Bibl ticosi tɔm ndʋ tɩ-yɔɔ. Ɛlɛ kɩyɔɔdʋʋ tɔm sakɩyɛ ndʋ tɩsɩɣnɩ-ɖʋ se ɖɩna mbʋ pʋyɔɔ pɩtɩla pakpaɣ lɩmaɣzɩyɛ se paapɩsɩɣ Nazarɛɛtɩ alɩwaatʋ ndʋ tɩ-taa yɔ.

Ɛsɔ tiyiyu nɔɔyʋ kaaheyi Maarɩɩ se ɛkaɣ haɣʋ hoɣa nɛ ɛlʋlɩ pɩɣa. Alɩwaatʋ ndʋ tiyiyu yɔɔdɩ tɔm ndʋ yɔ, Maarɩɩ nɛ Yosɛɛfʋ paawɛ Galilee tɛtʋ ndʋ payaɣ se Nazarɛɛtɩ yɔ tɩ-taa. (Luka 1:26-31; 2:4) Pʋwayɩ palɩnɩ Ejipiti nɛ papɩsɩ lɛ, powolo pacaɣ Nazarɛɛtɩ. Peeɖe Yesu caɣaa nɛ ɛpaɣlɩ, piyeba nɛ payaɣ-ɩ se Nazarɛɛtɩ tʋ. (Mat. 2:19-23) Pʋyɔɔ ɖɩɩyɔɔdʋʋ Yesu, Yosɛɛfʋ, nɛ Maarɩɩ pɔ-tɔm lɛ, ɖɩtɔzʋʋ Nazarɛɛtɩ yɔɔ.

Maarɩɩ hɔʋ taa tʋ nɔɔyʋ kaawɛ Yuuda nɛ payaɣ-ɩ se Elizaabɛɛtɩ. Elizaabɛɛtɩ kaakɛ cɔjɔ Zakarii halʋ nɛ ɛnʋ lʋlɩnɩ Yohanɛɛsɩ lɩm Mɩyɩsɩyʋ. (Luka 1:5, 9, 13, 36) Maarɩɩ kaawobi Elizaabɛɛtɩ cɔlɔ Yuuda nɛ ɛcaɣ ɛ-cɔlɔ fenasɩ 3. Pʋwayɩ lɛ, Maarɩɩ pɩsɩ Nazarɛɛtɩ. (Luka 1:39, 40, 56) Mbʋ yebina nɛ Maarɩɩ tɩlɩ Yuuda egeetiye.

Pʋwayɩ lɛ, Yosɛɛfʋ ña paɣtʋ ndʋ paɖʋwa se ɛyaa iwolo nɛ «pama pa-hɩla» pɛ-tɛ yɔ. Peeɖe Yosɛɛfʋ kʋyɩ Nazarɛɛtɩ nɛ ewolo Bɛtɩlɛhɛm «Daviid tɛtʋ» taa; peeɖe Masɩ kaayɔɔdaa se pakaɣ lʋlʋʋ Mesiya. (Luka 2:3, 4; 1 Sam. 17:15; 20:6; Mik. 5:2) Maarɩɩ lʋlɩ Yesu peeɖe nɛ pɩtɛ lɛ, Yosɛɛfʋ tɩkpaɣ Maarɩɩ nɛ pɩɣa cɩɩɩ ŋga se pɔɖɔ nʋmɔʋ poliŋ ñɩŋgʋ nɛ papɩsɩ Nazarɛɛtɩ. Pacaɣ Bɛtɩlɛhɛm, nɛ Bɛtɩlɛhɛm kaaposini Yeruzalɛm ɛzɩ kilomɛtawaa 9 mbʋ yɔ. Piyekaɣ se pɩwɛɛ-wɛ kɛlɛʋ nɛ powoni Yesu templo taa nɛ palaa kɩlaʋ ŋgʋ paɣtʋ pɔzʋʋ yɔ.—Lev. 12:2, 6-8; Luka 2:22-24.

Ɛsɔ tiyiyu kaaheyi Maarɩɩ se ɛ-pɩyalʋ kaɣ mʋʋ «Daviid kewiyaɣ kpelaɣ» nɛ ɛkaɣ «tɔɔʋ kewiyitu.» Pɩtɩla yɔ, Yosɛɛfʋ nɛ Maarɩɩ paanɩ pɩ-taa se pɩcɛyaa se palʋlɩ Yesu Daviid tɛtʋ taa. (Luka 1:32, 33; 2:11, 17) Pʋtɔma yɔ, pamaɣzaɣ se pɩkɛnɩ lɔŋsɩnɖɛ se pacaɣ peeɖe nɛ paɖaŋ nɛ pana mbʋ Ɛsɔ kaɣ-wɛ heyuu se pala pʋwayɩ yɔ.

Ðɩɩsɩŋ alɩwaatʋ ɛzɩma palabɩ Bɛtɩlɛhɛm pʋcɔ nɛ ɛyaa mba patɩyɩɣnɩ tɩɩnzɩ yɔ powolo pɔ-cɔlɔ yɔ. Ɛlɛ alɩwaatʋ ndʋ tɩ-taa lɛ paawɛ ɖɩɣa nakɛyɛ taa nɛ Yesu taatasɩ kɛʋ pɩɣa cɩɩɩ, ɛlɛ ɛɛpaɣlɩ pazɩ. (Mat. 2:11) Mbʋ ɛzɩ paapɩsɩ Nazarɛɛtɩ lɛ, pɩwɛ ɛzɩ pacaɣ Bɛtɩlɛhɛm alɩwaatʋ sakɩyɛ, nɛ papɩsɩ pɛ-tɛ peeɖe.

Eroodi ɖʋ paɣtʋ se «pakʋ abalɩbiya kpeekpe, nzɩ sɩwɛnɩ pɩnzɩ 2 nɛ pɩkpaɣ nɛ pitii yɔ.» (Mat. 2:16) Ɛsɔ tiyiyu heyi Yosɛɛfʋ paɣtʋ ndʋ tɩ-tɔm lɛ, Yosɛɛfʋ kpaɣ Maarɩɩ nɛ Yesu nɛ pese powolo Ejipiti nɛ pacaɣ peeɖe nɛ pɩkɔɔ pɩtalɩ alɩwaatʋ ndʋ Eroodi sɩba yɔ. Pʋwayɩ lɛ, Yosɛɛfʋ kpaɣ ɛ-hɔʋ nɛ powolo Nazarɛɛtɩ. Ɛbɛ yɔɔ patɩpɩsɩ Bɛtɩlɛhɛm? Mbʋ pʋyɔɔ yɔ alɩwaatʋ ndʋ tɩ-taa lɛ, Eroodi pɩyalʋ Arkelaayuusi tɔkaɣ kewiyitu Yuudee taa nɛ ɛɛwɛ kañatʋ. Pɩtasɩ lɛ, tiyiyu heyi Yosɛɛfʋ kaɖɛ nɖɩ ɖɩpɩzɩɣ ɖɩtalɩ-wɛ ye papɩsɩ peeɖe yɔ. Nazarɛɛtɩ kaakɛ lone nɖɩ ɖɩ-taa Yosɛɛfʋ pɩzaɣ se ɛcɔnɩ Yesu yɔɔ nɛ nabʋyʋ ɛtaatalɩ-ɩ yɔ.—Mat. 2:19-22; 13:55; Luka 2:39, 52.

Pɩwɛ ɛzɩ Yosɛɛfʋ sɩba pʋcɔ nɛ Yesu sɩ nɛ pɩhaɣ ɛyaa lalaa waɖɛ se pakpa ɛsɔdaa yɔ. Ye mbʋ, pakaɣ Yosɛɛfʋ fezuu tɛtʋ yɔɔ. Ɛyaa sakɩyɛ kaɣ pɩzʋʋ nɛ pakatɩ-ɩ nɛ pɔpɔzɩ-ɩ tɔm nɛ patɩlɩ mbʋ pɩ-yɔɔ ɛ nɛ Maarɩɩ pacaɣ Bɛtɩlɛhɛm Yesu lʋlʋʋ wayɩ yɔ.