1-2. Mba pɩzɩɣ pasɩnɩ Bibl kpɛlɩkɩyʋ nɔɔyʋ nɛ ɛɖɛɛnɩ ɛsɩndaa nɛ pamɩyɩsɩ-ɩ lɩm?

AMY wɛ Fiiji ɛjaɖɛ taa. Ɛyɔɔdaa se: “Maasɔɔlɩ tɔm ndʋ mɛnkpɛlɩkaɣ Bibl taa yɔ. Maanawa se tɩkɛ toovenim. Ɛlɛ, manpaɣzɩ kpaɣʋ alɩwaatʋ nɛ ma nɛ koobiya ɖɩcakɩ lɛ, pɩsɩnɩ-m nɛ mɛlɛɣzɩ mɛ-wɛtʋ nɛ maha man-tɩ nɛ pamɩyɩsɩ-m lɩm.” Amy kɩɖaʋ ñɩkɩɣ niye toovenim tɔm kɩcɛyɩtʋ tʋnɛ tɩ-yɔɔ: Alɩwaatʋ ndʋ ɛgbɛyɛ taa ñɩma lalaa ɖʋʋ nesi Bibl kpɛlɩkɩyʋ nɔɔyʋ yɔ, pɩsɩɣnɩ-ɩ se ɛɖɛɛnɩ ɛsɩndaa nɛ pɩkɩlɩ nɛ pamɩyɩsɩ-ɩ lɩm.

² Paa tɔm susuyu weyi lɛ, ɛpɩzɩɣ ɛɖʋ nesi nɛ ɛgbɛyɛ huu. (Efɛz. 4:16) Leilani wɛ Vanuatu ɛjaɖɛ taa, nɛ ɛkɛ paa ɖooye nʋmɔʋ lɩzɩyʋ. Ɛyɔɔdaa se: “Ðoŋ ɖoŋ lɛ, pɔyɔɔdʋʋ se pɩtɩkɛ ɛyʋ kʋɖʋm tɩnɩ pɩɣa. Mamaɣzɩɣ se tɔm ndʋ tɩkɛ toovenim kpɛlɩkɩyaa labʋ hɔɔlʋʋ taa ɖɔɖɔ; ɖoŋ ɖoŋ lɛ, pɩsa nɛ nɔɔyʋ kɔɔ toovenim taa lɛ, ɛgbɛyɛ taa ñɩma tɩŋa ɖʋʋnɩ nesi.” Hɔʋ taa ñɩma, taabalaa, nɛ wɩlɩyaa pa-tɩŋa paɖʋʋnɩ nesi nɛ pasɩɣnɩ pɩɣa se kɛɖɛɛnɩ ɛsɩndaa nɛ kapɩsɩ ɛyʋ sɔsɔ. Palakɩ mbʋ, alɩwaatʋ ndʋ pakpazɩɣ pɩɣa ɖoŋ nɛ patasɩɣ-kɛ lɔŋ kɩbaŋ yɔ. Mbʋ ɖɔɖɔ tɔm susuyaa pɩzɩɣ nɛ patasɩ Bibl kpɛlɩkɩyaa lɔŋ, pakpazɩ-wɛ ɖoŋ nɛ paha-wɛ kɩɖaʋ kɩbaŋʋ se pɩsɩnɩ-wɛ nɛ pɛɖɛɛnɩ ɛsɩndaa nɛ pamɩyɩsɩ-wɛ lɩm.—Adu. 15:22.

3. Tɔm ndʋ Ana, Dorin nɛ Leilani pɔyɔɔdaa yɔ, lɔŋ weyi tɩkpɛlɩkɩɣ-ŋ?

³ Alɩwaatʋ ndʋ ɛgbɛyɛ taa ñɩma lalaa sɩɣnɩ Bibl kpɛlɩkɩyʋ nɔɔyʋ yɔ, ɛbɛ yɔɔ pɩpɔzʋʋ se weyi ɛkpɛlɩkɩɣnɩ-ɩ Bibl yɔ ɛ-taa ɛla leleŋ? Ana wɛ Mɔlɩdaavii ɛjaɖɛ taa nɛ ɛkɛ nʋmɔʋ lɩzɩyʋ kiya. Na tɔm ndʋ ɛyɔɔdaa yɔ. Ɛyɔɔdaa se: “Alɩwaatʋ ndʋ Bibl kpɛlɩkɩyʋ nɔɔyʋ paɣzɩɣ ɖɛnʋʋ ɛsɩndaa yɔ, pɩwɛ kaɖɛ siŋŋ se ɛyʋ kʋɖʋm ɛcɔnɩ ɛ-kɩcɛyɩm tɩŋa ɖeɖe.” Dorin kɛ nʋmɔʋ lɩzɩyʋ  kiya nɛ ɛwɛ ɛjaɖɛ kʋɖʋmɖɩyɛ nɖɩ ɖɩ-taa. Ɛyɔɔdaa se: “Ðoŋ ɖoŋ lɛ, tɔm susuyaa lalaa yɔɔdʋʋ tɔm ndʋ titukuuni kpɛlɩkɩyʋ laŋɩyɛ yɔ, nɛ mantaamaɣzɩ tɔm ndʋ tɩ-yɔɔ kpa.” Leilani weyi ɛ-tɔm ɖɩyɔɔdaa nɛ pɩɖɛɛ yɔ, ɛyɔɔdɩ lɩmaɣzɩyɛ lɛɛɖɛ nɖɩ ɖɩ-yɔɔ pɩwɛɛ se ɖa-taa ɛla leleŋ alɩwaatʋ ndʋ ɛyaa lalaa sɩɣnɩ ɖe-Bibl kpɛlɩkɩyʋ yɔ ɖɩ-tɔm. Ɛyɔɔdaa se: “Alɩwaatʋ ndʋ Bibl kpɛlɩkɩyʋ naɣ se koobiya lalaa sɔɔlɩ-ɩ nɛ pamaɣzɩɣ ɛ-yɔɔ yɔ, pɩsɩɣnɩ-ɩ se ɛtɩlɩ se ɖɛkɛnɩ Yehowa samaɣ.”—Yoh. 13:35.

4. Ɛbɛ ɖɩkaɣ naʋ tɔm ñʋʋ kʋnɛ kɩ-taa?

⁴ Ɛlɛ, pɩtɩla ŋpɔzʋʋ ña-tɩ se: ‘Ɛbɛ manpɩzɩɣ mala nɛ mansɩnɩ Bibl kpɛlɩkɩyʋ nɔɔyʋ nɛ ɛɖɛɛnɩ ɛsɩndaa, ye pɩtɩkɛ mɛkpɛlɩkɩɣnɩ-ɩ Bibl yɔ?’ Iyele nɛ ɖɩna mbʋ ɖɩpɩzɩɣ ɖɩla alɩwaatʋ ndʋ nɔɔyʋ yaɣ-ɖʋ se ɖɩsɩɩ-ɩ nɛ ɛkpɛlɩkɩnɩ nɔɔyʋ Bibl yɔ, nɛ mbʋ ɖɩpɩzɩɣ ɖɩla alɩwaatʋ ndʋ kpɛlɩkɩyʋ paɣzɩɣ kediɣzisi kɔm yɔ. Ðɩkaɣ naʋ ɖɔɖɔ ɛzɩma ɛgbɛyɛ taa ɛzʋtʋyaa pɩzɩɣ pasɩnɩ Bibl kpɛlɩkɩyaa nɛ pɛɖɛɛnɩ ɛsɩndaa nɛ pamɩyɩsɩ-wɛ lɩm yɔ.

5. Ye koobu nɔɔyʋ ɛya-ŋ se ŋsɩɩ-ɩ nɛ ɛkpɛlɩkɩnɩ nɔɔyʋ Bibl yɔ, ɛbɛ pɩpɔzʋʋ se ŋla?

⁵ Alɩwaatʋ ndʋ ɛyaa naalɛ woki se pɛkpɛlɩkɩnɩ ɛyʋ nɔɔyʋ Bibl yɔ, weyi ɛkpɛlɩkɩɣnɩ ɛyʋ ɛnʋ yɔ, ɛ-tʋmɩyɛ pɩkɛnaa se ɛsɩnɩ kpɛlɩkɩyʋ nɛ ɛnɩɩ Ɛsɔtɔm taa. Ye tɔm susuyu nɔɔyʋ ɛya-ŋ se ŋsɩɩ-ɩ nɛ ɛkpɛlɩkɩnɩ nɔɔyʋ Bibl yɔ, pɩwɛɛ se ŋtɩlɩ se ŋkɛ ɛ-sɩnɩyʋ. Ña-tʋmɩyɛ lɛ se ŋɖʋ-ɩ nesi. (Ekl. 4:9, 10) Ɛbɛ ɖeyi ɖeyi ŋpɩzɩɣ ŋla nɛ ŋɖʋ nesi nɛ kpɛlɩkʋʋ wazɩ kpɛlɩkɩyʋ nɛ pɩkɩlɩ?

6. Alɩwaatʋ ndʋ nɔɔyʋ yaɣ-ŋ se ŋsɩɩ-ɩ nɛ ɛkpɛlɩkɩnɩ nɔɔyʋ Bibl yɔ, ɛzɩma ŋpɩzɩɣ nɛ ŋlabɩnɩ tʋmɩyɛ paɣtʋ kiɖe nɖɩ ɖɩwɛ Aduwa 20:18 taa yɔ?

⁶ Ñɔɔzɩ hɔɔlʋʋ ŋgʋ ɩkaɣ kpɛlɩkʋʋ yɔ. Kajalaɣ lɛ, pɔzɩ wɩlɩyʋ se eheyi-ŋ Bibl kpɛlɩkɩyʋ yɔɔ tɔm pazɩ. (Kalɩ Aduwa 20:18.) Ŋpɩzɩɣ nɛ ŋpɔzɩ-ɩ se: “Tɔm ndʋ ŋsɩm Bibl kpɛlɩkɩyʋ ɛnʋ ɛ-yɔɔ? Tɔm ñʋʋ ŋgʋ ña nɛ ɩ ɩkaɣ kpɛlɩkʋʋ? Tɔm ndʋ ŋsɔɔlaa se kpɛlɩkɩyʋ ɛtɩlɩ hɔɔlʋʋ ŋgʋ ɩkaɣ kpɛlɩkʋʋ yɔ kɩ-taa? Ŋmaɣzɩɣ se pɩpɔzʋʋ se mɔyɔɔdɩ tɔm natʋyʋ yaa mantaayɔɔdɩ-tʋ kpɛlɩkʋʋ alɩwaatʋ taa? Yaa ŋmaɣzɩɣ se pɩpɔzʋʋ se mala nabʋyʋ yaa mantaalabɩ-pʋ kpɛlɩkʋʋ alɩwaatʋ taa? Ɛbɛ manpɩzɩɣ mala nɛ menseɣti kpɛlɩkɩyʋ nɛ ɛɖɛɛnɩ ɛsɩndaa?” Toovenim taa lɛ, wɩlɩyʋ ɛɛkaɣ-ŋ heyuu kpɛlɩkɩyʋ yɔɔ mɛsaɣ tɛɛ tɔm natʋyʋ, ɛlɛ tɔm ndʋ ɛkaɣ-ŋ heyuu yɔ tɩpɩzɩɣ nɛ tɩsɩnɩ-ŋ. Joy kɛ Ɛsɔtɔm tiyiyu nɛ ɖoŋ ɖoŋ lɛ, ɛ nɛ mba pasɩɣ-ɩ e-Bibl kpɛlɩkɩyaa cɔlɔ yɔ palakɩ kɛdɛsɩ nzɩ. Ɛyɔɔdaa se: “Kɛdaɣ ŋga ma nɛ weyi ɛsɩɣ-m men-Bibl kpɛlɩkɩyʋ cɔlɔ yɔ ɖɩlakɩ yɔ, kasɩɣnɩ-ɩ se ɛmaɣzɩ Bibl kpɛlɩkɩyʋ yɔɔ nɛ ɛtɩlɩ ɛzɩma ɛɖʋ nesi kpɛlɩkʋʋ alɩwaatʋ taa yɔ.”

7. Ye nɔɔyʋ ɛpɔzɩ-ŋ se ŋsɩɩ-ɩ nɛ ɛkpɛlɩkɩnɩ nɔɔyʋ Bibl, ɛbɛ yɔɔ pɩcɛyaa se ŋñɔɔzɩ hɔɔlʋʋ ŋgʋ ɩkaɣ kpɛlɩkʋʋ yɔ?

⁷ Ye nɔɔyʋ ɛya-ŋ se ŋsɩɩ-ɩ nɛ ɛkpɛlɩkɩnɩ nɔɔyʋ Bibl yɔ, ye ŋpɩzɩɣ se ŋñɔɔzɩ hɔɔlʋʋ ŋgʋ kɩ-taa ɩkaɣ tazʋʋ yɔ, pɩwɛɣ ɖeu. (Ɛsd. 7:10)  Koobu Dorin weyi ɛ-tɔm ɖɩyɔɔdaa nɛ pɩɖɛɛ yɔ, ɛtɔm se: “Man-taa lakɩ leleŋ siŋŋ alɩwaatʋ ndʋ manaɣ se weyi ɛsɩ-m se ɖɩkpɛlɩkɩnɩ nɔɔyʋ Bibl yɔ, ɛñɔɔzɩ hɔɔlʋʋ ŋgʋ ɖɩkaɣ kpɛlɩkʋʋ yɔ. Piyeki nɛ ɛpɩzɩ ɛɖʋ nesi camɩyɛ.” Pɩtasɩ lɛ, pɩtʋʋ fɛyɩ se kpɛlɩkɩyʋ kaɣ ɖiɣzinuu se mɩ-naalɛ ɩñɔɔzɩ mɩ-tɩ camɩyɛ, nɛ ɩkaɣ-ɩ kɛnʋʋ kɩɖaʋ kɩbaŋʋ. Paa ŋŋpɩzɩɣ se ŋñɔɔzɩ hɔɔlʋʋ ŋgʋ ɩkaɣ kpɛlɩkʋʋ yɔ camɩyɛ yɔ, ŋpɩzɩɣ ŋkpaɣ alɩwaatʋ natʋyʋ nɛ ŋñɩnɩ kɩ-taa lɩmaɣza sɔsɔna.

8. Ɛbɛ ŋpɩzɩɣ ŋla nɛ pɩsa nɛ adɩma wena ŋlakɩ alɩwaatʋ ndʋ ɩkpɛlɩkɩɣnɩ nɔɔyʋ Bibl yɔ, awɛɛnɩ tɔbʋʋ nɩʋ?

⁸ Adɩma kɛ Bibl kpɛlɩkʋʋ hɔɔlʋʋ ŋgʋ kɩ-tɔm cɛyaa yɔ, pʋyɔɔ lɛ maɣzɩ nɛ ŋna se tɔm ndʋ ŋkaɣ yɔɔdʋʋ ye pɔpɔzɩ-ŋ se ŋtɩmɩ yɔ. Ye ŋlabɩ mbʋ yɔ, pɩtʋʋ fɛyɩ se ña-adɩma kaɣ wɛnʋʋ tɔbʋʋ nɩʋ nɛ pɩkpaɖɩ. (Keɣa 140:2) Hanae wɛ Japɔŋ ɛjaɖɛ taa. Eɖiɣni tɔzʋʋ adɩma wena koobu halɩñɩnʋ nɔɔyʋ laba alɩwaatʋ ndʋ ɛlɛ kaasɩ weyi ɛkpɛlɩkaɣnɩ-ɩ Bibl yɔ nɛ powolo ɛ-cɔlɔ yɔ a-yɔɔ. Ɛyɔɔdaa se: “Maaɖiɣzinaa se ɛ nɛ Yehowa pa-taabalɩyɛ cɛyɩsɩ siŋŋ, nɛ maasɔɔlaa se mamaɣzɩnɩ-ɩ. Maaɖiɣzinaa ɖɔɖɔ se ɛsɔɔlɩ-m alɩwaatʋ ndʋ ɛya ma-hɩɖɛ ɛ-adɩma taa yɔ.”

9. Ɛzɩ Yakubu 1:19 yɔɔdʋʋ yɔ, ɛbɛ ŋpɩzɩɣ ŋla nɛ ŋkɛ sɩnɩyʋ kɩbanʋ Bibl kpɛlɩkʋʋ alɩwaatʋ taa?

⁹ Ðʋ nesi wɩlɩyʋ kpɛlɩkʋʋ alɩwaatʋ taa. Omamuyovbi kɛ nʋmɔʋ lɩzɩyʋ kiya nɛ ɛwɛ Naajeeriya ɛjaɖɛ taa. Ɛyɔɔdaa se: “Sɩnɩyʋ kɩbanʋ welisiɣ camɩyɛ kpɛlɩkʋʋ alɩwaatʋ taa. Sɩnɩyʋ yɔɔdʋʋ tɔm ndʋ tɩwɛnɩ tɔbʋʋ nɩʋ yɔ, ɛlɛ ɛɛkɩlɩɣ yɔɔdʋʋ mbʋ pʋyɔɔ yɔ, ɛnawa se wɩlɩyʋ ɖɛɣnɩ nɔɔ kpɛlɩkʋʋ alɩwaatʋ taa.” Ɛzɩma ŋpɩzɩɣ ŋla nɛ ŋtɩlɩ alɩwaatʋ ndʋ pɩwɛɛ se ŋyɔɔdɩ nɛ tɔm ndʋ pɩwɛɛ se ŋyɔɔdɩ kpɛlɩkʋʋ alɩwaatʋ taa yɔ? (Adu. 25:11) Alɩwaatʋ ndʋ wɩlɩyʋ nɛ Bibl kpɛlɩkɩyʋ pɔyɔɔdʋʋ yɔ, welisi camɩyɛ. (Kalɩ Yakubu 1:19.) Ye ŋlabɩ mbʋ yɔ, ŋkaɣ pɩzʋʋ nɛ ŋɖʋ nesi alɩwaatʋ kɩbandʋ yɔɔ. Ɛlɛ pɩwɛɛ se ŋmaɣzɩ camɩyɛ pʋcɔ nɛ ŋyɔɔdɩ. Pɩtɩpɔzɩ se ŋkɩlɩ yɔɔdʋʋ nɛ pɩtɩpɔzɩ se ŋcɛ wɩlɩyʋ nɔɔ alɩwaatʋ ndʋ ɛlɛ kaacɔlʋʋ kpɛlɩkɩyʋ lɩmaɣza yɔ, nɛ pɩtɩpɔzɩ ɖɔɖɔ se ŋyɔɔdɩ tɔm ndʋ tɩwɛ ndɩ nɛ ndʋ ɩwɛɛ nɛ ɩkpɛlɩkɩɣ yɔ. Ɛlɛ ŋpɩzɩɣ nɛ ŋyɔɔdɩ tɔm natʋyʋ pazɩ, ŋha kɩɖaʋ nakʋyʋ yaa ŋpɔzɩ tɔm natʋyʋ nɛ pɩsa nɛ tɔm ndʋ ɩwɛɛ nɛ ɩkpɛlɩkɩɣ yɔ, tɩ-taa tʋ kpayɩ kpayɩ. Nabʋyʋ taa, pɩpɩzɩɣ nɛ pɩlabɩ-ŋ ɛzɩ ŋfɛyɩnɩ tɔm sakɩyɛ se ŋyɔɔdɩ yɔ. Ɛlɛ ye ŋsam kpɛlɩkɩyʋ nɛ ŋwɩlɩ se ŋmaɣzɩɣ ɛ-yɔɔ yɔ, ŋkaɣ-ɩ sɩnʋʋ se ɛɖɛɛnɩ ɛsɩndaa.

10. Ye ŋkɛdɩ Bibl kpɛlɩkɩyʋ nɔɔyʋ mbʋ ŋkatɩ ñe-wezuu caɣʋ taa yɔ pɩ-tɔm yɔ, ɛzɩma pɩpɩzɩɣ nɛ pɩsɩnɩ-ɩ?

¹⁰ Kɛdɩ-ɩ mbʋ ŋkatɩ ñe-wezuu caɣʋ taa yɔ pɩ-tɔm. Ŋpɩzɩɣ nɛ ŋkɛdɩ kpɛlɩkɩyʋ ɛzɩma ŋlaba nɛ ŋtɩlɩ toovenim yɔ, ɛzɩma ŋlʋbɩnɩ kaɖɛ naɖɩyɛ nɛ ŋwa yɔ, yaa ɛzɩma Yehowa sɩnɩ-ŋ yɔ pɩ-tɔm, ye ŋnawa se pɩpɩzɩɣ nɛ pɩsɩnɩ-ɩ yɔ. (Keɣa 77:4, 7) Pɩtɩla, tɔm ndʋ ɖeyi ɖeyi pɩpɔzʋʋ se kpɛlɩkɩyʋ ɛnɩɩ. Tɔm ndʋ tɩpɩzɩɣ nɛ tɩkpazɩ e-tisuu ɖoŋ, yaa tiseɣti-i se ɛɖɛɛnɩ ɛsɩndaa nɛ pamɩyɩsɩ-ɩ lɩm. Nɛ tɩpɩzɩɣ tɩsɩnɩ-ɩ nɛ ɛtɩlɩ  ɛzɩma ɛlʋbɩnɩ kaɖɛ nɖɩ ɛwɛɛ nɛ ɛkatɩɣ yɔ. (1 Pɩy. 5:9) Gabriel wɛ Breeziili ɛjaɖɛ taa nɛ lɛɛlɛɛyɔ ɛkɛ paa ɖooye nʋmɔʋ lɩzɩyʋ. Ɛtɔzʋʋ mbʋ pɩɩsɩnɩ-ɩ alɩwaatʋ ndʋ ɛkpɛlɩkaɣ Bibl yɔ pɩ-yɔɔ. Ɛyɔɔdaa se: “Alɩwaatʋ ndʋ koobiya kɛdɩ-m mbʋ pakatɩ pe-wezuu caɣʋ taa yɔ pɩ-tɔm lɛ, pɩsɩnɩ-m nɛ menɖiɣzina se Yehowa naɣ kala wena ɖɩkatɩɣ yɔ. Nɛ ye papɩzaa nɛ pawabɩ-yɛ yɔ, ma ɖɔɖɔ manpɩzɩɣ.”

11-12. Alɩwaatʋ ndʋ Bibl kpɛlɩkɩyʋ nɔɔyʋ kɔŋ kediɣzisi yɔ, ɛbɛ yɔɔ pɩpɔzʋʋ se ɖɩmʋ-ɩ camɩyɛ?

¹¹ Pɩsa nɛ Bibl kpɛlɩkɩyʋ nɔɔyʋ ɖɛɛnɩ ɛsɩndaa nɛ pamɩyɩsɩ-ɩ lɩm lɛ, pɩwɛɛ se ewoki ɛgbɛyɛ taa kediɣzisi ɖoŋ ɖoŋ nɛ eyele nɛ sɩwazɩ-ɩ. (Ebr. 10:24, 25) Pɩtʋʋ fɛyɩ se ɛ-wɩlɩyʋ kaɣnɩ-ɩ yaʋ se ɛkɔɔ kediɣzaɣ kajalaɣ ɖeɖe. Alɩwaatʋ ndʋ kpɛlɩkɩyʋ kɔŋ kediɣzaɣ yɔ, ɖa-tɩŋa ɖɩpɩzɩɣ ɖiseɣti-i se ewolo pɩ-yɔɔ nɛ ɛkɔŋ Kewiyaɣ Kpaaŋ taa. Nʋmɔŋ weyi yɔɔ ɖɩpɩzɩɣ ɖɩtɩŋna nɛ ɖɩla mbʋ?

¹² Mʋ Bibl kpɛlɩkɩyʋ camɩyɛ. (Roma 15:7) Ye ɖɩmʋʋ kpɛlɩkɩyʋ camɩyɛ kediɣzisi taa yɔ, pɩtʋʋ fɛyɩ se ɛkaɣ sɔɔlʋʋ se ewolo pɩ-yɔɔ nɛ ɛkɔŋ Kewiyaɣ Kpaaŋ taa. Sɛɛ kpɛlɩkɩyʋ nɛ nɔɔ kɩbaŋa nɛ ŋyele nɛ ɛ nɛ lalaa patɩlɩ ɖama, ɛlɛ taala nɛ pɩcɛyɩ-ɩ. Yɔɔdɩnɩ-ɩ mbʋ pʋyɔɔ yɔ, pɩtɩla weyi ɛkpɛlɩkɩɣnɩ-ɩ Bibl yɔ ɛtɩtɩɩkɔmta yaa ɛwɛɛ nɛ ɛlakɩ tʋma naayɛ Kewiyaɣ Kpaaŋ taa nɛ pɩɖɔkɩnɩ-ɩ. Alɩwaatʋ ndʋ kpɛlɩkɩyʋ kaayɔɔdʋʋ yɔ, welisini-i camɩyɛ, nɛ ŋwɩlɩ se ŋmaɣzɩɣ ɛ-yɔɔ. Ye ŋmʋ kpɛlɩkɩyʋ nɔɔyʋ camɩyɛ yɔ, ɖoŋ weyi pɩpɩzɩɣ nɛ pɩwɛɛnɩ ɛ-yɔɔ? Iyele nɛ ɖɩna Dmitrii kɩɖaʋ. Pamɩyɩsʋʋ-ɩ lɩm yɔ pɩlakɩ pɩnzɩ pazɩ yɔ, nɛ lɛɛlɛɛyɔ ɛkɛ ɛgbɛyɛ taa tʋmlaɖʋ. Ɛtɔzʋʋ kɩyakʋ ŋgʋ ɛcalɩ wobu kediɣzaɣ yɔ kɩ-yɔɔ. Ɛyɔɔdaa se: “Alɩwaatʋ ndʋ koobu abalɩñɩnʋ nɔɔyʋ na-m mansɩŋ awayɩ nɛ sɔɔndʋ kpaɣaɣ-m yɔ, ɛñɔtɩnɩ-m nɛ ɛsɩnɩ-m nɛ ma nɛ ɩ ɖɩsʋʋ Kewiyaɣ Kpaaŋ taa. Ɛyaa sakɩyɛ ñɔtɩnɩ-m nɛ pɛsɛ-m. Pɩɩɖɩɣzɩ-m kpem. Pɩɩkɛdɩnɩ-m siŋŋ nɛ pʋyɔɔ lɛ, maasɔɔlaa se kpɩtaʋ taa lɛ, ɖɩlakɩ kediɣzaɣ paa evemiye nɖɩ. Mbʋ mana peeɖe yɔ, wiɖiyi mantɩnatɩ-pʋ ɖoli kpa.”

13. Wezuu ŋgʋ ŋcakɩ yɔ, ɖoŋ weyi kɩpɩzɩɣ nɛ kɩwɛɛnɩ Bibl kpɛlɩkɩyʋ nɔɔyʋ yɔɔ?

¹³ Ha kɩɖaʋ kɩbaŋʋ. Wezuu ŋgʋ ŋcakɩ yɔ kɩpɩzɩɣ kɩsɩnɩ Bibl kpɛlɩkɩyʋ nɛ ɛ-taa tɛ se ɛlɩ toovenim yɔɔ. (Mat. 5:16) Vitalii wɛ Mɔlɩdaavii ɛjaɖɛ taa nɛ ɛkɛ paa ɖooye nʋmɔʋ lɩzɩyʋ. Ɛyɔɔdaa se: “Manaɣaɣ ɛzɩma ɛgbɛyɛ taa ñɩma lalaa cakaɣ wezuu yɔ, lɩmaɣza wena paawɛna yɔ, nɛ pa-lakasɩ. Piyeba nɛ man-taa tɛ se Yehowa Aseɣɖe Tɩnaa ɛgbɛyɛ kɛnɩ toovenim Ɛsɔ sɛtʋ ɛgbɛyɛ.”

14. Ɛzɩma ña-kɩɖaʋ pɩzɩɣ kɩsɩnɩ nɔɔyʋ nɛ ɛɖɛɛnɩ ɛsɩndaa?

¹⁴ Pɩsa nɛ Bibl kpɛlɩkɩyʋ nɔɔyʋ mʋna se pamɩyɩsɩ-ɩ lɩm lɛ, pɩcɛyaa se ɛɖɔ tɔm ndʋ ɛkpɛlɩkɩɣ yɔ tɩ-yɔɔ. Pɩ-labʋ fɛyɩ kɛlɛʋ paa ɛzɩmtaa. Ɛlɛ alɩwaatʋ ndʋ kpɛlɩkɩyʋ naɣ  ɛzɩma Bibl paɣtʋ kila yɔɔ ɖɔm wazɩ-ŋ yɔ, pɩpɩzɩɣ piseɣti-i nɛ ɛmaɣzɩnɩ-ŋ. (1 Kɔr. 11:1) Iyele nɛ ɖɩna Hanae weyi ɛ-tɔm ɖɩyɔɔdaa nɛ pɩɖɛɛ yɔ ɛ-kɩɖaʋ. Ɛyɔɔdaa se: “Koobiya kaawɛɛ nɛ pɔɖɔŋ tɔm ndʋ mɛnkpɛlɩkaɣ yɔ tɩ-yɔɔ. Maana ɛzɩma manpɩzɩɣ nɛ mankpazɩ lalaa ɖoŋ nɛ menkpeɣ-wɛ yɔ, nɛ ɛzɩma manpɩzɩɣ nɛ mawɩlɩ-wɛ sɔɔlɩm yɔ. Pɔyɔɔdaɣ lalaa yɔɔ tɔm kɩbandʋ paa ɛzɩmtaa. Maasɔɔlaa se mamaɣzɩnɩ-wɛ.”

15. Ɛzɩma Aduwa 27:17 sɩɣnɩ-ɖʋ se ɖɩtɩlɩ mbʋ pʋyɔɔ pɩpɔzʋʋ se ɖɩɖʋ taabalɩyɛ nɛ Bibl kpɛlɩkɩyʋ alɩwaatʋ ndʋ ewoki pɩ-yɔɔ nɛ ɛkɔŋ kediɣzisi yɔ?

¹⁵ Ðʋ taabalɩyɛ nɛ Bibl kpɛlɩkɩyʋ. Kpɛlɩkɩyʋ woki pɩ-yɔɔ nɛ ɛkɔŋ kediɣzisi lɛ, wolo pɩ-yɔɔ nɛ ŋwɩlɩɣ se ŋmaɣzɩɣ ɛ-yɔɔ. (Fil. 2:4) Ŋpɩzɩɣ ŋñaɣ pana nɛ ŋtɩlɩ-ɩ camɩyɛ nɛ pɩkpaɖɩ. Ŋpɩzɩɣ nɛ ŋheyi-i se ña-taa wɛ leleŋ nɛ lɛɣzɩtʋ ndʋ ɛwɛɛ nɛ ɛlakɩ yɔ. Ŋpɩzɩɣ ɖɔɖɔ nɛ ŋpɔzɩ-ɩ tɔm pɩlɩɩnɩ e-Bibl kpɛlɩkʋʋ, ɛ-hɔʋ nɛ ɛ-tʋmɩyɛ pɔ-yɔɔ. Ɛlɛ kpa ña-tɩ nɛ taapɔzɩ-ɩ tɔm ndʋ tɩpɩzɩɣ nɛ tɩcɛyɩ-ɩ yɔ. Ye ña nɛ ɩ ɩlakɩ kɛdɛsɩ nzɩ yɔ, mɩ-taabalɩyɛ pɩzɩɣ nɛ ɖɩcɛyɩsɩ. Ye ŋɖʋ taabalɩyɛ nɛ kpɛlɩkɩyʋ yɔ, ŋsɩɣnɩ-ɩ se ɛɖɛɛnɩ ɛsɩndaa nɛ pamɩyɩsɩ-ɩ lɩm. (Kalɩ Aduwa 27:17.) Lɛɛlɛɛyɔ, Hanae kɛ paa ɖooye nʋmɔʋ lɩzɩyʋ. Ɛtɔzʋʋ alɩwaatʋ ndʋ ɛpaɣzɩ kediɣzisi wobu yɔ tɩ-yɔɔ. Ɛyɔɔdaa se: “Alɩwaatʋ ndʋ manɖʋ taabalɩyɛ nɛ ɛgbɛyɛ taa ñɩma yɔ, piyeba nɛ manpaɣzɩ ɖaŋʋʋ kpam se kediɣzisi ɛtalɩ lɔŋ, nɛ mañakaɣ pana nɛ mowoki-sɩ halɩ pɩkpɛndɩnɩ alɩwaatʋ ndʋ pɩnɩɣaɣ-m yɔ. Man-taa lakaɣ leleŋ siŋŋ se ma nɛ man-taabalaa kɩfama ɖɩkpakaɣ alɩwaatʋ nɛ ɖɩcakɩ, nɛ pɩɩsɩnɩ-m nɛ mɛncɛ taabalɩyɛ nɖɩ ɖɩɩwɛ ma nɛ ɛyaa mba paasɛɣ Yehowa yɔ ɖɛ-hɛkʋ taa yɔ. Maasɔɔlaa se mɔñɔtɩnɩ Yehowa nɛ mon-koobiya nɛ pɩkpaɖɩ. Piyeba nɛ mankpaɣ lɩmaɣzɩyɛ se mahaɣ man-tɩ nɛ pamɩyɩsɩ-m lɩm.”

16. Ɛbɛ ɖɔɖɔ ŋpɩzɩɣ ŋla nɛ ŋsɩnɩ Bibl kpɛlɩkɩyʋ nɔɔyʋ nɛ ɛ-taa la leleŋ se ɛwɛ ɛgbɛyɛ taa?

¹⁶ Alɩwaatʋ ndʋ kpɛlɩkɩyʋ woki pɩ-yɔɔ nɛ ɛɖɛɣnɩ ɛsɩndaa nɛ ɛlakɩ lɛɣzɩtʋ yɔ, sɩnɩ-ɩ nɛ eɖiɣzina se ɛkɛ ɛgbɛyɛ taa tʋ. Ŋpɩzɩɣ nɛ ŋla mbʋ, ye ŋmʋʋ ɛyaa lalaa ɛgɔndʋ yɔ. (Ebr. 13:2) Denis wɛ Mɔlɩdaavii ɛjaɖɛ taa. Ɛtɔzʋʋ alɩwaatʋ ndʋ ɛkpɛlɩkaɣ Bibl yɔ tɩ-yɔɔ. Ɛyɔɔdaa se: “Koobiya yaɣaɣ ma nɛ ma-halʋ tam sakɩyɛ nɛ ɖa nɛ wɛ ɖɩkpakɩɣ alɩwaatʋ nɛ ɖɩcakɩ. Peheyaɣ-ɖʋ ɛzɩma Yehowa kaasɩnɩ-wɛ nɛ pɩɖɛɛ yɔ pɩ-tɔm. Pɩɩkpazɩ-ɖʋ ɖoŋ. Pɩɩsɩnɩ-ɖʋ nɛ ɖɩtɛ ɖa-taa se ɖɩsɛɣ Yehowa nɛ ɖa-taa tɛ ɖɔɖɔ se ye ɖɩlabɩ mbʋ yɔ, ɖɩkaɣ hiɣu taa leleŋ ɖe-wezuu caɣʋ taa.” Alɩwaatʋ ndʋ pahaɣ Bibl kpɛlɩkɩyʋ waɖɛ se ɛpɩsɩ tɔm susuyu yɔ, ŋpɩzɩɣ ɖɔɖɔ nɛ ŋyaa-ɩ se ɛsɩ-ŋ tɔm susuu taa. Payaɣ tɔm susuyu nɔɔyʋ se Diego nɛ ɛwɛ Preeziili ɛjaɖɛ taa. Ɛyɔɔdaa se: “Koobiya abalɩñɩma sakɩyɛ ya-m se ma nɛ wɛ ɖɩlɩɩ nɛ ɖisusi tɔm. Pɩɩkɛnɩ nʋmɔʋ kɩbaŋʋ ŋgʋ kɩ-yɔɔ mantɩŋnaa nɛ mantɩlɩ-wɛ camɩyɛ yɔ. Alɩwaatʋ ndʋ malabɩ mbʋ yɔ, mɛnkpɛlɩkɩ lɔŋ sakɩyɛ nɛ mɔñɔtɩnɩ Yehowa nɛ Yesu nɛ pɩkpaɖɩ.”

17. Ɛbɛ ɛgbɛyɛ taa ɛzʋtʋyaa pɩzɩɣ pala nɛ pasɩnɩ Bibl kpɛlɩkɩyaa?

¹⁷ Ha Bibl kpɛlɩkɩyaa ña-alɩwaatʋ. Ɛgbɛyɛ taa ɛzʋtʋyaa, ye ɩwɩlɩɣ sɔɔlɩm Bibl kpɛlɩkɩyaa nɛ ɩwɩlɩɣ se ɩmaɣzɩɣ pɔ-yɔɔ yɔ, pɩpɩzɩɣ pɩsɩnɩ-wɛ nɛ pɛɖɛɛnɩ ɛsɩndaa nɛ pamɩyɩsɩ-wɛ lɩm. Ŋpɩzɩɣ nɛ ŋkpakɩɣ alɩwaatʋ ɖoŋ ɖoŋ nɛ ña nɛ Bibl kpɛlɩkɩyaa ɩlakɩ faawɩyɛ kediɣzisi taa? Pakaɣ ɖiɣzinuu se ŋmaɣzɩɣ pɔ-yɔɔ, ye ŋtɔzʋʋ pa-hɩla yɔɔ kɔzɩ kɔzɩ alɩwaatʋ ndʋ papaɣzɩɣ tɔm cosuu yɔ. Ŋpɩzɩɣ nɛ ŋlɛɣzɩɣ ña-ɖʋtʋ ɖoŋ ɖoŋ se pɩsa nɛ ŋsɩɩ tɔm susuyu nɔɔyʋ, alɩwaatʋ ndʋ ewoki se ɛkpɛlɩkɩnɩ nɔɔyʋ Bibl yɔ? Ye ŋlakɩ mbʋ yɔ, ŋpɩzɩɣ nɛ ŋsɩnɩ kpɛlɩkɩyʋ nɔɔyʋ siŋŋ nɛ pɩtɩla ŋtaamaɣzɩ pɩ-yɔɔ. Jackie wɛ Naajeeriya ɛjaɖɛ taa nɛ ɛkɛ paa ɖooye nʋmɔʋ lɩzɩyʋ. Ɛyɔɔdaa se: “Alɩwaatʋ ndʋ men-Bibl kpɛlɩkɩyaa nawa se koobu weyi ɛsɩ-m yɔ ɛkɛ ɛgbɛyɛ taa ɛzʋtʋyʋ yɔ, pɩɖɩɣzɩ-wɛ. Men-Bibl kpɛlɩkɩyʋ lɛlʋ yɔɔdaa se: ‘Mɛn-tɛ Pasɩtɛɛrɩ ɛɛpɩzɩɣ nɛ ɛla mbʋ kpa. Ñɩm tɩnaa ɖeke yɔɔ ekilimiɣ, nɛ pʋcɔ nɛ ekilimi pɔ-yɔɔ lɛ, pɩwɛɛ se pɛhɛyɩ-ɩ liidiye!’” Lɛɛlɛɛyɔ, kpɛlɩkɩyʋ ɛnʋ ewoki kediɣzisi.

18. Ɛzɩma ɛgbɛyɛ taa ɛzʋtʋyaa pɩzɩɣ nɛ pɔɖɔ tɔm ndʋ tɩwɛ Tʋma Labʋ 20:28 taa yɔ tɩ-yɔɔ?

¹⁸ Falɩsɩ wɩlɩyaa nɛ ŋkpazɩ-wɛ ɖoŋ. Ɛgbɛyɛ taa ɛzʋtʋyaa, ɩwɛnɩ tʋmɩyɛ kɩcɛyɩyɛ naɖɩyɛ; nɖɩ lɛ se pɩwɛɛ se ɩsɩnɩ tɔm susuyaa nɛ pɛwɛɛ niye tɔm susuu nɛ tɔm wɩlʋʋ taa. (Kalɩ Tʋma Labʋ 20:28.) Ye ŋnawa se fɛyɛ kpaɣ nɔɔyʋ se ɛkpɛlɩkɩnɩ nɔɔyʋ Bibl alɩwaatʋ ndʋ ŋwɛ peeɖe yɔ, heyi-i se ŋcɔŋnɩ kpɛlɩkʋʋ yɔɔ. Jackie weyi ɛ-tɔm ɖɩyɔɔdaa nɛ pɩɖɛɛ yɔ, ɛtɔm se: “Ðoŋ ɖoŋ lɛ, ɛzʋtʋyaa pɔzʋʋ-m tɔm pɩlɩɩnɩ men-Bibl kpɛlɩkɩyaa yɔɔ. Ye panawa se mɛwɛɛ nɛ mankatɩɣ tɩlasɩ nasɩyɩ ma nɛ nɔɔyʋ ɖe-Bibl kpɛlɩkʋʋ taa yɔ, patasɩɣ-m lɔŋ kɩbaŋ.” Ɛzʋtʋyaa pɩzɩɣ nɛ pañaɣ pana siŋŋ nɛ pakpazɩ ɖoŋ wɩlɩyaa nɛ peseɣti-wɛ se pɔɖɔkɩ kpam. (1 Tes. 5:11) Jackie tasɩ yɔɔdʋʋ se: “Alɩwaatʋ ndʋ ɛzʋtʋyaa kpazɩɣ-m ɖoŋ nɛ peheyiɣ-m se tʋmɩyɛ nɖɩ malakɩ yɔ ɖɩmʋ ñɩm pɛ-ɛsɩndaa yɔ, pɩkɛdɩɣnɩ-m. Pɔ-tɔm hɛzɩɣ ma-laŋɩyɛ ɛzɩ lɩm kiniɣdim hɛzʋʋ ɛyʋ laŋɩyɛ soŋaɣ alɩwaatʋ taa yɔ. Alɩwaatʋ ndʋ pasaŋɩ-m yɔ, piyeki nɛ mantaɣ man-tɩ liu nɛ pɩkpaɖɩɣ nɛ piyeki ɖɔɖɔ nɛ mehikiɣ taa leleŋ nɛ pɩkpaɖɩɣ alɩwaatʋ ndʋ mɛnkpɛlɩkɩɣnɩ ɛyaa Bibl yɔ.”—Adu. 25:25.

19. Taa leleŋ weyi ɖa-tɩŋa ɖɩpɩzɩɣ nɛ ɖihiɣ?

¹⁹ Paa ɖɩɩkpɛlɩkɩɣnɩ nɔɔyʋ Bibl lɛɛlɛɛyɔ yɔ, ɖɩpɩzɩɣ ɖɩsɩnɩ nɔɔyʋ nɛ ɛɖɛɛnɩ ɛsɩndaa nɛ pamɩyɩsɩ-ɩ lɩm. Ye ɖɩñɔɔzɩ ɖa-tɩ camɩyɛ yɔ, ɖɩpɩzɩɣ nɛ ɖɩyɔɔdɩ tɔm natʋyʋ nɛ ɖɩɖʋ nesi wɩlɩyʋ kpɛlɩkʋʋ alɩwaatʋ taa, ɛlɛ pɩtɩpɔzɩ se ɖɩkɩlɩ yɔɔdʋʋ. Ðɩpɩzɩɣ ɖɩɖʋ taabalɩyɛ nɛ Bibl kpɛlɩkɩyaa alɩwaatʋ ndʋ pɔkɔŋ Kewiyaɣ Kpaaŋ taa yɔ, nɛ ɖɩpɩzɩɣ ɖɔɖɔ nɛ ɖɩkɛnɩ-wɛ kɩɖaŋ kɩbaŋ. Ɛgbɛyɛ taa ɛzʋtʋyaa pɩzɩɣ nɛ pakpazɩ ɖoŋ Bibl kpɛlɩkɩyaa, ye pahaɣ-wɛ pa-alɩwaatʋ yɔ. Nɛ papɩzɩɣ ɖɔɖɔ nɛ pakpazɩ ɖoŋ wɩlɩyaa, ye pafalɩsɩɣ-wɛ nɛ pasaŋ-wɛ yɔ. Ða-taa wɛ leleŋ siŋŋ se ɖɩtɩlɩ se ɖɩpɩzɩɣ ɖɩla nabʋyʋ, paa pɩtɩɩkɛ pʋyʋ cikpem yɔ nɛ ɖɩsɩnɩ nɔɔyʋ nɛ ɛsɔɔlɩ Yehowa nɛ ɛsɛɛ-ɩ!