TƆM ÑƲƲ ŊGƲ ÐƖKPƐLƖKƖƔ YƆ 42
Ɛzɩma ɖɩpɩzɩɣ ɖɩsɩnɩ Bibl kpɛlɩkɩyaa nɛ pɛɖɛɛnɩ ɛsɩndaa nɛ pamɩyɩsɩ-wɛ lɩm?—Hɔɔlʋʋ naalɛ ñɩŋgʋ
“Paa ɛzɩmtaa lɛ, cɔnɩ ña-tɩ yɔɔ nɛ ñɔ-tɔm wɩlʋʋ yɔɔ camɩyɛ.”—1 TIM. 4:16.
HENDU 77 Cɩkpɛndʋʋ ɛjaɖɛ taa mintʋsʋʋ
LƖMAƔZA SƆSƆNA *
1. Ɛzɩma ɖɩlaba nɛ ɖɩna se tɔmkpɛlɩkɩyaa labʋ tʋmɩyɛ kɛ tʋmɩyɛ nɖɩ ɖɩyakɩ ɛyaa ñʋʋ yɔ?
TƆMKPƐLƖKƖYAA labʋ tʋmɩyɛ kɛ tʋmɩyɛ nɖɩ ɖɩyakɩ ɛyaa ñʋʋ yɔ! Ɛzɩma ɖɩlaba nɛ ɖɩtɩlɩ? Alɩwaatʋ ndʋ Yesu ɖʋ paɣtʋ ndʋ pama Maatiyee 28:19, 20 taa yɔ, ɛyɔɔdaa se: “Iwolo nɛ ɩla . . . tɔmkpɛlɩkɩyaa, ɩmɩyɩsɩ-wɛ lɩm.” Tɔm ndʋ ɖɩsɩma pɩlɩɩnɩ ɛzɩma lɩm mɩyɩsʋʋ tɔm cɛyaa yɔ pɩ-yɔɔ? Mba pɔsɔɔlaa se pehiɣ ñʋʋ yabʋ yɔ, pɩcɛyaa se pamɩyɩsɩ-wɛ lɩm. Ɛyʋ weyi ɛsɔɔlaa se pamɩyɩsɩ-ɩ lɩm yɔ, pɩwɛɛ se etisi se Yesu sɩm nɛ e-femtu ɖeke yekina nɛ ɛpɩzɩ nɛ ehiɣ wezuu maatɛŋ. Pʋyɔɔ apostoloo Pɩyɛɛrɩ heyi e-koobiya Krɩstʋ ñɩma se: ‘Lɩm mɩyɩsʋʋ yakɩ mɩ-ñʋʋ ɖɔɖɔ lɛɛlɛɛyɔ pɩtɩŋnɩ Yesu Krɩstʋ femtu yɔɔ.’ (1 Pɩy. 3:21) Pʋyɔɔ lɛ, alɩwaatʋ ndʋ tɔmkpɛlɩkɩyʋ kɩfalʋ nɔɔyʋ haɣ ɛ-tɩ nɛ pamɩyɩsɩ-ɩ lɩm yɔ, ɛpɩzɩɣ nɛ ɛtaa liu se ɛcakɩ wezuu maatɛŋ.
2. Ɛzɩ 2 Timootee 4:1, 2 yɔɔdʋʋ yɔ, wɩlɩyaa mba pɩwɛɛ se ɖɩkɛna?
2 Pɩsa nɛ ɖɩla tɔmkpɛlɩkɩyaa lɛ, pɩcɛyaa se ɖɩñaɣ pana nɛ ɖɩwɛɛnɩ “tɔm wɩlʋʋ lɛɣtʋ.” (Kalɩ 2 Timootee 4:1, 2.) Ɛbɛ yɔɔ? Mbʋ pʋyɔɔ yɔ, Yesu ɖʋ-ɖʋ paɣtʋ se: “Iwolo nɛ ɩla . . . tɔmkpɛlɩkɩyaa, . . . ɩwɩlɩ-wɛ.” Apostoloo Pɔɔlɩ yɔɔdaa se pɩwɛɛ se ɖɩɖɔkɩ kpɛlɩkɩyaa labʋ tʋmɩyɛ kpam, ‘mbʋ pʋyɔɔ yɔ ye ɖɩlakɩ mbʋ yɔ, ɖɩkaɣ yabʋ ɖa-maɣmaɣ ɖa-ñʋʋ nɛ mba pewelisiɣni-ɖʋ yɔ pa-ñɩŋgʋ.’ Ye mbʋ, Pɔɔlɩ wɛnɩ toovenim se ɛyɔɔdɩ se: “Paa ɛzɩmtaa lɛ, cɔnɩ . . . ñɔ-tɔm wɩlʋʋ yɔɔ camɩyɛ.” (1 Tim. 4:16) Nɔɔ kʋɖʋmaɣ nakɛyɛ wɛ tɔm wɩlʋʋ nɛ tɔmkpɛlɩkɩyaa labʋ pɛ-hɛkʋ taa, pʋyɔɔ lɛ ɖɩsɔɔlaa se ɖɔ-tɔm wɩlʋʋ ɛwɛɛ ɖeu nɛ pɩkpaɖɩ.
3. Tɔm ñʋʋ kʋnɛ kɩ-taa, ɛbɛ ɖɩkaɣ naʋ pɩlɩɩnɩ Bibl kpɛlɩkɩnʋʋ ɛyaa yɔɔ?
3 Ðɩwɛɛ nɛ ɖɩwɩlɩɣ ɛyaa miiliyɔɔwaa sakɩyɛ toovenim tɔm ndʋ tɩwɛ Bibl taa yɔ. Ɛlɛ, ɛzɩ ɖɩnaʋ tɔm ñʋʋ ŋgʋ kɩɖɛwa yɔ kɩ-taa yɔ, ɖɩsɔɔlaa se ɖɩtɩlɩ mbʋ ɖɩpɩzɩɣ ɖɩla nɛ ɖɩsɩnɩ pa-taa sakɩyɛ nɛ pamɩyɩsɩ-wɛ lɩm nɛ papɩsɩ Yesu Krɩstʋ tɔmkpɛlɩkɩyaa yɔ. Tɔm ñʋʋ kʋnɛ kɩ-taa, ɖɩkaɣ naʋ mbʋ pɩwɛɛ se paa wɩlɩyʋ weyi lɛ ɛtasɩ labʋ nɛ ɛsɩnɩ Bibl kpɛlɩkɩyʋ nɔɔyʋ nɛ ɛɖɛɛnɩ ɛsɩndaa nɛ pamɩyɩsɩ lɩm yɔ pɩ-taa kagbanzɩ.
LABƖNƖ BIBL TƲMƖYƐ ALƖWAATƲ NDƲ ŊWƖLƖƔ TƆM YƆ
Pɔzɩ wɩlɩyʋ weyi ɛwɛ niye yɔ se ɛsɩnɩ-ŋ nɛ ŋlabɩnɩ tʋmɩyɛ Bibl camɩyɛ nɛ pɩkpaɖɩ (Cɔnɩ tayʋʋ 4-6) *
4. Ɛbɛ yɔɔ pɩtɩpɔzɩ se wɩlɩyʋ ɛkɩlɩ yɔɔdʋʋ alɩwaatʋ ndʋ ɛkpɛlɩkɩɣnɩ nɔɔyʋ Bibl yɔ? (Kalɩ ɖɔɖɔ pɩ-tɛɛ tɔm.)
4 Ðɩsɔɔlɩ Bibl taa tɔm ndʋ ɖɩwɩlɩɣ ɛyaa yɔ. Pʋyɔɔ lɛ, pɩpɩzɩɣ nɛ pɩtakɩ-ɖʋ se ɖɩkpaɣ alɩwaatʋ sakɩyɛ nɛ ɖɩyɔɔdɩ mbʋ ɖɩsɔɔlaa yɔ pɩ-tɔm. Ɛlɛ, paa ɖɩtɩɩkɛ Feŋuu Tilimiye kpɛlɩkʋʋ yɔɔ cɔnɩyʋ, ɛgbɛyɛ taa Bibl kpɛlɩkʋʋ yɔɔ cɔnɩyʋ, yaa ɖɩkpɛlɩkɩɣnɩ nɔɔyʋ Bibl ɖɩɣa yɔ, pɩtɩpɔzɩ se ɖɩkɩlɩ yɔɔdʋʋ. Paa wɩlɩyʋ weyi lɛ, ɛsɔɔlaa se ɛlabɩnɩ Bibl tʋmɩyɛ camɩyɛ alɩwaatʋ ndʋ ɛwɩlɩɣ tɔm yɔ. Pʋyɔɔ lɛ, pɩcɛyaa se ɛkpa ɛ-tɩ nɛ ɛtaakɩlɩ yɔɔdʋʋ, nɛ ɛtaañaɣ pana se ɛlɩzɩ tɔm ndʋ payɩ ɛsɩm Bibl mayaɣ nakɛyɛ yɔɔ yaa tɔm natʋyʋ yɔɔ yɔ tɩ-taa. * (Yoh. 16:12) Kpaɣ Bibl taa tɔm ndʋ ŋsɩm alɩwaatʋ ndʋ pamɩyɩsɩ-ŋ lɩm yɔ nɛ ŋmaɣzɩnɩ ndʋ ŋsɩm lɛɛlɛɛyɔ yɔ. Pɩtʋʋ fɛyɩ se alɩwaatʋ ndʋ pamɩyɩsɩ-ŋ lɩm yɔ, Bibl taa kajalaɣ wɩlɩtʋ ɖeke ŋŋsɩma. (Ebr. 6:1) Pʋcɔ nɛ ŋkpɛlɩkɩ tɔm ndʋ ŋsɩm sɔnɔ yɔ lɛ, pɩkpaɣ-ŋ pɩnzɩ sakɩyɛ. Ye mbʋ, taañaɣ pana se ŋwɩlɩ kpɛlɩkɩyʋ kɩfalʋ tɔm tɩŋa kpaagbaa.
5. (a) Ɛzɩ 1 Tesalooniiki mba 2:13 yɔɔdʋʋ yɔ, ɛbɛ ɖɩsɔɔlaa se ɖɛ-kpɛlɩkɩyʋ ɛtɩlɩ pɩlɩɩnɩ tɔm ndʋ ɛkpɛlɩkɩɣ yɔ tɩ-yɔɔ? (b) Ɛzɩma ɖɩpɩzɩɣ nɛ ɖiseɣti kpɛlɩkɩyʋ nɔɔyʋ nɛ ɛyɔɔdɩ mbʋ ɛkpɛlɩkɩɣ yɔ pɩ-yɔɔ tɔm?
5 Ðɩsɔɔlaa se ɖe-Bibl kpɛlɩkɩyʋ ɛnɩɩ pɩ-taa se tɔm ndʋ ɛkpɛlɩkɩɣ yɔ, tɩlɩnɩ Bibl taa. (Kalɩ 1 Tesalooniiki mba 2:13.) Ɛbɛ pɩwɛɛ se ɖɩla nɛ ɖɩsɩnɩ-ɩ nɛ ɛnɩɩ tɔm ndʋ tɩ-taa? Seɣti ñe-Bibl kpɛlɩkɩyʋ se ɛyɔɔdɩ mbʋ ɛkpɛlɩkɩɣ yɔ pɩ-tɔm. Taalɩzɩ-ɩ Bibl masɩ tɩŋa taa paa ɛzɩmtaa, ɛlɛ pɔzɩ-ɩ se ɛlɩzɩ-ŋ sɩ-taa nasɩyɩ taa. Sɩnɩ ñe-Bibl kpɛlɩkɩyʋ nɛ ɛna ɛzɩma Ɛsɔtɔm tukuuni ɛ-maɣmaɣ yɔ. Pɔzɩ-ɩ tɔm nɛ pɩsɩnɩ-ɩ nɛ ɛyɔɔdɩ ndʋ ɛmaɣzɩɣ masɩ nzɩ ɛkalɩɣ yɔ sɩ-yɔɔ yɔ. (Luka 10:25-28) Ŋpɩzɩɣ nɛ ŋpɔzɩ-ɩ se: “Ɛzɩma mayaɣ kanɛ kasɩnɩ-ŋ nɛ ŋtɩlɩ Yehowa wɛtʋ natʋyʋ?” “Ɛzɩma Bibl taa toovenim tɔm tʋnɛ tɩpɩzɩɣ nɛ tɩwazɩ-ŋ?” “Suwe ŋmaɣzɩɣ tɔm ndʋ ŋkpɛlɩkɩ lɛɛlɛɛyɔ yɔ tɩ-yɔɔ?” (Adu. 20:5) Pɩtɩkɛ tɔm ndʋ kpɛlɩkɩyʋ sɩma yɔ tɩ-tɔm kɩlɩnɩ cɛyʋʋ, ɛlɛ ɛzɩma ɛsɔɔlɩ-tʋ nɛ ɛɖɔŋ tɩ-yɔɔ yɔ, pɩ-tɔm kɩlɩnɩ cɛyʋʋ.
6. Ɛbɛ yɔɔ pɩwɛɣ ɖeu se ɖɩkpɛndɩnɩ wɩlɩyʋ weyi ɛwɛ niye yɔ alɩwaatʋ ndʋ ɖɩkpɛlɩkɩɣnɩ nɔɔyʋ Bibl yɔ?
6 Wiɖiyi ŋtɛm yaʋ tɔm susuyu weyi ɛwɛ niye tɔm wɩlʋʋ taa yɔ se ɛsɩ-ŋ ñe-bibl kpɛlɩkɩyʋ nɔɔyʋ cɔlɔ? Iwoki nɛ ɩkpɛlɩkɩ nɛ pɩtɛ lɛ, ŋpɩzɩɣ nɛ ŋpɔzɩ-ɩ se eheyi-ŋ ndʋ ɛmaɣzɩɣ pɩlɩɩnɩ ɛzɩma ŋcɔŋnɩ kpɛlɩkʋʋ yɔɔ yɔ pɩ-yɔɔ yɔ. Ŋpɩzɩɣ ɖɔɖɔ nɛ ŋpɔzɩ-ɩ nɛ ŋna se ŋwɛɛ nɛ ŋlakɩnɩ Bibl tʋmɩyɛ camɩyɛ na? Ye ŋsɔɔlaa se ŋwɛɛ niye tɔm wɩlʋʋ taa nɛ pɩkpaɖɩ yɔ, pɩwɛɛ se ŋluzi ña-tɩ. (Kpaɣ-tʋ nɛ ŋmaɣzɩnɩ Tʋma Labʋ 18:24-26.) Pʋwayɩ lɛ, pɔzɩ tɔm susuyu weyi ɛwɛ niye yɔ nɛ ŋna se ɛmaɣzɩɣ se kpɛlɩkɩyʋ wɛɛ nɛ ɛnɩɣ toovenim tɔm taa camɩyɛ na. Ŋpɩzɩɣ ɖɔɖɔ nɛ ŋpɔzɩ tɔm susuyu ɛnʋ se ɛkpɛlɩkɩnɩ ñe-Bibl kpɛlɩkɩyʋ, ye ŋŋkaɣ wɛʋ kpɩtaʋ kʋɖʋmʋʋ yaa kpɩtaŋ sakɩyɛ yɔ. Pɩkaɣ yebu se kpɛlɩkʋʋ ɛtaasɩŋ. Pɩkaɣ yebu ɖɔɖɔ nɛ kpɛlɩkɩyʋ ɖiɣzina se kpɛlɩkʋʋ tɔm cɛyaa. Taamaɣzɩ kpa se “ñɛ-kpɛlɩkɩyʋ” ɛkɛnaa nɛ ɛyʋ lɛlʋ ɛɛpɩzɩɣ nɛ ɛkpɛlɩkɩnɩ-ɩ. Ŋsɔɔlaa se piɖeni ñɛ-kpɛlɩkɩyʋ, pʋ-tɔbʋʋ se ŋsɔɔlaa se ewolo pɩ-yɔɔ nɛ ɛkpɛlɩkɩɣ toovenim tɔm.
WƖLƖ SE ŊSƆƆLƖ TƆM NDƲ ŊWƖLƖƔ YƆ NƐ ŊTISIƔ TƖ-YƆƆ
Kɛdɩ ñe-Bibl kpɛlɩkɩyʋ ɛyaa lalaa mba palabɩ lɛɣzɩtʋ pe-wezuu caɣʋ taa yɔ pa-kɩɖaŋ tɔm nɛ pɩsɩnɩ-ɩ nɛ ɛna ɛzɩma pɩwɛɛ se ɛɖɔ tɔm ndʋ ɛkpɛlɩkɩɣ yɔ tɩ-yɔɔ yɔ (Cɔnɩ tayʋʋ 7-9) *
7. Ɛbɛ kaɣ sɩnʋʋ kpɛlɩkɩyʋ nɔɔyʋ nɛ ɛsɔɔlɩ tɔm ndʋ ɛwɛɛ nɛ ɛkpɛlɩkɩɣ yɔ?
7 Pɩcɛyaa se kpɛlɩkɩyʋ ɛna se ŋsɔɔlɩ Bibl taa toovenim tɔm nɛ ña-taa tɛmnɩ-tʋ. (1 Tes. 1:5) Pɩtʋʋ fɛyɩ se pɩkaɣ yebu nɛ ɛsɔɔlɩ tɔm ndʋ ɛwɛɛ nɛ ɛkpɛlɩkɩɣ yɔ nɛ pɩkpaɖɩ. Ye pɩsaŋ yɔ, heyi-i ɛzɩma Bibl paɣtʋ kila yɔɔ ɖɔm sɩnɩ ña-maɣmaɣ yɔ. Pɩkaɣ yebu nɛ eɖiɣzina se lɔŋ tasʋʋ kɩbam wɛ Bibl taa nɛ pɩpɩzɩɣ nɛ pɩwazɩ-ɩ ɖɔɖɔ.
8. (a) Ɛbɛ ɖɔɖɔ ŋpɩzɩɣ ŋla nɛ ŋsɩnɩ ñe-Bibl kpɛlɩkɩyʋ? (b) Nɛ ɛbɛ yɔɔ ŋkaɣ labʋ mbʋ?
8 Alɩwaatʋ ndʋ ña nɛ ñe-Bibl kpɛlɩkɩyʋ ɩkpɛlɩkɩɣ yɔ, heyi-i koobiya lalaa mba pakatɩ kala wena ɛwɛɛ nɛ ɛkatɩɣ yɔ nɛ papɩzɩ nɛ pawabɩ-yɛ yɔ pɔ-tɔm. Ŋŋwoki ɛ-cɔlɔ se ña nɛ ɩ ɩkpɛlɩkɩ lɛ, kpɛndɩnɩ ɛgbɛyɛ taa koobu nɔɔyʋ, weyi ɛ-kɩɖaʋ pɩzɩɣ nɛ kɩwazɩ-ɩ yɔ. Ŋpɩzɩɣ nɛ ŋna kɩɖaŋ kɩbaŋ Feŋuu Tilimiye takayɩsɩ kɩbɩnzɩ taa. Ɩwɛ tɔm ñʋŋ “Bibl lɛɣzɩɣ ɛyaa wezuu caɣʋ” taa. Ŋpɩzɩɣ ɖɔɖɔ nɛ ŋna kɩɖaŋ ɛnɩ ɩ-ɖɔndɩ jw.org * yɔɔ. Tɔm ñʋŋ ɛnɩ nɛ videowaa mba, pakaɣ sɩnʋʋ ñe-Bibl kpɛlɩkɩyʋ nɛ ɛna se Bibl pɩzɩɣ kɩsɩnɩ-ɩ nɛ ɛla lɛɣzɩtʋ e-wezuu caɣʋ taa.
9. Ɛzɩma ŋpɩzɩɣ nɛ ŋseɣti Bibl kpɛlɩkɩyʋ nɔɔyʋ se eheyi tɔm ndʋ ɛkpɛlɩkɩɣ yɔ ɛ-hɔʋ taa ñɩma nɛ ɛ-taabalaa?
9 Ye kpɛlɩkɩyʋ ɛɖɔkɩ nesi yɔ, ɛ-tɛŋga ɖɔɖɔ kpɛlɩkɩɣ yaa we? Ye ɛɛkpɛlɩkɩɣ yɔ, yaa-ɩ se ɛkpɛndɩ mɩ-yɔɔ nɛ mɩ nɛ ɩ ɩkpɛlɩkɩ. Seɣti ñe-Bibl kpɛlɩkɩyʋ se eheyi tɔm ndʋ ɛkpɛlɩkɩɣ yɔ ɛ-hɔʋ taa ñɩma nɛ ɛ-taabalaa. (Yoh. 1:40-45) Ɛzɩma ŋpɩzɩɣ nɛ ŋseɣti-i? Ŋpɩzɩɣ nɛ ŋpɔzɩ-ɩ se: “Ɛzɩma ŋpɩzɩɣ nɛ ŋlɩzɩ toovenim tɔm tʋnɛ tɩ-taa ñɔ-hɔʋ taa mba?” yaa “Mayaɣ ŋga ŋkaɣ labɩnʋʋ tʋmɩyɛ se ŋwɩlɩ toovenim tɔm tʋnɛ ña-taabalʋ nɔɔyʋ?” Ye ŋlakɩ mbʋ yɔ, ŋkaɣ falɩsʋʋ ñe-Bibl kpɛlɩkɩyʋ se ɛpɩsɩ wɩlɩyʋ. Nɛ alɩwaatʋ ndʋ ɛmʋʋna yɔ, ɛpɩzɩɣ nɛ ɛpɩsɩ tɔm susuyu weyi patɩmɩyɩsɩtɩ-ɩ lɩm yɔ. Ŋpɩzɩɣ nɛ ŋpɔzɩ kpɛlɩkɩyʋ nɛ ŋna se ɛsɩm ɛyʋ nɔɔyʋ nɛ ɛlɛ sɔɔlaa se ɛkpɛlɩkɩ Bibl? Ye ɛsɩm nɔɔyʋ yɔ, ñaɣ pana nɛ ŋtɩlɩ ɛyʋ ɛnʋ lɛɛ lɛɛ nɛ ŋheyi-i se ŋsɔɔlaa se ña nɛ ɩ ɩkpɛlɩkɩ Bibl. Wɩlɩ-ɩ Ɛzɩma ɖɩkpɛlɩkɩɣnɩ ɛyaa Bibl? * tɛ video.
SEƔTI BIBL KPƐLƖKƖYƲ SE ƐÐƲ TAABALƖYƐ NƐ ƐGBƐYƐ TAA ÑƖMA
Seɣti Bibl kpɛlɩkɩyʋ se ɛɖʋ taabalɩyɛ nɛ ɛgbɛyɛ taa ñɩma (Cɔnɩ tayʋʋ 10-11) *
10. Ɛzɩ pɔyɔɔdʋʋ 1 Tesalooniiki mba 2:7, 8 taa yɔ, ɛzɩma wɩlɩyʋ nɔɔyʋ pɩzɩɣ nɛ ɛmaɣzɩnɩ Pɔɔlɩ kɩɖaʋ?
10 Pɩwɛɛ se wɩlɩyaa ɩmaɣzɩ pɛ-kpɛlɩkɩyaa yɔɔ. Kpaɣ-wɛ ɛzɩ mba pakaɣ pɩsʋʋ ño-koobiya fezuu taa yɔ. (Kalɩ 1 Tesalooniiki mba 2:7, 8.) Pɩfɛyɩ-wɛ kɛlɛʋ se pɛcɛ taabalɩyɛ nɖɩ ɖɩwɛ pa nɛ ɛjaɖɛ yɔɔ mba pɛ-hɛkʋ taa yɔ nɛ pala lɛɣzɩtʋ ndʋ tɩ-tɔm cɛyaa yɔ tɩ-tɩŋa nɛ pɩsa nɛ pɛsɛɛ Yehowa. Pɩpɔzʋʋ se ɖɩsɩnɩ-wɛ nɛ pehiɣ taabalaa kɩbama ɛgbɛyɛ taa. Pɩtasɩna se ŋwoki ñe-Bibl kpɛlɩkɩyʋ cɔlɔ nɛ ɩkpɛlɩkɩɣ Bibl lɛ, kpakɩɣ alɩwaatʋ lɛɛtʋ nɛ ña nɛ ɩ ɩcakɩ se pɩsa nɛ ŋɖʋ-ɩ nɛ taabalɩyɛ. Ye ŋyaɣ-ɩ kaŋgalaafu yɔɔ, ŋtiyiɣni-i message waa nɛ ŋwoki nɛ ŋnaɣ-ɩ alɩwaatʋ lɛɛtʋ yɔɔ yɔ, piyeki nɛ eɖiɣzina se toovenim taa lɛ, ŋmaɣzɩɣ ɛ-yɔɔ.
11. (a) Ɛbɛ ɖɩsɔɔlaa se ɖe-Bibl kpɛlɩkɩyaa ihiɣ ɛgbɛyɛ taa? (b) Nɛ ɛbɛ yɔɔ?
11 Ðoŋ ɖoŋ lɛ pɔyɔɔdʋʋ se: “Pɩtɩkɛ ɛyʋ kʋɖʋm tɩnɩ pɩɣa.” Ðɩpɩzɩɣ nɛ ɖɩyɔɔdɩ se: “Pɩtɩkɛ ɛyʋ kʋɖʋm tɩnɩ tɔmkpɛlɩkɩyʋ.” Pʋyɔɔ wɩlɩyaa mba pɛwɛ niye yɔ, pasɩɣnɩ pe-Bibl kpɛlɩkɩyaa se patɩlɩ ɛgbɛyɛ taa ñɩma lalaa mba papɩzɩɣ nɛ pɛwɛɛnɩ ɖoŋ kɩbaŋ pɔ-yɔɔ yɔ. Pɩpɩzɩɣ piyele nɛ kpɛlɩkɩyaa sɔɔlɩ se pɛkpɛndɩ Ɛsɔ samaɣ yɔɔ, nɛ koobiya pɩzɩɣ nɛ pasɩnɩ-wɛ fezuu taa, nɛ alɩwaatʋ ndʋ pakatɩɣ kala yɔ. Ðɩsɔɔlaa se paa ɖe-Bibl kpɛlɩkɩyʋ weyi lɛ, ɛtɩlɩ se ɛkɛ ɛgbɛyɛ taa tʋ nɛ ɛwɛnɩ lone ɖe-fezuu taa hɔʋ taa. Ðɩsɔɔlaa se ɛñɔtɩnɩ ɛjaɖɛ kpeekpe yɔɔ koobiya hɔʋ ŋgʋ kɩ-taa sɔɔlɩm wɛɛ yɔ. Pɩkaɣ yebu nɛ pɩwɛɛ-ɩ kɛlɛʋ se ɛcɛ taabalɩyɛ nɖɩ ɖɩwɛ ɛ nɛ ɛyaa mba paasɩɣnɩ-ɩ se ɛsɔɔlɩ Yehowa yɔ pɛ-hɛkʋ taa yɔ. (Adu. 13:20) Ye ɛ-taabalaa kɩbɩma ikizi-i yɔ, ɛkaɣ naʋ se ɛpɩzɩɣ nɛ ehiɣ taabalaa kɩbama Yehowa ɛgbɛyɛ taa.—Mark. 10:29, 30; 1 Pɩy. 4:4.
ÑƖƔ NIYE TƖ HAƲ NƐ LƖM MƖYƖSƲƲ KAÐƲWA YƆƆ
Bibl kpɛlɩkɩyʋ weyi ɛsɔɔlɩ tɔm ndʋ ɛkpɛlɩkɩɣ yɔ, ɛpɩzɩɣ nɛ ɛtalɩ lɩm mɩyɩsʋʋ kaɖʋwa ye ɛkpɛzɩɣ nɩŋgbanzɩ nasɩyɩ yɔ! (Cɔnɩ tayʋʋ 12-13)
12. Ɛbɛ yɔɔ pɩwɛɛ se ɖiheyiɣ ɖe-Bibl kpɛlɩkɩyʋ tɩ haʋ nɛ lɩm mɩyɩsʋʋ tɔm?
12 Pɩwɛɛ se ɖoŋ ɖoŋ lɛ, ŋyɔɔdʋʋ ɛzɩma pɩcɛyaa se ɛyʋ ɛha ɛ-tɩ Yehowa nɛ pamɩyɩsɩ-ɩ lɩm yɔ pɩ-tɔm. Lɩmaɣzɩyɛ nɖɩ ɖɩ-yɔɔ ɖɩkpɛlɩkɩɣnɩ ɛyʋ nɔɔyʋ Bibl yɔ, nɖɩ lɛ se ɖɩsɩnɩ-ɩ nɛ ɛsɛɛ Yehowa nɛ pamɩyɩsɩ-ɩ lɩm. Nɔɔyʋ paɣzɩɣ Bibl kpɛlɩkʋʋ ɖoŋ ɖoŋ nɛ pɩla fenasɩ cabɩ, nɛ kɔzɩ kɔzɩ ɛpaɣzɩɣ kediɣzisi kɔm lɛ, pɩwɛɛ se ɛnɩɩ pɩ-taa se kpɛlɩkʋʋ mbʋ pɩ-kaɖʋwa lɛ se pɩsɩnɩ-ɩ nɛ ɛpaɣzɩ Yehowa sɛʋ nɛ ɛpɩsɩ Ɛ-Aseɣɖe Tʋ.
13. Nɩŋgbanzɩ nzɩ pɩpɔzʋʋ se kpɛlɩkɩyʋ ɛkpɛzɩ nɛ pɩsa pamɩyɩsɩ-ɩ lɩm?
13 Bibl kpɛlɩkɩyʋ weyi ɛsɔɔlaa se ɛha ɛ-tɩ nɛ pamɩyɩsɩ-ɩ lɩm yɔ, nɩŋgbanzɩ sakɩyɛ wɛɛ, nɛ pɩpɔzʋʋ se ɛkpɛzɩ-sɩ. Kajalaɣ lɛ, pɩpɔzʋʋ se kpɛlɩkɩyʋ ɛtɩlɩ Yehowa nɛ ɛsɔɔlɩ-ɩ nɛ ɛwɛɛnɩ tisuu ɛ-yɔɔ. (Yoh. 3:16; 17:3) Pʋwayɩ lɛ, pɩpɔzʋʋ se ɛɖʋ taabalɩyɛ nɛ Yehowa nɛ ɛgbɛyɛ taa koobiya ɖɔɖɔ. (Ebr. 10:24, 25; Yak. 4:8) Alɩwaatʋ wɛɣ nɛ tɩɖɛɣ lɛ, pɩpɔzʋʋ se kpɛlɩkɩyʋ ekizi lakasɩ kɩdɛkɛdɩsɩ nɛ ekpiɖi ɛ-kɩwɛɛkɩm yɔɔ. (Tʋma 3:19) Pɩtasɩ lɛ, pɩpɔzʋʋ se eheyi lalaa mbʋ pɩ-yɔɔ etisiɣ lɛɛlɛɛyɔ yɔ pɩ-tɔm. (2 Kɔr. 4:13) Pʋwayɩ lɛ, pɩpɔzʋʋ se ɛha ɛ-tɩ Yehowa nɛ eyele nɛ pamɩyɩsɩ-ɩ lɩm nɛ pɩwɩlɩ se ɛha ɛ-tɩ Ɛsɔ. (1 Pɩy. 3:21; 4:2) Nɛ lɩm mɩyɩsʋʋ evemiye kɛnɩ taa leleŋ evemiye paa anɩ! Alɩwaatʋ ndʋ kpɛlɩkɩyʋ kpɛzɩɣ nɩŋgbanzɩ nzɩ pɩpɔzʋʋ se ɛkpɛzɩ nɛ pamɩyɩsɩ-ɩ lɩm yɔ, wolo pɩ-yɔɔ nɛ ŋsaŋɩ-ɩ. Nɛ seɣti-i se ewolo pɩ-yɔɔ nɛ ɛkpɛzɩɣ nɩŋgbanzɩ nzɩ.
TAZƖƔ ÐOŊ ÐOŊ NƐ ŊNAƔ ƐZƖMA KPƐLƖKƖYƲ ÐƐƔNƖ ƐSƖNDAA YƆ
14. Ɛzɩma wɩlɩyʋ nɔɔyʋ pɩzɩɣ nɛ ɛtazɩ nɛ ɛna ɛzɩma kpɛlɩkɩyʋ ɖɛɣnɩ ɛsɩndaa yɔ?
14 Alɩwaatʋ ndʋ ɖɩsɩɣnɩ kpɛlɩkɩyʋ nɔɔyʋ se ɛɖɛɛnɩ ɛsɩndaa nɛ ɛha ɛ-tɩ nɛ pamɩyɩsɩ-ɩ lɩm yɔ, pɩpɔzʋʋ se ɖɩwɛɛ suuɖu. Ɛlɛ, pɩpɔzʋʋ ɖɔɖɔ se ɖɩtazɩ nɛ ɖɩna se ɛsɔɔlaa se ɛsɛɛ Yehowa yaa we. Ŋnaɣ yʋsasɩ nasɩyɩ nɛ sɩwɩlɩɣ se kpɛlɩkɩyʋ wɛɛ nɛ ɛñakɩ pana se ɛɖɔ Yesu paɣtʋ yɔɔ? Yaa Bibl taa tɔm kɩbandʋ ɛsɔɔlaa se ɛkpɛlɩkɩ yem?
15. Ɛbɛ kaɣ yebu nɛ wɩlɩyʋ nɔɔyʋ ɖiɣzina se kpɛlɩkɩyʋ nɔɔyʋ mʋnaa se pamɩyɩsɩ-ɩ lɩm?
15 Ðoŋ ɖoŋ lɛ, maɣzɩ nɛ ŋna se kpɛlɩkɩyʋ wɛɛ nɛ ɛɖɛɣnɩ ɛsɩndaa yaa we. Ɛyɔɔdʋʋ lɩmaɣza wena ɛwɛnɩ Yehowa yɔɔ yɔ a-tɔm na? Ɛtɩmɩɣnɩ Yehowa? (Keɣa 114:1, 2) Ɛsɔɔlɩ Bibl kalʋʋ na? (Keɣa 118:97) Ɛkɔŋ kediɣzisi ɖoŋ ɖoŋ? (Keɣa 21:23) Ɛlabɩ lɛɣzɩtʋ ndʋ pɩpɔzʋʋ yɔ e-wezuu caɣʋ taa? (Keɣa 118:112) Ɛpaɣzɩ heyuu ɛ-hɔʋ taa ñɩma nɛ ɛ-taabalaa tɔm ndʋ ɛkpɛlɩkɩɣ yɔ? (Keɣa 9A:2) Kɔzɩ kɔzɩ lɛ, ɛsɔɔlaa se ɛpɩsɩ Yehowa Aseɣɖe Tʋ na? (Keɣa 39:9) Ye kpɛlɩkɩyʋ ɛɛɖɛɣnɩ ɛsɩndaa hɔɔlɩŋ ɛnɩ ɩ-taa nakʋyʋ taa yɔ, pɔzɩ-ɩ nɛ lɛɣtʋ nɛ ŋtɩlɩ mbʋ pʋyɔɔ yɔ; nɛ pʋwayɩ lɛ, ña nɛ ɩ ɩyɔɔdɩ pɩ-tɔm. Yɔɔdɩnɩ-ɩ nɛ nɔɔ kɩbaŋa, ɛlɛ heyi-i toovenim. *
16. Alɩwaatʋ ndʋ pɩpɔzʋʋ se ŋyele nɔɔyʋ kpɛlɩkɩnʋʋ?
16 Nabʋyʋ taa lɛ, maɣzɩ nɛ ŋna se pɩpɔzʋʋ se ŋwolo pɩ-yɔɔ nɛ ŋkpɛlɩkɩɣnɩ nɔɔyʋ yaa pɩwɛɛ se ŋyebi-i kpɛlɩkɩnʋʋ. Pɔzɩ ña-tɩ se: ‘Ɛzɩ kpɛlɩkɩyʋ ñɔɔzʋʋ kpɛlɩkʋʋ na? Ɛzɩ ɛtɩsɔɔlɩ se ɛkɔɔ kediɣzisi na? Eyebi ɛ-wɛtʋ kɩdɛkɛdɩtʋ na? Ɛzɩ ɛlɩ cɛtɩm Ɛsɔ sɛtʋ ɛgbɛyɛ nɖɩ ɖɩ-taa ɛɛwɛɛ yɔ?’ Ye ŋcosi tɔm ndʋ tɩ-yɔɔ se aayɩ nɛ ŋwolo pɩ-yɔɔ nɛ ŋkpɛlɩkɩɣnɩ ɛyʋ ɛnʋ yɔ, pɩwɛɣ ɛzɩ ŋwɛɛ nɛ ŋñakɩ pana se ŋwɩlɩ nɔɔyʋ lɩm yaʋ; ŋgʋ pʋdʋ ɛnʋ ɛtɩsɔɔlɩ se lɩm etukuni-i. Ye kpɛlɩkɩyʋ ɛtɩsɔɔlɩ tɔm ndʋ ɛkpɛlɩkɩɣ yɔ siŋŋ nɛ ɛtɩsɔɔlɩ se ɛla lɛɣzɩtʋ yɔ, pɩwɛɣ ɖeu se ŋyebi-i kpɛlɩkɩnʋʋ.
17. Ɛzɩ 1 Timootee 4:16 yɔɔdʋʋ yɔ, ɛbɛ pɩpɔzʋʋ se Bibl wɩlɩyaa tɩŋa ɩla?
17 Kpɛlɩkɩyaa labʋ tʋmɩyɛ nɖɩ paɖʋ-ɖʋ yɔ, ɖɩ-tɔm cɛyɩ ɖɛ-ɛsɩndaa siŋŋ, nɛ ɖɩsɔɔlaa se ɖɩsɩnɩ ɖe-Bibl kpɛlɩkɩyaa nɛ pɛɖɛɛnɩ ɛsɩndaa nɛ pamɩyɩsɩ-wɛ lɩm. Pʋyɔɔ lɛ, ɖɩkaɣ tɩŋnʋʋ Bibl yɔɔ se ɖɩwɩlɩ tɔm, nɛ ɖɩkaɣ wɩlʋʋ se ɖɩsɔɔlɩ tɔm ndʋ ɖɩwɩlɩɣ yɔ nɛ ɖa-taa tɛmnɩ-tʋ. Ðɩkaɣ seɣtuu kpɛlɩkɩyʋ se ɛɖʋ taabalɩyɛ nɛ ɛgbɛyɛ taa ñɩma. Nɛ ɖɩkaɣ ñɩɣʋ niye tɩ haʋ nɛ lɩm mɩyɩsʋʋ kaɖʋwa yɔɔ, nɛ ɖɩtazɩɣ ɖoŋ ɖoŋ nɛ ɖɩnaɣ ɛzɩma kpɛlɩkɩyʋ ɖɛɣnɩ ɛsɩndaa yɔ. (Kalɩ aɖakaɣ “ Mbʋ pɩwɛɛ se wɩlɩyaa ɩla nɛ pasɩnɩ Bibl kpɛlɩkɩyaa nɛ pɛɖɛɛnɩ ɛsɩndaa nɛ pamɩyɩsɩ-wɛ lɩm yɔ,” kɛwɛ hɔɔlʋʋ 13 yɔɔ.) Ða-taa wɛ leleŋ se ɖɩpɩzɩɣ nɛ ɖɩɖʋ nesi ñʋʋ yabɩtʋ tʋmɩyɛ nɖɩ! Tɛtɛ nɛ ɖɩtɛ ɖa-taa se ɖɩlakɩ ɖo-ɖoŋ ɖeɖe nɛ ɖɩsɩnɩ ɖe-Bibl kpɛlɩkɩyaa nɛ pɛɖɛɛnɩ ɛsɩndaa nɛ pamɩyɩsɩ-wɛ lɩm.
HENDU 79 Wɩlɩ-wɛ nɛ pɔɖɔkɩ kpam
^ tay. 5 Alɩwaatʋ ndʋ ɖɩkpɛlɩkɩɣnɩ ɛyaa Bibl yɔ, ɖɩwɛnɩ waɖɛ se ɖɩsɩnɩ-wɛ nɛ patɩlɩ ɛzɩma Yehowa sɔɔlaa se pamaɣzɩ, nɛ mbʋ ɛsɔɔlaa se pala yɔ. Tɔm ñʋʋ kʋnɛ, kɩkaɣ-ɖʋ tasʋʋ wɩlʋʋ mbʋ ɖɩpɩzɩɣ ɖɩla nɛ ɖɩwɛɛ niye tɔm wɩlʋʋ taa nɛ pɩkpaɖɩ yɔ.
^ tay. 4 Kalɩ tɔm ñʋʋ “Wɛɛ lɛɣtʋ alɩwaatʋ ndʋ ŋkpɛlɩkɩɣ nɔɔyʋ Bibl yɔ,” kɩwɛ septembre 2016 tɛ Ðe-wezuu caɣʋ nɛ ɖɛ-Ɛsɔ sɛtʋ tʋmɩyɛ kpɛlɩkʋʋ takayaɣ taa.
^ tay. 8 Wolo QUI SOMMES-NOUS? > TEMOIGNAGES ET ANECDOTES > LA BIBLE TRANSFORME DES VIES taa.
^ tay. 9 Wolo JW Library® taa, hɔɔlʋʋ MULTIMEDIA > NOS REUNIONS ET NOTRE MINISTERE > OUTILS POUR LA PREDICATION taa.
^ tay. 15 Kalɩ tɔm ñʋŋ “Sɔɔlɩm nɛ ɛsɩmɩyɛ nɖɩ ŋwɛnɩ Yehowa yɔɔ yɔ, piseɣtiɣ-ŋ se ŋha ña-tɩ nɛ pamɩyɩsɩ-ŋ lɩm” nɛ “Ŋtalaa se pamɩyɩsɩ-ŋ lɩm na?” Ɩwɛ mars 2020 tɛ Feŋuu Tilimiye takayaɣ taa.
^ tay. 77 KƖLƐMƖŊ YƆƆ TƆM: Koobu halɩñɩnʋ weyi ɛwɛ niye tɔm wɩlʋʋ taa yɔ nɛ koobu halɩñɩnʋ lɛlʋ pɛkpɛlɩkɩnɩ ɛlɛ tɛ kpɛlɩkɩyʋ Bibl nɛ pɩtɛ lɛ, weyi ɛwɛ niye yɔ ɛwɛɛ nɛ ɛsɩɣnɩ-ɩ se ɛtɩlɩ ɛzɩma ɛtaakɩlɩ yɔɔdʋʋ kpɛlɩkʋʋ alɩwaatʋ taa yɔ.
^ tay. 79 KƖLƐMƖŊ YƆƆ TƆM: Kpɛlɩkʋʋ alɩwaatʋ taa, kpɛlɩkɩyʋ wɛɛ nɛ ɛkpɛlɩkɩɣ ɛzɩma ɛkɛ halʋ kɩbanʋ yɔ. Pʋwayɩ, ɛwɛɛ nɛ eheyiɣ ɛ-walʋ tɔm ndʋ ɛkpɛlɩkaa yɔ.
^ tay. 81 KƖLƐMƖŊ YƆƆ TƆM: Kpɛlɩkɩyʋ ɛnʋ nɛ ɛ-walʋ powobi taabalaa mba ɛkatɩ Kewiyaɣ Kpaaŋ taa yɔ, pa-taa lɛlʋ tɛ nɛ pɛkpɛndɩ panɩɣ leleŋ.
