TƆM ÑƲƲ ŊGƲ ÐƖKPƐLƖKƖƔ YƆ 41
Ɛzɩma ɖɩpɩzɩɣ ɖɩsɩnɩ Bibl kpɛlɩkɩyaa nɛ pɛɖɛɛnɩ ɛsɩndaa nɛ pamɩyɩsɩ-wɛ lɩm?—Hɔɔlʋʋ kajalaɣ ñɩŋgʋ
“Ɩwɩlaa se ɩkɛ Krɩstʋ takayaɣ ŋga ɖa lɩmɖʋyaa ɖɩmawa yɔ.”—2 KƆR. 3:3.
HENDU 78 Ɛsɔ tɔm wɩlʋʋ
LƖMAƔZA SƆSƆNA *
Ɛbɛ pɩzɩɣ nɛ pɩha taa leleŋ ɛgbɛyɛ naɖɩyɛ taa ñɩma tɩŋa nɛ pɩkpaɖɩ se pana se Bibl kpɛlɩkɩyʋ weyi pawɩlɩ-ɩ sɔɔlɩm yɔ ɛha ɛ-tɩ nɛ pamɩyɩsɩ-ɩ lɩm? (Cɔnɩ tayʋʋ 1)
1. Ɛzɩma 2 Kɔrɛntɩ mba 3:1-3 wɩlɩɣ-ɖʋ se waɖɛ sɔsɔɖɛ pɩkɛnɩ-ɖʋ se ɖɩkpɛlɩkɩnɩ ɛyaa Bibl nɛ pamɩyɩsɩ-wɛ lɩm? (Cɔnɩ takayaɣ huyuu yɔɔ kɩlɛmʋʋ.)
ALƖWAATƲ ndʋ ŋnaɣ se ñɛ-ɛgbɛyɛ taa koobu nɔɔyʋ Bibl kpɛlɩkɩyʋ nɔɔyʋ ha ɛ-tɩ nɛ pamɩyɩsɩ-ɩ lɩm yɔ, ɛzɩma pɩlakɩ-ŋ? Pɩtʋʋ fɛyɩ se ña-taa lakɩ leleŋ siŋŋ! (Mat. 28:19) Nɛ ye ña nɛ ɛyʋ ɛnʋ ɩkpɛlɩkɩnɩ Bibl nɛ ɛha ɛ-tɩ nɛ pamɩyɩsɩ-ɩ lɩm yɔ, ña-taa lakɩ leleŋ siŋŋ nɛ pɩkpaɖɩ! (1 Tes. 2:20) Tɔmkpɛlɩkɩyaa kɩfama mba pamɩyɩsɩ-wɛ lɩm yɔ, pɛkɛ “samtʋ takayɩsɩ” kɩbanzɩ mba pɛkpɛlɩkɩnɩ-wɛ yɔ nɛ ɛgbɛyɛ kpeekpe.—Kalɩ 2 Kɔrɛntɩ mba 3:1-3.
2. (a) Tɔm kɩcɛyɩtʋ ndʋ pɩwɛɛ se ɖɩpɔzɩ ɖa-tɩ, nɛ ɛbɛ yɔɔ? (b) Ye pɔtɔm se pɛkpɛlɩkɩɣnɩ nɔɔyʋ Bibl, pʋ-tɔbʋʋ lɛ suwe? (Cɔnɩ pɩ-tɛɛ tɔm.)
2 Pɩwɛ ɖeu siŋŋ se ɖɩtɩlɩ se pɩnzɩ naanza nzɩ sɩɖɛwa yɔ sɩ-taa, tɔm susuu akɔnta wɩlaa se ɛyaa ɛzɩ 10 000 000 mbʋ yɔ tisina se pɛkpɛlɩkɩnɩ-wɛ Bibl * paa fenaɣ ŋga ɛjaɖɛ kpeekpe yɔɔ. Pɩnzɩ naanza nzɩ sɩ-taa, ɛyaa ɛzɩ 280 000 mbʋ yɔ ha pa-tɩ nɛ pamɩyɩsɩ-wɛ lɩm paa pɩnaɣ ŋga. Ɛzɩma ɖɩpɩzɩɣ nɛ ɖɩsɩnɩ Bibl kpɛlɩkɩyaa miiliyɔɔwaa mba nɛ pa-taa sakɩyɛ ha pa-tɩ nɛ pamɩyɩsɩ-wɛ lɩm nɛ pɩkpaɖɩ? Yehowa wɛɛ nɛ ɛhaɣ ɛyaa waɖɛ se papɩsɩ ɛ-Aseɣɖe Tɩnaa. Pʋyɔɔ lɛ, ɖɩlakɩ ɖo-ɖoŋ ɖeɖe se ɖɩsɩnɩ-wɛ nɛ pɛɖɛɛnɩ ɛsɩndaa nɛ paha pa-tɩ nɛ pamɩyɩsɩ-wɛ lɩm kpɛdɛyɛ. Alɩwaatʋ wɛɛ nɛ tɩɖɛɣ lɛɛ lɛɛ! —1 Kɔr. 7:29a; 1 Pɩy. 4:7.
3. Ɛbɛ ɖɩkaɣ naʋ tɔm ñʋʋ kʋnɛ kɩ-taa?
3 Pɩcɛyɩ siŋŋ se ɖɩla kpɛlɩkɩyaa lɛɛlɛɛyɔ, pʋyɔɔ Nɔɔɖɛyaa Ɛgbɛyɛ pɔzɩ ɛgbɛyɛ pilinzi se pana se ɛbɛ ɖɩpɩzɩɣ ɖɩla nɛ ɖɩsɩnɩ ɖe-Bibl kpɛlɩkɩyaa sakɩyɛ nɛ pɛɖɛɛnɩ ɛsɩndaa nɛ pamɩyɩsɩ-wɛ lɩm. Tɔm ñʋʋ kʋnɛ nɛ ŋgʋ kɩkɔŋ yɔ pa-taa, ɖɩkaɣ naʋ mbʋ ɖɩpɩzɩɣ nɛ ɖɩkpɛlɩkɩ nʋmɔʋ lɩzɩyaa, Ɛsɔtɔm tiyiyaa nɛ egeetiye yɔɔ cɔnɩyaa mba pɛwɛ niye yɔ pɔ-cɔlɔ yɔ. * (Adu. 11:14; 15:22) Pɔyɔɔdɩ mbʋ Bibl wɩlɩyaa nɛ pe-Bibl kpɛlɩkɩyaa papɩzɩɣ pala nɛ kpɛlɩkʋʋ wazɩ Bibl kpɛlɩkɩyʋ nɛ pɩkpaɖɩ yɔ pɩ-tɔm. Tɔm ñʋʋ kʋnɛ kɩ-taa, ɖɩkaɣ naʋ nɩŋgbanzɩ kagbanzɩ nzɩ pɩwɛɛ se paa Bibl kpɛlɩkɩyʋ weyi lɛ ɛkpɛzɩ nɛ ɛɖɛɛnɩ ɛsɩndaa nɛ pamɩyɩsɩ-ɩ lɩm yɔ.
KPƐLƖKƖ PAA KPƖTAƲ ŊGƲ
Pɔzɩ kpɛlɩkɩyʋ nɛ ŋna se ɩpɩzɩɣ ɩcaɣ nɛ ɩla kɛdaɣ Bibl yɔɔ? (Cɔnɩ tayʋʋ 4-6)
4. Ye Bibl kpɛlɩkɩyʋ nɔɔyʋ ɛɛkpakɩɣ alɩwaatʋ nɛ e-ɖoŋ sakɩyɛ nɛ ɛkpɛlɩkɩɣnɩ Ɛsɔtɔm yɔ, ɛbɛ lɩɣ pɩ-taa?
4 Ðo-koobiya sakɩyɛ kpɛlɩkɩɣnɩ ɛyaa Bibl paba nɔnɔsɩ tɛɛ. Paa kpɛlɩkʋʋ mbʋ pɩsɩɣnɩ ɛyaa mba se pɔsɔɔlɩ Bibl taa tɔm yɔ, ɖoŋ ɖoŋ lɛ pɩɩkpakɩɣ alɩwaatʋ nɛ pɩtɩla paakpɛlɩkɩɣ paa kpɩtaʋ ŋgʋ. Pɩsa nɛ koobiya nabɛyɛ sɩnɩ ɛyaa mba nɛ pɔsɔɔlɩ Bibl taa tɔm nɛ pɩkpaɖɩ lɛ, pamʋʋ pa-kaŋgalaafu mayaɣ nɛ pʋwayɩ lɛ, payaa-wɛ yaa petiyini-wɛ message nakʋyʋ nɛ peheyi-wɛ Bibl taa tɔm natʋyʋ. Pa nɛ ɛyaa mba papɩzɩɣ nɛ pakpaɣ fenasɩ sakɩyɛ nɛ palakɩ kɛdɛsɩ pazɩ pazɩ mbʋ. Ɛlɛ ye Bibl kpɛlɩkɩyʋ nɔɔyʋ ɛɛkpakɩɣ alɩwaatʋ nɛ e-ɖoŋ sakɩyɛ nɛ ɛkpɛlɩkɩɣnɩ Ɛsɔtɔm yɔ, toovenim taa lɛ ɛɛkaɣ ɖɛnʋʋ ɛsɩndaa se ɛha ɛ-tɩ nɛ pamɩyɩsɩ-ɩ lɩm. *
5. Tɔm ndʋ Yesu yɔɔdɩ Luka 14:27-33 taa nɛ ɖɩpɩzɩɣ ɖɩtɩŋnɩ tɩ-yɔɔ nɛ ɖɩsɩnɩ ɖe-Bibl kpɛlɩkɩyaa?
5 Kɩyakʋ nakʋyʋ, Yesu tɩŋnɩ kɩɖaʋ nakʋyʋ yɔɔ nɛ ɛyɔɔdɩ mbʋ pɩpɔzʋʋ se nɔɔyʋ ɛla ye ɛsɔɔlaa se ɛpɩsɩ ɛ-tɔmkpɛlɩkɩyʋ yɔ pɩ-tɔm. Ɛyɔɔdɩ ɛyʋ nɔɔyʋ tɔm se ɛsɔɔlaa se ɛma kuduyuu, nɛ ɛyɔɔdɩ ɖɔɖɔ wiyaʋ nɔɔyʋ tɔm se ɛlɛ sɔɔlaa se ewolo you. Yesu yɔɔdaa se pɩpɔzʋʋ se kuduyuu mayʋ ‘ɛcalɩnɩ caɣʋ nɛ ɛtʋʋzɩ liidiye’ nɛ ɛna se ɖɩtalɩɣ nɛ ɛma kuduyuu nɛ ɛtɛ na. Ɛyɔɔdaa ɖɔɖɔ se pɩpɔzʋʋ se wiyaʋ ‘ɛcalɩnɩ caɣʋ nɛ ɛmaɣzɩ’ nɛ ɛna se ɛ-sɔɔjanaa kaɣ pɩzʋʋ nɛ pala mbʋ ɛsɔɔlaa se pala yɔ. (Kalɩ Luka 14:27-33.) Yesu kaanawa ɖɔɖɔ se ɛyʋ weyi ɛsɔɔlaa se ɛpɩsɩ ɛ-tɔmkpɛlɩkɩyʋ yɔ, pɩwɛɛ se ɛmaɣzɩ camɩyɛ nɛ ɛna mbʋ pɩpɔzʋʋ se ɛla nɛ ɛtɩŋ ɛ-wayɩ yɔ. Pʋyɔɔ lɛ, pɩpɔzʋʋ se ɖiseɣti ɖe-Bibl kpɛlɩkɩyaa nɛ petisi nɛ ɖa nɛ wɛ ɖɩkpɛlɩkɩɣ paa kpɩtaʋ ŋgʋ. Ɛbɛ ɖɩpɩzɩɣ nɛ ɖɩla?
6. Ɛbɛ ɖɩpɩzɩɣ ɖɩñaɣ pana nɛ ɖɩla nɛ ɖe-Bibl kpɛlɩkɩyaa ɖɛɛnɩ ɛsɩndaa?
6 Kajalaɣ lɛ, yele nɛ ña nɛ mba ɩkpɛlɩkɩɣ pɔ-nɔnɔsɩ taa yɔ mɩ-kɛdɛsɩ ɖaɣlɩ nɛ pɩkɩlɩ. Alɩwaatʋ ndʋ payɩ ŋpɩsɩɣ se ŋna nɔɔyʋ yɔ, ña nɛ ɩ ɩtaatazɩ mayaɣ kʋɖʋmaɣ taa ɖeke, ɛlɛ ɩtazɩ masɩ naalɛ taa. Alɩwaatʋ ndʋ ɖɩɣdʋ tisiɣ nɛ mɩ-kɛdɛsɩ paɣzɩ ɖaɣlʋʋ yɔ, pɔzɩ-ɩ se ye lone naɖɩyɛ ɛwɛɛ yɔ, ña nɛ ɩ ɩpɩzɩɣ ɩcaɣ nɛ iwolo kɛdaɣ yɔɔ. Tɔm ndʋ ɖɩɣdʋ cosuu yɔ, ndʋ kaɣnɩ wɩlʋʋ ɛzɩma Bibl kpɛlɩkʋʋ tɔm cɛyɩ ɛ-ɛsɩndaa yɔ. Pɩsa nɛ ŋsɩnɩ Bibl kpɛlɩkɩyʋ nɛ ɛɖɛɛnɩ ɛsɩndaa lɛɛ lɛɛ lɛ, ŋpɩzɩɣ nɛ ŋpɔzɩ-ɩ nɛ ŋna se pɩkɛdɩɣnɩ-ɩ se ña nɛ ɩ ɩkpɛlɩkɩ tam nabʋlɛ paa kpɩtaʋ ŋgʋ. Ɛlɛ, paa ɩkpɛlɩkɩɣ tam kʋɖʋm yaa nabʋlɛ paa kpɩtaʋ ŋgʋ yɔ, nabʋyʋ tɔm cɛyaa ɖɔɖɔ.
ÑƆƆZƖ PAA KPƐLƖKƲƲ MBƲ
Ñɔɔzɩ Bibl kpɛlɩkʋʋ camɩyɛ, nɛ ŋwɩlɩ kpɛlɩkɩyʋ ɛzɩma ɛñɔɔzɩ ɛ-tɩ yɔ (Cɔnɩ tayʋʋ 7-9)
7. Ɛzɩma wɩlɩyʋ pɩzɩɣ nɛ ɛñɔɔzɩ paa kpɛlɩkʋʋ mbʋ lɛ camɩyɛ?
7 Ŋkɛ wɩlɩyʋ nɛ pʋyɔɔ lɛ, pɩpɔzʋʋ se ŋñɔɔzɩ paa Bibl kpɛlɩkʋʋ mbʋ lɛ camɩyɛ. Ŋpɩzɩɣ nɛ ŋpaɣzɩnɩ kalʋʋ hɔɔlʋʋ ŋgʋ ɩkaɣ kpɛlɩkʋʋ yɔ. Kalɩ ɖɔɖɔ masɩ nzɩ sɩwɛ hɔɔlʋʋ ŋgʋ kɩ-taa yɔ. Ðɔkɩ lɩmaɣza sɔsɔna ña-ñʋʋ taa. Maɣzɩ tɔm ñʋʋ yɔɔ, tɔm ñʋŋ cikpeŋ yɔɔ, tɔm pɔzʋʋ yɔɔ, masɩ nzɩ sɩ-cɔlɔ pamawa se “kalɩ” yɔ sɩ-yɔɔ, kɩlɛmɩŋ yɔɔ nɛ videowaa mba payɩ ŋpɩzɩɣ nɛ ŋtɩŋnɩ pɔ-yɔɔ nɛ ŋsɩnɩ ɖɩɣdʋ nɛ ɛnɩɩ ndʋ ɩkpɛlɩkɩɣ yɔ tɩ-taa yɔ pɔ-yɔɔ. Pʋwayɩ lɛ, ŋmaɣzɩ ñe-Bibl kpɛlɩkɩyʋ yɔɔ nɛ ŋna ɛzɩma ŋpɩzɩɣ nɛ ŋlɩzɩ-ɩ tɔm ndʋ ɩtazɩɣ yɔ tɩ-taa kpayɩ kpayɩ, nɛ pɩsa nɛ ɛnɩɩ tɩ-taa kɛlɛʋ nɛ ɛlabɩnɩ-tʋ tʋmɩyɛ yɔ.—Neh. 8:8; Adu. 15:28a.
8. Apostoloo Pɔɔlɩ tɔm ndʋ tɩwɛ Koloosi mba 1:9, 10 taa yɔ tɩwɩlɩɣ-ɖʋ se ɖɩɩtɩmɩɣ ɖe-Bibl kpɛlɩkɩyaa yɔɔ lɛ, ɛbɛ ɖɩpɩzɩɣ nɛ ɖɩpɔzɩ Yehowa?
8 Ŋŋñɔɔzʋʋ ña-tɩ lɛ, tɩmnɩ Yehowa Bibl kpɛlɩkɩyʋ nɛ ɛ-kɩcɛyɩm pɔ-yɔɔ. Tɩmnɩ Yehowa se ɛsɩnɩ-ŋ nɛ ŋŋwɩlɩɣ ɛyʋ nɔɔyʋ tɔm lɛ, ŋtɩlɩ ɛzɩma ŋtɩŋnɩ Bibl yɔɔ nɛ ŋtukuni ɛ-laŋɩyɛ yɔ. (Kalɩ Koloosi mba 1:9, 10.) Ñaɣ pana nɛ ŋmaɣzɩ mbʋ pɩ-taa nɩʋ pɩzɩɣ nɛ pɩwɛɛ Bibl kpɛlɩkɩyʋ kaɖɛ yɔ pɩ-yɔɔ, yaa tɔm ndʋ pɩpɩzɩɣ nɛ pɩwɛɛ-ɩ kaɖɛ se etisi yɔ tɩ-yɔɔ. Taasɔɔ se ña-kaɖʋwa lɛ se ŋsɩnɩ-ɩ nɛ ɛɖɛɛnɩ ɛsɩndaa nɛ pamɩyɩsɩ-ɩ lɩm.
9. Ɛzɩma wɩlɩyʋ pɩzɩɣ nɛ ɛsɩnɩ Bibl kpɛlɩkɩyʋ nɛ ɛñɔɔzɩ kpɛlɩkʋʋ? Lɩzɩ pɩ-taa.
9 Ðɩtaɣ liu se ye ɖa nɛ Bibl kpɛlɩkɩyʋ nɔɔyʋ ɖɩkpɛlɩkɩɣ ɖoŋ ɖoŋ yɔ, pɩkaɣ-ɩ sɩnʋʋ nɛ ɛwɛɛnɩ ɛsɩmɩyɛ mbʋ Yehowa nɛ Yesu palaba yɔ pɩ-yɔɔ, nɛ ɛsɔɔlɩ se ɛtɩlɩ nɛ pɩkpaɖɩ. (Mat. 5:3, 6) Pɩsa nɛ kpɛlɩkʋʋ wazɩ Bibl kpɛlɩkɩyʋ nɔɔyʋ camɩyɛ lɛ, pɩpɔzʋʋ se ɛka ñʋʋ tɔm ndʋ ɛwɛɛ nɛ ɛkpɛlɩkɩɣ yɔ tɩ-yɔɔ. Pɩsa nɛ ŋsɩnɩ-ɩ nɛ ɛla mbʋ lɛ, lɩzɩ-ɩ pɩ-taa se pɩcɛyɩ siŋŋ se ɛñɔɔzʋʋ paa kpɛlɩkʋʋ mbʋ. Pɩwɛɛ se ɛkalɩ hɔɔlʋʋ ŋgʋ ɩkpɛlɩkɩɣ yɔ nɛ ɛmaɣzɩ nɛ ɛna ɛzɩma ɛpɩzɩɣ nɛ ɛɖɔ tɔm ndʋ ɛkpɛlɩkɩɣ yɔ tɩ-yɔɔ yɔ. Ɛzɩma ŋpɩzɩɣ ŋsɩnɩ-ɩ nɛ ɛñɔɔzɩ kpɛlɩkʋʋ? Ña nɛ kpɛlɩkɩyʋ ɩkpɛndɩ nɛ ɩñɔɔzɩ ñʋʋ nakʋyʋ nɛ ŋwɩlɩ-ɩ ɛzɩma palakɩ yɔ. * Wɩlɩ-ɩ ɛzɩma ɛpɩzɩɣ nɛ ɛna tɔm yɔɔ cosuu yɔ, nɛ ŋwɩlɩ-ɩ ɛzɩma ɛhɛɛ tɔm pee sɔsɔna yaa tɔm loyisi nzɩ sɩ-tɔm cɛyaa yɔ sɩ-tɛɛ nɛ pɩsɩnɩ-ɩ nɛ ɛtɔzɩ tɔm cosuu yɔɔ yɔ. Pʋwayɩ lɛ, heyi-i se ɛtɩŋnɩ ɛ-maɣmaɣ ɛ-tɔm pee yɔɔ nɛ ecosi tɔm yɔɔ. Ye ɛlakɩ mbʋ yɔ, pɩkaɣ-ŋ sɩnʋʋ nɛ ŋna se ɛnɩ tɔm ndʋ ɩkpɛlɩkaa yɔ tɩ-taa camɩyɛ yaa ɛtɩnɩɩ. Ɛlɛ pɩkazɩ nabʋyʋ ɖɔɖɔ se ŋpɩzɩɣ nɛ ŋseɣti ñe-Bibl kpɛlɩkɩyʋ nɛ ɛla.
WƖLƖ-Ɩ SE ƐYƆƆDƲƲNƖ YEHOWA PAA ÐOOYE
Wɩlɩ ñe-Bibl kpɛlɩkɩyʋ ɛzɩma ɛyɔɔdɩnɩ Yehowa yɔ (Cɔnɩ tayʋʋ 10-11)
10. (a) Ɛbɛ yɔɔ pɩcɛyaa se ɛyʋ ɛkalɩɣ Bibl paa ɖooye? (b) Nɛ ɛbɛ pɩpɔzʋʋ se ɛyʋ ɛla nɛ Bibl kalʋʋ wazɩ-ɩ camɩyɛ?
10 Paa wɩlɩyʋ nɛ Bibl kpɛlɩkɩyʋ pɛkpɛlɩkɩɣ paa kpɩtaʋ ŋgʋ yɔ, pɩwɛɛ se kpɛlɩkɩyʋ maɣmaɣ ɛlakɩ nabʋyʋ ɖɔɖɔ paa ɖooye, nɛ ye ɛlakɩ-pʋ yɔ pɩkaɣ-ɩ wazʋʋ. Pɩwɛɛ se ɛ nɛ Yehowa pɔyɔɔdʋʋ. Ɛzɩma tɩyɛ? Pɩcɛyaa se ewelisini Yehowa nɛ ɛyɔɔdɩnɩ-ɩ ɖɔɖɔ. Ɛpɩzɩɣ nɛ ewelisini Ɛsɔ, ye ɛkalɩɣ Bibl paa ɖooye yɔ. (Yoz. 1:8; Keɣa 1:1-3) Wɩlɩ-ɩ ɛzɩma ɛpɩzɩɣ nɛ ɛlabɩnɩ tʋmɩyɛ “Programme de lecture de la Bible” takayaɣ ŋga kɛwɛ jw.org yɔɔ yɔ. * Pɩsa nɛ ŋsɩnɩ-ɩ nɛ e-Bibl kalʋʋ wazɩ-ɩ camɩyɛ lɛ, seɣti-i se ɛmaɣzɩ ndʋ Bibl wɩlɩɣ-ɩ Yehowa yɔɔ yɔ tɩ-yɔɔ. Sɩnɩ-ɩ ɖɔɖɔ nɛ ɛmaɣzɩ nɛ ɛna se ɛzɩma ɛpɩzɩɣ nɛ ɛlabɩnɩ tʋmɩyɛ tɔm ndʋ ɛkpɛlɩkɩɣ yɔ e-wezuu caɣʋ taa.—Tʋma 17:11; Yak. 1:25.
11. (a) Ɛzɩma kpɛlɩkɩyʋ pɩzɩɣ nɛ ɛkpɛlɩkɩ adɩma labʋ camɩyɛ? (b) Nɛ ɛbɛ yɔɔ pɩcɛyaa se ɛtɩmɩɣnɩ Yehowa ɖoŋ ɖoŋ?
11 Seɣti ñe-Bibl kpɛlɩkɩyʋ se ɛtɩmɩɣ paa ɖooye nɛ ɛyɔɔdʋʋnɩ Yehowa. Tɩmnɩ ña-laŋɩyɛ pilim alɩwaatʋ ndʋ ɩpaɣzɩɣ kpɛlɩkʋʋ yɔ nɛ alɩwaatʋ ndʋ ɩtɛŋ yɔ; nɛ ŋŋtɩmɩɣ lɛ, tɩmɩ ñe-Bibl kpɛlɩkɩyʋ yɔɔ. Ɛwɛɣ nɛ ewelisiɣ ña-adɩma lɛ, ɛkaɣ kpɛlɩkʋʋ ɛzɩma ɛtɩmnɩ ɛ-laŋɩyɛ pilim nɛ ɛyɔɔdɩnɩ Yehowa Ɛsɔ, Yesu hɩɖɛ taa yɔ. (Mat. 6:9; Yoh. 15:16) Maɣzɩ nɛ ŋna ɛzɩma Bibl kalʋʋ paa ɖooye (Yehowa welisinuu) nɛ adɩma (Yehowa yɔɔdɩnʋʋ) kaɣ sɩnʋʋ ñe-Bibl kpɛlɩkɩyʋ nɛ ɛñɔtɩnɩ Ɛsɔ nɛ pɩkpaɖɩ yɔ! (Yak. 4:8) Ye ɛlakɩ mbʋ paa ɖooye yɔ, pɩkaɣ-ɩ sɩnʋʋ nɛ ɛɖɛɛnɩ ɛsɩndaa nɛ ɛha ɛ-tɩ nɛ pamɩyɩsɩ-ɩ lɩm. Ɛbɛ ɖɔɖɔ kaɣ-ɩ sɩnʋʋ?
SƖNƖ-Ɩ NƐ ƐÐƲ TAABALƖYƐ NƐ YEHOWA
12. Ɛzɩma wɩlɩyʋ pɩzɩɣ nɛ ɛsɩnɩ Bibl kpɛlɩkɩyʋ nɛ ɛɖʋ taabalɩyɛ nɛ Yehowa?
12 Tɔm ndʋ Bibl kpɛlɩkɩyʋ kpɛlɩkɩɣ yɔ pɩwɛɛ se tiseɣti-i nɛ ɛlɛɣzɩ ɛ-maɣzɩm, ɛlɛ pɩwɛɛ ɖɔɖɔ se tiseɣti-i nɛ ɛlɛɣzɩ ɛ-laŋɩyɛ. Ɛbɛ yɔɔ? Ðɩsɔɔlaa se ɖe-Bibl kpɛlɩkɩyʋ ɛtɩlɩ Yehowa yɔɔ tɔm. Ɛlɛ tɔm ndʋ ɛkpɛlɩkɩɣ yɔ, pɩwɛɛ ɖɔɖɔ se titukuni ɛ-laŋɩyɛ nɛ ɛsɔɔlɩ se ɛlabɩnɩ-tʋ tʋmɩyɛ. Yesu kaawɩlɩ ɛyaa tɔm sakɩyɛ, nɛ paasɔɔlaa se pɛkpɛlɩkɩ tɔm ɛ-cɔlɔ. Ɛlɛ ɛyaa tɩŋ ɛ-wayɩ mbʋ pʋyɔɔ yɔ, ɛ-tɔm kaatukuni pa-laŋa ɖɔɖɔ. (Luka 24:15, 27, 32) Pɩwɛɛ se kpɛlɩkɩyʋ ɛna Yehowa ɛzɩ Ɛyʋ keekee yɔ; ɛyʋ weyi ɛpɩzɩɣ nɛ ɛɖʋ-ɩ nɛ taabalɩyɛ yɔ. Pɩwɛɛ se eɖiɣzina se Yehowa pɩzɩɣ nɛ ɛkɛ ɛ-Caa, ɛ-Ɛsɔ nɛ ɛ-Taabalʋ. (Keɣa 24:4, 5) Ɩɩkpɛlɩkɩɣ Bibl lɛ, hɔ kpɛlɩkɩyʋ lɩmaɣza nɛ ŋwoni Ɛsɔ wɛtʋ kɩbandʋ yɔɔ. (Ejl. 34:5, 6; 1 Pɩy. 5:6, 7) La mbʋ, paa tɔm ñʋʋ ŋgʋ taa ɩtɩɩwɛɛ nɛ ɩtazɩɣ yɔ. Sɩnɩ ñe-Bibl kpɛlɩkɩyʋ nɛ ɛsɔɔlɩ Yehowa wɛtʋ kɩbandʋ ɛzɩ ɛ-sɔɔlɩm, ɛ-camɩyɛ lakasɩ nɛ ɛ-pʋtɔdɩyɛ naʋ mbʋ yɔ. Yesu yɔɔdaa se “paɣtʋ sɔsɔtʋ nɛ kajalaɣ ñɩndʋ” yɔ: “Sɔɔlɩ Yehowa ñɛ-Ɛsɔ.” (Mat. 22:37, 38) Ñaɣ pana nɛ ŋsɩnɩ ñe-Bibl kpɛlɩkɩyʋ nɛ ɛsɔɔlɩ Yehowa.
13. Ha kɩɖaʋ nakʋyʋ ŋgʋ kɩ-yɔɔ ɛyʋ pɩzɩɣ ɛtɩŋna nɛ ɛsɩnɩ Bibl kpɛlɩkɩyʋ nɔɔyʋ nɛ ɛkpɛlɩkɩ Yehowa wɛtʋ yɔɔ tɔm yɔ.
13 Ña nɛ ñe-Bibl kpɛlɩkɩyʋ ɩɩlakɩ kɛdɛsɩ lɛ, heyi-i mbʋ pʋyɔɔ ŋsɔɔlɩ Yehowa yɔ. Pɩpɩzɩɣ nɛ pɩsɩnɩ-ɩ nɛ eɖiɣzina se ɛnʋ ɖɔɖɔ pɩpɔzʋʋ se ɛpɩsɩ Yehowa taabalʋ nɛ ɛsɔɔlɩ-ɩ. (Keɣa 72:28) Ɛzɩ tɔm loyaɣ nakɛyɛ wɛ takayaɣ ŋga ɩwɛɛ nɛ ɩkpɛlɩkɩɣ yɔ ka-taa yaa mayaɣ nakɛyɛ taa, nɛ kɔyɔɔdʋʋ Yehowa sɔɔlɩm, ɛ-lɔŋsɩnɖɛ, e-siɣsiɣ wɛtʋ yaa e-ɖoŋ tɔm nɛ kotukuuni ña-laŋɩyɛ na? Heyi ñe-Bibl kpɛlɩkɩyʋ kɔ-tɔm nɛ ŋyele nɛ ɛtɩlɩ se lɩmaɣza sakɩyɛ wena a-yɔɔ ŋsɔɔlɩ ɖa-Caa weyi ɛwɛ ɛsɔdaa yɔ a-taa lɛɛɖɛ lɛ. Nabʋyʋ wɛɛ ɖɔɖɔ nɛ pɩpɔzʋʋ se paa Bibl kpɛlɩkɩyʋ weyi lɛ ɛlabɩ-pʋ nɛ pɩsa nɛ ɛɖɛɛnɩ ɛsɩndaa nɛ pamɩyɩsɩ-ɩ lɩm.
SEƔTI-I SE ƐKƆŊ ƐGBƐYƐ TAA KEDIƔZISI
Ye pɩsaŋ yɔ, seɣti kpɛlɩkɩyʋ lɔŋ se ɛpaɣzɩ kediɣzisi kɔm! (Cɔnɩ tayʋʋ 14-15)
14. Tɔm ndʋ Ebree mba 10:24, 25 heyiɣ-ɖʋ ɛgbɛyɛ taa kediɣzisi yɔɔ nɛ tɩpɩzɩɣ tɩsɩnɩ Bibl kpɛlɩkɩyʋ nɔɔyʋ nɛ ɛɖɛɛnɩ ɛsɩndaa?
14 Ða-tɩŋa payɩ ɖɩsɔɔlaa se ɖe-Bibl kpɛlɩkɩyaa ɩɖɛɛnɩ ɛsɩndaa nɛ pamɩyɩsɩ-wɛ lɩm. Nʋmɔʋ sɔsɔʋ ŋgʋ kɩ-yɔɔ ɖɩpɩzɩɣ ɖɩtɩŋna nɛ ɖɩsɩnɩ-wɛ yɔ, ŋgʋ lɛ se ɖiseɣti-wɛ se pɔkɔŋ ɛgbɛyɛ taa kediɣzisi. Bibl wɩlɩyaa mba pɛwɛ niye yɔ, pɔyɔɔdaa se Bibl kpɛlɩkɩyaa mba powoki kediɣzisi yɔ, pɛɖɛɣnɩ ɛsɩndaa lɛɛ lɛɛ. (Keɣa 110:1) Wɩlɩyaa nabɛyɛ heyiɣ pe-Bibl kpɛlɩkɩyaa se pɩsa nɛ patɩlɩ Bibl taa tɔm nɛ pɩkpaɖɩ lɛ, pɩpɔzʋʋ se powoki kediɣzisi. Ña nɛ ñe-Bibl kpɛlɩkɩyʋ ɩkalɩ Ebree mba 10:24, 25 nɛ ŋwɩlɩ-ɩ wazasɩ nzɩ ɛkaɣ hiɣu ye ɛkɔŋ kediɣzisi yɔ. (Kalɩ Ebree mba 10:24, 25.) Wɩlɩ-ɩ Ɛbɛ palakɩ Kewiyaɣ Kpaaŋ taa? * tɛ video. Sɩnɩ ñe-Bibl kpɛlɩkɩyʋ nɛ ɛtɛ ɛ-taa se ɛɛfɛɣ kediɣzaɣ nakɛyɛ.
15. Ɛbɛ ɖɩpɩzɩɣ ɖɩla nɛ ɖiseɣti Bibl kpɛlɩkɩyʋ nɔɔyʋ se ɛkɔŋ kediɣzisi ɖoŋ ɖoŋ?
15 Ye ñe-Bibl kpɛlɩkɩyʋ ɛtɩkɔmtɩ kediɣzaɣ nakɛyɛ yaa ɛɛkɔŋ kediɣzisi ɖoŋ ɖoŋ yɔ, ɛbɛ ŋpɩzɩɣ nɛ ŋla? Heyi-i nɛ kpekpeka tɔm ndʋ ŋkpɛlɩkɩ kediɣzaɣ nakɛyɛ taa pitileɖita yɔ tɩ-taa natʋyʋ. Ɛnaɣ lɩmaɣza wena ŋwɛnɩ kediɣzaɣ yɔɔ yɔ lɛ, ɛpɩzɩɣ nɛ ɛsɔɔlɩ se ɛkɔɔ. Ha-ɩ Feŋuu Tilimiye yaa Ðe-wezuu caɣʋ nɛ ɖɛ-Ɛsɔ sɛtʋ tʋmɩyɛ kpɛlɩkʋʋ takayaɣ ŋga ɩwɛɛ nɛ ɩkpɛlɩkɩɣ kediɣzaɣ taa yɔ. Wɩlɩ-ɩ mbʋ pɩ-tɔm pakaɣ yɔɔdʋʋ kediɣzaɣ ŋga kɔkɔŋ yɔ ka-taa yɔ, nɛ ŋpɔzɩ-ɩ se eheyi-ŋ hɔɔlʋʋ ŋgʋ kɩ-tɔm kɛdɩnɩ-ɩ nɛ pɩkpaɖɩ yɔ. Mbʋ ñe-Bibl kpɛlɩkɩyʋ kaɣ naʋ kediɣzaɣ ŋga ɛcalɩɣ wobu yɔ ka-taa yɔ, pɩkpaɖɩɣ mbʋ payɩ ɛtɛm naʋ Ɛsɔ sɛtʋ agbaa lɛɛna taa yɔ. (1 Kɔr. 14:24, 25) Ɛkaɣ katʋʋ ɛyaa lalaa; nɛ ɛpɩzɩɣ nɛ ɛmaɣzɩnɩ ɛyaa mba pa-kɩɖaŋ kɩbaŋ. Pakaɣ-ɩ sɩnʋʋ nɛ ɛɖɛɛnɩ ɛsɩndaa nɛ pamɩyɩsɩ-ɩ lɩm.
16. (a) Ɛbɛ pɩpɔzʋʋ se ɖɩla nɛ ɖɩsɩnɩ Bibl kpɛlɩkɩyaa nɛ pɛɖɛɛnɩ ɛsɩndaa nɛ pamɩyɩsɩ-wɛ lɩm? (b) Nɛ ɛbɛ ɖɩkaɣ naʋ tɔm ñʋʋ ŋgʋ kɩkɔŋ yɔ kɩ-taa?
16 Ɛzɩma ɖɩpɩzɩɣ nɛ ɖɩsɩnɩ Bibl kpɛlɩkɩyaa nɛ pɛɖɛɛnɩ ɛsɩndaa nɛ pamɩyɩsɩ-wɛ lɩm? Ðɩpɩzɩɣ nɛ ɖɩsɩnɩ paa Bibl kpɛlɩkɩyʋ weyi nɛ ɛna se kpɛlɩkʋʋ tɔm cɛyɩ siŋŋ, ye ɖiseɣtiɣ-i se etisi nɛ ɖa nɛ ɩ ɖɩkpɛlɩkɩɣ paa kpɩtaʋ ŋgʋ nɛ ɖiseɣtiɣ-i ɖɔɖɔ se ɛñɔɔzʋʋ paa kpɛlɩkʋʋ mbʋ yɔ. Ðɩsɔɔlaa ɖɔɖɔ se ɖiseɣti-i nɛ ɛyɔɔdʋʋnɩ Yehowa paa ɖooye, nɛ ɛɖʋ-ɩ nɛ taabalɩyɛ. Ðɩsɔɔlaa se ɖiseɣti Bibl kpɛlɩkɩyʋ nɛ ɛkɔŋ kediɣzisi. (Kalɩ aɖakaɣ “ Mbʋ pɩwɛɛ se kpɛlɩkɩyaa ɩla nɛ pɛɖɛɛnɩ ɛsɩndaa nɛ pamɩyɩsɩ-wɛ lɩm yɔ,” kɛwɛ hɔɔlʋʋ 12 yɔɔ.) Ɛlɛ, tɔm ñʋʋ ŋgʋ kɩkɔŋ yɔ kɩ-taa, ɖɩkaɣ naʋ mbʋ Bibl wɩlɩyaa pɩzɩɣ nɛ patasɩ labʋ nɛ pasɩnɩ Bibl kpɛlɩkɩyaa nɛ pɛɖɛɛnɩ ɛsɩndaa nɛ pamɩyɩsɩ-wɛ lɩm yɔ pɩ-taa kagbanzɩ.
HENDU 76 Ɛzɩma pɩlakɩ-ŋ?
^ tay. 5 Ye pɔtɔm se pawɩlɩ nɔɔyʋ nabʋyʋ yɔ, pʋ-tɔbʋʋ lɛ se pasɩnɩ-ɩ nɛ ɛlɛɣzɩ ɛ-maɣzɩm, ɛzɩma pɩlakɩ-ɩ yɔ, yaa ɛ-lakasɩ. Pɩnaɣ 2020 mayaɣ lɛ Maatiyee 28:19. Mayaɣ ŋga, kɔtɔzɩ-ɖʋ se pɩcɛyaa se ɖɩkpɛlɩkɩnɩ ɛyaa Bibl nɛ ɖɩwɩlɩ-wɛ mbʋ pɩwɛɛ se pala nɛ papɩsɩ Yesu Krɩstʋ tɔmkpɛlɩkɩyaa nɛ pamɩyɩsɩ-wɛ lɩm yɔ. Tɔm ñʋʋ kʋnɛ nɛ ŋgʋ kɩkɔŋ yɔ pa-taa, ɖɩkaɣ naʋ mbʋ ɖɩpɩzɩɣ ɖɩla nɛ ɖɩwɛɛ niye tʋmɩyɛ kɩcɛyɩyɛ nɖɩ ɖɩ-labʋ taa nɛ pɩkpaɖɩ yɔ.
^ tay. 2 TƆM TƆBƲƲ: Ye ña nɛ nɔɔyʋ ɩtɩŋɩɣnɩ Bibl yɔɔ nɛ ɩlakɩ kɛdaɣ ɖoŋ ɖoŋ yɔ, pɩwɩlɩɣ se ŋwɛɛ nɛ ŋkpɛlɩkɩɣnɩ-ɩ Bibl. Ye ŋwɩlɩ ɛyʋ ɛnʋ ɛzɩma ɖɩkpɛlɩkɩɣnɩ ɛyaa Bibl yɔ, nɛ ña nɛ ɩ ɩkpɛlɩkɩ tam nabʋlɛ pʋwayɩ nɛ ŋna se kpɛlɩkʋʋ mbʋ pɩkaɣ wobu pɩ-yɔɔ yɔ, ŋpɩzɩɣ nɛ ŋkalɩ-ɩ se kpɛlɩkɩyʋ.
^ tay. 3 Tɔm ñʋŋ ɛnɩ ɩyɔɔdʋʋ ɖɔɖɔ lɔŋ tasʋʋ mbʋ pɩwɛ tɔm ñʋŋ “Dirigeons des études bibliques qui favorisent les progrès” taa yɔ pɩ-tɔm. Tɔm ñʋŋ ɩnɩ, ɩwɛ juillet 2004 piwolo mai 2005 tɛ Kewiyaɣ Ɛsɔ Sɛtʋ Tʋmɩyɛ takayɩsɩ (fransɩɩ) taa.
^ tay. 4 Tɔm ndʋ payɩ pɔyɔɔdʋʋ Bibl kpɛlɩkɩyʋ abalɩñɩnʋ yɔɔ yɔ, titukuuni ɖɔɖɔ Bibl kpɛlɩkɩyʋ halɩñɩnʋ.
^ tay. 9 Cɔnɩ cɛcɛsɩ naanza tɛ video Wɩlɩ ñe-Bibl kpɛlɩkɩyaa ɛzɩma pɔñɔɔzɩ pa-tɩ yɔ. Wolo JW Library® taa, hɔɔlʋʋ MULTIMEDIA > NOS REUNIONS ET NOTRE MINISTERE > DEVENONS PLUS HABILES taa.
^ tay. 10 Wolo LA BIBLE ET VOUS > OUTILS D’ETUDE DE LA BIBLE taa.
^ tay. 14 Wolo JW Library® taa, hɔɔlʋʋ MULTIMEDIA > NOS REUNIONS ET NOTRE MINISTERE > OUTILS POUR LA PREDICATION taa.
