Pɩsa nɛ ɖɔ-tɔm kɛdɩnɩ Yehowa lɛ, pɩpɔzʋʋ se ɖɩwɛɛnɩ tisuu. Ɛlɛ Bibl yɔɔdʋʋ se: «Pɩtɩkɛ ɛyaa tɩŋa wɛnɩnɩ tisuu.» (2 Tes. 3:2) Mayaɣ kanɛ ka-taa, apostoloo Pɔɔlɩ yɔɔdaɣ «ɛyaa kɩdɛkɛdaa nɛ kañatʋ tɩnaa» mba panazaɣ-ɩ yɔ pɔ-tɔm na. Ɛlɛ tɔm ndʋ ɛyɔɔdɩ tisuu yɔɔ yɔ titukuuni ɖɔɖɔ ɛyaa lalaa. Ɛyaa nabɛyɛ tɩsɔɔlɩ se petisi se Ɛsɔ nɔɔyʋ wɛɛ nɛ ɛnʋ lɩzɩnɩ mbʋ payɩ pɩwɛ kedeŋa yɔɔ yɔ. (Roma 1:20) Ɛyaa lalaa pɩzɩɣ nɛ pɔyɔɔdɩ se petisiɣ Ɛsɔ yɔɔ. Ɛlɛ tisuu mbʋ pi-ɖeke piiyeki se ɖɔ-tɔm ɛkɛdɩnɩ Yehowa.

Pɩcɛyaa se ɖitisi se Yehowa wɛɛ, nɛ «ɛhɛyɩɣ» mba pɛwɛnɩ tisuu sɔsɔm ɛ-yɔɔ yɔ. (Ebr. 11:6) Tisuu kɛ piye nɖɩ fezuu kiɖeɖeu lʋlʋʋ yɔ ɖɩ-hɔɔlʋʋ nakʋyʋ. Pɩsa nɛ ɖɩmʋ fezuu kiɖeɖeu lɛ pɩpɔzʋʋ se ɖɩtɩmnɩ Yehowa nɛ ɖɩpɔzɩ-ɩ kʋ. (Luka 11:​9, 10, 13) Nʋmɔʋ sɔsɔʋ lɛɛkʋ ŋgʋ kɩ-yɔɔ ɖɩpɩzɩɣ ɖɩtɩŋna nɛ ɖɩmʋ fezuu kiɖeɖeu yɔ lɛ se ɖɩkalɩɣ Ɛsɔtɔm, mbʋ pʋyɔɔ yɔ fezuu kiɖeɖeu ɖiyina nɛ pama-tʋ. Pʋwayɩ lɛ ɖɩmaɣzɩ ndʋ ɖɩkalaa yɔ tɩ-yɔɔ nɛ ɖɩñaɣ pana nɛ ɖɩɖɔ tɩ-yɔɔ. Ðɩnɛ ɛlɛ, Yehowa fezuu kiɖeɖeu pɩzɩɣ nɛ kɩwɛɛnɩ ɖoŋ ɖe-wezuu caɣʋ yɔɔ nɛ kɩsɩnɩ-ɖʋ nɛ ɖɩwɛɛnɩ tisuu mbʋ pɩkɛdɩɣnɩ Ɛsɔ yɔ.