1. Pʋcɔ nɛ ŋpaɣzɩ Bibl kpɛlɩkʋʋ lɛ, ɛzɩma ñe-wezuu caɣʋ kaawɛɛ?

 PƲCƆ nɛ ña nɛ Yehowa Aseɣɖe Tɩnaa ɩpaɣzɩɣ Bibl kpɛlɩkʋʋ lɛ, ɛzɩma ñe-wezuu caɣʋ kaawɛɛ? Ða-taa sakɩyɛ tɩsɔɔlɩ se pamaɣzɩ pɩ-yɔɔ. Pɩtʋʋ fɛyɩ se mbʋ ɛjaɖɛ maɣzɩɣ se pɩkɛ kɩbam nɛ kɩdɛkɛdɩm yɔ, mbʋ ɖiyaɣni ɖɛ-wɛtʋ nɛ ɖɛ-ɛyʋtʋ. Ye mbʋ yɔ, ‘ɖɩtaawɛɛnɩ lidaʋ nɛ ɖɩtaatɩlɩ Ɛsɔ.’ (Efɛz. 2:12) Ɛlɛ ɖɩpaɣzɩ Bibl kpɛlɩkʋʋ lɛ, ɖe-wezuu caɣʋ lɛɣzaa kpem!

2. Ŋpaɣzɩ Bibl kpɛlɩkʋʋ lɛ, tɔm ndʋ ŋɖiɣzinaa?

² Ŋpaɣzɩ Bibl kpɛlɩkʋʋ lɛ, ŋɖiɣzina se ŋwɛnɩ Caa nɔɔyʋ ɛsɔdaa nɛ ɛsɔɔlɩ-ŋ siŋŋ. Ŋɖiɣzinaa se ye ŋsɔɔlaa se ñɔ-tɔm ɛkɛdɩnɩ Yehowa nɛ ŋpɩsɩ ɛ-sɛyaa hɔʋ taa tʋ yɔ, pɩpɔzʋʋ se ŋla lɛɣzɩtʋ sɔsɔtʋ ñe-wezuu caɣʋ taa nɛ ña-maɣzɩm taa. Pɩpɔzʋʋ se ŋcaɣ wezuu nɛ pɩla nɔɔ kʋɖʋmaɣ nɛ ɛ-paɣtʋ nɛ ɛ-paɣtʋ kila.—Efɛz. 5:3-5.

3. (a) Ɛzɩ Koloosi mba 3:9, 10 yɔɔdʋʋ yɔ, ɛbɛ Yehowa sɔɔlaa se ɖɩla? (b) Nɛ ɛbɛ ɖɩkaɣ naʋ tɔm ñʋʋ kʋnɛ kɩ-taa?

³ Yehowa kɛnɩ ɖa-Lɩzɩyʋ nɛ ɖa-Caa weyi ɛwɛ ɛsɔdaa yɔ; pʋyɔɔ lɛ, ɛwɛnɩ waɖɛ se eheyi ɛ-hɔʋ taa mba wezuu ŋgʋ pɩwɛɛ se pacaɣ yɔ. Nɛ ɛsɔɔlaa se ɖɩñaɣ pana siŋŋ nɛ ‘ɖɩhɔzɩ ɛyʋtʋ kɩbɩndʋ nɛ tɩ-lakasɩ’ * pʋcɔ nɛ pamɩyɩsɩ-ɖʋ lɩm. (Kalɩ Koloosi mba 3:9, 10.) Tɔm ñʋʋ kʋnɛ, kɩkaɣ sɩnʋʋ mba pɔsɔɔlaa se pamɩyɩsɩ-wɛ lɩm yɔ nɛ pocosi tɔm pɔzʋʋ naadozo yɔɔ: (1) Ɛbɛ “ɛyʋtʋ kɩbɩndʋ” kɛnaa? (2) Ɛbɛ yɔɔ Yehowa seɣtiɣ-ɖʋ se ɖɩhɔzɩ-tʋ? (3) Ɛzɩma ɖɩpɩzɩɣ nɛ ɖɩla mbʋ? Ða mba pɛtɛm-ɖʋ lɩm mɩyɩsʋʋ yɔ, tɔm ñʋʋ kʋnɛ kɩkaɣ-ɖʋ sɩnʋʋ se ɖɩtaaɖaɣnɩ pɩsʋʋ ɖɛ-ɛyʋtʋ kɩbɩndʋ wayɩ.

4. Ɛyʋ weyi ɛwɛnɩ “ɛyʋtʋ kɩbɩndʋ” yɔ, wɛtʋ ndʋ ɛwɛna?

⁴ Ɛyʋ weyi ɛwɛnɩ “ɛyʋtʋ kɩbɩndʋ” yɔ, ɖoŋ ɖoŋ lɛ, ɛmaɣzɩɣ nɛ ɛlakɩ ɛzɩ tomnaɣ yɔɔ ɛyʋ yɔ. Ɛpɩzɩɣ nɛ ɛwɛɛnɩ piɖeni men-ɖeke wɛtʋ, ɛkɔʋ pana lɛɛ lɛɛ, ɛɛwɛɣnɩ ɛsɩmɩyɛ, nɛ ɛwɛɣnɩ tɩ kpazʋʋ. Ɛpɩzɩɣ nɛ ɛsɔɔlɩ kʋzʋʋ kɩlɛmɩŋ cɔnʋʋ, wezuu kɩdɛkɛdʋʋ caɣʋ nɛ puuyaɣ lakasɩ tɛ filimwaa cɔnʋʋ. Pɩtʋʋ fɛyɩ se ɛwɛnɩ wɛtʋ kɩbandʋ, nɛ pɩtɩla tɔm kɩdɛkɛdɩtʋ ndʋ ɛyɔɔdʋʋ yɔ yaa lakasɩ kɩdɛkɛdɩsɩ nzɩ ɛlakɩ yɔ, piyeki nɛ ɛ-ɛhʋyɛ kʋʋ ɛ-tɔm. Ɛlɛ piiseɣtiɣ-i se ɛlɛɣzɩ ɛ-maɣzɩm nɛ e-wezuu caɣʋ.—Gal. 5:19-21; 2 Tim. 3:2-5.

5. Ðɩpɩzɩɣ nɛ ɖɩhɔzɩ ɛyʋtʋ kɩbɩndʋ caɣ caɣ na? Lɩzɩ pɩ-taa. (Tʋma Labʋ 3:19)

⁵ Ðɩtɩtalɩ pilim; pʋyɔɔ lɛ, ɖa-taa nɔɔyʋ ɛɛpɩzɩɣ nɛ ɛhɩzɩ lɩmaɣza kɩdɛkɛda nɛ kɔɖɛyɩ kɩdɛkɛdʋʋ ɛ-laŋɩyɛ taa nɛ ɛ-maɣzɩm taa caɣ caɣ. Nabʋyʋ taa, ɖɩpɩzɩɣ nɛ ɖɩla nabʋyʋ yaa ɖɩyɔɔdɩ tɔm natʋyʋ nɛ pʋwayɩ lɛ ɖikpiɖi pɩ-yɔɔ. (Yer. 17:9; Yak. 3:2) Ɛlɛ alɩwaatʋ ndʋ ɖɩhɔzʋʋ ɛyʋtʋ kɩbɩndʋ yɔ, tomnaɣ yɔɔ ɛyʋ wɛtʋ nɛ lakasɩ kɩdɛkɛdɩsɩ ɩɩtaasɩɣ-ɖʋ ɖiyuu. Ðɩpɩsɩɣ ɛyʋ weyi ɛwɛ ndɩ kpem yɔ.—Iza. 55:7; kalɩ Tʋma Labʋ 3:19.

6. Ɛbɛ yɔɔ Yehowa seɣtiɣ-ɖʋ se ɖɩtaawɛɛnɩ lɩmaɣza kɩdɛkɛda nɛ wɛtʋ kɩdɛkɛdɩtʋ?

⁶ Yehowa seɣtiɣ-ɖʋ se ɖɩtaawɛɛnɩ lɩmaɣza kɩdɛkɛda nɛ wɛtʋ kɩdɛkɛdɩtʋ, mbʋ pʋyɔɔ yɔ ɛsɔɔlɩ-ɖʋ siŋŋ nɛ ɛsɔɔlaa se ɖɩnɩɩ leleŋ ɖe-wezuu caɣʋ taa. (Iza. 48:17, 18) Ɛnawa se mba paakaɖɩɣnɩ kɔɖɛyɩ kɩdɛkɛdʋʋ yɔ, pɔkɔŋnɩ kaɖɛ pa-maɣmaɣ nɛ ɛyaa lalaa. Alɩwaatʋ ndʋ ɛnaɣ ɖɩkɔŋnɩ kaɖɛ ɖa-maɣmaɣ ɖa-tɩ yɔɔ nɛ ɛyaa lalaa yɔɔ yɔ, pɩcɛyɩɣ-ɩ.

7. Ɛzɩ Roma mba 12:1, 2 yɔɔdʋʋ yɔ, ɛbɛ ɖɩpɩzɩɣ nɛ ɖɩlɩzɩ se ɖɩlakɩ?

⁷ Kiɖe tɛɛ lɛ, pɩtɩla yɔ ɖa-taabalaa yaa ɖɔ-hɔʋ taa mba nabɛyɛ hoŋuu-ɖʋ mbʋ pʋyɔɔ yɔ ɖɩwɛɛ nɛ ɖɩñakɩ pana se ɖɩlɛɣzɩ ɖɛ-ɛyʋtʋ. (1 Pɩy. 4:3, 4) Papɩzɩɣ nɛ pɔyɔɔdɩ se ɖɩwɛnɩ waɖɛ se ɖɩla mbʋ ɖɩsɔɔlaa yɔ nɛ pɩtɩpɔzɩ se ɖiyele nɛ lalaa heyini-ɖʋ mbʋ ɖɩla yɔ. Ɛlɛ mba pekiziɣ Yehowa paɣtʋ nɛ ɛ-paɣtʋ kila yɔ, toovenim taa lɛ pɛfɛyɩ pa-tɩ yɔɔ. Toovenim lɛ se peyeki nɛ ɛjaɖɛ nɖɩ Sataŋ ɖiyiɣ yɔ ɖɩwɛɣnɩ ɖoŋ pɔ-yɔɔ. (Kalɩ Roma mba 12:1, 2.) Ða-tɩŋa payɩ pɩpɔzʋʋ se ɖɩkpaɣ  lɩmaɣzɩyɛ naɖɩyɛ: Ðɩpɩzɩɣ nɛ ɖɩlɩzɩ se ɖɩñɔʋnɩ ɖɛ-ɛyʋtʋ kɩbɩndʋ, ndʋ kɩwɛɛkɩm nɛ Sataŋ ɛjaɖɛ peɖiyiɣ yɔ; yaa ɖɩpɩzɩɣ nɛ ɖɩlɩzɩ se ɖɩhaɣ Yehowa nʋmɔʋ nɛ ɛlɛɣzɩ-ɖʋ nɛ ɖɩkɛ ɛyʋ kɩbanʋ weyi pɩpɔzʋʋ se ɖɩkɛ lɛɛlɛɛyɔ yɔ.—Iza. 64:7.

8. Ɛbɛ pɩzɩɣ pɩsɩnɩ-ɖʋ nɛ ɖiyele wɛnʋʋ lɩmaɣza kɩdɛkɛda nɛ wɛtʋ kɩdɛkɛdɩtʋ?

⁸ Yehowa nawa se pʋcɔ nɛ ɖiyele wɛnʋʋ lɩmaɣza kɩdɛkɛda nɛ wɛtʋ kɩdɛkɛdɩtʋ lɛ, pɩkpakɩɣ alɩwaatʋ nɛ pɩpɔzʋʋ pana ñaɣʋ. (Keɣa 102:13, 14) Ɛlɛ Yehowa tɩŋɩɣnɩ ɛ-Tɔm, e-fezuu kiɖeɖeu, nɛ ɛ-ɛgbɛyɛ yɔɔ nɛ ɛhaɣ-ɖʋ lɔŋsɩnɖɛ, ɖoŋ, nɛ sɩnʋʋ mbʋ pɩpɔzʋʋ-ɖʋ yɔ se pɩsa nɛ ɖɩlɛɣzɩ ɛyʋ weyi ɖɩkɛnaa yɔ. Pɩtʋʋ fɛyɩ se ɛtɛmɩ-ŋ sɩnʋʋ. Lɛɛlɛɛyɔ lɛ, iyele nɛ ɖɩna nɩŋgbanzɩ nzɩ ŋpɩzɩɣ ŋkpɛzɩ nɛ pɩsɩnɩ-ŋ nɛ ŋwolo pɩ-yɔɔ nɛ ŋhɔzʋʋ ɛyʋtʋ kɩbɩndʋ nɛ ŋmʋna nɛ pamɩyɩsɩ-ŋ lɩm yɔ sɩ-taa nasɩyɩ.

9. Ɛbɛ Ɛsɔtɔm pɩzɩɣ tɩsɩnɩ-ŋ nɛ ŋla?

⁹ Labɩnɩ Bibl tʋmɩyɛ nɛ ŋtazɩ ña-taa camɩyɛ. Ɛsɔtɔm lakɩ tʋmɩyɛ ɛzɩ ñɩnʋʋ yɔ; tɩpɩzɩɣ tɩsɩnɩ-ŋ nɛ ŋtazɩ ña-maɣzɩm, ñɔ-yɔɔdaɣ, nɛ ña-lakasɩ taa. (Yak. 1:22-25) Weyi ɛkpɛlɩkɩɣnɩ-ŋ Bibl yɔ nɛ Krɩstʋ ñɩma lalaa mba papɩ fezuu taa yɔ, papɩzɩɣ nɛ patasɩ-ŋ lɔŋ. Papɩzɩɣ nɛ patɩŋnɩ Masɩ yɔɔ nɛ pasɩnɩ-ŋ nɛ ŋɖiɣzini hɔɔlɩŋ weyi ɩ-taa ŋwɛ ɖoŋ nɛ weyi ɩ-taa ŋwɛnɩ ɛjandʋ yɔ. Papɩzɩɣ nɛ pawɩlɩ-ŋ ɛzɩma ŋkpaɣna nɛ ŋna Bibl taa lɔŋ tasʋʋ mbʋ pɩsɩɣnɩ-ŋ nɛ ŋwa lakasɩ kɩdɛkɛdɩsɩ yɔ. Nɛ paa ɛzɩmtaa lɛ, Yehowa sɔɔlaa se ɛsɩnɩ-ŋ. Ɛnʋ pɩzɩɣna nɛ ɛsɩnɩ-ŋ camɩyɛ nɛ pɩkɩlɩ, mbʋ pʋyɔɔ yɔ ɛsɩm mbʋ pɩwɛ ña-laŋɩyɛ taa yɔ. (Adu. 14:10; 15:11) Pʋyɔɔ lɛ, tɩmɩɣnɩ-ɩ ɖoŋ ɖoŋ nɛ ŋkpɛlɩkɩɣ ɛ-Tɔm paa ɖooye.

10. Ɛbɛ Elie kɩɖaʋ kpɛlɩkɩ-ŋ?

¹⁰ Ña-taa ɛtɛ se Yehowa paɣtʋ nɛ ɛ-paɣtʋ kila kɩlɩnɩ ɖeu. Mbʋ payɩ Yehowa pɔzʋʋ-ɖʋ se ɖɩla yɔ pɩwazɩɣ-ɖʋ. Mba palakɩnɩ tʋmɩyɛ ɛ-paɣtʋ nɛ ɛ-paɣtʋ kila yɔ pañaŋ pa-tɩ, pe-wezuu caɣʋ wɛɣnɩ tɔbʋʋ nɩʋ, nɛ pehikiɣ koboyaɣ siŋŋ. (Keɣa 18:8-12) Ɛlɛ, mba paakpakɩɣ Yehowa paɣtʋ nɛ ɛ-paɣtʋ kila nɛ palakɩnɩ tʋmɩyɛ yɔ, panɩɣ siziŋ weyi tomnaɣ lakasɩ kɔŋna yɔ. Payaɣ abalʋ nɔɔyʋ se Elie. Eekizi ɖɔm Yehowa paɣtʋ nɛ ɛ-paɣtʋ kila yɔɔ. Na tɔm ndʋ ɛyɔɔdaa yɔ. Lʋlɩyaa mba pɔsɔɔlɩ Yehowa yɔ, mba cɔŋnɩnɩ ɛ-yɔɔ nɛ ɛpaɣlɩ. Ɛlɛ Elie pɩsɩ pɩɣa evelaɣ lɛ, ɛpaɣzɩ ɖʋʋ taabalɩyɛ kɩdɛkɛdɩyɛ. Ɛpaɣzɩ labɩnʋʋ tʋmɩyɛ tabakʋʋyaɣ kadadayaɣ, ɛcakɩ kʋzʋʋ kɩdɛkɛdʋʋ wezuu, nɛ ɛmɩlɩɣ. Elie kɛdaa se ɛnʋ kɔm nɛ ɛna se ɛpaɣzɩ kɔʋ pana siŋŋ nɛ ɛwɛɛ puuyaɣ. Ɛyɔɔdaa se: “Malabɩ mbʋ payɩ paawɩlɩ-m se pɩtɩpɔzɩ se Krɩstʋ tʋ ɛla yɔ.” Paa mbʋ yɔ, Elie tɩsɔɔ mbʋ ɛɛkpɛlɩkɩ alɩwaatʋ ndʋ ɛɛkɛ pɩɣa yɔ pɩ-yɔɔ. Pʋwayɩ, Elie ɖaɣnɩ paɣzʋʋ Bibl kpɛlɩkʋʋ. Ɛñaɣ pana siŋŋ nɛ eyele ɛ-lakasɩ kɩdɛkɛdɩsɩ nɛ ɛha ɛ-tɩ nɛ pamɩyɩsɩ-ɩ lɩm pɩnaɣ 2000 taa. Ɛcaɣ wezuu nɛ pɩla nɔɔ kʋɖʋmaɣ nɛ Yehowa paɣtʋ nɛ ɛ-paɣtʋ kila lɛ, ɛzɩma pɩwazɩ-ɩ? Elie yɔɔdaa se: “Lɛɛlɛɛyɔ lɛ, mɛwɛnɩ maɣzɩm taa laŋhɛzɩyɛ nɛ ɛhʋyɛ kele kele ñɩnɖɛ.” * Elie kɩɖaʋ wɩlɩɣ-ɖʋ se mba pekiziɣ Yehowa paɣtʋ nɛ ɛ-paɣtʋ kila yɔ, paɖʋʋ pa-tɩ wɩzasɩ. Paa pɩlabɩ mbʋ yɔ, Yehowa sɔɔlɩ faaa se ɛsɩnɩ-wɛ nɛ pɛlɛɣzɩ.

11. Wɛtʋ nɛ lakasɩ nzɩ Yehowa paɖɩɣ?

¹¹ Paɖɩ mbʋ Yehowa paɖɩɣ yɔ. (Keɣa 96:10) Bibl wɩlɩɣ se Yehowa paɖɩɣ “pɛŋʋʋ tɛtɛ [yaa  ɛsa wena akpazɩɣ a-tɩ yɔ], nzʋlʋmɩyɛ kɩcɛtɩyɛ, nesi nzɩ sɩkpɛdɩɣ calɩm ɖulum yɔ.” (Adu. 6:16, 17) Pɩtasɩ lɛ, “ɛpaɖɩɣ puuyaɣ tɩnaa nɛ pɔbɔtʋ tɩnaa.” (Keɣa 5:6; nwt) Yehowa paɖɩɣ wɛtʋ nɛ lakasɩ nzɩ siŋŋ; pʋyɔɔ Noowa alɩwaatʋ taa ɛɖɩzɩ kañatʋ tɩnaa tɩŋa, mbʋ pʋyɔɔ yɔ peyeba nɛ tɛtʋ suni puuyaɣ lakasɩ. (Kiɖe 6:13) Iyele nɛ ɖɩna kɩɖaʋ lɛɛkʋ. Yehowa tɩŋnɩ nayʋ Malakii yɔɔ nɛ ɛyɔɔdɩ se ɛnʋ paɖɩɣ mba palakɩ pɩ-tɛɛ nɛ pɩ-yɔɔ lakasɩ nɛ pekiziɣ pɛ-tɛnzɩ ɖulum yɔ. Ɛsɔ ɛɛmʋ pɛ-sɛtʋ nɛ ɛkaɣ-wɛ pɔzʋʋ akɔnta pa-lakasɩ yɔɔ.—Mal. 2:13-16; Ebr. 13:4.

12. Ye pɔtɔm se ɛyʋ ‘ekizi mbʋ pɩkɛ kɩdɛkɛdɩm’ yɔ, pʋ-tɔbʋʋ lɛ suwe?

¹² Yehowa sɔɔlaa se ‘ɖikizi mbʋ pɩkɛ kɩdɛkɛdɩm’ yɔ. (Roma 12:9) Tɔm piye “ikizi” wɩlɩɣ ɛzɩma pɩlakɩ ɛyʋ yɔ; ɖɩ-tɔbʋʋ lɛ se ɛyʋ ɛpaɖɩ nabʋyʋ siŋŋ, nabʋyʋ ɛla ɛyʋ kiniŋ. Ye pɔpɔzɩ-ŋ se ŋtɔɔ tɔɔnaɣ ŋga kaɖazaa yɔ, maɣzɩ nɛ ŋna ɛzɩma pɩlakɩ-ŋ yɔ. Halɩ tɔɔnaɣ ŋga kɔ-yɔɔ maɣzʋʋ pɩzɩɣ piyele nɛ ŋtɔlɩ kʋdɔŋ. Mbʋ ɖɔɖɔ, mbʋ Yehowa tɔŋ se pɩfɛyɩ ɖeu yɔ, pɩpɔzʋʋ se pɩ-yɔɔ maɣzʋʋ ɛlabɩ-ɖʋ kiniŋ.

13. Ɛbɛ yɔɔ pɩwɛɛ se ɖɩkandɩyɩ ɖa-maɣzɩm yɔɔ?

¹³ Kandɩyɩ ña-maɣzɩm yɔɔ. Ða-maɣzɩm wɛnɩ ɖoŋ ɖa-lakasɩ yɔɔ. Pʋyɔɔ Yesu wɩlɩ-ɖʋ se ɖikizi maɣzɩm mbʋ pɩpɩzɩɣ nɛ pituyi-ɖʋ nɛ ɖɩla kɩwɛɛkɩm sɔsɔm nabʋyʋ yɔ. (Mat. 5:21, 22, 28, 29) Ðɩsɔɔlaa se ɖɔ-tɔm ɛkɛdɩnɩ ɖa-Caa weyi ɛwɛ ɛsɔdaa yɔ, yaa pɩtɩkɛ mbʋ? Pʋyɔɔ lɛ, pɩcɛyɩ kpem se ɖɩlɔ lɩmaɣza kɩdɛkɛda wena akɔŋ ɖa-maɣzɩm taa yɔ kpaagbaa!

14. (a) Ðɔ-yɔɔdaɣ wɩlɩɣ we? (b) Nɛ tɔm ndʋ yɔɔ pɩpɔzʋʋ se ɖicosi?

¹⁴ Maɣzɩ tɔm ndʋ ŋyɔɔdʋʋ yɔ tɩ-yɔɔ. Yesu yɔɔdaa se: “Mbʋ payɩ pɩlɩɣnɩ nɔɔ taa yɔ, laŋɩyɛ taa pɩlɩɣna.” (Mat. 15:18) Tɔm ndʋ ɖɩyɔɔdʋʋ yɔ, tɩwɩlɩɣ ɛyʋ weyi ɖɩkɛnɩ ɖooo ɖa-taa yɔ. Pʋyɔɔ lɛ, pɔzɩ ña-tɩ tɔm tʋnɛ: ‘Mentisiɣ se mɔyɔɔdɩ toovenim paa manawa se pɩkɔŋnɩ-m kaɖɛ yɔ? Ye mɔnɖɔkɩ nesi yɔ, mankpaɣ man-tɩ nɛ maacɛbɛlɩɣnɩ weyi ma nɛ ɩ ɖɩtɩkaa kʋzʋʋ piliŋa yɔ? Menseɣ kʋzɔɔtʋ tɔm yɔɔdʋʋ ɛzɩ kʋdɔŋ yɔ? Alɩwaatʋ ndʋ nɔɔyʋ ɖʋʋ-m ɖɩwɩzɩyɛ yɔ, moncosuu-i nɛ nɔɔ kɩbaŋa na?’ Ye ŋkpaɣ alɩwaatʋ nɛ ŋmaɣzɩ tɔm pɔzʋʋ mbʋ pɩ-yɔɔ yɔ, pɩkaɣ-ŋ sɩnʋʋ. Papɩzɩɣ nɛ pakpaɣ ñɔ-yɔɔdaɣ nɛ pamaɣzɩnɩ  toko yɔɔ kʋtɔŋnaa. Ye ŋlɩzɩ kʋtɔŋnaa yɔ pɩwɛɣ-ŋ kɛlɛʋ se ŋhɔzɩ toko ŋgʋ. Mbʋ ɖɔɖɔ, ye ŋlabɩ ño-ɖoŋ ɖeɖe nɛ ŋkizi yɔɔdʋʋ tɔm ndʋ tɩɖʋʋ ɖɩwɩzɩyɛ yɔ, cɛtɩm tɔm, nɛ kʋzɔɔtʋ tɔm yɔ, ŋkaɣ naʋ se pɩwɛɣ-ŋ kɛlɛʋ se ŋhɔzɩ ɛyʋtʋ kɩbɩndʋ.

15. Ye pɔtɔm se ɖɩka ɖɛ-ɛyʋtʋ kɩbɩndʋ “sizika yɔɔ” yɔ, pʋ-tɔbʋʋ lɛ suwe?

¹⁵ Tisi faaa nɛ ŋla mbʋ pɩpɔzʋʋ yɔ. Apostoloo Pɔɔlɩ tɩŋnɩ kɩɖaʋ nakʋyʋ yɔɔ nɛ ɛwɩlɩ-ɖʋ se pɩcɛyɩ siŋŋ se ɖɩlɛɣzɩ ɖe-wezuu caɣʋ. Ɛmawa se pɩpɔzʋʋ se ɖɩka ɖɛ-ɛyʋtʋ kɩbɩndʋ “sizika yɔɔ.” (Roma 6:6) Pʋ-tɔbʋʋ lɛ se ɖɩsɔɔlaa se ɖɩmaɣzɩnɩ Krɩstʋ kɩɖaʋ. Pɩpɔzʋʋ se ɖiyele wɛtʋ nɛ lakasɩ nzɩ Yehowa paɖɩɣ yɔ. Ye ɖɩkpɛzɩ nɩŋgbanzɩ nzɩ yɔ, mbʋ kaɣnɩ yebu nɛ ɖɩwɛɛnɩ ɛhʋyɛ kele kele ñɩnɖɛ nɛ ɖɩwɛɛnɩ lidaʋ ɖɔɖɔ se ɖɩkaɣ hiɣu wezuu maatɛŋ. (Yoh. 17:3; 1 Pɩy. 3:21) Tɔzɩ se Yehowa ɛɛkaɣ lɛɣzʋʋ ɛ-paɣtʋ nɛ ɛ-paɣtʋ kila se pɩla nɔɔ kʋɖʋmaɣ nɛ mbʋ ɖɩsɔɔlaa yɔ. Ɛlɛ ɖa pɩpɔzʋʋ se ɖɩlɛɣzɩ ɖɛ-ɛyʋtʋ nɛ pɩla nɔɔ kʋɖʋmaɣ nɛ ɛ-paɣtʋ nɛ ɛ-paɣtʋ kila.—Iza. 1:16-18; 55:9.

16. Ɛbɛ yɔɔ pɩwɛɛ se ŋtɛ ña-taa se ŋwoki pɩ-yɔɔ nɛ ŋlʋkɩnɩ tomnaɣ ɛjandʋ?

¹⁶ Wolo pɩ-yɔɔ nɛ ŋlʋkɩnɩ tomnaɣ ɛjandʋ. Halɩ pamɩyɩsɩɣ-ŋ lɩm nɛ pɩtɛ lɛ, pɩkaɣ pɔzʋʋ se ŋwolo pɩ-yɔɔ nɛ ŋlʋkɩnɩ tomnaɣ kɔɖɛyɩ. Payaɣ abalʋ nɔɔyʋ se Maurício. Iyele nɛ ɖɩna ɛ-kɩɖaʋ. Alɩwaatʋ ndʋ ɛɛkɛ pɩɣa evelaɣ yɔ, ɛpaɣzɩ sʋnʋʋ abalaa lalaa. Pʋwayɩ lɛ, ɛkatɩ Yehowa samaɣ nɛ ɛpaɣzɩ Bibl kpɛlɩkʋʋ. Ɛlabɩ lɛɣzɩtʋ e-wezuu caɣʋ taa lɛ, ɛha ɛ-tɩ nɛ pamɩyɩsɩ-ɩ lɩm pɩnaɣ 2002 taa. Paa Maurício paɣzʋʋ sɛʋ Yehowa yɔ pɩlabɩ pɩnzɩ sakɩyɛ yɔ, ɛyɔɔdaa se: “Pɩɩwɛɛ se malʋbɩnɩ kɔɖɛyɩ kɩdɛkɛdʋʋ alɩwaatʋ natʋyʋ taa.” Etiyele nɛ pitibi yɔɔɔ. Ɛlɛ ɛyɔɔdaa se: “Mehiɣ laŋɩyɛ hɛzʋʋ mbʋ pʋyɔɔ yɔ, manawa se ye malɩzaa se maayeki nɛ kɔɖɛyɩ kɩdɛkɛdʋʋ wɛɛnɩ ɖoŋ mɔ-yɔɔ yɔ, mɔn-tɔm pɩzɩɣ nɛ pɩkɛdɩnɩ Yehowa.” *

17. Ɛbɛ kpazɩɣ-ŋ ɖoŋ Nabiha kɩɖaʋ taa?

¹⁷ Tɩmnɩ Yehowa se ɛsɩnɩ-ŋ, taa liu e-fezuu kiɖeɖeu, taataa liu ña-maɣmaɣ ño-ɖoŋ. (Gal. 5:22; Fil. 4:6) Ye ɖɩsɔɔlaa se ɖɩhɔzɩ ɛyʋtʋ kɩbɩndʋ nɛ ɖɩtaapɩsɩ tɩ-wayɩ yɔ, pɩpɔzʋʋ se ɖɩñaɣ pana siŋŋ. Payaɣ halʋ nɔɔyʋ se Nabiha. Iyele nɛ ɖɩna ɛ-kɩɖaʋ. Ɛwɛnɩ pɩnzɩ  loɖo lɛ ɛ-caa ɖɛwa nɛ eyebi-i. Ɛyɔɔdaa se: “Piyeba nɛ manɩɩ siziŋ siŋŋ.” Nabiha wɛɛ nɛ ɛpaɣlɩɣ lɛ, ɛ-pana wɛɛ nɛ akpaɣ ɖoŋ nɛ ɛlakɩ puuyaɣ lakasɩ nɛ pɩkɩlɩɣ. Ɛpaɣzɩ tabakʋʋyaɣ pɛdʋʋ, pakpa-ɩ nɛ paɖʋ-ɩ salaka pɩnzɩ nasɩyɩ. Yehowa Aseɣɖe Tɩnaa mba powokaɣ salaka taa peeɖe yɔ, papaɣzɩnɩ-ɩ Bibl kpɛlɩkʋʋ. Nabiha paɣzɩ labʋ lɛɣzɩtʋ sɔsɔtʋ. Ɛyɔɔdaa se: “Pɩɩwɛ-m kɛlɛʋ se meyele lakasɩ kɩdɛkɛdɩsɩ nzɩ maawɛna yɔ sɩ-taa nasɩyɩ. Ɛlɛ pɩɩwɛ-m kaɖɛ se meyele sɩgaa ñɔʋ. Nabiha lʋba pɩcɛzɩ pɩnaɣ yɔɔ pʋcɔ nɛ ɛpɩzɩ nɛ eyele sɩgaa ñɔʋ. Ɛbɛ sɩnɩ-ɩ nɛ ɛla mbʋ? Ɛyɔɔdaa se: “Mantɩmaɣnɩ Yehowa ɖoŋ ɖoŋ nɛ mbʋ sɩnɩnɩ-m nɛ manpɩzɩ nɛ meyele.” Lɛɛlɛɛyɔ lɛ, eheyiɣ ɛyaa lalaa se: “Man-taa tɛma se ye manpɩzaa nɛ mɛlɛɣzɩ se pɩsa nɛ mɔn-tɔm kɛdɩnɩ Yehowa yɔ, paa anɩ ɛpɩzɩɣ nɛ ɛla mbʋ!” *

18. Ɛzɩ 1 Kɔrɛntɩ mba 6:9-11 yɔɔdʋʋ yɔ, ɛbɛ Ɛsɔ sɛyaa sakɩyɛ pɩzaa nɛ pala?

¹⁸ Kajalaɣ pɩnzɩ mɩnʋʋ taa, abalaa nɛ halaa mba Yehowa lɩzaa se pa nɛ Krɩstʋ pɔtɔɔ kewiyitu yɔ, pa-taa nabɛyɛ kaalabɩ lakasɩ kɩdɛkɛdɩsɩ nɛ pɩɖɛɛ. Paakɛ acɛyɛ laɖaa, abalaa mba pasʋʋnɩ abalaa yɔ nɛ halaa mba pasʋʋnɩ halaa yɔ, nɛ mɩlaa. Ɛlɛ Ɛsɔ fezuu kiɖeɖeu sɩnɩ-wɛ nɛ papɩzɩ nɛ pɛlɛɣzɩ pɛ-ɛyʋtʋ. (Kalɩ 1 Kɔrɛntɩ mba 6:9-11.) Mbʋ ɖɔɖɔ sɔnɔ, Bibl sɩnɩ ɛyaa miiliyɔɔwaa sakɩyɛ nɛ pala lɛɣzɩtʋ pe-wezuu caɣʋ taa. * Papɩzaa nɛ pawa wɛtʋ kɩdɛkɛdɩtʋ ndʋ tɩɩkam lila pa-taa yɔ. Pa-kɩɖaʋ wɩlɩɣ se ña ɖɔɖɔ ŋpɩzɩɣ nɛ ŋlɛɣzɩ ñɛ-ɛyʋtʋ nɛ ña-lakasɩ kɩdɛkɛdɩsɩ nɛ pɩsa nɛ ŋmʋna nɛ pamɩyɩsɩ-ŋ lɩm.

19. Ɛbɛ ɖɩkaɣ naʋ tɔm ñʋʋ ŋgʋ kɩkɔŋ yɔ kɩ-taa?

¹⁹ Mba pɔsɔɔlaa se paha pa-tɩ nɛ pamɩyɩsɩ-wɛ lɩm yɔ, pɩtasɩna se pɩpɔzʋʋ se pañaɣ pana nɛ pɔhɔzɩ pɛ-ɛyʋtʋ kɩbɩndʋ lɛ, pɩpɔzʋʋ ɖɔɖɔ se pañaɣ pana nɛ posuu ɛyʋtʋ kɩfatʋ. Tɔm ñʋʋ ŋgʋ kɩkɔŋ yɔ, kɩkaɣ-ɖʋ sɩnʋʋ nɛ ɖɩna ɛzɩma ɖɩpɩzɩɣ nɛ ɖɩla mbʋ yɔ, nɛ ɛzɩma lalaa pɩzɩɣ nɛ pasɩnɩ-ɖʋ yɔ.