1. (a) Ɛbɛ payaɣ se ‘ɖe-fezuu taa wondu’? (b) Nɛ nɔɔ kʋɖʋmaɣ ŋga wɛ ɖe-fezuu taa wondu nɛ koboyaɣ pɛ-hɛkʋ taa?

 KOBOYAƔ siŋŋ tɩkɛnɩ taa leleŋ weyi ɛyʋ hikiɣ nabʋyʋ taa yɔ. Ɛyʋ pɩzɩɣ nɛ ehiɣ koboyaɣ siŋŋ e-wezuu caɣʋ kpeekpe taa. Ɛzɩma tɩyɛ? Pʋʋ yɔɔ tɔm yɔɔdʋʋ taa, Yesu lɩzɩ pɩ-taa se: «Koboyaɣ tɩnaa kɛlɛ mba panawa se pɩpɔzʋʋ-wɛ fezuu taa wondu yɔ.» (Mat. 5:3) Yesu nawa se Yehowa Ɛsɔ lɩzɩ ɛyaa lɛ, ɛɖʋ pa-laŋa taa se pɔsɔɔlɩ siŋŋ se pɛkpɛlɩkɩɣ nɛ patɩlɩ pa-lɩzɩyʋ nɛ pɛsɛɛ-ɩ. Mbʋ payaɣ se ‘ɖe-fezuu taa wondu.’ Nɛ Yehowa kɛ «Ɛsɔ koboyaɣ tʋ» pʋyɔɔ lɛ, mba pɛsɛɣ-ɩ yɔ papɩzɩɣ nɛ pɛkɛ koboyaɣ tɩnaa ɖɔɖɔ.—1 Tim. 1:11.

2-3. (a) Ɛzɩ Yesu yɔɔdʋʋ yɔ, mba ɖɔɖɔ pɩzɩɣ nɛ pehiɣ koboyaɣ? (b) Ɛbɛ ɖɩkaɣ naʋ tɔm ñʋʋ kʋnɛ kɩ-taa, nɛ ɛbɛ yɔɔ pɩ-tɔm cɛyaa?

² Ɛzɩ pɩpɔzʋʋ se ɖɩwɛɛ wɛtʋ kɩbandʋ taa ɖe-wezuu caɣʋ taa pʋcɔ nɛ ɖihiɣ koboyaɣ na? Aayɩ. Pʋʋ yɔɔ tɔm yɔɔdʋʋ taa, Yesu yɔɔdɩ tɔm natʋyʋ nɛ tɩwɛ piti. Ɛyɔɔdaa se: «Mba pɛwɛ kʋñɔwiye taa yɔ» papɩzɩɣ nɛ pɛkɛ koboyaɣ tɩnaa, paa pɩtɩɩkɛ kɩwɛɛkɩm mbʋ palaba yɔ pʋyɔɔ panɩɣ siziŋ yaa paa pɛwɛɛ nɛ pakatɩɣ kaɖɛ wɛtʋ ndɩ ndɩ pe-wezuu caɣʋ taa yɔ. Yesu yɔɔdɩ tɔm kʋɖʋmtʋ ndʋ ɛyaa «mba panazɩ-wɛ siɣsiɣ wɛtʋ yɔɔ yɔ» yaa ɛyaa ‘mba patʋʋ-wɛ’ mbʋ pʋyɔɔ yɔ pɛkɛ Krɩstʋ wayɩ tɩŋɩyaa yɔ pɔ-yɔɔ. (Mat. 5:4, 10, 11) Ɛlɛ, ɛzɩma ɛyʋ pɩzɩɣ nɛ ehiɣ koboyaɣ siŋŋ wɛtʋ ndɩ ndɩ ndʋ tɩ-taa?

³ Yesu ñɩnaɣ se ɛwɩlɩ-ɖʋ se pɩtɩkɛ wɛtʋ kɩbandʋ ndʋ ɖɩkatɩɣ ɖe-wezuu caɣʋ taa yɔ, tɩ-cɔlɔ koboyaɣ lɩɣna; ɛlɛ ye ɖɩcɔŋnɩ ɖe-fezuu taa kɩcɛyɩm ɖeɖe nɛ ɖɩñakɩ pana se ɖɩñɔtɩnɩ Ɛsɔ yɔ, piyeki nɛ ɖihiɣ koboyaɣ. (Yak. 4:8) Ɛzɩma ɖɩpɩzɩɣ nɛ ɖɩla mbʋ? Tɔm ñʋʋ kʋnɛ kɩ-taa, ɖɩkaɣ naʋ nɩŋgbanzɩ sɔsɔsɩ naadozo nzɩ  ɖɩpɩzɩɣ ɖɩkpɛzɩ nɛ pɩsɩnɩ-ɖʋ nɛ ɖihiɣ koboyaɣ siŋŋ yɔ.

4. Pʋcɔ nɛ ɖihiɣ koboyaɣ siŋŋ lɛ, nɩŋgbaŋaɣ kajalaɣ ñɩŋga ŋga pɩpɔzʋʋ se ɖɩkpɛzɩ? (Keɣa 1:1-3)

⁴ NƖŊGBAŊAƔ 1: Pʋcɔ nɛ ɖihiɣ koboyaɣ siŋŋ lɛ, pɩpɔzʋʋ se ɖɩtɔkɩ fezuu taa tɔɔnaɣ. Pɩsa nɛ ɛyaa nɛ kpɩna papɩzɩ nɛ pɛwɛɛ wezuu lɛ, pɩpɔzʋʋ-wɛ tomnaɣ yɔɔ tɔɔnaɣ. Ɛlɛ, ɛyaa ɖeke pɩzɩɣna nɛ pɔtɔɔ fezuu taa tɔɔnaɣ. Nɛ pɩpɔzʋʋ-ɖʋ tɔɔnaɣ ŋga. Pʋyɔɔ Yesu yɔɔdaa se: «Pɩtɩkɛ kpɔnɔ ɖeke yekina se ɛyʋ ɛwɛɛ wezuu, ɛlɛ ɛwɛɣ wezuu tɔm ndʋ tɩ-tɩŋa tɩlɩɣnɩ Yehowa nɔɔ taa yɔ tɩ-yɔɔ.» (Mat. 4:4) Ye mbʋ, pɩtɩpɔzɩ se ɖiyele nɛ evemiye naɖɩyɛ ɖɛɛ nɛ ɖɩtɩtɔɔ fezuu taa tɔɔnaɣ ŋga kɛwɛ Bibl taa yɔ ka-taa nakɛyɛ. Keɣa maɖʋ yɔɔdaa se: ‘Ɛyʋ ɛnʋ ɛkɛ koboyaɣ tʋ, ɛnʋ weyi ɛnɩɣ leleŋ nɛ [Yehowa] paɣtʋ, nɛ ɛmaɣzɩɣ tɩ-yɔɔ ɖoo nɛ wɩsɩ yɔ.’—Kalɩ Keɣa 1:1-3.

5-6. (a) Tɔm ndʋ ɖɩpɩzɩɣ nɛ ɖɩkpɛlɩkɩ Bibl taa? (b) Ye ɖɩkalɩɣ Bibl yɔ, ɛzɩma kɩpɩzɩɣ nɛ kɩsɩnɩ-ɖʋ?

⁵ Yehowa sɔɔlɩ-ɖʋ, ɛwɩlɩɣ-ɖʋ mbʋ pɩpɔzʋʋ se ɖɩla nɛ ɖihiɣ koboyaɣ ɖe-wezuu caɣʋ taa yɔ; nɛ pɩwɛ Bibl taa. Ðɩkpɛlɩkɩɣ Ɛsɔtɔm lɛ, ɖɩtɩlɩɣ mbʋ Ɛsɔ sɔɔlaa se ɖɩla ɖe-wezuu caɣʋ taa yɔ. Ðɩtɩlɩɣ ɖɔɖɔ ɛzɩma ɖɩla nɛ ɖɩñɔtɩnɩ-ɩ nɛ mbʋ pɩwɛɛ se ɖɩla nɛ ekpeɣ-ɖʋ ɖa-kɩwɛɛkɩm yɔ. Pɩtasɩ lɛ, ɖɩtɩlɩɣ lidaʋ kɩbaŋʋ ŋgʋ ɛha-ɖʋ cee wayɩ yɔɔ yɔ kɩ-tɔm. (Yer. 29:11) Bibl taa ɖɩkpɛlɩkɩɣ toovenim tɔm ndʋ, nɛ tɩhaɣ-ɖʋ taa leleŋ siŋŋ!

⁶ Ðɩnawa ɖɔɖɔ se lɔŋ tasʋʋ kɩbam wɛ Bibl taa nɛ lɔŋ tasʋʋ mbʋ pɩpɩzɩɣ nɛ pɩsɩnɩ-ɖʋ ɖe-wezuu caɣʋ taa paa evemiye nɖɩ. Ye ɖɩɖɔŋ lɔŋ tasʋʋ mbʋ pɩ-yɔɔ yɔ, ɖɩpɩzɩɣ nɛ ɖihiɣ koboyaɣ. Ñe-wezuu caɣʋ taa, alɩwaatʋ ndʋ payɩ  ŋkatɩɣ kala nɛ pitiki-ŋ yɔɔɔ yɔ, kpaɣ alɩwaatʋ nɛ pɩkɩlɩ nɛ ŋkalɩɣ Yehowa Tɔm nɛ ŋmaɣzɩɣ tɩ-yɔɔ. Yesu yɔɔdaa se: «Koboyaɣ tɩnaa lɛ mba panɩɣ Ɛsɔ tɔm nɛ pɔɖɔŋ tɩ-yɔɔ yɔ!»—Luka 11:28.

7. Ɛzɩma ŋpɩzɩɣ ŋla nɛ alɩwaatʋ ndʋ ŋkpakɩɣ nɛ ŋkalɩɣnɩ Ɛsɔtɔm yɔ tɩwazɩ-ŋ nɛ pɩkɩlɩ?

⁷ Alɩwaatʋ ndʋ ŋkalɩɣ Ɛsɔtɔm yɔ, kpaɣ ña-alɩwaatʋ nɛ ŋnɩɩ leleŋ tɔm ndʋ ŋkalɩɣ yɔ tɩ-yɔɔ. Wiɖiyi wɛtʋ tʋnɛ tɩtɛmɩ-ŋ talʋʋ na? Ɛyʋ nɔɔyʋ labɩ tɔɔnasɩ nzɩ ŋkɩlɩ sɔɔlʋʋ yɔ sɩ-taa nakɛyɛ. Ɛlɛ, pɩtɩla ŋtaawɛɛnɩ alɩwaatʋ sakɩyɛ yaa ña-lɩmaɣza taawɛɛ a-ɖeɖe, pʋyɔɔ lɛ ŋtɔɔ-kɛ lɛɛ lɛɛ nɛ alɩwaatʋ ndʋ payɩ ŋɖʋwaɣ-kɛ ñɔ-nɔɔ taa yɔ, ŋtɩkpaɣ alɩwaatʋ nɛ ŋnɩɩ ke-leleŋ keekee. Ŋtɛm tɔɔʋ lɛ, ŋɖiɣzina se ŋkɩlɩ tɔɔʋ lɛɛ lɛɛ nɛ ŋkpiɖi se ŋŋnawa yɔ, ŋŋtɔɔ-kɛ hɛɛɛ nɛ ŋnɩɩ ke-leleŋ nɛ pɩkɩlɩ. Alɩwaatʋ ndʋ ŋkalɩɣ Bibl yɔ, pɩpɩzɩɣ nɛ pɩtalɩ-ŋ mbʋ ɖɔɖɔ. Nabʋyʋ taa, pɩtɩla ŋkalɩɣ-kʋ lɛɛ lɛɛ kpem nɛ ŋŋkpakɩɣ alɩwaatʋ se ŋnɩɩ leleŋ tɔm ndʋ ŋkalɩɣ yɔ tɩ-yɔɔ keekee. Kpaɣ alɩwaatʋ nɛ ŋnɩɩ leleŋ tɔm ndʋ ŋkalɩɣ Ɛsɔtɔm taa yɔ tɩ-yɔɔ, naɣ mbʋ pɩlaba yɔ ña-maɣzɩm taa, nɩɣ nɔsɩ taŋ, nɛ ŋmaɣzɩ tɔm ndʋ ŋkalɩɣ yɔ tɩ-yɔɔ. Ye ŋlabɩ mbʋ yɔ, ŋkaɣ hiɣu koboyaɣ nɛ pɩkɩlɩ.

8. Ɛzɩma «yom siɣsiɣ tʋ nɛ lɔŋsɩnɖʋ» wɛɛ nɛ ɛlakɩ tʋmɩyɛ nɖɩ paɖʋ-ɩ yɔ? (Kalɩ ɖɔɖɔ pɩ-tɛɛ tɔm.)

⁸ Yesu lɩzɩ «yom siɣsiɣ tʋ nɛ lɔŋsɩnɖʋ» se ɛha fezuu taa tɔɔnaɣ alɩwaatʋ ndʋ tɩmʋnaa yɔ tɩ-yɔɔ, nɛ yom ɛnʋ ɛcalɩɣ-ɖʋ camɩyɛ kpem fezuu taa. * (Mat. 24:45) Fezuu kiɖeɖeu ɖiyina nɛ pama Ɛsɔtɔm, nɛ ndʋ kɛnɩ wonuu sɔsɔʋ ŋgʋ kɩ-yɔɔ yom siɣsiɣ tʋ tɩŋɩɣna nɛ ɛlɩzɩɣ mbʋ payɩ ɛlɩzɩɣ yɔ. (1 Tes. 2:13) Fezuu taa tɔɔnaɣ ŋga, kasɩɣnɩ-ɖʋ se ɖɩtɩlɩ Yehowa lɩmaɣza, nɛ ɛ-lɩmaɣza ana awɛ Bibl taa. Pʋyɔɔ ɖɩkalɩɣ Feŋuu Tilimiye nɛ Réveillez-vous! takayɩsɩ nɛ tɔm ñʋŋ weyi ɩwɛ jw.org yɔɔ yɔ. Ðɩñɔɔzʋʋ kpɩtaʋ hɛkʋ taa nɛ kpɩtaʋ ɖɩdɛnɖɛ kediɣzisi. Pʋyɔɔ ɖɔɖɔ ɖɩcɔŋnɩ JW Tɔm Ðɩyɔɔdɩyɛ^® yɔɔ ɖʋtʋ ndʋ palakɩ paa fenaɣ ŋga yɔ, ye tɩwɛ kʋnʋŋ ŋgʋ ɖɩnɩɣ yɔ kɩ-taa yɔ. Ye ɖɩtɔkɩ fezuu taa tɔɔnaɣ ŋga camɩyɛ yɔ, pɩkaɣ-ɖʋ sɩnʋʋ nɛ ɖɩkpɛzɩ nɩŋgbaŋaɣ naalɛ ñɩŋga ŋga keyeki se ɖihiɣ koboyaɣ siŋŋ yɔ.

9. Pɩsa nɛ ɖihiɣ koboyaɣ siŋŋ lɛ, nɩŋgbaŋaɣ naalɛ ñɩŋga ŋga pɩpɔzʋʋ se ɖɩkpɛzɩ?

⁹ NƖŊGBAŊAƔ 2: Pɩsa nɛ ɖihiɣ koboyaɣ siŋŋ lɛ, pɩpɔzʋʋ se ɖɩcaɣ wezuu nɛ pɩla nɔɔ kʋɖʋmaɣ nɛ Yehowa paɣtʋ nɛ ɛ-paɣtʋ kila. Keɣa maɖʋ mawa se: «Koboyaɣ tɩnaa kɛlɛ mba pañaŋ [Yehowa] nɛ patɩŋɩɣ ɛnʋmɔŋ yɔ!» (Keɣa 127:1) Ye pɔtɔm se ɖɩña Yehowa yɔ, pʋ-tɔbʋʋ lɛ se pɩwɛɛ se ɖɩɖʋ-ɩ hɩɖɛ siŋŋ nɛ ɖikizi labʋ mbʋ pɩɩkɛdɩɣnɩ-ɩ yɔ. (Adu. 16:6) Pʋyɔɔ lɛ, ɖiwoki pɩ-yɔɔ nɛ ɖɩñakɩ pana se ɖɩcaɣ wezuu nɛ pɩla nɔɔ kʋɖʋmaɣ nɛ paɣtʋ nɛ paɣtʋ kila wena Ɛsɔ ɖʋwa pɩlɩɩnɩ mbʋ pɩwɛ siɣsiɣ nɛ mbʋ pɩfɛyɩ siɣsiɣ yɔ pɩ-yɔɔ yɔ. Ɛ-paɣtʋ nɛ ɛ-paɣtʋ kila ana awɛ Bibl taa. (2 Kɔr. 7:1) Ye ɖɩlakɩ mbʋ Yehowa sɔɔlaa yɔ nɛ ɖɩɩlakɩ mbʋ ɛpaɖɩɣ yɔ, ɖɩkaɣ hiɣu koboyaɣ.—Keɣa 36:27; 96:10; Roma 12:9.

10. Ɛzɩ Roma mba 12:2 yɔɔdʋʋ yɔ, ɛbɛ pɩpɔzʋʋ se ɖɩla?

¹⁰ Kalɩ Roma mba 12:2. Nɔɔyʋ pɩzɩɣ nɛ ɛtɩlɩ se Yehowa wɛnɩ waɖɛ se eheyi-ɖʋ mbʋ pɩtʋʋzaa nɛ mbʋ pɩtɩtʋʋzɩ yɔ, ɛlɛ pɩwɛɛ ɖɔɖɔ se etisi nɛ ɛɖɔ Ɛsɔ paɣtʋ nɛ ɛ-paɣtʋ kila yɔɔ. Nɔɔyʋ pɩzɩɣ nɛ eɖiɣzina se komina wɛnɩ waɖɛ se kɩɖʋ paɣtʋ pɩlɩɩnɩ ɛzɩma pɩpɔzʋʋ se lɔɔɖa sayaa yaa kpokpo sayaa ise habɛɛ yɔɔ nɛ pɩmaɣna yɔ. Ɛlɛ pɩtɩla eetisiɣ faaa se ɛɖɔ paɣtʋ ndʋ tɩ-yɔɔ. Pʋyɔɔ lɛ, alɩwaatʋ ndʋ ɛsaɣ lɔɔɖɩyɛ yaa kpokpo yɔ, eseɣ nɛ pɩcɛzɩɣ ɛzɩma pɩpɔzʋʋ se ese yɔ. Ðɩtɩŋɩɣnɩ ɖe-wezuu caɣʋ yɔɔ nɛ  ɖɩwɩlɩɣ se toovenim taa lɛ, ɖa-taa tɛma se Yehowa paɣtʋ nɛ ɛ-paɣtʋ kila yɔɔ ɖɔm kɛnɩ wezuu caɣʋ ŋgʋ kɩkpaɖɩ ɖeu yɔ. (Adu. 12:28) Lɩmaɣza ana ɖɔɖɔ Daviid kaawɛna, mbʋ pʋyɔɔ yɔ, eheyi Yehowa se: «Ŋwɩlɩɣ-m wezuu nʋmɔʋ, ñɔ-cɔlɔ laŋhɛzɩyɛ tɔyɩ yem; ña-nɩwaŋ tɛɛ, leleŋ maatɛŋ wɛna.»—Keɣa 15:11.

11-12. (a) Alɩwaatʋ ndʋ ɖɩwɛɣ nɩɣzɛ taa yaa pitiki-ɖʋ yɔɔɔ yɔ, pɩwɛɛ se ɖɩkpa ɖa-tɩ nɛ ɖɩtaala we? (b) Alɩwaatʋ ndʋ ɖɩlɩzɩɣ aleɣya wena ɖɩlakɩ yɔ, tɔm ndʋ tɩwɛ Filiipi mba 4:8 taa yɔ, ɛzɩma tɩpɩzɩɣ nɛ tɩsɩnɩ-ɖʋ?

¹¹ Alɩwaatʋ ndʋ ɖɩwɛɣ nɩɣzɛ taa yaa pitiki-ɖʋ yɔɔɔ yɔ, pɩtɩla ɖɩsɔɔlʋʋ se ɖɩla nabʋyʋ nɛ pɩsɩnɩ-ɖʋ nɛ ɖiyele nɩɣzʋʋ kala wena ɖɩkatɩɣ yɔ a-yɔɔ. Pɩ-taa wɛ nɩʋ se ɖɩla mbʋ, ɛlɛ pɩwɛɛ se ɖɩkpa ɖa-tɩ nɛ ɖɩtaala mbʋ Yehowa paɖɩɣ yɔ.—Efɛz. 5:10-12, 15-17.

¹² Takayaɣ ŋga apostoloo Pɔɔlɩ ma Filiipi mba yɔ ka-taa, eseɣti Krɩstʋ mba se powolo pɩ-yɔɔ nɛ pamaɣzɩɣ mbʋ «pɩwɛ siɣsiɣ, . . . kele kele, . . .pɩmʋnaa se pɔsɔɔlɩ-pʋ, [nɛ] pɩkɛ kɩbandʋ labʋ yɔ» pɩ-yɔɔ. (Kalɩ Filiipi mba 4:8.) Tɔm ndʋ Pɔɔlɩ mawa yɔ, paa pɩtɩkɛ aleɣya titukuuni ɖeyi ɖeyi yɔ, pɩpɔzʋʋ se ɖiyele nɛ tɩwɛɛnɩ ɖoŋ aleɣya wena ɖɩlɩzɩɣ yɔ a-yɔɔ. Ñaɣ pana nɛ ŋla ɛzʋnɔ: Alɩwaatʋ ndʋ payɩ ŋnaɣ tɔm piye «mbʋ» mayaɣ ŋga ka-taa yɔ, lɛɣzɩ ɖi-lone taa tɔm piye «hendu,» «filimwaa,» «takayɩsɩ,» yaa «video yɔɔ aleɣya.» Ye ŋlakɩ mbʋ yɔ, pɩsɩɣnɩ-ŋ nɛ ŋtɩlɩ aleɣya wena akɛdɩɣnɩ Ɛsɔ nɛ wena aakɛdɩɣnɩ-ɩ yɔ. Ðɩsɔɔlaa se ɖɩcaɣ wezuu nɛ pɩla nɔɔ kʋɖʋmaɣ nɛ Yehowa paɣtʋ nɛ ɛ-paɣtʋ kila. (Keɣa 118:1-3) Piyeki nɛ ɖɩwɛɛnɩ ɛhʋyɛ kele kele ñɩnɖɛ nɛ ɖɩpɩzɩ nɛ ɖɩkpɛzɩ nɩŋgbaŋaɣ lɛɛka ŋga keyeki se ɖihiɣ koboyaɣ siŋŋ yɔ.—Tʋma 23:1.

13. Pɩsa nɛ ɖihiɣ koboyaɣ siŋŋ lɛ, nɩŋgbaŋaɣ naadozo ñɩŋga ŋga pɩpɔzʋʋ se ɖɩkpɛzɩ? (Yohanɛɛsɩ 4:23, 24)

¹³ NƖŊGBAŊAƔ 3: Ñaɣ pana nɛ ŋsɩɩ Yehowa sɛtʋ kajalaɣ lone taa ñe-wezuu caɣʋ taa. Yehowa kɛnɩ ɖa-Lɩzɩyʋ, pʋyɔɔ lɛ ɛmʋnaa se ɖɩsɛɛ-ɩ. (Natʋ 4:11; 14:6, 7) Ye mbʋ, pɩcɛyaa se ɖɩsɩɩ ɛ-sɛtʋ kajalaɣ ɖeɖe nɛ pɩcɛyaa ɖɔɖɔ se ɖɩsɛɛ-ɩ ɛzɩ ɛsɔɔlʋʋ yɔ, pʋ-tɔbʋʋ lɛ se ɖɩsɛɛ-ɩ «fezuu taa nɛ toovenim taa.» (Kalɩ Yohanɛɛsɩ 4:23, 24.) Ðɩsɔɔlaa se Ɛsɔ fezuu kiɖeɖeu eɖiyi-ɖʋ ɖɛ-Ɛsɔ sɛtʋ taa nɛ pɩsa nɛ tɩla nɔɔ kʋɖʋmaɣ nɛ toovenim tɔm ndʋ tɩwɛ ɛ-Tɔm taa yɔ. Pɩpɔzʋʋ se ɖɩsɩɩ ɖɛ-Ɛsɔ sɛtʋ kajalaɣ ɖeɖe halɩ paa ɖɩwɛ ajɛɛ wena a-taa paɖɩɣ ɖɛ-Ɛsɔ sɛtʋ tʋma naayɛ nʋmɔʋ yaa wena a-taa paɖɩɣ a-tɩŋa nʋmɔʋ yɔ a-taa yɔ. Alɩwaatʋ tʋnɛ tɩ-taa, ɖo-koobiya mba paɖʋ-wɛ salaka mbʋ pʋyɔɔ yɔ pɛkɛ Yehowa Aseɣɖe Tɩnaa yɔ, pɛcɛzɩ 100. * Paa mbʋ yɔ, palakɩ mbʋ payɩ papɩzɩɣ yɔ nɛ patɩmɩɣ, pɛkpɛlɩkɩɣ, nɛ peheyiɣ lalaa ɖɛ-Ɛsɔ nɛ e-Kewiyaɣ tɔm nɛ taa leleŋ. Alɩwaatʋ ndʋ pohoŋuu-ɖʋ yaa panazɩɣ-ɖʋ yɔ, ɖa-taa pɩzɩɣ nɛ pɩla leleŋ mbʋ pʋyɔɔ yɔ, ɖɩnawa se Yehowa wɛ ɖɔ-cɔlɔ nɛ ɛkaɣ-ɖʋ wazʋʋ.—Yak. 1:12; 1 Pɩy. 4:14.

14. Ɛbɛ talɩ koobu evebu nɔɔyʋ Tajikisɩtaŋ ɛjaɖɛ taa, nɛ ɛbɛ yɔɔ?

¹⁴ Mbʋ ɛyaa nabɛyɛ katɩ pe-wezuu caɣʋ taa yɔ, pɩñɩkɩɣ niye se ye ɖɩkpɛzɩ nɩŋgbanzɩ naadozo nzɩ sɩ-tɔm ɖɩyɔɔdɩ lɛɛlɛɛyɔ yɔ pɩsɩɣnɩ-ɖʋ nɛ ɖihiɣ koboyaɣ siŋŋ paa wɛtʋ ndʋ taa ɖɩtɩɩwɛɛ yɔ. Jovidon Bobojonov lɩnɩ Tajikisɩtaŋ. Ɛɛwɛnɩ pɩnzɩ 19 lɛ, ekizaa se ɛɛlakɩ sɔɔjatʋ tʋmɩyɛ. Iyele nɛ ɖɩna mbʋ pɩtalɩ-ɩ yɔ. 4 octobre 2019 wiye, powoba nɛ pakpa-ɩ nɛ paɖʋ-ɩ salaka fenasɩ sakɩyɛ, nɛ pakpaɣ-ɩ se ɛkɛ ɛyʋ kɩdɛkɛdʋ. Pɔyɔɔdɩ mulum lakasɩ nzɩ sɩ-tɔm ɛjaɖɛ yɔɔ tɔm susuu wondu taa ajɛɛ sakɩyɛ taa. Pɔyɔɔdaa se pamabɩ-ɩ siŋŋ se patɩŋnɩ pɩ-yɔɔ nɛ pañɩɣ ɛ-yɔɔ nɛ etisi se ɛlakɩ sɔɔjatʋ tʋmɩyɛ  nɛ etisi se esuu sɔɔjatʋ wondu. Pʋwayɩ, tɔm hʋyaa kʋ ɛ-tɔm nɛ paɖʋ-ɩ salaka, nɛ ɛɛwɛ peeɖe pɩkɔɔ nɛ pɩtalɩ alɩwaatʋ ndʋ ɛjaɖɛ nɖɩ ɖɩ-ñʋʋdʋ kpeɣ-i nɛ ɛha nɔɔ se peyebi-i yɔ. Alɩwaatʋ ndʋ tɩ-tɩŋa tɩ-taa, Jovidon wobi pɩ-yɔɔ nɛ ɛɖɔkɩ ɛ-cɩŋgɩlɩm wɛtʋ nɛ etilesi taa leleŋ weyi ɛɛwɛna yɔ. Ɛbɛ sɩnɩ-ɩ nɛ ɛla mbʋ? Ɛpɩzaa nɛ ɛla mbʋ, mbʋ pʋyɔɔ yɔ paa ɛzɩmtaa lɛ, ɛɛnawa se pɩpɔzʋʋ-ɩ fezuu taa wondu.

15. Jovidon kaawɛ salaka taa lɛ, ɛzɩma ɛtɔkaɣ fezuu taa tɔɔnaɣ?

¹⁵ Jovidon kaawɛ salaka taa lɛ, paa ɛtaawɛɛnɩ Bibl nɛ ɖɛ-ɛgbɛyɛ takayaɣ nakɛyɛ yɔ, ɛtɔkaɣ fezuu taa tɔɔnaɣ. Ɛzɩma ɛpɩzaa nɛ ɛla mbʋ? Ɛ-ɛgbɛyɛ taa koobiya tiyaɣni-i tomnaɣ yɔɔ tɔɔnaɣ nɛ pamaɣaɣ evemiye mayaɣ huyiŋ weyi ɩ-taa paɖʋwaɣ tɔɔnaɣ yɔ ɩ-yɔɔ. Pɩɩsɩnɩ Jovidon nɛ ɛpɩzɩ ɛkalɩ Bibl nɛ ɛmaɣzɩɣ tɔm ndʋ ɛkalɩɣ yɔ tɩ-yɔɔ paa evemiye nɖɩ. Palɩzɩ-ɩ salaka taa nɛ pɩtɛ lɛ, lɔŋ ɛnɛ ɛtasɩ mba patɩtɩɩkatɩtɩ kala sɔsɔna yɔ pa-taa paa anɩ: «Tɩ-yɔɔ wɛʋ waɖɛ nɖɩ ŋwɛnɩ lɛɛlɛɛyɔ yɔ, pɩcɛyɩ siŋŋ se ŋlabɩnɩ-ɖɩ tʋmɩyɛ kiya nɛ ŋkalɩɣ Ɛsɔtɔm nɛ ɖɛ-ɛgbɛyɛ takayɩsɩ nɛ pɩsa nɛ ŋtɩlɩ Yehowa camɩyɛ nɛ pɩkɩlɩ.»

16. Ɛbɛ yɔɔ Jovidon kaakam ɛ-lɩmaɣza?

¹⁶ Ðo-koobu ɛnʋ, ɛcaɣ wezuu nɛ pɩla nɔɔ kʋɖʋmaɣ nɛ Yehowa paɣtʋ nɛ ɛ-paɣtʋ kila. Mbʋ ɛzɩ eewobi pɩ-yɔɔ nɛ ɛmaɣzɩɣ lɩmaɣza kɩdɛkɛda nɛ ɛcaɣ wezuu kɩdɛkɛdʋʋ lɛ, ɛɛkam  ɛ-lɩmaɣza Yehowa nɛ mbʋ pɩmʋ ñɩm ɛlɛ ɛsɩndaa yɔ pɩ-yɔɔ na. Jovidon kpakaɣ alɩwaatʋ nɛ ɛmaɣzɩɣ ɛzɩma Ɛsɔ wondu kɩlɩzɩtʋ wɛ kajʋka yɔ pɩ-yɔɔ. Paa tanaŋ ŋgʋ kɩ-tɛɛ lɛ, sumasɩ teɣaɣ hendu nɛ pifeziɣ-i. Ðoo taa lɛ, ɛkpakaɣ alɩwaatʋ nɛ ɛcɔŋnɩ fenaɣ nɛ tɩɩnzɩ. Ɛyɔɔdaa se: «Kʋjɔŋ ɛnɩ ɩlɩnɩ Yehowa cɔlɔ nɛ iyeba nɛ mehiɣ taa leleŋ nɛ ɖoŋ kpazʋʋ.» Ye ɖɩwɛnɩ ɛsɩmɩyɛ fezuu taa nɛ tomnaɣ yɔɔ wondu ndʋ Yehowa haɣ-ɖʋ yɔ tɩ-yɔɔ yɔ, ɖihikiɣ taa leleŋ, nɛ taa leleŋ ɛnɩ ɛpɩzɩɣ ɛsɩnɩ-ɖʋ nɛ ɖɩɖɔkɩ ɖa-laŋa.

17. Alɩwaatʋ ndʋ ɖɩkatɩɣ wɛtʋ ndʋ tɩnɩɣzɩnɩ Jovidon ñɩndʋ yɔ, ye ɖiwobi pɩ-yɔɔ nɛ ɖɩɖɔkɩ ɖa-laŋa yɔ, ɛbɛ lɩɣ pɩ-taa? (1 Pɩyɛɛrɩ 1:6, 7)

¹⁷ Pɩtasɩ lɛ, Jovidon sɩ Yehowa sɛtʋ kajalaɣ lone taa. Ɛɛnawa se pɩcɛyaa se ewolo pɩ-yɔɔ nɛ ɛɖɔkɩ ɛ-cɩŋgɩlɩm wɛtʋ Ɛsɔ toovenim tʋ ɛsɩndaa. Yesu yɔɔdaa se: «Yehowa ñɛ-Ɛsɔ pɩwɛɛ se ŋsɛɛ, nɛ e-ɖeke koŋ pɩwɛɛ se ŋla tʋmɩyɛ kiɖeɖeye.» (Luka 4:8) Sɔɔjanaa ñʋndɩnaa nɛ sɔɔjanaa lalaa paasɔɔlaa se Jovidon ekizi se ɛɛtasɩɣ kɛʋ Yehowa Aseɣɖe Tʋ. Ɛlɛ, ɛtɩmaɣ siŋŋ paa evemiye nɖɩ nɛ paa ɖoo wena nɛ ɛpɔzʋʋ Yehowa se ɛsɩnɩ-ɩ nɛ ewolo pɩ-yɔɔ nɛ ɛɖɔkɩ kpam nɛ etaalesi e-siɣsiɣ wɛtʋ. Paa paamuli Jovidon nɛ palabɩ-ɩ kañatʋ lakasɩ yɔ, ewobi pɩ-yɔɔ nɛ ɛɖɔkɩ e-siɣsiɣ wɛtʋ. Mbʋ pɩlɩ pɩ-taa yɔ lɛ se lɛɛlɛɛyɔ Jovidon taa wɛ leleŋ siŋŋ mbʋ pʋyɔɔ yɔ, ɛwɛnɩ nabʋyʋ; ɛlɛ pʋcɔ nɛ pakpaɣ-ɩ, pamakɩ-ɩ nɛ paɖʋʋ-ɩ salaka lɛ, ɛtaawɛɛnɩ-pʋ. Mbʋ yɔ: E-tisuu kpa ɖoŋ nɛ pɩkɩlɩ mbʋ pʋyɔɔ yɔ pɩtakɩ-pʋ.—Kalɩ 1 Pɩyɛɛrɩ 1:6, 7.

18. Ɛzɩma ɖɩpɩzɩɣ ɖɩla nɛ ɖiwolo pɩ-yɔɔ nɛ ɖɩwɛɛ koboyaɣ taa?

¹⁸ Yehowa sɩm mbʋ pɩpɔzʋʋ-ɖʋ se pɩsa nɛ ɖihiɣ koboyaɣ siŋŋ yɔ. Ye ŋkpɛzɩ nɩŋgbanzɩ naadozo nzɩ siyeki se ŋhiɣ koboyaɣ siŋŋ yɔ, ŋpɩzɩɣ ŋwolo pɩ-yɔɔ nɛ ŋwɛɛ koboyaɣ taa paa ŋkatɩɣ kala sɔsɔna yɔ. Ðɩnɛ ɛlɛ ña ɖɔɖɔ ŋkaɣ pɩzʋʋ nɛ ŋyɔɔdɩ se: «Samaɣ ŋga [Yehowa] kɛ kɛ-Ɛsɔ yɔ, kanɩ leleŋ!»—Keɣa 143:15.