1-2. Tʋma wena ɛgbɛyɛ taa ɛzʋtʋyʋ lakɩ?

 YE ŊKƐ ɛgbɛyɛ taa tʋmlaɖʋ yɔ, pɩtɩla ŋwɛɛ nɛ ŋñakɩ pana se ŋwɛɛnɩ wɛtʋ ndʋ tɩsɩɣnɩ-ŋ se ŋpɩsɩ ɛgbɛyɛ taa ɛzʋtʋyʋ yɔ. Ŋsɔɔlaa se ŋla «tʋmɩyɛ kɩbanɖɛ» nɖɩ?—1 Tim. 3:1.

² Tʋma wena ɛgbɛyɛ taa ɛzʋtʋyʋ lakɩ? Ɛɖɛɣ nɔɔ tɔm susuu tʋmɩyɛ taa, ɛñakɩ pana nɛ ekilimiɣ koobiya yɔɔ nɛ ɛwɩlɩɣ tɔm, nɛ ɛtɩŋɩɣnɩ ɛ-yɔɔdaɣ nɛ ɛ-kɩɖaʋ kɩbaŋʋ yɔɔ nɛ ɛkpazɩɣ ɛgbɛyɛ ɖoŋ. Pʋyɔɔ Bibl yaɣ ɛgbɛyɛ taa ɛzʋtʋyaa mba palakɩ tʋmɩyɛ nɛ kpekpeka yɔ se ‘ɛyaa kʋjɔŋ.’—Efɛz. 4:8.

3. Ɛbɛ koobu abalɩñɩnʋ nɔɔyʋ pɩzɩɣ ɛla nɛ ɛpɩsɩ ɛgbɛyɛ taa ɛzʋtʋyʋ? (1 Timootee 3:​1-7; Tiiti 1:​5-9)

³ Ɛbɛ ŋpɩzɩɣ ŋla nɛ ŋpɩsɩ ɛgbɛyɛ taa ɛzʋtʋyʋ? Wɛtʋ ndʋ pɩpɔzʋʋ se ɛyʋ ɛwɛɛna pʋcɔ nɛ ɛpɩsɩ ɛgbɛyɛ taa ɛzʋtʋyʋ yɔ, tɩwɛ ndɩ nɛ wɛtʋ ndʋ pɩpɔzʋʋ se ɛyʋ ɛwɛɛna pʋcɔ nɛ ehiɣ tomnaɣ yɔɔ tʋmɩyɛ naɖɩyɛ yɔ. Ðoŋ ɖoŋ lɛ, pʋcɔ nɛ ŋhiɣ tʋmɩyɛ naɖɩyɛ lɛ, pɩpɔzʋʋ se ŋwɛɛ niye hɔɔlɩŋ weyi ɩ-taa tʋmɩyɛ ñʋʋdʋ ñɩnɩɣ se ɛyʋ ɛwɛɛ niye pʋcɔ nɛ ɛla tʋmɩyɛ nɖɩ yɔ. Ɛlɛ pʋcɔ nɛ ɛyʋ pɩsɩ ɛgbɛyɛ taa ɛzʋtʋyʋ lɛ, pɩwɛ ndɩ. Pʋcɔ nɛ ŋpɩsɩ ɛgbɛyɛ taa ɛzʋtʋyʋ lɛ, pɩtɩkɛ tɔm susuu nɛ tɔm wɩlʋʋ tʋmɩyɛ taa ɖeke pɩwɛɛ se ŋwɛɛ niye. Pɩwɛɛ ɖɔɖɔ se ŋwɛɛnɩ wɛtʋ kɩbandʋ ndʋ pɔyɔɔdɩ tɩ-tɔm 1 Timootee 3:​1-7 nɛ Tiiti 1:​5-9 taa yɔ. (Kalɩ 1 Timootee 3:​1-7; Tiiti 1:​5-9.) Tɔm ñʋʋ kʋnɛ kɩ-taa, ɖɩkaɣ naʋ wɛtʋ kɩbandʋ ndʋ pɩpɔzʋʋ se ɛzʋtʋyaa ɩwɛɛnɩ hɔɔlɩŋ sɔsɔŋ 3 ɩnɛ ɩ-taa yɔ: pɩpɔzʋʋ se pɛwɛɛnɩ hɩɖɛ kɩbanɖɛ ɛgbɛyɛ taa mba nɛ awayɩ mba ɛsɩndaa, pɩwɛɛ se pɛkɛ hɔŋ ñʋndɩnaa mba pahaɣ kɩɖaʋ kɩbaŋʋ  yɔ nɛ pɛkɛ mba petisiɣ faaa se paɖʋ ɛgbɛyɛ taa mba lɩm yɔ.

WƐƐNƖ HƖÐƐ KƖBANÐƐ

4. Ye pɔtɔm se pɩwɛɛ se ŋkɛ «weyi ɛfɛyɩnɩ kɩwɛɛkɩtʋ natʋyʋ yɔ,» pʋ-tɔbʋʋ lɛ suwe?

⁴ Pʋcɔ nɛ ŋpɩsɩ ɛgbɛyɛ taa ɛzʋtʋyʋ lɛ, pɩwɛɛ se ŋkɛ «weyi ɛfɛyɩnɩ kɩwɛɛkɩtʋ natʋyʋ yɔ,» pʋ-tɔbʋʋ se pɩwɛɛ se ŋwɛɛnɩ hɩɖɛ kɩbanɖɛ ɛgbɛyɛ taa, ɖɩnɛ ɛlɛ paapɩzɩɣ nɛ pɔyɔɔdɩ tɔm kɩdɛkɛdɩtʋ natʋyʋ ñe-wezuu caɣʋ yɔɔ. Pɩtasɩ lɛ, pɩwɛɛ se ‘awayɩ mba ɩlɩzɩ ñɔ-yɔɔ aseɣɖe kɩbanɖɛ.’ Mba paasɛɣ Yehowa yɔ, papɩzɩɣ nɛ pɔyɔɔdɩ tɔm kɩdɛkɛdɩtʋ ñe-tisuu yɔɔ, ɛlɛ pɩfɛyɩ kpa se pehiɣ waɖɛ nɛ pɔyɔɔdɩ se ŋfɛyɩ toovenim yaa ŋŋcakɩ wezuu kɩbaŋʋ. (Dan. 6:​4, 5) Pɔzɩ ña-tɩ se: «Mɛwɛnɩ hɩɖɛ kɩbanɖɛ ɛgbɛyɛ taa mba nɛ awayɩ mba ɛsɩndaa?»

5. Ɛzɩma ŋpɩzɩɣ nɛ ŋwɩlɩ se ŋkɛ «kɩbandʋ sɔɔlɩyʋ»?

⁵ Ye ŋkɛ «kɩbandʋ sɔɔlɩyʋ» yɔ, ŋkaɣ naʋ wɛtʋ kɩbandʋ ndʋ ɛyaa lalaa wɛna yɔ nɛ ŋsam-wɛ tɩ-yɔɔ. Pɩtasɩ lɛ, ña-taa lakɩ leleŋ se ŋla ɛyaa lalaa kɩbandʋ, halɩ ŋpɩzɩɣ ŋla nɛ pɩcɛzɩ mbʋ pɩ-yɔɔ lalaa pɩzɩɣ nɛ pamaɣzɩ yɔ. (1 Tes. 2:8) Ɛbɛ yɔɔ pɩcɛyaa se ɛzʋtʋyaa ɩwɛɛnɩ wɛtʋ kɩbandʋ ndʋ? Mbʋ pʋyɔɔ yɔ pɩkaɣ pɔzʋʋ se pakpaɣ pa-alɩwaatʋ sakɩyɛ nɛ pekilimi koobiya yɔɔ nɛ palakɩ ɛgbɛyɛ taa tʋma. (1 Pɩy. 5:​1-3) Paa pɩ-labʋ ɛkpakɩɣ-wɛ alɩwaatʋ sakɩyɛ mbʋ yɔ, pehikiɣ taa leleŋ siŋŋ mbʋ pʋyɔɔ yɔ pasɩɣnɩ ɛyaa lalaa.—Tʋma 20:35.

6. Ye pɔtɔm se ‘ŋsɔɔlɩ ɛyaa mʋʋ’ yɔ, pʋ-tɔbʋʋ lɛ suwe? (Ebree mba 13:​2, 16; cɔnɩ ɖɔɖɔ kɩlɛmʋʋ.)

⁶ Ŋwɩlɩɣ se ‘ŋsɔɔlɩ ɛyaa mʋʋ’ ye ŋlakɩ ɛyaa lalaa kɩbandʋ, pɩkpɛndɩnɩ mba patɩkɛ ña-taabalaa kɩbama yɔ. (1 Pɩy. 4:9) Takayaɣ nakɛyɛ yɔɔdaa se ɛyʋ weyi ɛsɔɔlɩ ɛyaa mʋʋ yɔ ɛlakɩ ɛyaa camɩyɛ lakasɩ, halɩ pɩkpɛndɩnɩ mba ɛɛsɩŋ-wɛ yɔ, nɛ ɛ-taa lakɩ leleŋ se ɛyaa-wɛ nɛ pɔkɔɔ ɛ-tɛ. Pɔzɩ ña-tɩ se: «Ɛyaa lalaa sɩmɩ-m se mɛnkɛ weyi ɛsɔɔlɩ agɔma mʋʋ yɔ?» (Kalɩ Ebree mba 13:​2, 16.) Ɛyʋ weyi ɛsɔɔlɩ ɛyaa mʋʋ yɔ, ɛlakɩ camɩyɛ lakasɩ ɛyaa tɩŋa, pɩkpɛndɩnɩ kʋñɔndɩnaa nɛ Yehowa sɛyaa mba palakɩ tʋmɩyɛ nɛ kpekpeka yɔ, ɛzɩ egeetiye yɔɔ cɔnɩyaa nɛ koobiya mba palɩɣnɩ agbaa lɛɛna taa nɛ pɔkɔŋ ɛ-ɛgbɛyɛ taa nɛ pɔyɔɔdʋʋ samaɣ taa tɔm yɔ.—Kiɖe 18:​2-8; Adu. 3:27; Luka 14:​13, 14; Tʋma 16:15; Roma 12:13.

7. Ɛzɩma ɛgbɛyɛ taa ɛzʋtʋyʋ nɔɔyʋ wɩlɩɣ se ‘ɛtɩkɛ liidiye sɔɔlɩyʋ’?

⁷ ‘Taakɛ liidiye sɔɔlɩyʋ.’ Pʋ-tɔbʋʋ lɛ se ŋŋkaŋ  ña-lɩmaɣza tomnaɣ yɔɔ wondu yɔɔ. Paa ŋkɛ ñɩm tʋ yaa kʋñɔndʋ yɔ, ŋsɩɣ Kewiyaɣ tʋma kajalaɣ ɖeɖe ñe-wezuu caɣʋ hɔɔlɩŋ kpeekpe taa. (Mat. 6:33) Ŋkpakɩɣ ña-alɩwaatʋ, ño-ɖoŋ nɛ tomnaɣ yɔɔ wondu ndʋ ŋwɛna yɔ nɛ ŋsɛɣnɩ Yehowa, ŋcɔŋnɩnɩ ñɔ-hɔʋ yɔɔ nɛ ŋsɩɣnɩ ɛgbɛyɛ taa koobiya. (Mat. 6:24; 1 Yoh. 2:​15-17) Pɔzɩ ña-tɩ se: «Lɩmaɣza wena mɛwɛnɩ liidiye yɔɔ? Me-liu sɩkɩnɩ mbʋ mɛwɛna yɔ? Yaa paa ɛzɩmtaa lɛ, mañakɩ pana se mɛwɛɛnɩ liidiye sakɩyɛ nɛ tomnaɣ yɔɔ wondu sakɩyɛ?»—1 Tim. 6:​6, 17-19.

8. Ye pɔtɔm se ‘ŋtaaɖɛlɛsɩ niye ña-lakasɩ taa’ nɛ ‘ŋwɛɛnɩ tɩ ɖɔkʋʋ’ yɔ, pʋ-tɔbʋʋ lɛ suwe?

⁸ Ye ‘ŋŋɖɛlɛsɩɣ niye ña-lakasɩ taa’ nɛ ‘ŋwɛɛnɩ tɩ ɖɔkʋʋ’ yɔ, ŋɖʋʋ ña-tɩ kamasɩ nzɩ pɩpɔzʋʋ yɔ ñe-wezuu caɣʋ hɔɔlɩŋ kpeekpe taa. Pʋ-tɔbʋʋ lɛ se ŋŋɖɛlɛsɩɣ niye tɔɔnaɣ tɔɔʋ, sʋlʋm ñɔʋ, wondu suu, ña-tɩ ñɔɔzʋʋ nɛ helim mʋʋ taa. Ŋŋmaɣzɩɣnɩ ɛjaɖɛ yɔɔ mba wezuu caɣʋ. (Luka 21:34; Yak. 4:4) Alɩwaatʋ ndʋ lalaa ɖʋʋ-ŋ ɖɩwɩzɩyɛ yɔ, ŋɖɔkʋʋ ña-tɩ. ‘Taakɛ sʋlʋm kpaŋɩyʋ’; pɩfɛyɩ ɖɔɖɔ se ɛyaa ɩsɩmɩ-ŋ se ŋñɔʋ sʋlʋm kadadayaɣ. Pɔzɩ ña-tɩ se: «Me-wezuu caɣʋ wɩlɩɣ se maaɖɛlɛsɩɣ niye ma-lakasɩ taa nɛ mɛwɛnɩ tɩ ɖɔkʋʋ na?»

9. Ye pɔtɔm se ŋkɛ «weyi ɛmaɣzɩɣ camɩyɛ yɔ» nɛ weyi ‘ɛsɩɣ paa mbʋ lɛ pi-lone taa yɔ,’ pʋ-tɔbʋʋ lɛ suwe?

⁹ Ye ŋkɛ «weyi ɛmaɣzɩɣ camɩyɛ yɔ,» alɩwaatʋ ndʋ nabʋyʋ lakɩ yɔ, ŋkpakɩɣ alɩwaatʋ nɛ ŋmaɣzɩ tɔm ndʋ Bibl yɔɔdʋʋ tɔm ndʋ tɩ-yɔɔ yɔ tɩ-yɔɔ. Ŋmaɣzɩɣ camɩyɛ nɛ ŋna Bibl lɔŋ tasʋʋ mbʋ pɩpɩzɩɣ nɛ pɩsɩnɩ ɛyʋ wɛtʋ ndʋ tɩ-taa yɔ, piyeki nɛ ŋnɩɩ tɔm taa camɩyɛ nɛ ŋkpaɣ lɩmaɣza kɩbana. Ŋŋkpedesiɣ nɛ ŋkpaɣ lɩmaɣza. Ɛlɛ ŋñakɩ pana se ŋnɩɩ mbʋ payɩ pɩlaba yɔ pɩ-taa. (Adu. 18:13) Piyeki nɛ ŋkpaɣ lɩmaɣza wena alabɩ nɔɔ kʋɖʋmaɣ nɛ Yehowa ñɩna yɔ. Ye ŋkɛ weyi ‘ɛsɩɣ paa mbʋ lɛ pi-lone taa yɔ,’ ŋñɔɔzʋʋ wondu camɩyɛ nɛ ŋcakɩ alɩwaatʋ yɔɔ. Ɛyaa lalaa sɩŋɩ-ŋ se ŋkɛ weyi papɩzɩɣ nɛ pataa-ɩ liu nɛ weyi ɛɖɔŋ lɔŋ tasʋʋ yɔɔ yɔ. Ye ŋwɛnɩ wɛtʋ kɩbandʋ ndʋ tɩ-tɩŋa yɔ, pɩkaɣ-ŋ sɩnʋʋ nɛ ŋwɛɛnɩ hɩɖɛ kɩbanɖɛ. Lɛɛlɛɛyɔ lɛ, iyele nɛ ɖɩna wɛtʋ kɩbandʋ ndʋ Bibl yɔɔdʋʋ se ɛzʋtʋyʋ ɛwɛɛna nɛ pɩsa nɛ ɛkɛ hɔʋ ñʋʋdʋ weyi ɛhaɣ kɩɖaʋ kɩbaŋʋ yɔ.

KƐ HƆƲ ÑƲƲDƲ WEYI ƐHAƔ KƖÐAƲ KƖBAŊƲ YƆ

10. Ɛzɩma ŋpɩzɩɣ nɛ ŋkɛ «ɛyʋ weyi eɖiyiɣ ɛ-maɣmaɣ ɛ-ɖɩɣa taa mba camɩyɛ yɔ»?

¹⁰ Ye ŋkɛ walʋ nɛ ŋsɔɔlɩ se ŋpɩsɩ ɛgbɛyɛ taa ɛzʋtʋyʋ yɔ, pɩcɛyaa ɖɔɖɔ se ñɔ-hɔʋ taa mba ɩwɛɛnɩ hɩɖɛ kɩbanɖɛ. Pʋyɔɔ lɛ, pɩwɛɛ se ŋkɛ «ɛyʋ weyi eɖiyiɣ ɛ-maɣmaɣ ɛ-ɖɩɣa taa mba camɩyɛ yɔ.» Pʋ-tɔbʋʋ lɛ se pɩwɛɛ se ŋcɔnɩ ñɔ-hɔʋ taa mba yɔɔ nɛ sɔɔlɩm nɛ ŋkpaɣ lɩmaɣza wena awazɩɣ-wɛ yɔ. Pɩwɩlɩɣ se pɩwɛɛ se ŋɖɛɛ ñɔ-hɔʋ taa mba nɔɔ ɖɛ-Ɛsɔ sɛtʋ hɔɔlɩŋ tɩŋa taa. Ɛbɛ yɔɔ pɩcɛyaa kpem se ŋla mbʋ? Apostoloo Pɔɔlɩ pɔzɩ tɔm tʋnɛ: «Ye ɛyʋ nɔɔyʋ ɛɛsɩŋ ɛzɩma eɖiyi ɛ-maɣmaɣ ɛ-ɖɩɣa taa mba yɔ, ɛzɩma ɛkaɣ cɔnʋʋ Ɛsɔ ɛgbɛyɛ yɔɔ?»—1 Tim. 3:5.

11-12. Ye caja nɔɔyʋ ɛsɔɔlaa se ɛpɩsɩ ɛgbɛyɛ taa ɛzʋtʋyʋ yɔ, ɛbɛ yɔɔ pɩcɛyaa se ɛ-hɔʋ taa mba ɩha kɩɖaʋ kɩbaŋʋ? (Cɔnɩ ɖɔɖɔ kɩlɛmʋʋ.)

¹¹ Ye ŋkɛ caja yɔ, pɩwɛɛ se «[ñe-piya] iluzuu sɩ-tɩ ɛzɩ pɩmʋnaʋ yɔ.» Pɩcɛyaa se ŋwɩlɩ ñe-piya tɔm nɛ ŋfalɩsɩ-sɩ nɛ sɔɔlɩm. Pɩkɛ toovenim se ɛzɩ piya tɩŋa yɔ, ñe-piya sɔɔlaa se sihoŋuu nɛ sileɣyiɣ. Ɛlɛ ye ŋfalɩsɩɣ-sɩ camɩyɛ yɔ, sɩkaɣ-ŋ ñam nɛ sɩña ɖɔɖɔ ɛyaa lalaa nɛ sɩcaɣ wezuu kɩbaŋʋ. Pɩtasɩ lɛ, pɩpɔzʋʋ se ŋla mbʋ payɩ pɩpɔzʋʋ yɔ nɛ ŋsɩnɩ ñe-piya nɛ taabalɩyɛ kɩbanɖɛ wɛɛ sɩ nɛ Yehowa pɛ-hɛkʋ taa, sɩɖɔ Bibl paɣtʋ kila yɔɔ si-wezuu caɣʋ taa nɛ sɩɖɛɛnɩ ɛsɩndaa fezuu taa nɛ pamɩyɩsɩ-sɩ lɩm.

¹² «[Wɛɛnɩ] piya nzɩ sɩwɛnɩ tisuu nɛ paayɔɔdʋʋ sɩ-tɔm se sɩcakɩ wezuu kɩdɛkɛdʋʋ yaa sɩlakɩ ñʋʋ taa ɖoŋ yɔ.» Ye pamɩyɩsɩ pɩɣa nakɛyɛ lɩm  yaa kɛwɛɛ nɛ kañakɩ pana se kaha ka-tɩ Yehowa, ɛlɛ kala kɩwɛɛkɩm sɔsɔm nabʋyʋ yɔ, ɛzɩma pɩkaɣ tukunuu ka-caa? Ye caja kaalabɩ kaakendu nɛ ɛtaafalɩsɩɣ-kɛ nɛ ɛtaasɩɣzɩɣ-kɛ lɔŋ yɔ, pɩtɩla ɛɛkaɣ mʋnʋʋ se ɛkɛ ɛgbɛyɛ taa ɛzʋtʋyʋ.—Kalɩ La Tour de Garde 15 octobre 1996, hɔɔlʋʋ 21, tayʋʋ 6-7.

ÐƲ ƐGBƐYƐ LƖM

13. Ɛzɩma ŋpɩzɩɣ nɛ ŋwɩlɩ se ŋkɛ «weyi ɛnɩɣ tɔm taa yɔ» nɛ ‘ŋtɩkɛ ñʋʋ taa ɖoŋ tʋ’?

¹³ Koobiya abalɩñɩma mba pɛwɛnɩ Krɩstʋ mba wɛtʋ kɩbandʋ yɔ pasɩɣnɩ ɛgbɛyɛ siŋŋ. «Weyi ɛnɩɣ tɔm taa yɔ,» ɛñakɩ pana se laŋhɛzɩyɛ ɛwɛɛ ɛ nɛ ɛyaa lalaa pɛ-hɛkʋ taa nɛ eseɣtiɣ ɖɔɖɔ ɛyaa lalaa se pɛwɛɛ laŋhɛzɩyɛ taa. Ye ŋsɔɔlaa se pasɩmɩ-ŋ se ŋkɛ ɛyʋ weyi ɛnɩɣ tɔm taa yɔ, pɩwɛɛ se ŋwelisiɣni lalaa nɛ ŋlakɩnɩ pa-lɩmaɣza tʋmɩyɛ. Kpaɣ se ŋtɛm pɩsʋʋ ɛgbɛyɛ taa ɛzʋtʋyʋ nɛ ɩlakɩ ɛzʋtʋyaa kediɣzaɣ. Ye ɛzʋtʋyaa hɔɔlʋʋ sɔsɔʋ itisi lɩmaɣzɩyɛ naɖɩyɛ yɔɔ nɛ ɖɩɩkaɖɩɣnɩ Bibl paɣtʋ kila yɔ, ŋkaɣ tisuu lɩmaɣzɩyɛ nɖɩ ɖɩ-yɔɔ paa pɩtɩkɛ mbʋ ŋmaɣzaɣ yɔ? Ye pɔtɔm se «[ŋtaakɛ] ñʋʋ taa ɖoŋ tʋ» yɔ, pʋ-tɔbʋʋ lɛ se ŋŋñɩkɩɣ ɛyaa lalaa yɔɔ se pala ɛzɩ ŋsɔɔlʋʋ yɔ. Ŋsɔɔlʋʋ se ŋwelisini lalaa nɛ ŋtɩlɩ pa-lɩmaɣza. (Kiɖe 13:​8, 9; Adu. 15:22) Ŋŋkɛɣnɩ «tɔm cayʋ» yaa «[ŋŋkɔʋ] pana lɛɛ lɛɛ.» Pʋ-tɔbʋʋ lɛ se ŋŋwɛɣnɩ kaañamtʋ lakasɩ ɛyaa lalaa yɔɔ yaa ña nɛ wɛ ɩɩhɔŋ tɔm, ɛlɛ ŋyɔɔdʋʋnɩ-wɛ nɛ nɔɔ kɩbaŋa nɛ ñamtʋ. Ŋñakɩ pana se ŋyele nɛ laŋhɛzɩyɛ wɛɛ ña nɛ ɛyaa lalaa mɩ-hɛkʋ taa, halɩ pɩkpɛndɩnɩ kaɖɛ alɩwaatʋ taa. (Yak. 3:​17, 18) Ye ŋyɔɔdʋʋnɩ ɛyaa nɛ nɔɔ kɩbaŋa yɔ, pɩhɛzɩɣ pa-pana, halɩ pɩhɛzɩɣ ɖɔɖɔ mba pakaɖɩɣnɩ-ɖʋ yɔ pa-pana.—Tɔh. 8:​1-3; Adu. 20:3; 25:15; Mat. 5:​23, 24.

14. Ye pɔtɔm se ɛyʋ «[ɛtaakɛ] weyi ɛpɩsɩ Krɩstʋ tʋ pitileɖi yɔ» nɛ «ɛwɛɛ siɣsiɣ» yɔ, pʋ-tɔbʋʋ lɛ suwe?

¹⁴ Koobu abalɩñɩnʋ weyi ɛñɩnɩɣ se ɛpɩsɩ ɛgbɛyɛ taa ɛzʋtʋyʋ yɔ, «[ɛtɩkɛ] weyi ɛpɩsɩ Krɩstʋ tʋ pitileɖi yɔ.» Paa pɩtɩcɛyɩ se pamɩyɩsɩ-ŋ lɩm pɩnzɩ sakɩyɛ pʋcɔ nɛ ŋpɩsɩ ɛzʋtʋyʋ yɔ, pɩpɔzʋʋ alɩwaatʋ sakɩyɛ pʋcɔ nɛ ŋpɩsɩ Krɩstʋ tʋ weyi ɛpɩ fezuu taa yɔ. Pʋcɔ nɛ ŋpɩsɩ ɛzʋtʋyʋ lɛ, ɛzɩ Yesu yɔ, pɩwɛɛ se ŋwɩlɩ se ŋwɛnɩ tɩ luzuu nɛ ŋɖaŋ  Yehowa se ɛha-ŋ wala wena pɩpɔzʋʋ yɔ alɩwaatʋ kɩbandʋ yɔɔ. (Mat. 20:23; Filp. 2:​5-8) Ŋpɩzɩɣ nɛ ŋwɩlɩ se ‘ŋwɛ siɣsiɣ’ ye ŋñɔnɩ Yehowa nɛ ɛ-paɣtʋ kila nɛ ŋɖɔŋ lɔŋ weyi ɛ-ɛgbɛyɛ tasɩɣ-ɖʋ yɔ ɩ-yɔɔ yɔ.—1 Tim. 4:15.

15. Ɛzɩ pɩcɛyaa se koobu abalɩñɩnʋ nɔɔyʋ ɛwɛɛ niye pɩdɩɩfɛyɩ tɔm yɔɔdʋʋ taa pʋcɔ nɛ ɛpɩsɩ ɛgbɛyɛ taa ɛzʋtʋyʋ na? Lɩzɩ pɩ-taa.

¹⁵ Masɩ yɔɔdʋʋ kpayɩ kpayɩ se pɩwɛɛ se ɛgbɛyɛ yɔɔ cɔnɩyʋ «ɛtɩlɩ tɔm wɩlʋʋ.» Ɛzɩ pɩwɩlɩɣ se pɩwɛɛ se ŋkɛnɩ tɔm yɔɔdɩyʋ weyi ɛwɛ niye pɩdɩɩfɛyɩ yɔ? Aayɩ. Ɛgbɛyɛ taa ɛzʋtʋyaa sakɩyɛ fɛyɩ niye siŋŋ samaɣ taa tɔm yɔɔdʋʋ taa, paa mbʋ yɔ pawɩlɩɣ tɔm camɩyɛ tɔm susuu taa nɛ alɩwaatʋ ndʋ pekilimiɣ koobiya yɔɔ yɔ. (Kpaɣ-tʋ nɛ ŋmaɣzɩnɩ 1 Kɔrɛntɩ mba 12:​28, 29 nɛ Efɛɛzɩ mba 4:11.) Paa ŋtɩkɛnɩ tɔm yɔɔdɩyʋ weyi ɛwɛ niye pɩdɩɩfɛyɩ yɔ, pɩwɛɛ se ŋwɛɛ nɛ ŋñakɩ pana se ŋwɛɛ niye nɛ pɩkɩlɩ. Ɛbɛ pɩzɩɣ nɛ pɩsɩnɩ-ŋ nɛ ŋkɛ wɩlɩyʋ weyi ɛwɛ niye yɔ?

16. Ɛbɛ pɩzɩɣ pɩsɩnɩ-ŋ nɛ ŋwɛɛ niye tɔm wɩlʋʋ taa nɛ pɩkɩlɩ? (Cɔnɩ ɖɔɖɔ kɩlɛmʋʋ.)

¹⁶ «[Ñɔɔnɩ] siɣsiɣ tɔm kpam.» Pɩsa nɛ ŋkɛ wɩlɩyʋ weyi ɛwɛ niye yɔ lɛ, pɩwɛɛ se ŋlabɩnɩ tʋmɩyɛ Bibl, paa ŋwɩlɩɣ tɔm samaɣ taa yaa ŋtasɩɣ nɔɔyʋ lɔŋ yɔ. Pɩwɛɛ se ŋkpɛlɩkɩɣ Bibl nɛ ɖɛ-ɛgbɛyɛ takayɩsɩ camɩyɛ. (Adu. 15:28; 16:23) Ŋŋkpɛlɩkɩɣ lɛ, ñaɣ pana nɛ ŋtɩlɩ ɛzɩma ɖɛ-ɛgbɛyɛ takayɩsɩ lɩzɩ Bibl masɩ taa yɔ se pɩsa nɛ ŋpɩzɩ nɛ ŋlabɩnɩ-sɩ tʋmɩyɛ camɩyɛ. Nɛ alɩwaatʋ ndʋ ŋwɩlɩɣ tɔm yɔ, ñaɣ pana nɛ ŋtukuni mba pewelisiɣni-ŋ yɔ pa-laŋa. Ŋpɩzɩɣ nɛ ŋwɛɛ niye tɔm wɩlʋʋ taa nɛ pɩkɩlɩ ye ŋpɔzʋʋ ɛgbɛyɛ taa ɛzʋtʋyaa mba pɛwɛ niye yɔ lɔŋ tasʋʋ nɛ ŋlakɩnɩ-pʋ tʋmɩyɛ yɔ. (1 Tim. 5:17) Pɩwɛɛ se ɛgbɛyɛ taa ɛzʋtʋyaa ‘ɩpɩzɩ nɛ pakpazɩ ɖoŋ’ po-koobiya, paa mbʋ yɔ nabʋyʋ taa, pɩpɔzʋʋ se ɛgbɛyɛ taa ɛzʋtʋyaa ɩtasɩ-wɛ lɔŋ yaa ‘pekizini-wɛ tɔm.’ Ɛlɛ pɩpɔzʋʋ se paa ɛzɩmtaa lɛ, pɔyɔɔdɩnɩ nɔɔ kɩbaŋa. Ye ŋyɔɔdʋʋnɩ nɔɔ kɩbaŋa nɛ sɔɔlɩm nɛ ŋtɩŋɩɣnɩ Bibl yɔɔ nɛ ŋwɩlɩɣ tɔm yɔ, ŋkaɣ kɛʋ wɩlɩyʋ kɩbanʋ, mbʋ pʋyɔɔ yɔ ŋwɛɛ nɛ ŋmaɣzɩɣnɩ Wɩlɩyʋ Sɔsɔ Yesu.—Mat. 11:​28-30; 2 Tim. 2:24.

 WOLO PƖ-YƆƆ NƐ ŊÑAKƖ PANA SE ŊPƖSƖ ƐGBƐYƐ TAA ƐZƲTƲYƲ

17. (a) Ɛbɛ pɩzɩɣ nɛ pɩsɩnɩ ɛgbɛyɛ taa tʋmlaɖaa nɛ powolo pɩ-yɔɔ nɛ pañakɩ pana se papɩsɩ ɛgbɛyɛ taa ɛzʋtʋyaa? (b) Tɔm ndʋ yɔɔ pɩwɛɛ se ɛgbɛyɛ taa ɛzʋtʋyaa ɩtɔzɩ alɩwaatʋ ndʋ patazɩɣ se pana se koobu nɔɔyʋ mʋnaa se ɛpɩsɩ ɛgbɛyɛ taa ɛzʋtʋyʋ yaa ɛtɩmʋna yɔ? (Kalɩ aɖakaɣ « Ɩkɛ mba panɩɣ tɔm taa yɔ alɩwaatʋ ndʋ ɩtazɩɣ koobiya lalaa wɛtʋ taa yɔ.»)

¹⁷ Ɛgbɛyɛ taa tʋmlaɖaa nabɛyɛ pɩzɩɣ nɛ pamaɣzɩ se paapɩzɩɣ nɛ papɩsɩ ɛgbɛyɛ taa ɛzʋtʋyaa kpa, mbʋ pʋyɔɔ yɔ wɛtʋ kɩbandʋ ndʋ pɩpɔzʋʋ se ɛgbɛyɛ taa ɛzʋtʋyʋ ɛwɛɛna yɔ tɩkɩlɩ ɖɔʋ. Ɛlɛ tɔzɩ se Yehowa nɛ ɛ-ɛgbɛyɛ paaɖaŋɩɣ se ŋwɛɛnɩ wɛtʋ ndʋ nɛ pɩtalɩ pilim. (1 Pɩy. 2:21) Pɩtasɩ lɛ, Yehowa fezuu kiɖeɖeu pɩzɩɣna nɛ kɩsɩnɩ-ŋ nɛ ŋwɛɛnɩ wɛtʋ kɩbandʋ ndʋ. (Filp. 2:13) Ŋmaɣzɩɣ se pɩpɔzʋʋ se ŋñaɣ pana nɛ ŋwɛɛnɩ wɛtʋ kɩbandʋ natʋyʋ nɛ pɩkɩlɩ? Tɩmnɩ Yehowa se ɛsɩnɩ-ŋ. Ñɩnɩ wɛtʋ ndʋ tɩ-tɔm nɛ ŋpɔzɩ ɛgbɛyɛ taa ɛzʋtʋyʋ nɔɔyʋ se ɛsɩnɩ-ŋ nɛ ŋna ɛzɩma ŋla nɛ ŋwɛɛnɩ-tʋ nɛ pɩkɩlɩ yɔ.

18. Ɛbɛ peseɣtiɣ ɛgbɛyɛ taa tʋmlaɖaa tɩŋa se pala?

¹⁸ Tɛtɛ nɛ ɖa-tɩŋa payɩ, pɩkpɛndɩnɩ mba pɛtɛm pɩsʋʋ ɛgbɛyɛ taa ɛzʋtʋyaa yɔ, ɖiwolo pɩ-yɔɔ nɛ ɖɩñaɣ pana nɛ ɖɩwɛɛnɩ wɛtʋ kɩbandʋ ndʋ tɩ-tɔm ɖɩyɔɔdɩ tɔm ñʋʋ kʋnɛ kɩ-taa yɔ. (Filp. 3:16) Ŋkɛ ɛgbɛyɛ taa tʋmlaɖʋ na? Ðʋ ña-tɩ kaɖʋwa se ŋpɩsɩɣ ɛgbɛyɛ taa ɛzʋtʋyʋ. Pɔzɩ Yehowa se ɛfalɩsɩ-ŋ nɛ ŋwɛɛ wazaɣ ɛ-sɛtʋ taa nɛ pɩkɩlɩ nɛ ŋtɛ ŋsɩnɩ ɛgbɛyɛ taa koobiya. (Iza. 64:8) Tɛtɛ nɛ Yehowa wazɩ pana wena ŋñakɩ se ŋmʋna nɛ ŋpɩsɩ ɛgbɛyɛ taa ɛzʋtʋyʋ yɔ a-yɔɔ.