Pʋcɔ nɛ meheyi-mɩ mbʋ pɩlabɩ pʋwayɩ yɔ lɛ, iyele nɛ mɛnkɛdɩ-mɩ ɛzɩma pɩɖɔma nɛ manpaɣzɩ alɩwaatʋ tɩŋa Ɛsɔ sɛtʋ tʋmɩyɛ labʋ yɔ.

Palʋlɩ-m pɩnaɣ 1942 taa Kaarayiibi lɩm hɛkʋ taa tɛtʋ ndʋ payaɣ se Kurasawo yɔ tɩ-taa, tɩwɛ kajʋka. Man-caa kaalɩnɩ Suriinam, ɛlɛ ɛkʋyɩ nɛ ewolo lɩm hɛkʋ taa tɛtʋ ndʋ tɩ-taa se ɛla tʋmɩyɛ. Pɩnzɩ nasɩyɩ pazɩ pʋcɔ nɛ palʋlʋʋ-m lɛ, ɛha ɛ-tɩ nɛ pamɩyɩsɩ-ɩ lɩm nɛ ɛpɩsɩ Yehowa Aseɣɖe tʋ Kurasawo; nɛ ɛkɛ mba pacalɩ pa-tɩ haʋ peeɖe nɛ pamɩyɩsɩ-wɛ lɩm yɔ pa-taa kʋɖʋm. a Ðɩɩkɛ piya kagbanzɩ, nɛ paa ɖɩtaasɔɔlɩ kpɛlɩkʋʋ paa ɛzɩmtaa yɔ, ɛkpɛlɩkaɣnɩ-ɖʋ Bibl paa kpɩtaʋ ŋgʋ. Mɛwɛnɩ pɩnzɩ 14 lɛ, ɖa nɛ ɖa-caa ɖɩkʋyɩ nɛ ɖiwolo Suriinam se pɩsa nɛ ɛcɔnɩ e-ɖoo yɔɔ, ɛlɛ kaakpadɩyaa.

Ðiwobi Suriinam lɛ, manpaɣzɩ taabalɩyɛ ɖʋʋ nɛ ɛgbɛyɛ taa piya evelisi nzɩ sɩɩwɛ kpekpeka Yehowa sɛtʋ taa yɔ. Sɩɩkɩlɩ-m nɛ pɩnzɩ pazɩ nɛ sɩɩkɛ paa ɖooye nʋmɔʋ lɩzɩyaa. Sɩkɛdaɣ mbʋ sɩkatɩ tɔm susuu taa yɔ nɛ taa leleŋ. Ðɩlakɩ ɛgbɛyɛ taa kediɣzisi nɛ pɩtɛ lɛ, ma nɛ man-taabalaa ɖɩlakaɣ ɖɔɖɔ kɛdɛsɩ pɩlɩɩnɩ Bibl taa tɔm ndɩ ndɩ yɔɔ. Nɛ nabʋyʋ taa ɖɩlakɩ mbʋ alɩwaatʋ ndʋ ɖɩcakɩ awayɩ nɛ ɖɩcɔŋnɩ tɩnzɩ ɛsɔdaa yɔ. Pasɩnɩ-m nɛ menɖiɣzini mbʋ maasɔɔlɩ me-wezuu caɣʋ taa yɔ; maasɔɔlaa se mala Yehowa tʋmɩyɛ. Pʋyɔɔ lɛ, mɛwɛnɩ pɩnzɩ 16 lɛ, maha man-tɩ nɛ pamɩyɩsɩ-m lɩm. Pʋwayɩ mɛwɛnɩ pɩnzɩ 18 lɛ, manpaɣzɩ paa ɖooye nʋmɔʋ lɩzʋʋ tʋmɩyɛ.

Maakɛ nʋmɔʋ lɩzɩyʋ lɛ, mɛnkpɛlɩkɩ lɔŋ sakɩyɛ, nɛ lɔŋ ɛnɩ ɛsɩnɩ-m alɩwaatʋ tɩŋa Ɛsɔ sɛtʋ tʋmɩyɛ taa. Kajalaɣ lɛ, mɛnkpɛlɩkaa se pɩcɛyaa se pafalɩsɩ lalaa. Payaɣ Ɛsɔtɔm tiyiyu nɔɔyʋ se Willem van Seijl; manpaɣzɩ nʋmɔʋ lɩzʋʋ tʋmɩyɛ lɛ, ɛwɩlaa se ɛmaɣzɩɣ mɔ-yɔɔ siŋŋ. b Ɛɛwɩlɩ-m ɛzɩma palakɩ ɛgbɛyɛ taa tʋma ndɩ ndɩ yɔ. Pʋbʋ taa lɛ,  mantaatɩlɩ se pɩɩcɛyɩ kpem se pafalɩsɩ-m mbʋ. Pɩnaɣ ŋga katɩŋaa yɔ ka-taa paha-m waɖɛ nɛ mɛnkɛ nʋmɔʋ lɩzɩyʋ kiya. Nɛ pʋwayɩ lɛ, manpaɣzɩ sɩnʋʋ ɛgbɛyɛ cikpeɖe naɖɩyɛ, ɖɩɩwɛ Suriinam hɛkʋ taa nɛ ɖiiposini agbaa lɛɛna. Maawɛnɩ ɛsɩmɩyɛ kpem se koobiya kaafalɩsɩ-m alɩwaatʋ kɩbandʋ yɔɔ! Kpaɣnɩ alɩwaatʋ ndʋ lɛ, mañaɣ pana se mamaɣzɩnɩ pa-kɩɖaʋ nɛ manfalɩsɩɣ lalaa.

Nabʋlɛ lɛ, mɛnkpɛlɩkaa se pɩwɛ ɖeu se ɛyʋ ɛcaɣ wezuu kɛlɛʋ nɛ ɛwɛɛnɩ ɖʋtʋ kɩbandʋ. Paa fenaɣ ŋga ka-ɖɩbazɩyɛ lɛ, ma nɛ koobu abalɩñɩnʋ weyi ɖɩlakaɣ nʋmɔʋ lɩzʋʋ kiya tʋmɩyɛ yɔ, ɖɩlakaɣ ɖʋtʋ mbʋ pɩkaɣ-ɖʋ pɔzʋʋ tomnaɣ yɔɔ fenaɣ taa yɔ pɩ-yɔɔ. Ðɩlakɩ ɖʋtʋ nɛ ɖɩtɛ lɛ, ɖa-taa kʋɖʋm woki tɛtʋ sɔsɔtʋ taa nɛ ɛya mbʋ pɩpɔzʋʋ-ɖʋ yɔ; tiiposini-ɖʋ. Pɩɩwɛɛ se ɖɩlabɩnɩ liidiye nɖɩ pahaɣ-ɖʋ paa fenaɣ ŋga yɔ tʋmɩyɛ camɩyɛ; pɩpɔzaɣ se ɖɩtɩlɩ mbʋ ɖɩya yɔ nɛ pɩsa nɛ pɩtalɩ-ɖʋ fenaɣ kpeekpe. Ðɩɩwɛ laʋ tɛɛ peeɖe lɛ, ye nabʋyʋ ɛtɛɖɩɣ-ɖʋ yɔ, ɛyaa pazɩ yem pɩzaɣna se pasɩnɩ-ɖʋ, yaa halɩ pɩtɩla nɔɔyʋ tɩpɩzɩɣ se ɛsɩnɩ-ɖʋ. Maakɛ pɩɣa evelaɣ lɛ mɛnkpɛlɩkɩ ɛzɩma mancaɣ wezuu kɛlɛʋ nɛ ɛzɩma mala ɖʋtʋ kɩbandʋ me-wezuu caɣʋ taa yɔ. Nɛ mamaɣzɩɣ se mbʋ sɩnɩnɩ-m nɛ mowolo pɩ-yɔɔ nɛ manka ma-lɩmaɣza Yehowa tʋmɩyɛ labʋ yɔɔ me-wezuu caɣʋ kpeekpe.

Nabudozo lɛ, mɛnkpɛlɩkaa se ye pawɩlɩɣ ɛyaa tɔm pa-maɣmaɣ pa-kʋnʋŋ taa yɔ, pɩwazɩɣ-wɛ nɛ pɩkɩlɩ. Kʋnʋmɩŋ weyi paa weyi ɛyɔɔdaɣ Suriinam yɔ, ɛnɩ lɛ Nerlandɛɛ, Aŋglɛɛ, Papiyamɛnto, nɛ Siranantoŋgo (Payaɣ-kʋ ɖɔɖɔ se Siranaŋ kʋnʋŋ); manpaɣlaɣ lɛ, ɛnɩ mɔyɔɔdaɣ. Ɛlɛ menɖiɣzinaa se mba paawɛ laʋ tɛɛ peeɖe yɔ, alɩwaatʋ ndʋ ɖisusaɣ-wɛ tɔm pa-maɣmaɣ kʋnʋŋ taa yɔ, pewelisaɣ-tʋ camɩyɛ nɛ pɩkɩlɩ. Kʋnʋmɩŋ ɛnɩ, ɩ-taa nɩɩyɩ yɔɔdʋʋ kaawɛ-m kaɖɛ. Ɩ-taa nakʋyʋ lɛ Saramakaŋ; paayɔɔdʋʋ-kʋ lɛ pɩpɔzʋʋ se tɔm pee naayɛ lɛ ɛyʋ nɔɔ ɛkʋyɩ nɛ naayɛ lɛ ɛyʋ nɔɔ etii. Paa mbʋ yɔ, pɩɩcɛyaa se mañaɣ pana. Pɩnzɩ wɛɛ nɛ sɩɖɛɣ lɛ, manpɩzaa nɛ mawɩlɩ toovenim ɛyaa sakɩyɛ nɛ pɩkɩlɩ mbʋ pʋyɔɔ yɔ manpɩzaa nɛ mɔyɔɔdɩ pa-kʋnʋŋ.

Toovenim taa lɛ, picoɖaɣ-m nabʋyʋ taa nɛ pɩcɛyaɣ-m siŋŋ. Kɩyakʋ nakʋyʋ Bibl kpɛlɩkɩyʋ nɔɔyʋ lotu wɩɣaɣ nɛ ɛyɔɔdaɣ Saramakaŋ kʋnʋŋ nɛ mañɩnaɣ se mɔnpɔzɩ-ɩ se ɛzɩma pɩwɛ-ɩ. Ɛlɛ tɔm ndʋ mɔnpɔzɩ-ɩ yɔ, toovenim taa lɛ tɩ-tɔbʋʋ lɛ se ña nɛ hoɣa yaa we? Tɔm ndʋ tɩɩcɛyɩ-ɩ siŋŋ! Paa picoɖaɣ-m ɛzɩ kɩɖaʋ kʋnɛ kɩwɩlɩɣ yɔ, paa ɛzɩmtaa mañaɣ pana se mɔyɔɔdɩ peeɖe mba kʋnʋŋ mɛ-Ɛsɔ sɛtʋ tʋma taa.

Pɩnaɣ 1970 taa, paha-m waɖɛ se mɛnkɛ egeetiye yɔɔ cɔnɩyʋ. Pɩnaɣ ŋga ka-taa, menkilimi agbaa cikpena sakɩyɛ wena awɛ laʋ ŋgʋ kɩ-tɛɛ yɔ a-yɔɔ lɛ, mawɩlɩ koobiya filim nakʋyʋ; kɩ-ñʋʋ yɔ «Une visite au siège mondial des témoins de Jéhovah.» Pɩsa nɛ ɖɩtalɩ koobiya mba pɔ-cɔlɔ lɛ, ma nɛ koobiya nabɛyɛ ɖɩlakaɣnɩ tʋmɩyɛ kpɩyʋʋ kɩɖaɣlʋʋ nakʋyʋ, paalabɩ-kʋ nɛ ɖasɩ. Ðɩɖʋwaɣ ɖa-kpɩyʋʋ taa menziini ŋgʋ kiyeki se ɖɩwɛɛnɩ laatriki miŋ yɔ, sanzɩ, kanɖʋnaa mba pa-taa paɖʋʋ kaɖasɩm yɔ, nɛ wonuu ŋgʋ pawɩlɩnɩ filimwaa yɔ. Ðɩtalɩɣ nɛ ɖitii lɛ, ɖɩkpakɩɣ wondu ndʋ tɩ-tɩŋa nɛ ɖiwoni ɖenɖe ɖɩkaɣ wɩlʋʋ Filim ŋgʋ yɔ. Ɛlɛ mbʋ pɩ-yɔɔ mankɩlɩɣ tɔzʋʋ ɖa-nʋmɔŋ ɖɔm mbʋ pɩ-taa yɔ, mbʋ lɛ ɛzɩma ɛyaa mba paawɛ poliŋ ageeta ana a-taa yɔ paasɔɔlɩ filim ŋgʋ yɔ. Man-taa kaawɛ leleŋ siŋŋ se mansɩnɩ lalaa nɛ  patɩlɩ Yehowa nɛ ɛ-ɛgbɛyɛ hɔɔlʋʋ ŋgʋ kɩ-wɛ tɛtʋ yɔɔ yɔ pɔ-yɔɔ tɔm. Manaɣ ɛzɩma ɛyaa ñɔtɩnɩ Yehowa yɔ lɛ, mantaa lakɩ leleŋ siŋŋ se malaba Yehowa tʋma nɛ kpekpeka.

Maakɛ ɛɖanɛ nɛ pʋyɔɔ lɛ, pɩɩwɛɣ-m kɛlɛʋ nɛ pɩkɩlɩ se mala mɛ-Ɛsɔ sɛtʋ tʋma; paa mbʋ yɔ maasɔɔlaa se mɔnɖɔkɩ nesi. Peeɖe mantɩmnɩ Yehowa nɛ mɔnpɔzɩ-ɩ se ɛsɩnɩ-m nɛ mehiɣ koobu halɩñɩnʋ weyi etisiɣ nɛ ma nɛ ɩ ɖɩla alɩwaatʋ tɩŋa Ɛsɔ sɛtʋ tʋmɩyɛ kaɖɛ ñɩnɖɛ nɖɩ laʋ ŋgʋ kɩ-tɛɛ nɛ taa leleŋ yɔ. Pɩlakaɣ ɛzɩ pɩnaɣ mbʋ yɔ lɛ, manpaɣzɩ ɖanʋʋ Ethel, ɛɛkɛ nʋmɔʋ lɩzɩyʋ kiya nɛ ɛɛwɛnɩ tɩ laʋ lɩmaɣza. Kpaɣnɩ alɩwaatʋ ndʋ Ethel kaakɛ pɩɣa pelaɣ yɔ apostoloo Pɔɔlɩ kɩɖaʋ kaakɛdɩnɩ-ɩ siŋŋ nɛ ɛɛsɔɔlaa se ɛha ɛ-tɩ nɛ ɛla tɔm susuu tʋmɩyɛ ɛzɩ ɛlɛ kaalabʋ yɔ. Ðɩɖɔkɩ nesi septembre 1971 taa nɛ ɖɩpaɣzɩ labʋ egeetiye yɔɔ cɔnʋʋ tʋmɩyɛ.

Hɔʋ ŋgʋ kɩ-taa Ethel caɣaa nɛ ɛpaɣlɩ yɔ, kɩtaawɛɛnɩ tomnaɣ yɔɔ wondu sakɩyɛ pʋyɔɔ lɛ pɩɩwɛ-ɩ kɛlɛʋ se ɛla lɛɣzɩtʋ nɛ ɖɩpɩzɩ nɛ ɖɩla egeetiye yɔɔ cɔnʋʋ tʋmɩyɛ laʋ ŋgʋ kɩ-tɛɛ. Kɩɖaŋ nɩɩyɩ yɔ. Alɩwaatʋ ndʋ ɖɩñɔɔzʋʋ ɖa-tɩ se ɖikilimi agbaa wena awɛ ɖooo poliŋ taa laʋ ŋgʋ kɩ-tɛɛ yɔ a-yɔɔ yɔ, ɖɩɩkpakɩɣ wondu sakɩyɛ. Pɔsɩ taa ɖɩcɔtaɣ ɖo-wondu nɛ ɖɩsɔʋ lɩm. Koobiya mba pamʋwaɣ-ɖʋ yɔ, ɖɩtɔkaɣ tɔɔnasɩ nzɩ payɩ palakaɣ-ɖʋ yɔ. Pɩpɩzɩɣ nɛ pɩkɛ kpɩna wena payaɣ fransɩɩ taa se iguanes yaa kpakpasɩ nzɩ payaɣ se piranhas yɔ, yaa mbʋ payɩ papɩzɩɣ nɛ pakʋ laʋ tɛɛ yaa papɩzɩɣ nɛ pakpa pɔsɩ taa yɔ. Ðenɖe ñanzɩ fɛyɩ yɔ, ɖɩtɔkaɣ tɔɔnaɣ ayaba hatʋ taa. Ðenɖe lɔɔyɩsɩ fɛyɩ yɔ, ɖɩtɔkaɣ tɔɔnaɣ nɛ ɖe-nesi. Ma nɛ Ethel ɖɩnawa se ɖɩla kɩlaŋ nɛ ɖɩkpɛndɩ nɛ ɖɩla Yehowa tʋma lɛ, pɩsɩnɩ-ɖʋ nɛ ɖɩpɩsɩ nimaɣ ŋga palʋ-kɛ tɔm nabudozo taa yɔ. (Ekl. 4:12) Kɩbam mbʋ payɩ ɖihiɣ ɖɛ-Ɛsɔ sɛtʋ tʋmɩyɛ taa yɔ, ɖɩɩpɩzɩɣ nɛ ɖɩkpaɣ-pʋ nɛ ɖɩlɛɣzɩnɩ nabʋyʋ!

Kɩyakʋ nakʋyʋ ɖikilimi koobiya nabɛyɛ yɔɔ laʋ tɛɛ peeɖe nɛ ɖɩpɩsɩɣ lɛ ɖɩkatɩ wɛtʋ ndʋ tɩ-tɔm mɛnkɛdɩ tɔm ñʋʋ kʋnɛ ki-kiɖe tɛɛ yɔ. Kpɩyʋʋ talɩ ɖenɖe lɩm seɣaɣ lɛɛ lɛɛ yɔ lɛ kɩsʋʋ lɩm tɛɛ alɩwaatʋ  pazɩ ɛlɛ kɩcaŋ kɩɖaɣnɩ kpaʋ lɩm yɔɔ. Mbʋ pɩlabɩ ɖeu yɔ lɛ se ɖiisu tokonaa mba pakandɩyɩɣ ɛyʋ yɔɔ se ɛtaasʋʋ lɩm tɛɛ yɔ; pɩtasɩ lɛ, ɖa-taa nɔɔyʋ tɩlɩɩnɩ kpɩyʋʋ taa nɛ ɛtɔlɩ lɩm taa. Ɛlɛ lɩm kaasu kpɩyʋʋ taa. Ðɩlɔ tɔɔnasɩ nzɩ sɩɩwɛ ɖa-ñanzɩ taa yɔ pɔɔ taa nɛ ɖɩkpaɣ-sɩ nɛ ɖɩlazɩnɩ lɩm kpɩyʋʋ taa.

Pɩtaakazɩ-ɖʋ tɔɔnaɣ nakɛyɛ, pʋyɔɔ lɛ ɖiwobi pɩ-yɔɔ nɛ ɖɩɖɔŋ lɩm yɔɔ lɛ, ɖɩpaɣzɩ ñaɣʋ pana se ɖɩkpa kpakpasɩ. Ɛlɛ ɖitaahikiɣ nabʋyʋ se ɖɩkpa. Peeɖe ɖɩtɩmnɩ Yehowa nɛ ɖɩpɔzɩ-ɩ se ɛha-ɖʋ tɔɔnaɣ ŋga pɩpɔzʋʋ-ɖʋ evemiye nɖɩ yɔ. Ðɩtɩɩtɛm tɩmʋʋ lɛ, ma nɛ koobiya mba yɔ pa-taa kʋɖʋm tisi kpakpasɩ kolaɣ lɩm taa nɛ ɛkpa kpakpayaɣ sɔsɔɔ nakɛyɛ nɛ ɖa-kagbanzɩ ɖɩtɔɔ-kɛ ɖoo ana nɛ ɖɩhaɣ.

Ma nɛ Ethel ɖɩkpɛndaa nɛ ɖɩla egeetiye yɔɔ cɔnʋʋ tʋmɩyɛ pɩnzɩ kagbanzɩ wayɩ lɛ, ɖihiɣ wazaɣ ŋga ɖɩtaaɖaŋ yɔ; ŋga lɛ se ɖɩkaɣ pɩsʋʋ lʋlɩyaa. Manɩ tɔm ndʋ lɛ, man-taa la leleŋ; paa mbʋ yɔ, mantaatɩlɩ ɖoŋ weyi pɩkaɣ wɛnʋʋ ɖe-wezuu caɣʋ yɔɔ yɔ. Ma nɛ Ethel ɖɩɩsɔɔlɩ siŋŋ se ɖiwolo pɩ-yɔɔ nɛ ɖɩwɛɛ alɩwaatʋ tɩŋa Ɛsɔ sɛtʋ tʋmɩyɛ taa ye pɩsaŋ yɔ. Ðɩlʋlɩ ɖa-pɩyalʋ Ethniël 1976 taa. Pɩnzɩ naalɛ nɛ hɔɔlʋʋ pʋwayɩ lɛ, ɖɩlʋlɩ ɖa-pɩyalʋ naalɛ ñɩnʋ Giovanni.

Alɩwaatʋ ndʋ tɩ-taa lɛ, kɩcɛyɩm kaawɛ Suriinam, pʋyɔɔ lɛ, ɛgbɛyɛ piliŋa labɩ ɖʋtʋ se mowolo pɩ-yɔɔ nɛ malakɩ egeetiye yɔɔ cɔnʋʋ tʋmɩyɛ, nɛ alɩwaatʋ kʋɖʋmtʋ ndʋ tɩ-taa lɛ ma nɛ ma-halʋ ɖiwolo pɩ-yɔɔ nɛ ɖɩcɔŋnɩ ɖe-piya yɔɔ. Ða-pɩyalaa pɩsɩ piya evelisi lɛ, pɔpɔzɩ-m se menkilimiɣ agbaa pazɩ yɔɔ na. Pɩhaɣaɣ-m waɖɛ se mala egeetiye yɔɔ cɔnʋʋ tʋmɩyɛ kpɩtaŋ naalɛ fenaɣ taa; nɛ alɩwaatʋ ndʋ tɩkazɩ fenaɣ taa yɔ mɛnkɛ nʋmɔʋ lɩzɩyʋ ɛgbɛyɛ nɖɩ ɖɩ-taa maawɛɛ yɔ. Maakilimiɣ agbaa wena añɔtɩnɩ ɖɛ-tɛ yɔ a-yɔɔ lɛ, ma nɛ Ethel nɛ ɖa-pɩyalaa ɖiwokina. Ɛlɛ maakilimiɣ agbaa wena awɛ laŋ tɛɛ yɔ a-yɔɔ nɛ maawoki kigbeɣliŋ weyi palakaɣ peeɖe yɔ ɩ-taa lɛ, men-ɖeke mowokina.

Pɩɩpɔzaa se mala ɖʋtʋ camɩyɛ nɛ pɩsa nɛ manpɩzɩ mala man-tʋma tɩŋa. Malakaɣ mbʋ payɩ pɩpɔzʋʋ yɔ nɛ ɖɩlakɩ ɖɔ-hɔʋ taa Ɛsɔ sɛtʋ paa kpɩtaʋ ŋgʋ. Alɩwaatʋ ndʋ mowoki se menkilimi laʋ tɛɛ agbaa yɔɔ yɔ, Ethel nɛ ɖa-pɩyalaa palakɩ hɔʋ taa Ɛsɔ sɛtʋ, nɛ Ethel cɔŋnaɣnɩ pɩ-yɔɔ. Ɛlɛ ɖoŋ ɖoŋ lɛ, alɩwaatʋ ndʋ pɩsaŋ yɔ, ɖɩkpɛndɩɣ nɛ ɖɩlakɩ tʋma hɔʋ taa. Pɩtasɩ lɛ, ɖoŋ ɖoŋ lɛ ma nɛ Ethel nɛ ɖa-pɩyalaa ɖɩkpɛndaɣ nɛ ɖɩmʋʋ helim. Ðɩlakaɣ aleɣya ndɩ ndɩ yaa ɖiwokaɣ nɛ ɖɩnaɣ lona wena awɛ kajʋka nɛ añɔtɩnɩ ɖa-ɖɩɣa yɔ. Ðoŋ ɖoŋ lɛ, mɔñɔɔzaɣ teokrasɩ tʋma nɛ pʋyɔɔ  lɛ, mantaahɩnɩɣ lɔŋ ɖoo taa. Ethel kɛ halʋ kɩbanʋ weyi ɛ-tɔm pɛkɛdɩ Aduwa 31:15 taa yɔ. Ɛkʋyaɣ lɔŋ pʋcɔ nɛ pɩñandɩɣ, nɛ ɛlakɩ mbʋ payɩ pɩpɔzʋʋ yɔ, piyekaɣ nɛ ɖɩkpɛndɩɣ nɛ ɖɩkalɩɣ evemiye mayaɣ nɛ ɖɩlɩzɩɣ sɔntɔ pʋcɔ nɛ ɖa-pɩyalaa ɖɛʋ sukuli. Mɛwɛnɩ ɛsɩmɩyɛ siŋŋ se mankpaɣ halʋ weyi ɛwɛnɩ tɩ laʋ lɩmaɣza yɔ. Ɛsɩɣnɩ-m paa ɛzɩmtaa nɛ malakɩ tʋma wena payɩ Yehowa ɖʋʋ-m yɔ.

Ðɩñaɣ pana siŋŋ se ɖɩsɩnɩ ɖa-pɩyalaa nɛ pɔsɔɔlɩ Yehowa nɛ tɔm susuu tʋmɩyɛ. Ðɩɩsɔɔlaa se ɖa-pɩyalaa ɛlɩzɩ se palakɩ alɩwaatʋ tɩŋa Ɛsɔ sɛtʋ tʋmɩyɛ; ɖɩɩsɔɔlaa se pa-maɣmaɣ palɩzɩnɩ se palakɩ mbʋ, nɛ pɩtaakɛ se ɖɩsɔɔlaa se pala mbʋ yɔɔ palɩzɩɣ se palakɩ mbʋ. Paa ɛzɩmtaa lɛ, ɖɩkɛdaɣ-wɛ ɛzɩma alɩwaatʋ tɩŋa Ɛsɔ sɛtʋ tʋmɩyɛ yeki se ɛyʋ ehiɣ taa leleŋ yɔ pɩ-tɔm. Ðitaahuzuu ɛsa kala wena ɖɩkataɣ yɔ a-yɔɔ, ɛlɛ ɖɩñɩkaɣ niye ɛzɩma Yehowa sɩnɩ ɖɔ-hɔʋ nɛ ɛwazɩ-kʋ yɔ pɩ-yɔɔ. Pɩtasɩ lɛ, ɖɩñaɣ pana se ɖa-pɩyalaa ɩɖʋ taabalɩyɛ nɛ koobiya mba pasɩɣ Yehowa kajalaɣ ɖeɖe pe-wezuu caɣʋ taa yɔ.

Yehowa ha-ɖʋ mbʋ payɩ pɩpɔzaɣ yɔ nɛ ɖɩcɔnɩ ɖɔ-hɔʋ yɔɔ. Toovenim taa lɛ, paa ɛzɩmtaa maañaɣ pana nɛ mala mbʋ payɩ pɩpɔzʋʋ yɔ nɛ mansɩnɩ mɔ-hɔʋ. Maakɛ ɛɖanɛ nɛ nʋmɔʋ lɩzɩyʋ kiya laʋ tɛɛ lɛ, mɛnkpɛlɩkaa se pɩcɛyaa se mamaɣzɩ nɛ mana mbʋ pɩpɔzʋʋ-ɖʋ tomnaɣ yɔɔ yɔ nɛ mala ɖʋtʋ lɔŋ. Ɛlɛ paa ɖɩɩñaɣ pana nɛ ɖɩla ɖo-ɖoŋ ɖeɖe yɔ, nabʋyʋ taa ɖɩtaawɛɛnɩ mbʋ payɩ pɩpɔzʋʋ-ɖʋ yɔ. Alɩwaatʋ ndʋ tɩ-taa manawa se Yehowa sɩnɩ-ɖʋ. Kɩɖaʋ nakʋyʋ yɔ. Pɩnaɣ 1980 waa ɖɩdɛnɖɛ nɛ pɩnaɣ 1990 waa ɖɩbazɩyɛ taa you labɩ Suriinam. Pɩnzɩ nzɩ sɩ-taa, alɩwaatʋ natʋyʋ taa pɩɩwɛ kaɖɛ se ɛyʋ ɛwɛɛnɩ mbʋ pɩpɔzʋʋ-ɩ yɔ. Paa mbʋ yɔ, Yehowa ha-ɖʋ mbʋ pɩpɔzaɣ-ɖʋ yɔ.—Mat. 6:32.

Ðe-wezuu caɣʋ kpeekpe taa, Yehowa sɩnɩ-ɖʋ nɛ ɖe-liu sɩbɩnɩ mbʋ ɖɩwɛna yɔ nɛ ɖihiɣ koboyaɣ. Ðe-piya yeba nɛ ɖihiɣ taa leleŋ, nɛ ɖɩwɛnɩ ɛsɩmɩyɛ siŋŋ se ɖɩpɩzaa nɛ ɖɩsɩnɩ-sɩ nɛ sɩsɛɣ Yehowa. Ða-taa wɛ leleŋ siŋŋ se sɩlɩzaa ɖɔɖɔ se sɩlakɩ alɩwaatʋ tɩŋa Ɛsɔ sɛtʋ tʋmɩyɛ. Ethniël nɛ Giovanni palabɩ teokrasɩ sukulinaa ndɩ ndɩ nɛ lɛɛlɛɛyɔ lɛ pa nɛ pa-halaa palakɩ tʋmɩyɛ Suriinam ɛgbɛyɛ piliŋa taa.

Lɛɛlɛɛyɔ lɛ, ma nɛ Ethel ɖɩkpadɩyɩ siŋŋ, ɛlɛ ɖiwoki pɩ-yɔɔ nɛ ɖɩlakɩ Yehowa tʋmɩyɛ nɛ kpekpeka; ɖɩkɛ nʋmɔʋ lɩzɩyaa kiya. Toovenim taa lɛ, pɩɖɔkɩnɩ-ɖʋ siŋŋ nɛ pʋyɔɔ lɛ, mentihiɣti alɩwaatʋ se mɛnkpɛlɩkɩ lɩm yaʋ! Ɛlɛ maakpiɖiɣ paa ññɩɩ. Mɔntɔzʋʋ mbʋ pɩlaba nɛ pɩɖɛɛ yɔ pɩ-yɔɔ lɛ, toovenim taa lɛ, mamaɣzɩɣ se lɩmaɣza wena mankpaɣaa se malakɩ alɩwaatʋ tɩŋa Ɛsɔ sɛtʋ tʋmɩyɛ alɩwaatʋ ndʋ maakɛ pɩɣa evelaɣ yɔ pɩkɛ lɩmaɣza wena mankpaɣ me-wezuu caɣʋ taa nɛ akɩlɩ ɖeu yɔ a-taa kʋɖʋmɖɩyɛ.