PAA pɩnaɣ ŋga lɛ, heŋ sakɩyɛ pɩsɩɣ Krɩstʋ ɛgbɛyɛ taa. Heŋ ɛnɩ ɩmʋ ñɩm pɩdɩɩfɛyɩ. Maɣzɩ nɛ ŋna ɛzɩma “taa leleŋ wɛɣ ɛsɔdaa” siŋŋ alɩwaatʋ ndʋ ɩ-taa paa weyi lɛ ɛpɩsɩɣ yɔ. (Luka 15:7, 10) Ye ŋpɩsɩ ɛgbɛyɛ taa yɔ, ña-taa pɩzɩɣ nɛ pɩtɛ se Yesu, Ɛsɔ tiyiyaa, nɛ Yehowa maɣmaɣ pa-taa wɛ leleŋ siŋŋ. Ɛlɛ, alɩwaatʋ ndʋ ŋwɛɣ nɛ ŋñɔɔzʋʋ ña nɛ Yehowa mɩ-taabalɩyɛ yɔ, ŋpɩzɩɣ nɛ ŋkatɩ kala. Kala ana a-taa naayɛ lɛ wena? Nɛ ɛbɛ pɩzɩɣ nɛ pɩsɩnɩ-ŋ?

Koobiya sakɩyɛ pɩsɩɣ ɛgbɛyɛ taa nɛ pɩtɛ lɛ, palʋkɩnɩ lɩmaɣza kɩdɛkɛda. Pɩtɩla, ŋnɩɣ ɛzɩma pɩɩlabɩ Wiyaʋ Daviid yɔ pɩ-taa. Pekpeɣ-i ɛ-kɩwɛɛkɩm nɛ pɩtɛ lɛ, ɛyɔɔdaa se: ‘Man-kɩwɛɛkɩm hu mɔ-yɔɔ.’ (Keɣa 40:12; nwt; 64:4) Nɔɔyʋ pɩsɩɣ Yehowa cɔlɔ nɛ pɩtɛ lɛ, ɛ-ɛhʋyɛ pɩzɩɣ nɛ ɖɩkʋʋ ɛ-tɔm yaa fɛyɛ pɩzɩɣ nɛ pɩkpaɣ-ɩ pɩnzɩ sakɩyɛ. Paalɩzɩ Isabelle ɛgbɛyɛ taa nɛ pɩcɛzɩ pɩnzɩ 20 yɔɔ. * Ɛyɔɔdaa se: “Pɩɩwɛ-m kaɖɛ kpem se mentisi se Yehowa pɩzɩɣ nɛ ekpeɣ-m.” Ye pitibi-ŋ yɔɔɔ yɔ, pɩpɩzɩɣ piyele nɛ ŋɖaɣnɩ hɛʋ fezuu taa. (Adu. 24:10) Ñaɣ pana nɛ pɩtaatalɩ-ŋ mbʋ.

Ɛyaa lalaa lɛ, sɔɔndʋ kpaɣ-wɛ se pɩtɩla paakaɣ pɩzʋʋ nɛ pala mbʋ payɩ pɩpɔzʋʋ se pala nɛ taabalɩyɛ kɩbanɖɛ ɖaɣnɩ wɛʋ pa nɛ Yehowa pɛ-hɛkʋ taa yɔ. Antoine pɩsɩ ɛgbɛyɛ taa nɛ pɩtɛ lɛ, ɛyɔɔdaa se: “Pɩlakaɣ-m ɛzɩ mbʋ maakpɛlɩkaa yaa mbʋ malakaɣ alɩwaatʋ ndʋ maakɛ Yehowa Aseɣɖe Tʋ yɔ, mɔnsɔ pɩ-taa sakɩyɛ yɔɔ yɔ.” Mbʋ pɩlakɩ ɛyaa nabɛyɛ; nɛ pʋyɔɔ lɛ sɔɔndʋ pɩzɩɣ nɛ pɩkpa-wɛ se paɖʋ nesi fezuu taa tʋma kiya.

Kɩɖaʋ nakʋyʋ yɔ. Ye helim sɔsɔm nabʋyʋ ɛmaba nɛ pɩyɔkɩ ɛyʋ nɔɔyʋ ɖɩɣa yɔ, ɛmaɣzɩɣ alɩwaatʋ nɛ tʋmɩyɛ nɖɩ pɩkaɣ-ɩ pɔzʋʋ se ɛla nɛ ɛɖaɣnɩ maʋ ɖɩɣa ŋga yɔ pɩ-yɔɔ lɛ, pɩpɩzɩɣ nɛ pitibi-i yɔɔɔ. Mbʋ ɖɔɖɔ, ye ŋlabɩ kɩwɛɛkɩm  sɔsɔm nabʋyʋ nɛ pɩwɛɛkɩ ña nɛ Yehowa mɩ-taabalɩyɛ yɔ, ŋpɩzɩɣ nɛ ŋmaɣzɩ se pʋcɔ nɛ ŋɖaɣnɩ kpaʋ ɖoŋ fezuu taa lɛ, pɩkaɣ pɔzʋʋ se ŋñaɣ pana siŋŋ. Ɛlɛ pɩtɩkɛ ña-maɣmaɣ ño-ɖoŋ taa ɖeke ŋkaɣ pɩzʋʋ nɛ ŋla mbʋ.

Yehowa yaɣ-ɖʋ nɛ ɛtɔŋ se: “Ɩkɔɔ ɖɩhʋʋ [yaa ɖɩñɔɔzɩ] tɔm.” (Iza. 1:18) Ŋtɛm ñaɣʋ pana siŋŋ nɛ ‘ŋñɔɔzɩ tɔm.’ Yehowa sɔɔlɩ-ŋ ña-pana ñaɣʋ mbʋ pʋyɔɔ. Maɣzɩ pazɩ nɛ ŋna: Ŋpɩsɩ Yehowa cɔlɔ nɛ pʋyɔɔ lɛ, ɛpɩzɩɣ nɛ ɛtɩŋnɩ ña-kɩɖaʋ yɔɔ nɛ ɛwɩlɩ se Eleeu kɛ cɛtɩyʋ.—Adu. 27:11.

Ŋpɩsʋʋ Yehowa cɔlɔ yɔ, pɩwɩlɩɣ se ŋtɛmɩ-ɩ ñɔtɩnʋʋ, nɛ ɛlabɩ tamaɣ se ɛñɔtʋʋnɩ-ŋ ɖɔɖɔ. (Yak. 4:8) Ɛlɛ paa ɛyaa lalaa eɖiɣzinaa se ŋɖaɣnɩ pɩsʋʋ koobu yɔ, pi-ɖeke pɩtɩmaɣ. Pɩpɔzʋʋ se ŋwolo pɩ-yɔɔ nɛ ŋcɛyɩsɩɣ sɔɔlɩm mbʋ ŋwɛnɩ ña-Caa nɛ ña-Taabalʋ Yehowa yɔɔ yɔ. Ɛzɩma ŋpɩzɩɣ nɛ ŋla mbʋ?

Ñaɣ pana nɛ ŋɖʋ ña-tɩ kaɖʋsɩ nzɩ ŋpɩzɩɣ nɛ ŋtalɩ yɔ. Pʋtɔma yɔ, ŋɖiɣni tɔzʋʋ tɔm ndʋ ŋkpɛlɩkɩ Yehowa nɛ Paradisuu tamaɣ ŋga ɛlaba yɔ pɔ-yɔɔ yɔ, tɩ-yɔɔ. Ɛlɛ lɛɛlɛɛyɔ, pɩpɔzʋʋ se ŋɖaɣnɩ labʋ ɖʋtʋ kɩbandʋ. Tɩ-taa natʋyʋ lɛ se pɩwɛɛ se ŋsusuu tɔm ɖoŋ ɖoŋ, ŋwoki kediɣzisi, nɛ ŋkpakɩɣ alɩwaatʋ nɛ ña nɛ ño-koobiya ɩcakɩ. Maɣzɩ kaɖʋsɩ nzɩ sɩkɔŋ yɔ sɩ-yɔɔ nɛ ŋna.

Yɔɔdʋʋnɩ Yehowa ɖoŋ ɖoŋ. Ña-Caa nɩɣ pɩ-taa se ye ñɛ-ɛhʋyɛ ewobi pɩ-yɔɔ nɛ ɖɩkʋʋ ñɔ-tɔm kɩwɛɛkɩm mbʋ ŋlaba nɛ pɩɖɛɛ yɔ pɩ-yɔɔ yɔ, pɩpɩzɩɣ piyele nɛ pɩwɛ-ŋ kaɖɛ se ŋtɩmnɩ-ɩ. (Roma 8:26) Paa mbʋ yɔ, ‘wɛɛ adɩma yɔɔ tam.’ Heyi Yehowa se ŋsɔɔlɩ siŋŋ se ŋɖʋ-ɩ nɛ taabalɩyɛ. (Roma 12:12) Andrej yɔɔdaa se: “Mɛ-ɛhʋyɛ kʋwaɣ mɔn-tɔm siŋŋ nɛ fɛyɛ kpaɣaɣ-m. Ɛlɛ, paa ɛzɩmtaa mantɩmɩɣ nɛ pɩtɛ lɛ, ma-laŋɩyɛ hɛɣ. Mehikaɣ laŋhɛzɩyɛ ma-maɣzɩm taa nɛ pɩkɩlɩɣ.” Ye ŋŋsɩŋ se tɔm ndʋ pɩwɛɛ se ŋyɔɔdɩ ña-adɩma taa yɔ, maɣzɩ adɩma wena Wiyaʋ Daviid laba alɩwaatʋ ndʋ ekpiɖi ɛ-kɩwɛɛkɩm yɔɔ yɔ a-yɔɔ. Pama-yɛ Keɣa 50 nɛ 64 taa.

Kpɛlɩkɩɣ Bibl ɖoŋ ɖoŋ. Ye ŋlakɩ mbʋ yɔ, pɩkaɣ-ŋ sɩnʋʋ nɛ ŋwɛɛnɩ tisuu sɔsɔm nɛ pɩkaɣ-ŋ sɩnʋʋ ɖɔɖɔ nɛ sɔɔlɩm mbʋ ŋwɛnɩ Yehowa yɔɔ yɔ pɩpaɣlɩ. (Keɣa 18:8-12) Felipe yɔɔdaa se: “Mantaasɩɣ fezuu taa tʋma kajalaɣ lone taa, mbʋ kaayebina nɛ mɛhɛɛ fezuu taa nɛ manɖʋ Yehowa ɖɩwɩzɩyɛ. Mantaasɔɔlɩ se manɖaɣnɩ labʋ kɩwɛɛkɩm mbʋ nabʋlɛ ɖeɖe, pʋyɔɔ maakpaɣ lɩmaɣzɩyɛ se mɛnkpɛlɩkɩɣ man-tɩ yɔɔ nɛ pɩkandɩyɩ mɔ-yɔɔ.” Ña ɖɔɖɔ ŋpɩzɩɣ nɛ ŋla mbʋ. Ye ŋsɔɔlaa se pasɩnɩ-ŋ nɛ ŋlɩzɩ tɔm ñʋŋ kɩbaŋ weyi ŋpɩzɩɣ nɛ ŋlabɩnɩ tʋmɩyɛ ña-tɩ yɔɔ kpɛlɩkʋʋ alɩwaatʋ taa yɔ, ŋpɩzɩɣ nɛ ŋpɔzɩ ña-taabalʋ weyi ɛ nɛ Yehowa pa-taabalɩyɛ cɛyɩsaa yɔ se ɛsɩnɩ-ŋ.

Yele nɛ taabalɩyɛ ɖaɣnɩ wɛʋ ña nɛ ño-koobiya mɩ-hɛkʋ taa. Ɛyaa mba papɩsɩɣ ɛgbɛyɛ taa yɔ, sɔɔndʋ kpaɣ pa-taa nabɛyɛ se ɛyaa lalaa kaɣ wɛnʋʋ lɩmaɣza kɩdɛkɛda pɔ-yɔɔ. Larissa yɔɔdaa se: “Fɛyɛ kpaɣaɣ-m siŋŋ. Mamaɣzaɣ se malɩ ɛgbɛyɛ wayɩ. Maawɛnɩ lɩmaɣza ana alɩwaatʋ sakɩyɛ.” Ña-taa ɛtɛ se ɛgbɛyɛ taa ɛzʋtʋyaa nɛ Krɩstʋ ñɩma lalaa mba papɩ fezuu taa yɔ, pɔsɔɔlaa se pasɩnɩ-ŋ nɛ ŋñɔɔzɩ ña nɛ Yehowa mɩ-taabalɩyɛ. (Kalɩ aɖakaɣ “Ɛbɛ ɛgbɛyɛ taa ɛzʋtʋyaa pɩzɩɣ nɛ pala?”) Pa-taa wɛ leleŋ siŋŋ se ŋpɩsaa nɛ pɔsɔɔlaa se ña-taa ɛla leleŋ!—Adu. 17:17.

Ɛbɛ pɩzɩɣ pɩsɩnɩ-ŋ nɛ ŋñɔtɩnɩ ɛgbɛyɛ kpam? Ðʋ nesi mbʋ ño-koobiya wɛɛ nɛ palakɩ yɔ kiya; pʋ-tɔbʋʋ lɛ se pɩwɛɛ se ŋwoki kediɣzisi nɛ ŋsusuu tɔm ɖoŋ ɖoŋ. Ye ŋlakɩ mbʋ yɔ, ɛzɩma pɩkaɣ-ŋ sɩnʋʋ? Felix yɔɔdaa se: “Ɛgbɛyɛ taa koobiya kaaɖaŋ kpam se manpɩsɩ. Menɖiɣzinaa se pɔsɔɔlɩ-m. Pa-tɩŋa pasɩnɩ-m nɛ mana se manɖaɣnɩ wɛnʋʋ lone ɛgbɛyɛ taa, se Yehowa kpeɣ-m man-kɩwɛɛkɩm, nɛ se manpɩzɩɣ mowolo pɩ-yɔɔ nɛ mɛnsɛɣ Yehowa.”—Kalɩ aɖakaɣ “ Ɛbɛ ŋpɩzɩɣ nɛ ŋla?”

Alɩwaatʋ ndʋ ŋwɛɣ nɛ ŋñɔɔzʋʋ ña nɛ Yehowa mɩ-taabalɩyɛ yɔ, Sataŋ kaɣ wobu pɩ-yɔɔ nɛ ɛkɔŋnɩ ñɔ-yɔɔ kala se eyele nɛ pitibi-ŋ yɔɔɔ. (Luka 4:13) Tɛ ña-taa se ŋcɛyɩsɩɣ ña nɛ Yehowa mɩ-taabalɩyɛ lɛɛlɛɛyɔ.

Yehowa yɔɔdaɣ e-heŋ tɔm lɛ, ɛlabɩ tamaɣ se: “Kpɩnɛ nɖɩ ɖiileba yɔ, mankaɣ-ɖɩ ñɩnʋʋ, nɖɩ ɖiisewa yɔ, mankaɣ-ɖɩ pɩsɩnʋʋ, nɛ nɖɩ pɩɩpɛlɩ-ɖɩ yɔ, mankaɣ-ɖɩ tam kpazaɣ nɛ nɖɩ ɖɩɩkɛ ɛjam yɔ, mankaɣ-ɖɩ ɖoŋ kpazʋʋ.” (Ezek. 34:16) Yehowa sɩnɩ ɛyaa sakɩyɛ nɛ pɔñɔɔzɩ pa nɛ ɩ pa-taabalɩyɛ. Ña-taa ɛtɛ se ɛsɔɔlaa se ɛsɩnɩ-ŋ nɛ ŋwolo pɩ-yɔɔ nɛ ŋñɔɔzʋʋ ña nɛ ɩ mɩ-taabalɩyɛ nɛ ɖɩcɛyɩsɩ nɛ pɩkɩlɩ.