1. Ɛbɛ ɖɩpɩzɩɣ nɛ ɖɩɖaŋ, nɛ tɔm ndʋ ɖa-taa pɩzɩɣ nɛ pɩtɛmna?

 ÐƖPƖZƖƔ nɛ ɖɩɖaŋ se alɩwaatʋ ndʋ ɖɩlakɩ ɖɔ-tɔm susuu tʋmɩyɛ yɔ, pakaɣ-ɖʋ kaɖɩnʋʋ. Nɛ pɩtɩla yɔ, pakaɣ-ɖʋ kaɖɩnʋʋ cee wayɩ nɛ pɩkɩlɩ. (Dan. 11:44; 2 Tim. 3:12; Natʋ 16:21) Paa mbʋ yɔ, ɖa-taa pɩzɩɣ nɛ pɩtɛ se Yehowa kaɣ-ɖʋ sɩnʋʋ ɛzɩ pɩpɔzʋʋ yɔ. Ɛbɛ yɔɔ? Mbʋ pʋyɔɔ yɔ, paa ɛzɩmtaa lɛ Yehowa sɩnɩ ɛ-sɛyaa nɛ pala tʋma wena ɛɖʋ-wɛ yɔ, paa aawɛ kaɖɛ ɛzɩma yɔ. Pɩsa nɛ ɖɩnɩɩ pɩ-taa camɩyɛ lɛ, iyele nɛ ɖɩna mbʋ pɩɩtalɩ nayʋ Ezekɩyɛɛlɩ e-wezuu caɣʋ taa yɔ pɩ-taa nabʋyʋ. Eesusi tɔm Yuuda ñɩma mba paakɛzɩ-wɛ tɛtʋ Babilɔɔnɩ yɔ.

2. (a) Ɛyaa mba pɩɩwɛɛ se Ezekɩyɛɛlɩ esusi-wɛ tɔm yɔ, Yehowa yɔɔdaa se wɛtʋ ndʋ pɛwɛna? (Ezekɩyɛɛlɩ 2:3-6) (b) Nɛ ɛbɛ ɖɩkaɣ naʋ tɔm ñʋʋ kʋnɛ kɩ-taa?

² Ɛyaa mba paawɛ egeetiye nɖɩ ɖɩ-taa pɩɩwɛɛ se Ezekɩyɛɛlɩ esusi tɔm yɔ, wɛtʋ ndʋ paawɛna? Yehowa yɔɔdaa se: ‘Pɛ-ɛsɩndaa wɛ ñaŋ,’ ‘pa-laŋa taa caɣ ɖoŋ,’ nɛ ‘paañaŋ.’ Pɔkɔŋnaɣ ɛyaa kaɖɛ ɛzɩ sɔɔ yɔ, nɛ pɔ-tɔm kaacaɣ kaɖɛ ɛzɩ pɩjɩsɩ yɔ. Pʋyɔɔ Yehowa heyi Ezekɩyɛɛlɩ tam sakɩyɛ se: «Taase-wɛ sɔɔndʋ»! (Kalɩ Ezekɩyɛɛlɩ 2:3-6.) Ezekɩyɛɛlɩ pɩzaa nɛ ɛla tɔm susuu tʋmɩyɛ, mbʋ pʋyɔɔ yɔ (1) Yehowa tiyini-i, (2) Ɛsɔ fezuu kaaha-ɩ ɖoŋ weyi pɩpɔzʋʋ-ɩ yɔ, nɛ (3) Ɛsɔtɔm kaakpazɩ e-tisuu ɖoŋ. Ɛzɩma pɩɩsɩnɩ Ezekɩyɛɛlɩ? Nɛ ɛzɩma pɩsɩɣnɩ-ɖʋ sɔnɔ?

3. (a) Tɔm ndʋ pɩzaɣ se tɩkpazɩ Ezekɩyɛɛlɩ ɖoŋ? (b) Nɛ ɛzɩma Yehowa yeba nɛ ɛ-taa tɛ se ɛkaɣ-ɩ sɩnʋʋ?

³ Yehowa heyi Ezekɩyɛɛlɩ se: «Mentiyiɣ-ŋ.» (Ezek. 2:3, 4) Tɔm ndʋ tɩɩkpazɩ Ezekɩyɛɛlɩ ɖoŋ. Ɛbɛ yɔɔ? Pɩtʋʋ fɛyɩ se ɛɛtɔzaa se alɩwaatʋ ndʋ Yehowa ɖʋ tʋmɩyɛ Moyizi nɛ Izaayii se pɛkɛ ɛ-nayaa yɔ, eeheyi-wɛ tɔm ndʋ tɩ-ɖɔndɩ. (Ejl. 3:10; Iza. 6:8) Ezekɩyɛɛlɩ kaasɩm ɖɔɖɔ ɛzɩma Yehowa kaasɩnɩ ɛ-nayaa mba pa-naalɛ nɛ pawa kala wena pakataa yɔ. Pʋyɔɔ lɛ, alɩwaatʋ ndʋ Yehowa heyi Ezekɩyɛɛlɩ tam nabʋlɛ se: «Mentiyiɣ-ŋ» yɔ, Ezekɩyɛɛlɩ kaawɛnɩ lɩmaɣza kɩbana wena a-yɔɔ pɩwɛɛ se ɛtaa liu se Yehowa sɩɣnɩ-ɩ yɔ. Nɛ ɖɩnaɣ tɔm tʋnɛ Ezekɩyɛɛlɩ takayaɣ taa tam sakɩyɛ. Tɩtɔŋ se: «[Yehowa] tɔm kɔɔ mɔ-yɔɔ.» (Ezek. 3:16) Pɩtasɩ lɛ, Ezekɩyɛɛlɩ ma tam sakɩyɛ se: «[Yehowa] tɔm heyi-m [yaa tɔm talɩ-m].» (Ezek. 6:1). Pɩtʋʋ fɛyɩ se Ezekɩyɛɛlɩ taa kaatɛma se Yehowa tiyini-i. Pɩtasɩ lɛ, Ezekɩyɛɛlɩ caa kaakɛ cɔjɔ, nɛ pɩtɩla ɛɛwɩlɩ Ezekɩyɛɛlɩ se paa ɛzɩmtaa lɛ, Yehowa heyi ɛ-nayaa se ɛsɩɣnɩ-wɛ. Yehowa kaaheyi Izaakɩ, Yakɔɔb, nɛ Yereemii se: «Mɛwɛ ñɔ-cɔlɔ.»—Kiɖe 26:24; 28:15; Yer. 1:8.

4. Laŋɩyɛ hɛzʋʋ tɔm ndʋ kaakpazɩ Ezekɩyɛɛlɩ ɖoŋ?

⁴ Alɩwaatʋ ndʋ Ezekɩyɛɛlɩ susuu Izrayɛɛlɩ mba tɔm yɔ, ɛzɩma pa-taa sakɩyɛ kaɣ labʋ? Yehowa yɔɔdaa se: «Izrayɛɛlɩ ɖɩɣa taa mba tɩsɔɔlɩ ñe-welisinuu, mbʋ yɔ patɩsɔɔlɩ me-welisinuu.» (Ezek. 3:7) Ye pekizaa se paawelisiɣni Ezekɩyɛɛlɩ yɔ, pɩwɩlɩɣ se pekizaa se paawelisiɣni Yehowa. Tɔm ndʋ, tiyeba nɛ Ezekɩyɛɛlɩ taa tɛ se ye ɛyaa ikizaa se paawelisiɣni-i yɔ, pɩtɩwɩlɩ se ɛtɩla ɛ-tʋmɩyɛ camɩyɛ. Pɩtasɩ lɛ, Yehowa yeba nɛ Ezekɩyɛɛlɩ taa tɛ se alɩwaatʋ ndʋ nɩŋgbaŋʋʋ hɔm tɔm ndʋ esusaa yɔ tɩlakɩ yɔ, ɛyaa kaɣ «tɩlʋʋ se nayʋ nɔɔyʋ kaawɛ pɛ-hɛkʋ taa.» (Ezek. 2:5;  33:33) Pɩtʋʋ fɛyɩ se laŋɩyɛ hɛzʋʋ tɔm ndʋ, tɩɩha Ezekɩyɛɛlɩ ɖoŋ weyi pɩpɔzʋʋ-ɩ yɔ se ɛla ɛ-tɔm susuu tʋmɩyɛ.

5. Tɔm ndʋ Izaayii 44:8 yɔɔdaa nɛ tɩkpazɩɣ-ɖʋ ɖoŋ?

⁵ Ða ɖɔɖɔ ɖihikiɣ ɖoŋ kpazʋʋ, mbʋ pʋyɔɔ yɔ ɖɩnawa se Yehowa tiyini-ɖʋ se ɖisusi tɔm. Ɛɖʋ-ɖʋ hɩɖɛ nɛ ɛyaɣ-ɖʋ se ‘ɛ-aseɣɖe tɩnaa.’ (Iza. 43:10) Pɩkɛ hɩɖɛ ɖʋʋ siŋŋ! Yehowa kaaheyi Ezekɩyɛɛlɩ se: «Taase-wɛ sɔɔndʋ.» Mbʋ ɖɔɖɔ Yehowa heyiɣ-ɖʋ se: «Ɩtaase sɔɔndʋ.» Ɛbɛ yɔɔ pɩtɩpɔzɩ se ɖise sɔɔndʋ mba pakaɖɩɣnɩ-ɖʋ yɔ? Mbʋ pʋyɔɔ yɔ, ɛzɩ Ezekɩyɛɛlɩ yɔ, Yehowa tiyini-ɖʋ nɛ ɛsɩɣnɩ-ɖʋ.—Kalɩ Izaayii 44:8.

6. (a) Tɔm ndʋ Yehowa yɔɔdaa nɛ tiyeki se ɖa-taa ɛtɛ se ɛsɩɣnɩ-ɖʋ? (b) Tɔm ndʋ hɛzɩɣ ɖa-laŋɩyɛ nɛ tɩkpazɩɣ-ɖʋ ɖoŋ?

⁶ Yehowa labɩ-ɖʋ tamaɣ se ɛkaɣ-ɖʋ sɩnʋʋ. Kɩɖaʋ nakʋyʋ yɔ: Pʋcɔ nɛ Yehowa yɔɔdɩ se: «Mɩkɛnɩ ma-aseɣɖe tɩnaa» lɛ, ɛyɔɔdaa se: «Ye ŋtɛzɩɣ lɩm kɔyɔ, ma nɛ ŋ, nɛ pɔsɩ ɩɩkaɣ-ŋ libu; ye miŋ taa kɔyɔ, ɩɩkaɣ-ŋ ñaɣʋ, nɛ miŋ nzʋlʋmɩyɛ ɛɛkaɣ-ŋ ñaɣʋ.» (Iza. 43:2) Alɩwaatʋ ndʋ ɖɩlakɩ ɖɔ-tɔm susuu tʋmɩyɛ yɔ, nabʋyʋ taa ɖɩkatɩɣ kala wena awɛ ɛzɩ pɔsɩ yɔ nɛ nazɩm mbʋ pɩwɛ ɛzɩ miŋ yɔ. Paa mbʋ yɔ, Yehowa sɩɣnɩ-ɖʋ nɛ ɖiwoki pɩ-yɔɔ nɛ ɖisusuu tɔm. (Iza. 41:13) Ɛzɩ pɩɩwɛʋ Ezekɩyɛɛlɩ alɩwaatʋ taa yɔ, mbʋ ɖɔɖɔ sɔnɔ ɛyaa hɔɔlʋʋ sɔsɔʋ kiziɣ se paawelisiɣ tɔm ndʋ ɖisusuu yɔ. Ɛlɛ ɖɩtɔzʋʋ se paa paawelisiɣni-ɖʋ yɔ pɩtɩwɩlɩ se ɖɩtɩla ɖɔ-tɔm susuu tʋmɩyɛ camɩyɛ. Ðɩnawa se ye ɖiwobi pɩ-yɔɔ nɛ ɖisusuu tɔm ɛzɩ Yehowa sɔɔlʋʋ yɔ yɔ, ɖɔ-tɔm kɛdɩɣnɩ-ɩ; nɛ pɩhɛzɩɣ ɖa-laŋɩyɛ nɛ pɩkpazɩɣ-ɖʋ ɖoŋ se ɖɩtɩlɩ tɔm ndʋ. Apostoloo Pɔɔlɩ yɔɔdaa se: «Paa weyi ɛkaɣ mʋʋ ɛ-maɣmaɣ ɛ-kɩhɛyʋʋ ɛzɩ ɛlabʋ ɛ-tʋmɩyɛ yɔ.» (1 Kɔr. 3:8; 4:1, 2). Koobu halɩñɩnʋ nɔɔyʋ labɩ nʋmɔʋ lɩzʋʋ tʋmɩyɛ alɩwaatʋ sakɩyɛ. Ɛyɔɔdaa se: «Man-taa wɛ leleŋ mbʋ pʋyɔɔ yɔ manawa se Yehowa hɛyɩɣ-ɖʋ pana wena ɖɩñakɩ yɔ a-yɔɔ.»

7. Alɩwaatʋ ndʋ payɩ Ezekɩyɛɛlɩ maɣzaɣ natʋ ndʋ ɛnawa yɔ tɩ-yɔɔ yɔ, ɛzɩma pɩlakaɣ-ɩ? (Cɔnɩ takayaɣ huyuu yɔɔ kɩlɛmʋʋ.)

⁷ Ezekɩyɛɛlɩ kaana ɛzɩma Yehowa fezuu wɛ ɖoŋ siŋŋ yɔ. Mbʋ Ezekɩyɛɛlɩ kaana natʋ natʋyʋ taa yɔ, pɩsɩnɩ-ɩ nɛ eɖiɣzina se Ɛsɔ fezuu kaawɛɛ nɛ kɩsɩɣnɩ Ɛsɔ tiyiyaa ɖoŋ tɩnaa nɛ kɩɩwɛɛ ɖɔɖɔ nɛ kɩwɩlɩɣ ɛsɔdaa kɛɛkɛɛ kpela nʋmɔʋ. (Ezek. 1:20, 21) Ɛzɩma Ezekɩyɛɛlɩ laba? Ɛma mbʋ pɩlaba yɔ. Ɛmawa se: «Manawa lɛ, mɔntɔlɩ manpa ɛsa nɛ tɛtʋ.» Pɩɩɖɩɣzɩ Ezekɩyɛɛlɩ kpem nɛ ɛtɔlɩ tataa. (Ezek. 1:28) Pʋwayɩ, alɩwaatʋ ndʋ payɩ Ezekɩyɛɛlɩ maɣzaɣ ŋgee natʋ ndʋ tɩ-yɔɔ yɔ, piyekaɣ nɛ ɛ-taa tɛŋ nɛ pɩkɩlɩɣ se Ɛsɔ fezuu sɩɣnɩ-ɩ nɛ ɛla ɛ-tɔm susuu tʋmɩyɛ.

8-9. (a) Alɩwaatʋ ndʋ Yehowa heyi Ezekɩyɛɛlɩ se ‘ɛkʋyɩ nɛ ɛsɩŋ’ yɔ, ɛbɛ talɩ-ɩ? (b) Ezekɩyɛɛlɩ egeetiye taa ñɩma ñʋʋ taa kaawɛ ɖoŋ; ɛlɛ ɛzɩma Yehowa tasɩ-ɩ kpazʋʋ ɖoŋ se pɩsa nɛ esusi-wɛ tɔm?

⁸ Yehowa heyi Ezekɩyɛɛlɩ se: «Ɛyʋ pɩyalʋ, kʋyɩ ŋsɩŋ ña-nɩŋgbanzɩ yɔɔ nɛ mɔyɔɔdɩnɩ-ŋ.» Tɔm ndʋ, nɛ Ɛsɔ fezuu paha Ezekiyɛɛlɩ ɖoŋ weyi pɩpɔzaɣ-ɩ yɔ se ɛpɩzɩ nɛ ɛkʋyɩ tataa. Ezekɩyɛɛlɩ mawa se: «Nɛ fezuu sʋʋ man-taa, . . . nɛ kɩsɩnzɩ-m ma-nɩŋgbanzɩ yɔɔ.» (Ezek. 2:1, 2) Pʋwayɩ, alɩwaatʋ ndʋ payɩ Ezekɩyɛɛlɩ lakaɣ ɛ-tɔm susuu tʋmɩyɛ yɔ, Ɛsɔ «nee» pʋ-tɔbʋʋ se Ɛsɔ fezuu kiɖeɖeu ɖiyaɣ-ɩ. (Ezek. 3:22; 8:1; 33:22; 37:1; 40:1) Ɛsɔ fezuu kaaha ɖoŋ Ezekɩyɛɛlɩ se pɩsa nɛ ɛpɩzɩ ɛla tʋmɩyɛ nɖɩ paɖʋ-ɩ yɔ, tʋmɩyɛ nɖɩ lɛ se esusi tɔm e-egeetiye taa ɛyaa. Ɛyaa mba ‘pa-ñʋʋ taa caɣ ɖoŋ nɛ pa-laŋɩyɛ taa wɛ kpɩzɩŋ.’ (Ezek. 3:7) Yehowa heyi Ezekɩyɛɛlɩ se: «Malaba nɛ ñɛ-ɛsɩndaa wɛɛ ñaŋ pɩkɩlɩ pɛ-ɛsɩndaa, nɛ ña-ñʋʋ  taa wɛɛ ɖoŋ pɩkɩlɩ pa-ñʋŋ taa; malaba nɛ ñɛ-ɛsɩndaa wɛɛ ɛzɩ ñɩɣlɩm yɔ nɛ pɩkɩlɩ ɖoŋ kaaʋ: taase-wɛ sɔɔndʋ, taaseli pɛ-ɛsɩndaa.» (Ezek. 3:8, 9) Pɩɩwɛ ɛzɩ Yehowa kaawɛɛ nɛ eheyiɣ Ezekɩyɛɛlɩ se: ‘Taayele nɛ ɛzɩma ɛyaa mba pa-ñʋʋ taa wɛ ɖoŋ yɔ piyele nɛ pitibi-ŋ yɔɔɔ. Mankaɣ-ŋ kpazʋʋ ɖoŋ.’

⁹ Pʋwayɩ lɛ, Ɛsɔ fezuu kpaɣ Ezekɩyɛɛlɩ nɛ kiwoni-i egeetiye nɖɩ ɖɩ-taa pɩɩwɛɛ se esusi tɔm yɔ. Ezekɩyɛɛlɩ mawa se: «[Yehowa] nee kaawɛ ɖoŋ pɩŋŋ mɔ-yɔɔ.» Nayʋ Ezekɩyɛɛlɩ kpaɣ kpɩtaʋ kʋɖʋmʋʋ nɛ ɛkpɛlɩkɩ nɛ ɛnɩɩ tɔm ndʋ ɛkaɣ susuu yɔ tɩ-taa camɩyɛ se pɩsa nɛ ɛpɩzɩ nɛ esusi-tʋ nɛ kpekpeka. (Ezek. 3:14, 15) Pʋwayɩ lɛ, Yehowa ɖiyi-i nɛ ewoni-i fɛɛʋ nakʋyʋ taa; ɛtalɩ peeɖe lɛ, «fezuu sʋʋ [ɛ-taa].» (Ezek. 3:23, 24) Lɛɛlɛɛyɔ lɛ, Ezekɩyɛɛlɩ pɩzɩɣ nɛ ɛpaɣzɩ ɛ-tɔm susuu tʋmɩyɛ.

10. Pɩsa nɛ ɖɩpɩzɩ ɖɩla ɖɔ-tɔm susuu tʋmɩyɛ lɛ, sɩnʋʋ mbʋ pɩpɔzʋʋ-ɖʋ, nɛ ɛbɛ yɔɔ?

¹⁰ Pɩsa nɛ ɖɩpɩzɩ nɛ ɖɩla ɖɔ-tɔm susuu tʋmɩyɛ lɛ, sɩnʋʋ mbʋ pɩpɔzʋʋ-ɖʋ? Pɩsa nɛ ɖicosi tɔm pɔzʋʋ mbʋ pɩ-yɔɔ lɛ, iyele nɛ ɖɩtasɩ maɣzʋʋ mbʋ pɩɩtalɩ Ezekɩyɛɛlɩ yɔ pɩ-yɔɔ. Pʋcɔ nɛ ɛpaɣzɩ ɛ-tɔm susuu tʋmɩyɛ lɛ, Ɛsɔ fezuu ha-ɩ ɖoŋ weyi pɩpɔzaɣ-ɩ yɔ. Ɛzɩ Ezekɩyɛɛlɩ yɔ, Ɛsɔ fezuu ɖoŋ taa ɖeke ɖɩpɩzɩɣ nɛ ɖisusuu tɔm sɔnɔ. Ɛbɛ yɔɔ? Mbʋ pʋyɔɔ yɔ Sataŋ wɛɛ nɛ eyouni-ɖʋ se pɩsa nɛ ɛsɩnzɩ ɖɔ-tɔm susuu tʋmɩyɛ. (Natʋ 12:17) Ɛyaa sakɩyɛ maɣzɩɣ se Sataŋ wɛ ɖoŋ siŋŋ nɛ ɖɩɩpɩzɩɣ nɛ ɖiyooni-i nɛ ɖɩwabɩ-ɩ. Ɛlɛ pɩtɩŋnɩ ɖa-aseɣɖe lɩzʋʋ tʋmɩyɛ yɔɔ lɛ, ɖɩwɛɛ nɛ ɖɩwakɩ-ɩ! (Natʋ 12:9-11) Ɛzɩma tɩyɛ? Alɩwaatʋ ndʋ ɖisusuu tɔm yɔ, ɖɩwɩlɩɣ se ɖa-paa fɛyɩnɩ sɔɔndʋ ndʋ Sataŋ ɖʋʋ-ɖʋ yɔ. Ɛzɩma ɖɩpɩzɩɣ nɛ ɖɩlakɩ ɖɔ-tɔm susuu tʋmɩyɛ paa pakaɖɩɣnɩ-ɖʋ yɔ, piyeki se ɖɩkɔ tɔm ñʋʋ suwe? Ðɩpɩzɩɣ nɛ ɖɩkɔ tɔm ñʋʋ se fezuu kiɖeɖeu wɛɛ nɛ kɩhaɣ-ɖʋ ɖoŋ, nɛ pɩtasɩ lɛ ɖɔ-tɔm kɛdɩnɩ Yehowa.—Mat. 5:10-12; 1 Pɩy. 4:14.

11. (a) Ɛbɛ Ɛsɔ fezuu kaɣ-ɖʋ labʋ? (b) Nɛ ɛbɛ ɖɩpɩzɩɣ ɖɩla nɛ ɛwɛɛ nɛ ɛhaɣ-ɖʋ kʋ?

¹¹ Ðɩmaɣzɩɣ ɛzɩma Yehowa kaaha Ezekɩyɛɛlɩ ɖoŋ nɛ ɛpɩzɩ nɛ esusi tɔm yɔ pɩ-yɔɔ lɛ, ɛbɛ  ɖɔɖɔ pɩkpɛlɩkɩɣ-ɖʋ? Pɩkpɛlɩkɩɣ-ɖʋ se Ɛsɔ fezuu pɩzɩɣ nɛ kɩha-ɖʋ ɖoŋ weyi pɩpɔzʋʋ-ɖʋ yɔ nɛ ɖɩpɩzɩ nɛ ɖɩwa kala wena payɩ ɖɩkatɩɣ tɔm susuu taa yɔ. (2 Kɔr. 4:7-9) Ye mbʋ, ɛbɛ ɖɩpɩzɩɣ ɖɩla nɛ ɖa-taa tɛ se Yehowa kaɣ wobu pɩ-yɔɔ nɛ ɛhaɣ-ɖʋ e-fezuu? Pɩpɔzʋʋ se ɖɩtɩmɩɣ nɛ ɖɩpɔzʋʋ-kʋ tam, nɛ ɖa-taa tɛ ɖɔɖɔ se Yehowa kaɣ welisuu ɖa-adɩma. Yesu heyi ɛ-tɔmkpɛlɩkɩyaa se: «Ɩwɛɛ pɔzʋʋ yɔɔ, . . . ɩwɛɛ ñɩnʋʋ yɔɔ, . . . ɩwɛɛ kɔtʋʋ yɔɔ.» Mbʋ pɩlɩɣ pɩ-taa yɔ lɛ se Yehowa kaɣ «haʋ fezuu kiɖeɖeu mba pɔpɔzɩ-ɩ kʋ yɔ.»—Luka 11:9, 13; Tʋma 1:14; 2:4.

12. Ezekɩyɛɛlɩ 2:9–3:3 wɩlɩɣ se le takayaɣ kikpiyaɣ lɩnaa, nɛ tɔm ndʋ wɛ kɔ-yɔɔ?

¹² Pɩtasɩnɩ se Ɛsɔ fezuu kaaha Ezekɩyɛɛlɩ ɖoŋ weyi pɩpɔzʋʋ-ɩ yɔ lɛ, Ɛsɔtɔm ɖɔɖɔ kaakpazɩ e-tisuu ɖoŋ. Ezekɩyɛɛlɩ na nesi nasɩyɩ natʋ taa, sɩɖɔkɩ takayaɣ kikpiyaɣ nakɛyɛ. (Kalɩ Ezekɩyɛɛlɩ 2:9–3:3.) Le takayaɣ kikpiyaɣ ŋga kalɩnaa? Tɔm ndʋ wɛ kɔ-yɔɔ? Ɛzɩma kakpazɩ Ezekɩyɛɛlɩ tisuu ɖoŋ? Iyele nɛ ɖɩna. Takayaɣ kikpiyaɣ ŋga, kalɩnɩ Ɛsɔ kewiyaɣ kpelaɣ cɔlɔ. Pɩtɩla yɔ, Yehowa tɩŋnɩ tiyiyaa naanza mba Ezekɩyɛɛlɩ kaanawa yɔ pa-taa nɔɔyʋ yɔɔ nɛ ɛcɛlɩ-ɩ takayaɣ kikpiyaɣ ŋga. (Ezek. 1:8; 10:7, 20) Ɛsɔtɔm kaawɛnɩ takayaɣ kikpiyaɣ ŋga kɔ-yɔɔ; pɩkɛ nɩŋgbaŋʋʋ hɔm tɔm ndʋ payasɩ tɩ-taa tete yɔ, nɛ pɩɩwɛɛ se Ezekɩyɛɛlɩ esusi-tʋ ɛyaa mba paañaŋ nɛ pɛkɛzɩ-wɛ tɛtʋ yɔ. (Ezek. 2:7) Paama tɔm ndʋ takayaɣ kikpiyaɣ ŋga ka-taa nɛ ka-wayɩ.

13. Yehowa heyi Ezekɩyɛɛlɩ se ɛla takayaɣ kikpiyaɣ ŋga we, nɛ ɛbɛ yɔɔ kɛwɛ leleŋ?

¹³ Yehowa heyi Ezekɩyɛɛlɩ se ɛtɔɔ takayaɣ kikpiyaɣ ŋga nɛ ‘ɛhaɣ.’ Ezekɩyɛɛlɩ ña nɛ ɛtɔɔ takayaɣ kikpiyaɣ ŋga ka-tɩŋa. Natʋ hɔɔlʋʋ ŋgʋ kɩ-tɔbʋʋ lɛ suwe? Pɩɩpɔzaa se Ezekɩyɛɛlɩ ɛnɩɩ natʋ tɔm ndʋ ɛkaɣ susuu yɔ tɩ-taa camɩyɛ. Nɛ pɩɩwɛɛ se etisi tɔm ndʋ tɩ-yɔɔ nɛ tiseɣti-i nɛ esusi-tʋ. Pʋwayɩ lɛ, nabʋyʋ la nɛ pɩwɛ piti. Ezekɩyɛɛlɩ ɖiɣzinaa se takayaɣ ŋga ‘kɛwɛ leleŋ ɛzɩ tʋŋ num yɔ.’ (Ezek. 3:3) Ɛbɛ yɔɔ? Mbʋ pʋyɔɔ yɔ Ezekɩyɛɛlɩ ɛsɩndaa lɛ, ɛzɩma Yehowa ɖʋ-ɩ hɩɖɛ se ɛyɔɔdɩ tɔm e-lone taa yɔ, pɩɩha-ɩ taa leleŋ nɛ pɩɩkɛdɩnɩ-ɩ. (Keɣa 18:9-12) Ɛɛwɛnɩ ɛsɩmɩyɛ se Yehowa ha-ɩ waɖɛ se ɛkɛ ɛ-nayʋ.

14. Ɛbɛ sɩnɩ Ezekɩyɛɛlɩ nɛ etisi nɛ ɛla tʋmɩyɛ nɖɩ paɖʋ-ɩ yɔ?

¹⁴ Pʋwayɩ lɛ, Yehowa heyi Ezekɩyɛɛlɩ se: «Ðɔkɩ ña-laŋɩyɛ taa mɔn-tɔm ndʋ meheyiɣ-ŋ yɔ ti-kpeekpe nɛ ŋwelisi-tʋ nɛ ña-nɩŋgbaaŋ.» (Ezek. 3:10) Yehowa tɩŋnɩ tɔm ndʋ tɩ-yɔɔ nɛ eheyi Ezekɩyɛɛlɩ se ɛɖɔkɩ tɔm ndʋ pama takayaɣ kikpiyaɣ ŋga kɔ-yɔɔ yɔ ɛ-ñʋʋ taa nɛ ɛmaɣzɩɣ tɩ-yɔɔ. Alɩwaatʋ ndʋ Ezekɩyɛɛlɩ labɩ mbʋ yɔ, piyeba nɛ e-tisuu kpa ɖoŋ nɛ pɩkɩlɩ. Pɩtasɩ lɛ, piyeba nɛ ɛwɛɛnɩ tɔm sɔsɔtʋ ndʋ pɩɩwɛɛ se esusi ɛyaa yɔ. (Ezek. 3:11) Alɩwaatʋ ndʋ Ezekɩyɛɛlɩ nɩ Ɛsɔtɔm taa camɩyɛ nɛ etisi tɩ-yɔɔ yɔ, ɛpɩzaɣ se ɛpaɣzɩ-tʋ susuu nɛ ewolo pɩ-yɔɔ nɛ ɛtɛ ɛ-tɔm susuu tʋmɩyɛ nɖɩ.—Kpaɣ-tʋ nɛ ŋmaɣzɩnɩ Keɣa 18:15.

15. Pɩsa nɛ ɖiwolo pɩ-yɔɔ nɛ ɖɩla ɖɔ-tɔm susuu tʋmɩyɛ lɛ, tɔm ndʋ pɩpɔzʋʋ se ‘ɖɩɖɔkɩ ɖa-laŋɩyɛ taa’?

¹⁵ Pɩsa nɛ ɖiwolo pɩ-yɔɔ nɛ ɖɩlakɩ ɖɔ-tɔm susuu tʋmɩyɛ lɛ, pɩcɛyaa se ɖa ɖɔɖɔ ɖiyele nɛ Ɛsɔtɔm wɛɛ nɛ tɩkpazɩɣ ɖe-tisuu ɖoŋ. Tɔm ndʋ payɩ Yehowa heyiɣ-ɖʋ yɔ, pɩcɛyaa se ‘ɖɩɖɔkɩ-tʋ ɖa-laŋɩyɛ taa.’ Sɔnɔ, Yehowa tɩŋɩɣnɩ ɛ-Tɔm Bibl yɔɔ nɛ ɛyɔɔdʋʋnɩ-ɖʋ. Ɛzɩma ɖɩpɩzɩɣ ɖɩla nɛ Ɛsɔtɔm wolo pɩ-yɔɔ nɛ tɩwɛɛnɩ ɖoŋ ɖa-maɣzɩm, ɛzɩma pɩlakɩ-ɖʋ yɔ, nɛ mbʋ piseɣtiɣ-ɖʋ yɔ pɩ-yɔɔ?

16. (a) Ɛbɛ pɩwɛɛ se ɖɩla Ɛsɔtɔm? (b) Nɛ ɛzɩma ɖɩpɩzɩɣ ɖɩla nɛ tɩsʋʋ ɖa-laŋɩyɛ taa?

¹⁶ Alɩwaatʋ ndʋ ɖɩtɔkɩ tɔɔnaɣ nɛ kɔyɔlɩ ɖa-taa  yɔ, piyeki nɛ ɖo-tomnaɣ kpa ɖoŋ nɛ pɩkɩlɩ. Mbʋ ɖɔɖɔ alɩwaatʋ ndʋ ɖɩkpɛlɩkɩɣ Ɛsɔtɔm nɛ ɖɩmaɣzɩɣ tɩ-yɔɔ yɔ, ɖe-tisuu kpaɣ ɖoŋ nɛ pɩkɩlɩ. Lɔŋ ɛnɩ ɖɩkpɛlɩkɩɣ takayaɣ kikpiyaɣ tɔm taa. Yehowa sɔɔlaa se ɖo-lotu ‘ɛtɔɔ ɛ-Tɔm nɛ tɩhaɣ,’ pʋ-tɔbʋʋ se ɛsɔɔlaa se ɖɩnɩɩ tɩ-taa camɩyɛ. Pɩsa nɛ ɖɩnɩɩ tɩ-taa camɩyɛ lɛ, pɩwɛɛ se ɖɩtɩmɩɣ, ɖɩkalɩɣ-tʋ nɛ ɖɩmaɣzɩɣ tɩ-yɔɔ. Kajalaɣ lɛ, ɖɩtɩmɩɣ se ɖɩñɔɔzɩ ɖa-laŋɩyɛ nɛ pɩsa nɛ ɖɩnɩɩ Ɛsɔtɔm taa. Pʋwayɩ lɛ, ɖɩkalɩ Bibl hɔɔlʋʋ ŋgʋ ɖɩñɩnɩɣ kalʋʋ yɔ. Pʋbʋ wayɩ lɛ, ɖɩhɛtɩ nɛ pɩsa nɛ ɖɩmaɣzɩ camɩyɛ tɔm ndʋ ɖɩkalaa yɔ tɩ-yɔɔ. Ɛbɛ lɩɣ pɩ-taa? Ðɩmaɣzɩɣ Ɛsɔtɔm yɔɔ nɛ pɩkɩlɩɣ lɛ, ɖɩkaɣ nɩʋ tɩ-taa nɛ pɩkɩlɩ nɛ pɩkaɣ kpazʋʋ ɖe-tisuu ɖoŋ.

17. Ɛbɛ yɔɔ pɩcɛyaa se ɖɩmaɣzɩɣ tɔm ndʋ ɖɩkalɩɣ Bibl taa yɔ tɩ-yɔɔ?

¹⁷ Ɛbɛ yɔɔ pɩcɛyaa se ɖɩkalɩɣ Bibl nɛ ɖɩmaɣzɩɣ tɔm ndʋ ɖɩkalɩɣ yɔ tɩ-yɔɔ? Ye ɖɩlakɩ mbʋ yɔ pɩhaɣ-ɖʋ ɖoŋ weyi pɩpɔzʋʋ-ɖʋ se ɖisusi Kewiyaɣ tɔm lɛɛlɛɛyɔ yɔ, nɛ pɩhaɣ-ɖʋ ɖoŋ ɖɔɖɔ se ɖisusi nɩŋgbaŋʋʋ hɔm tɔm ndʋ pɩtɩla pɩkazɩ pazɩ lɛ ɖɩkaɣ susuu yɔ. Pɩtasɩ lɛ, alɩwaatʋ ndʋ ɖɩmaɣzɩɣ Yehowa wɛtʋ kɩbandʋ ndɩ ndɩ yɔɔ yɔ, ɖa nɛ ɩ ɖa-taabalɩyɛ cɛyɩsɩɣ nɛ pɩkɩlɩ. Mbʋ pɩlɩɣ pɩ-taa yɔ lɛ se ɖɩkaɣ wɛnʋʋ laŋhɛzɩyɛ nɛ ɖa-taa wɛɛ leleŋ nɛ ɖe-liu kaɣ sɩbɩnʋʋ mbʋ ɖɩwɛna yɔ.—Keɣa 118:103.

18. Tɔm ndʋ ɖo-kooka taa mba kaɣ ɖiɣzinuu, nɛ ɛbɛ yɔɔ?

¹⁸ Ezekɩyɛɛlɩ kaakɛ nayʋ, ɛlɛ ɖa lɛ ɖɩtɩkɛ nayaa. Paa mbʋ yɔ, ɖɩtɛm ɖa-taa se ɖiwoki pɩ-yɔɔ nɛ ɖisusi Yehowa tɔm ndʋ eyeba nɛ tɩwɛɛ Bibl taa yɔ nɛ pɩkɔɔ pɩtalɩ alɩwaatʋ ndʋ ɛtɔŋ se pɩmaɣaa yɔ. Tɔm hʋʋ alɩwaatʋ talɩɣ lɛ, ɛyaa mba pɛwɛ ɖo-kooka taa yɔ paakaɣ pɩzʋʋ nɛ pɔyɔɔdɩ se patɩpaɣ-wɛ yaa paakaɣ pɩzʋʋ nɛ pɔyɔɔdɩ ɖɔɖɔ se Ɛsɔ sɔ pɔ-yɔɔ. (Ezek. 3:19; 18:23) Ɛlɛ, pakaɣ ɖiɣzinuu se tɔm ndʋ ɖisusaɣ yɔ tɩlɩnɩ Ɛsɔ cɔlɔ.

19. Ɛbɛ kaɣ-ɖʋ haʋ ɖoŋ nɛ ɖɩla ɖɔ-tɔm susuu tʋmɩyɛ nɛ ɖɩtɛm-ɖɩ?

¹⁹ Ɛbɛ kaɣ-ɖʋ haʋ ɖoŋ nɛ ɖɩla ɖɔ-tɔm susuu tʋmɩyɛ nɛ ɖɩtɛm-ɖɩ? Mbʋ pɩɩsɩnɩ Ezekɩyɛɛlɩ yɔ mbʋ kaɣnɩ-ɖʋ sɩnʋʋ ɖɔɖɔ. Ðiwoki pɩ-yɔɔ nɛ ɖisusuu tɔm mbʋ pʋyɔɔ yɔ ɖɩnawa se Yehowa tiyini-ɖʋ, Ɛsɔ fezuu kiɖeɖeu haɣ-ɖʋ ɖoŋ weyi pɩpɔzʋʋ-ɖʋ yɔ, nɛ Ɛsɔtɔm kpazɩɣ ɖe-tisuu ɖoŋ. Yehowa sɩɣnɩ-ɖʋ nɛ piseɣtiɣ-ɖʋ se ɖɩla ɖɔ-tɔm susuu tʋmɩyɛ nɛ ɖɩɖɔkɩ ɖa-laŋɩyɛ nɛ «pɩkɔɔ pɩtɛ.»—Mat. 24:13.