1. Lɩmaɣzɩyɛ kɩbanɖɛ nɖɩ ɛyʋ pɩzɩɣ nɛ ɛkpaɣ?

ÐOŊ ÐOŊ lɛ, lɩmaɣza wena lʋlɩyaa kpakɩɣ yɔ, awɛɣnɩ ɖoŋ pe-piya yɔɔ alɩwaatʋ sakɩyɛ. Ye lʋlɩyaa ɩtɩkpaɣ lɩmaɣza kɩbana yɔ, pɩpɩzɩɣ nɛ pɩkɔnɩ pe-piya kaɖɛ. Ɛlɛ, ye pakpaɣ lɩmaɣza kɩbana yɔ, piyeki nɛ pe-piya hiɣ taa leleŋ nɛ piɖeni-sɩ si-wezuu caɣʋ taa. Paa mbʋ yɔ, pɩwɛɛ se piya ɖɔɖɔ ɩkpaɣ lɩmaɣza kɩbana. Lɩmaɣzɩyɛ kɩbanɖɛ nɖɩ ɛyʋ pɩzɩɣ nɛ ɛkpaɣ yɔ, nɖɩ lɛ se ɛsɛɛ ɖa-Caa sɔɔlɩm tʋ weyi ɛwɛ ɛsɔdaa yɔ.—Keɣa 72:28.

2. Lɩmaɣza kɩbana wena Yesu nɛ ɛ-lʋlɩyaa pakpaɣaa?

² Yosɛɛfʋ nɛ Maarɩɩ paasɔɔlaa se pasɩnɩ pe-piya nɛ sɩsɛɛ Yehowa. Nɛ lɩmaɣza wena pakpaɣaa yɔ, awɩlaa se kaɖʋwa ŋga, kɔ-tɔm kaakɩlɩnɩ cɛyʋʋ pe-wezuu caɣʋ taa. (Luka 2:40, 41, 52) Yesu ɖɔɖɔ kaakpaɣ lɩmaɣza kɩbana, nɛ asɩnɩ-ɩ nɛ ɛla Yehowa sɔɔlɩm. (Mat. 4:1-10) Yesu pɩsɩ ɛyʋ kɩbanʋ, weyi ɛwɛ siɣsiɣ nɛ ɛwɛɛ abalɩtʋ yɔ. Lʋlɩyaa mba payɩ pɔsɔɔlɩ Yehowa yɔ, pɩkɛdɩɣnɩ-wɛ se pɛwɛɛnɩ pɩɣa ŋga kɛ-wɛtʋ wɛ ɛzɩ Yesu ñɩndʋ yɔ.

3. Tɔm pɔzʋʋ mbʋ yɔɔ ɖɩkaɣ cosuu tɔm ñʋʋ kʋnɛ kɩ-taa?

³ Tɔm ñʋʋ kʋnɛ kɩ-taa, ɖɩkaɣ cosuu tɔm pɔzʋʋ pʋnɛ pɩ-yɔɔ: Lɩmaɣza kɩbana wena Yehowa kpaɣ Yesu hɔɔlʋʋ taa? Ɛbɛ lɩmaɣza wena Yosɛɛfʋ nɛ Maarɩɩ pakpaɣaa yɔ, apɩzɩɣ nɛ akpɛlɩkɩ lʋlɩyaa Krɩstʋ ñɩma? Nɛ lɩmaɣza wena Yesu kpaɣaa yɔ, ɛbɛ apɩzɩɣ nɛ akpɛlɩkɩ piya evelisi nzɩ sɩkɛ Krɩstʋ ñɩma yɔ?

4. Lɩmaɣzɩyɛ kɩcɛyɩyɛ nɖɩ Yehowa kpaɣ ɛ-Pɩyalʋ hɔɔlʋʋ taa?

⁴ Yehowa yeba se Yesu ɛwɛɛnɩ lʋlɩyaa kɩbama. (Mat. 1:18-23; Luka 1:26-38) Maarɩɩ yɔɔdɩ tɔm natʋyʋ nɛ ɛ-laŋɩyɛ pilim  nɛ pama-tʋ Bibl taa. Nɛ tɩwɩlɩɣ se ɛwɛnɩ sɔɔlɩm sɔsɔm Yehowa nɛ ɛ-tɔm pɔ-yɔɔ. (Luka 1:46-55) Nɛ ɛzɩma Yosɛɛfʋ ñam Yehowa paɣtʋ yɔ, pɩwɩlɩɣ se ɛsɔɔlɩ Ɛsɔ nɛ ɛsɔɔlɩ se ɛ-tɔm ɛkɛdɩnɩ-ɩ.—Mat. 1:24.

5-6. Ɛbɛ Yehowa ha nʋmɔʋ se pɩtalɩ ɛ-Pɩyalʋ?

⁵ Yehowa tɩlɩzɩ mba pɛkɛ ñɩm tɩnaa yɔ se palʋlɩ Yesu. Yosɛɛfʋ nɛ Maarɩɩ palʋlɩ Yesu lɛ, kɩlaʋ ŋgʋ palaba yɔ, kɩwɩlɩɣ se pɛkɛ kʋñɔndɩnaa. (Luka 2:24) Yosɛɛfʋ kaakɛ kafɩnda Nazarɛɛtɩ tɛtʋ taa; nɛ pɩtɩla ɛ-tʋmɩyɛ ɖɩlaɖɛ kaañɔtɩnɩ ɛ-ɖɩɣa. Pɩtɩla pacakaɣ wezuu kɛlɛʋ, kɔzɩ kɔzɩ alɩwaatʋ ndʋ pe-piya talɩ lʋbɛ yaa sɩcɛzɩ mbʋ yɔ.—Mat. 13:55, 56.

⁶ Yehowa kandɩyɩ Yesu yɔɔ se kala naayɛ ɩtaatalɩ-ɩ, ɛlɛ ɛtɩɖɩɣ kala tɩŋa nʋmɔʋ. (Mat. 2:13-15) Kɩɖaʋ nakʋyʋ yɔ: Yesu hɔʋ taa ñɩma nabɛyɛ taatisiɣ ɛ-yɔɔ. Yesu maɣmaɣ hɔʋ taa ñɩma nabɛyɛ taatisi ɛ-yɔɔ kiɖe tɛɛ se ɛnʋ lɛ Mesiya. Maɣzɩ nɛ ŋna ɛzɩma pɩpɩzaɣ se pɩcɛyɩ-ɩ yɔ. (Mark. 3:21; Yoh. 7:5) Pɩtasɩ lɛ, pɩtɩla Yosɛɛfʋ sɩba alɩwaatʋ ndʋ Yesu kaakɛ pɩɣa evelaɣ yɔ; nɛ piyeba nɛ ɛnɩɩ siziŋ. Yesu kɛnɩ kajalaɣ pɩɣa; nɛ alɩwaatʋ ndʋ Yosɛɛfʋ sɩba yɔ, pɩtɩla ɛnʋ pɩɩwɛɛ se ɛla ɛ-caa tʋmɩyɛ nɛ ɛcɔnɩ hɔʋ yɔɔ. (Mark. 6:3) Yesu wɛɛ nɛ ɛpaɣlɩɣ lɛ, ɛkpɛlɩkɩ ɛzɩma ɛcɔnɩ ɛ-hɔʋ kɩcɛyɩm ɖeɖe yɔ. Pɩtɩla pɩɩwɛɛ se ɛla tʋmɩyɛ nɛ kpekpeka nɛ ɛcɔnɩ ɛ-hɔʋ taa ñɩma yɔɔ. Piyeba nɛ ɛtɩlɩ ɛzɩma evemiye kpeekpe tʋmɩyɛ labʋ nɩɣ ɛyʋ yɔ.

7. (a) Tɔm pɔzʋʋ mbʋ kaɣ sɩnʋʋ mba pɔɖɔkɩ nesi yɔ nɛ pɔcɔnɩ pe-piya yɔɔ? (b) Ɛzɩma Aduwa 2:1-6 pɩzɩɣ pɩsɩnɩ lʋlɩyaa nɛ pafalɩsɩ pe-piya?

⁷ Ye ɩɖɔkɩ nesi, nɛ ɩsɔɔlaa se ɩwɛɛnɩ piya yɔ, ɩpɔzɩ mɩ-tɩ tɔm tʋnɛ: Ðɩkɛ ɛyaa mba pɛwɛnɩ tɩ luzuu nɛ pɔsɔɔlɩ Yehowa nɛ ɛ-Tɔm yɔ? Yehowa tisiɣ se ɛlɩzɩ-ɖʋ nɛ ɖɩcɔnɩ pɩɣa ŋga ɖɩkaɣ lʋlʋʋ, nɛ kamʋ ñɩm ɛ-ɛsɩndaa yɔ kɔ-yɔɔ? (Keɣa 126:3, 4) Ye ŋtɛm kɛʋ lʋlɩyʋ yɔ, pɔzɩ ña-tɩ tɔm tʋnɛ: ‘Mɛwɛɛ nɛ mawɩlɩɣ men-piya se pɩwɛ ɖeu se sɩla tʋmɩyɛ nɛ kpekpeka na?’ (Ekl. 3:12, 13) ‘Mɛwɛɛ nɛ mañakɩ pana se mansɩnɩ men-piya nɛ sɩfɛɛ kala wena sɩpɩzɩɣ nɛ sɩkatɩ Sataŋ ɛjaɖɛ ɖɩnɛ ɖɩ-taa yɔ?’ (Adu. 22:3) Ŋŋpɩzɩɣ nɛ ŋkandɩyɩ ñe-piya yɔɔ se kaɖɛ naɖɩyɛ ɛtaatalɩ-sɩ paa ññɩɩ. Nɔɔyʋ ɛɛpɩzɩɣ nɛ ɛla mbʋ kpa. Ɛlɛ, ye ŋwobi pɩ-yɔɔ nɛ ŋwɩlɩɣ-sɩ nɛ sɔɔlɩm se sɩtaa Bibl taa lɔŋ tasʋʋ liu yɔ,  ŋpɩzɩɣ nɛ ŋsɩnɩ-sɩ nɛ sɩlʋbɩnɩ wezuu caɣʋ taa kala. (Kalɩ Aduwa 2:1-6.) Kɩɖaŋ nɩɩyɩ yɔ: Ye hɔʋ taa tʋ nɔɔyʋ ɛkpaɣ lɩmaɣzɩyɛ se eyeki Yehowa sɛʋ yɔ, tɩŋnɩ Ɛsɔtɔm yɔɔ nɛ ŋwɩlɩ ñe-piya mbʋ pʋyɔɔ pɩcɛyaa se ɖɩɖɔkɩ ɖe-siɣsiɣ wɛtʋ Yehowa ɛsɩndaa yɔ. (Keɣa 30:24) Yaa ye ɛyʋ kʋsɔɔlʋ nɔɔyʋ ɛsɩba yɔ, wɩlɩ ñe-piya Bibl masɩ nzɩ sɩpɩzɩɣ sɩsɩnɩ-sɩ nɛ sɩlʋbɩnɩ wɩzasɩ nɛ sihiɣ laŋɩyɛ hɛzʋʋ yɔ.—2 Kɔr. 1:3, 4; 2 Tim. 3:16.

8. Wayɩ Wayɩ Paɣtʋ 6:6, 7 taa lɔŋ tasʋʋ mbʋ yɔɔ Yosɛɛfʋ nɛ Maarɩɩ pɔɖɔma?

⁸ Yosɛɛfʋ nɛ Maarɩɩ pasɩnɩ Yesu nɛ ɛpɩsɩ ɛyʋ sɔsɔ weyi ɛ-tɔm kɛdɩnɩ Ɛsɔ yɔ, mbʋ pʋyɔɔ yɔ pɔɖɔm lɔŋ weyi Yehowa tasɩɣ lʋlɩyaa yɔ ɩ-yɔɔ. (Kalɩ Wayɩ Wayɩ Paɣtʋ 6:6, 7.) Yosɛɛfʋ nɛ Maarɩɩ paasɔɔlɩ Yehowa siŋŋ. Pa-kaɖʋwa kajalaɣ ñɩŋga kaakɛnaa se pasɩnɩ pe-piya nɛ sɩsɔɔlɩ Yehowa ɖɔɖɔ siŋŋ.

9. Lɩmaɣza kɩbana wena Yosɛɛfʋ nɛ Maarɩɩ pakpaɣaa?

⁹ Yosɛɛfʋ nɛ Maarɩɩ palɩzaa se pa nɛ pe-piya pɛkpɛndɩɣ nɛ palakɩ fezuu taa tʋma ɖoŋ ɖoŋ. Pɩtʋʋ fɛyɩ se powokaɣ kediɣzisi paa kpɩtaʋ ŋgʋ Nazarɛɛtɩ sinaagɔɔgɩ taa. Nɛ powokaɣ ɖɔɖɔ Yeruzalɛm paa pɩnaɣ ŋga nɛ pɔtɔkɩ Paska kazandʋ. (Luka 2:41; 4:16) Pɩtɩla, alɩwaatʋ ndʋ hɔʋ tɩŋa kpɛndaɣ nɛ kɩɖɔŋ Yeruzalɛm nʋmɔʋ yɔ, Yosɛɛfʋ nɛ Maarɩɩ pawɩlaɣ Yesu nɛ e-newaa Yehowa samaɣ yɔɔ tɔm. Nɛ pɩtɩla powokaɣ ɖɔɖɔ nɛ panaɣ lona wena a-tɔm pɔyɔɔdɩ Masɩ taa yɔ pa-nʋmɔʋ ɖɔm taa. Alɩwaatʋ ndʋ Yosɛɛfʋ nɛ Maarɩɩ paawɛnɩ piya nɛ pɩɖɔɔ yɔ, pɩtʋʋ fɛyɩ se pɩtaawɛ-wɛ kɛlɛʋ se powolo pɩ-yɔɔ nɛ palakɩ fezuu taa tʋma ɖoŋ ɖoŋ. Ɛlɛ, pañaɣ pana nɛ pala mbʋ lɛ, pehiɣ wazasɩ! Paasɩ Yehowa sɛtʋ kajalaɣ ɖeɖe, nɛ piyeba nɛ pɔ-hɔʋ ñɔɔnɩ Yehowa kpam.

10. Krɩstʋ ñɩma mba pɛkɛ lʋlɩyaa yɔ, lɔŋ weyi papɩzɩɣ nɛ pɛkpɛlɩkɩ Yosɛɛfʋ nɛ Maarɩɩ pɔ-cɔlɔ?

¹⁰ Lʋlɩyaa mba pañaŋ Ɛsɔ yɔ, lɔŋ weyi papɩzɩɣ nɛ pɛkpɛlɩkɩ Yosɛɛfʋ nɛ Maarɩɩ pɔ-cɔlɔ? Mbʋ pɩ-tɔm kɩlɩ cɛyʋʋ yɔ lɛ se ŋtɩŋnɩ ña-lakasɩ nɛ ñɔ-yɔɔdaɣ yɔɔ nɛ ŋwɩlɩ ñe-piya se ŋsɔɔlɩ Yehowa siŋŋ. Kʋjɔʋ sɔsɔʋ ŋgʋ ŋpɩzɩɣ nɛ ŋlabɩ-sɩ yɔ, ŋgʋ lɛ se ŋsɩnɩ-sɩ nɛ sɩsɔɔlɩ Yehowa. Nɛ lɔŋ kɩbaŋ weyi ŋpɩzɩɣ nɛ ŋkpɛlɩkɩ-sɩ yɔ, ɛnɩ lɛ se ŋsɩnɩ-sɩ nɛ sɩkpɛlɩkɩɣ Bibl ɖoŋ  ɖoŋ, sɩtɩmɩɣ ɖoŋ ɖoŋ, siwoki kediɣzisi nɛ sisusuu tɔm. (1 Tim. 6:6) Toovenim taa lɛ, pɩwɛɛ se ŋha ñe-piya tomnaɣ yɔɔ wondu ndʋ pɩpɔzʋʋ-sɩ yɔ. (1 Tim. 5:8) Ɛlɛ, taasɔɔ se taabalɩyɛ kɩbanɖɛ nɖɩ ɖɩwɛɣ ñe-piya nɛ Yehowa pɛ-hɛkʋ taa yɔ, nɖɩ kaɣnɩ-sɩ sɩnʋʋ se sihiɣ ñʋʋ yabʋ Sataŋ ɛjaɖɛ kɩdɛkɛdɩyɛ ɖɩnɛ ɖɩ-tɛm wiye nɛ sɩsʋʋ ɛjaɖɛ kɩfaɖɛ taa. Pɩtɩkɛ tomnaɣ yɔɔ wondu ndʋ sɩwɛna yɔ ndʋ kaɣnɩ-sɩ sɩnʋʋ. *—Ezek. 7:19; 1 Tim. 4:8.

11. (a) Lɔŋ weyi ɩwɛ 1 Timootee 6:17-19 taa yɔ, ɛzɩma ɩpɩzɩɣ ɩsɩnɩ lʋlɩyaa nɛ pɔcɔnɩ pe-piya yɔɔ? (b) Kaɖʋsɩ nzɩ ñɔ-hɔʋ pɩzɩɣ nɛ kɩɖʋ kɩ-tɩ? (c) Nɛ wazasɩ nzɩ kɩpɩzɩɣ nɛ kihiɣ? (Kalɩ aɖakaɣ “ Kaɖʋsɩ nzɩ ŋkaɣ ña-tɩ ɖʋʋ?”)

¹¹ Pɩwɛ ɖeu kpem se lʋlɩyaa Krɩstʋ ñɩma sakɩyɛ kpakɩɣ lɩmaɣza kɩbana nɛ pasɩɣnɩ pe-piya se sɩñɔɔnɩ Yehowa! Pa nɛ sɩ pɛkpɛndɩɣ ɖoŋ ɖoŋ nɛ pɛsɛɣ Ɛsɔ. Powoki kediɣzisi nɛ kigbeɣliŋ. Nɛ posusuu tɔm kɩbandʋ. Halɩ hɔŋ nɩɩyɩ susuu tɔm kooka ŋga ka-taa paasusuu tɔm ɖoŋ ɖoŋ yɔ. Hɔŋ lɛɛŋ woki nɛ ikilimiɣ Betɛɛlɩwaa taa yaa ɩɖʋʋ nesi Ɛsɔ sɛtʋ kuduyuŋ maʋ tʋmɩyɛ. Hɔŋ weyi ɩlakɩ mbʋ yɔ, ɩlakɩnɩ tʋmɩyɛ liidiye sakɩyɛ, nɛ pɩpɩzɩɣ nɛ pɩwɛɛ-ɩ kaɖɛ. Ɛlɛ, Yehowa kaɣ hɔŋ ɛnɩ wazʋʋ siŋŋ. (Kalɩ 1 Timootee 6:17-19.) Sakɩyɛ taa lɛ, piya nzɩ palʋlɩ-sɩ hɔŋ ɛnɩ ɩ-taa yɔ, sɩwɛɣ nɛ sɩpaɣlɩɣ lɛ, siwoki pɩ-yɔɔ nɛ sɩwɛɣnɩ wɛtʋ kɩbandʋ ndʋ; nɛ siikpiɖiɣ paa ññɩɩ! *—Adu. 10:22.

12. Yesu wɛɛ nɛ ɛpaɣlɩɣ lɛ, ɛbɛ pɩɩwɛɛ se ɛla?

¹² Yesu Caa weyi ɛwɛ ɛsɔdaa yɔ, ɛkpakɩɣ lɩmaɣza kɩbana paa ɛzɩmtaa. Nɛ ɛ-lʋlɩyaa mba paawɛ tɛtʋ yɔɔ yɔ, paakpaɣ lɩmaɣza kɩbana ɖɔɖɔ. Ɛlɛ, Yesu kɔm nɛ ɛpaɣlɩ lɛ, pɩɩwɛɛ se ɛ-maɣmaɣ ɛkpaɣ ɛ-lɩmaɣza. (Gal. 6:5) Ɛɛwɛnɩ tɩ-yɔɔ wɛʋ lɩzʋʋ waɖɛ ɛzɩ ɖa-tɩŋa payɩ yɔ. Ɛpɩzaɣ se ɛlɩzɩ se ɛlakɩ ɛ-maɣmaɣ ɛ-sɔɔlɩm nɛ eyele Ɛsɔ ñɩmbʋ. Ɛlɛ, ɛlɩzaa se eyeki nɛ taabalɩyɛ kɩbanɖɛ wɛɛ ɛ nɛ Yehowa pɛ-hɛkʋ taa. (Yoh. 8:29) Ɛzɩma ɛ-kɩɖaʋ pɩzɩɣ nɛ kɩsɩnɩ piya evelisi sɔnɔ?

13. Yesu kaakɛ pɩɣa lɛ, lɩmaɣzɩyɛ kɩbanɖɛ nɖɩ ɛɛkpaɣaa?

¹³ Yesu kaakɛ pɩɣa tɛtʋ yɔɔ lɛ, ɛlɩzaa se ɛñaŋ ɛ-lʋlɩyaa. Etikizi ɛ-lʋlɩyaa lɔŋ tasʋʋ wiɖiyi kpa, nɛ ɛtɩmaɣzɩ se ɛsɩma nɛ pɩkpaɖɩ-wɛ. Ɛlɛ, ewobi pɩ-yɔɔ nɛ “eluzuu ɛ-tɩ pɛ-tɛɛ.” (Luka 2:51) Ɛnʋ kaakɛnɩ kajalaɣ pɩɣa ɛ-lʋlɩyaa cɔlɔ, nɛ pɩtʋʋ fɛyɩ se ɛɛlabɩ mbʋ pɩpɔzʋʋ se kajalaɣ pɩɣa ɛla yɔ camɩyɛ. Ɛñaɣ pana siŋŋ nɛ ɛkpɛlɩkɩ kafɩnda tʋmɩyɛ Yosɛɛfʋ cɔlɔ se pɩsa nɛ ɛsɩna nɛ pehiɣ liidiye nɛ pɔcɔnɩ hɔʋ kɩcɛyɩm ɖeɖe.

14. Ɛzɩma ɖɩlaba nɛ ɖɩtɩlɩ se Yesu kaakɛ Ɛsɔtɔm kpɛlɩkɩyʋ kɩbanʋ?

 ¹⁴ Pɩtʋʋ fɛyɩ se Yesu lʋlɩyaa heyi-i ɛzɩma pɩtɩŋnɩ piti lakasɩ yɔɔ nɛ palʋlɩ-ɩ yɔ, pɩ-tɔm. Nɛ peheyi-i ɖɔɖɔ tɔm ndʋ Ɛsɔ tiyiyaa yɔɔdɩ ɛ-yɔɔ yɔ. (Luka 2:8-19, 25-38) Yesu titisi tɔm ndʋ peheyi-i yɔ tɩ-yɔɔ yem, ɛlɛ ɛ-maɣmaɣ ɛtazɩ Masɩ taa nɛ ɛna se tɩkɛ toovenim. Ɛzɩma ɖɩlaba nɛ ɖɩtɩlɩ se Yesu kaakɛ Ɛsɔtɔm kpɛlɩkɩyʋ kɩbanʋ? Ðɩsɩm tɔm ndʋ mbʋ pʋyɔɔ yɔ, Bibl yɔɔdʋʋ se Ɛsɔtɔm wɩlɩyaa mba paawɛ Yeruzalɛm yɔ, pɩɩwɛɛ nɛ “pɩɖɩɣzɩɣ-wɛ nɛ ɛ-tɔm taa nɩʋ lɛɣtʋ nɛ ɛ-tɔm cosuu.” (Luka 2:46, 47) Yesu kaawɛnɩ pɩnzɩ 12 lɛ, ɛ-taa kaatɛm tɛm se Yehowa kɛnɩ ɛ-Caa.—Luka 2:42, 43, 49.

15. Ɛzɩma Yesu wɩlaa se ɛlɩzaa se ɛlakɩ Yehowa sɔɔlɩm?

¹⁵ Yesu kpɛlɩkaa nɛ ɛtɩlɩ mbʋ Yehowa sɔɔlaa se ɛla yɔ lɛ, ɛlɩzɩ se ɛlakɩ Yehowa sɔɔlɩm. (Yoh. 6:38) Ɛɛnawa se ɛyaa sakɩyɛ kaɣ-ɩ paɖʋʋ, nɛ pɩtʋʋ fɛyɩ se lɩmaɣza ana aaha-ɩ nɩɣzɛ. Ɛlɛ, ɛlɩzaa se ɛñaŋ Yehowa. Pamɩyɩsɩ Yesu lɩm pɩnaɣ 29 taa lɛ, mbʋ pɩ-tɔm kaakɩlɩ cɛyʋʋ ɛ-ɛsɩndaa yɔ lɛ se ɛla mbʋ Yehowa sɔɔlaa yɔ. (Ebr. 10:5-7) Halɩ alɩwaatʋ ndʋ Yesu sɩkaɣ nazɩm sizika yɔɔ yɔ, ewobi pɩ-yɔɔ nɛ ɛtɛ ɛ-taa se ɛlakɩ ɛ-Caa sɔɔlɩm.—Yoh. 19:30.

16. Lɔŋ weyi piya pɩzɩɣ nɛ sɩkpɛlɩkɩ Yesu cɔlɔ yɔ, ɩ-taa nɩɩyɩ lɛ weyi?

¹⁶ Ña ña-lʋlɩyaa. Ɛzɩ Yosɛɛfʋ nɛ Maarɩɩ yɔ, ña-lʋlɩyaa tɩtalɩ pilim. Paa mbʋ yɔ, Yehowa ɖʋ ña-lʋlɩyaa tʋmɩyɛ se pakandɩyɩ ñɔ-yɔɔ, pafalɩsɩ-ŋ nɛ peɖiyi-ŋ. Ye ŋwelisiɣ pɔ-lɔŋ tasʋʋ nɛ ŋñaŋ-wɛ yɔ, pɩkaɣ-ŋ ‘ɖɔmnʋʋ camɩyɛ.’—Efɛz. 6:1-4.

17. Ɛzɩ Yozuwee 24:15 yɔɔdʋʋ yɔ, lɩmaɣzɩyɛ nɖɩ pɩwɛɛ se piya ɩkpaɣ?

¹⁷ Lɩzɩ weyi ŋkaɣ sɛʋ yɔ. Pɩwɛɛ se ŋtɩlɩ weyi Yehowa kɛnaa yɔ, mbʋ ɛsɔɔlaa yɔ nɛ ɛzɩma ŋpɩzɩɣ nɛ ŋla ɛ-sɔɔlɩm ñe-wezuu caɣʋ taa yɔ. (Roma 12:2) Ye ŋlabɩ mbʋ yɔ, ŋkaɣ pɩzʋʋ nɛ ŋkpaɣ lɩmaɣzɩyɛ nɖɩ ɖɩ-tɔm kɩlɩ cɛyʋʋ ñe-wezuu caɣʋ taa yɔ; nɖɩ lɛ se ŋlɩzɩ se ŋsɛɣ Yehowa. (Kalɩ Yozuwee 24:15; Ekl. 12:1) Ye ŋlabɩ ɖʋtʋ nɛ ŋkalɩɣ Bibl ɖoŋ ɖoŋ nɛ ŋkpɛlɩkɩɣ-kʋ ɖoŋ ɖoŋ ɖɔɖɔ yɔ, ŋkaɣ sɔɔlʋʋ Yehowa nɛ pɩkpaɖɩ nɛ tisuu mbʋ ŋwɛnɩ ɛ-yɔɔ yɔ, pɩkaɣ kpaʋ ɖoŋ.

18. (a) Lɩmaɣzɩyɛ nɖɩ pɩwɛɛ se piya ɩkpaɣ? (b) Nɛ ɛbɛ kaɣ lɩʋ pɩ-taa?

 ¹⁸ Lɩzɩ se ŋsɩɣ Yehowa sɔɔlɩm labʋ kajalaɣ ɖeɖe ñe-wezuu caɣʋ taa. Sataŋ ɛjaɖɛ taa ñɩma yɔɔdʋʋ se ye ŋlabɩnɩ tʋmɩyɛ hɔɔlɩŋ weyi ɩ-taa ŋwɛ niye yɔ nɛ ŋñɩnɩ ña-maɣmaɣ ñɛ-kɛzɛɣa yɔ, ŋkaɣ hiɣu taa leleŋ. Ɛlɛ, toovenim taa lɛ, mba pakaŋ ñʋʋ nɛ tomnaɣ yɔɔ ñɩm ñɩnʋʋ yɔ, ‘wɩzasɩ sakɩyɛ tʋlʋʋ-wɛ pɔŋ paa le.’ (1 Tim. 6:9, 10) Hɔɔlʋʋ lɛɛkʋ taa lɛ, ye ŋwelisini Yehowa nɛ ŋlɩzɩ se ŋsɩɣ ɛ-sɔɔlɩm labʋ kajalaɣ ɖeɖe ñe-wezuu caɣʋ taa yɔ, pɩkaɣ-ŋ ɖenuu nɛ “pɩkaɣ-ŋ ɖɔmnʋʋ ɖeu.”—Yoz. 1:8.

19. Tɔm ndʋ pɩwɛɛ se lʋlɩyaa ɩtaasɔɔ?

¹⁹ Lʋlɩyaa, ɩla mbʋ payɩ ɩpɩzɩɣ yɔ nɛ ɩsɩnɩ mi-piya nɛ sɩsɛɛ Yehowa. Ɩtaa-ɩ liu nɛ ɛkaɣ-mɩ sɩnʋʋ nɛ ɩkpaɣ lɩmaɣza kɩbana. (Adu. 3:5, 6) Ɩtaasɔɔ se mbʋ ɩlakɩ yɔ, pɩkaɣ wɛnʋʋ ɖoŋ mi-piya yɔɔ nɛ pɩkpaɖɩ ndʋ ɩyɔɔdʋʋ yɔ. Pʋyɔɔ lɛ, ɩkpaɣ lɩmaɣza wena akaɣ-sɩ sɩnʋʋ nɛ sɩ-tɔm kɛdɩnɩ Yehowa yɔ.

20. Ye piya ɩlɩzaa se sɩsɛɣ Yehowa yɔ, wazasɩ nzɩ sɩkaɣ hiɣu?

²⁰ Piya, mɩ-lʋlɩyaa pɩzɩɣ pasɩnɩ-mɩ nɛ ɩkpaɣ lɩmaɣza kɩbana mɩ-wezuu caɣʋ taa. Ɛlɛ, mɩ pɩwɛɛ se ɩñaɣ pana nɛ mɩ-tɔm kɛdɩnɩ Ɛsɔ. Pʋyɔɔ lɛ, ɩmaɣzɩnɩ Yesu nɛ ɩlɩzɩ se ɩsɛɣ mɩ-Caa sɔɔlɩm tʋ weyi ɛwɛ Ɛsɔdaa yɔ. Ye ɩlabɩ mbʋ yɔ, ɩkaɣ labʋ tʋma kɩbana Yehowa sɛtʋ taa, mi-wezuu caɣʋ wɛɣnɩ tɔbʋʋ nɩʋ lɛɛlɛɛyɔ nɛ ɩnɩɩ leleŋ. (1 Tim. 4:16) Nɛ cee wayɩ lɛ, ɩkaɣ hiɣu taa leleŋ weyi ɩ-wayɩ fɛyɩ yɔ mi-wezuu caɣʋ taa!