1. Ye pɔtɔm se ɖɩɖɔkɩ ɖa-maɣzɩm camɩyɛ yɔ, pʋ-tɔbʋʋ lɛ suwe? (2 Timootee 4:5)

 ALƖWAATƲ ndʋ ɖɩkatɩɣ kala yɔ, pɩpɩzɩɣ nɛ pɩlabɩ-ɖʋ kaɖɛ se ɖiwolo pɩ-yɔɔ nɛ ɖɩñɔɔnɩ Yehowa nɛ ɛ-ɛgbɛyɛ. Ɛbɛ ɖɩpɩzɩɣ ɖɩla nɛ ɖɩlʋbɩnɩ kala ana nɛ ɖɩwabɩ-yɛ? Pɩpɔzʋʋ se ɖɩɖɔkɩ ɖa-maɣzɩm camɩyɛ, ɖɩcaɣnɩ ɖɛ-ɛsa nɛ ɖɩɖɔkɩ kpam tisuu taa. (Kalɩ 2 Timootee 4:5.) Ðɩɖɔkʋʋ ɖa-maɣzɩm camɩyɛ alɩwaatʋ ndʋ ɖɩcakɩ ɖiɣ ɖiɣ, ɖɩmaɣzɩɣ camɩyɛ nɛ ɖɩñakɩ pana se ɖɩwɛɛnɩ lɩmaɣza wena Yehowa wɛnɩ wɛtʋ ndʋ tɩ-taa ɖɩwɛɛ yɔ tɩ-yɔɔ yɔ. Ye ɖɩlakɩ mbʋ yɔ, ɛzɩma pɩlakɩ-ɖʋ yɔ, pɩɩkaɣ wɛnʋʋ ɖoŋ ɖa-maɣzɩm yɔɔ.

2. Ɛbɛ tɔm ɖɩkaɣ yɔɔdʋʋ tɔm ñʋʋ kʋnɛ kɩ-taa?

² Tɔm ñʋʋ ŋgʋ kɩɖɛwa yɔ kɩ-taa, ɖɩyɔɔdɩ kala naadozo wena ɖɩpɩzɩɣ nɛ ɖɩkatɩ nɛ atɩlɩɩnɩ ɛgbɛyɛ taa yɔ a-tɔm. Tɔm ñʋʋ kʋnɛ kɩ-taa, ɖɩkaɣ yɔɔdʋʋ kala naadozo wena apɩzɩɣ alɩɩnɩ ɛgbɛyɛ taa nɛ atakɩ ɖe-siɣsiɣ wɛtʋ Yehowa ɛsɩndaa yɔ a-tɔm. Ana yɔ: (1) alɩwaatʋ ndʋ ɖɩmaɣzɩɣ se ɖo-koobu Krɩstʋ tʋ nɔɔyʋ labɩ-ɖʋ mbʋ pɩfɛyɩ ɖeu yɔ, (2) alɩwaatʋ ndʋ pasɩɣzɩɣ-ɖʋ lɔŋ yɔ, nɛ (3) alɩwaatʋ ndʋ pɩlakɩ-ɖʋ kaɖɛ se ɖɩlɛɣzɩ nɛ pɩmʋnɩ lɛɣzɩtʋ ndʋ ɛgbɛyɛ laba yɔ. Alɩwaatʋ ndʋ ɖɩkatɩɣ kala ana yɔ, ɛbɛ ɖɩpɩzɩɣ ɖɩla nɛ pɩsa nɛ ɖɩɖɔkɩ ɖa-maɣzɩm camɩyɛ nɛ ɖiwolo pɩ-yɔɔ nɛ ɖɩñɔɔnɩ Yehowa nɛ ɛ-ɛgbɛyɛ?

3. Ye ɖɩmaɣzɩɣ se koobu nɔɔyʋ labɩ-ɖʋ mbʋ pɩfɛyɩ ɖeu yɔ, ɛzɩma pɩpɩzɩɣ nɛ pɩlabɩ-ɖʋ?

³ Wiɖiyi pɩtɛmɩ-ŋ labʋ ɛzɩ koobu nɔɔyʋ weyi pɩtɩla ɛwɛnɩ waɖɛ naɖɩyɛ ɛgbɛyɛ taa yɔ, ɛlabɩ-ŋ mbʋ pɩfɛyɩ ɖeu yɔ? Pɩtʋʋ fɛyɩ se koobu ɛnʋ ɛtaaɖʋ ɛ-taa se ɛɖʋʋ-ŋ ɖɩwɩzɩyɛ. (Roma 3:23; Yak. 3:2) Ɛlɛ pɩtɩla, mbʋ ɛlaba yɔ pɩɖʋ-ŋ ɖɩwɩzɩyɛ. Pɩtɩla, ŋŋwɛɛ nɛ ŋmaɣzɩɣ mbʋ ɛlabɩ-ŋ yɔ pɩ-yɔɔ nɛ piyele nɛ ŋtaaɖou. Halɩ pɩtɩla, ŋpɔzɩ ña-tɩ se: ‘Ye koobu ɛlakɩnɩ ɛzʋnɔ, ɛzɩ toovenim taa lɛ pɩkɛ Yehowa ɛgbɛyɛ na?’ Mbʋ ɖeyi ɖeyi Sataŋ ñɩnɩɣ se ɖɩmaɣzɩ. (2 Kɔr. 2:11) Lɩmaɣza kɩdɛkɛda ana apɩzɩɣ ayele nɛ ɖiposi ɖa-tɩ nɛ Yehowa nɛ ɛ-ɛgbɛyɛ. Ye mbʋ, ye ɖɩmaɣzɩɣ se koobu nɔɔyʋ labɩ-ɖʋ mbʋ pɩfɛyɩ ɖeu yɔ, ɛbɛ ɖɩpɩzɩɣ ɖɩla nɛ pɩsa nɛ ɖɩɖɔkɩ ɖa-maɣzɩm camɩyɛ nɛ ɖɩtaawɛɛnɩ lɩmaɣza wena Sataŋ ñɩnɩɣ se ɖɩwɛɛna yɔ?

4. (a) Alɩwaatʋ ndʋ palabɩ Yosɛɛfʋ mbʋ pɩfɛyɩ ɖeu yɔ, ɛbɛ sɩnɩ-ɩ nɛ ɛɖɔkɩ ɛ-maɣzɩm camɩyɛ? (b) Nɛ lɔŋ weyi ɛ-kɩɖaʋ kpɛlɩkɩɣ-ɖʋ? (Kiɖe Tɛɛ Tɔm 50:19-21)

⁴ Taacaɣnɩ nɔɔyʋ. Alɩwaatʋ ndʋ Yosɛɛfʋ kaakɛ pɩɣa evelaɣ yɔ, ɛ-ɖalaa labɩ-ɩ mbʋ pɩfɛyɩ ɖeu yɔ. Paapaɖɩ-ɩ nɛ halɩ pa-taa nabɛyɛ kaasɔɔlaa se pakʋ-ɩ. (Kiɖe 37:4, 18-22) Pɩtɛmnaa se pɛpɛdɩ-ɩ nɛ ɛpɩsɩ yom. Mbʋ pɩlɩ pɩ-taa yɔ lɛ se Yosɛɛfʋ katɩ kala siŋŋ pɩnzɩ 13 mbʋ yɔ. Yosɛɛfʋ pɩzaɣ se ɛpɔzɩ ɛ-tɩ se ɛzɩ toovenim taa lɛ Yehowa sɔɔlɩ-ɩ. Nɛ ɛpɩzaɣ se ɛmaɣzɩ se yaa Yehowa lɔ-ɩ alɩwaatʋ ndʋ pɩɩpɔzaa se pasɩnɩ-ɩ yɔ. Ɛlɛ, Yosɛɛfʋ taacaɣnɩ nɔɔyʋ. Ɛɛcaɣ ɖiɣ ɖiɣ nɛ pɩsɩnɩ-ɩ nɛ ɛɖɔkɩ ɛ-maɣzɩm camɩyɛ. Alɩwaatʋ ndʋ ehiɣ waɖɛ se ɛkpa ɛ-ɖalaa kɩmɩyɛ yɔ, ɛtɩla mbʋ. Ɛlɛ, ɛɛwɩlɩ-wɛ sɔɔlɩm nɛ ekpeɣ-wɛ. (Kiɖe 45:4, 5) Yosɛɛfʋ labɩ mbʋ, mbʋ pʋyɔɔ yɔ, ɛpɩzaa nɛ ɛmaɣzɩ camɩyɛ. Ɛtɩka ɛ-lɩmaɣza ɛ-maɣmaɣ ɛ-kʋñɔmɩŋ yɔɔ, ɛlɛ Yehowa tamasɩ yɔɔ ɛmaɣzaɣ. (Kalɩ Kiɖe Tɛɛ Tɔm 50:19-21.) Lɔŋ weyi pɩkpɛlɩkɩɣ-ɖʋ? Ye nɔɔyʋ ɛlabɩ-ŋ mbʋ pɩfɛyɩ ɖeu yɔ, taacaɣnɩ Yehowa yaa taamaɣzɩ se yaa ɛha-ŋ siɣye. Ɛlɛ, maɣzɩ ɛzɩma ɛwɛɛ nɛ ɛsɩɣnɩ-ŋ se ŋɖɔkɩ ña-laŋɩyɛ kaɖɛ nɖɩ ɖɩ-taa yɔ pɩ-yɔɔ. Pɩtasɩ lɛ, alɩwaatʋ ndʋ lalaa lakɩ-ŋ mbʋ pɩfɛyɩ ɖeu yɔ, ñaɣ pana nɛ ŋkpaɣ sɔɔlɩm nɛ ŋhuuzi pɛ-ɛjandʋ yɔɔ.—1 Pɩy. 4:8.

5. Alɩwaatʋ ndʋ Miqueas maɣzaɣ se palabɩ-ɩ mbʋ pɩfɛyɩ ɖeu yɔ, ɛzɩma ɛlaba nɛ ɛpɩzɩ nɛ ɛɖɔkɩ ɛ-maɣzɩm camɩyɛ?

⁵ Iyele nɛ ɖɩna ɖa-alɩwaatʋ taa ɛgbɛyɛ taa ɛzʋtʋyʋ nɔɔyʋ kɩɖaʋ. Payaɣ-ɩ se Miqueas nɛ ɛwɛ Amerika Hadɛ kiŋ. b Ɛtɔzʋʋ alɩwaatʋ ndʋ ɛmaɣzaɣ se koobiya nabɛyɛ tɩlabɩ-ɩ camɩyɛ lakasɩ yɔ tɩ-yɔɔ. Koobiya mba, paawɛnɩ wala ɛgbɛyɛ taa. Ɛyɔɔdaa se: «Wiɖiyi nabʋyʋ tɩtalɩ-m nɛ mɛwɛɛ nɩɣzɛ taa mbʋ nɛ mana. Sɔɔndʋ kaakpa-m. Ðoo taa mantaaɖou, nɛ mentisaɣ ɛsɩtɛɣlɩm mbʋ pʋyɔɔ yɔ mamaɣzaɣ se maapɩzɩɣ nɛ mala nabʋyʋ.» Paa mbʋ yɔ, Miqueas kaaɖɔkɩ ɛ-maɣzɩm camɩyɛ nɛ ɛɛñaɣ pana se ɛzɩma pɩlakaɣ-ɩ yɔ pɩtawɛɛnɩ ɖoŋ ɛ-yɔɔ. Ɛtɩmaɣnɩ Yehowa ɖoŋ ɖoŋ nɛ ɛpɔzʋʋ-ɩ se ɛha-ɩ fezuu kiɖeɖeu nɛ ɖoŋ nɛ ɛpɩzɩ nɛ ɛɖɔkɩ ɛ-laŋɩyɛ. Ɛñɩnɩ ɖɔɖɔ ɖɛ-ɛgbɛyɛ takayɩsɩ taa tɔm ndʋ tɩpɩzɩɣ nɛ tɩsɩnɩ-ɩ yɔ. Lɔŋ weyi pɩkpɛlɩkɩɣ-ɖʋ? Ye ŋmaɣzɩɣ se koobu nɔɔyʋ labɩ-ŋ mbʋ pɩfɛyɩ ɖeu yɔ, wolo pɩ-yɔɔ nɛ ŋcaɣ ɖiɣ ɖiɣ nɛ ŋñaɣ pana nɛ lɩmaɣza kɩdɛkɛda wena apɩzɩɣ nɛ akɔɔ ña-ñʋʋ taa yɔ ataawɛɛnɩ ɖoŋ ñɔ-yɔɔ. Pɩtɩla, ŋŋsɩŋ wɛtʋ ndʋ tiyeba nɛ ɛyɔɔdɩ tɔm ndʋ yaa ɛla mbʋ yɔ. Pʋyɔɔ lɛ, tɩmnɩ Yehowa nɛ ŋpɔzɩ-ɩ se ɛsɩnɩ-ŋ nɛ ŋwɛɛnɩ lɩmaɣza wena koobu ɛnʋ ɛwɛnɩ wɛtʋ ndʋ tɩ-yɔɔ yɔ. Ye ŋlabɩ mbʋ yɔ, pɩpɩzɩɣ pɩsɩnɩ-ŋ nɛ ŋtaawɛɛnɩ lɩmaɣza kɩdɛkɛda koobu ɛnʋ ɛ-yɔɔ nɛ ŋsɔɔ ɖɩwɩzɩyɛ nɖɩ ɛɖʋ-ŋ yɔ ɖɩ-yɔɔ. (Adu. 19:11) Tɔzɩ se Yehowa sɩm wɛtʋ  ndʋ tɩ-taa ŋwɛɛ yɔ nɛ ɛkaɣ-ŋ haʋ ɖoŋ weyi pɩpɔzʋʋ-ŋ yɔ nɛ ŋɖɔkɩ ña-laŋɩyɛ.—4 Aw. 16:9; Ekl. 5:7.

6. Ɛbɛ yɔɔ pɩcɛyaa se ɖɩnɩɩ pɩ-taa se Yehowa sɩɣzɩɣ-ɖʋ lɔŋ mbʋ pʋyɔɔ yɔ ɛsɔɔlɩ-ɖʋ? (Ebree mba 12:5, 6, 11)

⁶ Alɩwaatʋ ndʋ pasɩɣzɩɣ-ɖʋ lɔŋ yɔ, ɖɩpɩzɩɣ nɛ ɖɩnɩɩ siziŋ. Ye ɖɩkam ɖa-lɩmaɣza siziŋ weyi ɖɩnɩɣ yɔ e-ɖeke ɛ-yɔɔ yɔ, ɖɩpɩzɩɣ nɛ ɖɩpaɣzɩ nim lɔŋ weyi pasɩɣzɩ-ɖʋ yɔ, nɛ ɖɩmaɣzɩɣ se ɛtɩmʋna yaa se patɩtasɩ-ɖʋ lɔŋ ɛnɩ nɛ sɔɔlɩm. Pɩpɩzɩɣ nɛ pɩɖɩɣ-ɖʋ nʋmɔʋ nɛ ɖɩɩnɩɣ tɔm kɩcɛyɩtʋ natʋyʋ taa; ndʋ yɔ: Yehowa sɩɣzɩɣ-ɖʋ lɔŋ mbʋ pʋyɔɔ yɔ ɛsɔɔlɩ-ɖʋ. (Kalɩ Ebree mba 12:5, 6, 11.) Ye ɖiyeba nɛ ɛzɩma pɩlakɩ-ɖʋ yɔ pɩwɛɛnɩ ɖoŋ ɖɔ-yɔɔ yɔ, ɖɩhaɣ Sataŋ waɖɛ se ɛwɛɛnɩ ɖoŋ ɖɔ-yɔɔ. Ɛsɔɔlaa se pasɩɣzɩ-ɖʋ lɔŋ lɛ, ɖikizi-i; nɛ halɩ kɔzɩ kɔzɩ lɛ, ɛsɔɔlaa se ɖiposi ɖa-tɩ nɛ Yehowa nɛ ɛ-ɛgbɛyɛ. Ye pasɩɣzɩ-ŋ lɔŋ yɔ, ɛzɩma ŋpɩzɩɣ nɛ ŋɖɔkɩ ña-maɣzɩm camɩyɛ?

7. (a) Ɛzɩ ɖɩnaʋ kɩlɛmʋʋ taa yɔ, Pɩyɛɛrɩ tisaa nɛ ɛmʋ lɔŋ sɩɣzʋʋ lɛ, wala wena Yehowa ha-ɩ? (b) Lɔŋ weyi Pɩyɛɛrɩ kɩɖaʋ kpɛlɩkɩɣ-ŋ?

⁷ Tisi nɛ ŋmʋ lɔŋ sɩɣzʋʋ nɛ ŋla lɛɣzɩtʋ ndʋ pɩpɔzʋʋ yɔ. Yesu sɩɣzɩ Pɩyɛɛrɩ lɔŋ apostoloowaa lalaa ɛsɩndaa nɛ pɩcɛzɩ tam kʋɖʋm. (Mark. 8:33; Luka 22:31-34) Pɩtɩla, pɩɩcɛyɩ Pɩyɛɛrɩ siŋŋ! Paa mbʋ yɔ, ewobi pɩ-yɔɔ nɛ ɛñɔɔnɩ Yesu. Eetisaa nɛ ɛmʋ lɔŋ sɩɣzʋʋ nɛ ɛkpɛlɩkɩ lɔŋ hɔɔlɩŋ weyi ɩ-taa picoɖi-i yɔ ɩ-taa. Mbʋ pɩlɩ pɩ-taa yɔ lɛ se Yehowa wazɩ-ɩ e-siɣsiɣ wɛtʋ yɔɔ nɛ ɛɖʋ-ɩ tʋma sɔsɔna ɛgbɛyɛ taa. (Yoh. 21:15-17; Tʋma 10:24-33; 1 Pɩy. 1:1) Lɔŋ weyi ɖɩpɩzɩɣ nɛ ɖɩkpɛlɩkɩ Pɩyɛɛrɩ kɩɖaʋ taa? Alɩwaatʋ ndʋ pasɩɣzɩɣ-ɖʋ lɔŋ yɔ, ye ɖɩɩkaŋ ɖa-lɩmaɣza ɛzɩma pɩcɛyɩ-ɖʋ yɔ pɩ-yɔɔ, ɛlɛ ɖitisiɣ nɛ ɖɩmʋʋ-pʋ nɛ ɖɩlakɩ lɛɣzɩtʋ ndʋ pɩpɔzʋʋ yɔ, pɩwazɩɣ ɖa-maɣmaɣ nɛ ɛyaa lalaa. Ye ɖɩlakɩ mbʋ yɔ, ɖɩkaɣ wɛʋ wazaɣ Yehowa nɛ ɖo-koobiya nɛ pɩkɩlɩ.

8-9. (a) Pasɩɣzɩ Bernardo lɔŋ nɛ pɩtɛ lɛ, ɛzɩma pɩlabɩ-ɩ kiɖe tɛɛ? (b) Ɛlɛ ɛbɛ sɩnɩ-ɩ nɛ ɛlɛɣzɩ ɛ-lɩmaɣza?

⁸ Payaɣ koobu abalɩñɩnʋ nɔɔyʋ se Bernardo; ɛwɛ Moozambiiki. Iyele nɛ ɖɩna mbʋ pɩtalɩ-ɩ yɔ. Ɛɛkɛ ɛgbɛyɛ taa ɛzʋtʋyʋ, ɛlɛ pɔkɔm nɛ pamʋ waɖɛ nɖɩ ɛ-cɔlɔ. Kiɖe tɛɛ lɛ, ɛzɩma pɩlabɩ Bernardo? Ɛyɔɔdaa se: «Maakɔ pana mbʋ pʋyɔɔ yɔ lɔŋ weyi pasɩɣzɩ-m yɔ ɛtaakɛdɩnɩ-m.» Ɛɛwɛɛ nɛ ɛnɩɣzɩɣ lɩmaɣza wena ɛgbɛyɛ taa mba lalaa kaɣ wɛnʋʋ ɛ-yɔɔ yɔ a-yɔɔ. Ɛyɔɔdaa se: «Pɩɩlabɩ fenasɩ cabɩ pʋcɔ nɛ mɛwɛɛnɩ lɩmaɣza wena amʋnaa yɔ lɔŋ sɩɣzʋʋ mbʋ pɩ-yɔɔ nɛ manɖaɣnɩ paɣzʋʋ taʋ Yehowa nɛ ɛ-ɛgbɛyɛ  liu.» Ɛbɛ sɩnɩ Bernardo nɛ ɛwɛɛnɩ lɩmaɣza kɩbana?

⁹ Bernardo lɛɣzɩ ɛ-lɩmaɣza. Ɛlɩzɩ pɩ-taa se: «Maakɛ ɛgbɛyɛ taa ɛzʋtʋyʋ lɛ, mantɩŋaɣnɩ Ebree mba 12:7 yɔɔ nɛ mansɩɣnɩ ɛyaa lalaa se pɛwɛɛnɩ lɩmaɣza kɩbana Yehowa lɔŋ sɩɣzʋʋ yɔɔ. Lɛɛlɛɛyɔ mɔnpɔzʋʋ man-tɩ se: ‘Anɩ pɩpɔzʋʋ se ɛɖɔ mayaɣ kanɛ ka-taa tɔm yɔɔ?’ Yehowa sɛyaa tɩŋa; ma ɖɔɖɔ mɛwɛ pɩ-taa.» Pʋwayɩ, Bernardo kpɛzɩ nɩŋgbanzɩ lɛɛsɩ nzɩ pɩpɔzʋʋ yɔ nɛ ɛɖaɣnɩ paɣzʋʋ taʋ Yehowa nɛ ɛ-ɛgbɛyɛ liu. Ɛkalaɣ Bibl nɛ pɩkɩlɩɣ nɛ ɛkpakaɣ alɩwaatʋ nɛ pɩkɩlɩɣ nɛ ɛmaɣzɩɣ tɔm ndʋ ɛkalaɣ yɔ tɩ-yɔɔ siŋŋ. Paa ɛɛwɛɛ nɛ ɛnɩɣzɩɣ lɩmaɣza wena e-koobiya wɛnɩ ɛ-yɔɔ yɔ a-yɔɔ mbʋ yɔ, ɛ nɛ wɛ pɛkpɛndaɣ nɛ posusuu tɔm nɛ ecosaɣ tɔm ɛgbɛyɛ taa kediɣzisi taa. Alɩwaatʋ natʋyʋ wayɩ lɛ, paɖaɣnɩ haʋ Bernardo waɖɛ nɛ ɛkɛ ɛzʋtʋyʋ. Ɛzɩ Bernardo yɔ, ye pasɩɣzɩ-ŋ lɔŋ yɔ, ñaɣ pana nɛ taakɩlɩ maɣzʋʋ ɛzɩma pɩcɛyɩ-ŋ yɔ pɩ-yɔɔ; tisi nɛ ŋmʋ lɔŋ tasʋʋ nɛ ŋlɛɣzɩ mbʋ pɩpɔzʋʋ se ŋlɛɣzɩ yɔ. c (Adu. 8:33; 22:4) Ye ŋlabɩ mbʋ yɔ, ña-taa pɩzɩɣ nɛ pɩtɛ se Yehowa kaɣ-ŋ wazʋʋ mbʋ pʋyɔɔ yɔ, ŋwobi pɩ-yɔɔ nɛ ŋñɔʋnɩ ɛ nɛ ɛ-ɛgbɛyɛ kpam.

10. Lɛɣzɩtʋ ndʋ pɩzaɣ se tɩtakɩ Izrayɛɛlɩ abalaa nabɛyɛ siɣsiɣ wɛtʋ?

¹⁰ Lɛɣzɩtʋ ndʋ ɛgbɛyɛ lakɩ yɔ, tɩpɩzɩɣ nɛ tɩtakɩ ɖe-siɣsiɣ wɛtʋ. Ye ɖɩtɩkpa ɖa-tɩ yɔ, halɩ ɖɩpɩzɩɣ ɖiyele nɛ lɛɣzɩtʋ ndʋ tɩyasɩ ɖa nɛ Yehowa ɖɛ-hɛkʋ taa. Kɩɖaʋ nakʋyʋ yɔ: Lɛɣzɩtʋ ndʋ Moyizi paɣtʋ kaakɔnaa yɔ, tɩɩwɛnɩ ɖoŋ Izrayɛɛlɩ mba nabɛyɛ yɔɔ. Pʋcɔ nɛ Yehowa cɛlɩɣ-wɛ paɣtʋ ndʋ lɛ, hɔŋ ñʋndɩnaa lakaɣ tʋma wena pɩpɔzaɣ se cɔjɔnaa ɩla yɔ. Pamaɣaɣ altaarunaa nɛ palaɣ kɩlaŋ Yehowa pɔ-hɔŋ taa mba lone taa. (Kiɖe 8:20, 21; 12:7; 26:25; 35:1, 6, 7; Yɔɔb 1:5) Ɛlɛ alɩwaatʋ ndʋ pɛcɛlɩ-wɛ Moyizi paɣtʋ yɔ, hɔŋ ñʋndɩnaa taatasɩ wɛnʋʋ waɖɛ nɖɩ. Yehowa lɩzɩ cɔjɔnaa Aarɔɔnɩ hɔʋ taa se palaɣ kɩlaŋ. Kpaɣnɩ alɩwaatʋ ndʋ lɛ, ye hɔʋ ñʋʋdʋ nɔɔyʋ ɛtɩkɛ Aarɔɔnɩ liɖe taa tʋ ɛlɛ ɛpaɣzɩ labʋ tʋma wena cɔjɔnaa lakaɣ yɔ, papɩzaɣ se pakʋ-ɩ. d (Lev. 17:3-6, 8, 9) Pɩtɩla, ɛzɩ lɛɣzɩtʋ ndʋ tiiyebina nɛ Kora, Dataanɩ, Abiram nɛ samaɣ taa sɔsaa 250 pakʋyɩ Moyizi nɛ Aarɔɔnɩ pɔ-yɔɔ? (Kɩg. 16:1-3) Ðɩɩpɩzɩɣ nɛ ɖɩyɔɔdɩ kpayɩ se mbʋ kaayebina nɛ pala mbʋ. Paa pɩtɩɩkɛ suwe yɔ, Kora nɛ ɛyaa mba patɩnɩ ɛ-yɔɔ yɔ, patiwolo pɩ-yɔɔ nɛ pɔɖɔkɩ pe-siɣsiɣ wɛtʋ Yehowa ɛsɩndaa. Ye ɛgbɛyɛ ɛlabɩ lɛɣzɩtʋ natʋyʋ nɛ tɩtakɩɣ ñe-siɣsiɣ wɛtʋ yɔ, ɛbɛ ŋpɩzɩɣ nɛ ŋla?

11. Lɔŋ weyi Kehaatɩ pɩyalaa nabɛyɛ kɩɖaʋ kpɛlɩkɩɣ-ɖʋ?

¹¹ Lɛɣzɩtʋ ndʋ ɛgbɛyɛ lakɩ yɔ, ɖʋ-tʋ nesi kiya. Izrayɛɛlɩ mba kaawɛ kañɩmbusuu taa lɛ, paaɖʋ ŋgee tʋmɩyɛ naɖɩyɛ Kehaatɩ pɩyalaa. Alɩwaatʋ ndʋ payɩ Izrayɛɛlɩ mba kʋyaɣ lone naɖɩyɛ taa se pɛkɛɛ lɛɛɖɛ taa yɔ, Kehaatɩ pɩyalaa nabɛyɛ hɔɔlaɣ ɛgbɛyɛ ɖʋʋ aɖakaɣ nɛ pɛɖɛɣ samaɣ kpeekpe nɔɔ. (Kɩg. 3:29, 31; 10:33; Yoz. 3:2-4) Pɩɩkɛ waɖɛ sɔsɔɖɛ kpem! Ɛlɛ Izrayɛɛlɩ mba sʋ Lidaʋ Tɛtʋ taa lɛ, lɛɣzɩtʋ kɔma. Pɩtaatasɩɣ pɔzʋʋ se pɛkɛzɩɣ ɛgbɛyɛ ɖʋʋ aɖakaɣ lone ɖoŋ ɖoŋ. Pʋyɔɔ lɛ, kpaɣnɩ alɩwaatʋ ndʋ Salomɔɔ paɣzɩ kewiyitu tɔɔʋ yɔ, paaɖʋ tʋma ndɩ ndɩ Kehaatɩ pɩyalaa. Pa-taa nabɛyɛ kaakɛ hendu teyaa, lalaa ñaakɛ nɔnɔsɩ yɔɔ ɖaŋɩyaa, nɛ lalaa ñaakɛ ñɩm yɔɔ cɔnɩyaa. (3 Aw. 6:16-18; 26:1, 24) Tɔm natʋyʋ fɛyɩ Bibl taa nɛ tɩwɩlɩɣ se Kehaatɩ pɩyalaa midaɣ yaa pɔpɔzaɣ se paha-wɛ wala sɔsɔna nɛ pɩkɩlɩ mbʋ pʋyɔɔ yɔ paalabɩ ŋgee tʋmɩyɛ nɖɩ nɛ pɩɖɛɛ. Lɔŋ weyi ɖɩpɩzɩɣ nɛ  ɖɩkpɛlɩkɩ? Ðʋ nesi lɛɣzɩtʋ ndʋ Yehowa ɛgbɛyɛ lakɩ yɔ nɛ ña-laŋɩyɛ pilim, pɩkpɛndɩnɩ lɛɣzɩtʋ ndʋ payɩ titukuuni tʋmɩyɛ nɖɩ ŋlakɩ yɔ. Paa tʋmɩyɛ nɖɩ patɩɩɖʋ-ŋ yɔ, labɩ-ɖɩ nɛ ŋhiɣ taa leleŋ. Tɔzɩ se pɩtɩkɛ tʋmɩyɛ nɖɩ ŋlakɩ yɔ nɖɩ yekina se ŋmʋ ñɩm Yehowa ɛsɩndaa. Ñamtʋ ndʋ ŋwɛna yɔ, tɩmʋ ñɩm siŋŋ Yehowa ɛsɩndaa nɛ pɩkpaɖɩ paa tʋmɩyɛ nɖɩ.—1 Sam. 15:22.

12. Alɩwaatʋ ndʋ pɔpɔzɩ Zaina se eyele labʋ Betɛɛlɩ tʋmɩyɛ nɛ ɛla tʋmɩyɛ lɛɛɖɛ yɔ, ɛzɩma pɩlabɩ-ɩ?

¹² Iyele nɛ ɖɩna koobu halɩñɩnʋ nɔɔyʋ kɩɖaʋ: Payaɣ-ɩ se Zaina. Paalɛɣzɩ-ɩ tʋmɩyɛ, nɛ piiyeba nɛ elesi tʋmɩyɛ nɖɩ ɛɛsɔɔlɩ siŋŋ yɔ. Ɛlabɩ tʋmɩyɛ Betɛɛlɩ nɛ pɩcɛzɩ pɩnzɩ 23 lɛ, pɔpɔzɩ-ɩ se ɛpɩsɩ nʋmɔʋ lɩzɩyʋ kiya. Ɛyɔɔdaa se: «Alɩwaatʋ ndʋ pɛlɛɣzɩ-m tʋmɩyɛ yɔ manɩ siziŋ siŋŋ. Mamaɣzaɣ se mantɩtasɩ wɛʋ wazaɣ, nɛ mɔnpɔzaɣ man-tɩ se: ‘Ɛzɩ ɛbɛ malaba nɛ pɩfɛyɩ ɖeu?’» Pɩlabɩ pʋtɔdɩyɛ se koobiya nabɛyɛ yeba nɛ Zaina nɩɩ siziŋ nɛ pɩkɩlɩ. Peheyaɣ-ɩ se: «Ye ŋŋlakaɣ tʋmɩyɛ camɩyɛ yɔ, ɛgbɛyɛ taayebi-ŋ se ŋɖɛɛ.» Alɩwaatʋ natʋyʋ, piitibi Zaina yɔɔɔ kpem nɛ pʋyɔɔ lɛ ewiɣaɣ paa ɖoo wena. Ɛlɛ, ɛyɔɔdaa se: «Mantɩha nʋmɔʋ kpa se wɛtʋ ndʋ tiyele nɛ manpɩtɩ se ɛgbɛyɛ sɔɔlɩ-m yaa se Yehowa sɔɔlɩ-m.» Ɛbɛ sɩnɩ Zaina nɛ ɛpɩzɩ nɛ ɛɖɔkɩ ɛ-maɣzɩm camɩyɛ?

13. Ɛbɛ Zaina laba nɛ pɩsɩnɩ-ɩ nɛ ɛwa lɩmaɣza kɩdɛkɛda wena ɛɛwɛna yɔ?

¹³ Zaina pɩzaa nɛ ɛwa lɩmaɣza kɩdɛkɛda wena ɛɛwɛna yɔ. Ɛbɛ sɩnɩ-ɩ? Ɛkalɩ ɖɛ-ɛgbɛyɛ takayɩsɩ taa tɔm ñʋŋ weyi ɛyɔɔdaɣ kaɖɛ nɖɩ ɛkataɣ yɔ ɖɩ-tɔm yɔ. 1^er février 2001 tɛ Feŋuu Tilimiye fransɩɩ ñɩnɖɛ taa tɔm ñʋʋ «Vous pouvez vaincre le découragement!» sɩnɩ-ɩ kpem. Tɔm ñʋʋ ŋgʋ, kɩyɔɔdʋʋ ɛzɩma pɩtɩla pɩɩlabɩ Bibl mayʋ Maarɩkɩ alɩwaatʋ ndʋ pɛlɛɣzɩ-ɩ tʋmɩyɛ yɔ pɩ-tɔm. Zaina yɔɔdaa se: «Maarɩkɩ kɩɖaʋ kɛnɩ mbʋ ɖeyi ɖeyi pɩpɔzaɣ-m se pɩsa nɛ piyebi-m tibu yɔɔɔ yɔ.» Pɩtasɩ lɛ, Zaina kaawobi pɩ-yɔɔ nɛ ɛñɔɔnɩ ɛ-taabalaa kpam. Etiposi ɛ-tɩ nɛ koobiya nɛ ɛtaamaɣzɩɣ se ɛ-tɔm labɩ pʋtɔdɩyɛ. Eeɖiɣzinaa se fezuu kiɖeɖeu ɖiyiɣni lɩmaɣza wena Yehowa ɛgbɛyɛ kpakɩɣ yɔ, nɛ eeɖiɣzinaa ɖɔɖɔ se koobiya mba pɛɖɛɣaɣ nɔɔ yɔ pamaɣzaɣ ɛ-yɔɔ siŋŋ. Pɩtasɩ lɛ, eeɖiɣzinaa se mbʋ pɩ-tɔm kɩlɩ cɛyʋʋ Yehowa ɛgbɛyɛ ɛsɩndaa yɔ mbʋ lɛ se ɖiyele nɛ pala tʋma wena Yehowa sɔɔlaa se pala yɔ.

14. Lɛɣzɩtʋ ndʋ ɛgbɛyɛ kaalaba nɛ pɩwɛɛ Vlado kaɖɛ se ɛlɛɣzɩ nɛ pɩmʋnɩ-tʋ, nɛ ɛbɛ sɩnɩ-ɩ?

¹⁴ Payaɣ ɛgbɛyɛ taa ɛzʋtʋyʋ nɔɔyʋ se Vlado. Ɛwɛnɩ pɩnzɩ 73 nɛ ɛwɛ Sɩloovenii. Pakpaɣ ɛgbɛyɛ nɖɩ ɖɩ-taa ɛɛwɛɛ yɔ nɛ pɛkpɛndɩ  lɛɛɖɛ yɔɔ nɛ paɖɩɣ Kewiyaɣ Kpaaŋ ŋgʋ kɩ-taa ewokaɣ kediɣzisi yɔ lɛ, pɩɩlabɩ-ɩ kaɖɛ. Ɛyɔɔdaa se: «Mantaanɩɣ mbʋ pʋyɔɔ pɩɩwɛɛ se paɖɩɣ Kewiyaɣ Kpaaŋ kɩbaŋʋ ŋgʋ yɔ pɩ-taa. Pɩɩcɛyɩ-m mbʋ pʋyɔɔ yɔ, ɖɩɖaɣnʋʋ ñɔɔzʋʋ Kewiyaɣ Kpaaŋ ŋgʋ yɔ, pitileɖi. Mɛnkɛ kafɩnda, nɛ wondu kɩfatʋ ndʋ pɩpɔzaɣ se ɖɩñɔɔzɩnɩ-kʋ yɔ, mansaɣ tɩ-taa natʋyʋ. Pɩtasɩ lɛ, pakpaɣ ɖɛ-ɛgbɛyɛ nɛ pɔsɔzɩ lɛɛɖɛ yɔɔ lɛ, pɩpɔzaɣ se pala lɛɣzɩtʋ sakɩyɛ nɛ lɛɣzɩtʋ ndʋ, tɩtaawɛɛ kɛlɛʋ ɖa tɔm susuyaa mba ɖɩkɛ akpadɩyaa yɔ.» Ɛbɛ sɩnɩ Vlado nɛ ɛɖʋ nesi lɩmaɣzɩyɛ nɖɩ pakpaɣaa yɔ? Ɛlɩzɩ pɩ-taa se: «Ye Yehowa ɛgbɛyɛ ɛlɛɣzɩ nabʋyʋ nɛ ɖa ɖɔɖɔ ɖɩlɛɣzɩ nɛ pɩmʋnɩ lɛɣzɩtʋ ndʋ ɛgbɛyɛ laba yɔ, paa ɛzɩmtaa lɛ pɩkɔŋnɩ-ɖʋ wazasɩ. Pɩsɩɣnɩ-ɖʋ se ɖɩñɔɔzɩ ɖa-tɩ nɛ ɖɩɖaŋ lɛɣzɩtʋ sɔsɔtʋ ndʋ tɩwɛnɩ ɛsɩndaa yɔ.» Pakpaɣ mɩ-ɛgbɛyɛ nɛ pɛkpɛndɩ lɛɛɖɛ yɔɔ yaa pɛlɛɣzɩ-ŋ tʋmɩyɛ naɖɩyɛ nɛ pɩlakɩ-ŋ kaɖɛ se lɛɣzɩtʋ ndʋ tɩmalɩnɩ-ŋ? Ye mbʋ yɔ, ña-taa ɛtɛ se ɛzɩma pɩlakɩ-ŋ yɔ, Yehowa nɩɣ pɩ-taa. Ye ŋɖʋʋ nesi lɛɣzɩtʋ ndʋ nɛ ŋñɔʋnɩ Yehowa nɛ ɛ-ɛgbɛyɛ yɔ, pɩtʋʋ fɛyɩ se ɛkaɣ-ŋ wazʋʋ.—Keɣa 17:26.

15. Alɩwaatʋ ndʋ ɖɩkatɩɣ kala ɛgbɛyɛ taa yɔ, ɛzɩma ɖɩpɩzɩɣ nɛ ɖɩɖɔkɩ ɖa-maɣzɩm camɩyɛ?

¹⁵ Ðɩwɛɣ nɛ ɖɩñɔtʋʋnɩ ɛjaɖɛ tɛm nɛ pɩkɩlɩɣ lɛ, ɖɩpɩzɩɣ nɛ ɖɩɖaŋ se ɖɩkaɣ katʋʋ kala wena alɩɣnɩ ɛgbɛyɛ taa yɔ. Kala ana apɩzɩɣ nɛ atakɩ ɖe-siɣsiɣ wɛtʋ Yehowa ɛsɩndaa. Pʋyɔɔ lɛ, pɩpɔzʋʋ se ɖɩɖɔkɩ ɖa-maɣzɩm camɩyɛ. Ye ŋmaɣzɩɣ se koobu nɔɔyʋ labɩ-ŋ mbʋ pɩfɛyɩ ɖeu yɔ, ñaɣ pana nɛ ŋtaacaɣnɩ-ɩ. Ye pasɩɣzɩ-ŋ lɔŋ nɛ pɩcɛyɩ-ŋ yɔ, taaka ña-lɩmaɣza ɛzɩma pɩcɛyɩ-ŋ yɔ pɩ-yɔɔ, tisi nɛ ŋmʋ lɔŋ tasʋʋ nɛ ŋlɛɣzɩ mbʋ pɩpɔzʋʋ yɔ. Nɛ alɩwaatʋ ndʋ Yehowa ɛgbɛyɛ lakɩ lɛɣzɩtʋ natʋyʋ nɛ titukuni ña-maɣmaɣ yɔ, tisi tɩ-yɔɔ nɛ ña-laŋɩyɛ pilim nɛ ŋɖʋ nesi lɩmaɣzɩyɛ nɖɩ pakpaɣaa yɔ.

16. Ɛbɛ pɩzɩɣ pɩsɩnɩ-ŋ nɛ ŋwolo pɩ-yɔɔ nɛ ŋtaɣ Yehowa nɛ ɛ-ɛgbɛyɛ liu?

¹⁶ Alɩwaatʋ ndʋ pɩtakɩɣ ñe-siɣsiɣ wɛtʋ yɔ, ŋpɩzɩɣ ŋwolo pɩ-yɔɔ nɛ ŋtaɣ Yehowa nɛ ɛ-ɛgbɛyɛ liu. Ɛlɛ pɩsa nɛ ŋla mbʋ lɛ, pɩcɛyaa se ŋɖɔkɩ ña-maɣzɩm camɩyɛ, pʋ-tɔbʋʋ lɛ se pɩcɛyaa se ŋcaɣ ɖiɣ ɖiɣ, ŋmaɣzɩ camɩyɛ, nɛ ŋwɛɛnɩ lɩmaɣza wena Yehowa wɛnɩ wɛtʋ ndʋ ŋwɛɛ nɛ ŋkatɩɣ yɔ tɩ-yɔɔ yɔ. Bibl taa ɛyaa mba pakatɩ kala ana a-ɖɔndɩ nɛ pawabɩ-yɛ yɔ, tɛ ña-taa se ŋkpɛlɩkɩɣ pɔ-yɔɔ tɔm nɛ ŋkpaɣ alɩwaatʋ nɛ ŋmaɣzɩ pa-kɩɖaŋ yɔɔ. Tɩmnɩ Yehowa se ɛsɩnɩ-ŋ. Nɛ taaposi ña-tɩ nɛ ɛgbɛyɛ kaaʋ. Ðɩnɛ ɛlɛ, paa ɛbɛ ɛtɩɩlakɩ yɔ, Sataŋ ɛɛkaɣ pɩzʋʋ nɛ ɛyasɩ ña nɛ Yehowa yaa ña nɛ ɛ-ɛgbɛyɛ mɩ-hɛkʋ taa.—Yak. 4:7.