; nɛ ɛsɩm ɖɔɖɔ ɛzɩma pɩlakɩ-ɩ yɔ nɛ ɛ-lɩmaɣza camɩyɛ. Yehowa sɩm ɖɔɖɔ mbʋ pɩwɛ ɛyʋ laŋɩyɛ taa yɔ. Paa ɛyʋ weyi lɛ, Yehowa sɩm mbʋ piseɣtiɣ-i nɛ ɛlakɩ nabʋyʋ yɔ; ɛsɩm ɖɔɖɔ ɛ-lɩmaɣza nɛ mbʋ ɛsɔɔlaa yɔ. Nabʋyʋ fɛyɩ se pɩmɛlaa nɛ Yehowa ɛɛnaɣ-pʋ. (Ebr. 4:13) Ye mbʋ, alɩwaatʋ ndʋ Yehowa kpeɣu ɛyʋ nɔɔyʋ yɔ, pɩwɩlɩɣ se ɛlabɩ mbʋ, mbʋ pʋyɔɔ yɔ ɛsɩm mbʋ pɩlaba yɔ pɩ-yɔɔ toovenim tɔm tɩŋa.

10. Ɛbɛ yɔɔ ɖɩpɩzɩɣ nɛ ɖɩyɔɔdɩ se paa ɛzɩmtaa lɛ, Yehowa tɔm hʋʋ wɛ siɣsiɣ nɛ pɩmʋnaa? (Wayɩ Wayɩ Paɣtʋ 32:4.)

¹⁰ Paa ɛzɩmtaa lɛ, Yehowa tɔm hʋʋ wɛ siɣsiɣ nɛ pɩmʋnaa. Ɛɛɖʋʋ tʋkaɣ ɛyaa taa kpa. Pɩtɩkɛ ɛyʋ nɔɔyʋ wɛtʋ ndʋ tɩnaɣ ɛsa yɔɔ yem yɔ, ñɩm mbʋ ɛwɛna yɔ, lone nɖɩ ɖɩ-taa ɛwɛɛ yɔɔ yaa hɔɔlɩŋ weyi ɩ-taa ɛwɛ niye yɔ Yehowa cɔŋna nɛ ekpeɣ-i. (1 Sam. 16:7; Yak. 2:1-4) Nɔɔyʋ ɛɛpɩzɩɣ nɛ ɛñɩɣ Yehowa yɔɔ se ɛla nabʋyʋ yaa nɔɔyʋ ɛɛpɩzɩɣ nɛ ɛlabɩ-ɩ haɖɛ naɖɩyɛ se ɛtaanɩ ɛ-nɔɔ num. (4 Aw. 19:7) Ɛɛkpakɩɣ lɩmaɣza nɛ pana kpa, yaa ɛzɩma pɩlakɩ-ɩ yɔ pɩɩwɛɣnɩ ɖoŋ ɛ-lɩmaɣza kpaɣʋ yɔɔ kpa. (Ejl. 34:7) Pɩtʋʋ fɛyɩ se Yehowa kɛnɩ Tɔm Hʋyʋ kɩbanʋ weyi ɛ-wayɩ fɛyɩ yɔ mbʋ pʋyɔɔ yɔ, ɛsɩm ɖɔ-yɔɔ tɔm tɩŋa nɛ ɛsɩm ɖɔɖɔ wɛtʋ ndʋ tɩ-taa ɖɩwɛɛ yɔ.—Kalɩ Wayɩ Wayɩ Paɣtʋ 32:4.

11. Ɛbɛ yɔɔ pɔtɔŋ se Yehowa kpaɣʋ nɛ kpeɣu wɛ ŋgee?

¹¹ Mba pama Ebree Masɩ yɔ, peɖiɣzinaa se Yehowa kpaɣʋ nɛ kpeɣu wɛ ŋgee. Hɔɔlɩŋ nɩɩyɩ taa lɛ, Ebree tɔm piye nɖɩ palabɩnɩ tʋmɩyɛ yɔ, takayaɣ nakɛyɛ yɔɔdaa se “palabɩnɩ tɔm piye nɖɩ tʋmɩyɛ nɛ pɔyɔɔdɩ ɛzɩma Yehowa kpeɣ kɩwɛɛkɩm laɖaa yɔ pɩ-tɔm, ɛlɛ patɩlabɩnɩ-ɖɩ tʋmɩyɛ nɛ pɔyɔɔdɩ ɛzɩma ɛyʋ nɔɔyʋ kpeɣ ɛyʋ lɛlʋ yɔ pɩ-tɔm kpa.” Yehowa  ɖeke pɩzɩɣna nɛ ekpeɣ kɩwɛɛkɩm laɖʋ weyi ekpiɖaa yɔ kiya. Alɩwaatʋ ndʋ Yehowa kpeɣ-ɖʋ yɔ, ɛbɛ lɩɣ pɩ-taa?

12-13. (a) Alɩwaatʋ ndʋ Yehowa kpeɣu nɔɔyʋ ɛ-kɩwɛɛkɩm yɔ, ɛbɛ ɛyʋ ɛnʋ ehikiɣ? (b) Wazasɩ nzɩ Yehowa kpaɣʋ nɛ kpeɣu kɔŋna yɔ, alɩwaatʋ ɛzɩma sɩwɛɣ?

¹² Alɩwaatʋ ndʋ ɖitisiɣ se toovenim taa lɛ Yehowa kpeɣ-ɖʋ yɔ, pɩkɔŋnɩ-ɖʋ “laŋhɛzɩyɛ alɩwaatʋ” nɛ ɖihikiɣ ɖɔɖɔ maɣzɩm taa laŋhɛzɩyɛ nɛ ɖɩwɛɣnɩ ɛhʋyɛ kele kele ñɩnɖɛ. Kpaɣʋ nɛ kpeɣu mbʋ, pɩɩpɩzɩɣ nɛ pɩlɩɩnɩ ɛyaa cɔlɔ, ɛlɛ “Yehowa maɣmaɣ” cɔlɔ pɩlɩɣna. (Tʋma 3:19) Alɩwaatʋ ndʋ Yehowa kpeɣu-ɖʋ yɔ, ɛhaɣ-ɖʋ waɖɛ se ɖɩɖaɣnɩ kɛʋ ɛ-taabalaa nɛ pɩwɛɣ ɛzɩ wiɖiyi ɖɩtɩla kɩwɛɛkɩm kpa yɔ.

¹³ Yehowa kpeɣu-ɖʋ nɛ pɩtɛ lɛ, wiɖiyi ɛɛtasɩɣ kʋʋ ɖɔ-tɔm yaa ɛɛtasɩɣ hɔm ɖa-nɩŋgbaŋʋʋ kɩwɛɛkɩm mbʋ pɩ-yɔɔ. (Iza. 43:25; Yer. 31:34) Yehowa posuuni-ɖʋ ɖa-kɩwɛɛkɩm “ɛzɩ ɖɔm tɛ posuuni penim tɛ yɔ.” * (Keɣa 102:12) Alɩwaatʋ ndʋ ɖɩmaɣzɩɣ ɛzɩma Yehowa kpaɣʋ nɛ kpeɣu paɣlaa yɔ pɩ-yɔɔ yɔ, ɖɩwɛɣnɩ ɛsɩmɩyɛ nɛ ɖiseɣ-i sɔɔndʋ. (Keɣa 129:4) Ɛlɛ, mba Yehowa kpeɣu?

14. Pɩtalʋʋnɩ lɛɛlɛɛyɔ yɔ, ɛbɛ ɖɩkpɛlɩkaa pɩlɩɩnɩ mbʋ pʋyɔɔ Yehowa lɩzɩɣ se ekpeɣu nɔɔyʋ yaa eekpeɣ-i yɔ pɩ-yɔɔ?

¹⁴ Ɛzɩ ɖɩnaʋ nɛ pɩɖɛɛ yɔ, kɩwɛɛkɩm mbʋ ɛyʋ nɔɔyʋ laba yɔ paa pɩkɛ kɩwɛɛkɩm sɔsɔm yaa cikpem yɔ, pɩtɩkɛ mbʋ Yehowa cɔŋna nɛ ɛlɩzɩɣ se ekpeɣ-i yaa eekpeɣ-i. Pɩtasɩ lɛ, ɖɩkpɛlɩkaa se Yehowa kɛnɩ ɖa-Lɩzɩyʋ, ɖa-Paɣtʋ Ðʋyʋ nɛ ɖɔ-Tɔm Hʋyʋ, pʋyɔɔ lɛ ɛlakɩnɩ tʋmɩyɛ lɔŋsɩnɖɛ nɖɩ ɛwɛna yɔ alɩwaatʋ ndʋ ɛkpakɩɣ lɩmaɣzɩyɛ se ekpeɣu nɔɔyʋ yaa eekpeɣ-i yɔ. Ɛlɛ, pʋcɔ nɛ Yehowa kpaɣ lɩmaɣzɩyɛ se ekpeɣu nɔɔyʋ yaa eekpeɣ-i lɛ, tɔm ndʋ yɔɔ ɛmaɣzɩɣ?

15. Ɛzɩ Luka 12:47, 48 wɩlʋʋ yɔ, tɔm ndʋ tɩ-yɔɔ Yehowa maɣzɩɣ yɔ tɩ-taa natʋyʋ lɛ ndʋ?

¹⁵ Tɔm ndʋ tɩ-yɔɔ Yehowa maɣzɩɣ yɔ tɩ-taa natʋyʋ lɛ se ɛmaɣzɩɣ se ɛna se ɛzɩ kɩwɛɛkɩm laɖʋ ɖiɣzinaa se mbʋ ɛwɛɛ nɛ ɛlakɩ yɔ pɩtɩtʋʋzɩ yaa we. Ɛzɩ pamaʋ Luka 12:47, 48 taa yɔ, Yesu yeba nɛ tɔm ndʋ tɩ-taa tʋ kpayɩ kpayɩ. (Kalɩ Luka 12:47, 48.) Ye nɔɔyʋ ɛnawa se nabʋyʋ ɛɛkɛdɩɣnɩ Ɛsɔ nɛ pɩkɛ kɩwɛɛkɩm nɛ ɛlɩzɩ se ɛlakɩ-pʋ yɔ, pɩkɛ kɩwɛɛkɩm sɔsɔm. Yehowa pɩzɩɣ nɛ ɛlɩzɩ se eekpeɣ  ɛyʋ ɛnʋ. (Mark. 3:29; Yoh. 9:41) Ɛlɛ, pɩwɛɛ se ɖɩtɩlɩ se wiɖiyi ɖɩtɛm labʋ mbʋ pɩfɛyɩ ɖeu yɔ paa ɖɩnawa se pɩtɩtʋʋzɩ yɔ. Ɛzɩ ɖɩpɩzɩɣ nɛ ɖɩwɛɛnɩ lidaʋ se Yehowa kpeɣu-ɖʋ? Ɛɛɛ, mbʋ pʋyɔɔ yɔ alɩwaatʋ ndʋ Yehowa kaakpakɩɣ lɩmaɣzɩyɛ se ekpeɣ-ɖʋ yaa eekpeɣ-ɖʋ yɔ, nabʋyʋ wɛɛ nɛ ɛmaɣzɩɣ pɩ-yɔɔ ɖɔɖɔ.

16. (a) Ye pɔtɔm se nɔɔyʋ kpiɖaa yɔ, pʋ-tɔbʋʋ lɛ suwe? (b) Nɛ ɛbɛ yɔɔ pɩ-tɔm cɛyaa?

¹⁶ Tɔm lɛɛtʋ ndʋ tɩ-yɔɔ Yehowa maɣzɩɣ yɔ ndʋ lɛ se ɛcɔŋna se ɛna se kɩwɛɛkɩm laɖʋ kpiɖi siŋŋ yaa etikpiɖi. Ye pɔtɔm se nɔɔyʋ kpiɖaa yɔ, pʋ-tɔbʋʋ lɛ suwe? Ye pɔtɔm se nɔɔyʋ kpiɖaa yɔ, pʋ-tɔbʋʋ lɛ se “ɛlɛɣzɩ ɛ-maɣzɩm, ɛ-lakasɩ yaa ɛ-kaɖʋwa.” Ɛnɩɣ pɩ-taa se ɛlabɩ mbʋ pɩtɩtʋʋzɩ yɔ nɛ ɛnɩɣ siziŋ siŋŋ mbʋ ɛlaba nɛ pɩfɛyɩ ɖeu yɔ pɩ-yɔɔ yaa kɩbam mbʋ pɩɩwɛɛ se ɛla, ɛlɛ ɛtɩpɩzɩ nɛ ɛlabɩ-pʋ yɔ pɩ-yɔɔ. Ɛyʋ weyi ekpiɖaa yɔ, pɩtasɩna se ɛnɩɣ siziŋ mbʋ ɛlaba nɛ pɩfɛyɩ ɖeu yɔ pɩ-yɔɔ lɛ, ɛnɩɣ siziŋ ɖɔɖɔ ɛzɩma eyeba nɛ ɛ nɛ Yehowa pa-taabalɩyɛ camɩ nɛ piyele nɛ ɛla mbʋ pɩfɛyɩ ɖeu yɔ pɩ-yɔɔ. Tɔzɩ se Wiyaʋ Manaasee nɛ Wiyaʋ Daviid paalabɩ kɩwɛɛkɩm sɔsɔm, paa mbʋ yɔ Yehowa kpeɣ-wɛ mbʋ pʋyɔɔ yɔ pekpiɖi siŋŋ. (1 Aw. 14:8) Toovenim taa lɛ, pʋcɔ nɛ Yehowa kpeɣ-ɖʋ lɛ, pɩpɔzʋʋ se ɛna mbʋ pɩwɩlɩɣ kpayɩ kpayɩ se ɖikpiɖaa yɔ. Ɛlɛ, ye ɖɩnɩ siziŋ kɩwɛɛkɩm mbʋ ɖɩlaba yɔ pɩ-yɔɔ yɔ, pi-ɖeke pɩtɩmaɣ. Pɩpɔzʋʋ se ɖitisi faaa nɛ ɖɩkpɛzɩ nɩŋgbaŋaɣ lɛɛka. * Nɛ pɩkɛ tɔm lɛɛtʋ ndʋ tɩ-yɔɔ Yehowa maɣzɩɣ yɔ.

17. Ye pɔtɔm se ɛyʋ lɛɣzaa yɔ, pʋ-tɔbʋʋ lɛ suwe? (b) Nɛ ɛbɛ yɔɔ pɩ-tɔm cɛyaa? (Izaayii 55:7)

¹⁷ Tɔm kɩcɛyɩtʋ lɛɛtʋ ndʋ tɩ-yɔɔ Yehowa maɣzɩɣ yɔ ndʋ le se ɛcɔŋna se ɛna se kɩwɛɛkɩm laɖʋ lɛɣzɩ ɛ-wɛtʋ na. Ye pɔtɔm se ɛyʋ lɛɣzaa yɔ, pʋ-tɔbʋʋ lɛ se “ɛyʋ eyele labʋ mbʋ ɛlakaɣ yɔ.” Ðɩpɩzɩɣ nɛ ɖɩyɔɔdɩ ɖɔɖɔ se pʋ-tɔbʋʋ lɛ se pɩwɛɛ se ɛyʋ eyele labʋ mbʋ pɩfɛyɩ ɖeu yɔ nɛ ɛpaɣzɩ caɣʋ wezuu ɛzɩ Yehowa sɔɔlʋʋ se ɛyaa ɩcaɣ wezuu yɔ. (Kalɩ Izaayii 55:7.) Pɩpɔzʋʋ se kɩwɛɛkɩm laɖʋ ɛnʋ ɛlɛɣzɩ ɛ-maɣzɩm nɛ pɩsa nɛ Yehowa maɣzɩm ɖiyi-i. (Roma 12:2; Efɛz. 4:23) Pɩwɛɛ se ɛtɛ ɛ-taa se ɛlɔʋ maɣzɩm kɩdɛkɛdɩm mbʋ ɛɛwɛna yɔ nɛ eyele ɛ-lakasɩ kɩdɛkɛdɩsɩ.  (Kol. 3:7-10) Toovenim taa lɛ, tisuu mbʋ ɖɩwɛnɩ Krɩstʋ kɩlaʋ yɔɔ yɔ, mbʋ yekina se Yehowa ekpeɣ-ɖʋ nɛ ɛhɩzɩ ɖa-kɩwɛɛkɩm. Ye Yehowa ɛnawa se ɖɩwɛɛ nɛ ɖɩñakɩ pana siŋŋ se ɖɩlɛɣzɩ ɖe-wezuu caɣʋ yɔ, ɛkaɣ tɩŋnʋʋ kɩlaʋ ŋgʋ kɩ-yɔɔ nɛ ekpeɣ-ɖʋ.—1 Yoh. 1:7.

18. Ɛbɛ ɖɩkpɛlɩkaa pɩlɩɩnɩ Yehowa kpaɣʋ nɛ kpeɣu yɔɔ?

¹⁸ Iyele ɖɩɖaɣnɩ naʋ lɩmaɣza sɔsɔna wena a-taa ɖɩtazaa nɛ pɩɖɛɛ yɔ a-taa naayɛ. Toovenim taa lɛ, kedeŋa kpeekpe yɔɔ lɛ, Yehowa kpaɣʋ nɛ kpeɣu wayɩ fɛyɩ. Ɛbɛ yɔɔ ɖɩpɩzɩɣ nɛ ɖɩyɔɔdɩ mbʋ? Kajalaɣ taa lɛ, ɛsɔɔlɩ faaa se ekpeɣ-ɖʋ paa ɛzɩmtaa. Nabʋlɛ lɛ, ɛsɩm-ɖʋ camɩyɛ. Ɛsɩm ɖɔ-yɔɔ tɔm tɩŋa nɛ pʋyɔɔ lɛ, ɛnʋ pɩzɩɣna nɛ ɛna se ɖikpiɖi toovenim taa yaa ɖitikpiɖi. Nɛ nabudozo lɛ, alɩwaatʋ ndʋ Yehowa kpeɣu-ɖʋ yɔ, ekpeɣu-ɖʋ kiya nɛ ɛ-ɛsɩndaa lɛ pɩwɛɣ ɛzɩ wiɖiyi ɖɩtɩla kɩwɛɛkɩm mbʋ yɔ. Piyeki nɛ ɖɩwɛɛnɩ ɛhʋyɛ kele kele ñɩnɖɛ nɛ ɖɔ-tɔm kɛdɩɣnɩ-ɩ ɖɔɖɔ.

19. Paa ɖɩtɩtalɩ pilim nɛ pʋyɔɔ lɛ ɖɩkaɣ wobu pɩ-yɔɔ nɛ ɖɩlakɩ kɩwɛɛkɩm yɔ, ɛbɛ yɔɔ ɖa-taa pɩzɩɣ nɛ pɩla leleŋ?

¹⁹ Toovenim taa lɛ, ɖɩtɩtalɩ pilim nɛ pʋyɔɔ lɛ, ɖɩkaɣ wobu pɩ-yɔɔ nɛ ɖɩlakɩ kɩwɛɛkɩm. Ɛlɛ tɔm ndʋ tɩwɛ Étude perspicace des Écritures Volume 2 hɔɔlʋʋ 765 yɔɔ yɔ, tɩpɩzɩɣ nɛ tɩhɛzɩ ɖa-laŋa. Tɔm ndʋ yɔ: “Yehowa naɣ ɛ-sɛyaa pʋtɔdɩyɛ nɛ ɛmaɣzɩɣ po-tomnaɣ ɛjandʋ yɔɔ, pʋyɔɔ lɛ alɩwaatʋ ndʋ mantɩtalɩ pilim wɛtʋ ndʋ pɛɖɛzɩ-wɛ yɔ tiyeki nɛ pala kɩwɛɛkɩm yɔ, pɩtɩpɔzɩ se powolo pɩ-yɔɔ nɛ pakʋʋ pa-tɩ tɔm. (Keɣa 102:8-14; 129:3) Ye powoki pɩ-yɔɔ nɛ pañakɩ pana se pacaɣ wezuu nɛ pɩla nɔɔ kʋɖʋmaɣ nɛ Ɛsɔ nʋmɔŋ yɔ, pa-taa pɩzɩɣ nɛ pɩla leleŋ. (Fil. 4:4-6; 1 Yoh. 3:19-22).” Tɔm ndʋ tɩkpazɩɣ-ɖʋ ɖoŋ siŋŋ!

20. Ɛbɛ ɖɩkaɣ naʋ tɔm ñʋʋ ŋgʋ kɩkɔŋ yɔ kɩ-taa?

²⁰ Alɩwaatʋ ndʋ ɖɩlakɩ kɩwɛɛkɩm nɛ ɖikpiɖi pɩ-yɔɔ siŋŋ yɔ, Yehowa sɔɔlɩ faaa se ekpeɣ-ɖʋ, nɛ ɖɩwɛnɩ ɛsɩmɩyɛ pɩ-yɔɔ. Ɛlɛ, ɛzɩma ɖɩpɩzɩɣ nɛ ɖɩmaɣzɩnɩ Yehowa nɛ ɖikpeɣ ɛyaa lalaa? Ɛzɩma ɖikpeɣ ɛyaa lalaa yɔ, hɔɔlɩŋ weyi ɩ-taa pɩlabɩ nɔɔ kʋɖʋmaɣ nɛ ɛzɩma Yehowa kpeɣ-ɖʋ yɔ, nɛ hɔɔlɩŋ weyi ɩ-taa pɩwɛ ndɩ? Ɛbɛ yɔɔ pɩcɛyaa se ɖɩtɩlɩ tʋkaɣ ŋga kɛwɛ ɛzɩma ɖikpeɣ ɛyaa lalaa nɛ ɛzɩma Yehowa kpeɣ-ɖʋ yɔ pɩ-hɛkʋ taa yɔ? Tɔm ñʋʋ ŋgʋ kɩkɔŋ yɔ, kɩkaɣ cosuu tɔm pɔzʋʋ mbʋ pɩ-yɔɔ.