1. Ɛbɛ yɔɔ Yehowa mʋnaa se ɖɩsɛɛ e-ɖeke?

PƖWƐƐ se ɖɩsɛɛ Yehowa ɖeke, mbʋ pʋyɔɔ yɔ ɛlɩzɩ-ɖʋ nɛ ɛha-ɖʋ wezuu. (Natʋ 4:11) Ɛlɛ kaɖɛ naɖɩyɛ wɛɛ. Paa ɖɩsɔɔlɩ Yehowa nɛ ɖɩñaŋɩ-ɩ yɔ, wondu natʋyʋ pɩzɩɣ nɛ tɩpaɣzɩ mʋʋ ñɩm siŋŋ ɖe-wezuu caɣʋ taa nɛ tiyele nɛ ɖɩɩtasɩɣ Yehowa sɔɔlʋʋ nɛ ɖɩsɛɣ e-ɖeke ɛzɩ pɩmʋnaʋ yɔ. Pɩwɛɛ se ɖɩtɩlɩ ɛzɩma pɩpɩzɩɣ nɛ pɩla mbʋ yɔ. Kajalaɣ lɛ, ɖɩkaɣ yɔɔdʋʋ mbʋ Yehowa ɖeke sɛʋ kɛnaa yɔ pɩ-tɔm.

2. Ɛzɩ Ejipiti Lɩʋ 34:14 yɔɔdʋʋ yɔ, ɛbɛ ɖɩkaɣ labʋ ye ɖɩsɛɣ Yehowa ɖeke yɔ?

² Bibl taa lɛ, ye pɔtɔm se ɖɩwɛɛnɩ sɔɔlɩm sɔsɔm Yehowa yɔɔ yɔ, pɩwɩlɩɣ se pɩwɛɛ se ɖɩsɛɛ e-ɖeke. Ðɩɩkaɣ nɔɔyʋ yaa nabʋyʋ haʋ nʋmɔʋ se pɩmʋ e-lone ɖa-laŋɩyɛ taa.—Kalɩ Ejipiti Lɩʋ 34:14.

3. Ɛbɛ yɔɔ ɖɩɩsɛɣ Yehowa yem se pɔtɔm se pɛsɛɛ-ɩ?

³ Ðɩɩsɛɣ Yehowa yem se pɔtɔm se pɛsɛɛ-ɩ. Ɛbɛ yɔɔ? Mbʋ pʋyɔɔ yɔ, mbʋ ɖɩkpɛlɩkaa nɛ ɖɩtɩlɩ ɛ-yɔɔ yɔ, mbʋ yebina nɛ ɖɩsɛɣ-ɩ. Ðɩkpɛlɩkaa nɛ ɖɩsɔɔlɩ ɛ-wɛtʋ kɩbandʋ. Ðɩsɩm mbʋ Yehowa sɔɔlaa nɛ mbʋ ɛtɩsɔɔlɩ yɔ nɛ ɖitisiɣ pɩ-yɔɔ. Ðɩsɩm tamaɣ ŋga ɛwɛnɩ ɛyaa yɔɔ yɔ nɛ ɖɩɖʋʋ-kɛ nesi. Pɩkɛnɩ-ɖʋ hɩɖɛ ɖʋʋ se ɛha-ɖʋ waɖɛ se ɖɩkɛ ɛ-taabalaa. (Keɣa 24:14) Mbʋ payɩ ɖɩkpɛlɩkɩɣ ɖa-Lɩzɩyʋ yɔɔ yɔ, piyeki se ɖɩñɔtɩnɩ-ɩ nɛ pɩkɩlɩ.—Yak. 4:8.

4. (a) Ɛbɛ Eleeu lakɩ se pɩsa nɛ sɔɔlɩm mbʋ ɖɩwɛnɩ Yehowa yɔɔ yɔ pɩpasɩ? (b) Ɛbɛ tɔm ɖɩkaɣ yɔɔdʋʋ tɔm ñʋʋ kʋnɛ kɩ-taa?

⁴ Eleeu ɖiyiɣni ɛjaɖɛ ɖɩnɛ, nɛ ɛtɩŋɩɣnɩ ɖɩ-yɔɔ nɛ eseɣtiɣ ɖo-tomnaɣ kɔɖɛyɩ nɛ eyeki se pɩwɛɛ-ɖʋ kaɖɛ se ɖɩlʋbɩnɩ lɩmaɣza kɩdɛkɛda. (Efɛz. 2:1-3; 1 Yoh. 5:19) Ɛñɩnɩɣ se ɖɩsɔɔlɩ wondu lɛɛtʋ ɖɔɖɔ nɛ piyele nɛ ɖɩtaatasɩ sɔɔlʋʋ Yehowa ɖeke. Ðɩkaɣ yɔɔdʋʋ nʋmɔŋ naalɛ weyi ɩ-yɔɔ Eleeu pɩzɩɣ ɛtɩŋna nɛ ɛla mbʋ yɔ ɩ-tɔm. Kajalaɣ lɛ, eseɣti-ɖʋ se ɖɩsɔɔlɩ  liidiye nɛ nabʋlɛ lɛ, eseɣtiɣ-ɖʋ se ɖɩlɩzɩ aleɣya wena atɩmʋna yɔ.

5. Ɛbɛ yɔɔ pɩwɛɛ se ɖɩkpa ɖa-tɩ nɛ ɖɩtaapaɣzɩ liidiye sɔɔlʋʋ?

⁵ Ða-tɩŋa ɖɩsɔɔlaa se ɖɩwɛɛnɩ tɔɔnaɣ sakɩyɛ nɛ ɖɩtɔɔ, wondu kɩbandʋ nɛ ɖisuu nɛ lone kɩbanɖɛ nɖɩ ɖɩ-taa ɖɩcaɣ wezuu yɔ. Paa mbʋ yɔ, pɩwɛɛ se ɖɩkpa ɖa-tɩ nɛ ɖɩtaapaɣzɩ liidiye sɔɔlʋʋ. Sɔnɔ, ɛyaa sakɩyɛ kɛ ‘liidiye sɔɔlɩyaa’ nɛ pɔsɔɔlɩ ɖɔɖɔ mbʋ liidiye pɩzɩɣ yabʋ yɔ. (2 Tim. 3:2) Yesu kaanawa se pɩpɩzɩɣ nɛ pɩtakɩ ɛ-wayɩ tɩŋɩyaa se pɛwɛɛnɩ sɔɔlɩm mbʋ. Ɛyɔɔdaa se: “Nɔɔyʋ ɛɛpɩzɩɣ nɛ ɛkɛ caanaa naalɛ yom; mbʋ pʋyɔɔ yɔ ɛkaɣ paɖʋʋ kʋɖʋm nɛ ɛsɔɔlɩ lɛlʋ, yaa ɛkaɣ ñɔnʋʋ kʋɖʋm nɛ eni lɛlʋ. Ɩɩpɩzɩɣ nɛ ɩkɛ Ɛsɔ yomaa nɛ ɩtɛ ɩkɛ Ñɩm yomaa.” (Mat. 6:24) Ye ɛyʋ ɛsɛɣ Yehowa nɛ ɛñakɩ pana sakɩyɛ se ɛwɛɛ ñɩm ɖɔɖɔ yɔ, pɩwɩlɩɣ se ɛwɛɛ nɛ ɛñɩnɩɣ se ɛkɛ caanaa naalɛ yom. Pɩwɩlɩɣ se pɩtɩkɛ Yehowa ɖeke ɛsɛɣ.

6. Tɔm ndʋ Yesu heyi Lawodisee ɛgbɛyɛ yɔ, lɔŋ weyi ɖɩkpɛlɩkɩɣ tɩ-taa?

⁶ Kajalaɣ pɩnzɩ mɩnʋʋ ɖɩdɛnɖɛ taa, Lawodisee ɛgbɛyɛ taa ñɩma kpazaɣ pa-tɩ nɛ pɔyɔɔdʋʋ se: “Mɛnkɛ ñɩm tʋ nɛ mehiɣ ñɩm nɛ maatɛɖɩɣ nabʋyʋ paa ññɩɩ.” Ɛlɛ Yehowa nɛ Yesu pɛ-ɛsɩndaa lɛ, pɛwɛ ‘tanɩm taa nɛ pɛwɛ pʋtɔdɩyɛ nɛ pɛkɛ kʋñɔndɩnaa nɛ yʋlʋmaa nɛ pɛwɛ ndaakpeɖe.’ Pɩtɩkɛ ñɩm mbʋ pɛwɛna yɔ pʋyɔɔ Yesu tasɩ-wɛ lɔŋ, ɛlɛ ɛtasɩ-wɛ lɔŋ mbʋ pʋyɔɔ yɔ, sɔɔlɩm mbʋ pɛwɛnɩ ñɩm yɔɔ yɔ, pɩwɛɛ nɛ pɩcamɩɣ taabalɩyɛ nɖɩ ɖɩwɛ pa nɛ Yehowa pɛ-hɛkʋ taa yɔ. (Natʋ 3:14-17) Ye ɖɩnawa se ɖɩpaɣzɩ sɔɔlʋʋ liidiye yɔ, pɩwɛɛ se ɖɩñaɣ pana kpɛdɛyɛ nɛ ɖɩñɔɔzɩ ɖa-lɩmaɣza. (1 Tim. 6:7, 8) Ye ɖɩtɩla mbʋ yɔ, ɖa-lɩmaɣza tayɩɣ nɛ Yehowa eetisiɣ nɛ ɛmʋ sɛtʋ ndʋ ɖɩhaɣ-ɩ yɔ. Ɛkɛ ‘Ɛsɔ  weyi ɛwɛ sʋsɩ * yɔ.’ (Wp. 4:24) Ɛzɩma liidiye pɩzɩɣ nɛ pɩpɩsɩ mbʋ pɩmʋ ñɩm siŋŋ yɔ ɖe-wezuu caɣʋ taa?

7-9. Mbʋ pɩtalɩ ɛzʋtʋyʋ weyi payaɣ se David yɔ, ɛbɛ ŋkpɛlɩkɩ pɩ-taa?

⁷ Ðɩyɔɔdɩ David kɩɖaʋ tɔm. Ɛkɛ ɛgbɛyɛ taa ɛzʋtʋyʋ weyi ɛlakɩ tʋmɩyɛ nɛ kpekpeka yɔ, nɛ ɛwɛ Etaazuunii ɛjaɖɛ taa. Ɛyɔɔdaa se ɛnʋ kɛ tʋmlaɖʋ weyi ɛwɛ kpekpeka yɔ. Tʋmɩyɛ ɛgbɛyɛ nɖɩ ɖɩ-taa ɛlakaɣ tʋmɩyɛ yɔ, ɖɩsɔzɩ-ɩ tʋmɩyɛ nɛ liidiye nɛ paha-ɩ samtʋ nimiye mbʋ pʋyɔɔ yɔ, ɛkɛ ɛyaa mba pɛwɛ niye tʋmɩyɛ nɖɩ ɖɩ-taa pɛ-ɛjaɖɛ taa yɔ, pa-taa nɔɔyʋ. David yɔɔdaa se: “Nabʋyʋ taa mamaɣzaɣ se ñʋʋ leleŋ weyi mehiɣ tʋmɩyɛ taa yɔ, pɩwɩlɩɣ kpayɩ kpayɩ se Yehowa wazɩnɩ-m.” Ɛlɛ pɩkɛ mbʋ toovenim na?

⁸ David kɔma nɛ ɛpaɣzɩ naʋ yʋsasɩ nzɩ sɩwɩlɩɣ se ɛ-tʋmɩyɛ wɛnɩ ɖoŋ kɩdɛkɛdɩŋ ɛ nɛ Yehowa pa-taabalɩyɛ yɔɔ yɔ. Ɛyɔɔdaa se: “Mɛwɛɣ ɛgbɛyɛ taa kediɣzisi taa nɛ halɩ tɔm susuu taa ɖɔɖɔ lɛ, pɩɖɩɣzɩ-m se mɛwɛɣ nɛ mamaɣzɩɣ man-tʋmɩyɛ taa tɩlasɩ yɔɔ. Pɛhɛyaɣ-m liidiye sakɩyɛ ɛlɛ mɔnkɔm nɛ manpaɣzɩ wɛnʋʋ nɩɣzɛ nɛ me-nesi ɖɔkʋʋ paɣzɩ sʋʋ kaɖɛ taa.”

⁹ David ɖiɣzinaa se pɩwɛɛ se ɛtɩlɩ mbʋ pɩ-tɔm kɩlɩ cɛyʋʋ yɔ. Ɛyɔɔdaa se: “Mɛntɛm man-taa kpem se mɔñɔɔzʋʋ wɛtʋ ndʋ tɩ-taa mɛwɛɛ yɔ.” David lɛɣzɩ ɛ-tʋmɩyɛ ɖʋtʋ nɛ eheyi ɛ-tʋmɩyɛ ñʋʋdʋ ɛzɩma ɛñɩnɩɣ se ɛpaɣzɩ labʋ tʋmɩyɛ yɔ. Ɛbɛ lɩ pɩ-taa? David lesi ɛ-tʋmɩyɛ! Ɛzɩma David laba? Ɛyɔɔdaa se: “Tɛʋ fema kpaagbaa lɛ, mañɩɣ niye se manpaɣzɩɣ nʋmɔʋ lɩzʋʋ sɩnɩyʋ tʋmɩyɛ paa fenaɣ ŋga.” Pɩsa nɛ David nɛ  ɛ-halʋ pɔcɔnɩ pa-kɩcɛyɩm ɖeɖe lɛ, papaɣzɩ labʋ ɖɩsɩ taa ñɔɔzʋʋ tʋmɩyɛ. Pɩlabɩ alɩwaatʋ pazɩ lɛ, ɛpɩsɩ paa ɖooye nʋmɔʋ lɩzɩyʋ nɛ pʋwayɩ lɛ, ɛ-halʋ ɖɔɖɔ paɣzɩ-ɖɩ labʋ. David nɛ ɛ-halʋ palɩzaa se palakɩ tʋmɩyɛ nɖɩ ɛyaa sakɩyɛ niŋaɣ yɔ, ɛlɛ tʋmɩyɛ nɖɩ palakɩ yɔ, pɩtɩkɛ ɖɩ-tɔm kɩlɩnɩ cɛyʋʋ pɛ-ɛsɩndaa. Ye patayɩ liidiye nɖɩ pɛhɛyaɣ-wɛ ɖooo lɛ yɔ tam hiu yɔ, ɖɩ-hɔɔlʋʋ kʋɖʋmʋʋ pɛhɛyɩɣ-wɛ lɛɛlɛɛyɔ; paa mbʋ yɔ, paa fenaɣ ŋga pɛwɛnɩ mbʋ pɔcɔnɩnɩ pa-kɩcɛyɩm ɖeɖe yɔ. Pɔsɔɔlaa se pasɩɩ Yehowa kajalaɣ ɖeɖe, nɛ panɩ pɩ-taa se ɛcɔŋnɩ mba pasɩɣ Kewiyaɣ tʋma kajalaɣ lone taa yɔ pɔ-yɔɔ.—Mat. 6:31-33.

10. Ɛzɩma ɖɩpɩzɩɣ nɛ ɖɩkandɩyɩ ɖa-laŋɩyɛ yɔɔ?

¹⁰ Pɩwɛɛ se ɖɩkandɩyɩ ɖa-laŋɩyɛ yɔɔ, paa ɖɩwɛnɩ ñɩm pazɩ yaa sakɩyɛ yɔ. Ɛzɩma tɩyɛ? Taapaɣzɩ ñɩm sɔɔlʋʋ. Taayele nɛ tʋmɩyɛ nɖɩ ŋlakɩ yɔ, ɖɩmʋ ñɩm ñɛ-ɛsɩndaa nɛ pɩkɩlɩ Yehowa sɛtʋ. Ɛzɩma ŋpɩzɩɣ nɛ ŋtɩlɩ se wɛtʋ ndʋ tɩwɛɛ nɛ tɩtalɩɣ-ŋ? Tɔm ndʋ pɩwɛɛ se ŋpɔzɩ ña-tɩ yɔ, tɩ-taa natʋyʋ lɛ se: Alɩwaatʋ ndʋ mɛwɛɣ kediɣzisi taa yaa tɔm susuu taa yɔ, mamaɣzɩɣ man-tʋmɩyɛ yɔɔ ɖoŋ ɖoŋ? Manɩɣzɩɣ paa ɛzɩmtaa se ɛzɩ mankaɣ wɛnʋʋ liidiye sakɩyɛ cee wayɩ? Ɛzɩ liidiye nɛ tomnaɣ yɔɔ ñɩm yeki nɛ tɔm kɔŋ ma nɛ mɛn-tɛŋga ɖɛ-hɛkʋ taa? Mentisiɣ se mala tʋmɩyɛ nɖɩ ɛyaa lalaa niŋ yɔ, ye ɖɩsɩɣnɩ-m se mehiɣ alɩwaatʋ sakɩyɛ nɛ mɛnsɛɛ Yehowa yɔ? (1 Tim. 6:9-12) Ŋŋmaɣzɩɣ tɔm ndʋ tɩ-yɔɔ lɛ, tɔzɩ se Yehowa sɔɔlɩ-ɖʋ nɛ ɛlabɩ mba pɛsɛɣ-ɩ yɔ tamaɣ se: “Maakaɣ-ŋ yebu kaaʋ, nɛ maakaɣ-ŋ siɣye haʋ kaaʋ.” Pʋyɔɔ apostoloo Pɔɔlɩ mawa se: “Ɩtaawɛɛnɩ liidiye sɔɔlɩm mi-wezuu caɣʋ taa.”—Ebr. 13:5, 6.

11. Ðoŋ weyi aleɣya pɩzɩɣ nɛ awɛɛnɩ ɛyʋ yɔɔ?

¹¹ Yehowa sɔɔlaa se ɖɩnɩɩ leleŋ ɖe-wezuu caɣʋ taa, nɛ aleɣya pɩzɩɣ asɩnɩ-ɖʋ nɛ ɖɩnɩɩ leleŋ ɛnɩ. Pʋyɔɔ Bibl yɔɔdaa se: “Nabʋyʋ fɛyɩ ɛyʋ weewee nɛ pɩkɩlɩ se ɛtɔɔ nɛ ɛñɔɔ nɛ ɛhɛzɩ, ñɩm mbʋ ehiɣaa nɛ ɛ-tʋma yɔ pɩ-taa.” (Ekl. 2:24) Paa mbʋ yɔ, aleɣya wena awɛ ɛjaɖɛ yɔɔ yɔ, a-taa sakɩyɛ pɩzɩɣ nɛ awɛɛnɩ ɖoŋ kɩdɛkɛdɩŋ ɖɔ-yɔɔ. Apɩzɩɣ ayele nɛ ɛyaa paɣzɩ tisuu mbʋ Bibl yɔɔdʋʋ se pɩfɛyɩ ɖeu yɔ pɩ-yɔɔ nɛ halɩ pɔsɔɔlʋʋ-pʋ.

12. Ɛzɩ 1 Kɔrɛntɩ mba 10:21, 22 yɔɔdʋʋ yɔ, ɛbɛ yɔɔ pɩwɛɛ se ɖɩlɩzɩ aleɣya wena ɖɩlakɩ yɔ camɩyɛ?

¹² Ðɩsɔɔlaa se ɖɩsɛɛ Yehowa ɖeke nɛ pʋyɔɔ lɛ, ɖɩɩpɩzɩɣ nɛ ɖɩtɔɔ “Yehowa  taabɩlɩ yɔɔ” nɛ “aleewaa taabɩlɩ yɔɔ.” (Kalɩ 1 Kɔrɛntɩ mba 10:21, 22.) Ye ña nɛ nɔɔyʋ ɩtɔkɩ tɔɔnaɣ yɔ, ɖoŋ ɖoŋ lɛ, pɩwɩlɩɣ se ña nɛ ɩ ɩkɛ taabalaa. Ye ɖɩlakɩ aleɣya wena aseɣtiɣ puuyaɣ lakasɩ, feziŋ kɩdɛkɛdɩŋ yaʋ, wezuu kɩdɛkɛdʋʋ caɣʋ yaa tomnaɣ sɔɔlɩm nɛ lakasɩ lɛɛsɩ yɔ, pɩwɩlɩɣ se ɖa nɛ Ɛsɔ koyindinaa ɖɩwɛɛ nɛ ɖɩtɔkɩ tɔɔnaɣ ŋga palaba yɔ. Mbʋ pɩlɩɣ pɩ-taa yɔ lɛ se pɩtasɩna se pɩɖʋzʋʋ-ɖʋ lɛ, pɩcamɩɣ ɖɔɖɔ ɖa nɛ Yehowa ɖa-taabalɩyɛ.

13-14. Ɛzɩ Yakubu 1:14, 15 yɔɔdʋʋ yɔ, ɛbɛ yɔɔ pɩcɛyaa se ɖɩlɩzɩ ɖa-aleɣya camɩyɛ? Ha kɩɖaʋ nakʋyʋ.

¹³ Ɛzɩma tɩyɛ ɖɩpɩzɩɣ ɖɩkpaɣ aleɣya nɛ ɖɩmaɣzɩnɩ tɔɔnaɣ? Ðɩɩtɔkɩ lɛ, ɖalɩzɩɣnɩ mbʋ ɖɩsɔɔlaa se ɖɩɖʋ ɖɔ-nɔɔ taa yɔ. Ɛlɛ ɖiliki tɔɔnaɣ nɛ pɩtɛ lɛ, ɖɩɩpɩzɩɣ nɛ ɖɩlɩzɩ ɛzɩma ɖɩsɔɔlaa se tɔɔnaɣ ŋga kala tʋmɩyɛ ɖo-tomnaɣ taa yɔ. Tɔɔnaɣ kɩbaŋa pɩzɩɣ nɛ keyele se ɖɩwɛɛ alaafɩya, ɛlɛ tɔɔnaɣ kɩdɛkɛdaɣ kaɣ yebu nɛ ɖɩtɔlɩ kʋdɔŋ. Pɩtɩla ɖɩɩnaɣ mbʋ pɩlɩɣ pɩ-taa yɔ kpaagbaa, ɛlɛ alɩwaatʋ wɛɣ nɛ tɩɖɛɣ lɛ, ɖɩkaɣ naʋ.

¹⁴ Mbʋ ɖɔɖɔ alɩwaatʋ ndʋ ɖɩlɩzɩɣ aleɣya wena ɖɩlakɩ yɔ, ɖalɩzɩɣnɩ mbʋ ɖɩɖʋʋ ɖa-maɣzɩm taa yɔ. Mbʋ pɩlakɩ pʋwayɩ yɔ, ɖɩfɛyɩnɩ ɖoŋ nɩɩyɩ pɩ-yɔɔ. Ɛlɛ pʋbʋ ñɛwɛnɩ ɖoŋ ɖa-laŋɩyɛ nɛ ɖa-maɣzɩm yɔɔ. Aleɣya kɩbana pɩzɩɣ nɛ akpazɩ-ɖʋ ɖoŋ; aleɣya kɩdɛkɛda kaɣ-ɖʋ ɖʋzʋʋ. (Kalɩ Yakubu 1:14, 15.) Ðoŋ weyi aleɣya kɩdɛkɛda wɛna yɔ, pɩtɩla ɖɩɩnaɣ-ɩ kpaagbaa ɛlɛ alɩwaatʋ wɛɣ nɛ tɩɖɛɣ lɛ, ɖɩkaɣ-ɩ naʋ. Pʋyɔɔ Bibl pakɩ-ɖʋ se: “Itaapeɣzi mɩ-tɩ: Paawoŋuu Ɛsɔ. Mbʋ pʋyɔɔ yɔ, mbʋ payɩ ɛyʋ ɖuu yɔ, mbʋ ɖɔɖɔ ɛkaɣ kʋm; mbʋ pʋyɔɔ yɔ weyi eɖuu se pɩwazɩ e-tomnaɣ yɔ, ɛkaɣ kʋm e-tomnaɣ taa mbʋ pɩɖazaa yɔ.” (Gal. 6:7, 8) Pɩcɛyaa kpem se ɖikizi aleɣya wena payɩ aseɣtiɣ lakasɩ nzɩ Yehowa paɖɩɣ yɔ!—Keɣa 96:10.

15. Kʋjɔʋ ŋgʋ Yehowa labɩ-ɖʋ se pɩwazɩ-ɖʋ?

¹⁵ Yehowa sɛyaa sakɩyɛ sɔɔlɩ cɔnʋʋ ɖɛ-tɛ teelee lone nɖɩ ɖɩwɛ intɛrnɛɛtɩ yɔɔ nɛ payaɣ-ɖɩ se JW Tɔm Ðɩyɔɔdɩyɛ^® yɔ. Payaɣ koobu halɩñɩnʋ nɔɔyʋ se Marilyn. Ɛyɔɔdaa se: “JW Tɔm Ðɩyɔɔdɩyɛ ɖʋtʋ kaasɩnɩ-m nɛ mehiɣ taa leleŋ, nɛ manpɩzɩɣ mɔncɔnɩ mbʋ payɩ palakɩ yɔ, mbʋ pʋyɔɔ yɔ pɩtɩŋa pɩwazɩɣ-m. Alɩwaatʋ ndʋ pɩlakɩ-m ɛzɩ mɛwɛ men-ɖeke yaa pitiki-m yɔɔɔ yɔ, mañɩnɩɣ tɔm yɔɔdʋʋ nabʋyʋ yaa Tanaŋ tɛɛ Ɛsɔ sɛtʋ ɖʋtʋ natʋyʋ ndʋ tɩkpazɩɣ-m ɖoŋ yɔ nɛ mɔncɔŋna. Piyeki se mɔñɔtɩnɩ Yehowa nɛ ɛ-ɛgbɛyɛ. Mbʋ palakɩ JW Tɔm Ðɩyɔɔdɩyɛ yɔɔ yɔ, pɩlɛɣzɩ me-wezuu caɣʋ siŋŋ.” Yehowa kʋjɔʋ ŋgʋ, kɩwɛɛ nɛ kɩwazɩɣ-ŋ? JW Tɔm Ðɩyɔɔdɩyɛ wɛnɩ ɖʋtʋ kɩfatʋ paa fenaɣ ŋga. Tatasɩ kɩnɩnɩsɩ, videowaa ɖʋtʋ nɛ hendu ndʋ tɩkpazɩɣ ɖoŋ yɔ tɩwɛɛ ɖɔɖɔ, nɛ ŋpɩzɩɣ ŋcɔna yaa ŋwelisi paa ɛzɩmtaa.

16-17. (a) Ɛbɛ yɔɔ pɩwɛɛ se ɖɩtɩlɩ alɩwaatʋ ɛzɩma pɩwɛɛ se ɖɩkpaɣ nɛ ɖɩlabɩnɩ aleɣya yɔ? (b) Nɛ ɛzɩma ɖɩpɩzɩɣ nɛ ɖɩla mbʋ?

¹⁶ Pɩtasɩna se pɩwɛɛ se ɖɩlɩzɩ aleɣya wena ɖɩlakɩ yɔ camɩyɛ lɛ, pɩwɛɛ ɖɔɖɔ se ɖɩtɩlɩ alɩwaatʋ ɛzɩma ɖɩkpakɩɣ nɛ ɖɩlakɩnɩ aleɣya ana yɔ. Ye ɖɩtɩla mbʋ yɔ, alɩwaatʋ ndʋ ɖɩkpakɩɣ nɛ ɖileɣyiɣna yɔ, tɩpɩzɩɣ nɛ tɩkɩlɩ alɩwaatʋ ndʋ ɖɩkpakɩɣ nɛ ɖɩlakɩnɩ Yehowa tʋma yɔ. Pɩwɛ ɛyaa sakɩyɛ kaɖɛ se patɩlɩ alɩwaatʋ ɛzɩma pɩwɛɛ se pakpaɣ nɛ peleɣyina yɔ. Payaɣ koobu halɩñɩnʋ nɔɔyʋ se Abigail nɛ ɛwɛnɩ pɩnzɩ 18. Ɛyɔɔdaa se: “Malakɩ tʋmɩyɛ nɛ pɩnɩ-m nɛ mɔncɔŋnɩ teelee evemiye ɖɩdɛnɖɛ lɛ, pɩsɩɣnɩ-m se mɔ-yɔɔ ɛkʋyɩ. Ɛlɛ ye mantɩkpa man-tɩ yɔ, manpɩzɩɣ nɛ mankpaɣ ñɩɣtʋ sakɩyɛ nɛ  mɔncɔnɩ teelee.” Payaɣ koobu pɩɣa evelaɣ nakɛyɛ se Samuel. Kɔyɔɔdaa se: “Nabʋyʋ taa mɔncɔŋnɩ videowaa cikpema sakɩyɛ intɛrnɛɛtɩ yɔɔ. Manpaɣzɩɣ cɔnʋʋ kʋɖʋmʋʋ nɛ pɩkɛdɩɣ lɛ, mayʋsʋʋ se pɩkpaɣ-m ñɩɣtʋ naadozo yaa naanza mbʋ yɔ.”

¹⁷ Ɛzɩma ŋpɩzɩɣ nɛ ŋtɩlɩ alɩwaatʋ ɛzɩma pɩwɛɛ se ŋkpaɣ nɛ ŋlabɩnɩ aleɣya yɔ? Kajalaɣ lɛ, pɩwɛɛ se aleɣya wena ŋlakɩ yɔ, ŋtɩlɩ alɩwaatʋ ɛzɩma ŋkpakɩɣ nɛ ŋlakɩnɩ-yɛ yɔ. Pɩɩwɛɣ ɖeu se ŋma alɩwaatʋ ɛzɩma pɩkpakɩɣ-ŋ kpɩtaʋ taa yɔ? Ma takayaɣ nakɛyɛ yɔɔ ñɩɣtʋ ɛzɩma ŋkpakɩɣ nɛ ŋcɔŋnɩ teelee, ŋwoki intɛrnɛɛtɩ yɔɔ nɛ ŋlakɩ aleɣya ñɔ-pɔrtaabɩlɩ yɔɔ yaa ña-taabɩlɛɛtɩ yɔɔ yɔ. Ye ŋyʋsaa se pɩkpakɩɣ-ŋ alɩwaatʋ sakɩyɛ yɔ, pɩwɛɛ se ŋla ɖʋtʋ. Kajalaɣ lɛ, ɖʋ se ŋkpakɩɣ alɩwaatʋ nɛ ŋlabɩnɩ mbʋ pɩ-tɔm kɩlɩ cɛyʋʋ yɔ nɛ pʋwayɩ lɛ, ŋɖʋ ɖɔɖɔ ndʋ ŋkaɣ kpaɣʋ nɛ ŋlabɩnɩ aleɣya yɔ. Pʋwayɩ lɛ, ŋpɔzɩ Yehowa se ɛsɩnɩ-ŋ nɛ ŋɖɔ ña-ɖʋtʋ yɔɔ. Ye ŋlabɩ mbʋ yɔ, ŋkaɣ hiɣu alɩwaatʋ nɛ ɖoŋ weyi pɩpɔzʋʋ-ŋ yɔ nɛ ŋkpɛlɩkɩ ña-tɩ yɔɔ, ŋla hɔʋ taa Ɛsɔ sɛtʋ, ŋwolo ɛgbɛyɛ taa kediɣzisi nɛ ŋla tɔm susuu nɛ tɔm wɩlʋʋ tʋmɩyɛ nɖɩ Yehowa ɖʋ-ɖʋ yɔ. Pɩpɩzɩɣ piyele nɛ ŋhiɣ taa leleŋ aleɣya wena ŋlakɩ yɔ a-taa nɛ pɩkɩlɩ; mbʋ pʋyɔɔ yɔ, ŋsɩ Yehowa tʋma kajalaɣ ɖeɖe.

18-19. Ɛzɩma ɖɩpɩzɩɣ nɛ ɖɩwɩlɩ se ɖɩtɛm ɖa-taa se ɖɩsɛɣ Yehowa ɖeke?

¹⁸ Apostoloo Pɩyɛɛrɩ tɛm yɔɔdʋʋ Sataŋ ɛjaɖɛ ɖɩnɛ ɖɩ-tɛm tɔm nɛ ɛjaɖɛ kɩfaɖɛ nɖɩ ɖɩkɔŋ yɔ ɖɩ-tɔm lɛ, ɛsɔzaa se: “Man-kʋsɔɔlaa, ɛzɩma ɩɖaŋ wondu ndʋ yɔ pʋyɔɔ lɛ, ɩla mbʋ payɩ ɩpɩzɩɣ yɔ nɛ ɛna-mɩ kɛdɛzaɣ ɖeɖe se ɩfɛyɩnɩ azuluma nɛ kɩwɛɛkɩtʋ natʋyʋ nɛ ɩwɛ laŋhɛzɩyɛ taa.” (2 Pɩy. 3:14) Ye ɖɩɖɔŋ lɔŋ tasʋʋ mbʋ pɩ-yɔɔ nɛ ɖɩñakɩ pana se ɖɩwɛɛ kele kele tomnaɣ yɔɔ nɛ fezuu taa yɔ, ɖɩwɩlɩɣ se ɖɩsɛɣ Yehowa ɖeke.

¹⁹ Sataŋ nɛ ɛ-ɛjaɖɛ pakaɣ wobu pɩ-yɔɔ nɛ patakɩɣ-ɖʋ se ɖɩsɩɩ wondu lɛɛtʋ kajalaɣ ɖeɖe ɖe-wezuu caɣʋ taa nɛ pɩtaakɛ Yehowa. (Luka 4:13) Ɛlɛ paa kala wena ɖɩkatɩɣ yɔ, ɖɩɩkaɣ haʋ nɔɔyʋ yaa nabʋyʋ nʋmɔʋ se pɩmʋ lone nɖɩ Yehowa wɛnɩ ɖa-laŋɩyɛ taa yɔ. Ðɩtɛm ɖa-taa se ɖɩcɛlɩɣ Yehowa mbʋ pɩkɛ e-ɖeke ɛ-pʋyʋ yɔ; pʋ-tɔbʋʋ lɛ se ɖɛ-sɛtʋ!