1. Ɛbɛ yɔɔ ɛyaa sakɩyɛ ñʋŋ taa sidaa?

SƆNƆ, Ɛsɔ sɛtʋ agbaa wena ayɔɔdʋʋ se akɛ Krɩstʋ ñɩma nɛ asɛɣ Ɛsɔ ɛzɩ ɛlɛ sɔɔlʋʋ yɔ aɖɔ sakɩyɛ. Pɩɩlakɩ piti se pisidi ɛyaa sakɩyɛ ñʋŋ taa! Pɔpɔzʋʋ se: “Ɛzɩ toovenim Ɛsɔ sɛtʋ ɛgbɛyɛ kʋɖʋmɖɩyɛ wɛna yaa Ɛsɔ sɛtʋ agbaa tɩŋa tɔm kɛdɩɣnɩ Ɛsɔ?” Ðitisiɣ nɛ ɖɩtɛŋ ɖa-taa se ɖa Yehowa Aseɣɖe Tɩnaa lɛ, ɖɩwɩlɩɣ toovenim nɛ nʋmɔʋ ŋgʋ kɩ-yɔɔ ɖɩtɩŋɩɣna nɛ ɖɩsɛɣ Yehowa yɔ ki-ɖeke kɩkɛdɩɣnɩ-ɩ? Ɛzɩ toovenim taa lɛ, ɖa-taa pɩzɩɣ nɛ pɩtɛmnɩ tɔm ndʋ? Iyele nɛ ɖɩna mbʋ pʋyɔɔ ɖa-taa pɩzɩɣ nɛ pɩtɛmnɩ tɔm ndʋ yɔ.

2. Ɛbɛ yɔɔ apostoloo Pɔɔlɩ taa kaatɛma se tɔm ndʋ tɩ-yɔɔ etisiɣ yɔ tɩkɛ toovenim? (1 Tesalooniiki mba 1:5)

² Apostoloo Pɔɔlɩ kaawɛnɩ tisuu siŋŋ se tɔm ndʋ tɩ-yɔɔ etisaɣ yɔ tɩkɛ toovenim. (Kalɩ 1 Tesalooniiki mba 1:5.) Etaatisiɣ tɔm ndʋ tɩ-yɔɔ yem mbʋ pʋyɔɔ yɔ tɩhaɣ-ɩ taa leleŋ. Pɔɔlɩ kpɛlɩkaɣ Ɛsɔtɔm camɩyɛ. Eetisaa se “Ɛsɔ fezuu ɖiyina nɛ pama Masɩ kpeekpe.” (2 Tim. 3:16) Ɛbɛ ɛkpɛlɩkaa? Masɩ kpɛlɩkʋʋ yeba nɛ Pɔɔlɩ na mbʋ pɩwɩlɩɣ kpayɩ kpayɩ se Yesu kaakɛnɩ Mesiya weyi ɛ-tɔm paayɔɔdaa yɔ; nɛ Yuuda mba Ɛsɔ sɛtʋ ñʋndɩnaa taatisiɣ toovenim tɔm ndʋ tɩ-yɔɔ. Ɛsɔ sɛtʋ ñʋndɩnaa pɩ-tɛɛ nɛ pɩ-yɔɔ tɩnaa mba, pɔyɔɔdaɣ se pɛkɛ Ɛsɔ lone taa caɣyaa, ɛlɛ palakaɣ mbʋ Ɛsɔ paɖɩɣ yɔ. (Tiiti 1:16) Pɔɔlɩ kaawɛ ndɩ nɛ Ɛsɔ sɛtʋ ñʋndɩnaa mba, ɛtaalɩzɩɣ Ɛsɔtɔm hɔɔlɩŋ weyi ɩ-yɔɔ ɛsɔɔlaa se etisi nɛ weyi ɩ-yɔɔ ɛtɩsɔɔlɩ se etisi yɔ. Ɛɛtɛm ɛ-taa se ɛwɩlɩɣ “Ɛsɔ lɔŋ tasʋʋ kpeekpe” nɛ ɛlabɩnɩ-pʋ tʋmɩyɛ.—Tʋma 20:27.

3. Pɩsa nɛ ɖɩwɛɛnɩ tisuu siŋŋ lɛ, pɩwɛɛ se ɖɩtɩlɩ tɔm ndʋ payɩ ɖɩpɔzʋʋ yɔ tɩ-yɔɔ cosuu na? (Kalɩ ɖɔɖɔ aɖakaɣ “ Yehowa tʋma nɛ ɛ-lɩmaɣza—‘Maanaɣ se manpaɣzɩnɩ le, pɩɖɔ yem.’”)

 ³ Nabɛyɛ maɣzɩɣ se pɩwɛɛ se toovenim Ɛsɔ sɛtʋ ɛpɩzɩ nɛ ticosi paa tɔm pɔzʋʋ mbʋ lɛ pɩ-yɔɔ, halɩ pɩkpɛndɩnɩ tɔm pɔzʋʋ mbʋ patɩyɔɔdɩ pɩ-tɔm Bibl taa yɔ. Pa-lɩmaɣza ana atʋʋzaa? Iyele nɛ ɖɩna Pɔɔlɩ kɩɖaʋ. Eseɣti e-koobiya Krɩstʋ ñɩma se ‘pewili pɩtɩŋa camɩyɛ,’ ɛlɛ ɛtasɩ yɔɔdʋʋ se tɔm sakɩyɛ wɛɛ ɛtɩnɩɩ tɩ-taa. (1 Tes. 5:21) Ɛmawa se: “Sɩmtʋ pazɩ ɖɩwɛna,” nɛ ɛsɔzɩ se: “Ðɩnaɣ yem fiɖiyii pɩtɩŋnɩ ñɩɣtʋ ñɩnʋʋ nakʋyʋ yɔɔ.” (1 Kɔr. 13:9, 12) Pɔɔlɩ taanɩɩ tɔm tɩŋa taa; nɛ ɖa ɖɔɖɔ mbʋ. Ɛlɛ, Pɔɔlɩ kaatɩlɩ Yehowa tamasɩ yɔɔ tɔm kɩcɛyɩtʋ. Ɛɛsɩm tɔm sakɩyɛ, nɛ tɔm ndʋ tiyekaɣ se ɛ-taa ɛtɛ se tɔm ndʋ tɩ-yɔɔ etisiɣ yɔ, tɩkɛ toovenim!

4. (a) Ɛbɛ pɩzɩɣ pɩsɩnɩ-ɖʋ nɛ ɖa-taa tɛ se ɖɩlɩ toovenim yɔɔ? (b) Nɛ ɛbɛ ɖɩkaɣ kpɛlɩkʋʋ toovenim Krɩstʋ ñɩma yɔɔ?

⁴ Nʋmɔŋ weyi ɩ-yɔɔ ɖɩpɩzɩɣ ɖɩtɩŋna nɛ ɖa-taa tɛ nɛ pɩkɩlɩ se ɖɩlɩ toovenim yɔɔ yɔ, ɩ-taa nakʋyʋ lɛ se ɖɩkpaɣ Ɛsɔ sɛtʋ kɩɖaʋ ŋgʋ Yesu hawa yɔ nɛ ɖɩmaɣzɩnɩ ɛzɩma Yehowa Aseɣɖe Tɩnaa lakɩ pɛ-Ɛsɔ sɛtʋ sɔnɔ yɔ. Tɔm ñʋʋ kʋnɛ kɩ-taa, ɖɩkaɣ naʋ se: (1) toovenim Krɩstʋ mba kiziɣ sɩɩnaa latʋ, (2) pañaŋ Ɛsɔ hɩɖɛ Yehowa, (3) pɔsɔɔlɩ toovenim, nɛ (4) pɔsɔɔlɩ ɖama siŋŋ.

5. (a) Nʋmɔʋ kɩbaŋʋ ŋgʋ kɩ-yɔɔ pɩwɛɛ se ɖɩtɩŋna nɛ ɖɩsɛɛ Ɛsɔ yɔ kɩ-hɔɔlʋʋ taa lɛ, ɛbɛ ɖɩkpɛlɩkɩɣ Yesu cɔlɔ? (b) Nɛ ɛzɩma ɖɩpɩzɩɣ nɛ ɖɩlabɩnɩ tʋmɩyɛ tɔm ndʋ ɛwɩlaa yɔ?

⁵ Yesu sɔɔlɩ Yehowa siŋŋ nɛ pʋyɔɔ lɛ, alɩwaatʋ ndʋ ɛɛwɛ ɛsɔdaa nɛ alɩwaatʋ ndʋ ɛɛwɛ tɛtʋ yɔɔ yɔ, Yehowa ɖeke ɛsɛɣaɣ. (Luka 4:8) Ɛwɩlɩ ɛ-tɔmkpɛlɩkɩyaa se pɛsɛɛ Yehowa ɖeke. Yesu yaa ɛ-tɔmkpɛlɩkɩyaa siɣsiɣ tɩnaa tɩlabɩnɩ sɩʋ kpelisi tʋmɩyɛ pɛ-Ɛsɔ  sɛtʋ taa wiɖiyi. Ɛsɔ kɛ fezuu nɛ pʋyɔɔ lɛ, nɔɔyʋ ɛɛpɩzɩɣ nɛ ɛla nabʋyʋ nɛ pɩkɛ Ɛsɔ lɛzʋʋ! (Iza. 46:5) Ɛlɛ, suwe ɖɩpɩzɩɣ nɛ ɖɩyɔɔdɩ ɛyaa kiɖeɖema sɩʋ kpelisi nzɩ ɛyaa lakɩ nɛ pɛsɛɣ-sɩ yɔ sɩ-yɔɔ? Yehowa yɔɔdɩ Paɣtʋ Hiu tɛ naalɛ ñɩndʋ taa se: ‘Taasaɣ ña-tɩ sɩʋ kpeliɣa, yaa mbʋ pɩwɛ ɛsɔdaa nɛ tataa yɔ. Taaluŋ pɩ-tɛɛ.’ (Ejl. 20:4, 5) Ɛyaa mba pɔsɔɔlaa se pɔ-tɔm ɛkɛdɩnɩ Ɛsɔ yɔ, panɩɣ pɩ-taa se ɛtɩsɔɔlɩ se ɖɩsɛɛ sɩʋ kpelisi.

6. Ɛsɔ sɛtʋ kɩɖaʋ ŋgʋ Yehowa Aseɣɖe Tɩnaa maɣzɩɣnɩ sɔnɔ?

⁶ Ɛyaa mba patazɩɣ caanaʋ taa tɔm taa yɔ, pɔyɔɔdaa se apostoloowaa alɩwaatʋ taa, Krɩstʋ mba sɛɣaɣ Ɛsɔ ɖeke na. Kɩɖaʋ nakʋyʋ yɔ. Takayaɣ nakɛyɛ yɔɔdaa se ye nɔɔyʋ ɛɛtasɩ lɔŋ kajalaɣ pɩnzɩ mɩnʋʋ taa Krɩstʋ ñɩma se palabɩnɩ tʋmɩyɛ sɩʋ kpelisi pɛ-Ɛsɔ sɛtʋ lona taa yɔ, “paapaɖɩ” lɩmaɣzɩyɛ nɖɩ. (History of the Christian Church) Sɔnɔ, Yehowa Aseɣɖe Tɩnaa maɣzɩɣnɩ kajalaɣ pɩnzɩ mɩnʋʋ taa Krɩstʋ ñɩma kɩɖaʋ. Ðiiluŋuu “ɛyaa kiɖeɖema” sɩʋ kpelisi tɛɛ yaa Ɛsɔ tiyiyaa tɛɛ se ɖɩtɩmnɩ-wɛ; nɛ halɩ Yesu maɣmaɣ ɖɩɩtɩmɩɣnɩ-ɩ. Ðɩɩsɛɣ kɩɖaʋ kɛdɛɛka yaa ɖɩɩlakɩ nabʋyʋ nɛ pɩwɩlɩɣ se ɖɩsɛɣ ɖɛ-ɛjaɖɛ. Paa pɩtɩɩkɛ ɛbɛ nɔɔyʋ ñakɩ pana se ɛñɩɣ ɖɔ-yɔɔ nɛ ɖɩla yɔ, ɖɩtɛm ɖa-taa se ɖɩñaŋ Yesu tɔm tʋnɛ: “Yehowa ñɛ-Ɛsɔ pɩwɛɛ se ŋsɛɛ.”—Mat. 4:10.

7. Hɔɔlɩŋ weyi taa Yehowa Aseɣɖe Tɩnaa wɛ ndɩ nɛ Ɛsɔ sɛtʋ agbaa lɛɛna tɩŋa?

⁷ Sɔnɔ, ɛyaa sakɩyɛ sɔɔlɩ welisinuu Ɛsɔ sɛtʋ ñʋndɩnaa mba pa-hɩla sɛwa yɔ. Pɔsɔɔlɩ ñʋndɩnaa mba kpem nɛ halɩ pɛsɛɣ-wɛ ɛzɩ ɛsɔnaa yɔ. Ɛyaa sakɩyɛ woki ñʋndɩnaa mba po-coocinaa taa, payakɩ pa-takayɩsɩ, nɛ pahaɣ ñʋndɩnaa mba yaa agbaa wena ñʋndɩnaa mba paɖʋʋ nesi yɔ liidiye sakɩyɛ. Ɛyaa nabɛyɛ tisiɣ tɔm ndʋ payɩ ñʋndɩnaa mba pɔyɔɔdʋʋ yɔ tɩ-yɔɔ. Panaɣ ñʋndɩnaa mba lɛ, pa-taa wɛ leleŋ kpem ɛzɩ Yesu maɣmaɣ panawa yɔ. Ɛlɛ, Yehowa sɛyaa toovenim mba ñaatɩŋɩɣ ɛyaa wayɩ. Paa ɖɩñaŋ mba pɛɖɛɣ-ɖʋ nɔɔ yɔ, ɖitisiɣ Yesu wɩlɩtʋ ndʋ tɩ-taa tʋ kpayɩ kpayɩ yɔ tɩ-yɔɔ. Ɛyɔɔdaa se: “Mɩ-tɩŋa lɛ ɩkɛ koobiya.” (Mat. 23:8-10) Ðɩɩcɛlɩɣ ɖɛ-Ɛsɔ sɛtʋ ɛyaa, paa patɩɩkɛ Ɛsɔ sɛtʋ ñʋndɩnaa yaa politiki ñʋndɩnaa yɔ. Ðɩɩɖʋʋ nesi pa-lɩmaɣza. Ðɩɩtɩnɩɣ hɔɔlʋʋ nakʋyʋ yɔɔ nɛ ɖɩtɩkɛ ɛjaɖɛ yɔɔ mba. Hɔɔlɩŋ ɛnɩ ɩ-tɩŋa ɩ-taa lɛ, ɖɩwɛ ndɩ kpem nɛ Ɛsɔ sɛtʋ agbaa wena ayaɣ a-tɩ se Krɩstʋ mba yɔ.—Yoh. 18:36.

8. Ɛsɩma ɖɩlaba nɛ ɖɩna se Yehowa sɔɔlaa se ɖɩsa ɛ-hɩɖɛ nɛ ɖiyele nɛ ɛya tɩŋa tɩlɩ-ɖɩ?

⁸ Kɩyakʋ nakʋyʋ Yesu tɩmaa se: “Caa, sa ña-hɩɖɛ.” Yehowa maɣmaɣ cosini ɛsɔdaa nɛ nɔɔ ɖoŋ ñɩŋga nɛ ɛyɔɔdɩ se ɛkaɣ sam ɛ-hɩɖɛ. (Yoh. 12:28) Alɩwaatʋ ndʋ tɩ-taa Yesu lakaɣ ɛ-Ɛsɔ sɛtʋ tʋmɩyɛ yɔ, ɛsam ɛ-Caa hɩɖɛ. (Yoh. 17:26) Ye mbʋ, toovenim Krɩstʋ ñɩma maɣzɩɣ se pɩkɛnɩ-wɛ hɩɖɛ ɖʋʋ se palabɩnɩ Ɛsɔ hɩɖɛ tʋmɩyɛ nɛ peyele nɛ ɛyaa lalaa tɩlɩ-ɖɩ.

9. Ɛzɩma tɩyɛ kajalaɣ pɩnzɩ mɩnʋʋ taa Krɩstʋ ñɩma wɩlaa se pañaŋ Ɛsɔ hɩɖɛ?

⁹ Kajalaɣ pɩnzɩ mɩnʋʋ taa, Krɩstʋ ɛgbɛyɛ ñɔwa nɛ pitileɖi lɛ, Yehowa “kɛzɩ ɛ-lɩmaɣza nɛ ajɛɛ yɔɔ kajalaɣ ɖeɖe se ɛlɩzɩ a-taa samaɣ nakɛyɛ nɛ payaa-kɛ nɛ ɛ-hɩɖɛ.” (Tʋma 15:14) Kajalaɣ pɩnzɩ mɩnʋʋ taa Krɩstʋ ñɩma mba, pa-taa kaawɛ leleŋ se palabɩnɩ Ɛsɔ hɩɖɛ tʋmɩyɛ nɛ peyele nɛ ɛyaa lalaa tɩlɩ-ɖɩ. Palabɩnɩ Ɛsɔ hɩɖɛ tʋmɩyɛ tɔm susuu taa nɛ Bibl takayɩsɩ nzɩ pamawa yɔ sɩ-taa. * Pawɩlaa  se pɛkɛ samaɣ ŋga paya-kɛ nɛ Ɛsɔ hɩɖɛ yɔ.—Tʋma 2:14, 21.

10. Ɛbɛ wɩlɩɣ kpayɩ kpayɩ se Yehowa Aseɣɖe Tɩnaa ɖeke sɩɣnɩnɩ ɛyaa se patɩlɩ Yehowa hɩɖɛ?

¹⁰ Ɛzɩ Yehowa Aseɣɖe Tɩnaa ɖeke yekina se ɛyaa ɩtɩlɩ Yehowa hɩɖɛ na? Iyele nɛ ɖɩna mbʋ pɩwɩlɩɣ se mba lakɩna mbʋ yɔ. Sɔnɔ, Ɛsɔ sɛtʋ agbaa ñʋndɩnaa sakɩyɛ labɩ po-ɖoŋ ɖeɖe se pɛmɛsɩ toovenim tɔm ndʋ tɩwɩlɩɣ se Ɛsɔ wɛnɩ hɩɖɛ yɔ. Pahɩzɩ-ɖɩ Biblwaa mba pɛɖɛzaa yɔ pa-taa; nɛ hɔɔlɩŋ nɩɩyɩ taa lɛ, paɖʋ paɣtʋ se pataalabɩnɩ hɩɖɛ nɖɩ tʋmɩyɛ po-coocinaa taa. * Pɩnaɣ kpayɩ kpayɩ se Yehowa Aseɣɖe Tɩnaa ɖeke ñaŋnɩ Ɛsɔ hɩɖɛ nɛ paɖʋʋ-ɖɩ hɩɖɛ ɛzɩ pɩmʋnʋʋ yɔ. Ɛsɔ sɛtʋ ɛgbɛyɛ naɖɩyɛ fɛyɩ nɛ ɖɩsɩɣnɩ ɛyaa se patɩlɩ Ɛsɔ hɩɖɛ ɛzɩ ɖɩlakʋʋ yɔ! Hɔɔlʋʋ ŋgʋ kɩ-taa lɛ, ɖɩwɛɛ nɛ ɖɩlakɩ ɖo-ɖoŋ ɖeɖe se ɖɩcaɣ wezuu nɛ kɩla nɔɔ kʋɖʋmaɣ nɛ ɖa-hɩɖɛ, Yehowa Aseɣɖe Tɩnaa. (Iza. 43:10-12) Ðɩlɩzɩ La Bible. Traduction du monde nouveau takayɩsɩ nɛ pɩcɛzɩ miiliyɔɔwaa 240; ŋgʋ Bibl ŋgʋ kɩ-taa ɖɩɖʋ Yehowa hɩɖɛ lona wena a-taa ɖɩɩwɛɛ, nɛ Bibl ɖɛzɩyaa lalaa tɩɖʋ-ɖɩ peeɖe. Nɛ ɖɩlɩzɩ Bibl kpɛlɩkʋʋ takayɩsɩ nzɩ sɩsɩɣnɩ ɛyaa se patɩlɩ Yehowa hɩɖɛ yɔ; nɛ sɩwɛ kʋnʋmɩŋ weyi ɩcɛzɩ 1 000 yɔ ɩ-taa!

11. Ɛzɩma kajalaɣ pɩnzɩ mɩnʋʋ taa Krɩstʋ mba wɩlaa se pɔsɔɔlɩ toovenim?

¹¹ Yesu kaasɔɔlɩ toovenim, pʋ-tɔbʋʋ se Ɛsɔ nɛ ɛ-kaɖʋsɩ yɔɔ toovenim tɔm. Yesu  kaacaɣ wezuu nɛ pɩla nɔɔ kʋɖʋmaɣ nɛ toovenim mbʋ, nɛ ɛsɩnɩ ɛyaa lalaa nɛ patɩlɩ toovenim mbʋ. (Yoh. 18:37) Yesu wayɩ tɩŋɩyaa toovenim mba ɖɔɖɔ sɔɔlɩ toovenim siŋŋ. (Yoh. 4:23, 24) Apostoloo Pɩyɛɛrɩ ya Krɩstʋ ɛgbɛyɛ se “toovenim nʋmɔʋ.” (2 Pɩy. 2:2) Kajalaɣ pɩnzɩ mɩnʋʋ taa Krɩstʋ mba kaasɔɔlɩ toovenim siŋŋ nɛ pʋyɔɔ lɛ, pekizaɣ Ɛsɔ sɛtʋ lɩmaɣza, sɔnzɩ, nɛ ɛyaa lɩmaɣza wena ataalakɩ nɔɔ kʋɖʋmaɣ nɛ toovenim yɔ. (Kol. 2:8) Mbʋ ɖɔɖɔ sɔnɔ, toovenim Krɩstʋ mba ñakɩ pana siŋŋ nɛ ‘pɔɖɔŋ toovenim taa;’ nɛ peyeki se mbʋ pɩ-yɔɔ petisiɣ nɛ ɛzɩma pacakɩ wezuu yɔ, pɩla nɔɔ kʋɖʋmaɣ nɛ Ɛsɔtɔm nɛ pɩwɩlɩ se pɔɖɔŋ toovenim taa.—3 Yoh. 3, 4.

12. (a) Alɩwaatʋ ndʋ Nɔɔɖɛyaa Ɛgbɛyɛ ɖiɣziɣna se pɩpɔzʋʋ se ɖɩlɛɣzɩ ɛzɩma ɖɩnɩɣaɣ tɔm natʋyʋ taa yɔ, ɛzɩma ɖɩlakɩ? (b) Nɛ ɛbɛ yɔɔ ɖɩlakɩ mbʋ?

¹² Sɔnɔ, Yehowa Aseɣɖe Tɩnaa ɩɩyɔɔdʋʋ se paa ɛzɩmtaa lɛ, panɩɣ tɔm ndʋ payɩ tɩwɛ Bibl taa yɔ tɩ-taa pilim. Nabʋyʋ taa, ɛzɩma palɩzaɣ Bibl taa tɔm natʋyʋ taa yɔ, piiyiɣdi-wɛ; nɛ nabʋyʋ taa ɖɔɖɔ lɛ, piiyiɣdi-wɛ ɖʋtʋ ndʋ palaba se tiɖiyi ɛgbɛyɛ yɔ tɩ-taa. Nɛ pɩfɛyɩ se pɩlabɩ-ɖʋ piti. Bibl wɩlɩɣ kpayɩ kpayɩ se alɩwaatʋ wɛɣ nɛ tɩɖɛɣ lɛ, Ɛsɔ samaɣ wɛɣ nɛ kanɩɣ toovenim taa nɛ pɩkɩlɩɣ. (Kol. 1:9, 10) Yehowa kuluu toovenim yɔɔ pazɩ pazɩ, nɛ pɩwɛɛ se ɖɩɖʋ suuɖu nɛ ɖɩɖaŋ pɩkɔɔ pɩtalɩ alɩwaatʋ ndʋ ɖɩpɩzɩɣ nɛ ɖɩnɩɩ toovenim taa nɛ pɩkɩlɩ yɔ. (Adu. 4:18) Alɩwaatʋ ndʋ Nɔɔɖɛyaa Ɛgbɛyɛ ɖiɣziɣna se pɩpɔzʋʋ se ɖɩlɛɣzɩ ɛzɩma ɖɩnɩɣaɣ toovenim tɔm natʋyʋ taa yɔ lɛ, palakɩ lɛɣzɩtʋ ndʋ pɩpɔzʋʋ yɔ kpaagbaa. Sɔnɔ, coocinaa sakɩyɛ lɛɣzɩɣ pa-wɩlɩtʋ se pɔ-tɔm ɛkɛdɩnɩ mba powoki po-coocinaa yɔ, yaa se panɩɣzɩnɩ ɛzɩma pɩɖɔŋ ɛjaɖɛ yɔɔ yɔ. Ɛlɛ ɖa Yehowa Aseɣɖe Tɩnaa lɛ, ɖɩlakɩ lɛɣzɩtʋ mbʋ pʋyɔɔ yɔ ɖɩsɔɔlaa se ɖɩñɔtɩnɩ Ɛsɔ nɛ ɖɩsɛɛ-ɩ ɛzɩ Yesu kaalabʋ yɔ. (Yak. 4:4) Pɩtɩkɛ ɛzɩma ɛjaɖɛ yɔɔ wɛtʋ wɛɛ nɛ tɩlɛɣzɩɣ yaa mbʋ ɛyaa sakɩyɛ sɔɔlaa yɔ mbʋ seɣtiɣni-ɖʋ nɛ ɖɩlakɩ lɛɣzɩtʋ, ɛlɛ ɖɩlakɩ lɛɣzɩtʋ mbʋ pʋyɔɔ yɔ ɖɩnɩɣ Masɩ taa camɩyɛ nɛ pɩkɩlɩɣ. Ðɩsɔɔlɩ toovenim!—1 Tes. 2:3, 4.

13. (a) Wɛtʋ kɩbandʋ sɔsɔtʋ ndʋ toovenim Krɩstʋ ñɩma lɩzɩɣ nɛ pawɩlɩɣ? (b) Nɛ ɛzɩma Yehowa Aseɣɖe Tɩnaa lɩzɩɣ wɛtʋ kɩbandʋ ndʋ nɛ pawɩlɩɣ sɔnɔ?

¹³ Paasɩm kajalaɣ pɩnzɩ mɩnʋʋ taa Krɩstʋ ɛgbɛyɛ nɛ wɛtʋ kɩbandʋ ndɩ ndɩ. Tɩ-taa ndʋ tɩkpaɖaa yɔ, ndʋ lɛ sɔɔlɩm. Yesu yɔɔdaa se: “Pʋnɛ piyekina se ɛyaa tɩŋa ɩtɩlɩ se ɩkɛ mɔn-tɔmkpɛlɩkɩyaa—ye sɔɔlɩm ɛwɛ mɩ-hɛkʋ taa yɔ.” (Yoh. 13:34, 35) Sɔnɔ, Yehowa Aseɣɖe Tɩnaa mba pɛwɛ ɛjaɖɛ kpeekpe yɔɔ yɔ, sɔɔlɩm nɛ nɔɔ kʋɖʋmaɣ wɛ pɛ-hɛkʋ taa siŋŋ. Ðɩwɛ ndɩ nɛ Ɛsɔ sɛtʋ agbaa lɛɛna tɩŋa, mbʋ pʋyɔɔ yɔ paa ɖɩlɩnɩ ɛjaɖɛ hɔɔlɩŋ ndɩ ndɩ taa, paa ɖɩwɛnɩ tomnaɣ tɔlɩm ndɩ ndɩ, nɛ paa ɖɩlɩnɩ sɔnzɩ ndɩ ndɩ taa yɔ, ɖɩwɛ ɛzɩ hɔʋ yɔ. Ðɩnaɣ mbʋ pɩwɩlɩɣ kaɣlaa se sɔɔlɩm siŋŋ wɛ ɖɛ-hɛkʋ taa yɔ ɖe-kediɣzisi taa, ɖe-kigbeɣliŋ cikpeŋ nɛ sɔsɔŋ taa. Nɛ pɩsɩɣnɩ-ɖʋ se ɖa-taa ɛtɛ nɛ pɩkɩlɩ se ɛzɩma ɖɩsɛɣ Yehowa yɔ pɩkɛdɩɣnɩ-ɩ.

14. Ɛzɩ Koloosi mba 3:12-14 yɔɔdʋʋ yɔ, nʋmɔʋ sɔsɔʋ ŋgʋ yɔɔ ɖɩpɩzɩɣ ɖɩtɩŋna nɛ ɖɩwɩlɩ se ɖɩsɔɔlɩ ɖama siŋŋ?

¹⁴ Masɩ seɣtiɣ-ɖʋ se ‘ɖɩsɔɔlɩ ɖama siŋŋ.’ (1 Pɩy. 4:8) Nʋmɔŋ weyi ɩ-yɔɔ ɖɩtɩŋɩɣna nɛ ɖɩlɩzɩɣ sɔɔlɩm mbʋ nɛ ɖɩwɩlɩɣ yɔ, ɩ-taa nakʋyʋ lɛ se ɖɩkpaɣ nɛ ɖikpeɣu ɖama nɛ ɖɔ-tɔm ɛtaanɩɩ ɖama alɩwaatʋ ndʋ ɖɩyʋsʋʋnɩ ɖama yɔ. Pɩtasɩ lɛ, ɖɩñɩnɩɣ nʋmɔŋ weyi ɩ-yɔɔ ɖɩtɩŋna nɛ ɖɩla kʋjɔŋ nɛ ɖɩmʋ ɛgbɛyɛ taa ñɩma tɩŋa, halɩ pɩkpɛndɩnɩ mba pɩtɩla paɖʋ-ɖʋ ɖɩwɩzɩyɛ yɔ. (Kalɩ Koloosi mba 3:12-14.) Alɩwaatʋ ndʋ ɖɩlɩzɩɣ sɔɔlɩm mbʋ nɛ ɖɩwɩlɩɣ yɔ, ɖɩwɩlɩɣ se ɖɩkɛ toovenim Krɩstʋ ñɩma.

15. Hɔɔlɩŋ lɛɛŋ weyi taa ɖɛ-Ɛsɔ sɛtʋ nɩɣzɩnɩ kajalaɣ pɩnzɩ mɩnʋʋ taa Krɩstʋ mba ñɩndʋ?

¹⁵ Ðɩmaɣzɩɣnɩ Ɛsɔ sɛtʋ tɛ kɩɖaʋ ŋgʋ kajalaɣ pɩnzɩ mɩnʋʋ taa Krɩstʋ ɛgbɛyɛ hawa yɔ hɔɔlɩŋ lɛɛŋ taa ɖɔɖɔ. Kɩɖaʋ nakʋyʋ yɔ: Ðʋtʋ ndʋ tɩwɛ ɖɛ-ɛgbɛyɛ taa yɔ, tɩnɩɣzɩnɩ ndʋ apostoloowaa kaalabɩ kajalaɣ pɩnzɩ mɩnʋʋ taa yɔ, pʋ-tɔbʋʋ se ɖɩwɛnɩ ageeta yɔɔ cɔnɩyaa, ɛgbɛyɛ taa ɛzʋtʋyaa, nɛ ɛgbɛyɛ taa tʋmlaɖaa. (Fil. 1:1; Tiiti 1:5) Nɛ ɛzɩ pɩɩwɛʋ kajalaɣ pɩnzɩ mɩnʋʋ taa yɔ, ɖɩñaŋ paɣtʋ ndʋ Yehowa ɖʋ kʋzʋʋ nɛ nesi ɖɔkʋʋ yɔɔ yɔ. Ðɩñaŋ ɖɔɖɔ paɣtʋ ndʋ ɛɖʋ ɛzɩma pɩwɛɛ se palabɩnɩ calɩm tʋmɩyɛ yɔ; nɛ ɖɩlɩzɩɣ kɩwɛɛkɩm laɖaa mba paakpiɖiɣ yɔ ɛgbɛyɛ taa se pɩsa nɛ pɩkandɩyɩ ɛgbɛyɛ yɔɔ.—Tʋma 15:28, 29; 1 Kɔr. 5:11-13; 6:9, 10; Ebr. 13:4.

16. Tɔm ndʋ tɩwɛ Efɛɛzɩ mba 4:4-6 taa yɔ, ɛbɛ tɩkpɛlɩkɩɣ-ɖʋ?

¹⁶ Yesu kaayɔɔdaa se ɛyaa sakɩyɛ kaɣ yɔɔdʋʋ se pɛkɛ ɛ-tɔmkpɛlɩkɩyaa, ɛlɛ pɩtɩkɛ pa-tɩŋa pakaɣnɩ kɛʋ toovenim ñɩma. (Mat. 7:21-23) Pɩtasɩ lɛ, Masɩ heyiɣ-ɖʋ se kɛdɛzaɣ kɩyakɩŋ taa lɛ, pɩkaɣ naʋ ɛsa yɔɔ yem se ɛyaa sakɩyɛ wɛnɩ “Ɛsɔ sɔɔndʋ seu.” (2 Tim. 3:1, 5) Ɛlɛ Bibl heyiɣ-ɖʋ kpayɩ se “tisuu kʋɖʋmʋm” kɛdɩɣnɩnɩ Ɛsɔ. (Kalɩ Efɛɛzɩ mba 4:4-6.)

17. Sɔnɔ, mba tɩŋɩɣ Yesu wayɩ nɛ pɛwɛnɩ tisuu kʋɖʋmʋm mbʋ pɩkɛ toovenim ñɩmbʋ yɔ?

¹⁷ Sɔnɔ, mba wɛnɩ tisuu kʋɖʋmʋm mbʋ pɩkɛ toovenim ñɩmbʋ yɔ? Ðɩtazɩ mbʋ picosuu tɔm ndʋ tɩ-yɔɔ kpayɩ yɔ pɩ-taa. Ðɩna nʋmɔʋ ŋgʋ Yesu wɩlaa se patɩŋnɩ kɩ-yɔɔ nɛ pɛsɛɛ Ɛsɔ yɔ; nɛ ŋgʋ kajalaɣ pɩnzɩ mɩnʋʋ taa Krɩstʋ ñɩma tɩŋaa. Ðicosuu tɔm ndʋ tɩ-yɔɔ kɛlɛʋ yem se, Yehowa Aseɣɖe Tɩnaa. Pɩkɛnɩ-ɖʋ hɩɖɛ ɖʋʋ siŋŋ se ɖɩkɛ Yehowa samaɣ taa mba, nɛ ɖɩtɩlɩ Yehowa yɔɔ toovenim tɔm nɛ ɛ-kaɖʋsɩ! Tɛtɛ nɛ ɖiwolo pɩ-yɔɔ nɛ ɖɩñɔɔnɩ toovenim kpam nɛ tisuu siŋŋ.