1. Ɛzɩma Ɛsɔ kaakpazɩ ɖoŋ ɛ-sɛyaa siɣsiɣ tɩnaa caanaʋ taa?

 ÐOŊ ÐOŊ lɛ, Bibl yɔɔdʋʋ ɛyaa mba pɔɖɔkɩ pe-siɣsiɣ wɛtʋ yɔ pɔ-tɔm se pɛwɛ ɖoŋ. Ɛlɛ pataamaɣzɩɣ se pɛwɛ ɖoŋ paa ɛzɩmtaa. Alɩwaatʋ natʋyʋ taa, Wiyaʋ Daviid maɣzaɣ se ‘ɛwɛ ɖoŋ ɛzɩ pʋʋ yɔ;’ ɛlɛ alɩwaatʋ lɛɛtʋ taa lɛ, ‘sɔɔndʋ paɣzɩ-ɩ kpaʋ.’ (Keɣ. 30:7) Alɩwaatʋ ndʋ Ɛsɔ fezuu kaawɛ Samsɔɔ yɔɔ yɔ, ɛɛwɛ ɖoŋ siŋŋ, paa mbʋ yɔ ɛɛnawa se ye Ɛsɔ ɛtɩha-ɩ ɖoŋ yɔ ‘ɛhʋʋ nɛ ɛpɩsɩ ɛzɩ ɛyaa lalaa yɔ.’ (Tɔh. 14:​5, 6; 16:17) Yehowa kaahanɩ ɛ-sɛyaa siɣsiɣ tɩnaa mba ɖoŋ.

2. Ɛbɛ yɔɔ apostoloo Pɔɔlɩ yɔɔdaa se alɩwaatʋ ndʋ ɛkɛ ɛjam yɔ, ɖɩnɛ ɛlɛ ɛwɛ ɖoŋ? (2 Kɔrɛntɩ mba 12:​9, 10)

² Apostoloo Pɔɔlɩ kaaɖiɣzinaa se pɩpɔzʋʋ se Yehowa ɛha-ɩ ɖoŋ. (Kalɩ 2 Kɔrɛntɩ mba 12:​9, 10.) Ɛzɩ ɖa-taa sakɩyɛ yɔ, Pɔɔlɩ kaalʋbɩnɩ kʋdɔmɩŋ. (Gal. 4:​13, 14) Nabʋyʋ taa pɩɩwɛ-ɩ kaɖɛ ɖɔɖɔ se ɛla mbʋ pɩtʋʋzaa yɔ. (Roma 7:​18, 19) Nɛ nabʋyʋ taa ɖɔɖɔ lɛ, ɛnɩɣzaɣ nɛ sɔɔndʋ kpaɣaɣ-ɩ nɛ mbʋ pɩpɩzaɣ se pɩtalɩ-ɩ yɔ. (2 Kɔr. 1:​8, 9) Paa mbʋ yɔ alɩwaatʋ ndʋ Pɔɔlɩ kɛ ɛjam yɔ, ɖɩnɛ ɛlɛ ɛwɛ ɖoŋ. Ɛzɩma tɩyɛ? Yehowa kaaha Pɔɔlɩ ɖoŋ weyi pɩpɔzaɣ-ɩ yɔ. Ɛɛlaba nɛ Pɔɔlɩ kpa ɖoŋ.

3. Tɔm ndʋ yɔɔ ɖɩkaɣ cosuu tɔm ñʋʋ kʋnɛ kɩ-taa?

³ Yehowa labɩ tamaɣ se ɛlakɩ nɛ ɖa ɖɔɖɔ ɖɩkpa ɖoŋ. (1 Pɩy. 5:10) Ɛlɛ ye ɖɩtɩñaɣ pana yɔ, ɖɩɩpɩzɩɣ nɛ ɖihiɣ ɖoŋ weyi ɛhaɣ yɔ. Iyele nɛ ɖɩkpaɣ kɩɖaʋ nakʋyʋ: Ye tɔɔnaɣ ɛwɛ ñanaɣ taa yɔ, pɩpɔzʋʋ se ŋtɔɔ-kɛ pʋcɔ nɛ kawazɩ-ŋ. Mbʋ ɖɔɖɔ, Yehowa sɔɔlɩ faaa se ɛha-ɖʋ ɖoŋ weyi pɩpɔzʋʋ-ɖʋ yɔ, ɛlɛ pʋcɔ nɛ ɖoŋ ɛnɩ ɩwazɩ-ɖʋ lɛ, pɩwɛɛ se ɖɩkpɛzɩ nɩŋgbanzɩ nzɩ pɩpɔzʋʋ yɔ. Ɛbɛ Yehowa ha-ɖʋ se pɩsɩnɩ-ɖʋ nɛ ɖɩkpa ɖoŋ? Nɛ ɛbɛ pɩwɛɛ se ɖɩla  pʋcɔ nɛ ɖihiɣ ɖoŋ ɛnɩ? Yele nɛ ɖɩtazɩ nɛ ɖɩna ɛzɩma Yehowa kaakpazɩ Bibl taa ɛyaa nabɛyɛ 3 ɖoŋ yɔ. Pɩkaɣ-ɖʋ sɩnʋʋ nɛ ɖicosi tɔm pɔzʋʋ mbʋ pɩ-yɔɔ. Ɛyaa mba yɔ: nayʋ Yoonaa, Yesu ɖoo Maarɩɩ nɛ apostoloo Pɔɔlɩ. Ðɩkaɣ naʋ ɖɔɖɔ ɛzɩma Yehowa wɛɛ nɛ ɛkpazɩɣ ɛ-sɛyaa ɖoŋ sɔnɔ yɔ.

4. Ɛbɛ ɖɩpɩzɩɣ nɛ ɖɩla nɛ Yehowa kpazɩ-ɖʋ ɖoŋ?

⁴ Mbʋ ɖɩpɩzɩɣ nɛ ɖɩla nɛ Yehowa kpazɩ-ɖʋ ɖoŋ yɔ pɩ-taa nabʋyʋ lɛ se ɖɩtɩmnɩ-ɩ. Yehowa kaɣ cosuu ɖa-adɩma yɔɔ nɛ ɛha-ɖʋ «ɖoŋ weyi ɩcɛzɩ ɛyʋ ɖoŋ yɔ.» (2 Kɔr. 4:7) Ye ɖɩkalɩɣ Ɛsɔtɔm nɛ ɖɩmaɣzɩɣ tɩ-yɔɔ camɩyɛ yɔ, pɩpɩzɩɣ pɩsɩnɩ-ɖʋ ɖɔɖɔ nɛ ɖɩkpa ɖoŋ. (Keɣ. 86:11) Tɔm ndʋ Yehowa heyiɣ-ɖʋ Bibl taa yɔ «tɩwɛnɩ ɖoŋ.» (Ebr. 4:12) Ye ŋtɩmɩɣnɩ Yehowa nɛ ŋkalɩɣ ɛ-Tɔm yɔ, ŋkaɣ hiɣu ɖoŋ weyi pɩpɔzʋʋ-ŋ yɔ nɛ ŋɖɔkɩ ña-laŋɩyɛ kala taa, ŋwɛɛ taa leleŋ taa yaa ŋla tʋmɩyɛ kaɖɛ ñɩnɖɛ naɖɩyɛ. Yele nɛ ɖɩna ɛzɩma Yehowa kaakpazɩ nayʋ Yoonaa ɖoŋ yɔ.

5. Ɛbɛ yɔɔ pɩɩpɔzaa se pakpazɩ nayʋ Yoonaa ɖoŋ?

⁵ Pɩɩpɔzɩ nayʋ Yoonaa abalɩtʋ. Yehowa kaaɖʋ-ɩ tʋmɩyɛ kaɖɛ ñɩnɖɛ naɖɩyɛ, nɛ sɔɔndʋ yɔɔ lɛ ɛsʋʋ mɛlɛ nɛ ese se ewolo lone lɛɛɖɛ taa. Piyeba nɛ ɛɖʋ ɛ nɛ mɛlɛ sʋyaa lalaa pe-weziŋ kaɖɛ taa helim sɔsɔm nabʋyʋ taa. Mɛlɛ sayaa kpaɣ Yoonaa nɛ pɛpɛɖɩ-ɩ teŋgu taa lɛ, kpakpayaɣ sɔsɔɔ nakɛyɛ libi-i nɛ ɛwɛɛ ko-lotu taa cɩkpɛndʋʋ sɔsɔʋ taa. Ŋmaɣzɩɣ se ɛzɩma pɩɩlabɩ Yoonaa? Pʋtɔma kiɖe tɛɛ lɛ, ɛmaɣzaɣ se ɛkaɣ sɩbʋ peeɖe. Pʋtɔma ɖɔɖɔ yɔ ɛmaɣzaɣ se Yehowa lɔ-ɩ. Pɩtʋʋ fɛyɩ se Yoonaa kaawɛ nɩɣzɛ taa kpem.

6. Ɛzɩ Yoonaa 2:​1, 2, 7 yɔɔdʋʋ yɔ, alɩwaatʋ ndʋ Yoonaa kaawɛ kpakpayaɣ lotu taa yɔ, ɛbɛ kaakpazɩ-ɩ ɖoŋ?

⁶ Ɛbɛ Yoonaa laba se pɩsa nɛ ehiɣ ɖoŋ alɩwaatʋ ndʋ ɛɛwɛ kpakpayaɣ lotu taa e-ɖeke yɔ? Kajalaɣ lɛ, ɛtɩmnɩ Yehowa. (Kalɩ Yoonaa 2:​1, 2, 7.) Paa Yoonaa kaamanɩ Yehowa paɣtʋ yɔɔ yɔ, ekpiɖi mbʋ ɛlaba yɔ pɩ-yɔɔ, nɛ ɛɛwɛnɩ tisuu se Yehowa kaɣ welisuu ɛ-adɩma. Nabʋlɛ lɛ, Yoonaa kaamaɣzɩ Masɩ yɔɔ. Ɛbɛ yɔɔ ɖɩpɩzɩɣ nɛ ɖɩyɔɔdɩ mbʋ? Ɛ-adɩma wena awɛ Yoonaa ñʋʋ 2 taa yɔ a-taa, ɛlabɩnɩ tʋmɩyɛ tɔm pee nɛ tɔm loyisi sakɩyɛ nzɩ sɩwɛ Keɣsi taa yɔ. (Kpaɣ Yoonaa 2:​2, 5 nɛ ŋmaɣzɩnɩ Keɣa 69:1; 86:7.) Pɩnaɣ kpayɩ kpayɩ se Yoonaa kaasɩm masɩ nzɩ camɩyɛ. Siyeba nɛ ɛ-taa tɛ se Yehowa kaɣ-ɩ sɩnʋʋ. Yehowa yabɩ Yoonaa ñʋʋ nɛ pʋwayɩ lɛ, Yoonaa tɛ ɛ-taa se ɛlakɩ tʋmɩyɛ nɖɩ Yehowa kaaɖʋ-ɩ yɔ.—Yon. 2:10–3:4.

7-8. Alɩwaatʋ ndʋ Tayɩwaanɩ koobu abalɩñɩnʋ nɔɔyʋ kaawɛɛ nɛ ɛlʋkɩnɩ kala yɔ, ɛbɛ kaakpazɩ-ɩ ɖoŋ?

⁷ Yoonaa kɩɖaʋ pɩzɩɣ nɛ kɩsɩnɩ-ɖʋ alɩwaatʋ ndʋ ɖɩkatɩɣ tɩlasɩ ndɩ ndɩ yɔ. Payaɣ koobu abalɩñɩnʋ nɔɔyʋ se Zhiming, b ɛwɛ Tayɩwaanɩ ɛjaɖɛ taa. Ɛwɛɛ nɛ ɛlʋkɩnɩ kʋdɔmɩŋ sɔsɔŋ ndɩ ndɩ. Pɩtasɩ lɛ, ɛ-hɔʋ taa mba wɛɛ nɛ pakaɖɩɣnɩ-ɩ siŋŋ mbʋ pʋyɔɔ yɔ ɛkɛ Yehowa Aseɣɖe Tʋ. Adɩma nɛ kpɛlɩkʋʋ sɩnɩ-ɩ nɛ ehiɣ ɖoŋ Yehowa cɔlɔ. Ɛyɔɔdaa se: «Nabʋyʋ taa, alɩwaatʋ ndʋ mankatɩɣ tɩlasɩ yɔ, manɩɣzɩɣ siŋŋ nɛ pɩɩsaŋ se ma-lɩmaɣza ɩcaɣ a-ɖeɖe nɛ mala man-tɩ yɔɔ kpɛlɩkʋʋ.» Ɛlɛ ɛɛlɔʋ lidaʋ. Ɛyɔɔdaa se: «Kajalaɣ lɛ, mantɩmɩɣnɩ Yehowa. Pʋwayɩ lɛ manɖʋ écouteur waa nɛ mewelisiɣ Kewiyaɣ hendu. Halɩ nabʋyʋ taa menteɣ hendu ndʋ me-liu tɛɛ nɛ pɩkɔɔ pɩsɩɩnɩ alɩwaatʋ ndʋ ma-lɩmaɣza hɛwa yɔ. Ðɩnɛ ɛlɛ manpaɣzɩ kpɛlɩkʋʋ.»

⁸ Tɩ-yɔɔ kpɛlɩkʋʋ kpazɩ Zhiming ɖoŋ pɩfɛyɩ yɔɔdʋʋ. Alɩwaatʋ ndʋ palabɩ-ɩ tʋmɩyɛ nɛ ɛ-yɔɔ tɩcɛbɩtɩ camɩyɛ yɔ, ɖɔkɔtɔ nɔɔyʋ heyi-i  se pɩkaɣ pɔzʋʋ se paɖʋ-ɩ calɩm mbʋ pʋyɔɔ yɔ calɩm tɩɖɔɔ ɛ-yɔɔ. Ðoo wena aɖɛwa pʋcɔ nɛ palakɩ Zhiming tʋmɩyɛ yɔ, ɛɛkalɩ koobu halɩñɩnʋ nɔɔyʋ tɔm se ɛɛwɛnɩ kʋdɔŋ kʋɖʋmʋʋ ŋgʋ nɛ palabɩ-ɩ tʋmɩyɛ. Halɩ calɩm kaatɛm koobu halɩñɩnʋ ɛnʋ ɛ-yɔɔ nɛ pɩkɩlɩ Zhiming, paa mbʋ yɔ etitisi nɛ paɖʋ-ɩ calɩm, nɛ ɛ-yɔɔ kɔma nɛ pɩcɛ. Koobu halɩñɩnʋ ɛnʋ ɛ-kɩɖaʋ sɩnɩ Zhiming nɛ ɛɖɔkɩ e-siɣsiɣ wɛtʋ.

9. Ye kaɖɛ naɖɩyɛ eyeba nɛ pitibi-ŋ yɔɔɔ yɔ, ɛbɛ ŋpɩzɩɣ nɛ ŋla? (Cɔnɩ ɖɔɖɔ kɩlɛmɩŋ.)

⁹ Alɩwaatʋ ndʋ ŋkatɩɣ tɩlasɩ yɔ, ŋnɩɣzɩɣ siŋŋ nɛ halɩ pɩwɛ-ŋ kaɖɛ se ŋtɩmnɩ Yehowa? Yaa pɩnɩɣ-ŋ siŋŋ nɛ pɩwɛɣ-ŋ kaɖɛ se ŋkpɛlɩkɩɣ? Tɩlɩ se Yehowa nɩɣ ñɔ-tɔm taa kpayɩ kpayɩ. Pʋyɔɔ lɛ, paa adɩma naayɛ kɛlɛʋ yem ŋlaba yɔ, ña-taa pɩzɩɣ nɛ pɩtɛ se ɛkaɣ-ŋ haʋ mbʋ ɖeyi ɖeyi pɩpɔzʋʋ-ŋ yɔ. (Efɛz. 3:20) Ye ŋnɩɣ wɩzasɩ ño-tomnaɣ taa yaa ña-maɣzɩm taa nɛ pɩlakɩ-ŋ kaɖɛ se ŋkalɩ tɔm yaa ŋkpɛlɩkɩ yɔ, ŋpɩzɩɣ ŋwelisi Bibl yaa ɛgbɛyɛ takayɩsɩ nzɩ pakpaɣ tataɣ yɔɔ yɔ. Ŋpɩzɩɣ ɖɔɖɔ nɛ ŋwelisi ɛgbɛyɛ hendu natʋyʋ yaa ŋcɔnɩ video nakʋyʋ jw.org yɔɔ. Yehowa sɔɔlaa se ɛkpazɩ-ŋ ɖoŋ nɛ ɛkaɣ mbʋ labʋ ye ŋtɩmɩɣnɩ-ɩ nɛ ŋñɩnɩɣ nɛ ŋnaɣ ɛzɩma ɛtɩŋɩɣnɩ Bibl nɛ ɛgbɛyɛ takayɩsɩ yɔɔ nɛ ecosuu ña-adɩma yɔɔ yɔ.

10. Ɛzɩma ɖo-koobiya Krɩstʋ mba pɩzɩɣ nɛ pakpazɩ-ɖʋ ɖoŋ?

¹⁰ Yehowa pɩzɩɣ nɛ ɛtɩŋnɩ ɖo-koobiya yɔɔ nɛ ɛkpazɩ-ɖʋ ɖoŋ. Alɩwaatʋ ndʋ ɖɩkatɩɣ tɩlasɩ yaa alɩwaatʋ ndʋ pɩwɛ-ɖʋ kaɖɛ se ɖɩla tʋmɩyɛ kaɖɛ ñɩnɖɛ naɖɩyɛ yɔ, ɖo-koobiya mba, ‘pɛhɛzɩɣ ɖa-laŋɩyɛ siŋŋ.’ (Kol. 4:​10, 11) Pɩpɔzʋʋ-ɖʋ taabalaa kɔzɩ kɔzɩ «kʋñɔŋ alɩwaatʋ taa.» (Adu. 17:17) Alɩwaatʋ ndʋ pitiki-ɖʋ yɔɔɔ yɔ, ɖo-koobiya pɩzɩɣ nɛ pasɩnɩ-ɖʋ tomnaɣ yɔɔ, pɛhɛzɩ ɖa-laŋa nɛ pasɩnɩ-ɖʋ nɛ ɖiwolo pɩ-yɔɔ nɛ ɖɩɖɔkɩ ɖe-siɣsiɣ wɛtʋ Yehowa ɛsɩndaa. Iyele nɛ ɖɩna ɛzɩma ɛyaa lalaa kaakpazɩ ɖoŋ Yesu ɖoo Maarɩɩ yɔ.

11. Ɛbɛ yɔɔ pɩɩpɔzaa se pakpazɩ Maarɩɩ ɖoŋ?

¹¹ Pɩɩpɔzaa se pakpazɩ Maarɩɩ ɖoŋ. Maɣzɩ ɛzɩma ɛɛwɛ nɩɣzɛ taa kpem yɔ pɩ-yɔɔ nɛ ŋna: Tiyiyu Gabrɩyɛɛlɩ heyi-i tʋmɩyɛ sɔsɔɖɛ nɖɩ paɖʋ-ɩ yɔ ɖɩ-tɔm. Ɛtaawalɩta, paa mbʋ yɔ pɩɩwɛɛ se ɛhaɣ hoɣa. Ɛtaawɛɛnɩ lɛɣtʋ natʋyʋ  piya yɔɔ cɔnʋʋ hɔɔlʋʋ taa, paa mbʋ yɔ pɩɩwɛɛ se ɛcɔnɩ pɩɣa ŋga kakaɣ pɩsʋʋ Mesiya yɔ kɔ-yɔɔ. Pɩtasɩ lɛ, Maarɩɩ ɛɛsɩŋ abalʋ, ye mbʋ ɛzɩma ɛpɩzɩɣ nɛ eheyi Yosɛɛfʋ se ɛ nɛ hoɣa nɛ ɛlɛ nɩɩ pɩ-taa?—Luka 1:​26-33.

12. Ɛzɩ Luka 1:​39-45 yɔɔdʋʋ yɔ, ɛzɩma Maarɩɩ laba nɛ ehiɣ ɖoŋ weyi pɩpɔzaɣ-ɩ yɔ?

¹² Ɛzɩma Maarɩɩ laba nɛ ehiɣ ɖoŋ weyi pɩɩpɔzɩ-ɩ yɔ nɛ ɛpɩzɩ nɛ ɛla ŋgee tʋmɩyɛ kaɖɛ ñɩnɖɛ nɖɩ? Ɛpɔzɩ lalaa se pasɩnɩ-ɩ. Ɛpɔzɩ Gabrɩyɛɛlɩ se ɛtasɩ-ɩ tɔm lɛɛtʋ heyuu pɩlɩɩnɩ tʋmɩyɛ nɖɩ ɖɩ-yɔɔ. (Luka 1:34) Pɩlabɩ pazɩ pʋwayɩ lɛ, ɛɖɔ nʋmɔʋ nɛ ɛkpa «pʋŋ taa, Yuuda tɛtʋ natʋyʋ taa» ɛ-hɔʋ taa tʋ Elizaabɛɛtɩ cɔlɔ. Nʋmɔʋ ŋgʋ, kɩ-ɖɔm kaawazɩ-ɩ kpem. Elizaabɛɛtɩ kaasam Maarɩɩ; nɛ Yehowa fezuu ɖoŋ taa lɛ, ɛyɔɔdɩ natʋ tɔm natʋyʋ nɛ titukuuni pɩɣa ŋga kɛwɛ Maarɩɩ lotu taa yɔ; nɛ tɔm ndʋ, tɩɩkpazɩ Maarɩɩ ɖoŋ. (Kalɩ Luka 1:​39-45.) Maarɩɩ yɔɔdaa se Yehowa ‘labɩ lakasɩ sɔsɔsɩ nɛ e-nesi.’ (Luka 1:​46-51) Yehowa tɩŋnɩ Gabrɩyɛɛlɩ nɛ Elizaabɛɛtɩ pɔ-yɔɔ nɛ ɛkpazɩ Maarɩɩ ɖoŋ.

13. Boolivii koobu halɩñɩnʋ nɔɔyʋ pɔzɩ koobiya se pasɩnɩ-ɩ lɛ, ɛzɩma pɩwazɩ-ɩ?

¹³ Ɛzɩ Maarɩɩ yɔ, ño-koobiya Krɩstʋ mba pɩzɩɣ nɛ pakpazɩ-ŋ ɖoŋ. Payaɣ koobu halɩñɩnʋ nɔɔyʋ se Dasuri, ɛwɛ Boolivii ɛjaɖɛ taa. Pɩɩpɔzaa se pakpazɩ-ɩ ɖoŋ. Pɩwɩɣaɣ ɛ-caa siŋŋ, nɛ ɛ-kʋdɔŋ taawɛɛnɩ kɔyɛ. Alɩwaatʋ ndʋ paasɩ ɛ-caa ɛnʋ ɖɔkɔtɔ tɛ yɔ, etisi faaa nɛ ɛwɛɛ ɛ-cɔlɔ se ɛcɔnɩ ɛ-yɔɔ. (1 Tim. 5:4) Pɩtaawɛɛ-ɩ kɛlɛʋ paa ɛzɩmtaa. Dasuri yɔɔdaa se: «Alɩwaatʋ sakɩyɛ taa lɛ, pɩlakaɣ-m ɛzɩ mɔlɔ nɛ mense yɔ.» Ɛpɔzaa se pasɩnɩ-ɩ? Kiɖe tɛɛ lɛ, ɛtaapɔzɩ se pasɩnɩ-ɩ. Ɛyɔɔdaa se: «Mantaasɔɔlɩ se mɛncɛyɩ koobiya. Mamaɣzaɣ se: ‘Yehowa kaɣnɩ-m sɩnʋʋ.’ Ɛlɛ pʋwayɩ, menɖiɣzinaa se ye monposuu man-tɩ nɛ ɛyaa lalaa yɔ, pɩwɩlɩɣ se mañɩnɩɣ se mɔcɔnɩ man-kala ɖeɖe men-ɖeke.» (Adu. 18:1) Dasuri kpaɣ lɩmaɣzɩyɛ se ɛmaɣ ɛ-taabalaa nabɛyɛ tɔm nɛ eheyi-wɛ wɛtʋ ndʋ tɩ-taa ɛwɛɛ yɔ. Ɛyɔɔdaa se: «Maasɩŋ ndʋ ɖeyi ɖeyi mɔyɔɔdɩ nɛ mɛnkɛdɩ ɛzɩma mon-koobiya Krɩstʋ mba kpazɩ-m ɖoŋ yɔ. Pɔkɔnɩ-ɖʋ tɔɔnaɣ ɖɔkɔtɔ tɛ nɛ pakalɩ-m Bibl masɩ nɛ pakpazɩnɩ-m ɖoŋ. Pɩkɛnɩ taa leleŋ tɔm kpem se ɖɩna se ɖɩfɛyɩ ɖe-ɖeke. Ðɩkɛ Yehowa hɔʋ taa mba. Hɔʋ ŋgʋ, kɩ-taa mba sɔɔlɩ faaa se paɖʋ-ɖʋ nesi, pasɩnɩ-ɖʋ wiu nɛ pasɩnɩ-ɖʋ nɛ ɖɩlʋbɩnɩ kala wena ɖɩkatɩɣ yɔ.»

14. Ɛbɛ yɔɔ pɩwɛɛ se ɖitisi faaa nɛ ɛgbɛyɛ taa ɛzʋtʋyaa sɩnɩ-ɖʋ?

¹⁴ Nʋmɔŋ weyi ɩ-yɔɔ Yehowa tɩŋɩɣna nɛ ɛkpazɩɣ-ɖʋ ɖoŋ yɔ, ɩ-taa nakʋyʋ lɛ ɛgbɛyɛ taa ɛzʋtʋyaa. Pɛkɛ kʋjɔŋ weyi Yehowa labɩ-ɖʋ yɔ, nɛ ɛtɩŋɩɣnɩ pɔ-yɔɔ nɛ ɛkpazɩɣ-ɖʋ ɖoŋ nɛ ɛhɛzɩɣ ɖa-laŋɩyɛ. (Iza. 32:​1, 2) Ye mbʋ, alɩwaatʋ ndʋ ŋwɛɣ nɩɣzɛ taa yɔ, heyi ɛzʋtʋyaa mbʋ pɩcɛyɩɣ-ŋ yɔ. Ye pacaɣ se pasɩnɩ-ŋ yɔ, tisi faaa nɛ pasɩnɩ-ŋ. Yehowa pɩzɩɣ nɛ ɛtɩŋnɩ pɔ-yɔɔ nɛ ɛkpazɩ-ŋ ɖoŋ.

15. Lidaʋ ŋgʋ Krɩstʋ mba tɩŋa wɛna?

¹⁵ Lidaʋ tɔm ndʋ tɩwɛ Bibl taa yɔ, tɩpɩzɩɣ nɛ tɩkpazɩ-ɖʋ ɖoŋ nɛ ɖiwolo pɩ-yɔɔ nɛ ɖɩsɛɣ Yehowa. (Roma 4:​3, 18-20) Ða Krɩstʋ mba lɛ, ɖɩwɛnɩ lidaʋ se ɖɩkaɣ caɣʋ wezuu maatɛŋ, nɛ lidaʋ ŋgʋ kɩ-wayɩ fɛyɩ. Nabɛyɛ kaɣ caɣʋ wezuu maatɛŋ paradisuu taa tɛtʋ yɔɔ, nɛ lalaa ñacaɣ wezuu maatɛŋ ɛsɔdaa. Lidaʋ ŋgʋ ɖɩwɛna yɔ, kɩsɩɣnɩ-ɖʋ se ɖɩɖɔkɩ ɖa-laŋɩyɛ kala taa, ɖisusi tɔm kɩbandʋ nɛ ɖɩla tʋma ndɩ ndɩ ɛgbɛyɛ taa. (1 Tes. 1:3) Lidaʋ ŋgʋ kɩɩkpazɩnɩ apostoloo Pɔɔlɩ ɖoŋ.

16. Ɛbɛ yɔɔ pɩɩpɔzaa se pakpazɩ apostoloo Pɔɔlɩ ɖoŋ?

¹⁶ Pɩɩpɔzaa se pakpazɩ Pɔɔlɩ ɖoŋ. Takayaɣ  ŋga ɛma Kɔrɛntɩ mba yɔ ka-taa, ɛkpaɣ ɛ-tɩ nɛ ɛmaɣzɩnɩ cʋʋ ñanaɣ ŋga kaalaɣzɩɣ yɔkʋʋ yɔ. ‘Paañɩɣ Pɔɔlɩ hɔɔlɩŋ tɩŋa taa, piisidi ɛ-ñʋʋ taa, paanazɩ-ɩ, paayaɣ-ɩ nɛ tɛtʋ.’ Halɩ e-wezuu kaawɛ kaɖɛ taa. (2 Kɔr. 4:​8-10) Pɔɔlɩ ma tɔm ndʋ alɩwaatʋ ndʋ ɛɖɔŋaɣ ɛ-Ɛsɔtɔm tiyiyu nʋmɔʋ 3 ñɩŋgʋ yɔ. Alɩwaatʋ ndʋ lɛ, Pɔɔlɩ taana se ɛ-kʋñɔmɩŋ tɩtɛmta. Samaɣ nakɛyɛ kaɣ kʋyʋʋ ɛ-yɔɔ, pɩtasɩ lɛ pakaɣ-ɩ kpaʋ, ɛkaɣ sʋʋ mɛlɛ nɛ kɩyɔkɩ, nɛ pakaɣ-ɩ ɖʋʋ salaka.

17. Ɛzɩ 2 Kɔrɛntɩ mba 4:​16-18 yɔɔdʋʋ yɔ, ɛbɛ sɩnɩ Pɔɔlɩ nɛ ɛpɩzɩ ɛlʋbɩnɩ tɩlasɩ?

¹⁷ Pɔɔlɩ kaakam ɛ-lɩmaɣza lidaʋ ŋgʋ ɛwɛna yɔ kɩ-yɔɔ; mbʋ kpazɩnɩ-ɩ ɖoŋ nɛ ɛpɩzɩ nɛ ɛɖɔkɩ ɛ-laŋɩyɛ kaɖɛ wɛtʋ ndʋ tɩ-taa. (Kalɩ 2 Kɔrɛntɩ mba 4:​16-18.) Eheyi Kɔrɛntɩ mba se paa e-tomnaɣ «ɛpʋkɩ yɔ,» ɛɛkaɣ yebu nɛ pitibi-i yɔɔɔ. Pɔɔlɩ kam ɛ-lɩmaɣza mbʋ pɩɖaŋɩ-ɩ cee wayɩ yɔ pɩ-yɔɔ. Lidaʋ ŋgʋ ɛɛwɛna se ɛkaɣ caɣʋ wezuu maatɛŋ ɛsɔdaa yɔ, ‘kɩɩwɛɛ nɛ kɩpaɣlɩɣ paɣlʋʋ yɔɔ nɛ pɩkɩlɩɣ;’ nɛ pʋyɔɔ lɛ, ɛɛtɛm ɛ-taa se ɛlʋkɩnɩ paa kaɖɛ wɛtʋ ndʋ nɛ ɛmʋ kɩhɛyʋʋ ŋgʋ. Pɔɔlɩ maɣzaɣ lidaʋ ŋgʋ kɩ-yɔɔ; piyeba nɛ ɛnaɣ ɛ-tɩ ɛzɩ «ɛpɩsɩɣ kɩfalʋ kɩyakʋ kɩyakʋ» yɔ.

18. Lidaʋ ŋgʋ Tihomir kaawɛnɩ cee wayɩ yɔɔ yɔ, ɛzɩma kɩkpazɩ ɛ nɛ ɛ-hɔʋ taa mba ɖoŋ?

¹⁸ Payaɣ koobu abalɩñɩnʋ nɔɔyʋ se Tihomir, ɛwɛ Bulɩgaarii ɛjaɖɛ taa. Lidaʋ ŋgʋ ɛɛwɛnɩ cee wayɩ yɔɔ yɔ, kɩɩkpazɩ-ɩ ɖoŋ. Pɩlakɩ pɩnzɩ nasɩyɩ yɔ, e-neu abalɩñɩnʋ Zdravko sɩbɩ kɛgbɛdɩsaɣ nakɛyɛ taa. Piyeba nɛ Tihomir wɛɛ laŋwɛɛkɩyɛ taa siŋŋ alɩwaatʋ natʋyʋ. Pɩsa nɛ ɛ nɛ ɛ-hɔʋ palʋbɩnɩ kaɖɛ nɖɩ lɛ, pamaɣzaɣ ɛzɩma pɩkaɣ wɛʋ sɩɖaa femtu alɩwaatʋ taa yɔ pɩ-yɔɔ. Ɛyɔɔdaa se: «Ðɩyɔɔdʋʋ ɖenɖe ɖɩkaɣ katʋʋ Zdravko yɔ, tɔɔnaɣ ŋga ɖɩkaɣ-ɩ labʋ yɔ, mba ɖɩkaɣ yaʋ se pɔkɔɔ nɛ pɔsɔzɩ ɖɔ-yɔɔ nɛ ɖɩmʋ-ɩ alɩwaatʋ ndʋ pefeziɣ-i yɔ, nɛ kɛdɛzaɣ kɩyakɩŋ yɔɔ tɔm ndʋ ɖɩkaɣ-ɩ kɛdʋʋ yɔ pɩ-tɔm.» Tihomir yɔɔdaa se ɛ nɛ ɛ-hɔʋ pakam pa-lɩmaɣza pe-lidaʋ yɔɔ lɛ, pɩkpazɩ-wɛ ɖoŋ nɛ powolo pɩ-yɔɔ nɛ pɔɖɔkʋʋ pa-laŋa kaɖɛ  nɖɩ ɖɩ-taa nɛ pɛwɛɛ nɛ paɖaŋɩɣ alɩwaatʋ ndʋ Yehowa kaɣ fezuu Zdravko yɔ kpam.

19. Ɛzɩma ŋpɩzɩɣ ŋla nɛ ŋkpazɩ ñe-lidaʋ ɖoŋ? (Cɔnɩ ɖɔɖɔ kɩlɛmʋʋ.)

¹⁹ Ɛzɩma ŋpɩzɩɣ ŋla nɛ ŋkpazɩ ñe-lidaʋ ɖoŋ? Ye ŋwɛnɩ lidaʋ se ŋkaɣ caɣʋ wezuu maatɛŋ tɛtʋ yɔɔ yɔ, kalɩɣ tɔm ndʋ Bibl yɔɔdʋʋ Paradisuu yɔɔ yɔ nɛ ŋmaɣzɩɣ tɩ-yɔɔ. (Iza. 25:8; 32:​16-18) Maɣzɩ ɛzɩma wezuu caɣʋ kaɣ wɛʋ ɛjaɖɛ kɩfaɖɛ taa yɔ pɩ-yɔɔ. Maɣzɩ se ŋwɛ ɛjaɖɛ kɩfaɖɛ nɖɩ ɖɩ-taa. Mba ŋnaɣ? Ɛbɛ taŋ ŋnɩɣ? Ɛzɩma pɩlakɩ-ŋ? Pɩsa nɛ ŋmaɣzɩ nɛ ŋna ɛzɩma Paradisuu kaɣ wɛʋ yɔ lɛ, cɔnɩ Paradisuu kɩlɛmɩŋ weyi ɩwɛ ɖɛ-ɛgbɛyɛ takayɩsɩ taa yɔ, yaa cɔnɩ minziiki tɛ video nakʋyʋ, ɛzɩ Ɛjaɖɛ kɩfaɖɛ nɖɩ ɖɩkaɣ kɔm yɔ, Pɩñɔtɩ kpam, yaa Maɣzɩɣ alɩwaatʋ ndʋ tɩ-yɔɔ mbʋ yɔ. Ye ɖɩkpakɩɣ alɩwaatʋ ɖoŋ ɖoŋ nɛ ɖɩmaɣzɩɣ ɛjaɖɛ kɩfaɖɛ yɔɔ yɔ, ɖa-kʋñɔmɩŋ kaɣ wɛʋ ɖɛ-ɛsɩndaa ɛzɩ mbʋ ‘pɩwɛ alɩwaatʋ pazɩ nɛ pɩtɩpaɣlɩ yɔ.’ (2 Kɔr. 4:17) Lidaʋ ŋgʋ Yehowa ha-ŋ yɔ, kɩkaɣ yebu nɛ ŋkpa ɖoŋ.

20. Halɩ alɩwaatʋ ndʋ pitiki-ɖʋ yɔɔɔ yɔ, ɛbɛ pɩzɩɣ nɛ pɩsɩnɩ-ɖʋ nɛ ɖɩkpa ɖoŋ?

²⁰ Halɩ alɩwaatʋ ndʋ pitiki-ɖʋ yɔɔɔ yɔ, ‘Ɛsɔ kaɣ labʋ nɛ ɖɩkpa ɖoŋ.’ (Keɣ. 108:13) Yehowa tɛmɩ-ŋ haʋ mbʋ pɩpɔzʋʋ-ŋ se pɩsa nɛ ŋkpa ɖoŋ yɔ. Ye mbʋ, alɩwaatʋ ndʋ pɩpɔzʋʋ-ŋ ɖoŋ se ŋla tʋmɩyɛ naɖɩyɛ, yaa ŋɖɔkɩ ña-laŋɩyɛ kaɖɛ naɖɩyɛ taa, yaa ŋwɛɛ taa leleŋ taa yɔ, tɩmnɩ Yehowa siŋŋ nɛ ŋkpɛlɩkɩɣ ña-tɩ yɔɔ. Ye ŋlakɩ mbʋ yɔ, Yehowa kaɣ-ŋ sɩnʋʋ. Tisi nɛ ño-koobiya kpazɩ-ŋ ɖoŋ. Kpakɩɣ alɩwaatʋ ɖoŋ ɖoŋ nɛ ŋmaɣzɩɣ ñe-lidaʋ yɔɔ. Ðɩnɛ ɛlɛ, ŋkaɣ ‘kpaʋ ɖoŋ pɩtɩŋnɩ ɖoŋ kpeekpe yɔɔ ɛzɩ Ɛsɔ ɖoŋ sɔsɔŋ pɔzʋʋ yɔ, se pɩsa nɛ ŋɖɔkɩ ña-laŋɩyɛ nɛ suuɖu nɛ taa leleŋ pɩtɩŋa pɩ-taa.’—Kol. 1:11.