Ɛyaa mba pakalɩɣ kɛdaɣ ŋga nɛ paakpakɩɣ alɩwaatʋ nɛ pamaɣzɩɣ kɔ-yɔɔ yɔ, pɔpɔzʋʋ tɔm ndʋ. Ɛlɛ, kɛdaɣ ŋga kɔyɔɔdʋʋ abalaa naalɛ tɔm nɛ paya-wɛ nɛ hɩɖɛ kʋɖʋmɖɩyɛ nɖɩ. Nɛ ye ɖɩkpaɣ alɩwaatʋ nɛ ɖɩtazɩ mbʋ pɩlaba yɔ pɩ-taa yɔ, ɖɩpɩzɩɣ nɛ ɖɩkpɛlɩkɩ lɔŋ nɩɩyɩ pɩ-taa.

Izrayɛɛlɩ Wiyaʋ Sɔɔlɩ kaawɛnɩ abalɩbiya lʋbɛ nɛ halɩbiya naalɛ. Sɔɔlɩ pɩyalʋ kajalaɣ ñɩnʋ lɛ Yonataanɩ. Pʋwayɩ lɛ, Wiyaʋ Sɔɔlɩ ɖaŋ Rizɩpa lʋlɩ-ɩ abalɩbɩɣa nakɛyɛ nɛ ɛyaa-kɛ se Mefiibosɛɛtɩ. Yonataanɩ ɖɔɖɔ kaaya ɛ-pɩyalʋ nɔɔyʋ se Mefiibosɛɛtɩ. Ye mbʋ, Wiyaʋ Sɔɔlɩ kaawɛnɩ pɩyalʋ nɔɔyʋ nɛ payaɣ-ɩ se Mefiibosɛɛtɩ, nɛ payaɣaɣ ɛ-sayɩ nɔɔyʋ ɖɔɖɔ nɛ hɩɖɛ kʋɖʋmɖɩyɛ nɖɩ.

Alɩwaatʋ natʋyʋ taa, Wiyaʋ Sɔɔlɩ kaakʋyɩ Gabawɔɔ ñɩma mba paawɛ Izrayɛɛlɩ mba hɛkʋ taa yɔ pɔ-yɔɔ nɛ ɛñaɣ pana se ɛɖɩzɩ-wɛ caɣ caɣ. Pɩɩwɛ ɛzɩ ɛɛkʋ pa-taa sakɩyɛ yɔ. Pɩnaɣaɣ kpayɩ kpayɩ se ɛ-lakasɩ nzɩ sɩtaatʋʋzɩ. Ɛbɛ yɔɔ? Mbʋ pʋyɔɔ yɔ, Yozuwee alɩwaatʋ taa, Izrayɛɛlɩ samaɣ taa sɔsaa kaaɖʋ laŋhɛzɩyɛ ɛgbɛyɛ nɛ Gabawɔɔ mba.—Yoz. 9:3-27.

Ɛgbɛyɛ nɖɩ, ɖɩɩkpɛndɩ ɖiɖiɣni tʋmɩyɛ labʋ Wiyaʋ Sɔɔlɩ alɩwaatʋ taa. Ɛlɛ, wiyaʋ tɩɖɔ ɛgbɛyɛ nɖɩ ɖɩ-yɔɔ, nɛ ɛñaɣ pana se ɛɖɩzɩ Gabawɔɔ mba caɣ caɣ. Mbʋ pɩlɩ pɩ-taa yɔ lɛ se “calɩm wɛ Sɔɔlɩ yɔɔ nɛ Sɔɔlɩ ɖɩɣa yɔɔ.” (2 Sam. 21:1) Pʋwayɩ lɛ, Daviid pɩsɩ wiyaʋ. Gabawɔɔ ñɩma mba pataakʋ-wɛ yɔ, peheyi Daviid kɩwɛɛkɩm sɔsɔm mbʋ pɩ-tɔm. Daviid pɔzɩ-wɛ mbʋ pɩpɔzʋʋ se pala nɛ pahɩzɩ Sɔɔlɩ kɩwɛɛkɩm sɔsɔm mbʋ nɛ pɩsa nɛ Yehowa wazɩ Izrayɛɛlɩ ɛjaɖɛ yɔ. Gabawɔɔ mba tɩpɔzɩ liidiye, ɛlɛ pɔpɔzɩ-ɩ se ɛcɛlɛ-wɛ abalʋ weyi ‘ɛmaɣzaɣ se ɛtɔyɩtʋʋ-wɛ’ yɔ ɛ-pɩyalaa lʋbɛ nɛ pakʋ-wɛ. Daviid tisaa nɛ ɛlabɩ-wɛ mbʋ pɔpɔzɩ-ɩ yɔ.—2 Sam. 21:2-6; Kɩg. 35:30, 31.

Alɩwaatʋ ndʋ tɩ-taa, Sɔɔlɩ nɛ ɛ-pɩyalʋ Yonataanɩ paasɩbɩ you taa, ɛlɛ Yonataanɩ pɩyalʋ Mefiibosɛɛtɩ ñaawɛ wezuu. Kɛgbɛdɩsaɣ nakɛyɛ kaatalɩ-ɩ ɛ-pɩjatʋ taa nɛ ɛpɩsɩ kaakalaɣ, nɛ ɛɛtaaɖʋ ɛ-cɔzɔ nesi alɩwaatʋ ndʋ ɛlɛ kaañaɣ pana se ɛɖɩzɩ Gabawɔɔ mba yɔ. Daviid nɛ Yonataanɩ paaɖʋ taabalɩyɛ ɛgbɛyɛ, nɛ ɛgbɛyɛ nɖɩ ɖɩwazaɣ Yonataanɩ lʋlʋʋ taa mba, nɛ Mefiibosɛɛtɩ ɖɔɖɔ kaawɛ pa-taa. (1 Sam. 18:1; 20:42) Kɛdaɣ ŋga kɔyɔɔdaa se: “Wiyaʋ [Daviid fɛɛ Mefiibosɛɛtɩ], Yonataanɩ pɩyalʋ, Sɔɔlɩ pɩyalʋ, ɖuutu ndʋ Daviid koɖuuni Yonataanɩ Sɔɔlɩ pɩyalʋ, [Yehowa] ɛsɩndaa yɔ tɩ-yɔɔ.”—2 Sam. 21:7.

Ɛlɛ, Daviid labɩ mbʋ Gabawɔɔ mba pɔzɩ-ɩ yɔ. Ɛcɛlɩ-wɛ Sɔɔlɩ pɩyalaa naalɛ, pa-taa lɛlʋ payaɣaɣ se Mefiibosɛɛtɩ, nɛ ɛcɛlɩ-wɛ ɖɔɖɔ Sɔɔlɩ sayɩnaa abalɩñɩma kagbanzɩ. (2 Sam. 21:8, 9) Daviid lakasɩ nzɩ, siyeba nɛ Sɔɔlɩ kaakpɛdɩ calɩm nɛ pɔɖɔɔ wɛɛ nɖɩ yɔ, ɖɩsɩɩ tɩnaɣ ɛjaɖɛ taa.

Mbʋ pɩlabɩ kɛdaɣ ŋga ka-taa yɔ, pɩkpɛlɩkɩɣ-ɖʋ lɔŋ kɩbaŋ nɩɩyɩ. Ɛsɔ paɣtʋ wɛ kpayɩ. Tɩtɔŋ se: “Pataakʋ piya sɩ-caanaa yɔɔ.” (Wp. 24:16) Ye Sɔɔlɩ pɩyalaa mba pa-naalɛ nɛ ɛ-sayɩnaa abalɩñɩma mba pa-kagbanzɩ pataaɖɔɔ wɛɛ yɔ, Yehowa taatisi se pakʋ-wɛ. Paɣtʋ ndʋ tɩtasɩ yɔɔdʋʋ se: “Paa weyi lɛ ɛkaɣ sɩbʋ ɛ-tɩtɩŋa ɛ-kɩwɛɛkɩm yɔɔ.” Pɩwɛ ɛzɩ Sɔɔlɩ lʋlʋʋ taa ñɩma lʋbɛ mba pakʋ-wɛ yɔ, paatɩŋnɩ nʋmɔʋ nakʋyʋ yɔɔ nɛ paɖʋ-ɩ nesi alɩwaatʋ ndʋ ɛñakaɣ pana se ɛɖɩzɩ Gabawɔɔ mba yɔ. Mbʋ pɩlɩ pɩ-taa yɔ lɛ se pa-lʋbɛ pasɩbɩ pa-lakasɩ kɩdɛkɛdɩsɩ yɔɔ.

Kɛdaɣ ŋga kawɩlɩɣ se ɛyʋ nɔɔyʋ ɛɛpɩzɩɣ nɛ ɛñɩnɩ kawanaɣ nɛ ɛla mbʋ pɩfɛyɩ ɖeu yɔ, nɛ ɛmaɣzɩɣ yaa ɛyɔɔdʋʋ se pɔtɔm se ɛnʋ ɛla mbʋ yɔɔ ɛlabɩ mbʋ. Eduuye naɖɩyɛ yɔɔdʋʋ lɔŋsɩnɖɛ tɔm tʋnɛ: “Cɔnɩ ña-naataŋ nʋmɔʋ taa, nɛ ña-nʋmɔŋ kpeekpe wɛɛ siɣsiɣ.”—Adu. 4:24-27; Efɛz. 5:15.