TƆM ÑƲƲ ŊGƲ ÐƖKPƐLƖKƖƔ YƆ 41
Ðɔkɩ ñe-siɣsiɣ wɛtʋ kpam “kʋñɔŋ sɔsɔʋ” alɩwaatʋ taa
“Ɩsɔɔlɩ Yehowa, mɩ mba payɩ ɩwɛ siɣsiɣ ɛ-ɛsɩndaa yɔ! Yehowa kandɩyɩɣ siɣsiɣ tɩnaa yɔɔ.”—KEƔA 31:23, nwt.
HENDU 129 Ðiwoki pɩ-yɔɔ nɛ ɖɩɖɔkɩ kpam
LƖMAƔZA SƆSƆNA *
1-2. (a) Piileɖiɣ lɛ, tɔm ndʋ ajɛɛ kaɣ susuu? (b) Tɔm pɔzʋʋ mbʋ yɔɔ pɩwɛɛ se ɖicosi?
MAƔZƖ se ajɛɛ susi “laŋhɛzɩyɛ nɛ pɛɛyɛ” tɔm ndʋ paaɖaŋaa yɔ pitileɖita. Papɩzɩɣ nɛ pamaɣzɩ se laŋhɛzɩyɛ wɛ ɛjaɖɛ yɔɔ siŋŋ. Ajɛɛ kaɣ ñɩnʋʋ se ɖɩmaɣzɩ se apɩzɩɣ ayele nɛ kʋñɔmɩŋ tɩŋa sɩɩ tɩnaɣ ɛjaɖɛ yɔɔ. Ɛlɛ toovenim taa lɛ, aapɩzɩɣ nɛ aɖɩɣ nʋmɔʋ mbʋ pɩkaɣ labʋ pʋwayɩ yɔ! Ɛbɛ yɔɔ? Ɛzɩ Bibl taa natʋ tɔm wɩlʋʋ yɔ, “ɖɩzʋʋ mbʋ patɩɖʋna yɔ pɩkaɣ pɔ-yɔɔ tibu tuda, . . . nɛ paakaɣ pɩ-taa lɩʋ kpa.”—1 Tes. 5:3.
2 Pɩpɔzʋʋ se ɖɩtɩlɩ tɔm kɩcɛyɩtʋ tʋnɛ tɩ-yɔɔ cosuu: Ɛbɛ kaɣ labʋ “kʋñɔŋ sɔsɔʋ” alɩwaatʋ taa? Ɛbɛ Yehowa kaɣ ñɩnʋʋ se ɖɩla alɩwaatʋ ndʋ tɩ-taa? Nɛ ɛzɩma ɖɩpɩzɩɣ nɛ ɖɩñɔɔzɩ ɖa-tɩ lɛɛlɛɛyɔ se pɩsa nɛ ɖɩɖɔkɩ ɖe-siɣsiɣ wɛtʋ kʋñɔŋ sɔsɔʋ alɩwaatʋ taa?—Mat. 24:21.
ƐBƐ KAƔ LABƲ “KƲÑƆŊ SƆSƆƲ” ALƖWAATƲ TAA?
3. Ɛzɩ Natʋ 17:5, 15-18 yɔɔdʋʋ yɔ, ɛzɩma Ɛsɔ kaɣ ɖɩzʋʋ “Babilɔɔnɩ Sɔsɔʋ”?
3 Kalɩ Natʋ 17:5, 15-18. Pakaɣ ɖɩzʋʋ “Babilɔɔnɩ Sɔsɔʋ”! Ɛzɩ ɖɩnaʋ nɛ pɩɖɛɛ yɔ, ajɛɛ ɩɩkaɣ pɩzʋʋ nɛ aɖɩɣ nʋmɔʋ mbʋ pɩkaɣ labʋ alɩwaatʋ ndʋ tɩ-taa yɔ. Ɛbɛ yɔɔ? Mbʋ pʋyɔɔ yɔ, “Ɛsɔ [kaɣ ɖʋʋ] pa-laŋa taa se pala ɛ-lɩmaɣzɩyɛ yɔɔ.” Ɛbɛ kɛnɩ Ɛsɔ lɩmaɣzɩyɛ? Nɖɩ lɛ se paɖɩzɩ cɛtɩm Ɛsɔ sɛtʋ tɩŋa pɩkpɛndɩnɩ mba payaɣ pa-tɩ se Krɩstʋ ñɩma yɔ. * Ɛsɔ kaɣ ɖʋʋ ɛ-lɩmaɣzɩyɛ ‘tɛtɛgbɩnɛ nɖɩ ɖɩsɛ cɩɩɩ’ yɔ ‘ɖɩ-hɩŋ hiu’ laŋa taa. Hɩŋ hiu sɩŋnɩ kominawaa mba payɩ paɖʋʋ nesi “tɛtɛgbɩnɛ” yɔ, pʋ-tɔbʋʋ se ajɛɛ kɩgbɛndʋʋ ɛgbɛyɛ nɖɩ payaɣ se ONU yɔ. (Natʋ 17:3, 11-13; 18:8) Kʋñɔŋ sɔsɔʋ kaɣ paɣzʋʋ alɩwaatʋ ndʋ kominawaa kʋyʋʋ cɛtɩm Ɛsɔ sɛtʋ agbaa yɔɔ yɔ. Pɩkaɣ labʋ kaɖɛ siŋŋ ɛjaɖɛ kpeekpe yɔɔ.
4. (a) Pɩtɩla lɩmaɣza wena yɔɔ ajɛɛ kaɣ kʋyʋʋ cɛtɩm Ɛsɔ sɛtʋ agbaa yɔɔ? (b) Mba paawɛ Ɛsɔ sɛtʋ agbaa ana a-taa yɔ, pɩtɩla ɛbɛ pakaɣ labʋ?
4 Ðɩɩsɩŋ lɩmaɣza wena a-yɔɔ ajɛɛ kaɣ kʋyʋʋ Babilɔɔnɩ Sɔsɔʋ yɔɔ yɔ. Pɩtɩla pakaɣ yɔɔdʋʋ se ɛjaɖɛ yɔɔ Ɛsɔ sɛtʋ agbaa ɖɩkɩnɩ ajɛɛ nʋmɔʋ nɛ aahikiɣ laŋhɛzɩyɛ nɛ ɖoŋ ɖoŋ lɛ, aɖʋʋ a-nɔsɩ politiki tɔm taa. Yaa pɩtɩla akaɣ yɔɔdʋʋ se Ɛsɔ sɛtʋ agbaa ana akɩlɩ kpeɣluu ñɩm sakɩyɛ. (Natʋ 18:3, 7) Pɩtɩla alɩwaatʋ ndʋ ajɛɛ kʋyʋʋ cɛtɩm Ɛsɔ sɛtʋ agbaa yɔɔ yɔ, aakaɣ ɖɩzʋʋ a-taa ñɩma tɩŋa. Ɛlɛ pɩwɛ ɛzɩ ajɛɛ kaɣ ɖɩzʋʋ Ɛsɔ sɛtʋ agbaa yɔ. Paɖɩzɩɣ agbaa ana lɛ, mba paawɛ a-taa yɔ, pakaɣ ɖiɣzinuu se pa-ñʋndɩnaa ɖʋzɩ-wɛ nɛ pɩtɩla pakaɣ ñaɣʋ pana se poposi pa-tɩ nɛ agbaa ana.
5. (a) Tɔm ndʋ Yehowa yɔɔdɩ kʋñɔŋ sɔsɔʋ yɔɔ? (b) Nɛ ɛbɛ yɔɔ?
5 Bibl tɩyɔɔdɩ alɩwaatʋ ɛzɩma Babilɔɔnɩ Sɔsɔʋ ɖɩzʋʋ kaɣ kpaɣʋ yɔ, ɛlɛ ɖɩnawa se kɩ-ɖɩzʋʋ ɛɛkaɣ kpaɣʋ alɩwaatʋ sakɩyɛ. (Natʋ 18:10, 21) Yehowa yɔɔdaa se ɛkaɣ ‘pasʋʋ kʋñɔŋ kɩyakɩŋ ɛnɩ ɩ-yɔɔ’ se pɩsa nɛ ɛya “mba ɛlɩzɩ-wɛ yɔ” nɛ toovenim Ɛsɔ sɛtʋ pa-ñʋʋ. (Mark. 13:19, 20) Ɛlɛ ɛbɛ Yehowa kaɣ ñɩnʋʋ se ɖɩla kpaɣnɩ kʋñɔŋ sɔsɔʋ ɖɩbazɩyɛ nɛ pɩtalɩ Armaagedɔɔ you alɩwaatʋ taa?
WOLO PƖ-YƆƆ NƐ ŊÐƲƲ NESI YEHOWA SƐTƲ KELE KELE ÑƖNDƲ
6. Paa ɖiposi ɖa-tɩ nɛ cɛtɩm Ɛsɔ sɛtʋ yɔ, ɛbɛ yɔɔ pi-ɖeke pɩtɩmaɣ?
6 Ɛzɩ ɖɩnaʋ tɔm ñʋʋ ŋgʋ kɩɖɛwa yɔ kɩ-taa yɔ, Yehowa ñɩnɩɣ se ɛ-sɛyaa iposi pa-tɩ nɛ Babilɔɔnɩ Sɔsɔʋ. Ɛlɛ paa ɖiposi ɖa-tɩ nɛ cɛtɩm Ɛsɔ sɛtʋ yɔ, pi-ɖeke pɩtɩmaɣ. Pɩwɛɛ sɛ ɖɩtɛ ɖa-taa se ɖɩɖʋʋ nesi toovenim Ɛsɔ sɛtʋ, pʋ-tɔbʋʋ se Yehowa sɛtʋ kele kele ñɩndʋ. Iyele nɛ ɖɩna nʋmɔŋ naalɛ weyi ɩ-yɔɔ ɖɩpɩzɩɣ ɖɩtɩŋna nɛ ɖɩla mbʋ yɔ.
Ðitaayele ɖama kpeɣluu kaaʋ halɩ pɩkpɛndɩnɩ kaɖɛ alɩwaatʋ taa (Cɔnɩ tayʋʋ 7) *
7. (a) Ɛzɩma ɖɩpɩzɩɣ nɛ ɖɩñɔɔnɩ paɣtʋ ndʋ Yehowa ɖʋ wezuu kɩbaŋʋ caɣʋ nʋmɔʋ taa yɔ? (b) Ɛzɩma Ebree mba 10:24, 25 wɩlɩɣ se pɩcɛyaa se ɖikpeɣliɣ ɖama, kɔzɩ kɔzɩ lɛɛlɛɛyɔ?
7 Kajalaɣ lɛ, pɩwɛɛ se ɖɩñɔɔnɩ paɣtʋ ndʋ Yehowa ɖʋ wezuu kɩbaŋʋ caɣʋ nʋmɔʋ taa yɔ. Ðitisiɣ lɩmaɣza wena ɛjaɖɛ wɛnɩ wezuu caɣʋ yɔɔ yɔ. Kɩɖaʋ nakʋyʋ yɔ: Ðɩpaɖɩɣ kʋzʋʋ kɩdɛkɛdʋʋ lakasɩ tɩŋa, pɩkpɛndɩnɩ ɛyaa mba paka kʋzʋʋ piliŋa yɔ pe-nesi ɖɔkʋʋ nɛ kʋzʋʋ wezuu ŋgʋ ɛyaa mba pacakɩ yɔ. (Mat. 19:4, 5; Roma 1:26, 27) Nabʋlɛ lɛ, pɩwɛɛ se ɖiwolo pɩ-yɔɔ nɛ ɖa nɛ ɖo-koobiya Krɩstʋ ñɩma ɖikpeɣliɣ. Ye pɩsaŋ yɔ ɖɩñakɩ pana nɛ ɖɩlakɩ mbʋ paa le, paa pɩtɩɩkɛ Kewiyaɣ Kpaamɩŋ, yaa pɩcɛyaa se ɖɩla mbʋ ɖɩɣa nakɛyɛ taa, yaa mɛsaɣ tɛɛ yɔ. Paa ɛbɛ ɛtɩɩlakɩ yɔ, ɖɩkaɣ wobu pɩ-yɔɔ nɛ ɖikpeɣliɣ nɛ ɖɩlakɩ ɖɛ-Ɛsɔ sɛtʋ ɛzɩ ɖɩtɩɩlakʋʋ yɔ. Toovenim taa lɛ, pɩcɛyaa se ɖikpeɣliɣ ɖama ‘nɛ pɩkɩlɩ, ɛzɩma ɖɩnaɣ se kɩyakʋ ɖiɣni ñɔtʋʋ yɔ.’—Kalɩ Ebree mba 10:24, 25.
8. Pɩtɩla, ɛzɩma tɔm ndʋ ɖisusuu yɔ tɩkaɣ lɛɣzʋʋ nɛ ɛsɩndaa?
8 Pɩtɩla tɔm ndʋ ɖɩkaɣ susuu kʋñɔŋ sɔsɔʋ alɩwaatʋ taa yɔ, tɩkaɣ lɛɣzʋʋ. Lɛɛlɛɛyɔ lɛ, ɖɩwɛɛ nɛ ɖisusuu Kewiyaɣ tɔm kɩbandʋ nɛ ɖɩñakɩ pana se ɖɩla tɔmkpɛlɩkɩyaa. Ɛlɛ alɩwaatʋ ndʋ tɩ-taa lɛ, pɩtɩla ɖɩkaɣ susuu tɔm ndʋ tɩsɔkɩ ɛyaa yɔ. Bibl kpaɣ tɔm ndʋ nɛ kɩmaɣzɩnɩ ɖɔmbɛɛ sɔsɔna. (Natʋ 16:21) Pɩtɩla ɖɩkaɣ susuu se piileɖiɣ lɛ, paɖɩzɩɣ Sataŋ ɛjaɖɛ. Alɩwaatʋ wɛɣ nɛ tɩɖɛɣ lɛ, ɖɩkaɣ tɩlʋʋ tɔm ndʋ ɖeyi ɖeyi pɩwɛɛ se ɖisusi yɔ nɛ ɛzɩma ɖɩkaɣ-tʋ susuu yɔ. Ɛzɩ nʋmɔŋ weyi ɖɩlabɩnɩ tʋmɩyɛ nɛ ɖisusi tɔm pɩcɛzɩɣ pɩnzɩ mɩnʋʋ yɔ, ɛnɩ ɖɔɖɔ ɖɩkaɣ labɩnʋʋ tʋmɩyɛ na? Yaa ɖɩkaɣ tɩŋnʋʋ nʋmɔŋ lɛɛŋ yɔɔ? Ðɩɩsɩŋ. Paa pɩtɩɩkɛ suwe yɔ, pɩwɛ ɛzɩ ɖɩkaɣ wɛnʋʋ waɖɛ se ɖisusi Yehowa nɩŋgbaŋʋʋ hɔm tɔm nɛ abalɩtʋ yɔ!—Ezek. 2:3-5.
9. (a) Tɔm ndʋ ɖɩkaɣ susuu yɔ, pɩtɩla ɛbɛ tɩkaɣ yebu nɛ ajɛɛ la? (b) Ɛlɛ tɔm ndʋ ɖa-taa pɩzɩɣ nɛ pɩtɛmna?
9 Pɩtɩla tɔm ndʋ ɖɩkaɣ susuu yɔ, tɩkaɣ yebu nɛ ajɛɛ ñɩnɩ se añɩɣ ɖɔ-yɔɔ nɛ ɖiyele tɔm susuu. Ɛzɩma ɖɩtaɣ Yehowa liu se ɛsɩnɩ-ɖʋ tɔm susuu taa sɔnɔ yɔ, mbʋ ɖɔɖɔ pɩkaɣ pɔzʋʋ se ɖɩtaa-ɩ liu alɩwaatʋ ndʋ tɩ-taa. Ða-taa pɩzɩɣ nɛ pɩtɛ se ɖɛ-Ɛsɔ kaɣ-ɖʋ haʋ ɖoŋ se ɖɩla ɛ-sɔɔlɩm.—Mik. 3:8.
ÑƆƆZƖ ÑA-TƖ NƐ ŊÐAŊ ALƖWAATƲ NDƲ GƆƆGƖ KƲYƲƲ ƐSƆ SAMAƔ YƆƆ YƆ
10. Ɛzɩ pɔyɔɔdʋʋ Luka 21:25-28 taa yɔ, mbʋ pɩkaɣ labʋ kʋñɔŋ sɔsɔʋ alɩwaatʋ taa yɔ, ɖoŋ weyi pɩkaɣ wɛnʋʋ ɛyaa sakɩyɛ yɔɔ?
10 Kalɩ Luka 21:25-28. Kʋñɔŋ sɔsɔʋ alɩwaatʋ taa, ɛyaa naɣ se mbʋ payɩ pataɣaɣ liu se pɩkaɣ wɛʋ tam yɔ pɩpaɣzɩ wɛɛkʋʋ lɛ, pɩkaɣ-wɛ cɛyʋʋ siŋŋ. Ɛyaa wezuu caɣʋ alɩwaatʋ kaɖɛ ñɩndʋ ndʋ tɩ-taa, pakaɣ nɩʋ “siziŋ” nɛ sɔɔndʋ kaɣ-wɛ kpaʋ se pɩtɩla pelesiɣ pe-weziŋ. (Sof. 1:14, 15) Alɩwaatʋ ndʋ tɩ-taa lɛ, pɩtɩla wezuu caɣʋ kaɣ wɛʋ kaɖɛ nɛ pɩkpaɖɩ, halɩ pɩkaɣ wɛʋ kaɖɛ Yehowa samaɣ. Ɛzɩma ɖɩtɩkɛ ɛjaɖɛ yɔɔ mba yɔ, pɩtɩla ɖɩkaɣ katʋʋ kala naayɛ. Pɩtɩla ɖɩkaɣ tɛɖʋʋ kɩcɛyɩm nabʋyʋ.
11. (a) Ɛbɛ yɔɔ pakaɣ Yehowa Aseɣɖe Tɩnaa pam nɛ ɛsa? (b) Ɛbɛ yɔɔ pɩtɩpɔzɩ se sɔɔndʋ ɛkpa-ɖʋ nɛ kʋñɔŋ sɔsɔʋ?
11 Pɩtalɩɣ alɩwaatʋ natʋyʋ lɛ, ɛyaa mba paawɛ Ɛsɔ sɛtʋ agbaa wena paɖɩzaa yɔ a-taa yɔ, pɩtɩla pa-taa kaɣ wɩʋ siŋŋ mbʋ pʋyɔɔ yɔ patɩɖɩzɩ Yehowa Aseɣɖe Tɩnaa ɛgbɛyɛ. Pɩtʋʋ fɛyɩ se pakaɣ tɩŋnʋʋ ɛzɩ intɛrnɛɛtɩ yɔɔ mbʋ yɔ, nɛ peyele nɛ ɛyaa lalaa na se pa-taa wɩwa. Ajɛɛ nɛ a-ñʋʋdʋ Sataŋ, pakaɣ-ɖʋ paɖʋʋ ɛzɩma patɩɖɩzɩ ɖɛ-Ɛsɔ sɛtʋ ɛgbɛyɛ yɔ pɩ-yɔɔ. Paakaɣ pɩzʋʋ nɛ patalɩ kaɖʋwa ŋga pɛwɛna se paɖɩzɩɣ Ɛsɔ sɛtʋ agbaa tɩŋa ɛjaɖɛ kpeekpe yɔɔ yɔ. Pʋyɔɔ lɛ, pakaɣ-ɖʋ pam nɛ ɛsa. Alɩwaatʋ ndʋ tɩ-taa, ajɛɛ kaɣ pɩsʋʋ Gɔɔgɩ weyi ɛlɩnɩ Maagɔɔgɩ yɔ. * Akaɣ labʋ nɔɔ nɛ akʋyɩ Yehowa samaɣ yɔɔ nɛ a-ɖoŋ kpeekpe. (Ezek. 38:2, 14-16) Ðɩɩsɩŋ mbʋ ɖeyi ɖeyi pɩkaɣ labʋ kʋñɔŋ sɔsɔʋ alɩwaatʋ ndʋ tɩ-taa yɔ; pʋyɔɔ lɛ, ɖɩpɩzɩɣ nɛ ɖɩpaɣzɩ nɩɣzʋʋ. Paa mbʋ yɔ, ɖa-taa tɛmnɩ tɔm tʋnɛ: Pɩtɩpɔzɩ se sɔɔndʋ ɛkpa-ɖʋ nɛ kʋñɔŋ sɔsɔʋ. Yehowa kaɣ-ɖʋ wɩlʋʋ nʋmɔʋ se pɩsa nɛ ɖihiɣ ñʋʋ yabʋ. (Keɣa 33:20) Ðɩkaɣ pɩzʋʋ nɛ ‘ɖɩkʋyɩ nɛ ɖɩsɩŋ yiɣ yiɣ nɛ ɖɩkʋsɩ ɖa-ñʋŋ’, mbʋ pʋyɔɔ yɔ ɖɩkaɣ ɖiɣzinuu se ‘ɖa-ñʋʋ yabɩtʋ ɖiɣni ñɔtʋʋ.’ *
12. Ɛzɩma “Yom siɣsiɣ tʋ nɛ lɔŋsɩnɖʋ” wɛɛ nɛ ɛsɩɣnɩ-ɖʋ se ɖɩñɔɔzɩ ɖa-tɩ nɛ ɖɩɖaŋ mbʋ pɩkaɣ labʋ nɛ ɛsɩndaa yɔ?
12 “Yom siɣsiɣ tʋ nɛ lɔŋsɩnɖʋ” wɛɛ ɛñɔɔzʋʋ-ɖʋ se pɩsa nɛ ɖɩɖɔkɩ ɖe-siɣsiɣ wɛtʋ kʋñɔŋ sɔsɔʋ alɩwaatʋ taa. (Mat. 24:45) Ɛtɩŋnɩ nʋmɔŋ sakɩyɛ yɔɔ nɛ ɛla mbʋ. Kɩɖaʋ nakʋyʋ lɛ kigbeɣliŋ sɔsɔŋ ɖʋtʋ ndʋ palabɩ kpaɣnɩ pɩnaɣ 2016 piwolo 2018 taa yɔ. Pɩtɩŋnɩ ɖʋtʋ ndʋ tɩ-yɔɔ lɛ, pasɩnɩ-ɖʋ se ɖɩkpazɩ ɖoŋ wɛtʋ ndʋ pɩpɔzʋʋ-ɖʋ alɩwaatʋ ndʋ ɖɩwɛɣ nɛ ɖɩñɔtʋʋnɩ Yehowa kɩyakʋ yɔ. Iyele nɛ ɖɩtasɩ tazʋʋ wɛtʋ ndʋ tɩ-taa pazɩ.
WOLO PƖ-YƆƆ NƐ ŊWƐƐNƖ SIƔSIƔ WƐTƲ, LAŊƖYƐ ÐƆKƲƲ NƐ ŊWƐƐ ABALƖTƲ NƐ PƖKPAÐƖ
Ñɔɔzɩ ña-tɩ lɛɛlɛɛyɔ nɛ pɩsa nɛ ŋhiɣ ñʋʋ yabʋ “kʋñɔŋ sɔsɔʋ” alɩwaatʋ taa (Cɔnɩ tayʋʋ 13-16) *
13. (a) Ɛzɩma ɖɩpɩzɩɣ nɛ ɖɩwɛɛ siɣsiɣ Yehowa ɛsɩndaa nɛ pɩkpaɖɩ? (b) Nɛ ɛbɛ yɔɔ pɩwɛɛ se ɖɩla mbʋ lɛɛlɛɛyɔ?
13 Siɣsiɣ wɛtʋ: Pɩnaɣ 2016 kigbeɣluu sɔsɔʋ tɔm ñʋʋ yɔ “Ðɔkɩ ñe-siɣsiɣ wɛtʋ kpam Yehowa ɛsɩndaa!” Kigbeɣluu ŋgʋ kɩwɩlɩ-ɖʋ se ye taabalɩyɛ kɩbanɖɛ ɛwɛ ɖa nɛ Yehowa ɖɛ-hɛkʋ taa yɔ, ɖɩkaɣ ɖɔkʋʋ ɖe-siɣsiɣ wɛtʋ ɛ-ɛsɩndaa. Pɔtɔzɩ-ɖʋ se ye ɖɩtɩmɩɣnɩ Yehowa nɛ ɖa-laŋɩyɛ pilim nɛ ɖɩñɩnɩɣ alɩwaatʋ nɛ ɖɩkpɛlɩkɩɣ ɛ-Tɔm yɔ, taabalɩyɛ kɩbanɖɛ pɩzɩɣ nɛ ɖɩwɛɛ ɖa nɛ ɩ ɖɛ-hɛkʋ taa. Ye ɖɩlakɩ mbʋ yɔ, ɖihikiɣ ɖoŋ nɛ ɖɩwa paa kaɖɛ nɖɩ. Ðɩpɩzɩɣ nɛ ɖɩkatɩ kala sɔsɔna wena atakɩɣ siɣsiɣ wɛtʋ ndʋ ɖɩwɛnɩ Ɛsɔ ɛsɩndaa nɛ e-Kewiyaɣ yɔɔ yɔ nɛ pɩkpaɖɩ, alɩwaatʋ ndʋ Sataŋ ɛjaɖɛ wɛɣ nɛ ɖɩñɔtʋʋnɩ ɖɩ-ɖɩdɛnɖɛ yɔ. Pɩtɩla ɛyaa kaɣ wobu pɩ-yɔɔ nɛ pohoŋuu-ɖʋ. (2 Pɩy. 3:3, 4) Lɩmaɣza wena a-yɔɔ pakaɣ-ɖʋ hoŋuu yɔ, a-taa naɖɩyɛ lɛ ɛzɩma ɖɩɩɖʋʋ nesi Sataŋ ɛjaɖɛ hɔɔlʋʋ nakʋyʋ yɔ. Pɩwɛɛ se ɖɩwɛɛnɩ siɣsiɣ wɛtʋ lɛɛlɛɛyɔ nɛ pɩkpaɖɩ nɛ pɩsa nɛ ɖɩɖɔkɩ-tʋ kʋñɔŋ sɔsɔʋ alɩwaatʋ taa.
14. (a) Lɛɣzɩtʋ ndʋ kaɣ kɔm koobiya mba peɖiyiɣ-ɖʋ tɛtʋ yɔɔ yɔ pɔ-hɔɔlʋʋ taa? (b) Ɛbɛ yɔɔ pɩkaɣ pɔzʋʋ se ɖɩɖɔkɩ ɖe-siɣsiɣ wɛtʋ alɩwaatʋ ndʋ tɩ-taa?
14 Kʋñɔŋ sɔsɔʋ alɩwaatʋ taa, lɛɣzɩtʋ natʋyʋ kaɣ kɔm koobiya mba peɖiyiɣ-ɖʋ tɛtʋ yɔɔ yɔ pɔ-hɔɔlʋʋ taa. Alɩwaatʋ natʋyʋ talɩɣ lɛ, pakaɣ kpeɣluu patam numwaa mba pakazɩ tɛtʋ yɔɔ yɔ ɛsɔdaa se paɖʋ nesi Armaagedɔɔ you. (Mat. 24:31; Natʋ 2:26, 27) Pɩwɩlɩɣ se Nɔɔɖɛyaa ɛgbɛyɛ ɛɛtasɩɣ wɛʋ ɖɔ-cɔlɔ tɛtʋ yɔɔ. Paa mbʋ yɔ, pɩtɩŋa pɩkaɣ ɖɔm cɔlɩɩɩ samaɣ sɔsɔɔ taa. Heŋ lɛɛŋ taa Koobiya abalɩñɩma mba pɛwɛ niye yɔ, mba kaɣnɩ ɖiyuu Ɛsɔ samaɣ. Pɩkaɣ pɔzʋʋ se ɖɩwɩlɩ se ɖɩwɛ siɣsiɣ Yehowa ɛsɩndaa nɛ ɖɩɖʋʋ nesi koobiya mba, nɛ ɖɩɖɔŋ nʋmɔʋ ŋgʋ Yehowa tɩŋɩɣnɩ pɔ-yɔɔ nɛ ɛwɩlɩɣ-ɖʋ yɔ, kɩ-taa. Ye ɖɩsɔɔlaa se ɖihiɣ wezuu yɔ, pɩpɔzʋʋ se ɖɩɖɔ nʋmɔʋ ŋgʋ pawɩlɩɣ-ɖʋ yɔ kɩ-taa!
15. (a) Ɛzɩma ɖɩpɩzɩɣ nɛ ɖɩwɛɛnɩ laŋɩyɛ ɖɔkʋʋ nɛ pɩkpaɖɩ? (b) Nɛ ɛbɛ yɔɔ pɩcɛyaa se ɖɩla mbʋ lɛɛlɛɛyɔ?
15 Laŋɩyɛ ɖɔkʋʋ: Pɩnaɣ 2017 kigbeɣluu sɔsɔʋ tɔm ñʋʋ yɔ “Taalɔ Lidaʋ!” Kigbeɣluu ŋgʋ kɩsɩnɩ-ɖʋ se ɖɩpɩzɩ nɛ ɖɩɖɔkɩ ɖa-tɩ kala taa nɛ pɩkpaɖɩ. Ðɩkpɛlɩkaa se laŋɩyɛ ɖɔkʋʋ ɛɛlɩɣnɩ wɛtʋ ndʋ tɩ-taa ɖɩwɛɛ yɔ tɩ-cɔlɔ. Ye ɖɩtaɣ Yehowa liu yɔ, ɖɩpɩzɩɣ nɛ ɖɩwɛɛnɩ laŋɩyɛ ɖɔkʋʋ nɛ pɩkpaɖɩ. (Roma 12:12) Ðɩtaasɔɔ lidaʋ tɔm ndʋ Yesu yɔɔdaa yɔ tɩ-yɔɔ kpa. Ɛyɔɔdaa se: “Weyi ɛɖɔkɩ ɛ-laŋɩyɛ nɛ pɩkɔɔ pɩtɛ yɔ, ɛnʋ kaɣnɩ hiɣu ñʋʋ yabʋ.” (Mat. 24:13; pɩ-tɛɛ tɔm.) Lidaʋ tɔm ndʋ, tɩwɩlɩɣ se pɩwɛɛ se ɖɩɖɔkɩ ɖe-siɣsiɣ wɛtʋ kpam paa kaɖɛ nɖɩ ɖɩkatɩɣ yɔ. Ye ɖɩɖɔkʋʋ ɖa-tɩ paa kaɖɛ nɖɩ ɖɩ-taa lɛɛlɛɛyɔ yɔ, ɖe-tisuu kaɣ kpaʋ ɖoŋ pʋcɔ nɛ kʋñɔŋ sɔsɔʋ paɣzɩ.
16. (a) Ɛbɛ wɩlɩɣ se ɖɩwɛ abalɩtʋ yaa ɖɩfɛyɩ? (b) Nɛ ɛzɩma ɖɩpɩzɩɣ nɛ ɖɩwɛɛ abalɩtʋ lɛɛlɛɛyɔ nɛ pɩkpaɖɩ?
16 Abalɩtʋ: Pɩnaɣ 2018 kigbeɣluu sɔsɔʋ tɔm ñʋʋ yɔ “Wɛɛ abalɩtʋ!” Kigbeɣluu ŋgʋ kɩtɔzɩ-ɖʋ se pɩtɩkɛ hɔɔlɩŋ weyi ɩ-taa ɖɩwɛ niye yɔ, ɛnɩ wɩlɩɣna se ɖɩwɛ abalɩtʋ yaa ɖɩfɛyɩ. Ɛzɩ pɩwɛʋ laŋɩyɛ ɖɔkʋʋ hɔɔlʋʋ taa yɔ, abalɩtʋ siŋŋ lɩɣnɩ ɛzɩma ɖɩtaɣ Yehowa liu yɔ pɩ-cɔlɔ na. Ɛzɩma ɖɩpɩzɩɣ nɛ ɖɩtaa Yehowa liu nɛ pɩkpaɖɩ? Ðɩpɩzɩɣ nɛ ɖɩla mbʋ ye ɖɩkalɩɣ Yehowa tɔm paa evemiye nɖɩ nɛ ɖɩmaɣzɩɣ ɛzɩma ɛyabɩ ɛ-samaɣ ñʋʋ caanaʋ taa yɔ pɩ-yɔɔ yɔ. (Keɣa 67:21; 2 Pɩy. 2:9) Alɩwaatʋ ndʋ ajɛɛ kʋyʋʋ ɖɔ-yɔɔ kʋñɔŋ sɔsɔʋ alɩwaatʋ taa yɔ, pɩkaɣ pɔzʋʋ se ɖɩwɛɛ abalɩtʋ nɛ ɖɩtaa Yehowa liu nɛ pɩkpaɖɩ. (Keɣa 111:7, 8; Ebr. 13:6) Ye ɖɩtaɣ Yehowa liu lɛɛlɛɛyɔ yɔ, ɖɩkaɣ wɛnʋʋ abalɩtʋ ndʋ pɩpɔzʋʋ-ɖʋ yɔ, alɩwaatʋ ndʋ Gɔɔgɩ kʋyʋʋ ɖɔ-yɔɔ yɔ. *
ÐAŊ ÑA-ÑƲƲ YABƖTƲ KPAM
Piileɖiɣ lɛ, Yesu nɛ ɛ-sɔɔjanaa mba pɛwɛ ɛsɔdaa pakaɣ labʋ Armaagedɔɔ you se paɖɩzɩ Ɛsɔ koyindinaa (Cɔnɩ tayʋʋ 17)
17. Ɛbɛ yɔɔ pɩtɩpɔzɩ se sɔɔndʋ ɛkpa-ɖʋ nɛ Armaagedɔɔ you? (Cɔnɩ takayaɣ huyuu yɔɔ kɩlɛmʋʋ.)
17 Ɛzɩ ɖɩnaʋ tɔm ñʋʋ ŋgʋ kɩɖɛwa yɔ kɩ-taa yɔ, ɖa-taa sakɩyɛ caɣ pe-wezuu kpeekpe kɛdɛzaɣ kɩyakɩŋ taa. Ɛlɛ ɖɩwɛnɩ lidaʋ ɖɔɖɔ se ɖɩkaɣ hiɣu wezuu kʋñɔŋ sɔsɔʋ alɩwaatʋ taa. Armaagedɔɔ you kaɣnɩ yebu se ɛjaɖɛ ɖɩnɛ ɖɩ-yɔɔ ɖʋtʋ ɛsɩɩ tɩnaɣ. Ɛlɛ pɩtɩpɔzɩ se sɔɔndʋ ɛkpa-ɖʋ nɛ nabʋyʋ. Ɛbɛ yɔɔ? Mbʋ pʋyɔɔ yɔ, Ɛsɔ kaɣnɩ labʋ you ŋgʋ. (Adu. 1:33; Ezek. 38:18-20; Zek. 14:3) Yehowa haɣ nɔɔ lɛ, Yesu kaɣ ɖɛʋ nɔɔ Ɛsɔ tɛ sɔɔjanaa nɛ pala you. Ɛ nɛ patam numwaa nɛ Ɛsɔ tiyiyaa canɖaŋ canɖaŋ pakaɣnɩ you labʋ. Pakaɣ kpɛndʋʋ nɛ poyooni Sataŋ, ɛ-aleewaa nɛ po-yoyaa.—Dan. 12:1; Natʋ 6:2; 17:14.
18. (a) Lidaʋ ŋgʋ Yehowa ha-ɖʋ? (b) Ɛzɩma Natʋ 7:9, 13-17 sɩɣnɩ-ŋ se ña-taa ɛtɛ se ŋkaɣ hiɣu ñʋʋ yabʋ cee wayɩ?
18 Yehowa heyi-ɖʋ lidaʋ tɔm tʋnɛ: “Paa wonuu ŋgʋ poluba se poyooni-ŋ kɔyɔ, falaa.” (Iza. 54:17) Yehowa sɛyaa siɣsiɣ ñɩma “samaɣ sɔsɔɔ nakɛyɛ” kaɣ ‘lɩnʋʋ kʋñɔŋ sɔsɔʋ taa’ cɩŋgɩlɩm! Nɛ pakaɣ wobu pɩ-yɔɔ nɛ pɛcɛlɩɣ-ɩ sɛtʋ kele kele ñɩndʋ. (Kalɩ Natʋ 7:9, 13-17.) Bibl heyiɣ-ɖʋ lɩmaɣza sakɩyɛ wena a-yɔɔ ɖa-taa pɩzɩɣ nɛ pɩtɛ se ɖɩkaɣ hiɣu ñʋʋ yabʋ cee wayɩ yɔ! Ðɩnawa se “Yehowa kandɩyɩɣ siɣsiɣ tɩnaa yɔɔ.” (Keɣa 31:23, nwt.) Mba payɩ pɔsɔɔlɩ Yehowa nɛ pɛsɛɣ-ɩ yɔ, pa-taa kaɣ labʋ leleŋ alɩwaatʋ ndʋ panaɣ se Yehowa wɛɛ nɛ ɛlʋkɩ ɛ-hɩɖɛ kiɖeɖee yɔɔ yɔ.—Ezek. 38:23.
19. Piileɖiɣ lɛ, cee wayɩ kɩbaŋʋ ŋgʋ ɖɩkaɣ hiɣu?
19 Maɣzɩ tɔm pee wena papɩzaɣ se palabɩnɩ tʋmɩyɛ 2 Timootee 3:2-5 taa se pɔyɔɔdɩ ɛyaa mba pɛwɛ ɛjaɖɛ kɩfaɖɛ taa nɛ Sataŋ tɩtasɩ wɛnʋʋ ɖoŋ pɔ-yɔɔ yɔ, a-yɔɔ nɛ ŋna. (Kalɩ aɖakaɣ “ Wɛtʋ ndʋ ɛyaa kaɣ wɛnʋʋ yɔ.”) Koobu George Gangas, * weyi ɛɛlabɩ tʋmɩyɛ Nɔɔɖɛyaa ɛgbɛyɛ taa yɔ, ɛyɔɔdɩ ɛyaa mba pɔ-yɔɔ se: “Alɩwaatʋ ndʋ paa weyi ɛsɛɣ Yehowa yɔ, ɛjaɖɛ kaɣ kɛʋ lone kɩbanɖɛ siŋŋ! Piileɖiɣ lɛ, ŋkaɣ wɛnʋʋ waɖɛ se ŋcaɣ ɛjaɖɛ kɩfaɖɛ taa. Ŋkaɣ caɣʋ wezuu nɛ pɩɖaɣlɩ ɛzɩ Yehowa yɔ. Ðɩkaɣ caɣʋ wezuu tam.” Pɩkɛnɩ lidaʋ kɩbaŋʋ siŋŋ!
HENDU 122 Ðɔkɩ ña-tɩ kpam, sɔɔndʋ ɛtaakpa-ŋ!
^ tay. 5 Ðɩnawa se piileɖiɣ lɛ, “kʋñɔŋ sɔsɔʋ” nakʋyʋ kaɣ kɔm ɛyaa kpeekpe yɔɔ. Ɛbɛ kaɣ talʋʋ Yehowa sɛyaa alɩwaatʋ ndʋ tɩ-taa? Ɛbɛ Yehowa kaɣ ñɩnʋʋ se ɖɩla alɩwaatʋ ndʋ tɩ-taa? Wɛtʋ ndʋ pɩpɔzʋʋ se ɖɩkpazɩ ɖoŋ lɛɛlɛɛyɔ nɛ pɩsa nɛ ɖɩɖɔkɩ ɖe-siɣsiɣ wɛtʋ? Tɔm ndʋ, tɩ-taa ɖɩkaɣ tazʋʋ tɔm ñʋʋ kʋnɛ kɩ-taa.
^ tay. 3 TƆM TƆBƲƲ: Mba payaɣ pa-tɩ se Krɩstʋ ñɩma yɔ, mba lɛ ɛyaa mba pɔyɔɔdʋʋ se patɩŋɩɣ Krɩstʋ wayɩ, ɛlɛ paaɖɔŋ Yehowa paɣtʋ yɔɔ yɔ.
^ tay. 11 TƆM TƆBƲƲ: Tɔm loyaɣ Gɔɔgɩ weyi ɛlɩnɩ Maagɔɔgɩ yɔ (yaa Gɔɔgɩ) sɩŋnɩ ajɛɛ wena akaɣ kpɛndʋʋ se akaɖɩnɩ Ɛsɔ sɛtʋ kele kele ñɩndʋ kʋñɔŋ sɔsɔʋ alɩwaatʋ taa yɔ.
^ tay. 11 Pɩsa nɛ ŋtɩlɩ mbʋ mbʋ pɩkaɣ labʋ pʋcɔ nɛ Armaagedɔɔ you paɣzɩ yɔ, pɩ-yɔɔ tɔm nɛ pɩkɩlɩ lɛ, kalɩ Ɛsɔ Kewiyaɣ ɖiɣni ka-tʋmɩyɛ labʋ! takayaɣ ñʋʋ 21. Pɩsa nɛ ŋtɩlɩ you ŋgʋ Gɔɔgɩ weyi ɛlɩnɩ Maagɔɔgɩ yɔ ɛkaɣ labʋ, nɛ ɛzɩma Yehowa kaɣ lʋbʋ ɛ-samaɣ yɔɔ Armaagedɔɔ you taa yɔ pɩ-yɔɔ tɔm nɛ pɩkpaɖɩ lɛ, kalɩ Feŋuu Tilimiye 1er juillet 2015 hɔɔlʋʋ 16-21.
^ tay. 16 Pɩnaɣ 2019 kigbeɣluu sɔsɔʋ tɔm ñʋʋ “Sɔɔlɩm ɛɛtɛŋ kpa!” sɩnɩ-ɖʋ se ɖa-taa ɛtɛ se Yehowa pɩzɩɣ nɛ ɛkandɩyɩ ɖɔ-yɔɔ nɛ sɔɔlɩm.—1 Kɔr. 13:8.
^ tay. 19 Kalɩ tɔm ñʋʋ ‘Ses œuvres l’accompagnent’ ŋgʋ kɩwɛ 1er décembre 1994 tɛ Feŋuu Tilimiye (Fransɩɩ) taa yɔ.
