ÐO-KOOBIYA halɩñɩma nabɛyɛ 3 wɛ Ɛndoneezii lɩm hɛkʋ taa tɛtʋ cikpetu ndʋ payaɣ se Sangir Besar yɔ tɩ-taa. Pɩlakɩ pɩnzɩ nasɩyɩ yɔ, pɛkpɛndaɣ nɛ palakɩ tʋmɩyɛ teŋgu kidiiliŋ yɔɔ. Pɔ-tɔm susuu tʋmɩyɛ yɔɔ lɛ, pasɩm-wɛ camɩyɛ lɩm hɛkʋ taa tɛtʋ ndʋ tɩ-taa. Pasɩɣnɩ ɛyaa se panɩɩ Bibl taa. Ɛlɛ alɩwaatʋ ndʋ tɩ-taa, palakaɣ ɖɔɖɔ tʋmɩyɛ nɖɩ ɖɩɩwɛ ndɩ yɔ.

Kajalaɣ lɛ, petiki teŋgu taa nɛ pañɩnɩ kaaŋ sɔsɔŋ nɛ palɩzɩ-ɩ kidiiliŋ yɔɔ. Kaaŋ ɛnɩ ɩ-taa nɩɩyɩ paɣlɩka talɩɣ pombo paɣlɩka. Pʋwayɩ lɛ, ɖo-koobiya halɩñɩma mba pacaɣ kpelisi nasɩyɩ yɔɔ nɛ pɔyɔkɩ kaaŋ ɛnɩ nɛ hamanaa. Pɔyɔkʋʋ-ɩ lɛ, ɩ-paɣlɩka ɛɛtalɩɣ kelimiye yaɖɛ. Pɛtɛŋ lɛ, pokuu kaaŋ ɛnɩ nɛ paɖʋ rɔba tɔkasɩ cikpesi nasɩyɩ taa nɛ powoni pɛ-tɛ. Pʋwayɩ lɛ, posuu kaaŋ ɛnɩ huyiŋ sɔsɔŋ nɩɩyɩ taa se pɩsa nɛ paɖʋ-ɩ lɔɔɖa sɔsɔna taa nɛ powona nɛ palabɩnɩ habɛɛ.

Payaɣ koobiya halɩñɩma mba pa-taa lɛlʋ se Hulda. Ɛ-wɛtʋ haɣaɣ-ɩ nʋmɔʋ se ɛlakɩ tʋmɩyɛ nɖɩ alɩwaatʋ sakɩyɛ nɛ pɩkɩlɩ koobiya halɩñɩma lalaa. Ðoŋ ɖoŋ lɛ, ɛkpakaɣ liidiye nɖɩ payɩ pɛhɛyɩɣ-ɩ yɔ nɛ ɛyakɩnɩ mbʋ pɩpɔzʋʋ ɛ-hɔʋ evemiye taa yɔ. Ɛlɛ lɛɛlɛɛyɔ lɛ, ɛsɔɔlaa ɖɔɖɔ se ɛlɩzɩ liidiye nɖɩ ɖɩ-taa nɛ ɛyabɩnɩ pʋyʋ nɔɔyʋ. Ɛɛsɔɔlaa se ɛya taabɩlɛɛtɩ nɛ ɛpɩzɩ ɛlabɩnɩ tʋmɩyɛ JW Library^®. Hulda kaanawa se videowaa nɛ wondu lɛɛtʋ ndʋ tɩwɛ JW Library^® yɔɔ yɔ, tɩkaɣ-ɩ sɩnʋʋ ɛ-tɔm susuu tʋmɩyɛ taa; nɛ tɩkaɣ-ɩ sɩnʋʋ ɖɔɖɔ nɛ ɛnɩɩ Bibl taa nɛ pɩkɩlɩ.

Hulda kpaɣ fenaɣ kʋɖʋmaɣ nɛ hɔɔlʋʋ nɛ ɛyɔkɩnɩ kaaŋ nɛ isu lɔɔɖɩyɛ cikpeɖe naɖɩyɛ. Paa tanaŋ ŋgʋ lɛ, ɛlakaɣ tʋmɩyɛ ñɩɣtʋ 2. Pɩtɛmnaa se ɛkɔm nɛ ehiɣ liidiye nɛ ɛya taabɩlɛɛtɩ.

Hulda yɔɔdaa se: «Paa kaaŋ yɔkʋʋ ɛɛnɩ-m siŋŋ yɔ, manpaɣzɩ labɩnʋʋ tʋmɩyɛ mɛn-tɛ taabɩlɛɛtɩ kɩfalʋʋ nɛ mɛwɛɛ niye tɔm susuu taa nɛ mɔñɔɔzʋʋ kediɣzisi kɛlɛʋ yem lɛ, mɔnsɔɔ wɩzasɩ nɛ kʋñɔmɩŋ ɛnɩ ɩ-tɩŋa ɩ-yɔɔ.» Ɛyɔɔdaa ɖɔɖɔ se taabɩlɛɛtɩ ŋgʋ kɩɩsɩnɩ-ɩ alɩwaatʋ ndʋ Covid kʋdɔŋ paɣzaa yɔ, mbʋ pʋyɔɔ yɔ visioconférence yɔɔ patɩŋaɣna nɛ palakɩ ɛgbɛyɛ taa tʋma kpeekpe. Ða-taa wɛ leleŋ se Hulda pɩzaa nɛ ɛtalɩ ɛ-kaɖʋwa.