Palʋlɩ-m pɩnaɣ 1983 taa. Maawɛnɩ tomnaɣ taa alaafɩya camɩyɛ men-pitu taa, ɛlɛ mɔnkɔm nɛ mantalɩ pɩnzɩ hiu lɛ, manpaɣzɩ nɩʋ wɩzasɩ siŋŋ mon-tomnaɣ kpeekpe taa. Pɩlabɩ pɩnzɩ naalɛ mbʋ yɔ pʋwayɩ, nɛ menfem tanaŋ nakʋyʋ tɛɛ lɛ, mantaatasɩɣ pɩzʋʋ se menciɣdi man-tɩ. Maañaɣ pana siŋŋ se menciɣdi ma-nɩŋgbanzɩ ɛlɛ mantɩpɩzɩ. Kpaɣnɩ kɩyakʋ ŋgʋ lɛ, mantɩpɩzɩ nɛ mantasɩ ɖɔm. Man-kʋdɔŋ yeba ɖɔɖɔ nɛ maatasɩɣ paɣlʋʋ. Halɩ nɛ sɔnɔ mɛwɛ ɛzɩ pɩɣa ɛjam yɔ.

Mahɩnɩ kʋdɔŋ nɛ maatasɩɣ pɩzʋʋ se malɩɩ ɖɩɣa, nɛ pɩla fenasɩ cabɩ mbʋ yɔ pʋwayɩ lɛ, Yehowa Aseɣɖe Tɩnaa nabɛyɛ naalɛ kɔɔ ɖɛ-tɛ. Ɛyaa tɩɩkɔŋ ɖɛ-tɛ lɛ, ɖoŋ ɖoŋ lɛ mɛmɛlɩɣ, ɛlɛ puwiye meyeba se Aseɣɖe Tɩnaa halɩñɩma mba pɔyɔɔdɩnɩ-m. Pɛwɛɛ nɛ pɔyɔɔdʋʋ Paradisuu tɔm lɛ, mɔntɔzɩ tɔm ndʋ maanɩwa alɩwaatʋ ndʋ maawɛnɩ pɩnzɩ kagbanzɩ mbʋ yɔ tɩ-yɔɔ. Alɩwaatʋ ndʋ tɩ-taa lɛ, payaɣaɣ Ɛsɔtɔm tiyiyu nɔɔyʋ se Jethro nɛ ɛɛwɛ Suriname tɛtʋ taa; ɛkɔŋaɣ ɖɛ-tɛtʋ cikpetu taa tam kʋɖʋm paa fenaɣ ŋga nɛ ɛkpɛlɩkɩɣnɩ man-caa Bibl. Jethro lakaɣ-m camɩyɛ lakasɩ siŋŋ nɛ maasɔɔlɩ ɛ-tɔm pɩdɩɩfɛyɩ. Pɩtasɩ lɛ, man-caa lʋlɩyaa kpɛndaɣnɩ-m Aseɣɖe Tɩnaa kediɣzisi nzɩ palakaɣ ɖɛ-tɛtʋ cikpetu taa yɔ sɩ-taa nasɩyɩ taa. Halaa mba paakɔm mɔn-cɔlɔ puwiye yɔ, payaɣ pa-taa lɛlʋ se Florence, ɛpɔzɩ-m se mɔnsɔɔlaa se mantɩlɩ nɛ pɩkpaɖɩ lɛ, moncosi-i se ɛɛɛ.

Pʋwayɩ lɛ, Florence nɛ ɛ-walʋ Justus papɩsɩ pɔkɔɔ nɛ papaɣzɩ-m Bibl kpɛlɩkɩnʋʋ. Pɔkɔm nɛ peɖiɣzina se maasɩŋ kalʋʋ lɛ, pasɩnɩ-m se mɛnkpɛlɩkɩ kalʋʋ. Pɩlabɩ alɩwaatʋ natʋyʋ lɛ, ma-maɣmaɣ manpaɣzɩ kalʋʋ. Kɩyakʋ nakʋyʋ lɛ, Florence nɛ ɛ-walʋ peheyi-m se pakʋsɩ-wɛ nɛ powoni Suriname tɛtʋ taa. Pɩlabɩ pʋtɔdɩyɛ se nɔɔyʋ taatasɩ wɛʋ Orealla se ewolo pɩ-yɔɔ nɛ ɛkpɛlɩkɩɣnɩ-m. Ɛlɛ pɩlabɩ ɖeu se Yehowa tɩsɔɔ mɔ-yɔɔ.

Pitileɖi lɛ, nʋmɔʋ lɩzɩyʋ weyi payaɣ se Floyd yɔ ɛkɔɔ Orealla, nɛ esusaɣ tɔm kpaɣ ɖɩɣa nɛ ŋwolo ɖɩɣa lɛ, ɛlɩɩ mɔ-yɔɔ. Ɛyɔɔdɩnɩ-m Bibl kpɛlɩkʋʋ tɔm lɛ, mamʋʋyɩ. Nɛ ɛpɔzɩ-m se: “Ɛbɛ yɔɔ ŋmʋʋyʋʋ?” Meheyi-i se mɛntɛm kpɛlɩkʋʋ hatʋ cabɩ takayaɣ ŋga payaɣ se Ce que Dieu attend de nous yɔ nɛ manpaɣzɩ kpɛlɩkʋʋ La connaissance qui mène à la vie éternelle takayaɣ. * Meheyi-i mbʋ pʋyɔɔ kpɛlɩkʋʋ sɩŋaa yɔ. Floyd tɛzɩ-m kpɛlɩkɩnʋʋ La connaissance qui mène à la vie éternelle takayaɣ hɔɔlʋʋ ŋgʋ kɩkazaa yɔ,  nɛ pʋwayɩ lɛ pakʋsɩ-ɩ ɖɔɖɔ nɛ pɛɖɛnɩ ɖoŋlɛɛɖɛ. Nɛ mantaatasɩ wɛnʋʋ weyi ɛkpɛlɩkɩnɩ-m Bibl yɔ.

Ɛlɛ pɩnaɣ 2004 taa lɛ, pɔkɔnɩ Granville nɛ Joshua, Orealla tɛtʋ taa; paakɛ nʋmɔʋ lɩzɩyaa kiya. Posusaɣ tɔm kpaɣ ɖɩɣa nɛ ŋwolo ɖɩɣa lɛ, palɩɩ mɔ-yɔɔ. Pɔpɔzɩ-m se mɔnsɔɔlɩ Bibl kpɛlɩkʋʋ yaa we, ɛlɛ mamʋʋyɩ. Mɔnpɔzɩ-wɛ se pɛkpɛlɩkɩnɩ-m La connaissance qui mène à la vie éternelle takayaɣ kpaɣnɩ ɖɩbazɩyɛ. Maasɔɔlaa se mana se tɔm kʋɖʋmtʋ ndʋ ma-wɩlɩyaa lalaa kaawɩlɩ-m yɔ ndʋ pawɩlɩɣ-m yaa we. Granville heyi-m se palakɩ kediɣzisi ɖɛ-tɛtʋ cikpetu taa. Mantaalɩɩ ɖɩɣa pɩlakɩ pɩnzɩ hiu yɔ, paa mbʋ yɔ maasɔɔlaa se mowolo kediɣzisi. Pʋyɔɔ lɛ, Granville kɔɔ man-ɖɩɣa nɛ ɛkpaɣ-m nɛ ɛcaɣzɩ kaakalasɩ cɛɛcɛ taa nɛ etuyi-m nɛ ewoni Kewiyaɣ Kpaaŋ taa.

Pʋwayɩ Granville seɣti-m se mama ma-hɩɖɛ Teokrasɩ Sukuli taa. Eheyi-m se: “Ŋwɛnɩ ɛjandʋ tomnaɣ yɔɔ, ɛlɛ ŋpɩzɩɣ nɛ ŋyɔɔdɩ. Wiɖiyi ŋkaɣ yɔɔdʋʋ samaɣ taa tɔm. Pɩkaɣ mbʋ labʋ.” Ɛ-tɔm pee kɩbana ana aseɣti-m nɛ mantaa man-tɩ liu.

Ma nɛ Granville ɖɩpaɣzɩ tɔm susuu. Ɛlɛ habɛɛ wena aawɛ ɖɛ-tɛtʋ taa yɔ, a-taa sakɩyɛ taawɛ ɖeu nɛ pɩtaawɛ kɛlɛʋ se potuyi kaakalasɩ cɛɛcɛ a-yɔɔ. Pʋyɔɔ lɛ, mɔnpɔzɩ Granville se ɛcaɣzɩ-m brouette taa nɛ etuyuu-m. Mbʋ ɖɩlakaɣ nɛ pɩɖɔŋ camɩyɛ. Avril 2005 taa lɛ, pamɩyɩsɩ-m lɩm. Pitileɖi lɛ, koobiya falɩsɩ-m se pɩsa nɛ mɔncɔnɩ takayɩsɩ ɖeɖe ɛgbɛyɛ taa, nɛ mɔncɔnɩ ɖɔɖɔ menziiniwaa mba pamakɩnɩ tatasɩ Kewiyaɣ Kpaaŋ taa yɔ pɔ-yɔɔ.

Pɩlabɩ pʋtɔdɩyɛ se pɩnaɣ 2007 taa lɛ, man-caa kaasʋ mɛlɛ nakʋyʋ nɛ kɩla kɛgbɛdɩsaɣ nɛ ɛsɩ. Pɩɩkɔnɩ laŋwɛɛkɩyɛ ɖɔ-hɔʋ taa siŋŋ. Granville kɔɔ nɛ ɖa nɛ ɩ ɖɩtɩmɩ nɛ ɛkalɩ-ɖʋ laŋɩyɛ hɛzʋʋ masɩ nasɩyɩ Bibl taa. Pɩlabɩ pɩnzɩ naalɛ pʋwayɩ lɛ, pʋtɔdɩyɛ tɔm lɛɛtʋ ɖaɣnɩ labʋ, Granville kaasʋ mɛlɛ nakʋyʋ nɛ kɩla kɛgbɛdɩsaɣ nɛ ɛsɩ.

Pɩɩkɔnɩ ɛgbɛyɛ kpeekpe laŋwɛɛkɩyɛ, ɛzʋtʋyʋ nɔɔyʋ taatasɩ wɛʋ, nɛ ɛgbɛyɛ taa tʋmlaɖʋ kʋɖʋm ɖeke pɩɩsaɣaa. Granville sɩm kɔnɩ-m laŋwɛɛkɩyɛ siŋŋ, ɛɛkɛ man-taabalʋ kɩbanʋ. Ɛsɩɣaɣnɩ-m paa ɛzɩmtaa se mɔñɔtɩnɩ Yehowa, nɛ ɛcɔŋnaɣ ɖɔɖɔ mon-tomnaɣ yɔɔ kɩcɛyɩm ɖeɖe. Ɛsɩba nɛ kediɣzaɣ ŋga ɖɩlabɩ pʋwayɩ yɔ ka-taa, ma paaha waɖɛ se mankalɩ Feŋuu Tilimiye. Mankalɩ kajalaɣ tayʋʋ nɛ naalɛ ñɩmbʋ lɛ, manpaɣzɩ wiluu nɛ mɛ-ɛsɩtɛɣlɩm wɛɛ tibu yɔɔ. Mantɩpɩzɩ nɛ mowolo kalʋʋ yɔɔ.

Ma-laŋɩyɛ paɣzɩ hɛʋ alɩwaatʋ ndʋ ɛgbɛyɛ lɛɛɖɛ taa koobiya kɔm Orealla se pasɩnɩ-ɖʋ yɔ. Pɩtasɩ lɛ, ɛgbɛyɛ piliŋa kaatiyini-ɖʋ nʋmɔʋ lɩzɩyʋ kiya nɔɔyʋ, payaɣ-ɩ se Kojo. Man-taa labɩ leleŋ se mon-ɖoo nɛ me-neu abalɩñɩnʋ papaɣzɩ kpɛlɩkʋʋ nɛ paha pa-tɩ nɛ pamɩyɩsɩ-wɛ lɩm. Nɛ mars 2015 lɛ, paha-m waɖɛ se mɛnkɛ ɛgbɛyɛ taa tʋmlaɖʋ. Pitileɖi lɛ, mɔyɔɔdɩ samaɣ taa tɔm kajalaɣ ɖeɖe. Puwiye, manɖaɣnɩ maɣzʋʋ tɔm ndʋ Granville kaaheyi-m yɔ tɩ-yɔɔ nɛ amʋʋya nɛ mentisi taa leleŋ ɛsɩtɛɣlɩm. Ɛɛyɔɔdaa se: “Wiɖiyi ŋkaɣ yɔɔdʋʋ samaɣ taa tɔm. Pɩkaɣ mbʋ labʋ.”

Pɩtɩŋnɩ JW Tɔm Ðɩyɔɔdɩyɛ^® ɖʋtʋ yɔɔ lɛ, mantɩlɩ Aseɣɖe Tɩnaa lalaa mba pɛwɛ wɛtʋ kʋɖʋmtʋ taa ɛzɩ ma ɖɔɖɔ yɔ pɔ-yɔɔ tɔm. Paa pɛwɛ kʋdɔŋ taa yɔ, papɩzɩɣ nɛ palakɩ tʋma sakɩyɛ, nɛ pa-taa wɛ leleŋ. Ma ɖɔɖɔ manpɩzɩɣ nɛ malakɩ tʋma naayɛ. Maasɔɔlaa se mala mon-ɖoŋ ɖeɖe Yehowa tʋmɩyɛ taa, pʋyɔɔ lɛ manpaɣzɩ paa ɖooye nʋmɔʋ lɩzʋʋ tʋmɩyɛ. Nɛ pɩtalɩ septembre 2019 lɛ, peheyi-m taa leleŋ tɔm ndʋ tɩ-yɔɔ mantaamaɣzɩ yɔ! Fenaɣ ŋga ka-taa, peheyi-m se paha-m waɖɛ se mɛnkɛ ɛgbɛyɛ taa ɛzʋtʋyʋ, nɛ tɔm susuyaa 40 mbʋ yɔ kaawɛnɩ ɖɛ-ɛgbɛyɛ taa.

Mɛwɛnɩ ɛsɩmɩyɛ koobiya kʋsɔɔlaa mba pɛkpɛlɩkɩnɩ-m nɛ pasɩnɩ-m se mala mɛ-Ɛsɔ sɛtʋ tʋmɩyɛ yɔ pɔ-yɔɔ. Kɔzɩ kɔzɩ lɛ, mɛwɛnɩ ɛsɩmɩyɛ siŋŋ se Yehowa tɩsɔɔ mɔ-yɔɔ.