CAAMA you naalɛ ñɩŋgʋ alɩwaatʋ taa, Naazii mba sɔɔja sɔsɔ nɔɔyʋ heyi Yehowa Aseɣɖe Tɩnaa nabɛyɛ se: «Ye mɩ-taa nɔɔyʋ ekizaa se eeyouni Fransɩ yaa Aŋgletɛɛrɩ yɔ, pakʋʋ mɩ-tɩŋa.» Paa Naazii sɔɔjanaa kaasɩŋ pɔ-cɔlɔ peeɖe nɛ pɔhɔɔlɩ malɩfanaa yɔ, ɖo-koobiya mba, pa-taa paa kʋɖʋm tɩmaanɩ Yehowa paɣtʋ yɔɔ. Paawɩlaa se pɛwɛnɩ abalɩtʋ siŋŋ! Pa-kɩɖaʋ wɩlɩɣ lɩmaɣza wena ɖa Yehowa Aseɣɖe Tɩnaa ɖɩwɛna yɔ: Ðikiziɣ se ɖɩɩlakɩ yoŋ weyi palakɩ ɛjaɖɛ ɖɩnɛ ɖɩ-yɔɔ yɔ. Halɩ alɩwaatʋ ndʋ pañazɩɣ-ɖʋ se pakʋʋ-ɖʋ yɔ, ɖɩɩɖʋʋ nesi ɛjaɖɛ ɖɩnɛ ɖɩ-yɔɔ yoŋ.

1. ƐSƆ SAMAƔ TAA MBA TƖŊA KAAKƐ ƐJAÐƐ KƲÐƲMÐƖYƐ TAA ƐYAA

Caanaʋ taa lɛ, Yehowa kaakpeɣli ɛ-samaɣ ɛjaɖɛ kʋɖʋmɖɩyɛ taa, nɖɩ lɛ Izrayɛɛlɩ. Ɛɛya Izrayɛɛlɩ mba se ‘ɛ-samaɣ ɛyaa kpeekpe taa.’ (Ejl. 19:5) Ɛsɔ kaaha-wɛ ɖɔɖɔ tɛtʋ nɛ hɔɔlʋʋ. Ye mbʋ, alɩwaatʋ ndʋ Ɛsɔ ɖʋ Izrayɛɛlɩ mba paɣtʋ se poyooni ajɛɛ lɛɛna yɔ, pɩtaakɛ Ɛsɔ sɛyaa lalaa poyowaɣna yaa pakʋwaɣ. *

Sɔnɔ, Ɛsɔ sɛyaa toovenim mba lɩnɩ «ajɛɛ kpeekpe nɛ cejewe kpeekpe nɛ samasɩ kpeekpe nɛ kʋnʋmɩŋ kpeekpe taa.» (Natʋ 7:9) Ye Ɛsɔ samaɣ taa mba iwoki you yɔ, papɩzɩɣ nɛ poyooni Ɛsɔ sɛyaa lalaa nɛ halɩ pakʋ-wɛ.

 2. YEHOWA KAAÐƲ PAƔTƲ IZRAYƐƐLƖ MBA SE POWOLO YOU

Caanaʋ taa lɛ, Yehowa heyaɣni Izrayɛɛlɩ mba alɩwaatʋ ndʋ powolo you yɔ nɛ mbʋ pʋyɔɔ pɩpɔzʋʋ se pala you ŋgʋ yɔ. Kɩɖaŋ nɩɩyɩ yɔ. Pɩsa nɛ Yehowa hʋʋnɩ Kanaŋ mba tɔm lɛ, eheyi Izrayɛɛlɩ mba se poyooni-wɛ; paasɩm-wɛ se pɛsɛɣ aleewaa, pacakaɣ kʋzʋʋ kɩdɛkɛdʋʋ wezuu siŋŋ nɛ pakpakaɣ pe-piya nɛ palaɣ kɩlaŋ. Yehowa kaaɖʋ Izrayɛɛlɩ mba paɣtʋ se paɖɩzɩ ɛyaa mba paawɛ peeɖe yɔ nɛ pɩsa nɛ paɖɩzɩ lakasɩ kɩdɛkɛdɩsɩ nzɩ Lidaʋ Tɛtʋ taa nɛ Izrayɛɛlɩ mba ɩtaakɔɔ nɛ palakɩ-sɩ. (Lev. 18:24, 25) Izrayɛɛlɩ mba mʋ Lidaʋ Tɛtʋ nɛ pɩtɛ lɛ, nabʋyʋ taa Ɛsɔ heyi-wɛ se poyooni po-koyindinaa mba panazaɣ-wɛ yɔ. (2 Sam. 5:17-25) Ɛlɛ Yehowa tɩha Izrayɛɛlɩ mba nʋmɔʋ kpa se pa-maɣmaɣ palɩzɩ se powoki you. Alɩwaatʋ ndʋ palakaɣ mbʋ yɔ, ɖoŋ ɖoŋ lɛ pɩkɔŋnaɣ-wɛ kaɖɛ siŋŋ.—Kɩg. 14:41-45; 4 Aw. 35:20-24.

Sɔnɔ, Yehowa tɩha ɛyaa waɖɛ se pala you. Ajɛɛ lakɩ you ɛyaa kɛzɛsɩ yɔɔ na ɛlɛ pɩtɩkɛ Ɛsɔ kɛzɛsɩ yɔɔ. Palakɩ you se pamʋ tɛtʋ yaa pehiɣ liidiye nɛ pɩkɩlɩ yaa palakɩ you politiki lɩmaɣza naayɛ yɔɔ. Ɛlɛ mba pɔyɔɔdʋʋ se palakɩ you Ɛsɔ hɩɖɛ taa se pakandɩyɩ pɛ-Ɛsɔ sɛtʋ yɔɔ yaa se pakʋ Ɛsɔ koyindinaa yɔ, suwe ɖɩpɩzɩɣ ɖɩyɔɔdɩ pɩlɩɩnɩ pɔ-yɔɔ? Yehowa kaɣ kandɩyʋʋ ɛ-sɛyaa toovenim mba yɔɔ nɛ ɛɖɩzɩ e-koyindinaa cee wayɩ you nakʋyʋ taa; you ŋgʋ lɛ Armaagedɔɔ you. (Natʋ 16:14, 16) Pɩtɩkɛ Ɛsɔ sɛyaa mba pɛkɛ ɛyaa yɔ mba kaɣnɩ labʋ you ŋgʋ, ɛlɛ Ɛsɔ tɛ sɔɔjanaa tɩŋa kaɣ kɛʋ feziŋ.—Natʋ 19:11-15.

3. IZRAYƐƐLƖ MBA TAAKƲƲ ƐYAA MBA PAWƖLAƔ SE PƐWƐNƖ TISUU YEHOWA YƆƆ YƆ

Caanaʋ taa lɛ, ɖoŋ ɖoŋ lɛ Izrayɛɛlɩ mba sɔɔjanaa naɣaɣ mba pawɩlaɣ se pɛwɛnɩ tisuu Yehowa yɔɔ yɔ pa-pʋtɔdɩyɛ; nɛ pakʋwaɣ mba Yehowa yɔɔdaa se pamʋnɩ sɩm yɔ pe-ɖeke na. Iyele nɛ ɖɩyɔɔdɩ kɩɖaŋ naalɛ tɔm. Paa Yehowa kaaɖʋ Izrayɛɛlɩ mba paɣtʋ se paɖɩzɩ Yeriikoo yɔ, patɩkʋ Rahaabɩ nɛ ɛ-hɔʋ taa mba mbʋ pʋyɔɔ yɔ ɛwɩlaa se ɛwɛnɩ tisuu. (Yoz. 2:9-16; 6:16, 17) Pʋwayɩ, patɩɖɩzɩ  Gabawɔɔ tɛtʋ mbʋ pʋyɔɔ yɔ Gabawɔɔ mba wɩlaa se peseɣ Ɛsɔ sɔɔndʋ.—Yoz. 9:3-9, 17-19.

Sɔnɔ, ajɛɛ wena ayouni ɖama yɔ aafɛɣ ɛyaa mba pawɩlɩɣ se pɛwɛnɩ tisuu yɔ. Nɛ nabʋyʋ taa ajɛɛ kaayouni ɖama lɛ, pakʋʋ ɛyaa mba patɩkɛ sɔɔjanaa yɔ.

4. PƖƖPƆZAA SE IZRAYƐƐLƖ MBA ƖÐƆ PAƔTƲ NDƲ ƐSƆ ÐƲ YOU LABƲ YƆƆ YƆ TƖ-YƆƆ

Caanaʋ taa lɛ, Yehowa pɔzaɣ Izrayɛɛlɩ mba se pala you nɛ pɩla nɔɔ kʋɖʋmaɣ nɛ ɛ-paɣtʋ. Kɩɖaŋ nɩɩyɩ yɔ. Nabʋyʋ taa, pʋcɔ nɛ poyooni tɛtʋ natʋyʋ lɛ, Ɛsɔ pɔzaɣ-wɛ se peheyi-tʋ se tiyele nɛ ‘laŋhɛzɩyɛ wɛɛ pa nɛ tʋ pɛ-hɛkʋ taa.’ (Wp. 20:10) Yehowa pɔzaɣ ɖɔɖɔ Izrayɛɛlɩ mba sɔɔjanaa se peyele nɛ pa-maɣmaɣ nɛ lone nɖɩ ɖɩ-taa pɛwɛɛ yɔ pɩwɛɛ kele kele nɛ pɔɖɔ wezuu kɩbaŋʋ caɣʋ paɣtʋ ndʋ Yehowa ɖʋwa yɔ tɩ-yɔɔ. (Wp. 23:10-15) Ajɛɛ wena aacɔ Izrayɛɛlɩ nɛ ata yɔ, a-taa sɔɔjanaa youni tɛtʋ natʋyʋ nɛ pamʋ-tʋ lɛ, ɖoŋ ɖoŋ lɛ pakpaɣ tɛtʋ ndʋ tɩ-taa halaa nɛ ɖoŋ nɛ pasʋʋnɩ-wɛ. Ɛlɛ Yehowa taaha Izrayɛɛlɩ mba nʋmɔʋ se pala mbʋ. Ye poyoni tɛtʋ natʋyʋ nɛ pamʋ-tʋ nɛ pakpa halʋ nɔɔyʋ nɛ ɛkɛ yom yɔ, pɩpɔzʋʋ se fenaɣ kʋɖʋmaɣ ɛtɛ pʋcɔ nɛ nɔɔyʋ kpaɣ-ɩ nɛ ɛpɩsɩ ɛ-halʋ.—Wp. 21:10-13.

Sɔnɔ, ajɛɛ sakɩyɛ nɩnɩ ɖama nɛ aɖʋ paɣtʋ ndʋ tɩ-yɔɔ pɩwɛɛ se pɔɖɔ alɩwaatʋ ndʋ paalakɩ yoŋ yɔ. Paa paɣtʋ ndʋ tɩ-kaɖʋwa ɛkɛnɩ se pakandɩyɩ mba patɩkɛ sɔɔjanaa yɔ pɔ-yɔɔ yɔ, pɩlabɩ pʋtɔdɩyɛ se ɖoŋ ɖoŋ lɛ pamaɣnɩ paɣtʋ ndʋ tɩ-yɔɔ.

5. ƐSƆ LABƖ YOU SE ƐLƲ Ɛ-ƐJAÐƐ YƆƆ

Caanaʋ taa lɛ, Yehowa labɩ you Izrayɛɛlɩ mba lone taa; nɛ ɖoŋ ɖoŋ lɛ ɛlabɩ piti lakasɩ nɛ pɩsa nɛ pawa. Ɛzɩma Yehowa sɩnɩ Izrayɛɛlɩ mba nɛ pawa Yeriikoo tɛtʋ? Ɛzɩ Yehowa yɔɔdʋʋ yɔ, alɩwaatʋ ndʋ Izrayɛɛlɩ mba mabɩ ‘kubusi lɛ, kolonzi kpɛzɩ nɛ sitii nɛ sɩɖa wamm,’ nɛ pɩwɛɛ-wɛ kɛlɛʋ se pamʋ tɛtʋ ndʋ. (Yoz. 6:20) Nɛ poyowaɣni Amoori mba lɛ, ɛzɩma pawabɩ-wɛ? «[Yehowa] tɔ-wɛ pɛɛ sɔsɔna nɛ ɛsɔdaa kiŋ, . . . nɛ sakɩyɛ sɩ nɛ ɖɔmbɛɛ pɩkɩlɩ mba Izrayɛɛlɩ piya lom-wɛ laɣɖɛ yɔ.»—Yoz. 10:6-11.

TOOVENIM KRƖSTƲ MBA KƐ LAŊHƐZƖYƐ ÑƖNƖYAA

Ɛzɩ ɖɩnaʋ yɔ, sɔnɔ ɖɛ-wɛtʋ wɛ ndɩ kpem nɛ caanaʋ taa Izrayɛɛlɩ ñɩndʋ. Ɛlɛ pɩtɩkɛ pi-ɖeke pɩ-yɔɔ ɖɩɩlakɩ you. Lɩmaɣza lɛɛna wɛɛ ɖɔɖɔ. A-taa naɖɩyɛ yɔ. Ɛsɔ kaayɔɔdaa se kɛdɛzaɣ kɩyakɩŋ taa lɛ, mba ɛwɩlɩ-wɛ tɔm yɔ «paakaɣ tasʋʋ kpɛlɩkʋʋ you labʋ,» nɛ paakaɣ ɖɔɖɔ ɖʋʋ nesi yoŋ ɛnɩ. (Iza. 2:2-4) Pɩtasɩ lɛ, Krɩstʋ yɔɔdaa se ɛ-tɔmkpɛlɩkɩyaa ‘tɩkɛ ɛjaɖɛ yɔɔ mba’; nɛ paaɖʋʋ nesi ɛjaɖɛ ɖɩnɛ ɖɩ-yɔɔ yoŋ.—Yoh. 15:19.

Krɩstʋ seɣti ɛ-wayɩ tɩŋɩyaa se pala nɛ pɩcɛzɩ mbʋ. Eheyi-wɛ se pekizi wɛtʋ ndʋ tɩkɔŋnɩ ɖama caɣnʋʋ, pana, nɛ you yɔ. (Mat. 5:21, 22) Pɩtasɩ lɛ, eheyi ɛ-wayɩ tɩŋɩyaa se pɛkɛ «laŋhɛzɩyɛ ñɩnɩyaa» nɛ pɔsɔɔlɩ po-koyindinaa.—Mat. 5:9, 44.

Ɛzɩma ɖɩpɩzɩɣ nɛ ɖɩla mbʋ? Pɩtʋʋ fɛyɩ se ɖɩtɩsɔɔlɩ se ɖɩla you, ɛlɛ ɛzɩ ɖa-taa wɛnɩ nɔɔyʋ nɛ pɩpɩzɩɣ nɛ pɩkɔnɩ you yaa tayʋʋ ɛgbɛyɛ taa? Iyele nɛ ɖɩñaɣ pana siŋŋ nɛ ɖɩlɔ wɛtʋ ndʋ, nɛ ɖɩlɔ ɖɔɖɔ wɛtʋ ndʋ tɩnɩɣzɩnɩ-tʋ yɔ.—Yak. 4:1, 11.

Ðɩɩɖʋʋ ɖɔ-nɔɔ ajɛɛ yoŋ taa, ɛlɛ ɖɩñakɩ pana siŋŋ se laŋhɛzɩyɛ nɛ sɔɔlɩm pɛwɛɛ ɖɛ-hɛkʋ taa. (Yoh. 13:34, 35) Ðɩwɛɣ nɛ ɖɩɖaŋɩɣ kɩyakʋ ŋgʋ Yehowa kaɣ ɖɩzʋʋ yoŋ tɩŋa tam yɔ lɛ, tɛtɛ nɛ ɖiwolo pi-yɔɔ nɛ ɖɩtɛ ɖa-taa se ɖɩɩɖʋʋ ɖɔ-nɔɔ ɛjaɖɛ tɔm taa.—Keɣa 45:10.