PƖWƐ-Ŋ kaɖɛ se ŋkpɛlɩkɩɣ Bibl paa kpɩtaʋ ŋgʋ? Pɩlakɩ-ŋ nabʋyʋ taa ɛzɩ Bibl kpɛlɩkʋʋ ɛɛhaɣ-ŋ taa leleŋ yɔ? Pɩpɩzɩɣ nɛ pɩtalɩ ɖa-tɩŋa mbʋ nabʋyʋ taa. Ɛlɛ maɣzɩ mbʋ ɖɩlakɩ ɖoŋ ɖoŋ yɔ pɩ-taa nabʋyʋ yɔɔ nɛ ŋna. Ðɩkpaɣ ɛzɩ lɩm sɔʋ mbʋ yɔ. Lɩm sɔʋ kpakɩɣ alɩwaatʋ nɛ pɩpɔzʋʋ ɖɔɖɔ pana ñaɣʋ. Ɛlɛ ɖɩtɛŋ lɩm sɔʋ lɛ, pɩlakɩ-ɖʋ camɩyɛ. Papɩzɩɣ ɖɔɖɔ nɛ pakpaɣ Bibl kpɛlɩkʋʋ nɛ pamaɣzɩnɩ ɛzɩma ‘ɛyʋ tɩŋɩɣnɩ tɔm yɔɔ nɛ ɛsɔʋ lɩm’ nɛ pɩlakɩ-ɩ camɩyɛ yɔ. (Efɛz. 5:26) Yele nɛ ɖɩna lɔŋ tasʋʋ mbʋ pɩpɩzɩɣ nɛ pɩsɩnɩ-ŋ yɔ:

• La ɖʋtʋ. Tɩ yɔɔ kpɛlɩkʋʋ kɛ «mbʋ pɩ-tɔm kɩlɩ cɛyʋʋ yɔ» pɩ-taa nabʋyʋ, nɛ pɩtɩmʋna se Krɩstʋ tʋ ɛla kaakendu pɩ-yɔɔ. (Filp. 1:10) Pɩsa nɛ ŋɖɔ ña-ɖʋtʋ yɔɔ lɛ, pɩwɛɣ ɖeu se ŋma-tʋ nɛ ŋkam-tʋ ɖenɖe ŋpɩzɩɣ nɛ ŋna-tʋ kɛlɛʋ yɔ; pɩpɩzɩɣ pɩkɛ kpata yɔɔ yaa frigoo yɔɔ. Yaa ŋpɩzɩɣ nɛ ŋñɔɔzɩ ñɛ-tɛ pɔrtaabɩlɩ se pɩñɔtʋʋnɩ kpɛlɩkʋʋ alɩwaatʋ lɛ kɩtɔzɩ-ŋ.

• Maɣzɩ mbʋ pɩpɩzɩɣ pɩsɩnɩ-ŋ nɛ ŋka ña-lɩmaɣza kpɛlɩkʋʋ yɔɔ yɔ pɩ-yɔɔ. Ɛbɛ wɛ-ŋ kɛlɛʋ nɛ pɩkɩlɩ? Ye ŋkpakɩɣ ñɩɣyʋʋ kʋɖʋmʋʋ mbʋ yɔ nɛ ŋkpɛlɩkɩɣna yɔ, pɩwɛɣ-ŋ kɛlɛʋ se ŋka ña-lɩmaɣza kpɛlɩkʋʋ yɔɔ? Yaa pɩkɩlɩɣ ɖeu se ŋtayɩ alɩwaatʋ ndʋ ŋkpɛlɩkɩɣna yɔ nɛ ŋkpɛlɩkɩɣ pazɩ pazɩ? Ñasɩmnɩ mbʋ pɩwazɩɣ-ŋ nɛ pɩkɩlɩ yɔ. Pʋyɔɔ lɛ, ŋŋlakɩ kpɛlɩkʋʋ ɖʋtʋ lɛ, pɩwɛɛ se tɔm ndʋ tɩwɛɛ ña-lɩmaɣza taa. Ye kpɛlɩkʋʋ alɩwaatʋ ɛtalaa nɛ pɩɩlakɩ-ŋ liu se ŋkpɛlɩkɩ yɔ, ñaɣ pana nɛ ŋkpɛlɩkɩ ɛzɩ cɛcɛsɩ 10 mbʋ yɔ. Ye ŋkpɛlɩkɩ cɛcɛsɩ pazɩ yɔ pɩwɛ weewee nɛ pɩkɩlɩ se ŋtaatɩɩkpɛlɩkʋʋ. Nɛ ŋñɩtɩɣ nɛ ŋpaɣzɩ lɛ, pʋtɔma pɩkaɣ-ŋ seɣtuu se ŋwolo pɩ-yɔɔ.—Filp. 2:13.

• Lɩzɩ tɔm ndʋ ŋsɔɔlaa se ŋkpɛlɩkɩ yɔ pʋcɔ nɛ kpɛlɩkʋʋ alɩwaatʋ talɩ. Ye ŋtɛm caɣʋ pʋcɔ nɛ ŋpɔzɩ ña-tɩ se ɛbɛ pɩwɛɛ se ŋkpɛlɩkɩ yɔ, ŋŋkaɣ ‘labɩnʋʋ ña-alɩwaatʋ tʋmɩyɛ camɩyɛ.’ (Efɛz. 5:16) Ñaɣ pana nɛ ŋma tɔm ñʋŋ weyi ŋsɔɔlaa se ŋkpɛlɩkɩ yɔ ɖoŋnɔɔyʋ. Ye ŋtɩnɩɩ tɔm natʋyʋ taa camɩyɛ nɛ ŋsɔɔlɩ se ŋnɩɩ tɩ-taa nɛ pɩkɩlɩ yɔ, sɔzɩ-tʋ tɔm ñʋŋ ɛnɩ ɩ-yɔɔ. Nɛ ŋtɛŋ kpɛlɩkʋʋ lɛ, pɩtɩla ŋwɛɣnɩ tɔm kɩfatʋ lɛɛtʋ; ŋpɩzɩɣ nɛ ŋsɔzɩ-tʋ ɖɔɖɔ tɔm ñʋŋ weyi ŋsɔɔlaa se ŋkpɛlɩkɩ yɔ ɩ-yɔɔ.

• Lɛɣzɩ ña-ɖʋtʋ ye pɩpɔzʋʋ yɔ. Nabʋyʋ taa, pɩpɩzɩɣ nɛ pɩpɔzɩ se ŋlɛɣzɩ ña-ɖʋtʋ ɛzɩ alɩwaatʋ ndʋ ŋkpakɩɣ nɛ ŋkpɛlɩkɩɣna yɔ yaa tɔm ñʋŋ weyi ŋlɩzaa se ŋkpɛlɩkɩɣ yɔ. Mbʋ pɩ-tɔm kɩlɩ cɛyʋʋ yɔ lɛ se ŋkpɛlɩkɩɣ paa kpɩtaʋ ŋgʋ, pɩtɩkɛ ɛzɩmtaa ŋkpɛlɩkɩɣ yɔ yaa alɩwaatʋ ɛzɩma ŋkpɛlɩkɩɣ yɔ yaa tɔm ndʋ ŋkpɛlɩkɩɣ yɔ pɩ-tɔm kɩlɩnɩ cɛyʋʋ.

Ye ɖɩkpɛlɩkɩɣ Bibl paa kpɩtaʋ ŋgʋ yɔ, ɖɩkaɣ hiɣu wazasɩ sakɩyɛ. Ðɩñɔtʋʋnɩ Yehowa, ɖɩkpakɩɣ lɩmaɣza kɩbana nɛ ɖɩkaɣ kpaʋ ɖoŋ fezuu taa.—Yoz. 1:8.