1. Pɩsa nɛ ɖihiɣ ñʋʋ yabʋ Yehowa kɩyakʋ wiye lɛ, ɛbɛ pɩwɛɛ se ɖɩla?

 ALƖWAATƲ ndʋ Bibl yɔɔdʋʋ «Yehowa kɩyakʋ tɔm» yɔ, pɩwɩlɩɣ alɩwaatʋ ndʋ Yehowa ɖɩzɩɣ e-koyindinaa nɛ ɛya ɛ-samaɣ ñʋʋ yɔ. Caanaʋ taa, Yehowa hɔm ajɛɛ naayɛ nɩŋgbaaŋ. (Iza. 13:1, 6; Ezek. 13:5; Sof. 1:8) Ða-alɩwaatʋ taa, «Yehowa kɩyakʋ» kaɣ paɣzʋʋ alɩwaatʋ ndʋ politiki ñʋndɩnaa kʋyʋʋ se paɖɩzɩ Babilɔɔnɩ Sɔsɔʋ yɔ nɛ kɩtɛ Armaagedɔɔ you taa. Pɩsa nɛ ɖihiɣ ñʋʋ yabʋ «kɩyakʋ» ŋgʋ ki-wiye lɛ, pɩpɔzʋʋ se ɖɩñɔɔzɩ ɖa-tɩ lɛɛlɛɛyɔ. Yesu yɔɔdaa se pɩwɛɛ se ɖɩñɔɔzɩ ɖa-tɩ nɛ ɖɩɖaŋ «kʋñɔŋ sɔsɔʋ» nɛ pɩwɩlɩɣ se pɩkɛ mbʋ pɩwɛɛ se ɖɩwɛɛ labʋ yɔɔ yɔ.—Mat. 24:21; Luka 12:40.

2. Ɛbɛ yɔɔ Tesalooniiki mba takayaɣ kajalaɣ ñɩŋga taa tɔm pɩzɩɣ nɛ tɩwazɩ-ɖʋ?

² Takayaɣ kajalaɣ ñɩŋga ŋga Ɛsɔ fezuu ɖiyi apostoloo Pɔɔlɩ nɛ ɛma Tesalooniiki mba yɔ ka-taa, ɛlabɩnɩ tʋmɩyɛ kɩɖaŋ sakɩyɛ se ɛsɩnɩ Krɩstʋ mba nɛ pɔñɔɔzɩ pa-tɩ nɛ paɖaŋ Yehowa kɩyakʋ. Pɔɔlɩ kaaɖiɣzinaa se pɩtɩkɛ alɩwaatʋ ndʋ tɩ-taa Yehowa kɩyakʋ kaɣ kɔm. (2 Tes. 2:1-3) Paa mbʋ yɔ, ɛtasɩ lɔŋ e-koobiya Krɩstʋ mba se pɔñɔɔzɩ pa-tɩ nɛ paɖaŋ kɩyakʋ ŋgʋ ɛzɩ cee kɩtalɩɣ yɔ; ɖa ɖɔɖɔ ɖɩpɩzɩɣ nɛ ɖɩɖɔ lɔŋ tasʋʋ mbʋ pɩ-yɔɔ. Iyele nɛ ɖɩna ɛzɩma ɛlɩzɩ tɔm ndʋ tɩkɔŋ yɔ tɩ-taa yɔ: (1) ɛzɩma Yehowa kɩyakʋ kaɣ kɔm yɔ, (2) mba pakaɣ hiɣu ñʋʋ yabʋ kɩyakʋ ŋgʋ ki-wiye yɔ, nɛ (3) ɛzɩma ɖɩpɩzɩɣ nɛ ɖɩñɔɔzɩ ɖa-tɩ nɛ ɖihiɣ ñʋʋ yabʋ yɔ.

3. Ɛbɛ yɔɔ pɔtɔŋ se Yehowa kɩyakʋ kaɣ kɔm ɛzɩ mɩlʋ kɔŋʋʋ ɖoo taa yɔ? (Cɔnɩ ɖɔɖɔ kɩlɛmʋʋ.)

³ «Ɛzɩ mɩlʋ kɔŋʋʋ ɖoo taa yɔ.» (1 Tes. 5:2) Kɩɖaŋ 3 weyi Pɔɔlɩ  labɩnɩ tʋmɩyɛ se ɛwɩlɩ ɛzɩma Yehowa kɩyakʋ kaɣ kɔm yɔ, ɩ-taa kajalaɣ ñɩŋgʋ lɛ. Ðoŋ ɖoŋ lɛ, mɩlaa kaamɩlɩɣ lɛ palakɩ lɛɛ lɛɛ, nɛ pamɩlɩɣ alɩwaatʋ ndʋ tɩ-yɔɔ ɛyaa tɩɖʋna yɔ. Mbʋ ɖɔɖɔ Yehowa kɩyakʋ kaɣ talʋʋ tuda nɛ kitudi ɛyaa hɔɔlʋʋ sɔsɔʋ. Ɛzɩma lakasɩ nzɩ sɩkaɣ tɩŋʋʋ ɖama wayɩ lɛɛ lɛɛ yɔ, halɩ pɩtɩla sɩkaɣ tuduu ɖa toovenim Krɩstʋ mba ɖɔɖɔ. Ɛlɛ paakaɣ-ɖʋ ɖɩzʋʋ ɛzɩ pɔkɔŋʋʋ ɖɩzʋʋ ɛyaa kɩdɛkɛdaa yɔ.

4. Ɛbɛ yɔɔ pɔtɔŋ se Yehowa kɩyakʋ wɛ ɛzɩ lʋlʋʋ wɩzasɩ yɔ?

⁴ «Ɛzɩ lʋlʋʋ wɩzasɩ tuduu halʋ hoɣa tʋ yɔ.» (1 Tes. 5:3) Halʋ hoɣa tʋ ɛɛpɩzɩɣ nɛ ɛtɩlɩ alɩwaatʋ ndʋ tɩ-yɔɔ ɖeyi ɖeyi ɛ-lʋlʋʋ wɩzasɩ paɣzɩɣ yɔ. Ɛlɛ ɛɛpɩtɩɣ paa ññɩɩ se alɩwaatʋ ndʋ tɩkaɣ talʋʋ. Nɛ tɩtalɩɣ lɛ, pɩtʋʋ fɛyɩ se wɩzasɩ nzɩ, sɩkaɣ paɣzʋʋ tuda, pɩkɛɣ siziŋ nɩʋ alɩwaatʋ; nɛ ɛɛpɩzɩɣ nɛ ɛɖɩɣ-sɩ nʋmɔʋ. Mbʋ ɖɔɖɔ, ɖɩɩsɩŋ kɩyakʋ nɛ ñɩɣyʋʋ ŋgʋ kɩ-yɔɔ Yehowa kɩyakʋ kaɣ paɣzʋʋ yɔ. Paa mbʋ yɔ, ɖa-taa tɛma se kɩyakʋ ŋgʋ Yehowa kaɣ hɔm ɛyaa kɩdɛkɛdaa nɩŋgbaaŋ yɔ, kɩkaɣ kɔm nɛ kɩkaɣ talʋʋ tuda nɛ paapɩzɩɣ nɛ palɩɩ kɩ-taa.

5. Ɛbɛ yɔɔ pɔtɔŋ se kʋñɔŋ sɔsɔʋ wɛ ɛzɩ tɛbɩyɛ yɔ?

⁵ «Ɛzɩ tɛbɩyɛ yɔ.» Kɩɖaʋ 3 ñɩŋgʋ taa lɛ, Pɔɔlɩ tasɩ labɩnʋʋ tʋmɩyɛ mɩlaa mba pamɩlɩɣ ɖoo taa yɔ pa-kɩɖaʋ. Ɛlɛ kɩ-taa lɛ, pɩwɛ ɛzɩ Pɔɔlɩ kpaɣ Yehowa kɩyakʋ nɛ ɛmaɣzɩɣnɩ tɛbɩyɛ yɔ. (1 Tes. 5:4) Mɩlaa mba pamɩlɩɣ ɖoo taa yɔ, pɛ-ɛsɩyɛ pɩzɩɣ nɛ pɩsɛɛnɩ mɩlʋʋ nɛ paanaɣ se alɩwaatʋ wɛɛ nɛ tɩɖɛɣ. Tanaŋ tɛɛ ñalɩmɩyɛ pɩzɩɣ ɖitudi-wɛ nɛ piyele nɛ pana-wɛ. Mbʋ ɖɔɖɔ, kʋñɔŋ sɔsɔʋ kaɣ kuluu mba pɛwɛ cɩkpɛndʋʋ tɛɛ mbʋ nɛ powoki pɩ-yɔɔ nɛ palakɩ mbʋ pɩɩkɛdɩɣnɩ Ɛsɔ yɔ pɔ-yɔɔ. Ða lɛ ɖɩwɛ ndɩ, ɖɩpɩzɩɣ nɛ ɖɩñɔɔzɩ ɖa-tɩ nɛ ɖɩɖaŋ ye ɖikiziɣ labʋ lakasɩ nzɩ sɩɩkɛdɩɣnɩ Yehowa yɔ nɛ ɖɩñɩnɩɣ «paa kɩbandʋ labʋ mbʋ nɛ paa siɣsiɣ wɛtʋ ndʋ nɛ paa toovenim mbʋ» yɔ. (Efɛz. 5:8-12) Pʋwayɩ lɛ, Pɔɔlɩ labɩnɩ tʋmɩyɛ kɩɖaŋ naalɛ weyi ɩnɩɣzɩnɩ  ɖama yɔ nɛ ɛyɔɔdɩ mba paakaɣ hiɣu ñʋʋ yabʋ yɔ pɔ-tɔm.

6. Ɛbɛ yɔɔ pɔtɔŋ se ɛyaa hɔɔlʋʋ sɔsɔʋ wɛɛ nɛ poɖou? (1 Tesalooniiki mba 5:6, 7)

⁶ «Mba poɖou yɔ.» (Kalɩ 1 Tesalooniiki mba 5:6, 7.) Pɔɔlɩ kpaɣ mba paakaɣ hiɣu ñʋʋ yabʋ Yehowa kɩyakʋ wiye yɔ nɛ ɛmaɣzɩnɩ mba poɖou yɔ. Pa-paa fɛyɩnɩ mbʋ pʋcɔ-wɛ nɛ pɩta yɔ nɛ ɛzɩma alɩwaatʋ wɛɛ nɛ tɩɖɛɣ yɔ; pʋyɔɔ lɛ, paapɩzɩɣ nɛ panɩɩ lakasɩ sɔsɔsɩ nzɩ sɩlakɩ yɔ sɩ-tɔbʋʋ nɛ pala mbʋ pɩpɔzʋʋ se pala yɔ. Sɔnɔ ɛyaa hɔɔlʋʋ sɔsɔʋ wɛɛ nɛ poɖou fezuu taa. (Roma 11:8) Pa-paa fɛyɩnɩ mbʋ pɩwɩlɩɣ kaɣlaa se ɖɩwɛ «kɛdɛzaɣ kɩyakɩŋ taa» nɛ se pɩkazɩ pazɩ lɛ kʋñɔŋ sɔsɔʋ paɣzɩɣ yɔ. Lɛɣzɩtʋ sɔsɔtʋ natʋyʋ lakɩ ɛjaɖɛ yɔɔ lɛ, ɛyaa nabɛyɛ tisiɣ nɛ pewelisiɣ Kewiyaɣ tɔm ndʋ ɖisusuu yɔ. Ɛlɛ pʋwayɩ lɛ, ɛyaa sakɩyɛ ɖaɣnɩɣ paɣzʋʋ ɖou nɛ paacakɩnɩ pɛ-ɛsa. Halɩ ɛyaa mba petisiɣ se Yehowa tɔm hʋʋ kɩyakʋ kaɣ kɔm yɔ pa-taa nabɛyɛ maɣzɩɣ se kɩɩkaɣ kɔm lɛɛlɛɛyɔ. (2 Pɩy. 3:3, 4) Ɛlɛ, ɖa lɛ, ɖiɖiɣzinaa se paa evemiye nɖɩ lɛ pɩcɛyaa se ɖiwolo pɩ-yɔɔ nɛ ɖɩcaɣnɩ ɖɛ-ɛsa nɛ pɩkɩlɩ.

7. Ɛyaa mba Ɛsɔ kaɣ ɖɩzʋʋ yɔ, ɛzɩma tɩyɛ pɛwɛ ɛzɩ ɛyaa mba sʋlʋm kʋʋ-wɛ yɔ?

⁷ «Mba pɔñɔʋ sʋlʋm nɛ pɩkʋʋ-wɛ yɔ.» Apostoloo Pɔɔlɩ kpaɣ mba Ɛsɔ kaɣ-wɛ ɖɩzʋʋ yɔ nɛ ɛmaɣzɩnɩ mba pɔñɔʋ sʋlʋm nɛ pɩkʋʋ-wɛ yɔ. Ɛyaa mba sʋlʋm kʋʋ-wɛ yɔ pa-paa fɛyɩnɩ mbʋ pɩlakɩ pɔ-cɔlɔ yɔ, nɛ pakpakɩɣ lɩmaɣza kɩdɛkɛda. Mbʋ ɖɔɖɔ, ɛyaa kɩdɛkɛdaa paa fɛyɩnɩ Yehowa lɔŋ tasʋʋ. Palɩzɩɣ se pacakɩ wezuu ŋgʋ kiwokini-wɛ ɖɩzʋʋ taa yɔ. Ɛlɛ Krɩstʋ mba lɛ, patasɩ paba lɔŋ se pɔɖɔkɩ pa-maɣzɩm camɩyɛ. (1 Tes. 5:6) Bibl taa tazɩyʋ nɔɔyʋ yɔɔdaa se ɛyʋ weyi ɛɖɔkʋʋ ɛ-maɣzɩm yɔ «ɛcakɩ ɖiɣ ɖiɣ nɛ sɔɔndʋ ɛɛkpaɣ-ɩ. Ɛpɩzɩɣ nɛ ɛmaɣzɩɣ camɩyɛ se pɩsa nɛ ɛkpaɣ lɩmaɣza wena atʋʋzaa yɔ.» Ɛbɛ yɔɔ pɩwɛɛ se ɖiwolo pɩ-yɔɔ nɛ ɖɩcaɣ ɖiɣ ɖiɣ nɛ sɔɔndʋ ɛtaakpa-ɖʋ? Pɩsɩɣnɩ-ɖʋ se ɖɩtaasʋzɩ ɖa-tɩ politiki nɔɔhɔnɖɛ taa. Yehowa kɩyakʋ wɛɣ nɛ kɩñɔtʋʋ lɛ, pakaɣ ñɩɣʋ ɖɔ-yɔɔ se ɖɩɖʋ ɖɔ-nɔɔ ɛjaɖɛ yɔɔ politiki nɔɔhɔnɖɛ taa nɛ pɩkɩlɩ. Ɛlɛ pɩtɩcɛyɩ se ɖɩnɩɣzɩɣ ɛzɩma ɖɩkaɣ labʋ yɔ pɩ-yɔɔ. Ɛsɔ fezuu kiɖeɖeu pɩzɩɣ kɩsɩnɩ-ɖʋ nɛ ɖɩcaɣ ɖiɣ ɖiɣ nɛ ɖɩmaɣzɩ camɩyɛ nɛ ɖɩkpaɣ lɩmaɣza kɩbana.—Luka 12:11, 12.

8. Ɛzɩ 1 Tesalooniiki mba 5:8 yɔɔdʋʋ yɔ, wɛtʋ kɩbandʋ ndʋ sɩɣnɩ-ɖʋ se ɖiwolo pɩ-yɔɔ nɛ ɖɩcaɣnɩ ɖɛ-ɛsa nɛ ɖɩɖɔkɩ ɖa-maɣzɩm tam? (Cɔnɩ ɖɔɖɔ kɩlɛmʋʋ.)

⁸ ‘Ðisuu ñɩɣtʋ toko ŋgʋ kihuuzuu laŋɩyɛ yɔɔ yɔ nɛ ɖɩpa ñɩɣtʋ hulaɣ.’ Pɔɔlɩ kpaɣ-ɖʋ nɛ ɛmaɣzɩnɩ sɔɔjanaa mba pacaɣnɩ pɛ-ɛsa nɛ posu you wondu se pala you yɔ. (Kalɩ 1 Tesalooniiki mba 5:8.) Ɛyaa maɣzɩɣ se pɩpɔzʋʋ se sɔɔja ɛñɔɔzɩ ɛ-tɩ nɛ ɛɖaŋ nɛ alɩwaatʋ ndʋ you nakʋyʋ tuluu lɛ, ɛpɩzɩ nɛ ɛlabɩ-kʋ. Mbʋ ɖɔɖɔ pɩwɛ ɖɔ-hɔɔlʋʋ taa. Ye ɖisu tisuu nɛ sɔɔlɩm ñɩɣtʋ toko ŋgʋ kihuuzuu laŋɩyɛ yɔɔ yɔ nɛ ɖɩpa ñʋʋ yabʋ lidaʋ ñɩɣtʋ hulaɣ tam yɔ, ɖɩwɩlɩɣ se ɖɩñɔɔzɩ ɖa-tɩ nɛ ɖɩɖaŋ Yehowa kɩyakʋ. Ye ɖɩwɛnɩ wɛtʋ kɩbandʋ ndʋ yɔ pɩpɩzɩɣ nɛ pɩsɩnɩ-ɖʋ siŋŋ.

9. Ɛzɩma tɩyɛ ɖe-tisuu kandɩyɩɣ ɖɔ-yɔɔ?

⁹ Ñɩɣtʋ toko ŋgʋ kihuuzuu laŋɩyɛ yɔɔ yɔ, kɩkandɩyɩɣ sɔɔja laŋɩyɛ yɔɔ. Mbʋ ɖɔɖɔ tisuu nɛ sɔɔlɩm kandɩyɩɣ ɖa-laŋɩyɛ yɔɔ, pʋ-tɔbʋʋ se ɛyʋ weyi ɖɩkɛnɩ ɖooo ɖa-taa yɔ ɛ-yɔɔ. Wɛtʋ kɩbandʋ ndʋ, tɩkaɣ-ɖʋ sɩnʋʋ nɛ ɖiwolo pɩ-yɔɔ nɛ ɖɩsɛɣ Ɛsɔ nɛ ɖɩtɩŋɩɣ Yesu wayɩ. Tisuu yeki nɛ ɖa-taa tɛŋ se ye ɖɩñɩnɩɣ Yehowa nɛ ɖa-laŋɩyɛ pilim yɔ ɛkaɣ-ɖʋ hɛyʋʋ. (Ebr. 11:6) Tisuu kaɣ-ɖʋ seɣtuu se ɖiwolo pɩ-yɔɔ nɛ ɖɩɖɔkɩ ɖe-siɣsiɣ wɛtʋ ɖa-Ñʋʋdʋ Yesu ɛsɩndaa, halɩ paa piyeki se ɖɩla kʋñɔŋ yɔ. Ða-alɩwaatʋ taa ɛyaa nabɛyɛ  katɩɣ nazɩm yaa palakɩ liidiye kʋñɔŋ ɛlɛ powoki pɩ-yɔɔ nɛ pɔɖɔkʋʋ pa-cɩŋgɩlɩm wɛtʋ. Ye ɖɩkpakɩɣ alɩwaatʋ nɛ ɖɩmaɣzɩɣ pa-kɩɖaŋ yɔɔ yɔ, pɩpɩzɩɣ pɩsɩnɩ-ɖʋ nɛ ɖɩcɛyɩsɩ ɖe-tisuu nɛ pɩsa nɛ ɖɩlʋbɩnɩ kala wena ɖɩkatɩɣ ɖe-wezuu caɣʋ taa yɔ. Nɛ ye ɖɩmaɣzɩnɩ ɛyaa mba pacakɩ wezuu kɛlɛʋ se pɩsa nɛ pasɩɩ Kewiyaɣ kajalaɣ ɖeɖe yɔ, pɩsɩɣnɩ-ɖʋ nɛ ɖɩtaatɔlɩ tomnaɣ yɔɔ wondu ñɩnʋʋ kadadayaɣ kpaca taa. b

10. Ye ɖɩsɔɔlɩ Ɛsɔ nɛ ɛyaa lalaa yɔ, ɛzɩma pɩsɩɣnɩ-ɖʋ se ɖɩɖɔkɩ ɖa-laŋɩyɛ tɔm susuu taa?

¹⁰ Pɩsa nɛ ɖiwolo pɩ-yɔɔ nɛ ɖɩcaɣnɩ ɖɛ-ɛsa nɛ ɖɩɖɔkɩ ɖa-maɣzɩm lɛ, pɩcɛyaa ɖɔɖɔ se ɖɩwɛɛnɩ sɔɔlɩm. (Mat. 22:37-39) Ye ɖɩsɔɔlɩ Ɛsɔ yɔ, pɩsɩɣnɩ-ɖʋ nɛ ɖiwolo tɔm susuu yɔɔ paa piyeki se ɖɩkatɩ kala yɔ. (2 Tim. 1:7, 8) Ðɩsɔɔlɩ ɛyaa mba paasɛɣ Yehowa yɔ, pʋyɔɔ lɛ ɖiwoki pɩ-yɔɔ nɛ ɖisusuu tɔm ɖo-kookasɩ taa; halɩ ɖɩtɩŋɩɣnɩ takayɩsɩ maʋ nɛ kaŋgalaafu yɔɔ ɖɔɖɔ nɛ ɖɩlɩzɩɣ aseɣɖe. Ɛyaa mba ɖisusuu-wɛ tɔm yɔ, ɖɩtaɣ liu se wiɖiyi pakaɣ lɛɣzʋʋ nɛ papaɣzɩ labʋ mbʋ pɩtʋʋzaa yɔ.—Ezek. 18:27, 28.

11. Ye ɖɩsɔɔlɩ ɖo-koobiya Krɩstʋ mba yɔ, ɛzɩma pɩsɩɣnɩ-ɖʋ? (1 Tesalooniiki mba 5:11)

¹¹ Ðɩsɔɔlɩ ɖɔɖɔ ɖo-koobiya Krɩstʋ mba. Ðɩlɩzɩɣ sɔɔlɩm mbʋ nɛ ɖɩwɩlɩɣ alɩwaatʋ ndʋ ‘ɖiseɣtiɣ ɖama nɛ ɖɩkpazɩɣ ɖama ɖoŋ’ yɔ. (Kalɩ 1 Tesalooniiki mba 5:11.) Ɛzɩ sɔɔjanaa mba paɖʋʋ ɖama nesi you taa yɔ, ɖa ɖɔɖɔ ɖɩkpazɩɣ ɖama ɖoŋ. Toovenim taa lɛ, alɩwaatʋ ndʋ you saɣ miŋ yɔ, sɔɔja nɔɔyʋ pɩzɩɣ nɛ ɛɖʋ heŋ ɛ-taabalʋ sɔɔja lɛlʋ, ɛlɛ ɛɛɖʋʋ ɛ-taa faŋŋ pʋcɔ nɛ ɛla mbʋ. Mbʋ ɖɔɖɔ, ɖa-taa nɔɔyʋ ɛɛkaɣ ɖʋʋ ɛ-taa faŋŋ pʋcɔ nɛ ɛɖʋ e-koobu ɖɩwɩzɩyɛ yaa ɛhɛyɩ-ɩ kɩdɛkɛdɩm kɩdɛkɛdɩm lone taa. (1 Tes. 5:13, 15) Ye ɖɩñaŋ koobiya mba peɖiyiɣ ɛgbɛyɛ yɔ, ɖɩwɩlɩɣ ɖɔɖɔ se ɖɩwɛnɩ sɔɔlɩm. (1 Tes. 5:12) Alɩwaatʋ ndʋ Pɔɔlɩ ma takayaɣ kanɛ yɔ, Tesalooniiki ɛgbɛyɛ ñɔwa pɩtɩtalɩtɩ pɩnaɣ kʋɖʋmaɣ. Abalaa mba paalɩzaa se peɖiyi ɛgbɛyɛ nɖɩ yɔ, pɩtɩla yɔ pataawɛɛnɩ lɛɣtʋ nɛ pʋtɔma yɔ piyiɣdaɣ-wɛ. Paa mbʋ yɔ, pɩɩwɛɛ se pañam-wɛ. Kʋñɔŋ sɔsɔʋ wɛɣ nɛ kɩñɔtʋʋ lɛ, pɩtɩla yɔ ɖa-agbaa taa ɛzʋtʋyaa kaɣnɩ-ɖʋ wɩlʋʋ mbʋ ɖɩla yɔ nɛ pɩkɩlɩ ɛzɩma palakɩ lɛɛlɛɛyɔ yɔ. Pɩtɩla yɔ, ɖɩɩkaɣ pɩzʋʋ nɛ ɖɩmʋ lɔŋ tasʋʋ mbʋ  pɩlɩɣnɩ ɖa-tʋmɩyɛ ɖɩlaɖɛ sɔsɔɖɛ nɛ ɛgbɛyɛ piliŋa cɔlɔ yɔ, pʋyɔɔ lɛ pɩcɛyaa se ɖɩsɔɔlɩ nɛ ɖɩña ɛgbɛyɛ taa ɛzʋtʋyaa lɛɛlɛɛyɔ. Paa ɛbɛ ɛtɩɩlakɩ yɔ, ɖiwolo pɩ-yɔɔ nɛ ɖɩɖɔkɩ ɖa-maɣzɩm camɩyɛ, ɖɩtaaka ɖa-lɩmaɣza pɛ-ɛjandʋ yɔɔ, ɛlɛ pɩwɛɛ ɖa-lɩmaɣza taa se Yehowa wɛɛ nɛ ɛtɩŋɩɣnɩ Krɩstʋ yɔɔ nɛ eɖiyiɣ abalaa siɣsiɣ tɩnaa mba.

12. Ɛzɩma tɩyɛ ɖe-lidaʋ kandɩyɩɣ ɖa-maɣzɩm yɔɔ?

¹² Ɛzɩ ñɩɣtʋ hulaɣ kandɩyʋʋ sɔɔja ñʋʋ yɔɔ yɔ, mbʋ ɖɔɖɔ ɖa-ñʋʋ yabʋ lidaʋ kandɩyɩɣ ɖa-maɣzɩm yɔɔ. Ye ɖɩwɛnɩ lidaʋ siŋŋ yɔ, ɖiɖiɣziɣna se mbʋ ɛjaɖɛ ɖɩnɛ ɖɩhaɣ yɔ pɩɩwazɩɣ pʋyʋ. (Filp. 3:8) Ðe-tisuu sɩɣnɩ-ɖʋ se ɖiwolo pɩ-yɔɔ nɛ ɖɩcaɣ ɖiɣ ɖiɣ nɛ sɔɔndʋ ɛtaakpa-ɖʋ. Wallace nɛ Laurinda palakɩ pɛ-Ɛsɔ sɛtʋ tʋmɩyɛ Afrika taa, nɛ tɔm ndʋ tɩkɛ toovenim pɔ-hɔɔlʋʋ taa. Kpɩtaŋ 3 ɖeke taa lɛ, pa-taa paa weyi lʋlɩyʋ kʋɖʋm sɩba. COVID-19 kʋdɔŋ yɔɔ lɛ, pataapɩzɩɣ se pekpe pɛ-tɛ nɛ pɛhɛzɩ pɔ-hɔŋ taa mba laŋa. Wallace mawa se: «Sɩɖaa femtu lidaʋ sɩɣnɩ-m nɛ mamaɣzɩɣ pɔ-yɔɔ; pɩtɩkɛ wɛtʋ kɩdɛkɛdɩtʋ ndʋ tɩ-taa paawɛɛ yɔ tɩ-yɔɔ mamaɣzɩɣ, ɛlɛ wɛtʋ ndʋ tɩ-taa pakaɣ wɛʋ kajalaɣ kɩyakɩŋ weyi ɩ-taa pakaɣ-wɛ fezuu ɛjaɖɛ kɩfaɖɛ taa yɔ tɩ-yɔɔ mamaɣzɩɣ. Lidaʋ ŋgʋ, kɩhɛzɩɣ ma-laŋɩyɛ alɩwaatʋ ndʋ mɛwɛɣ laŋwɛɛkɩyɛ taa yaa pɛtɛɖɩɣ-m yɔ.»

13. Ɛbɛ ɖɩpɩzɩɣ ɖɩla nɛ ɖɩmʋ fezuu kiɖeɖeu?

¹³ «Ɩtaaɖɩzɩ fezuu miŋ.» (1 Tes. 5:19) Pɔɔlɩ kpaɣ fezuu kiɖeɖeu nɛ ɛmaɣzɩnɩ miŋ nɩɩyɩ nɛ ɛwɛ ɖa-taa. Alɩwaatʋ ndʋ Ɛsɔ haɣ-ɖʋ fezuu kiɖeɖeu yɔ ɖɩwɛɣ kpekpeka mbʋ pɩtʋʋzaa yɔ pɩ-labʋ taa nɛ ɖɩwɛɣnɩ ɖoŋ se ɖɩla Yehowa tʋma. (Rom. 12:11) Ɛbɛ ɖɩpɩzɩɣ ɖɩla nɛ ɖɩmʋ fezuu kiɖeɖeu? Ðɩpɩzɩɣ nɛ ɖɩtɩmɩ nɛ ɖɩpɔzɩ-kʋ, ɖɩkpɛlɩkɩ tɔm ndʋ Ɛsɔ fezuu ɖiyaa nɛ pama yɔ, nɛ ɖɩɖʋ taabalɩyɛ nɛ ɛgbɛyɛ nɖɩ Ɛsɔ fezuu ɖiyiɣ yɔ. Ye ɖɩlakɩ mbʋ yɔ, pɩkaɣ-ɖʋ sɩnʋʋ nɛ ɖɩwɛɛnɩ «piye nɖɩ fezuu lʋlʋʋ yɔ.»—Gal. 5:22, 23.

14. Pɩsa nɛ ɖiwolo pɩ-yɔɔ nɛ ɖɩmʋʋ Ɛsɔ fezuu kiɖeɖeu lɛ, ɛbɛ pɩtɩpɔzɩ se ɖɩlakɩ? (Cɔnɩ ɖɔɖɔ kɩlɛmʋʋ.)

¹⁴ Ɛsɔ haɣ-ɖʋ e-fezuu kiɖeɖeu nɛ pɩtɛ lɛ, pɩwɛɛ se ɖɩkpa ɖa-tɩ nɛ ‘ɖɩtaaɖɩzɩ fezuu miŋ.’ Ɛyaa mba pɛwɛ kele kele pa-maɣzɩm  nɛ pa-lakasɩ taa yɔ, pe-ɖeke Ɛsɔ haɣ e-fezuu kiɖeɖeu. Ye ɖɩmaɣzɩɣ mbʋ pɩfɛyɩ kele kele yɔ pɩ-yɔɔ nɛ ɖɩlakɩ-pʋ yɔ, ɛɛtasɩɣ-ɖʋ kʋ haʋ. (1 Tes. 4:7, 8) Pɩsa nɛ ɖiwolo pɩ-yɔɔ nɛ ɖɩmʋʋ fezuu kiɖeɖeu lɛ, pɩpɔzʋʋ ɖɔɖɔ se ‘ɖitaani natʋ tɔm.’ (1 Tes. 5:20) Mayaɣ ŋga ka-taa, «natʋ tɔm» wɩlɩɣ tɔm ndʋ Yehowa tɩŋnɩ e-fezuu kiɖeɖeu yɔɔ nɛ eyele nɛ pama yɔ; tɩ-taa natʋyʋ lɛ ndʋ titukuuni Yehowa kɩyakʋ sɔsɔʋ nɛ ɛzɩma pɩcɛyaa se ɛyʋ ɛla nabʋyʋ kpɛdɛyɛ ɖa-alɩwaatʋ tʋnɛ tɩ-taa yɔ. Pɩtɩpɔzɩ se ɖɩmaɣzɩ se Yehowa kɩyakʋ yaa Armaagedɔɔ ɛɛkaɣ kɔm ɖe-wezuu caɣʋ alɩwaatʋ taa. Ye ɖiwobi pɩ-yɔɔ nɛ ɖɩɖɔŋ ɖɔnɛ nɖɩ ɖɩtʋʋzaa yɔ nɛ ɖɛ-ɛsɩyɛ sɛɛnɩ lakasɩ nzɩ ‘sɩwɩlɩɣ se ɖɩñɔnɩ Ɛsɔ yɔ’ sɩ-labʋ yɔ, ɖɩwɩlɩɣ se ɖɩɖaŋaa se pɩkazɩ pazɩ lɛ Yehowa kɩyakʋ kaɣ kɔm.—2 Pɩy. 3:11, 12.

15. Pɩsa nɛ cɛtɩm tɔm nɛ tɔm ndʋ tɩlɩnɩ aleewaa cɔlɔ yɔ titaapeɣzi-ɖʋ lɛ, ɛbɛ pɩwɛɛ se ɖɩla? (1 Tesalooniiki mba 5:21)

¹⁵ Pɩkazɩ pazɩ lɛ, mba pakaɖɩɣnɩ Ɛsɔ yɔ pakaɣ yɔɔdʋʋ se: «Laŋhɛzɩyɛ nɛ pɛɛyɛ!» (1 Tes. 5:3) Tɔm ndʋ tɩlɩnɩ aleewaa cɔlɔ yɔ tɩkaɣ yɛlʋʋ ɛjaɖɛ kpeekpe yɔɔ nɛ tɩkaɣ peɣzuu ɛyaa hɔɔlʋʋ sɔsɔʋ. (Natʋ 16:13, 14) Piyele nɛ ɖa yɔ? Ye ‘ɖiwiliɣ pɩtɩŋa camɩyɛ’ yɔ, tɩɩkaɣ-ɖʋ peɣzuu. (Kalɩ 1 Tesalooniiki mba 5:21.) Grɛɛkɩ tɔm piye nɖɩ pɛɖɛzaa se ‘iwili camɩyɛ’ yɔ, ɖɩwɩlɩɣ ɛzɩma ɛyaa wiliɣ ñɩɣyʋʋ nakʋyʋ se pana se kɩkɛ kɩbaŋʋ yaa kɩtɩkɛ yɔ; pɩpɩzɩɣ nɛ pɩkɛ sika yaa liidiye ñɩɣyʋʋ. Mbʋ ɖɔɖɔ, pɩpɔzʋʋ se ɖiwili tɔm ndʋ ɖɩnɩɣ yaa ɖɩkalɩɣ yɔ camɩyɛ nɛ ɖɩna se tɩkɛ toovenim yaa tɩtɩkɛ. Pɩɩcɛyaa se Tesalooniiki mba ɩla mbʋ, nɛ halɩ pɩkaɣ cɛyʋʋ se ɖɩla mbʋ nɛ pɩkɩlɩ kʋñɔŋ sɔsɔʋ wɛɣ nɛ kɩñɔtʋʋ lɛ. Mbʋ ɛzɩ ɖitisi tɔm ndʋ payɩ lalaa yɔɔdʋʋ yɔ tɩ-yɔɔ yem lɛ, ɖɩlakɩnɩ tʋmɩyɛ ɖa-maɣzɩm nɛ ɖɩkpakɩɣ tɔm ndʋ ɖɩkalɩɣ yaa ɖɩnɩɣ yɔ nɛ ɖɩmaɣzɩɣnɩ tɔm ndʋ Bibl nɛ Yehowa ɛgbɛyɛ pɔyɔɔdʋʋ yɔ. Ye ɖɩlakɩ mbʋ yɔ, tɔm ndʋ tɩlɩɣnɩ aleewaa cɔlɔ yɔ tɩɩkaɣ-ɖʋ peɣzuu.—Adu. 14:15; 1 Tim. 4:1.

16. Lidaʋ ŋgʋ ɖɩwɛna, nɛ ɖɩtɛm ɖa-taa se ɖɩlakɩ we?

¹⁶ Ðɩnawa se Yehowa samaɣ kaɣ hiɣu ñʋʋ yabʋ kʋñɔŋ sɔsɔʋ taa. Ɛlɛ ye pakpaɣ-ɖʋ kʋɖʋm kʋɖʋm yɔ, ɖɩɩsɩŋ mbʋ cee wayɩ kaɣ-ɖʋ kɔnʋʋ yɔ. (Yak. 4:14) Paa mbʋ yɔ, paa kʋñɔŋ sɔsɔʋ ɛkɔma nɛ kɩmaɣnɩ-ɖʋ nɛ ɖihiɣ ñʋʋ yabʋ yaa ye pɩlaba se ɖɩsɩba pʋcɔ nɛ pɩtalɩ mbʋ yɔ, ye ɖiwobi pɩ-yɔɔ nɛ ɖɩɖɔkɩ ɖe-siɣsiɣ wɛtʋ yɔ, Ɛsɔ kaɣ-ɖʋ haʋ wezuu maatɛŋ. Patam numwaa nɛ Yesu pakaɣ wɛʋ ɛsɔdaa. Heŋ lɛɛŋ ñakaɣ wɛʋ paradisuu taa tɛtʋ yɔɔ. Tɛtɛ nɛ ɖa-tɩŋa ɖiwolo pɩ-yɔɔ nɛ ɖɩka ɖa-lɩmaɣza ɖe-lidaʋ kɩbaŋʋ yɔɔ nɛ ɖiwolo pɩ-yɔɔ ɖɔɖɔ nɛ ɖɩñɔɔzʋʋ ɖa-tɩ nɛ ɖɩɖaŋ Yehowa kɩyakʋ!