1-2. Ye ŋtɩtɛmtɩ ña-tɩ ñɔɔzʋʋ se ŋmʋna nɛ pamɩyɩsɩ-ŋ lɩm yɔ, ɛbɛ yɔɔ pɩtɩpɔzɩ se pitibi-ŋ yɔɔɔ? (Cɔnɩ takayaɣ huyuu yɔɔ kɩlɛmʋʋ.)

 YE ŊSƆƆLAA se ŋha ña-tɩ nɛ pamɩyɩsɩ-ŋ lɩm yɔ, ŋɖʋ ña-tɩ kaɖʋwa kɩbaŋa siŋŋ. Ŋñɔɔzɩ ña-tɩ se ŋkpɛzɩ nɩŋgbaŋaɣ ŋga lɛɛlɛɛyɔ? Ye ŋmaɣzɩɣ se ŋñɔɔzɩ ña-tɩ nɛ ye ɛgbɛyɛ taa ɛzʋtʋyaa etisaa yɔ, sɔɔndʋ ɛtaakpa-ŋ se ŋha ña-tɩ nɛ pamɩyɩsɩ-ŋ lɩm kigbeɣluu ŋgʋ kɩwɛnɩ ɛsɩndaa yɔ kɩ-taa. Ye ŋlabɩ mbʋ yɔ, ŋkaɣ hiɣu wazasɩ Yehowa sɛtʋ taa.

² Yaa peheyi-ŋ se pɩpɔzʋʋ se ŋɖaɣnɩ ɖɛnʋʋ ɛsɩndaa fezuu taa pʋcɔ nɛ pamɩyɩsɩ-ŋ lɩm? Yaa ña-maɣmaɣ ŋɖiɣzinaa se pɩpɔzʋʋ se ŋɖaɣnɩ ɖɛnʋʋ ɛsɩndaa? Ye mbʋ yɔ, pitaatibi-ŋ yɔɔɔ. Paa ŋkɛ pɩɣa yaa ɛyʋ sɔsɔ yɔ, ŋpɩzɩɣ nɛ ŋɖɛɛnɩ ɛsɩndaa nɛ ŋkpɛzɩ nɩŋgbaŋaɣ kɩcɛyaɣ ŋga.

3. Suwe Etiyoopii kaɖɩka nakɛyɛ pɔzɩ Filiipu, nɛ piyeki se ɖɩpɔzɩ tɔm ndʋ? (Tʋma Labʋ 8:36, 38)

³ Kalɩ Tʋma Labʋ 8:36, 38. Kɩyakʋ nakʋyʋ, Etiyoopii kaɖɩka nakɛyɛ pɔzɩ tɔm kɩbandʋ susuyu Filiipu se: «Ɛbɛ ɖaŋɩɣ-m se pataamɩyɩsɩ-m lɩm?» Etiyoopii abalʋ ɛnʋ, ɛsɔɔlɩ siŋŋ se pamɩyɩsɩ-ɩ lɩm; ɛlɛ ɛzɩ toovenim taa lɛ ɛɛtɛm ɛ-tɩ ñɔɔzʋʋ se ɛkpɛzɩ nɩŋgbaŋaɣ kɩcɛyaɣ ŋga?

4. Ɛzɩma Etiyoopii abalʋ wɩlaa se ɛɛtɛm ɛ-taa se ewoki pɩ-yɔɔ nɛ ɛkpɛlɩkɩɣ tɔm?

⁴ Etiyoopii abalʋ ɛnʋ «eewobi Yeruzalɛm se eluŋ Ɛsɔ tɛɛ.» (Tʋma 8:27) Ye mbʋ, abalʋ ɛnʋ ɛkɛɣnɩ sɩɩnaa layʋ, ɛlɛ ɛlɛɣzaa nɛ ɛpɩsɩ Yuuda mba Ɛsɔ sɛtʋ taa tʋ. Pɩtʋʋ fɛyɩ se ɛɛkpɛlɩkɩ Yehowa tɔm Ebree Masɩ kiɖeɖesi taa. Paa mbʋ yɔ, ɛɛsɔɔlɩ siŋŋ se  ɛtasɩ kpɛlɩkʋʋ tɔm nɛ pɩkɩlɩ. Toovenim taa lɛ, Filiipu katɩ abalʋ ɛnʋ habɩyɛ yɔɔ lɛ, ɛbɛ ɛna-ɩ eɖiɣni labʋ? Ɛɛwɛɛ nɛ ɛkalɩɣ nayʋ Izaayii takayaɣ kikpiyaɣ. (Tʋma 8:28) Pɩɩkɛ fezuu taa tɔɔnaɣ ŋga kɛwɛ yuŋ yɔ. Pɩtɩkɛ Bibl taa kajalaɣ wɩlɩtʋ natʋyʋ pazɩ ɖeke kaɖɩka ŋga kaasɔɔlaa se katɩlɩ, ɛlɛ kaasɔɔlaa se kowolo pɩ-yɔɔ nɛ kɛkpɛlɩkɩɣ tɔm.

5. Etiyoopii abalʋ kpɛlɩkɩ tɔm nɛ pɩtɛ lɛ, ɛbɛ ɛlaba?

⁵ Abalʋ ɛnʋ ɛɛkɛ kaɖɩka sɔsɔɔ nakɛyɛ Etiyoopii Abiɖe Kandaasɩ tɛɛ nɛ «ɛcɔŋnɩ ɛ-ñɩm kpeekpe yɔɔ.» (Tʋma 8:27) Ye mbʋ, pɩtʋʋ fɛyɩ se ɛlakaɣ tʋma sakɩyɛ nɛ pɩɖɔkaɣnɩ-ɩ siŋŋ. Paa mbʋ yɔ, ɛkpakaɣ alɩwaatʋ nɛ ɛsɛɣ Yehowa. Pɩtasɩna se ɛkpɛlɩkɩ toovenim lɛ, ɛɖɔm tɔm ndʋ ɛkpɛlɩkaa yɔ tɩ-yɔɔ. Pʋyɔɔ ɛkʋyɩnɩ Etiyoopii nɛ ɛɖɔ nʋmɔʋ kɩɖaɣlʋʋ se ewolo nɛ ɛsɛɛ Yehowa templo taa Yeruzalɛm. Nʋmɔʋ ŋgʋ kɩ-ɖɔm kpakaɣ alɩwaatʋ sakɩyɛ nɛ pɩpɔzaɣ ɖɔɖɔ liidiye sakɩyɛ, paa mbʋ yɔ abalʋ ɛnʋ ɛɛsɔɔlaa se ɛsɛɛ Yehowa paa pɩɩpɔzaa se ɛñaɣ pana siŋŋ yɔ.

6-7. Sɔɔlɩm mbʋ Etiyoopii abalʋ ɛnʋ ɛwɛnɩ Yehowa yɔɔ yɔ, ɛzɩma pɩwɛɛ nɛ pɩpaɣlɩɣ?

⁶ Etiyoopii abalʋ ɛnʋ, ɛkpɛlɩkɩ toovenim tɔm kɩfatʋ natʋyʋ Filiipu cɔlɔ nɛ tɩ-tɔm cɛyaa. Tɩ-taa natʋyʋ lɛ se ɛkpɛlɩkaa se Yesu kɛnɩ Mesiya. (Tʋma 8:34, 35) Ɛkpɛlɩkaa nɛ ɛtɩlɩ mbʋ Yesu labɩ-ɩ yɔ lɛ, pɩtʋʋ fɛyɩ se pitukuni ɛ-laŋɩyɛ siŋŋ. Ɛzɩma ɛkaɣ labʋ? Ɛpɩzaɣ se ewolo pɩ-yɔɔ nɛ ɛkɛ ɛyʋ weyi pañaŋɩ-ɩ yɔ Yuuda mba Ɛsɔ sɛtʋ taa. Ɛlɛ sɔɔlɩm mbʋ ɛɛwɛnɩ Yehowa nɛ ɛ-Pɩyalʋ pɔ-yɔɔ yɔ pɩpaɣlaa. Piseɣti-i nɛ ɛkpaɣ lɩmaɣzɩyɛ kɩcɛyɩyɛ naɖɩyɛ; nɖɩ lɛ se ɛha ɛ-tɩ nɛ pamɩyɩsɩ-ɩ lɩm nɛ ɛpɩsɩ Yesu Krɩstʋ wayɩ tɩŋɩyʋ. Filiipu kaanawa se abalʋ ɛnʋ ɛñɔɔzɩ ɛ-tɩ nɛ ɛmʋna se pamɩyɩsɩ-ɩ lɩm, pʋyɔɔ etisaa nɛ ɛmɩyɩsɩ-ɩ lɩm.

⁷ Ye ŋmaɣzɩnɩ Etiyoopii abalʋ ɛnʋ ɛ-kɩɖaʋ yɔ, ña ɖɔɖɔ ŋpɩzɩɣ nɛ ŋñɔɔzɩ ña-tɩ nɛ ŋmʋna se pamɩyɩsɩ-ŋ lɩm. Ña ɖɔɖɔ ŋkaɣ pɩzʋʋ nɛ ŋyɔɔdɩnɩ ña-laŋɩyɛ pilim se: «Ɛbɛ ɖaŋɩɣ-m se pataamɩyɩsɩ-m lɩm?» Iyele nɛ ɖɩna ɛzɩma ña ɖɔɖɔ ŋpɩzɩɣ nɛ ŋkpɛzɩ nɩŋgbanzɩ nzɩ abalʋ ɛnʋ ɛkpɛzaa yɔ; nzɩ yɔ: eewobi pɩ-yɔɔ nɛ ɛkpɛlɩkɩɣ tɔm, ɛɖɔŋaɣ tɔm ndʋ ɛkpɛlɩkaɣ yɔ tɩ-yɔɔ nɛ sɔɔlɩm mbʋ ɛɛwɛnɩ Ɛsɔ yɔɔ yɔ pɩɩwɛɛ nɛ pɩpaɣlɩɣ.

8. Yohanɛɛsɩ 17:3 yɔɔdʋʋ se pɩwɛɛ se ŋla we?

⁸ Kalɩ Yohanɛɛsɩ 17:3. Tɔm ndʋ Yesu yɔɔdɩ mayaɣ ŋga ka-taa yɔ, ndʋ sɩnɩnɩ-ŋ nɛ ŋkpaɣ lɩmaɣzɩyɛ se ŋkpɛlɩkɩɣ Bibl? Ndʋ sɩnɩnɩ ɖa-taa sakɩyɛ. Ɛlɛ, ɛzɩ tɔm kʋɖʋmtʋ ndʋ tɩwɩlɩɣ-ɖʋ ɖɔɖɔ se pɩwɛɛ se ɖiwolo pɩ-yɔɔ nɛ ɖɩkpɛlɩkɩɣ? Ɛɛɛ. Ðɩkaɣ wobu pɩ-yɔɔ nɛ ‘ɖɩtɩlɩɣ Ɛsɔ toovenim tʋ kʋɖʋm koŋ.’ (Ekl. 3:11; nwt) Ðɩkaɣ wobu pɩ-yɔɔ nɛ ɖɩkpɛlɩkɩɣ tɔm tam. Ðɩwɛɣ nɛ ɖɩkpɛlɩkɩɣ tɔm nɛ pɩkɩlɩɣ lɛ, ɖɩkaɣ ñɔtɩnʋʋ Yehowa nɛ pɩkɩlɩ.—Keɣa 72:28.

9. Ðɩtɩlɩɣ Bibl taa kajalaɣ wɩlɩtʋ nɛ pɩtɛ lɛ, ɛbɛ pɩpɔzʋʋ se ɖɩla?

⁹ Alɩwaatʋ ndʋ ɖɩpaɣzɩɣ kpɛlɩkʋʋ Yehowa tɔm yɔ, Bibl taa kajalaɣ wɩlɩtʋ ɖeke ɖɩpaɣzɩɣ kpɛlɩkʋʋ. Takayaɣ ŋga apostoloo Pɔɔlɩ ma Ebree mba yɔ ka-taa, ɛya kajalaɣ wɩlɩtʋ ndʋ se «kajalaɣ wondu.» Etaaniŋ «kajalaɣ wɩlɩtʋ» ndʋ, ɛlɛ ɛkpaɣ-tʋ nɛ ɛmaɣzɩnɩ naalɩm mbʋ pɩsɩɣnɩ pɩɣa se kapaɣlɩ yɔ. (Ebr. 5:12; 6:1) Eseɣti ɖɔɖɔ Krɩstʋ mba tɩŋa se powolo pɩ-yɔɔ nɛ pɛkpɛlɩkɩɣ nɛ pɛcɛzɩ kajalaɣ wɩlɩtʋ ndʋ nɛ pɛkpɛlɩkɩ Ɛsɔtɔm taa toovenim tɔm ndʋ tilimaa yɔ. Ŋsɔɔlɩ siŋŋ se ŋkpɛlɩkɩ Bibl taa wɩlɩtʋ ndʋ tilimaa yɔ? Ŋtisiɣ faaa se ŋwolo pɩ-yɔɔ nɛ ŋpaɣlɩɣ, pʋ-tɔbʋʋ lɛ se ŋwolo pɩ-yɔɔ nɛ ŋkpɛlɩkɩɣ Yehowa nɛ ɛ-kaɖʋsɩ pɔ-yɔɔ tɔm na?

10. Ɛbɛ yɔɔ pɩwɛ ɛyaa nabɛyɛ kaɖɛ se pɛkpɛlɩkɩ tɔm?

¹⁰ Ɛlɛ, pɩwɛ ɖa-taa sakɩyɛ kaɖɛ se pɛkpɛlɩkɩ tɔm. Ɛzɩma pɩwɛ ñɔ-hɔɔlʋʋ taa? Sukuli taa, ŋkpɛlɩkɩ tɔm kalʋʋ nɛ tɔm kpɛlɩkʋʋ camɩyɛ na? Tɔm kpɛlɩkʋʋ haɣaɣ-ŋ taa leleŋ nɛ tɩwazaɣ-ŋ? Yaa ŋmaɣzɩɣ se takayɩsɩ taa tɔm kpɛlɩkʋʋ hɔɔlʋʋ taa lɛ, ŋfɛyɩ niye? Ye mbʋ yɔ, pɩtɩkɛ ñe-ɖeke ŋwɛnɩ wɛtʋ ndʋ tɩ-taa. Ɛlɛ, Yehowa pɩzɩɣ nɛ ɛsɩnɩ-ŋ. Ɛtalɩ pilim nɛ ɛkɛ Wɩlɩyʋ weyi ɛ-wayɩ fɛyɩ yɔ.

11. Ɛzɩma Yehowa wɩlɩɣ se ɛkɛ «Wɩlɩyʋ Sɔsɔ»?

¹¹ Yehowa ya ɛ-tɩ se «ñɔ-lɔŋ wɩlɩyʋ [yaa ña-Wɩlɩyʋ Sɔsɔ.]» (Iza. 30:20, 21) Ɛkɛ Wɩlɩyʋ weyi ɛwɛ suuɖu, ɛlakɩ camɩyɛ lakasɩ nɛ ɛnɩɣ ɛyaa tɔm taa yɔ. Ɛkaŋ ɛ-ɛsa e-sukuli piya wɛtʋ kɩbandʋ yɔɔ na. (Keɣa 129:3) Nɛ ɛɛɖaŋɩɣ kpa se ɖɩla nɛ pɩcɛzɩ mbʋ ɖɩpɩzɩɣ labʋ yɔ pɩ-yɔɔ. Tɔzɩ se ɛnʋ labɩnɩ ña-fɩtɩyɩm nɛ pɩkɛ kʋjɔʋ ŋgʋ kɩ-wayɩ fɛyɩ yɔ. (Keɣa 138:14) Ðɩsɔɔlɩ siŋŋ se ɖɩkpɛlɩkɩ tɔm. Ða-Lɩzɩyʋ sɔɔlaa se ɖiwolo pɩ-yɔɔ nɛ ɖɩkpɛlɩkɩɣ tɔm tam nɛ ɛsɔɔlaa se kpɛlɩkʋʋ ɛha-ɖʋ taa leleŋ. Pʋyɔɔ lɛ, pɩkɛɣnɩ lɔŋsɩnɖɛ se sɔnɔ sɔnɔ ‘ɖɩsɔɔlɩ Bibl taa toovenim tɔm siŋŋ.’ (1 Pɩy. 2:2) Ðʋ ña-tɩ kaɖʋsɩ nzɩ ŋpɩzɩɣ nɛ ŋtalɩ yɔ, nɛ ñɔɔnɩ ɖʋtʋ ndʋ ŋlaba nɛ ŋkalɩɣ Bibl nɛ ŋkpɛlɩkɩɣ-kʋ yɔ. (Yoz. 1:8) Yehowa kaɣ-ŋ sɩnʋʋ nɛ ŋsɔɔlɩ kalʋʋ ɛ-tɔm nɛ ŋsɔɔlɩ ɖɔɖɔ tɩ-kpɛlɩkʋʋ nɛ pɩkɩlɩ.

12. Ɛbɛ yɔɔ pɩpɔzʋʋ se ɖɩkpɛlɩkɩ Yesu wezuu caɣʋ nɛ ɛ-Ɛsɔ sɛtʋ tʋmɩyɛ tɔm?

¹² Kpakɩɣ alɩwaatʋ ɖoŋ ɖoŋ nɛ ŋmaɣzɩɣ Yesu wezuu caɣʋ nɛ ɛ-Ɛsɔ sɛtʋ tʋmɩyɛ yɔɔ. Ye ɖɩsɔɔlaa se ɖɩsɛɛ Yehowa yɔ, pɩcɛyaa se ɖɩtɩŋ Yesu nɩŋgbanzɩ taa ɖeyi ɖeyi, kɔzɩ kɔzɩ alɩwaatʋ kaɖɛ ñɩndʋ tʋnɛ tɩ-taa. (1 Pɩy. 2:21) Yesu heyi ɛ-tɔmkpɛlɩkɩyaa se pakaɣ katʋʋ kala. (Luka 14:27, 28) Paa mbʋ yɔ, ɛ-taa kaatɛma se ɛ-wayɩ tɩŋɩyaa toovenim mba kaɣ pɩzʋʋ nɛ powolo pɩ-yɔɔ nɛ pɔɖɔkɩ pe-siɣsiɣ wɛtʋ Ɛsɔ ɛsɩndaa ɛzɩ ɛ-maɣmaɣ ɛɛlabʋ yɔ. (Yoh. 16:33) Kpɛlɩkɩ Yesu wezuu caɣʋ tɔm tete, nɛ ŋɖʋ ña-tɩ kaɖʋwa se ŋmaɣzɩɣnɩ-ɩ ñe-wezuu caɣʋ taa paa evemiye nɖɩ.

13. Ɛbɛ pɩwɛɛ se ŋwolo pɩ-yɔɔ nɛ ŋpɔzʋʋ Yehowa, nɛ ɛbɛ yɔɔ?

¹³ Ye ɖɩwɛnɩ sɩmtʋ yɔ, pi-ɖeke pɩtɩmaɣ. Lɩmaɣzɩyɛ nɖɩ ɖɩ-yɔɔ pɩpɔzʋʋ-ŋ sɩmtʋ yɔ, nɖɩ lɛ se pɩsɩɣnɩ-ŋ se ŋkpɛlɩkɩ tɔm sakɩyɛ Yehowa yɔɔ nɛ pɩkɩlɩ nɛ ŋñaɣ pana nɛ ŋwɛɛnɩ wɛtʋ kɩbandʋ ndɩ ndɩ. Tɩ-taa natʋyʋ lɛ se ŋsɔɔlɩ-ɩ nɛ ŋwɛɛnɩ tisuu ɛ-yɔɔ. (1 Kɔr. 8:1-3) Ŋwɛɣ nɛ ŋkpɛlɩkɩɣ tɔm lɛ, wolo pɩ-yɔɔ nɛ ŋpɔzʋʋ Yehowa se ɛsɩnɩ-ŋ nɛ ŋwɛɛnɩ tisuu nɛ pɩkɩlɩ. (Luka 17:5) Ecosuu adɩma ana a-yɔɔ faaa. Ye toovenim mbʋ ŋtɩlɩ ɖɛ-Ɛsɔ yɔɔ yɔ, mbʋ ɛkɛnɩ ñe-tisuu tigiɖe yɔ, pɩkaɣ-ŋ sɩnʋʋ nɛ ŋɖɛɛnɩ ɛsɩndaa nɛ pɩkɩlɩ.—Yak. 2:26.

14. Ɛzɩma apostoloo Pɩyɛɛrɩ ñɩɣ niye se pɩcɛyaa se ɖɩɖɔ tɔm ndʋ ɖɩkpɛlɩkɩɣ yɔ tɩ-yɔɔ? (Cɔnɩ ɖɔɖɔ kɩlɛmʋʋ.)

¹⁴ Apostoloo Pɩyɛɛrɩ ñɩɣ niye se pɩcɛyɩ siŋŋ se Krɩstʋ wayɩ tɩŋɩyaa iwolo pɩ-yɔɔ nɛ pɔɖɔŋ tɔm ndʋ pɛkpɛlɩkɩɣ yɔ tɩ-yɔɔ. Ɛlabɩnɩ tʋmɩyɛ  Bibl taa kɛdaɣ ŋga kɔyɔɔdʋʋ Noowa tɔm yɔ. Yehowa kaaheyi Noowa se ɛkaɣ tɩŋnʋʋ tɛʋ sɔsɔʋ nakʋyʋ yɔɔ nɛ ɛɖɩzɩ ɛyaa kɩdɛkɛdaa mba paawɛ ɛ-alɩwaatʋ taa yɔ. Noowa nɛ ɛ-hɔʋ patɩlʋʋ se tɛʋ sɔsɔʋ nakʋyʋ kaɣ nɩʋ yɔ, pi-ɖeke pɩtaapɩzɩɣ se pɩsɩnɩ-wɛ se pehiɣ ñʋʋ yabʋ. Taasɔɔ se Pɩyɛɛrɩ yɔɔdaɣ alɩwaatʋ ndʋ tɩkɔm pʋcɔ nɛ tɛʋ sɔsɔʋ nɩɩ yɔ tɩ-tɔm na, pʋ-tɔbʋʋ se «alɩwaatʋ ndʋ pasakaɣ aɖakaɣ» yɔ. (1 Pɩy. 3:20) Noowa nɛ ɛ-hɔʋ pasaɣ aɖakaɣ nakɛyɛ, pʋ-tɔbʋʋ se mɛlɛ sɔsɔʋ nakʋyʋ, nɛ patɩŋnɩ pɩ-yɔɔ nɛ pawɩlɩ se pɔɖɔm tɔm ndʋ Ɛsɔ heyi-wɛ yɔ tɩ-yɔɔ. (Ebr. 11:7) Pʋwayɩ lɛ, Pɩyɛɛrɩ kpaɣ mbʋ Noowa laba yɔ nɛ ɛmaɣzɩnɩ lɩm mɩyɩsʋʋ. Ɛmawa se: «Lɩm mɩyɩsʋʋ mbʋ pɩnɩɣzɩnɩ lakasɩ nzɩ yɔ, pɩyakɩ mɩ-ñʋʋ ɖɔɖɔ lɛɛlɛɛyɔ.» (1 Pɩy. 3:21) Ye mbʋ, ɖɩpɩzɩɣ nɛ ɖɩkpaɣ mbʋ ŋwɛɛ nɛ ŋlakɩ lɛɛlɛɛyɔ se ŋñɔɔzɩ ña-tɩ nɛ ŋmʋna nɛ pamɩyɩsɩ-ŋ lɩm yɔ nɛ ɖɩmaɣzɩnɩ mbʋ Noowa nɛ ɛ-hɔʋ palabɩ pɩnzɩ sakɩyɛ nɛ pasaɣ aɖakaɣ yɔ. Pɩsa nɛ ŋñɔɔzɩ ña-tɩ nɛ ŋmʋna nɛ pamɩyɩsɩ-ŋ lɩm lɛ, ɛbɛ pɩpɔzʋʋ se ŋla?

15. Ɛzɩma ɖɩwɩlɩɣ se ɖikpiɖi siŋŋ?

¹⁵ Mbʋ pɩpɔzʋʋ se ɖɩla yɔ pɩ-taa nabʋyʋ lɛ se pɩwɛɛ se ɖikpiɖi ɖa-kɩwɛɛkɩm yɔɔ siŋŋ. (Tʋma 2:37, 38) Ye ɖikpiɖaa siŋŋ yɔ, pɩkaɣ yebu nɛ ɖɩla lɛɣzɩtʋ siŋŋ. Ŋyebi labʋ lakasɩ nzɩ payɩ sɩɩkɛdɩɣnɩ Yehowa yɔ, ɛzɩ wezuu kɩdɛkɛdʋʋ caɣʋ, tabakʋʋyaɣ ñɔʋ, kʋzɔɔtʋ tɔm yɔɔdʋʋ yaa tɔm ndʋ tɩɖʋʋ ɖɩwɩzɩyɛ yɔ tɩ-yɔɔdʋʋ mbʋ yɔ? (1 Kɔr. 6:9, 10; 2 Kɔr. 7:1; Efɛz. 4:29) Ye ŋtɩlabɩtɩ mbʋ yɔ, wolo pɩ-yɔɔ nɛ ŋñaɣ pana nɛ ŋlɛɣzɩ. Yɔɔdɩnɩ weyi ɛkpɛlɩkɩɣnɩ-ŋ Bibl yɔ, yaa pɔzɩ ɛgbɛyɛ taa ɛzʋtʋyaa se pasɩnɩ-ŋ nɛ patasɩ-ŋ lɔŋ. Ye ŋkɛ pɩɣa evelaɣ nɛ ŋkpɛndɩ ŋwɛ ña-lʋlɩyaa cɔlɔ yɔ, wolo pɩ-yɔɔ nɛ ŋpɔzʋʋ-wɛ se pasɩnɩ-ŋ nɛ ŋyele labʋ lakasɩ nzɩ payɩ sɩpɩzɩɣ nɛ sɩɖɩɣ-ŋ nʋmɔʋ se ŋtaaha ña-tɩ nɛ pamɩyɩsɩ-ŋ lɩm yɔ.

16. Fezuu taa ɖʋtʋ kɩbandʋ ndʋ pɩpɔzʋʋ se ɖɩwɛɛna yɔ, tɩ-taa natʋyʋ lɛ ndʋ?

¹⁶ Pɩcɛyaa ɖɔɖɔ se ɖɩwɛɛnɩ fezuu taa ɖʋtʋ kɩbandʋ nɛ ɖɩɖɔŋ tɩ-yɔɔ. Pɩ-taa nabʋyʋ lɛ se pɩwɛɛ se ɖiwoki Krɩstʋ mba kediɣzisi nɛ ɖicosuu tɔm sɩ-taa. (Ebr. 10:24, 25) Nɛ alɩwaatʋ ndʋ ŋmʋʋna nɛ ŋpaɣzɩ tɔm susuu yɔ, ñaɣ pana nɛ ŋlakɩ mbʋ ɖoŋ ɖoŋ. Ŋwɛɣ nɛ ŋsusuu tɔm nɛ pɩkɩlɩɣ lɛ, tɔm susuu kaɣ-ŋ kɛdɩnʋʋ nɛ pɩkɩlɩ. (2 Tim. 4:5) Ye ŋkɛ pɩɣa evelaɣ nɛ ŋkpɛndɩ  ŋwɛ ña-lʋlɩyaa cɔlɔ yɔ, pɔzɩ ña-tɩ se: ‘Pɩpɔzʋʋ se ma-lʋlɩyaa ɩtɔzʋʋ-m se mowoki kediɣzisi yaa monsusuu tɔm na? Yaa ma-maɣmaɣ malakɩnɩ mbʋ?’ Ye ŋlakɩ mbʋ ña-maɣmaɣ yɔ, ŋwɩlɩɣ se ŋwɛnɩ tisuu nɛ ŋwɩlɩɣ ɖɔɖɔ se ŋsɔɔlɩ Yehowa nɛ ŋwɛnɩ ɛsɩmɩyɛ ɛ-yɔɔ. Pɩkɛ ‘lakasɩ nzɩ sɩwɩlɩɣ se ŋñɔnɩ Ɛsɔ yɔ’ pʋ-tɔbʋʋ se pɩkɛ kʋjɔŋ weyi ŋlakɩ Yehowa yɔ. (2 Pɩy. 3:11; Ebr. 13:15) Kʋjɔŋ weyi payɩ ɖɩlakɩ ɖɛ-Ɛsɔ faaa nɛ paañɩkɩɣ ɖɔ-yɔɔ kɩñɩʋ yɔ, ɩkɛdɩɣnɩ-ɩ. (Kpaɣ-tʋ nɛ ŋmaɣzɩnɩ 2 Kɔrɛntɩ mba 9:7.) Ðɩlakɩ mbʋ, mbʋ pʋyɔɔ yɔ, alɩwaatʋ ndʋ ɖɩhaɣ Yehowa mbʋ ɖɩwɛna nɛ pɩkpaɖɩ ɖeu yɔ, pɩhaɣ-ɖʋ taa leleŋ.

17-18. Wɛtʋ kɩbandʋ ndʋ kaɣ-ŋ sɩnʋʋ nɛ ŋɖɛɛnɩ ɛsɩndaa nɛ pamɩyɩsɩ-ŋ lɩm, nɛ ɛbɛ yɔɔ? (Maatiyee 22:37)

¹⁷ Ŋwɛɣ nɛ ŋɖɛɣnɩ ɛsɩndaa se ŋmʋna nɛ pamɩyɩsɩ-ŋ lɩm lɛ, ŋkaɣ katʋʋ kala. Tisuu kɩfam mbʋ ŋwɛna yɔ pʋyɔɔ lɛ, ɛyaa nabɛyɛ pɩzɩɣ nɛ pohoŋi-ŋ nɛ halɩ papɩzɩɣ nɛ pakaɖɩnɩ-ŋ yaa panazɩ-ŋ. (2 Tim. 3:12) Ŋwɛɣ nɛ ŋñakɩ pana se ŋyele labʋ lakasɩ kɩdɛkɛdɩsɩ nasɩyɩ lɛ, nabʋyʋ taa pɩtɩla ŋɖaɣnɩɣ labʋ lakasɩ nzɩ. Yaa pɩtɩla yɔ, pɩlakɩ-ŋ ɛzɩ ŋfɛyɩ suuɖu yɔ nɛ ña-lɩmaɣza taa sidiɣ mbʋ pʋyɔɔ yɔ kaɖʋwa ŋga ŋwɛna se ŋhaɣ ña-tɩ nɛ pamɩyɩsɩ-ŋ lɩm yɔ, pɩwɛ ɛzɩ ŋŋtalɩɣ-kɛ lɔŋ yɔ. Ɛbɛ kaɣ-ŋ sɩnʋʋ nɛ ŋɖɔkɩ kpam? Wɛtʋ kɩbandʋ natʋyʋ, ndʋ lɛ sɔɔlɩm mbʋ ŋwɛnɩ Yehowa yɔɔ yɔ.

¹⁸ Sɔɔlɩm mbʋ ŋwɛnɩ Yehowa yɔɔ yɔ pɩkɛ wɛtʋ kɩbandʋ, nɛ wɛtʋ kɩbandʋ ndʋ payɩ ŋwɛna yɔ tɩ-taa lɛ ndʋ kpaɖɩna. (Kalɩ Maatiyee 22:37.) Ye ŋsɔɔlɩ Ɛsɔ siŋŋ yɔ, pɩpɩzɩɣ pɩsɩnɩ-ŋ nɛ ŋlʋbɩnɩ kala wena ŋkatɩɣ ñe-wezuu caɣʋ taa yɔ nɛ ŋwa. Ðoŋ ɖoŋ lɛ, Bibl yɔɔdʋʋ se Yehowa wɛnɩ sɔɔlɩm siɣsiɣ ñɩmbʋ ɛ-sɛyaa yɔɔ. Sɔɔlɩm siɣsiɣ ñɩmbʋ tɔbʋʋ lɛ se ɛɛkaɣ lɔʋ ɛ-sɛyaa kaaʋ yaa ɛɛkaɣ-wɛ yebu sɔɔlʋʋ kaaʋ. (Keɣa 99:5) Ɛsɔ lɩzɩ-ŋ ɛ-lɛzʋʋ. (Kiɖe 1:26) Ɛzɩma ŋpɩzɩɣ nɛ ŋlɩzɩ sɔɔlɩm mbʋ pɩ-ɖɔndɩ nɛ ŋwɩlɩ?

19. Mbʋ payɩ Yehowa lakɩ-ŋ yɔ, ɛzɩma ŋpɩzɩɣ ŋla nɛ ŋwɛɛnɩ ɛsɩmɩyɛ pɩ-yɔɔ nɛ pɩkɩlɩ? (Galaatii mba 2:20)

¹⁹ Paɣzɩnɩ ɛsɩmɩyɛ. (1 Tes. 5:18) Paa evemiye nɖɩ lɛ, pɔzɩ ña-tɩ se: ‘Ɛzɩma Yehowa lɩzɩ sɔɔlɩm nɛ ɛwɩlɩ-m?’ Pʋwayɩ lɛ, tɔzɩ nɛ ŋsɛɛ Yehowa se ɛlabaɣ lɛ ña-adɩma taa, yɔɔdɩ mbʋ ɖeyi ɖeyi ɛlabɩ-ŋ yɔ pɩ-tɔm. Ɛzɩ apostoloo Pɔɔlɩ kaaɖiɣzinuu se ɛ-maɣmaɣ Yehowa labɩ kɩbandʋ yɔ, ña ɖɔɖɔ nɩɩ pɩ-taa se Yehowa labɩ ña-maɣmaɣ kɩbandʋ mbʋ pʋyɔɔ yɔ ɛsɔɔlɩ-ŋ. (Kalɩ Galaatii mba 2:20.) Pɔzɩ ña-tɩ se: ‘Ma ɖɔɖɔ mɔnsɔɔlaa se mawɩlɩ-ɩ se mɔnsɔɔlɩ-ɩ?’ Sɔɔlɩm mbʋ ŋwɛnɩ Yehowa yɔɔ yɔ, pɩkaɣ-ŋ  sɩnʋʋ nɛ ŋwolo pɩ-yɔɔ nɛ ŋkaɖɩnɩ takɩm nɛ ŋɖɔkɩ ña-laŋɩyɛ kala taa. Pɩkaɣ-ŋ seɣtuu nɛ ŋñɔɔnɩ fezuu taa tʋma kpam, nɛ ŋwolo pɩ-yɔɔ nɛ ŋwɩlɩɣ ña-Caa se ŋsɔɔlɩ-ɩ paa evemiye nɖɩ.

20. Ɛbɛ pɩpɔzʋʋ se ŋla nɛ ŋha ña-tɩ Yehowa, nɛ ɛbɛ yɔɔ pɩkɛ lɩmaɣzɩyɛ nɖɩ ɖɩ-tɔm cɛyaa yɔ?

²⁰ Alɩwaatʋ kaaɖɛɣ lɛ, sɔɔlɩm mbʋ ŋwɛnɩ Yehowa yɔɔ yɔ, pɩkaɣ-ŋ seɣtuu se ŋla ŋgee adɩma naayɛ. Adɩma ana a-taa ŋkaɣ ña-tɩ haʋ Ɛsɔ. Tɔzɩ se alɩwaatʋ ndʋ ŋhaɣ ña-tɩ Yehowa yɔ, ŋwɛɣnɩ lidaʋ kɩbaŋʋ kʋnɛ: Ŋpɩsɩɣ ɛ-pʋyʋ tam tam. Alɩwaatʋ ndʋ ŋhaɣ ña-tɩ Yehowa yɔ, pɩwɩlɩɣ se ŋɖuwaa se ŋsɛɣ-ɩ alɩwaatʋ kɩbandʋ nɛ alɩwaatʋ kaɖɛ ñɩndʋ taa. Wiɖiyi pɩɩkaɣ pɔzʋʋ kpa se ŋtasɩ ɖuu. Toovenim taa lɛ, alɩwaatʋ ndʋ ɖɩhaɣ ɖa-tɩ Yehowa yɔ, ɖɩwɛɛ nɛ ɖɩkpakɩɣ lɩmaɣzɩyɛ kɩcɛyɩyɛ naɖɩyɛ. Ɛlɛ maɣzɩ tɔm tʋnɛ tɩ-yɔɔ nɛ ŋna: Ŋkaɣ kpaɣʋ lɩmaɣza sakɩyɛ ñe-wezuu caɣʋ taa, nɛ a-taa naayɛ kaɣ kɛʋ lɩmaɣza kɩbana siŋŋ; paa mbʋ yɔ lɩmaɣzɩyɛ nɖɩ ŋkpakɩɣ se ŋhaɣ ña-tɩ Yehowa yɔ, ɖɩkpaɖɩ lɩmaɣza ana a-tɩŋa. (Keɣa 49:14) Sataŋ kaɣ ñaɣʋ pana se eyele nɛ sɔɔlɩm mbʋ ŋwɛnɩ Yehowa yɔɔ yɔ pɩcamɩ, nɛ ɛtaɣ liu se ŋkaɣ lesuu ña-cɩŋgɩlɩm wɛtʋ. Taayele nɛ ɛwa kaaʋ. (Yɔɔb 27:5) Sɔɔlɩm sɔsɔm mbʋ ŋwɛnɩ Yehowa yɔɔ yɔ, pɩkaɣ-ŋ sɩnʋʋ nɛ ŋɖɔ ɖuutu ndʋ ŋɖuwaa se ŋsɛɣ-ɩ yɔ tɩ-yɔɔ nɛ ŋwolo pɩ-yɔɔ nɛ ŋñɔtʋʋnɩ ña-Caa weyi ɛwɛ ɛsɔdaa yɔ nɛ pɩkɩlɩ.

21. Ɛbɛ yɔɔ ɖɩpɩzɩɣ nɛ ɖɩyɔɔdɩ se lɩm mɩyɩsʋʋ tɩkɛ Krɩstʋ tʋ wezuu caɣʋ ɖɩdɛnɖɛ ɛlɛ pɩkɛ kɩ-ɖɩbazɩyɛ?

²¹ Ŋhaɣ ña-tɩ Yehowa nɛ pɩtɛ lɛ, yɔɔdɩnɩ ñɛ-ɛgbɛyɛ taa ɛzʋtʋyaa nɛ ŋheyi-wɛ se ŋsɔɔlaa se pamɩyɩsɩ-ŋ lɩm. Ɛlɛ taasɔɔ kaaʋ se lɩm mɩyɩsʋʋ tɩkɛ Krɩstʋ tʋ wezuu caɣʋ ɖɩdɛnɖɛ, ɛlɛ pɩkɛ kɩ-ɖɩbazɩyɛ. Kpaɣnɩ puwiye lɛ, pɩwɛɛ se ŋwolo pɩ-yɔɔ nɛ ŋsɛɣ Yehowa ñe-wezuu caɣʋ taa tam. Pʋyɔɔ lɛ, cɛyɩsɩ sɔɔlɩm mbʋ ŋwɛnɩ ña-Caa yɔɔ yɔ lɛɛlɛɛyɔ. Ðʋ ña-tɩ kaɖʋsɩ nɛ pɩsa nɛ sɔɔlɩm mbʋ ŋwɛnɩ ɛ-yɔɔ yɔ pɩpaɣlɩɣ paa evemiye nɖɩ. Ye ŋlakɩ mbʋ yɔ, pɩkaɣ-ŋ seɣtuu nɛ ŋha ña-tɩ nɛ pamɩyɩsɩ-ŋ lɩm. Evemiye nɖɩ pamɩyɩsɩɣ-ŋ lɩm yɔ, ɖɩkaɣ kɛʋ evemiye kɩbanɖɛ kpem; ɛlɛ, ɖɩkaɣ kɛʋ ɖɩbazɩyɛ na. Sɔɔlɩm mbʋ ŋwɛnɩ Yehowa nɛ ɛ-Pɩyalʋ pɔ-yɔɔ yɔ, tɛtɛ nɛ piwolo pɩ-yɔɔ nɛ pɩpaɣlɩɣ tam!