1. Ɛzɩ 1 Pɩyɛɛrɩ 5:2 yɔɔdʋʋ yɔ, waɖɛ nɖɩ ɛzʋtʋyaa wɛna?

 YEHOWA ɖʋ ɛzʋtʋyaa tʋmɩyɛ se pɔcɔnɩ e-heŋ yɔɔ, nɛ heŋ ɛnɩ ɩmʋ ñɩm ɛ-ɛsɩndaa. Abalaa kpekpeka tɩnaa mba, tʋmɩyɛ nɖɩ paɖʋ-wɛ se paɖʋ lɩm po-koobiya yɔ ɖɩmʋ ñɩm pɛ-ɛsɩndaa nɛ pañakɩ pana siŋŋ se pɛkɛ «ninɖiɣyaa mba peɖiyiɣ [heɣsi] ɛzɩ pɩpɔzʋʋ yɔ.» (Yer. 23:4; kalɩ 1 Pɩyɛɛrɩ 5:2.) Ðɩwɛnɩ ɛsɩmɩyɛ siŋŋ ɖɛ-ɛgbɛyɛ taa koobiya mba pɔ-yɔɔ.

2. Kala wena ɛzʋtʋyaa nabɛyɛ pɩzɩɣ nɛ pakatɩ?

² Ɛzʋtʋyaa kaalakɩ pa-tʋma lɛ, pakatɩɣ kala sakɩyɛ. Tʋma ana a-taa naɖɩyɛ lɛ se pañaɣ pana siŋŋ nɛ pɔcɔnɩ ɛgbɛyɛ yɔɔ. Payaɣ Etaazuunii ɛgbɛyɛ taa ɛzʋtʋyʋ nɔɔyʋ se Tony; pɩɩpɔzaa se ɛtɩlɩ e-ɖoŋ kamaɣ alɩwaatʋ ndʋ paaɖʋ-ɩ tʋma ndɩ ndɩ yɔ. Ɛyɔɔdaa se: «COVID-19 kʋdɔŋ paɣzaa lɛ, mañaɣ pana nɛ pɩkɩlɩ nɛ mala kediɣzisi nɛ tɔm susuu ɖʋtʋ. Ɛlɛ paa maañaɣ pana nɛ mala sakɩyɛ yɔ, tʋma sakɩyɛ kaawɛɛ se pala. Pɩkɔm pɩtɛmna se mantaapɩzɩɣ nɛ mankalɩɣ Bibl, malakɩ man-tɩ yɔɔ kpɛlɩkʋʋ nɛ mantɩmɩɣ.» Payaɣ Kosovoo ɛjaɖɛ taa ɛzʋtʋyʋ nɔɔyʋ se Ilir; ɛlɛ katɩ kaɖɛ nɖɩ yɔ ɖɩwɛ ndɩ. Ɛɛwɛ egeetiye nɖɩ ɖɩ-taa palakaɣ you yɔ; nɛ alɩwaatʋ ndʋ tɩ-taa lɛ, pɩɩwɛ-ɩ kaɖɛ se ɛɖɔ lɔŋ weyi ɛgbɛyɛ tasɩɣ yɔ ɛ-yɔɔ. Ɛyɔɔdaa se: «Alɩwaatʋ ndʋ ɛgbɛyɛ piliŋa ɖʋ-m tʋmɩyɛ se mansɩnɩ koobiya mba pɛwɛ kaɖɛ lone naɖɩyɛ taa yɔ, pɩɩtakɩ abalɩtʋ ndʋ mɛwɛna yɔ. Sɔɔndʋ kpaɣaɣ-m nɛ pɩlakaɣ-m ɛzɩ lɔŋ weyi patasɩ-m yɔ ɛtɩmʋna yɔ.» Payaɣ Aazii Ɛsɔtɔm tiyiyu nɔɔyʋ se Tim; pɩɩwɛ-ɩ kaɖɛ se ɛlakɩ tʋma wena payɩ pɩpɔzaɣ se ɛla paa evemiye nɖɩ yɔ. Ɛyɔɔdaa se: «Nabʋyʋ taa pɩnɩɣ-m siŋŋ nɛ maapɩzɩɣ nɛ mɔncɔŋnɩ koobiya yɔɔ.» Ɛbɛ pɩzɩɣ nɛ pɩsɩnɩ ɛzʋtʋyaa mba pakatɩɣ kala ana a-ɖɔndɩ yɔ?

3. Ye ɖa-tɩŋa ɖɩmaɣzɩɣ Tɔm hʋyʋʋ Gideyɔɔ kɩɖaʋ yɔɔ yɔ, ɛzɩma pɩpɩzɩɣ nɛ pɩwazɩ-ɖʋ?

 ³ Ɛzʋtʋyaa pɩzɩɣ nɛ pɛkpɛlɩkɩ lɔŋ Tɔm hʋyʋ Gideyɔɔ kɩɖaʋ taa. (Ebr. 6:12; 11:32) Ɛɛkɛ Ɛsɔ samaɣ yɔɔ kandɩyʋ nɛ ke-ɖiyiyu. (Tɔh. 2:16; 1 Kro. 17:6) Ɛzɩ Gideyɔɔ yɔ, Ɛsɔ ɖʋ ɛzʋtʋyaa tʋmɩyɛ se pɔcɔnɩ ɛ-samaɣ yɔɔ kaɖɛ alɩwaatʋ taa. (Tʋma 20:28; 2 Tim. 3:1) Gideyɔɔ kaatɩlɩ e-ɖoŋ kamaɣ, ɛɛwɛnɩ tɩ luzuu, ñamtʋ, nɛ laŋɩyɛ ɖɔkʋʋ. Ɛzʋtʋyaa pɩzɩɣ nɛ pɛkpɛlɩkɩ lɔŋ ɛ-cɔlɔ. Pɩtasɩ lɛ, ye mba patɩkɛ ɛzʋtʋyaa yɔ pamaɣzɩɣ Gideyɔɔ kɩɖaʋ yɔɔ yɔ, pɩsɩɣnɩ-wɛ nɛ pɛwɛɛnɩ ɛsɩmɩyɛ ɛzʋtʋyaa yɔɔ nɛ pɩkɩlɩ nɛ paɖʋ-wɛ nesi.—Ebr. 13:17.

4. Ɛzɩma Gideyɔɔ wɩlaa se ɛsɩm e-ɖoŋ kamaɣ nɛ ɛwɛnɩ tɩ luzuu?

⁴ Gideyɔɔ kaasɩm e-ɖoŋ kamaɣ nɛ ɛɛwɛnɩ tɩ luzuu ɖɔɖɔ. b Alɩwaatʋ ndʋ Ɛsɔ tiyiyu heyi Gideyɔɔ se palɩzɩ-ɩ se ɛya Izrayɛɛlɩ piya ñʋʋ Madiyaŋ mba nesi tɛɛ yɔ, ɛyɔɔdɩnɩ tɩ luzuu se: «Men-cejewiye kɛnɩnɩ tɔyaɣ Manaasee taa, nɛ makɩlɩnɩ kɔzʋʋ man-caa ɖɩɣa taa.» (Tɔh. 6:15) Ɛmaɣzaɣ se ɛtɩmʋna se ɛla tʋmɩyɛ nɖɩ, ɛlɛ Yehowa ñanawa se ɛpɩzɩɣ nɛ ɛlabɩ-ɖɩ. Yehowa sɩnɩ Gideyɔɔ nɛ ɛpɩzɩ nɛ ɛla ɛ-tʋmɩyɛ nɖɩ camɩyɛ.

5. Alɩwaatʋ ndʋ taa pɩpɩzɩɣ nɛ pɩla ɛzʋtʋyʋ nɔɔyʋ kaɖɛ se eluzi ɛ-tɩ nɛ ɛtɩlɩ e-ɖoŋ kamaɣ?

⁵ Ɛzʋtʋyaa lakɩ po-ɖoŋ ɖeɖe se patɩlɩ po-ɖoŋ kamaɣ nɛ pɛwɛɛnɩ tɩ luzuu pɩtɩŋa pɩ-taa. (Mik. 6:8; Tʋma 20:18, 19) Paaɖɛlɛsɩɣ niye mbʋ papɩzɩɣ labʋ yɔ yaa mbʋ palakɩ yɔ pɩ-taa; nɛ alɩwaatʋ ndʋ picoɖuu-wɛ yɔ, paamaɣzɩɣ se pɛfɛyɩ wazaɣ nakɛyɛ. Nabʋyʋ taa pɩpɩzɩɣ nɛ pɩla ɛzʋtʋyʋ nɔɔyʋ kaɖɛ se eluzi ɛ-tɩ yaa se ɛtɩlɩ e-ɖoŋ kamaɣ. Pɩtɩla ɛpɩzɩɣ etisi nɛ ɛmʋ tʋma sakɩyɛ ɛlɛ ɛɛpɩzɩɣ se ɛla a-tɩŋa. Yaa nabɛyɛ pɩzɩɣ nɛ pɔyɔɔdɩ se ɛtɩla tʋmɩyɛ naɖɩyɛ camɩyɛ yaa papɩzɩɣ nɛ pasamɩ-ɩ ɛzɩma ɛlabɩ tʋmɩyɛ naɖɩyɛ camɩyɛ yɔ pɩ-yɔɔ. Ɛbɛ ɛzʋtʋyaa pɩzɩɣ nɛ pɛkpɛlɩkɩ Gideyɔɔ cɔlɔ nɛ pɩsɩnɩ-wɛ wɛtʋ ndʋ tɩ-taa?

6. Gideyɔɔ tɩlɩ e-ɖoŋ kamaɣ, ɛbɛ ɛzʋtʋyaa pɩzɩɣ nɛ pɛkpɛlɩ ɛ-cɔlɔ? (Cɔnɩ ɖɔɖɔ kɩlɛmʋʋ.)

⁶ Pɔzɩ nɛ pasɩnɩ-ŋ. Ɛyʋ weyi ɛtɩlɩ e-ɖoŋ kamaɣ yɔ, ɛnawa se ɛɛpɩzɩɣ nɛ ɛla pɩtɩŋa. Gideyɔɔ kaawɩlaa se ɛtɩlɩ e-ɖoŋ kamaɣ mbʋ  pʋyɔɔ yɔ ɛpɔzɩ lalaa se pasɩnɩ-ɩ. (Tɔh. 6:27, 35; 7:24) Ɛzʋtʋyaa mba pɛwɛnɩ lɔŋsɩnɖɛ yɔ, palakɩ mbʋ ɖɔɖɔ. Tony weyi ɖɩyɔɔdɩ ɛ-tɔm nɛ pɩɖɛɛ yɔ ɛyɔɔdaa se: «Ɛzɩma pafalɩsɩ-m man-pɩjatʋ taa yɔ pʋyɔɔ lɛ, mentisiɣ nɛ paɖʋʋ-m tʋma nɛ pɩcɛzɩɣ wena manpɩzɩɣ labʋ yɔ. Pʋyɔɔ lɛ, mankpaɣ lɩmaɣzɩyɛ se manɖʋʋ tɔm ñʋʋ ŋgʋ kɩyɔɔdʋʋ ɛzɩma pɩwɛɛ se ɛyʋ ɛtɩlɩ e-ɖoŋ kamaɣ yɔ pɩ-tɔm ɖɔ-hɔʋ taa Ɛsɔ sɛtʋ ɖʋtʋ taa nɛ mɔnpɔzɩ ma-halʋ se ɛmaɣzɩɣ se wɛtʋ ndʋ mɛwɛnɩ hɔɔlʋʋ ŋgʋ kɩ-taa. Mantasɩ cɔnʋʋ ɖɔɖɔ jw.org yɔɔ video: Falɩsɩ lalaa, ŋtaa-wɛ liu nɛ ŋha-wɛ ɖoŋ ɛzɩ Yesu kaalabʋ yɔ.» Tony paɣzɩ pɔzʋʋ ɛyaa lalaa se pasɩnɩ-ɩ ɛ-tʋma labʋ. Ɛbɛ lɩ pɩ-taa? Tony yɔɔdaa se: «Lalaa wɛɛ nɛ paɖʋʋ nesi nɛ palakɩ ɛgbɛyɛ taa tʋma nɛ mɛwɛnɩ alɩwaatʋ se mɛncɛyɩsɩ ma nɛ Yehowa ɖa-taabalɩyɛ.»

7. Ɛzɩma ɛzʋtʋyaa pɩzɩɣ nɛ pamaɣzɩnɩ Gideyɔɔ alɩwaatʋ ndʋ pakʋʋ pɔ-tɔm yɔ? (Yakubu 3:13)

⁷ Ye nɔɔyʋ ɛkʋʋ ñɔ-tɔm yɔ, cosini nɔɔ kɩbaŋa. Ɛzʋtʋyaa katɩɣ kaɖɛ lɛɛɖɛ alɩwaatʋ ndʋ pakʋʋ pɔ-tɔm yɔ. Alɩwaatʋ ndʋ tɩ-taa ɖɔɖɔ, Gideyɔɔ kɩɖaʋ pɩzɩɣ nɛ kɩsɩnɩ-wɛ. Gideyɔɔ kaanawa se ɛtɩtalɩ pilim pʋyɔɔ ecosini nɔɔ kɩbaŋa alɩwaatʋ ndʋ Efrayim mba kʋ ɛ-tɔm yɔ. (Tɔh. 8:1-3) Eticosi-wɛ nɛ pana. Ewelisini-wɛ nɛ pɔyɔɔdɩ ndʋ tɩcɛyaɣ-wɛ yɔ nɛ ecosi-wɛ nɛ nɔɔ kɩbaŋa nɛ ɛwɩlɩ se ɛwɛnɩ tɩ luzuu, piyeba nɛ pa-laŋɩyɛ hɛɛ. Ɛzʋtʋyaa mba pɛwɛnɩ lɔŋsɩnɖɛ yɔ, pamaɣzɩɣnɩ Gideyɔɔ alɩwaatʋ ndʋ pewelisiɣni mba pakʋʋ pɔ-tɔm yɔ camɩyɛ nɛ pocosuu-wɛ nɛ nɔɔ kɩbaŋa yɔ. (Kalɩ Yakubu 3:13.) Alɩwaatʋ ndʋ palakɩ mbʋ yɔ, peyeki se laŋhɛzɩyɛ ɛwɛɛ ɛgbɛyɛ taa.

8. Ɛzɩma pɩwɛɛ se ɛzʋtʋyaa ɩla alɩwaatʋ ndʋ pasaŋ-wɛ yɔ? Ha kɩɖaʋ nakʋyʋ.

⁸ Cɛlɩ samtʋ Yehowa. Alɩwaatʋ ndʋ Gideyɔɔ wabɩ Madiyaŋ mba nɛ ɛyaa lalaa wɛɛ nɛ pasaŋɩ-ɩ yɔ, ɛcɛlɩ samtʋ ndʋ Yehowa. (Tɔh. 8:22, 23) Ɛzɩma koobiya mba paha-wɛ wala yɔ papɩzɩɣ nɛ pamaɣzɩnɩ Gideyɔɔ? Yehowa pɩwɛɛ se pɛcɛlɩ samtʋ mbʋ papɩzɩɣ nɛ palakɩ yɔ pɩ-yɔɔ. (1 Kɔr. 4:6, 7) Ðɩkpaɣ se pasam ɛzʋtʋyʋ nɔɔyʋ mbʋ pʋyɔɔ yɔ ɛwɩlɩ tɔm camɩyɛ. Ɛpɩzɩɣ nɛ ɛyɔɔdɩ se wɩlɩtʋ ndʋ tɩlɩnɩ Ɛsɔtɔm taa na, nɛ ɖa-tɩŋa payɩ Yehowa ɛgbɛyɛ wɛɛ nɛ ɖɩfalɩsɩɣ-ɖʋ. Ɛzʋtʋyaa pɩzɩɣ nɛ pamaɣzɩ nɛ pana se alɩwaatʋ ndʋ pawɩlɩɣ tɔm yɔ, paɖʋʋ Yehowa hɩɖɛ na yaa pɔsɔɔlaa se pɔhɔ ɛyaa lɩmaɣza nɛ pɔkɔnɩ pa-tɩ yɔɔ. Payaɣ ɛzʋtʋyʋ nɔɔyʋ se Timothy; iyele nɛ ɖɩna ɛ-kɩɖaʋ. Alɩwaatʋ ndʋ paha-ɩ waɖɛ nɛ ɛpɩsɩ ɛzʋtʋyʋ yɔ, ɛɛsɔɔlɩ samaɣ taa tɔm yɔɔdʋʋ. Ɛyɔɔdaa se: «Mɔn-kɔɔnɔɔ tɔm ɖaɣlaɣ nɛ kɩɖaŋ weyi mankpakaɣ yɔ mancanaɣ-ɩ kpem. Piyekaɣ nɛ ɖoŋ ɖoŋ lɛ, ɛyaa saŋɩ-m pɩ-yɔɔ. Ɛlɛ piyeba nɛ tɔm welisiyaa kaŋ pa-lɩmaɣza mɔ-yɔɔ nɛ pataakaŋ-yɛ Bibl yaa Yehowa yɔɔ. Alɩwaatʋ wɛɛ nɛ tɩɖɛɣ lɛ, Timothy ɖiɣzina se pɩpɔzʋʋ se ɛlɛɣzɩ ɛzɩma ɛwɩlɩɣ tɔm yɔ pɩ-hɔɔlʋʋ taa nɛ pɩsa nɛ ɛyaa ɩtaakaŋ pa-lɩmaɣza ɛ-yɔɔ. (Adu. 27:21) Ɛbɛ lɩ pɩ-taa? Ɛyɔɔdaa se: «Koobiya ndɩ ndɩ heyi-m se mɔn-tɔm yɔɔdʋʋ sɩnɩ-wɛ nɛ palʋbɩnɩ kaɖɛ naɖɩyɛ, pɔɖɔkɩ pa-laŋɩyɛ kʋñɔŋ nakʋyʋ taa, yaa pɔñɔtɩnɩ Yehowa nɛ pɩkɩlɩ. Alɩwaatʋ ndʋ koobiya heyiɣ-m tɔm ndʋ yɔ, man-taa lakɩ leleŋ nɛ pɩkɩlɩɣ alɩwaatʋ ndʋ pasaŋaɣ-m yɔ.»

9. Ɛbɛ kaayeba nɛ pɩwɛɛ Gideyɔɔ kaɖɛ se ɛña Yehowa nɛ ɛwɛɛ abalɩtʋ? (Cɔnɩ takayaɣ huyuu yɔɔ kɩlɛmʋʋ.)

⁹ Alɩwaatʋ ndʋ palɩzɩ Gideyɔɔ se ɛpɩsɩ tɔm hʋyʋ yɔ, pɩɩpɔzaa se ɛwɛɛnɩ ñamtʋ nɛ ɛwɛɛ abalɩtʋ. Paaɖʋ-ɩ tʋmɩyɛ se ɛyɔkɩ ɛ-caa tɛ Baalɩ altaaru; tʋmɩyɛ nɖɩ ɖɩɩwɛ kaɖɛ. (Tɔh. 6:25, 26) Pʋwayɩ ekpeɣli sɔɔjanaa nɛ pɩtɛ lɛ, Yehowa heyi-i tam nabʋlɛ se ɛpasɩ sɔɔjanaa mba. (Tɔh. 7:2-7) Kɛdɛzaɣ ɖeɖe lɛ, Yehowa heyi-i  se ewolo nɛ eyooni koyindu ɖoo cɩjɩka taa.—Tɔh. 7:9-11.

10. Ɛbɛ pɩzɩɣ piyele nɛ pɩwɛɛ ɛzʋtʋyʋ nɔɔyʋ kaɖɛ se etisi faaa nɛ ɛña?

¹⁰ Pɩpɔzʋʋ se ɛzʋtʋyaa ‘itisi faaa nɛ paña.’ (Yak. 3:17) Ɛzʋtʋyʋ weyi ɛñaŋ yɔ, etisiɣ faaa nɛ ɛɖɔŋ tɔm ndʋ Masɩ yɔɔdʋʋ yɔ tɩ-yɔɔ nɛ ɛɖɔŋ ɖɔɖɔ lɔŋ weyi ɛgbɛyɛ tasɩɣ yɔ ɛ-yɔɔ. Ɛlakɩ mbʋ nɛ ɛhaɣ ɛyaa lalaa kɩɖaʋ kɩbaŋʋ. Ɛlɛ pɩpɩzɩɣ nɛ pɩlabɩ-ɩ kaɖɛ se ɛña. Kɩɖaʋ nakʋyʋ yɔ: Pɩtɩla ɛmʋ lɔŋ tasʋʋ sakɩyɛ yaa pɛlɛɣzɩ lɔŋ tasʋʋ mbʋ lɛɛ lɛɛ nɛ pɩwɛɛ-ɩ kaɖɛ se ɛɖɔ pɩ-yɔɔ. Hɔɔlɩŋ nɩɩyɩ taa lɛ, pɩtɩla ɛpɔzʋʋ ɛ-tɩ se toovenim taa lɛ, ɛzɩ lɔŋ tasʋʋ mbʋ pɩmʋnaa yaa pɩkɛ lɔŋ tasʋʋ kɩbam na? Yaa papɩzɩɣ nɛ paɖʋ-ɩ tʋmɩyɛ nɖɩ ɖɩpɩzɩɣ ɖiyele nɛ elesi ɛ-tɩ yɔɔ wɛʋ waɖɛ yɔ. Wɛtʋ ndʋ tɩ-taa lɛ, ɛzɩma ɛzʋtʋyaa pɩzɩɣ nɛ pamaɣzɩnɩ Gideyɔɔ nɛ petisi nɛ paña?

11. Ɛbɛ pɩzɩɣ pɩsɩnɩ ɛzʋtʋyaa nɛ pɛwɛɛnɩ ñamtʋ?

¹¹ Welisi lɔŋ tasʋʋ camɩyɛ nɛ ŋɖɔ pɩ-yɔɔ. Ɛsɔ heyi Gideyɔɔ ɛzɩma ɛyɔkɩ ɛ-caa tɛ altaaru yɔ, ɖenɖe pɩwɛɛ se ɛma Yehowa tɛ altaaru yɔ nɛ kpɩnɛ nɖɩ pɩwɛɛ se ɛlaanɩ kɩlaʋ yɔ. Gideyɔɔ tɩkaɖɩnɩ lɔŋ tasʋʋ mbʋ, ɛlɛ ɛlabɩ mbʋ peheyi-i se ɛla yɔ ɖeyi ɖeyi. Sɔnɔ, Yehowa ɛgbɛyɛ tɩŋɩɣnɩ takayɩsɩ nɛ tɔm susuu yɔɔ nɛ ɖitiyiɣni lɔŋ tasʋʋ ɛzʋtʋyaa se pɩkandɩyɩ ɖɔ-yɔɔ nɛ ɖɩñɔtɩnɩ Yehowa. Ðɩsɔɔlɩ ɛzʋtʋyaa mbʋ pʋyɔɔ yɔ pɔɖɔŋ lɔŋ tasʋʋ mbʋ pɩ-yɔɔ camɩyɛ. Pɩwazɩɣ ɛgbɛyɛ kpeekpe.—Keɣ. 119:112.

12. Ye palabɩ lɛɣzɩtʋ natʋyʋ teokrasɩ ɖʋtʋ taa yɔ, ɛzɩma ɛzʋtʋyaa pɩzɩɣ nɛ pɔɖɔ Ebree mba 13:17 taa tɔm yɔɔ?

¹² Tisi faaa nɛ ŋlɛɣzɩ. Tɔzɩ se Yehowa kaaheyi Gideyɔɔ se eyele ɛ-sɔɔjanaa hɔɔlʋʋ sɔsɔʋ nɛ papɩsɩ ɖɩɣa. (Tɔh. 7:8) Ɛpɩzaɣ se ɛpɔzɩ ɛ-tɩ se: ‘Ɛzɩ toovenim taa lɛ, pɩcɛyaa se mala lɛɣzɩtʋ ndʋ? Ye malabɩ mbʋ pɩkaɣ ɖɔm na?’ Paa pɩtɩɩkɛ suwe yɔ, Gideyɔɔ ñama. Sɔnɔ, ɛzʋtʋyaa maɣzɩɣnɩ Gideyɔɔ ye petisiɣ nɛ pañaŋ alɩwaatʋ ndʋ ɛgbɛyɛ heyiɣ-wɛ se pala nabʋyʋ nɛ pɩwɛ ndɩ nɛ mbʋ palakaɣ yɔ. (Kalɩ Ebree mba 13:17.) Kɩɖaʋ nakʋyʋ yɔ: Pɩnaɣ 2014 taa, Nɔɔɖɛyaa ɛgbɛyɛ labɩ lɛɣzɩtʋ liidiye nɖɩ pamaɣnɩ Kewiyaɣ kpaamɩŋ nɛ Kigbeɣliŋ kpaamɩŋ yɔ pɩ-hɔɔlʋʋ taa. (2 Kɔr. 8:12-14) Agbaa ɩɩtasɩɣ hɛyʋʋ liidiye nɖɩ pamaɣnɩ kpaamɩŋ ɛnɩ yɔ. Ɛlɛ, ɛjaɖɛ kpeekpe yɔɔ agbaa kpɛndɩɣ a-liidiye se pɩsa nɛ papɩzɩ nɛ pama teokrasɩ kuduyuŋ ɖenɖe pɩpɔzʋʋ yɔ paa ɛgbɛyɛ nɖɩ pamaɣ kuduyuu ŋgʋ yɔ ɖɩfɛyɩnɩ liidiye sakɩyɛ se ɖɩɖʋ nesi yɔ. Alɩwaatʋ ndʋ José nɩ lɛɣzɩtʋ ndʋ tɩ-tɔm yɔ, ɛpɩtaɣ se pɩɩkaɣ ɖɔm, nɛ ɛmaɣzaɣ se: ‘Paakaɣ pɩzʋʋ nɛ pama paa Kewiyaɣ kpaaŋ kʋɖʋmʋʋ maɣmaɣ. Pɩtɩkɛ mbʋ palakɩ ɛjaɖɛ hɔɔlʋʋ kʋnɛ kɩ-taa.’ Ɛbɛ sɩnɩ José nɛ ɛɖʋ nesi lɛɣzɩtʋ ndʋ? Ɛyɔɔdaa se: «Aduwa 3:5, 6 taa tɔm tɔzɩ-m se mantaa Yehowa liu. Nɛ mbʋ pɩlɩ pɩ-taa yɔ, pɩwɛ ɖeu kpem. Pɩtasɩna se ɖɩmaɣ Kewiyaɣ kpaamɩŋ sakɩyɛ nɛ pɩkɩlɩɣ lɛ, ɖɩkpɛlɩkɩ ɖɔɖɔ ɛzɩma ɖɩtɩŋnɩ nʋmɔŋ ndɩ ndɩ yɔɔ nɛ ɖɩɖʋ nesi nɛ pɩsa nɛ pɩtɩŋa pɩwɛɛ kɩmaŋ yɔ.»

13. (a) Gideyɔɔ taa kaatɛmnɩ we? (b) Ɛzɩma ɛzʋtʋyaa pɩzɩɣ nɛ pamaɣzɩnɩ Gideyɔɔ? (Cɔnɩ ɖɔɖɔ kɩlɛmʋʋ.)

 ¹³ La Yehowa sɔɔlɩm nɛ abalɩtʋ. Gideyɔɔ ñam Yehowa paa sɔɔndʋ kaakpa-ɩ nɛ paa tʋmɩyɛ nɖɩ ɖɩ-labʋ ɛpɩzaɣ se pɩkɔnɩ-ɩ kaɖɛ yɔ. (Tɔh. 9:17) Yehowa yeba nɛ Gideyɔɔ na se ɛwɛ ɛ-cɔlɔ nɛ pɩtɛ lɛ, Gideyɔɔ taa tɛ se Yehowa kaɣ-ɩ sɩnʋʋ nɛ ɛkandɩyɩ ɛ-samaɣ yɔɔ. Ɛzʋtʋyaa mba pɛwɛ ageeta wena a-taa paɖɩɣ ɖɛ-Ɛsɔ sɛtʋ tʋma nʋmɔʋ yɔ, pamaɣzɩɣnɩ Gideyɔɔ. Palakɩ abalɩtʋ nɛ pɛɖɛɣ nɔɔ kediɣzisi nɛ tɔm susuu taa paa tʋma ana a-labʋ ɛpɩzɩɣ piyele se pakpa-wɛ, pɔpɔzɩ-wɛ tɔm, pelesi pa-tʋma yaa palabɩ-wɛ kañatʋ yɔ. c Kʋñɔŋ sɔsɔʋ alɩwaatʋ taa, pɩkaɣ pɔzʋʋ se ɛzʋtʋyaa ɩwɛɛ abalɩtʋ nɛ papɩzɩ nɛ pɔɖɔ lɔŋ tasʋʋ mbʋ pakaɣ mʋʋ yɔ pɩ-yɔɔ paa pɩ-yɔɔ ɖɔm ɛpɩzɩɣ nɛ pɩkɔnɩ-wɛ kaɖɛ yɔ. Lɔŋ tasʋʋ mbʋ, pɩpɩzɩɣ nɛ pitukuni ɛzɩma pɩwɛɛ se ɖisusi nɩŋgbaŋʋʋ hɔm tɔm yɔ, nɛ ɛzɩma pɩwɛɛ se ɖɩla nɛ ɖihiɣ ñʋʋ yabʋ alɩwaatʋ ndʋ Gɔɔgɩ weyi ɛlɩnɩ Maagɔɔgɩ yɔ ɛkʋyʋʋ ɖɔ-yɔɔ yɔ.—Ezek. 38:18; Natʋ 16:21.

14. Ɛbɛ yɔɔ pɩɩwɛ Gideyɔɔ kaɖɛ se ɛɖɔkɩ ɛ-laŋɩyɛ?

¹⁴ Waɖɛ nɖɩ paha Gideyɔɔ se ɛkɛ tɔm hʋyʋ yɔ ɖɩpɔzaɣ se ɛla tʋmɩyɛ siŋŋ. Alɩwaatʋ ndʋ Gideyɔɔ yowaɣni Madiyaŋ mba nɛ peseɣ yɔ, ɛɖʋ pa-wayɩ kpaɣnɩ Yizreyɛɛlɩ fɛɛʋ taa nɛ pɩkɔɔ pɩtalɩ Yɔɔrdaŋ Pɔɔ taa; pɩtɩla cɔka sakɩyɛ kaawɛ egeetiye nɖɩ ɖɩ-taa. (Tɔh. 7:22) Ɛzɩ Gideyɔɔ talɩ Yɔɔrdaŋ Pɔɔ taa lɛ, ɛpɩsɩ? Aayɩ! Paa pɩɩnɩ ɛ nɛ ɛ-ɛyaa 300 yɔ, pɛtɛzɩ pɔɔ ŋga nɛ powolo pɩ-yɔɔ nɛ paɖʋ pa-wayɩ. Pɩtɛmna se pehiɣ Madiyaŋ mba nɛ pawabɩ-wɛ.—Tɔh. 8:4-12.

15. Alɩwaatʋ ndʋ taa pɩpɩzɩɣ nɛ pɩwɛɛ ɛzʋtʋyʋ nɔɔyʋ kaɖɛ se ɛɖɔkɩ ɛ-laŋɩyɛ?

¹⁵ Nabʋyʋ taa ɛgbɛyɛ yɔɔ cɔnʋʋ yaa hɔʋ yɔɔ cɔnʋʋ pɩzɩɣ piyele nɛ pɩnɩɩ ɛzʋtʋyʋ nɔɔyʋ siŋŋ. Ɛzɩma ɛzʋtʋyaa pɩzɩɣ nɛ pamaɣzɩnɩ Gideyɔɔ wɛtʋ ndʋ tɩ-taa?

16-17. (a) Ɛbɛ sɩnɩ Gideyɔɔ nɛ ɛɖɔkɩ ɛ-laŋɩyɛ? (b) Ɛzʋtʋyaa taa pɩzɩɣ nɛ pɩtɛ suwe? (Izaayii 40:28-31) (Cɔnɩ ɖɔɖɔ kɩlɛmʋʋ.)

¹⁶ Taa liu Yehowa se ɛkaɣ-ŋ kpazʋʋ ɖoŋ. Gideyɔɔ kaata Yehowa liu se ɛkaɣ-ɩ kpazʋʋ ɖoŋ,  nɛ Yehowa kpazɩ-ɩ ɖoŋ. (Tɔh. 6:14, 34) Alɩwaatʋ natʋyʋ Gideyɔɔ nɛ ɛ-ɛyaa paaɖʋ Madiyaŋ awiya 2 wayɩ, ŋgʋ paba kaacaɣ aɖaaɖaanaa yɔɔ. (Tɔh. 8:12, 21) Ɛlɛ, Ɛsɔ sɩnɩ Izrayɛɛlɩ mba nɛ pakpa-wɛ nɛ pawa you. Ɛzʋtʋyaa ɖɔɖɔ pɩzɩɣ nɛ pataa Yehowa liu, ɛnʋ weyi «pɩɩnɩɣ-ɩ kaaʋ nɛ pɩɩɖɛɣ-ɩ kaaʋ» yɔ. Ɛkaɣ-wɛ haʋ ɖoŋ alɩwaatʋ ndʋ pɩpɔzʋʋ-wɛ ɖoŋ ɛnɩ yɔ.—Kalɩ Izaayii 40:28-31.

¹⁷ Iyele nɛ ɖɩna Matthew kɩɖaʋ; ɛkɛ ɖama nɩnʋʋ nɛ ɖɔkɔtɔnaa kɔɔmiite nakʋyʋ taa tʋ. Ɛbɛ sɩɣnɩ-ɩ nɛ ɛɖɔkʋʋ ɛ-laŋɩyɛ? Ɛyɔɔdaa se: «Menɖiɣzinaa se Filiipi mba 4:13 taa tɔm kɛ toovenim. Tam sakɩyɛ, alɩwaatʋ ndʋ pɩnɩɣ-m siŋŋ nɛ maatasɩɣ pɩzʋʋ se mala nabʋyʋ yɔ, mantɩmɩɣnɩ Yehowa siŋŋ nɛ mentendiɣ-i se ɛha-m tomnaɣ taa ɖoŋ nɛ maɣzɩm taa ɖoŋ nɛ mansɩnɩ mon-koobiya. Alɩwaatʋ ndʋ tɩ-taa lɛ, menɖiɣziɣna se Yehowa fezuu haɣ-m ɖoŋ nɛ ɩsɩɣnɩ-m nɛ mɔnɖɔkʋʋ ma-laŋɩyɛ.» Ɛzɩ Gideyɔɔ yɔ, ɖa-agbaa taa ɛzʋtʋyaa lakɩ tʋmɩyɛ siŋŋ nɛ pɔcɔŋnɩ Ɛsɔ samaɣ yɔɔ paa pɩ-labʋ ɛfɛyɩ kɛlɛʋ paa ɛzɩmtaa yɔ. Pɩkɛ toovenim se pɩpɔzʋʋ se patɩlɩ po-ɖoŋ kamaɣ nɛ peɖiɣzina se paapɩzɩɣ nɛ pala pɩtɩŋa paa ɛzɩmtaa ɛzɩ pɔsɔɔlʋʋ yɔ. Ɛlɛ papɩzɩɣ nɛ pataa liu Yehowa se ɛkaɣ welisuu adɩma wena palakɩ se ɛsɩnɩ-wɛ yɔ nɛ ɛkaɣ-wɛ kpazʋʋ ɖoŋ nɛ pɔɖɔkɩ pa-laŋɩyɛ.—Keɣ. 116:1; Filp. 2:13.

18. Tobi lɛ, ɛzɩma ɛzʋtʋyaa pɩzɩɣ nɛ pamaɣzɩnɩ Gideyɔɔ?

¹⁸ Ɛzʋtʋyaa pɩzɩɣ nɛ pɛkpɛlɩkɩ lɔŋ sakɩyɛ Gideyɔɔ kɩɖaʋ taa. Pɩpɔzʋʋ se patɩlɩ po-ɖoŋ kamaɣ nɛ poluzi pa-tɩ alɩwaatʋ ndʋ petisiɣ se pamʋʋ tʋma wena paɖʋʋ-wɛ yɔ, nɛ alɩwaatʋ ndʋ ɛyaa kʋʋ pɔ-tɔm yaa pasaŋ-wɛ yɔ. Pɩwɛɛ se petisi faaa nɛ paña nɛ pɛwɛɛ abalɩtʋ, kɔzɩ kɔzɩ alɩwaatʋ ndʋ ɛjaɖɛ kɩdɛkɛdɩyɛ ɖɩnɛ ɖɩ-tɛm wɛɛ nɛ pɩñɔtʋʋ yɔ. Nɛ pɩpɔzʋʋ se pataa Ɛsɔ liu se paa kaɖɛ nɖɩ pakatɩɣ yɔ, ɛpɩzɩɣ nɛ ɛha-wɛ ɖoŋ. Ninɖiɣyaa mba, palakɩ tʋmɩyɛ siŋŋ; pɩtʋʋ fɛyɩ se ɖa-taa wɛnɩ-wɛ nɛ leleŋ, nɛ ‘ɖiwoki pɩ-yɔɔ nɛ ɖɩsɔɔlʋʋ-wɛ.’—Filp. 2:29.