Abalʋ weyi payaɣaɣ-ɩ se «ñɩnʋ [yaa Akele]» yɔ, ɛbɛ yɔɔ ɛyɔɔdaa se ye ɛkpaɣ Ruti yɔ piyeki nɛ ‘elesi’ ɛ-ñɩm? (Ruti 4:1, 6)

Bibl alɩwaatʋ taa, ye abalʋ nɔɔyʋ ɛkpaɣ halʋ nɛ ɛsɩ nɛ ɛfɛyɩnɩ piya yɔ, pɩɩpɔzaa se pocosi tɔm pɔzʋʋ pʋnɛ pɩ-yɔɔ: Ɛbɛ pɩtɛŋnɩ ɛ-tɛtʋ? Ɛ-hɔʋ hɩɖɛ ɖɩŋ nɛ pɩla pɩtɛma? Moyizi Paɣtʋ sɩɣaɣna se pocosi tɔm ndʋ tɩ-yɔɔ.

Ye abalʋ nɔɔyʋ ɛsɩba yaa ye ɛpɩsɩ kʋñɔndʋ nɛ ɛpɛdɩ ɛ-tɛtʋ yɔ, ɛbɛ pɩtɛŋnɩ-tʋ? E-koobu yaa ɛ-hɔʋ taa tʋ weyi ɛñɔtɩnɩ-ɩ kpam yɔ, ɛpɩzaɣ se ɛɖaɣnɩ-tʋ yabʋ. Piyekaɣ se tɛtʋ ndʋ tɩtaalɩɩ hɔʋ nesi tɛɛ.—Lev. 25:23-28; Kɩg. 27:8-11.

Ɛzɩma palakaɣ se pɩsa nɛ abalʋ weyi ɛsɩba yɔ ɛ-hɔʋ hɩɖɛ etaale? Pɩɩwɛɛ se sɩɖʋ koobu ɛkpaɣ sɩɖʋ halʋ, nɛ mbʋ pɩɩlabɩ Ruti hɔɔlʋʋ taa. E-koobu kpakɩɣ ɛ-halʋ nɛ ɛlʋlɩ-ɩ pɩɣa nɛ payaa-kɛ nɛ sɩɖʋ ɛnʋ ɛ-hɩɖɛ nɛ pɛcɛlɩ-kɛ ɛ-ñɩm. Pɩɩkɛ sɔɔlɩm ɖʋtʋ, nɛ tɩsɩɣaɣna ɖɔɖɔ se pɔcɔnɩ lelu yɔɔ.—Wp. 25:5-7; Mat. 22:23-28.

Iyele nɛ ɖɩna Nawomii kɩɖaʋ. Ɛɛwalɩ abalʋ weyi payaɣ se Elimelɛɛkɩ yɔ. Elimelɛɛkɩ nɛ ɛ-pɩyalaa mba pa-naalɛ pasɩba lɛ, pɩkazɩ Nawomii ɖeke, ɛfɛyɩnɩ nɔɔyʋ se ɛcɔnɩ ɛ-yɔɔ. (Ruti 1:1-5) Nawomii pɩsɩ Yuuda lɛ, eheyi e-wolu Ruti se ɛpɔzɩ Bowaazɩ se ɛya pɛ-tɛtʋ. Ɛɛkɛ Elimelɛɛkɩ hɔʋ taa tʋ. (Ruti 2:1, 19, 20; 3:1-4) Bowaazɩ nawa se hɔʋ taa tʋ lɛlʋ wɛɛ, Bibl ya-ɩ se «Akele», nɛ ɛkɛ hɔʋ taa tʋ weyi ɛñɔtɩnɩ-wɛ nɛ pɩkpaɖɩ yɔ. Pʋyɔɔ lɛ, ɛnʋ wɛnɩnɩ kajalaɣ waɖɛ se ɛlɩzɩ se ɛyakɩ-tʋ.—Ruti 3:9, 12, 13.

Kiɖe tɛɛ lɛ, «Akele» kaasɔɔlɩ faaa se ɛsɩnɩ-wɛ. (Ruti 4:1-4) Paa ɛɛnawa se pɩpɔzʋʋ liidiye yɔ, eeɖiɣzinaa se Nawomii ɛɛpɩzɩɣ nɛ ɛtasɩ lʋlʋʋ pɩɣa nɛ Elimelɛɛkɩ tɛtʋ pɩsɩ ka-ñɩm. Toovenim taa lɛ, pakpakaɣ tɛtʋ ndʋ se pɔsɔzɩ Akele ɛnʋ ɛ-tɛtʋ yɔɔ nɛ pɩpɩsɩ ɛ-ñɩm; pʋyɔɔ lɛ ɛmaɣzaɣ se paa elesi liidiye yɔ pɩɩɖʋzʋʋ-ɩ.

Ɛlɛ Akele ɛnʋ, alɩwaatʋ ndʋ ɛnawa se pɩpɔzʋʋ se ɛkpaɣ Ruti nɛ ɛpɩsɩ ɛ-halʋ lɛ, ɛlɛɣzɩ lɩmaɣza. Ɛyɔɔdaa se: «Meyeki ñɩnʋ yɔɔ nɔɔ wɛnʋʋ nɛ pɩwɛna-m se melesi mɔ-hɔʋ ñɩm.» (Ruti 4:5, 6) Ɛbɛ yɔɔ ɛlɛɣzɩ ɛ-lɩmaɣza?

Ye Akele ɛnʋ yaa ɛyʋ lɛlʋ ɛkpaɣ Ruti nɛ ɛlɛ lʋlɩ-ɩ abalɩbɩɣa yɔ, Elimelɛɛkɩ tɛtʋ pɩsɩɣ abalɩbɩɣa ŋga ka-ñɩm. Ɛzɩma pɩpɩzaɣ se piyele nɛ Akele ɛnʋ ‘elesi ɛ-ñɩm’? Bibl tɩyɔɔdɩ tɔm natʋyʋ, ɛlɛ pɩtɩla lɩmaɣza naayɛ yɔɔ ɛmaɣzaɣ mbʋ.

• Kajalaɣ lɛ, liidiye nɖɩ ɛkpakɩɣ se ɛyabɩnɩ Elimelɛɛkɩ tɛtʋ yɔ ɛkaɣ-ɖɩ lesuu, mbʋ pʋyɔɔ yɔ alɩwaatʋ kaaɖɛɣ lɛ, tɛtʋ ndʋ tɩɩkaɣ kɛʋ ɛ-pʋyʋ. Tɩkaɣ pɩsʋʋ Ruti pɩyalʋ ñɩndʋ.

• Nabʋlɛ lɛ, pɩkaɣ kɛʋ ɛ-sʋʋtʋ se ɛcalɩ Nawomii nɛ Ruti nɛ ɛcɔnɩ pɔ-yɔɔ.

• Nabudozo lɛ, ye Ruti ɛlʋlɩ Akele ɛnʋ piya lɛɛsɩ yɔ, piya nzɩ nɛ piya nzɩ payɩ Akele ɛnʋ ɛlʋlʋʋ yɔ sɩtayɩɣ ɛ-ñɩm.

• Nabʋnaza lɛ, ye Akele ɛnʋ ɛ-maɣmaɣ ɛfɛyɩnɩ piya lɛɛsɩ yɔ, abalɩbɩɣa ŋga Ruti lʋlʋʋ-ɩ yɔ, kakaɣ wɛnʋʋ waɖɛ se Elimelɛɛkɩ tɛtʋ nɛ Akele ɛnʋ ɛ-tɛtʋ papɩsɩ ka-ñɩm. Ye mbʋ alɩwaatʋ ndʋ ɛsɩkɩ yɔ, pɩɣa ŋga paya-kɛ nɛ Elimelɛɛkɩ hɩɖɛ nɛ pɩtɩkɛ ɛ-ñɩnɖɛ yɔ ɛ-tɛtʋ pɩsɩɣ ka-ñɩndʋ. Akele ɛnʋ ɛtɩsɔɔlɩ se ɛsɩnɩ Nawomii nɛ elesi ɛ-ñɩm. Ɛlɩzaa se ɛhaɣ waɖɛ Bowaazɩ nɛ ɛkpaɣ sʋʋtʋ ndʋ. Ɛ-wayɩ lɛ ɛlɛ kaawɛnɩnɩ waɖɛ se ɛya tɛtʋ ndʋ. Bowaazɩ labɩ mbʋ, mbʋ pʋyɔɔ yɔ, ɛɛsɔɔlaa se ‘sɩɖʋ ñɩm nɛ ɛ-hɩɖɛ pataale.’—Ruti 4:10.

Akele ɛnʋ pɩwɛ ɛzɩ ɛmaɣzaɣ ɛzɩma etaalesi ɛ-hɩɖɛ nɛ ɛ-ñɩm yɔ pɩ-yɔɔ nɛ pɩkɩlɩ. Ɛɛwɛnɩ piɖeni men-ɖeke wɛtʋ. Akele ɛnʋ paa ɛɛñaɣ pana siŋŋ se ɛ-hɩɖɛ etaale yɔ, sɔnɔ ɖɩɩsɩŋ ɛzɩma payaɣaɣ-ɩ yɔ. Elesi ɖɔɖɔ ŋgee waɖɛ nɖɩ Bowaazɩ hiɣaa yɔ. Bowaazɩ pɩsɩ Mesiya Yesu Krɩstʋ cɔzɔnaa taa lɛlʋ. Piɖeni men-ɖeke wɛtʋ yeba nɛ Akele ɛnʋ ekizi waɖɛ nɖɩ ɛwɛna se ɛsɩnɩ ɛyʋ weyi ɛwɛ kɩcɛyɩm taa yɔ lɛ, mbʋ pɩlɩ pɩ-taa yɔ pɩlabɩ pʋtɔdɩyɛ kpem!—Mat. 1:5; Luka 3:23, 32.