Ŋsɔɔlaa se ña-tɩ yɔɔ kpɛlɩkʋʋ ɛwazɩ-ŋ nɛ pɩkɩlɩ? Lɔŋ tasʋʋ mbʋ pɩkɔŋ yɔ, pɩpɩzɩɣ pɩsɩnɩ-ŋ nɛ ŋka ña-lɩmaɣza kpɛlɩkʋʋ yɔɔ nɛ pɩkɩlɩ:

• Ñɩnɩ lone kɩbanɖɛ. Ye pɩsaŋ yɔ, caɣ ɖenɖe pɩwɛ cɩɖɩ cɩɖɩ yɔ nɛ ɖenɖe ñalɩmɩyɛ wɛɛ yɔ se pɩsa nɛ ŋna camɩyɛ. Ŋpɩzɩɣ nɛ ŋcaɣ taabɩlɩ yɔɔ yaa ŋcaɣ lone kɩbanɖɛ naɖɩyɛ taa awayɩ.

• Caɣ ɖenɖe ŋpɩzɩɣ nɛ ŋwɛɛ ñe-ɖeke yɔ. Yesu kaalɩzaa se ɛtɩmɩɣ «tanaŋ tɛɛ cu» nɛ «lone nɖɩ ɖɩ-taa ɛyaa fɛyɩ yɔ» ɖɩ-taa. (Mark. 1:35) Ye pɩɩsaŋ se ŋwɛɛ ɖoŋnɔɔyʋ ñe-ɖeke yɔ, ŋpɩzɩɣ nɛ ŋyele nɛ ñɔ-hɔʋ taa mba yaa mba ña nɛ wɛ ɩwɛɛ yɔ patɩlɩ alɩwaatʋ ndʋ ŋkpɛlɩkɩɣ yɔ nɛ ŋheyi-wɛ se pataacɛyɩ-ŋ alɩwaatʋ ndʋ tɩ-taa.

• Ka ña-lɩmaɣza kpɛlɩkʋʋ yɔɔ. Ñaɣ pana nɛ ña-lɩmaɣza ɩtaayɛlɩ. Ye ñɛ-tɛ pɔrtaabɩlɩ yaa ñɛ-tɛ taabɩlɛɛtɩ taa ŋkpɛlɩkɩɣ yɔ, ñɔɔzɩ-kʋ nɛ nɔɔyʋ ɛtaaya-ŋ alɩwaatʋ ndʋ ŋkpɛlɩkɩɣ yɔ yaa message waa ɩtaakɔɔ kɩ-taa. Nɛ ye ŋpaɣzɩ kpɛlɩkʋʋ nɛ ŋtɔzɩ se pɩwɛɛ se ŋla nabʋyʋ yɔ, ma-tʋ ɖoli se pɩsa nɛ ŋtɔzɩ nɛ ŋlabɩ-pʋ pʋwayɩ. Ye ña-lɩmaɣza ɩwɛɛ nɛ ayɛlɩɣ yɔ, kʋyɩ nɛ ŋɖɔ pazɩ yaa ŋhɔ ña-tɩ.