Kɩhɛyʋʋ pʋ-ñʋʋ taa kɩlaʋ ŋgʋ Yesu tɩŋnɩ ɛ-calɩm yɔɔ nɛ ɛhɛyɩ yɔ, ki-ɖeke kɩ-yɔɔ pɩtɩŋɩɣna nɛ pekpeɣ-ɖʋ ɖa-kɩwɛɛkɩm. (Efɛz. 1:7) Ŋgʋ Bibl yɔɔdʋʋ se: «[Ɛsɔ] pʋtɔdɩyɛ naʋ yɔɔ lɛ, ekpeɣaɣ kɩwɛɛkɩm mbʋ paalaba nɛ pɩɖɛɛ yɔ,» pʋ-tɔbʋʋ se mbʋ paalaba pʋcɔ nɛ Yesu hɛyɩ kɩhɛyʋʋ pʋ-ñʋʋ taa yɔ. (Roma 3:25) Ɛzɩma tɩyɛ Yehowa pɩzaɣ se ekpeɣ kɩwɛɛkɩm mbʋ ɛyaa lakaɣ pʋcɔ nɛ Yesu hɛyɩɣ kɩhɛyʋʋ pʋ-ñʋʋ taa yɔ, nɛ alɩwaatʋ kʋɖʋmtʋ ndʋ tɩ-taa lɛ, ɛkɛ Ɛsɔ weyi ɛwɛ siɣsiɣ yɔ?

Yehowa kaalabɩ tamaɣ se «ɖomaɣ» nakɛyɛ kaɣ yabʋ mba pɛwɛɣnɩ tisuu ɛ-yɔɔ nɛ ɛ-tamasɩ yɔɔ yɔ pa-ñʋʋ. Alɩwaatʋ ndʋ ɛlabɩ tamaɣ ŋga yɔ, ɛ-ɛsɩndaa lɛ, pɩwɛ ɛzɩ ɛtɛm hɛyʋʋ kɩhɛyʋʋ pʋ-ñʋʋ taa yɔ. (Kiɖe 3:​15, pɩ-tɛɛ tɔm; 22:18) Ɛsɔ taapɩtɩɣ paa ññɩɩ se alɩwaatʋ ndʋ ɛɖʋwa yɔ tɩtalɩɣ lɛ, ɛ-Pɩyalʋ ɛgbamɩyɛ kaɣ haʋ ɛ-tɩ faaa nɛ ɛhɛyɩ kɩhɛyʋʋ ŋgʋ. (Gal. 4:4; Ebr. 10:​7-10) Alɩwaatʋ ndʋ Yesu kaawɛ tɛtʋ yɔɔ yɔ, Yehowa kaaha-ɩ ɖoŋ se ekpeɣ ɛyaa kɩwɛɛkɩm pʋcɔ nɛ ɛhɛyɩ kɩhɛyʋʋ pʋ-ñʋʋ taa. Yesu pɩzaɣ se ekpeɣ mba pɛwɛnɩ tisuu yɔ pa-kɩwɛɛkɩm, mbʋ pʋyɔɔ yɔ ɛɛnawa se kɩlaʋ ŋgʋ ɛkaɣ laʋ yɔ, kɩkaɣ huuzuu pa-kɩwɛɛkɩm yɔɔ.—Mat. 9:​2-6.